ಭಾರತೀಯ ಚಿತ್ರರಂಗದ ಮೇರು ನಟರ ಸಾಲಿನಲ್ಲಿ ಮುಂಚೂಣಿಯಲ್ಲಿರುವವರು ಕಮಲ್ ಹಾಸನ್. ಸದಾ ಭಿನ್ನವಾದ ಪಾತ್ರಗಳನ್ನೇ ಅರಸುತ್ತಾ ಬಂದಿರುವ ಕಮಲ್, ಇಳಿವಯಸ್ಸಿನಲ್ಲಿಯೂ ಅದೇ ಹಾದಿಯಲ್ಲಿ ಮುಂದುವರೆದಿದ್ದಾರೆ. ಒಂದು ಪ್ರಯೋಗ ನೀರಸ ಪ್ರತಿಕ್ರಿಯೆ ಕಂಡರೂ, ಭಾರೀ ನಿರೀಕ್ಷೆ ತಲೆಕೆಳಗಾದರೂ ಕೂಡಾ ಎಲ್ಲವನ್ನೂ ಸಮಚಿತ್ತದಿಂದ ಸಂಬಾಳಿಸಿಕೊಂಡು ಬಂದಿರೋ ಕಮಲ್, ಇತ್ತೀಚಿನ ವರ್ಷಗಳಲಲಿ ಅದೇಕೋ ಸಿನಿಮಾ ಆಯ್ಕೆ ವಿಚಾರದಲ್ಲಿ ಎಡವುತ್ತಿದ್ದಾರೆ. ಹಾಗಂತ ಖುದ್ದು ಅವರನ್ನು ಆರಾಧಿಸುವ ಅಭಿಮಾನಿಗಳೇ ಅಸಹನೆಗೀಡಾಗಿದ್ದಾರೆ. ಅದರಲ್ಲಿಯೂ ವಿಶೇಷವಾಗಿ, ಕಮಲ್ ಯಾಕೆ ಇಂಡಿಯನ್3ನಂಥಾ ಚಿತ್ರವನ್ನು ಒಪ್ಪಿಕೊಂಡರೆಂಬ ಯಕ್ಷಪ್ರಶ್ನೆಯೊಂದು ಸಿನಿಮಾಸಕ್ತರನ್ನು ಬಿಟ್ಟೂ ಬಿಡದಂತೆ ಕಾಡುತ್ತಿದೆ!
ಆದರೆ, ಕಮಲ್ ಹಾಸನ್ ಮಾತ್ರ ತಮ್ಮ ಬಗ್ಗೆ ಹಬ್ಬಿಕೊಂಡಿರುವ ನಕಾರಾತ್ಮಕ ಅಂಶಗಳತ್ತ ಗಮನ ಹರಿಸುವ ಆಸಾಮಿಯಲ್ಲ. ಬಹುಶಃ ಇತ್ತೀಚಿನ ದಿನಗಳಲ್ಲಿ ಅಭಿಮಾನಿಗಳ ಮನದಿಂಗಿತವನ್ನ ಅರ್ಥ ಮಾಡಿಕೊಂಡು ಮುಂದಡಿ ಇಡುವ ಸೂಕ್ಷ್ಮತೆಯನ್ನು ಕಮಲ್ ಮರೆತಿದ್ದಾರೆ. ಅಂಥಾ ಮನಃಸ್ಥಿತಿ ಇಲ್ಲದೇ ಹೋಗಿದ್ದರೆ ಪರಮ ತೋಪು ಚಿತ್ರವಾದ ಇಂಡಿಯನ್೩ಯ ಸೀಕ್ವೆಲ್ಗೆ ತಯಾರಾಗಲು ಸಾಧ್ಯವಿತ್ತಾ? ಇಂಡಿಯನ್೨ ಚಿತ್ರ ಅತ್ಯಂತ ಹೀನಾಯ ಸೋಲು ಕಂಡಿತ್ತು. ನಿರ್ಮಾಪಕರಂತೂ ಕಮಲ್ ಮತ್ತು ಶಂಕರ್ನನ್ನು ನಂಬಿ ಕೋಟಿ ಕೋಟಿ ಸುರಿದು ಕೈ ಸುಟ್ಟುಕೊಂಡಿದ್ದರು. ಸಾಮಾನ್ಯವಾಗಿ ಹೀಗೆ ತೋಪೆದ್ದ ಚಿತ್ರವೊಂದರ ಸೀಕ್ವೆಲ್ ಮಾಡೋ ದಡ್ಡತನವನ್ನು ಯಾರೂ ಮಾಡೋದಿಲ್ಲ. ಆದರೆ, ಕಳೆದುಕೊಂಡಲ್ಲಿಯೇ ಮರಳಿ ಪಡೆಯಬೇಕೆಂಬ ಜಿದ್ದಿಗೆ ಬಿದ್ದಂತಿದ್ದ ಕಮಲ್ ಮತ್ತು ಶಂಕರ್ ಇಂಡಿಯನ್೩ಗೆ ಅಣಿಗೊಂಡಿದ್ದರು.
ಈ ಪ್ರಾಜೆಕ್ಟು ಬೇಡವೆಂದು ಸಾರಿ ಹೇಳಿದರೂ ಶಂಕರ್ ಆಗಲಿ, ಕಮಲ್ ಆಗಲಿ ಪಟ್ಟು ಬಿಟ್ಟಿರಲಿಲ್ಲ. ಕಡೆಗೂ ನಿಮಾಪಕರು ಕಮಲ್ ಮೇಲಿನ ಗೌರವದಿಂದ ಕೊಂಚ ಮೆತ್ತಗಾಗಿದ್ದರು. ಅದನ್ನೇ ಬಳಸಿಕೊಂಡ ಶಂಕರ್ ಮತ್ತು ಕಮಲ್ ಸೇರಿ ಟ್ರೈಲರ್ ಒಂದನ್ನು ಸಿದ್ಧಪಡಿಸಿದ್ದರು. ಇದು ಇಂಡಿಯನ್೨ಗೆ ಹೋಲಿಸಿದರೆ ಕೊಂಚ ಪರವಾಗಿಲ್ಲವೆನಿಸಿತ್ತು. ಆದರೆ, ಓಟಿಟಿಗೆ ಮಾತ್ರವೇ ಮಾಡೋದಾದರೆ ಮಾತ್ರ ಕಾಸು ಹೂಡೋದಾಗಿ ನಿಮಾಪಕರು ಹೇಳಿದ್ದರಂತೆ. ಶಂಕರ್ಗೆ ಅದು ಸುತಾರಾಂ ಇಷ್ಟವಿರಲಿಲ್ಲ. ಈ ಚಿತ್ರವನ್ನು ತೆರೆಗಾಣಿಸಿ ಕಾಸು ಮಾಡೋ ವಿಶ್ವಾಸ ನಿರ್ಮಾಪಕರಿಗೂ ಇರಲಿಲ್ಲ. ಈ ಕಾರಣದಿಂದಲೇ ಕಡ್ಡಿಮುರಿದಂತೆ ಓಟಿಟಿ ಬಿಟ್ಟು ಬೇರ್ಯಾವ ಸಾಹಸಕ್ಕೂ ಕೈ ಹಾಕಲು ಸಾಧ್ಯವಿಲ್ಲವೆಂದು ನಿರ್ಮಾಪಕರು ಹೇಳಿದ್ದಾರೆ. ಇದರಿಂದ ನಿರಾಸೆಗೀಡಾಗಿರೋ ಶಂಕರ್ ಮುಂದಿನ ಪ್ರಾಜೆಕ್ಟಿಗಾಗಿ ತಡಕಾಡಲಾರಂಭಿಸಿದ್ದಾರೆ!
keywords: kamal hassan, shankar, indian3, kollywood