ಪ್ಯಾನಿಂಡಿಯಾ ಮಟ್ಟದಲ್ಲಿ ದೊಡ್ಡ ಪ್ರಮಾಣದ ಫ್ಯಾನ್ ಬೇಸ್ ಹೊಂದಿರುವ ನಟ (suriya) ಸೂರ್ಯ. ತಮಿಳು ಚಿತ್ರರಂಗದ ಸ್ಟಾರ್ ಆಗಿದ್ದುಕೊಂಡು, ಇತರೇ ಭಾಷೆಗಳ ಪ್ರೇಕ್ಷಕರನ್ನೂ ಸೆಳೆದುಕೊಂಡಿರುವ ಸೂರ್ಯ, ಇತ್ತೀಚಿನ ವರ್ಷಗಳಲ್ಲೇಕೋ ಮಂಕಾದಂತಿದ್ದರು. ಸೂರ್ಯನ ವೃತ್ತಿ ಬದುಕಿನ ಗ್ರಾಫ್ ಅನ್ನೊಮ್ಮೆ ಪರಾಮರ್ಶಿಸಿದರೆ, ಆತ ಅದೆಂಥಾ ನಟ ಎಂಬುದರ ಅರಿವಾಗುತ್ತದೆ. ಕಥೆಯನ್ನು ಆಯ್ಕೆ ಮಾಡಿಕೊಳ್ಳುವ ಕಲೆ, ಹೀರೋಗಿರಿಯನ್ನು ಸಂಭಾಳಿಸಿಕೊಂಡು ಸಾಗುವ ಬಗೆಗಳೆಲ್ಲವೂ ಒಟ್ಟಾರೆ ಯಶಸ್ಸಿನಲ್ಲಿ ಪ್ರಧಾನ ಪಾತ್ರ ವಹಿಸುತ್ತವೆ. ಆ ನಿಟ್ಟಿನಲ್ಲಿ ಸೂರ್ಯನದ್ದು ಅನುಕರಣೀಯ ನಡೆ. ಹಾಗಿದ್ದರೂ ಕೂಡಾ ಈಗೊಂದಷ್ಟು ವರ್ಷಗಳಿಂದ ಆತನನ್ನು ಹಿನ್ನಡೆಯೆಂಬುದು ತಬ್ಬಿಕೊಂಡಂತಿತ್ತು. ಇದೀಗ ಸೂರ್ಯ ಮೈಕೊಡವಿಕೊಂಡು ನಿಂತಂತಿದೆ!
ಕೆಲ ವರ್ಷಗಳಿಂದ ಸಮ್ಮೋಹಕ ಅನ್ನಿಸುವ ಗೆಲುವಿಂದ ದೂರವಿದ್ದರಾದರೂ, ಸೂರ್ಯ ಒಂದಷ್ಟು ಪ್ರಯೋಗಗಳಿಗೆ ಕೈ ಹಚ್ಚಿದ್ದರು. ಆದ ಕಾರತಣ ಬಾಕ್ಸ್ ಆಫೀಸ್ ಹಂಗಾಮದಲ್ಲಿ ಮಿಂದೇಳುವ ಅವಕಾಶವನ್ನು ಅಭಿಮಾನಿ ಬಳಗ ಮಿಸ್ ಮಾಡಿಕೊಂಡಿತ್ತು. ಅದೆಲ್ಲವನ್ನು ದಾಟಿಕೊಂಡು ನಿಂತಿರುವ ಸೂರ್ಯ ಇದೀಗ ಸರಿಕಟ್ಟಾದ ತಂಡಗಳೋಂದಿಗೆ ಕೈ ಜೋಡಿಸಿದ್ದಾರೆ. ಸದ್ಯ ಸೂರ್ಯ ಬಿಗ್ ಬಜೆಟ್ಟಿನ ಕಂಗುವಾ ಎಂಬ ಚಿತ್ರದಲ್ಲಿ ನಟಿಸಿದ್ದಾರೆ. ಅದೇ ಹೊತ್ತಿನಲ್ಲಿ ಸೊರರೈ ಪೋಟ್ರು ನಿರ್ದೇಶಕಿ ಸುಧಾ ಕೋಂಗಾರ ನಿರ್ದೇಶನದ ಚಿತ್ರವನ್ನೂ ಒಪ್ಪಿಕೊಂಡಿದ್ದಾರೆ. ತಮಿಳು ಚಿತ್ರರಂಗದ ಸ್ಟಾರ್ ನಿರ್ದೇಶಕ ವೆಟ್ರಿ ಮಾರನ್ ನಿರ್ದೇಶನದ ಚಿತ್ರಕ್ಕೂ ಗ್ರೀನ್ ಸಿಗ್ನಲ್ ತೋರಿಸಿದ್ದಾರೆ. ಚಂದು ಮೊಂಡೇಟಿ ನಿರ್ದೇಸನದ ಚಿತ್ರದ ಮಾತುಕತೆಗಳೂ ಚಾಲ್ತಿಯಲ್ಲಿವೆ.
ಸೂರ್ಯ ಈ ಹಿಂದೆ ಸೊರೆರೈ ಪೋಟ್ರು ಮತ್ತು ಜೈ ಭೀಮ್ ನಂಥಾ ಸಿನಿಮಾಗಳಲ್ಲಿ ನಟಿಸಿದ್ದರು. ಅವೆರಡೂ ನಿಜಕ್ಕೂ ಅದ್ಭುತ ಸಿನಿಮಾಗಳೇ. ಆದರೆ ಅದೇಕೋ ಅವೆರಡೂ ಸಿನಿಮಾಗಳು ಸಹ ಓಟಿಟಿಯಲ್ಲಿ ಬಿಡುಗಡೆಗೊಂಡಿದ್ದವು. ಆ ನಂತರ ಸೂರ್ಯ ನಟಿಸಿದ್ದ ಚಿತ್ರ ಈಟಿ. ದೊಡ್ಡ ಮಟ್ಟದ ಹೈಪಿನೊಂದಿಗೆ ಬಹುಕಾಲದ ನಂತರ ಸಿನಿಮಾ ಮಂದಿರಗಳಲ್ಲಿ ಆ ಚಿತ್ರ ಬಿಡುಗಡೆಗೊಂಡಿತ್ತು. ಆದರೆ ಈಟಿಗೆ ಸವಾಲುಗಳನ್ನು ದಾಟಿಕೊಳ್ಳುವ ಕಸುವಿರಲೇ ಇಲ್ಲ. ಆ ಚಿತ್ರ ಸೂರ್ಯ ವೃತ್ತಿ ಬದುಕಿನ ಬಹುದೊಡ್ಡ ಸೋಲಾಗಿ ದಾಖಲಾಗಿತ್ತು. ಇದೀಗ ಅಂಥಾ ಸೋಲನ್ನೆಲ್ಲ ಜಯಿಸಿಕೊಳ್ಳುವ ಹುರುಪಿನೊಂದಿಗೆ ಸೂರ್ಯ ಅಖಾಡಕ್ಕಿಳಿದಂತಿದೆ. ಆ ಆವೇಗವನ್ನು ಗಮನಿಸಿದರೆ, ಮುಂದಿನ ದಿನಗಳಲ್ಲಿ ಸೂರ್ಯಾಭಿಮಾನಿಗಳಿಗೆ ಹಬ್ಬವಾಗೋದು ಗ್ಯಾರೆಂಟಿ!
