ಈ ಕ್ಷಣಕ್ಕೆ ಡೆವಿಲ್ ಟ್ರೈಲರ್ ನಾಗಾಲೋಟದಲ್ಲಿ ಮುನ್ನುಗ್ಗುತ್ತಿರೋದು ನಿಜ. ಟ್ರೆಂಡಿಗ್ ವಿಚಾರದಲ್ಲಿಯೂ ಡೆವಿಲ್ ಮುಂಚೂಣಿಯಲ್ಲಿದೆ ಅನ್ನೋದರಲ್ಲಿಯೂ ಅನುಮಾನಗಳಿಲ್ಲ. ನಿರ್ದೇಶಕ ಮಿಲನಾ ಪ್ರಕಾಶ್ ಅತ್ಯಂತ ನಾಜೂಕಿನಿಂದಲೇ ಈ ಟ್ರೈಲರ್ ಅನ್ನು ರೂಪಿಸಿದ್ದಾರೆ. ಒಟ್ಟಾರೆ ಕಥನದ ಬಗ್ಗೆ ನಿಖರವಾದ ಸುಳಿವು ಬಿಟ್ಟು ಕೊಡದಂತೆ ಸದರಿ ಟ್ರೈಲರ್ ಅನ್ನು ಕಟ್ಟಿ ಕೊಡಲಾಗಿದೆ. ಅದು ಈ ಕ್ಷಣಕ್ಕೆ ನಿರ್ದೇಶಕರ ಜಾಣ್ಮೆಯಂತೆ ಕಾಣಿಸುತ್ತಿದೆ. ಆದರೆ, ದರ್ಶನ್ ಬಳಗದ ಹೊರತಾಗಿ ಎಲ್ಲ ಸಿನಿಮಾಗಳನ್ನೂ ನೋಡಿ ಪ್ರೋತ್ಸಾಹಿಸೋ ಅಪ್ಪಟ ಸಿನಿಮಾ ಪ್ರೇಮಿಗಳ ಬಳಗವಿದೆಯಲ್ಲಾ? ಆ ವಲಯದಲ್ಲಿ ಡೆವಿಲ್ ಟ್ರೈಲರ್ ಬಗ್ಗೆ ಎಂಥಾ ಚರ್ಚೆಗಳು ನಡೆಯುತ್ತಿವೆ? ಅಲ್ಲಿ ಸಹಜವಾಗಿ ಕುತೂಹಲ ಮೂಡಿಕೊಂಡಿದೆಯಾ? ಇಂಥಾ ಪ್ರಶ್ನೆಗಳಿಗೆ ಉತ್ತರವಾಗಿ ನಿಲ್ಲೋದು ಮಿಶ್ರ ವಾತಾವರಣ!

ಡೆವಿಲ್ ಬಗ್ಗೆ ಆರಂಭದಿಂದಲೂ ದೊಡ್ಡ ಮಟ್ಟದಲ್ಲಿಯೇ ನಿರೀಕ್ಷೆಗಳಿದ್ದವು. ಕಾಟೇರದಂಥಾ ದೊಡ್ಡ ಯಶದ ನಂತರ ಫಾರ್ಮಿಗೆ ಮರಳಿದಂತಿದ್ದ ದರ್ಶನ್ ಮಿಲನಾ ಪ್ರಕಾಶ್ ಜೊತೆ ಸೇರಿದ ಸುದ್ದಿ ಬಂದಾಕ್ಷಣವೇ ಕುತೂಹಲ ಮೂಡಿಕೊಂಡಿತ್ತು. ನಂತರ ಹೊರ ಬಂದ ಫಸ್ಟ್ ಲುಕ್ ನೋಡಿಯೇ ಅಭಿಮಾನದಾಚೆಗೂ ಸಂಚಲನ ಸೃಷ್ಟಿಯಾಗಿತ್ತು. ಆ ಬಳಿಕ ದರ್ಶನ್ ಮಣ್ಣು ತಿನ್ನೋ ಕೆಲಸ ಮಾಡಿ ಜೈಲು ಪಾಲಾದ ನಂತರವೂ ಡೆವಿಲ್ ಹವಾ ತಗ್ಗಿರಲಿಲ್ಲ. ಹಾಗೆ ದಾಸ ಜೈಲುಪಾಲಾಗುತ್ತಲೇ ಆತನ ಅಭಿಮಾನಿ ಬಳಗದಲ್ಲಿ ಡೆವಿಲ್ ಮೂಲಕ ಸಾರಥಿ ಇತಿಹಾಸ ಮತ್ತೊಮ್ಮೆ ಸೃಷ್ಟಿಯಾಗುವ ಭ್ರಮೆ ಕವುಚಿಕೊಂಡಿತ್ತು. ಆ ನಂತರದಲ್ಲಿ ದಿನೇ ದಿನೆ ದರ್ಶನ್ ಕೊರಳಿಗೆ ಕಾನೂನಿನ ಉರುಳು ಬಿಗಿಯಾಗುತ್ತಲೇ ಬರುತ್ತಿದೆ. ಈ ಹಂತದಲ್ಲಿ ಡೆವಿಲ್ ಬಿಡುಗಡೆ ದಿನಾಂಕ ಘೋಷಣೆಯಾಗಿ ಟ್ರೈಲರ್ ಕೂಡಾ ಧೂಳೆಬ್ಬಿಸುತ್ತಿದೆ.

Darshan Devil Movie: ಅವಿವೇಕಿ ಸೆಲೆಬ್ರಿಟೀಸ್ ಅದನ್ನೇ ಸಂಭ್ರಮಿಸಿದ್ದರು!

ಆದರೆ, ಡೆವಿಲ್ ಟ್ರೈಲರಿನಲ್ಲಿ ನಿರೀಕ್ಷೆಗೆ ತಕ್ಕಂಥಾ ದೃಷ್ಯಗಳ ಸುಳಿವಿಲ್ಲ. ದರ್ಶನ್ ಗೆಟಪ್ಪು ಬದಲಾದರೂ ಕೂಡಾ ದೃಷ್ಯಗಳಲ್ಲಿ ಮತ್ತೇನೋ ಹೊಸತನ ಇದ್ದಿರಬಹುದೆಂಬ ನಿರೀಕ್ಷೆ ಮೂಡಿಸುವ ಸಮ್ಮೋಹಕ ಗುಣಗಳೂ ಕಾಣಿಸುತ್ತಿಲ್ಲ. ಡೆವಿಲ್ ಚಿತ್ರೀಕರಣದ ಹೊತ್ತಿಗೆಲ್ಲ ಸುಬ್ಬಿಯ ಪ್ರೀತಿಯ ಸುಬ್ಬನ ಮೋರೆ ಬಾತುಕೊಂಡಿತ್ತು. ಡೆವಿಲ್ ಬಹುಭಾಗ ಅಂಥಾ ಬಾತುಮೋರೆಯಿಂದಲೇ ತುಂಬಿಕೊಂಡಿರೋದರಲ್ಲಿ ಯಾವ ಸಂದೇಹವೂ ಇಲ್ಲ. ಇಂಥಾ ಸ್ಥಿತಿಯಲ್ಲಿ ನಿರ್ದೇಶಕ ಮಿಲನಾ ಪ್ರಕಾಶ್ ಕೂಡಾ ಚಿತ್ರೀಕರಣದ ಹಂತದಲ್ಲಿ ಸಹಜವಾಗಿಯೇ ಒತ್ತಡ ಅನುಭಿಸುವಂತಾಗಿರಬಹುದು. ಈ ಎಲ್ಲ ಬಗೆಯಲ್ಲಿ ನಿಂತು ದಿಟ್ಟಿಸಿದರೆ, ಟ್ರೈಲರ್ ಮೂಡಿ ಬಂದಿರೋ ರೀತಿ ಗಮನಿಸಿದರೆ ಡೆವಿಲ್ ಮತ್ತೊಂದು ಮಟ್ಟದಲ್ಲಿ ಮೂಡಿ ಬರುತ್ತದೆಂಬ ನಿರೀಕ್ಷೆ ಹುಸಿಯಾಗೋ ಸಂದರ್ಭವೇ ಹೆಚ್ಚಾಗಿರುವಂತಿದೆ. ಡೆವಿಲ್ ಅಸಲೀ ಸ್ವರೂಪ ಇನ್ನೇನು ದಿನದೊಪ್ಪತ್ತಿನಲ್ಲಿಯೇ ಜಾಹೀರಾಗಲಿದೆ!

keywords: challenging star, darshan, dboss, devil movie, devil craze, milana prakash, rachana rai

The post Darshan Devil Movie no1trailer : ಡೆವಿಲ್ ಟ್ರೈಲರ್‌ನಲ್ಲಿ ಮಿಶ್ರ ಛಾಯೆ! appeared first on Cini Shodha.

ದೆವಿಲ್ ಸಿನಿಮಾಕ್ಕಾಗಿ ಇಂಥಾ ಪಟಾಲಮ್ಮಿಗೆ ಸೇರಿಕೊಂಡಿದ್ದ ನಿರ್ದೇಶಕ ಮಿಲನಾ ಪ್ರಕಾಶ್ ಕೂಡಾ ಸೂಕ್ಷ್ಮವಂತಿಕೆ ಕಳೆದುಕೊಂಡರಾ? ನವಿರು ಭಾವದ ರಾಯಭಾರಿಯಂತೆ ದೃಷ್ಯ ಕಟ್ಟಿ ಗೆದ್ದಿದ್ದ ಪ್ರಕಾಶ್ ಕೂಡಾ ಡೆವಿಲ್ ಅಡ್ಡೆಯಲ್ಲಿ ನಿಂತು ಬದಲಾಗಿ ಬಿಟ್ಟರಾ? ತಿಂಗಳ ಹಿಂದೆ ಇದ್ರೆ ನೆಮ್ದಿಯಾಗಿರ್ಬೇಕ್ ಅಂತೊಂದು ಡೆವಿಲ್ ಚಿತ್ರದ ಹಾಡು ಹೊರಬಂದಾಗಲೇ ಅನೇಕರನ್ನು ಇಂಥಾ ಹತ್ತಾರು ಪ್ರಶ್ನೆಗಳು ಕಾಡಿದ್ದವು. ಇದೀಗ ದರ್ಶನ್ ಅನುಪಸ್ಥಿತಿಯಲ್ಲಿ ನಡೆದಿರುವ ಡೆವಿಲ್ ಪತ್ರಿಕಾಗೋಷ್ಠಿಯಲ್ಲಿಯೂ ಈ ಹಾಡಿನ ಕುರಿತಾದೊಂದು ಪ್ರಶ್ನೆ ಪ್ರಕಾಶ್ ಅವರನ್ನು ಎದುರುಗೊಂಡಿದೆ. ಇದಕ್ಕೆ ಅತ್ಯಂತ ಸಮಚಿತ್ತದಿಂದ ಉತ್ತರಿಸಿರುವ ಪ್ರಕಾಶ್, ತೀರಾ ಇತ್ತೀಚಿಬನವರೆಗೂ ಆ ಹಾಡಿನ ಹಿನ್ನೆಲೆಯಲ್ಲಿರುವ ಕಥೆಯೇ ತನಗೆ ಗೊತ್ತಿರಲಿಲ್ಲ ಎಂದಿದ್ದಾರೆ. ಆ ಹಾಡು ರಚನೆಯಾದಾಗ, ಅದಕ್ಕೆ ಅಜನೀಶ್ ಸಂಗೀತ ಸಂಯೋಜನೆ ಮಾಡಿದಾಗ ಇಷ್ಟವಾಗಿ ಒಪ್ಪಿಕೊಂಡಿದ್ದಾಗಿ ಹೇಳಿಕೊಂಡಿದ್ದಾರೆ.

ಮಿಲನಾ ಪ್ರಕಾಶ್ ಒಂಥರಾ ಮೂಡಿ ಮನುಷ್ಯ. ಒಂದಷ್ಟು ಕಾಲ ಎಲ್ಲಿಯೋ ಕಳೆದು ಹೋಗಿ, ಮತ್ಯಾವಾಗಲೋ ಧುತ್ತನೆದುರಾಗುವಂಥಾ ಅವಧೂತ ಪ್ರಜ್ಞೆಯ ಮೂಲಕ ಆತ ಭಿನ್ನವಾಗಿ ಕಾಣಿಸುತ್ತಾರೆ. ಅಂಥಾ ಪ್ರಕಾಶ ಹಿನ್ನೆಲೆ ಗೊತ್ತಿದ್ದಿದ್ದರೆ ಈ ಹಾಡನ್ನು ಒಪ್ಪಿಕೊಳ್ಳುತ್ತಿರಲಿಲ್ಲವೇನೋ. ಈ ವಿಚಾರದಲ್ಲಿ ಅವರು ಕೊಟ್ಟಿರೋ ಸಮಜಾಯಿಷಿಯನ್ನು ನಂಬಲಡ್ಡಿಯಿಲ್ಲ. ಆದರೆ, ದರ್ಶನ್ ಸುತ್ತಾ ಪಿತಗುಡುತ್ತಿರುವ ಕೆಲ ಮಂದಿಗಾದರೂ ಇದ್ರೆ ನೆಮ್ದಿಯಾಗಿರ್ಬೇಕ್ ಎಂಬ ದರ್ಶನ್ ಡೈಲಾಗಿನ ಹಿನ್ನೆಲೆ ಗೊತ್ತಿರದಿರಲು ಸಾಧ್ಯವೇ? ದರ್ಶನ್ ಬದುಕೇ ಹಡಾಲೆದ್ದಿರುವ ಈ ಘಳಿಗೆಯಲ್ಲಿ, ಆತ ತನ್ನ ಹೆಂಡತಿ ವಿಜಲಕ್ಷ್ಮಿಗೆ ಒಂದು ಕಾಲದಲ್ಲಿ ಬೈದಿದ್ದ ಬೈಗುಳದ ಸಾಲೇ ಹಾಡಾಗೋದು ಬೇಡ ಅಂತ ಯಾರಿಗಾದರೂ ಅನ್ನಿಬೇಕಿತ್ತಲ್ಲಾ? ಯಾರಿಗೂ ಅನ್ನಿಸಿಲ್ಲವೆಂದರೆ, ದರ್ಶನ್ ಸುತ್ತ ಈ ಕ್ಷಣಕ್ಕೂ ಮನುಷ್ಯಮಾತ್ರರು ಇಲ್ಲವೆಂದೇ ಅರ್ಥ!

ಇನ್ನು ದರ್ಶನ್ ಮೈಸವರಿ ಸಾಕಿಕೊಂಡಿರುವ ಅಭಿಮಾನಿಗಳ ವಿಚಾರ. ಈವತ್ತಿಗೂ ದರ್ಶನ್ ಮಾಡಿರೋದು ಸರಿಯಿಲ್ಲವೆಂಬುದೂ ಸೇರಿದಂತೆ, ಆತನ ಠೇಂಕಾರಗಳ ಬಗ್ಗೆ ತಕರಾರಿಟ್ಟುಕೊಂಡಿರುವ ಅಭಿಮಾನಿ ವರ್ಗವಿದೆ. ಅಂಥವರ ಅಭಿಪ್ರಾಯದ ಎದೆ ಮೇಲೆ ಸವಾರಿ ನಡೆಸುತ್ತಿರೋದು ಪಕ್ಕಾ ಅಯೋಗ್ಯದ ದಂಡು. ದರ್ಶನ್ ಪರ ಅಂಧಾಭಿಮಾನ ಹೊಮ್ಮಿಸುತ್ತಲೇ, ಕಾನೂನು ಕುಣಿಕೆ ಮತ್ತಷ್ಟು ಬಿಗಿಯಾಗಿಸುವಲ್ಲಿಯೂ ಈ ಅಯೋಗ್ಯರ ಪಾಲಿದ್ದೇ ಇದೆ. ಒಂದು ವೇಳೆ ಇವರೆಲ್ಲರ ಜಾಗದಲ್ಲಿ ತಲೆ ನೆಟ್ಟಗಿರುವವರಿದ್ದಿದ್ದರೆ ಇಂಥಾ ಹಾಡಿನ ಬಗ್ಗೆ ವಿಮರ್ಶೆ ಮಾಡುತ್ತಿದ್ದರು. ಇದು ಬೇಡವಾಗಿತ್ತೆಂಬಂಥಾ ಮಾತುಗಳನ್ನಾದರೂ ಆಡುತ್ತಿದ್ದರು. ವಿಜಯಲಕ್ಷ್ಮಿಯನ್ನು ಅತ್ತಿಗೆ ಅಂತಲೇ ಕರೆಯೋ ಈ ಮಂದಿಗೆ, ಅದೇ ಹೆಣ್ಣುಮಗಳಿಗೆ ಬೈದಿದ್ದ ಬೈಗುಳದ ಹಿಂಚುಮುಂಚಿನ ಸಾಲೊಂದು ಹಾಡಾದಾಗ ಅಸಹ್ಯ ಅನ್ನಿಸಲೇ ಇಲ್ಲ. ಅದು ಅವರ ಮನಃಸ್ಥಿತಿಗೆ ಹಿಡಿದ ಕನ್ನಡಿಯೂ ಹೌದು. ಕಾನೂನು ಪ್ರಕಾರ ಮುಂದೇನಾಗುತ್ತದೋ ಗೊತ್ತಿಲ್ಲ. ಒಂದು ವೇಳೆ ದರ್ಶನ್ ಈ ಕೇಸಿನಿಂದ ಹೊರ ಬರುವ ಅವಕಾಶ ಸಿಕ್ಕರೆ, ಆತ ಕೂಡಲೆ ತನ್ನ ಸುತ್ತಲಿರೋ ಬಳಗವನ್ನು ಫಿಲ್ಟರ್ ಮಾಡಿಕೊಳ್ಳುವತ್ತ ಗಮನ ಹರಿಸಬೇಕಿದೆ. ಸೋ ಕಾಲ್ಡ್ ಸೆಲೆಬ್ರಿಟಿಗಳನ್ನು ಹದ್ದುಬಸ್ತಲಿಲಿಡಬೇಕಿದೆ. ಇಲ್ಲದೇ ಹೋದರೆ ಆತ ಮತ್ತೊಮ್ಮೆ ಜೈಲುಪಾಲಾಗಿ ನೆಮ್ಮದಿ ಕಳಕೊಳ್ಳೋದು ಶತಃಸ್ಸಿದ್ಧ!

The post Darshan Devil Movie: ಅವಿವೇಕಿ ಸೆಲೆಬ್ರಿಟೀಸ್ ಅದನ್ನೇ ಸಂಭ್ರಮಿಸಿದ್ದರು! appeared first on Cini Shodha.

ದರ್ಶನ್ ತಲುಪಿಕೊಂಡಿರುವ ಈ ಸ್ಥಿತಿ ಕಂಡರೆ ಒಂದು ಕಾಲದಲ್ಲಿ ಆತನ ಆವುಟಗಳನ್ನು ಕಂಡು ರೋಸತ್ತಿದ್ದವರಲ್ಲೂ ಮರುಕ ಹುಟ್ಟೋದು ಸುಳ್ಳಲ್ಲ. ಆದರೆ, ಅದರ ಹಿಂದೆ ಆತನ ಸ್ವಯಂಕೃತಾಪರಾಧಗಳಿದ್ದಾವೆ. ಅಭಿಮಾನಿಗಳೆನ್ನಿಸಿಕೊಂಡವರ ಸ್ವೇಚ್ಛೆಯ ವರ್ತನೆಗಳ ಪಾಲೂ ಯಥೇಚ್ಚವಾಗಿದೆ. ಜೈಲುವಾಸದ ಮೊದಲ ಅವಧಿಯನ್ನು ಒಂದಷ್ಟು ನಿರಾಳವಾಗಿ ಕಳೆದಿದ್ದ ದರ್ಶನ್‌ಗೆ ಎರಡನೇ ಅವಧಿಯಲ್ಲಿ ಅಕ್ಷರಶಃ ನರಕದರ್ಶನವಾಗುತ್ತಿದೆ. ಕೋಟಿ ಕಮಾಯಿಸಿದ ಅಧಿಕಾರಿಗಳು ತಮ್ಮದೇ ಜಗತ್ತಿನಲ್ಲಿ ಬೆಚ್ಚಗಿದ್ದಾರೆ. ಜೈಲಾಧಿಕಾರಿ ಸುರೇಶ ದರ್ಶನ್ ವಿಚಾರದಲ್ಲಿ ಆಟ ಕಟ್ಟಲು ಹಿಂದೇಟು ಹಾಕುತ್ತಿದ್ದಾನೆ. ತಲೆಮಾಸಿದ ರೌಡಿಗಳು ಜೈಲೊಳಗೇ ಬರ್ತ್‌ಡೇ ಪಾರ್ಟಿ ಆಚರಿಸುತ್ತಿದ್ದರೂ ದರ್ಶನ್‌ಗೆ ಹೆಚ್ಚುವರಿ ಸೌಕರ್ಯ ಒದಗಿಸಲು ಜೈಲೊಳಗಿನ ಖೂಳುಬಾಕರು ಹೆದರುತ್ತಿದ್ದಾರೆ.

ಎಲ್ಲರ ಫೋಕಸ್ಸು ದರ್ಶನ್ ಮೇಲಿರೋದರಿಂದ ಕೊಂಚ ಯಾಮಾರಿದರೆ ಯಡವಟ್ಟಾದೀತೆಂಬ ಭಯವೇ ಅದಕ್ಕೆ ಕಾರಣ. ಈ ಸಂಬಂಧವಾಗಿ ದರ್ಶನ್ ಪರ ವಕೀಲರು ಕೋರ್ಟ್ ಮೊರೆ ಹೋಗಿದ್ದಾರೆ. ಇದೀಗ ಆ ವಿಚಾರಣೆಯೂ ಮುಂದೂಡಲ್ಪಟ್ಟಿದೆ. ಅಲ್ಲಿಗೆ ಒಂದು ತಲೆದಿಂಬೂ ಕೂಡಾ ದರ್ಶನ್‌ಗೆ ಸದ್ಯದ ಮಟ್ಟಿಗೆ ಮರೀಚಿಕೆಯಾಗಿದೆ. ಅಲ್ಲೇ ಮತ್ತೊಂದು ಮಗ್ಗುಲಿನ ಸೆಲ್ಲಿನಲ್ಲಿರುವ ಮಾಯಾಂಗನೆ ಪವಿತ್ರಾ ದರ್ಶನ್ ಕಥೆ ಹೇಗಾದರೂ ತಾನು ಬಚಾವ ಆದರೆ ಸಾಕೆಂಬಂತೆ ಲಾಯರ್‌ಗಳ ಮೂಲಕ ಶತ ಪ್ರಯತ್ನ ನಡೆಸುತ್ತಿದ್ದಾಳೆ. ಈ ನಡುವೆ ದಿನೇ ದಿನೆ ದಾಸನಿಗೆ ಕಾನೂನಿನ ಉರುಳು ಬಿಗಿಯಾಗುತ್ತಿರುವ ಭಯವೂ ಕಾಡುತ್ತಿದೆ. ಈ ಕ್ಷಣದಲ್ಲಿ ಆತನ ಪರವಾಗಿ ಅಚಲವಾಗಿ ಹೋರಾಟ ನಡೆಸುತ್ತಿರೋದು ವಿಜಯಲಕ್ಷ್ಮಿ ಮಾತ್ರ. ಇದ್ರೆ ನೆಮ್ದಿಯಾಗಿರ್ಬೇಕ್ ಅಂತಗ ಅಬ್ಬರಿಸಿದ್ದ ದಾಸನ ಸ್ಥಿತಿ ನಿಜಕ್ಕೂ ಮರುಕ ಮೂಡಿಸುವಂತಾಗಿದೆ… ಆದರೆ ಆತನಿರೋದು ತಪ್ಪಿನ ಅರಿವು ಮೂಡಿಸುವ ಜೈಲಿನಲ್ಲಿ; ಬೇಕೆಂದ ಸೌಕರ್ಯಗಳು ಸಲೀಸಾಗಿ ದಕ್ಕಲು ಅದೇನು ಕ್ಯಾರವಾನ್ ಅಲ್ಲ ಅನ್ನೋದು ಅರಗಿಸಿಕೊಳ್ಳಲೇಬೇಕಾದ ವಾಸ್ತವ!

The post Challenging Star Darshan: ಅದು ಕ್ಯಾರವಾನ್ ಅಲ್ಲ ಪರಪ್ಪನ ಅಗ್ರಹಾರ! appeared first on Cini Shodha.

ಸದ್ಯದ ಮಟ್ಟಿಗೆ ದರ್ಶನ್ ಪಾಲಿಗೆ ಅಂಥಾ ಆಘಾತಗಳು ಒಂದರ ಹಿಂದೊಂದರಂತೆ ಬಂದೆರಗುತ್ತಿವೆ. ಮೊದಲ ಹಂತದಲ್ಲಿ ಜೈಲನ್ನೂ ಕೂಡಾ ಮಾವನ ಮನೆಯನ್ನಾಗಿಸಿಕೊಂಡಿದ್ದಾತ ದರ್ಶನ್. ಹೇಳಿಕೇಳಿ ಪರಪ್ಪನ ಅಗ್ರಹಾರದಲ್ಲಿ ಅಧಿಕಾರಿಗಳ ನೆರಳಲ್ಲಿಯೇ ದಂಧೆಗಳ ದುಖಾನು ತೆರೆದುಕೊಂಡಿದೆ. ಅಲ್ಲಿ ನೇರಾನೇರ ವ್ಯವಹಾರ ಕುದುರಿಸಿ ಹಾಯಾಗಿ ಅಡ್ಡಾಡಿಕೊಂಡಿದ್ದಾತ ದರ್ಶನ್. ಅತ್ತ ಪಕ್ಕದ ಸೆಲ್ಲಿನಲ್ಲಿಯೇ ಬೆಂಗಳೂರಿನ ನಟೋರಿಯಸ್ ರೌಡಿ ವಿಲ್ಸನ್ ಗಾರ್ಡನ್ ನಾಗ ಇದ್ದ. ಇತ್ತ ತನ್ನ ಗೆಣೆಕಾರ ದರ್ಶನ್ನನ ಪರಿಚಾರಿಕೆಗೆಂದೇ ಸೈಕಲ್ ರವಿ ಬೇಕರಿ ರಘು ಎಂಬೋ ರೌಡಿ ಎಲಿಮೆಂಟನ್ನು ಅಂದರ್ ಮಾಡಿದ್ದ. ಇವರೆಲ್ಲದ ದೇಖಾರೇಖಿಯಲ್ಲಿಮ ಒಂದು ಹಂತದ ವರೆಗೂ ದರ್ಶನ್ ಪಾಲಿಗೆ ಜೈಲೆಂಬುದೂ ಸ್ವರ್ಗವಾಗಿತ್ತು.

ಅದು ದರ್ಶನ್ ಮಾಡಿದ ಬಹು ದೊಡ್ಡ ತಪ್ಪು. ತನ್ನ ಕಡೆಯಿಂದ ಎಡವಟ್ಟಾಗಿದೆ. ಅದಕ್ಕಾಗಿ ಕಾನೂನಿನ ಏಟು ಬಿದ್ದಿದೆ. ಈ ಹಂ ತದಲ್ಲಿ ಶಿಕ್ಷೆಯ ಅವಧಿಯನ್ನು ಪ್ರಾಮಾಣಿಕವಾಗಿ ಎದುರಿಸಬೇಕೆಂಬ ಸಣ್ಣ ಖಬರೂ ಕೂಡಾ ದಾಸನ ಸನಿಹ ಸುಳಿದಿರಲಿಲ್ಲ. ಇಂಥಾ ಸ್ವೇಚ್ಛೆಯೇ ದೇಶವ್ಯಾಪಿ ಸುದ್ದಿಯಾಗಿ, ಬೇರೆ ಜೈಲಿಗೆ ಕಮಾನೆತ್ತಿಸಿಕೊಂಡಿದ್ದ ದರ್ಶನ್, ಬೇಲ್ ಪಡೆದು ಹೊರ ಬಂ ದ ನಂತರವೂ ಕೂಡಾ ಸೂಕ್ಷ್ಮವಾಗಿ ನಡೆದುಕೊಂಡಿರಲಿಲ್ಲ. ಇದೇ ಹೊತ್ತಿನಲ್ಲಿ ಅಭಿಮಾನಿಗಳೆನ್ನಿಸಿಕೊಂಡ ಕೆಲ ಅವಿವೇಕಿಗಳು ಅಕ್ಷರಶಃ ಗೂಂಡಾಗಳಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಮೆರೆಯಲಾರಂಭಿಸಿದ್ದರು. ದರ್ಶನ್ ಬೇಲ್ ಕ್ಯಾನ್ಸಲ್ ಆಗಿ ಮತ್ತೆ ಜೈಲಿಗೆ ಗದುಮಿಸಿಕೊಂಡಿದ್ದರ ಹಿಂದಿರೋದು ಇಂಥಾ ಸ್ವಯಂಕೃತಾಪರಾಧಗಳೇ.

ಈಗಂತೂ ಪರಪ್ಪನ ಅಗ್ರಹಾರದೊಳಗೆ ಎಲ್ಲವೂ ಬಿಗಿಯಾಗಿದೆ. ಅಲ್ಲಿ ಜೈಲಾಧಿಕಾರಿಯಾಗಿರೋ ಸುರೇಶನ ದುಂಡಾವರ್ತನೆಗಳ ಬಗ್ಗೆ `ಸಿನಿಶೋಧ’ ತನಿಖಾ ವರದಿಯೊಂದನ್ನು ಪ್ರಕಟಿಸಿತ್ತು. ಅದಾದ ನಂತರ ದಯಾನಂದ್ ಜೈಲಾಧಿಕಾರಿಗಳ ನಟ್ಟು ಬೋಲ್ಟು ಟೈಟ್ ಮಾಡಿದ್ದಾರೆ. ಮಾಲಿನಿ ಮೇಡಮ್ಮಿನ ಪರಿಚಾರಕರೆಲ್ಲ ಬಾಲ ಮುದುರಿಕೊಂಡಿದ್ದಾರೆ. ಇದೆಲ್ಲದರ ನಡುವೆಯೇ ರೇಣುಕಾಸ್ವಾಮಿ ಕೊಲೆ ಕೇಸು ಇಡೀ ದೇಶದಲ್ಲೇ ಎರಡನೇ ಭಯಾನಕ ಪ್ರಕರಣವಾಗಿ ದಾಖಲಾಗಿದೆ. ನರ್ಸಿಂಗ್ ವಿದ್ಯಾರ್ಥಿನಿಯ ಭೀಕರ ರೇಪ್ ಮತ್ತು ಹತ್ಯೆ ಕೇಸು ಮೊದಲ ಸ್ಥಾನದಲ್ಲಿದೆ. ಈ ಮೂಲಕ ರೇಣುಕಾಸ್ವಾಮಿ ಕೊಲೆ ಪ್ರಕರಣದ ಬಗ್ಗೆ ರಾಷ್ಟ್ರೀಯ ಮಾಧ್ಯಮಗಳೂ ಕೂಡಾ ಮತ್ತೊಮ್ಮೆ ಫೋಕಸ್ ಮಾಡಿವೆ.

ಇನ್ನುಳಿದಂತೆ ರೇಣುಕಾಸ್ವಾಮಿಯನ್ನು ಚಿತ್ರಹಿಂಸೆ ಕೊಟ್ಟು ಕೊಂದ ಪರಿಯ ಬಗ್ಗೆ ನ್ಯಾಯಾಂಗ ವಲಯದಲ್ಲಿ ನಾನಾ ವಿಶ್ಲೇಷಣೆಗಳು ಕೇಳಿ ಬರುತ್ತಿವೆ. ಅದರಲ್ಲಿನ ಬಹುತೇಕ ಅಂಶಗಳು ದರ್ಶನ್ ಕೊರಳಿಗೆ ಕಾನೂನಿನ ಕುಣಿಕೆ ಬಿಗಿಯಾಗುತ್ತಿರೋದನ್ನೇ ಬಲವಾಗಿ ಧ್ವನಿಸುತ್ತಿವೆ. ನ್ಯಾಯಾಂಗ ಈ ಪ್ರಕರಣದಲ್ಲಿ ಪ್ರಧಾನವಾಗಿ ಪರಿಗಣಿಸಬಹುದಾದ ಅಂಶಗಳೇ ಭಯಾನಕವಾಗಿವೆ. ಓರ್ವ ಮನುಷ್ಯನನ್ನು ಹೇಗೆಲ್ಲ ಹಿಂಸಿಸಬಾರದೋ, ಹಾಗೆಲ್ಲ ಚಿತ್ರ ಹಿಂಸೆ ಕೊಟ್ಟು ಕೊಲ್ಲಲಾಗಿದೆ ಎಂಬ ವಿಚಾರವೇ ಇಲ್ಲಿ ಪ್ರಧಾನವಾಗಿ ಪರಿಗಣಿಸಲ್ಪಡುವ ಸಾಧ್ಯತೆಗಳು ದಟ್ಟವಾಗಿವೆ. ಬಹುಶಃ ತನ್ನ ಶಿಷ್ಯನ ಸ್ಟೋನಿಬ್ರೂಕ್ಸ್ ಡ್ರಗ್ಸ್ ನಶೆ ಇಂಥಾ ಅನಾಹುತ ಸೃಷ್ಟಿಸುತ್ತದೆಂಬ ಸಣ್ಣ ಕಲ್ಪನೆಯೂ ದರ್ಶನ್‌ಗಿದ್ದಂತಿಲ್ಲ. ಸದ್ಯದ ಮಟ್ಟಿಗೆ ಮಾಡಿದ ಎಡವಟ್ಟನ್ನು ಕೋಟಿ ಸುರಿದರೂ ನೀಗಿಕೊಳ್ಳಲಾರದ ವಾಸ್ತವವೊಂದು ದರ್ಶನ್ ನಲುಗುವಂತೆ ಮಾಡಿದೆ. ಕಣ್ಣೆದುರೇ ನರಳಿ ಸತ್ತ ರೇಣುಕಾಸ್ವಾಮಿ ಕಂಬಿ ಹಿಂದಿರೋ ದಾಸನನ್ನು ಕ್ಷಣ ಕ್ಷಣವೂ ಕಂಗಾಲಾಗಿಸುತ್ತಿದ್ದಾನೆ. ಅದೆಲ್ಲದರ ಅಂತಿಮ ಫಲಿತಾಂಶ ಶೀಘ್ರದಲ್ಲಿಯೇ ಜಾಹೀರಾಗಲಿದೆ!

The post Challenjing Star Darshan: ಕಂಬಿ ಹಿಂದೆ ಕಾಡುತ್ತಿದ್ದಾನೆ ರೇಣುಕಾಸ್ವಾಮಿ! appeared first on Cini Shodha.

ಬೇಲ್ ಸಿಗಲೂ ಕೂಡಾ ದರ್ಶನ್‌ಗೆ ಅಡಿಗಡಿಗೆ ಕಂಟಕಗಳು ಎದುರಾಗಿದ್ದವು. ಯಾರೂ ಊಹಿಸಿರದಂತೆ ದರ್ಶನ್ ತಿಂಗಳುಗಟ್ಟಲೆ ಜೈಲಲ್ಲಿ ಕೊಳೆಯುವಂತಾಗಿತ್ತು. ಅಲ್ಲಿ ತೆಪ್ಪಗಿದ್ದಿದ್ದರೆ ಒಂದಷ್ಟು ಬೇಗ ಬಿಡುಗಡೆಯ ಭಾಗ್ಯ ಸಿಗುತ್ತಿತ್ತೇನೋ. ಆದರೀತ ತನ್ನ ಪರಿಚಾರಿಕೆಗೆ ಪರಪ್ಪನ ಅಗ್ರಹಾರ ಸೇರಿಕೊಂಡಿದ್ದ ರೌಡಿ ಎಲಿಮೆಂಟುಗಳು, ಡಾನ್ ಅನ್ನಿಸಿಕೊಂಡಿರುವ ವಿಲ್ಸನ್ ಗಾರ್ಡನ್ ನಾಗನಂಥವರ ಜೊತೆ ಸೇರಿಕೊಂಡು ಯಡವಟ್ಟು ಮಾಡಿಕೊಂಡಿದ್ದ. ಹೇಗೋ ಪಾರಾಗಿ ಬಂದರೂ ಕೂಡಾ ಮತ್ತೆ ಜೈಲು ಪಾಲಾಗುವ, ತಿಂಗಳುಗಟ್ಟಲೆ ಸರಳ ಹಿಂದೆ ಸರಿಯುವ ಭೀತಿಯಿಂದ ದರ್ಶನ್ ಕಂಗಾಲಾದಂತಿದೆ.

ಅಷ್ಟಕ್ಕೂ ದರ್ಶನ್ ಈಗ ಅತ್ಯಂತ ನಾಜೂಕಿನ ನಡೆ ಅನುಸರಿಸುತ್ತಿದ್ದಾರೆ. ಚೂರೇ ಚೂರು ಹಳೇ ವರಸೆ ತೋರಿಸಿದರೂ ಅದು ವಾಪಾಸು ಗುಮ್ಮುವ ಭಯ ದಾಸನನ್ನು ಕಾಡುತ್ತಿದೆ. ಒಟ್ಟಾರೆಯಾಗಿ ಕಟಕಟೆಯಲ್ಲಿ ಹೋಗಿ ನಿಂತಾಗಲೂ ಈತ ಬದಲಾಗಿದ್ದಾನೆಂದು ತೋರಿಸಿಕೊಳ್ಳುವ ಅನಿವಾರ್ಯತೆ ದರ್ಶನ್ ಮುಂದಿದೆ. ಈ ಕಾರಣದಿಂದಲೇ ಎಲ್ಲ ಮುನಿಸು ಮರೆತಂತೆ ಮಡದಿಯೊಂದಿಗೆ ಕಾಣಿಸಿಕೊಳ್ಳುತ್ತಿದ್ದಾರೆಂಬ ಮಾತೂ ಕೇಳಿ ಬರುತ್ತಿದೆ. ಇಷ್ಟೆಲ್ಲ ಸರ್ಕಸ್ಸು ಮಾಡಿದರೂ ಕೂಡಾ ದರ್ಶನ್ ಪಾಲಿಗೆ ಮತ್ತೆ ಕಂಟಕ ಎದುರಾಗಿದೆ. ದರ್ಶನನ ಪ್ರೀತಿಯ ಸುಬ್ಬಿ ಪವಿತ್ರಾ ಗೌಡಳಿಗೂ ಕೂಡಾ ಜೈಲು ಸೇರೋದು ಪಕ್ಕಾ ಎಂಬ ಭೀತಿ ಹಿಂಬಾಲಿಸುತ್ತಿದೆ. ಮತ್ತೆ ಸುಬ್ಬಾಸುಬ್ಬಿ ಜೈಕಲು ಪಾಲಾಗೋ ಸ್ಥಿತಿ ಬರುತ್ತದಾ? ಅಥವಾ ಮತ್ತೆ ನಿರಾಳವಾಗೋ ಅವಕಾಶ ಸಿಗುತ್ತದಾ ಎಂಬ ಪ್ರಶ್ನೆಗೆ ಕೆಲವೇ ಗಂಟೆಗಳಲ್ಲಿ ಉತ್ತರ ಸಿಗಲಿದೆ!

The post darshan-renukaswamy murder case: ಡೋಂಟ್‌ಕೇರ್ ಸ್ವಭಾವದ ದರ್ಶನ್‌ಗೀಗ ಢವಢವ! appeared first on Cini Shodha.

ಹಾಗೆ ನೋಡಿದರೆ, ಆರಂಭದ ದಿನಗಳಲ್ಲಿ ದರ್ಶನ್ ಸುತ್ತ ತಲೆ ನೆಟ್ಟಗಿರುವ ಆಸಾಮಿಗಳಿದ್ದದ್ದು ಸತ್ಯ. ಬರಬರುತ್ತಾ ಎಣ್ಣೆ ಏಟಲ್ಲಿ ಸಿಕ್ಕವರನ್ನೆಲ್ಲ ಸ್ಲಂ ಸಂಸ್ಕøತದಲ್ಲಿ ನಿಂಧಿಸುತ್ತಾ, ಕೈಗೆ ಸಿಕ್ಕವರನ್ನು ಸಾಯುವಂತೆ ಬಡಿಯಲಾರಂಭಿಸಿದನಲ್ಲಾ ದರ್ಶನ್? ಈ ಅಟಾಟೋಪ ನೋಡಿ ಸುಸ್ತಾದ ಒಂದಷ್ಟು ಮಂದಿ ಯಾವತ್ತೋ ಕಳಚಿಕೊಂಡಿದ್ದಾರೆ. ದರ್ಶನ್ ಯಾವ ಹಂತ ತಲುಪಿಕೊಂಡನೆಂದರೆ, ಬುದ್ಧಿ ಹೇಳೋ ಧೈರ್ಯ ಮಾಡುವವರ್ಯಾರೂ ಇರಲಿಲ್ಲ. ಅಕಸ್ಮಾತು ಯಾವನಾದರೂ ತಿಳಿಹೇಳಲು ಮುಂದಾದರೆ ಅದನ್ನು ಕೇಳಿಸಿಕೊಳ್ಳುವ ಸೈರಣೆಯೂ ಆತನಿಗಿರಲಿಲ್ಲ. ಕೊನೆ ಕೊನೆಗೆ ಹಣವಂತ ಪುಂಡರು, ದಗಲ್ಬಾಜಿಗಳು, ವಿಕೃತ ಕ್ರಿಮಿಗಳು ಮತ್ತು ಗಾಂಜಾ ಏಟಿನ ಸೈಕೋಗಳಷ್ಟೇ ದರ್ಶನ್ ಅಂತಃಪುರದಲ್ಲಿ ಉಳಿದುಕೊಂಡಿದ್ದರು.

ಅಂಥಾದ್ದೊಂದು ಸೈಕೋ ಸಂತಾನವನ್ನೀಗ ಪೊಲೀಸರು ಹೆಡೆಮುರಿ ಕಟ್ಟಿ ಜೈಲಿಗಟ್ಟಿದ್ದಾರೆ. ಆತ ಧನರಾಜ್ ಅಲಿಯಾಸ್ ನಾಯಿ ರಾಜು. ಮೊನ್ನೆ ದಿನ ದರ್ಶನ್ ಗ್ಯಾಂಗು ಪಟ್ಟಣಗೆರೆ ಶೆಡ್ಡಿನಲ್ಲಿ ರೇಣುಕಾ ಸ್ವಾಮಿಯನ್ನು ಸಾಯಬಡಿದಿದ್ದರಲ್ಲಾ? ಹಾಗೆ ದರ್ಶನ್ ಗ್ಯಾಂಗಿನ ಪ್ರಹಾರದಿಂದ ರೇಣುಕನ ಪೀಚು ದೇಹ ಪ್ರಜ್ಞೆ ತಪ್ಪಿತ್ತು. ಆ ಹಂತದಲ್ಲಿ ದರ್ಶನ್ ಗ್ಯಾಂಗಿನ ಮಂದಿ ಕರೆ ಮಾಡಿದ್ದು ಇದೇ ನಾಯಿ ರಾಜನನ್ನು. ಆತ ಮೆಗ್ಗರ್ ಮೂಲಕ ವಿದ್ಯುತ್ ಶಾಕ್ ಕೊಡೋದ್ರಲ್ಲಿ ಪಂಟರ್. ಈಗ ದರ್ಶನ್ ಜೊತೆ ತಗುಲಿಕೊಂಡಿರೋ ವಿನಯ್ ನ ಅತ್ಯಾಪ್ತ ನಾಯಿ ರಾಜ. ಈತ ಬಂದವನೇ ನೆಲಕ್ಕೊರಗಿದ್ದ ರೇಣುಕಾಸ್ವಾಮಿಗೆ ಶಾಕ್ ಕೊಟ್ಟು ಎಬ್ಬಿಸಿದ್ದನಂತೆ. ಹಾಗೆ ನಿತ್ರಾಣವಾಗಿದ್ದ ರೇಣುಕನ ಮೇಲೆ ದರ್ಶನನ ಸೈಕೋ ಗ್ಯಾಂಗು ಮತ್ತೆ ಬಡಿದು ಕೊಂದು ಕೆಡವಿತೆಂಬುದು ಪೊಲೀಸರು ಕಲೆ ಹಾಕಿರುವ ಮಾಹಿತಿ.

ಈ ನಾಯಿ ರಾಜ ರಾಜರಾಜೇಶ್ವರಿ ನಗರದಲ್ಲಿಯೇ ವಾಸವಿದ್ದಾನೆ. ಆರೋಪಿ ವಿನಯ್ ಅತ್ಯಾಪ್ತನಾದ ಈತ ಆರಂಭದಲ್ಲಿ ಡಾಗ್ ಬ್ರೀಡಿಂಗ್ ನಡೆಸುತ್ತಿದ್ದ. ಈ ಹಂನವಂತರ ಮಕ್ಕಳಿಗೆ ಸಾವಿರಗಟ್ಟಲೆ ಕೊಟ್ಟು ನಾಯಿ ಮರಿ ಸಾಕೋ ಖಯಾಲಿ ಇರುತ್ತದಲ್ಲಾ? ಅಂಥಾದ್ದೇ ಶೋಕಿ ಹೊಂದಿದ್ದ ವಿನಯನ ಸಂಪರ್ಕಕ್ಕೆ ಬಂದಿದ್ದ. ಅಲ್ಲಿಂದ ದರ್ಶನ್ ಪಾಳೆಯಕ್ಕೂ ದಾಟಿಕೊಂಡಿದ್ದ ನಾಯಿರಾಜನಿಗೆ, ದರ್ಶನ್ ಮನೆಯ ನಾಯಿಗಳ ದೇಖಾರೇಖಿ ನೋಡಿಕೊಳ್ಳೋ ಕೆಲಸ ಸಿಕ್ಕಿತ್ತು. ಹೀಗೆ ಹಗಲು ಹೊತ್ತು ದರ್ಶನ್ ಮನೆ ನಾಯಿಗಳನ್ನ ನೋಡಿಕೊಳ್ಳುತ್ತಿದ್ದ ಧನರಾಜ್, ರಾತ್ರಿಯಾಗುತ್ತಲೇ ವಿನಯ್ ಗ್ಯಾಂಗು ಸೇರಿಕೊಳ್ಳುತ್ತಿದ್ದ. ಅಲ್ಲಿ ವಿನಯ್ ತನ್ನ ವ್ಯವಹಾರ ಸಂಬಂಧಿತವಾದ ದುಶ್ಮನ್ ಗಳನ್ನು ಇದೇ ಶೆಡ್ಡಿಗೆ ಎತ್ತಾಕಿಕೊಂಡು ಬರುತ್ತಿದ್ದ. ಅಲ್ಲಿಯೂ ರೇಣುಕಾ ಸ್ವಾಮಿಗಾದಂಥಾದ್ದೇ ಪ್ರಹಾರ ನಡೆಯುತ್ತಿತ್ತು. ಒದೆ ತಿಂದು ಪ್ರಜ್ಞೆಇದವರನ್ನು ಮೆಗ್ಗರ್ ಮೂಲಕ ಎಬ್ಬಿಸೋ ಕಸುಬನ್ನು ನಾಯಿ ರಾಜ ಮಾಡುತ್ತಿದ್ದ. ಹೀರೋ ಒಬ್ಬನ ಸುತ್ತ ಇಂಥಾ ಕ್ಷುದ್ರ ಜೀವಿಗಳೇ ತುಂಬಿದ್ದರೆ ಅನಾಹುತವಲ್ಲದೇ ಬೇರೇನು ಘಟಿಸಲು ಸಾಧ್ಯ?

The post darshan gang: ಅದು ಶೆಡ್ಡಲ್ಲ ಅಮಾಯಕರ ಬಲಿಪೀಠ! appeared first on Cini Shodha.

ಪವಿತ್ರಾಳಿಗೆ ಮೆಸೇಜು ಬಿಟ್ಟ ರೇಣುಕಾಸ್ವಾಮಿಯನ್ನು ಆ ಪರಿಯಾಗಿ ಹಿಂಸಿಸಿ ಕೊಂದಿತ್ತಲ್ಲಾ ಡಿ ಗ್ಯಾಂಗು? ನಂಬಿಕೆ ದ್ರೋಹ ಮಾಡಿ ಕೋಟಿ ಕೋಟಿ ವಂಚಿಸಿದ್ದ ಮಲ್ಲಿಯನ್ನು ಸುಮ್ಮನೆ ಬಿಟ್ಟಿರಲು ಸಾಧ್ಯವೇ? ಹೀಗೊಂದು ಅನುಮಾನ ಹೊಗೆಯಾಡಿ, ಕೆಲ ಮೀಡಿಯಾಗಳಲ್ಲಿ ಶರಂಪರ ಚರ್ಚೆಗಳು ನಡೆಯುತ್ತಿವೆ. ಕೆಲ ಮಂದಿ ಮಲ್ಲಿಯ ಕೇಸು ದರ್ಶನ್ ಪಾಲಿಗೆ ಮತ್ತೊಂದು ಕಂಟಕವಾಗುತ್ತದೆಂದೂ ಹೇಳಲಾರಂಭಿಸಿದ್ದಾರೆ. ಅದು ನಿಜವೂ ಹೌದು. ಒಂದು ವೇಳೆ ದರ್ಶನ್ ಗ್ಯಾಂಗಿಗೆ ಮ್ಯಾನೇಜರ್ ಮಲ್ಲಿ ಬಲಿಯಾಗಿದ್ದರೆ ದಾಸನಿಗೆ ಹದಿನಾಲ್ಕು ವರ್ಷ ಜೈಲುವಾಸ ಫಿಕ್ಸಾಗಿ ಬಿಡುತ್ತಿತ್ತು. ಆದರೆ, ಸದ್ಯದ ಮಟ್ಟಿಗೆ ಅದೊಂದು ವಿಚಾರದಲ್ಲಿ ದರ್ಶನ್ ಸೇಫಾಗಿದ್ದಾನೆ. ಯಾಕೆಂದರೆ, ಮಹಾನ್ ಛತ್ರಿ ಆಸಾಮಿ ಮಲ್ಲಿಯಿನ್ನೂ ಬದುಕಿದ್ದಾನೆ!

2018ರ ಜುಲೈ ತಿಂಗಳಿನಲ್ಲಿ ಮ್ಯಾನೇಜರ್ ಮಲ್ಲಿಯ ಅಸಲೀ ಪುರಾಣ ಜಾಹೀರಾಗಿತ್ತು. ಅದಕ್ಕೂ ಒಂದಷ್ಟು ತಿಂಗಳ ಹಿಂದೆಯೇ ದೋಖಾಬಾಜಿಗಳ ಸುಳಿವು ಸಿಕ್ಕಿ, ಅದು ದರ್ಶನ್ ಪಾಳೆಯಕ್ಕೂ ದಾಟಿಕೊಂಡಿತ್ತು. ಆದರೆ, ದರ್ಶನ್ ಆಗಿ, ದಿನಕರ್ ಆಗಲಿ ಅದನ್ನ ಗಂಭೀರವಾಗಿ ಪರಿಗಣಿಸಿರಲಿಲ್ಲ. ಖುದ್ದು ದರ್ಶನ್ ಫೋನು ಮಾಡಿದರೂ ಸ್ವೀಕರಿಸದೆ, ಕಡೇಗೆ ಸ್ವಿಚಾಫ್ ಮಾಡಿಕೊಂಡು ಅಡ್ಡಾಡಲಾರಂಭಿಸಿದ್ದ ಮಲ್ಲಿ ನೋಡ ನೋಡುತ್ತಲೇ ಗಾಯಬ್ ಆಗಿಬಿಟ್ಟಿದ್ದ. ಆ ವಿಚಾರ ತಿಳಿದದ್ದೇ ಮಲ್ಲಿ ಅಲ್ಲಲ್ಲಿ ದರ್ಶನ್ ಹೆಸರಲ್ಲಿ ಪೀಕಿದ್ದ ಕೋಟಿ ಕಾಸಿನ ಕುರುಹುಗಳು ಪಿತಗುಡಲಾರಂಭಿಸಿದ್ದವು. ಆ ನಂತರ ಆತನ ಪತ್ತೆಯಿರಲಿಲ್ಲ. ದರ್ಶನ್ ಮ್ಯಾನೇಜರ್ ಎಂಬ ಕಾರಣಕ್ಕೆ ನಂಬಿ ಅನೇಕರು ಪಿಗ್ಗಿಬಿದ್ದದ್ದರಲ್ಲಾ? ಅವರೆಲ್ಲ ಗಾಬರಿಬಿದ್ದು ದರ್ಶನ್ ಅಂತಃಪುರದತ್ತ ಹರಿದು ಬರಲಾರಂಭಿಸಿದ್ದರು.

ಒಂದು ಮೂಲದ ಪ್ರಕಾರ ಹಾಗೆ ಬಂದ ಅನೇಕರಿಗೆ ದಿನಕರ್ ಆಗಿರುವ ಅನಾಹುತವನ್ನ ಮನವರಿಕೆ ಮಾಡಿಕೊಟ್ಟಿದ್ದಾರೆ. ತಮಗೂ ಆದ ಮೋಸದ ಬಗ್ಗೆ ತಿಳಿ ಹೇಳಿದ್ದಾರೆ. ಇನ್ನೂ ಕೆಲ ಮಂದಿ ದಿನಕರ್ ರನ್ನು ದಾಟಿ, ಕಾಸು ಸಿಗಬಹುದೆಂಬ ಆಸೆಯಿಂದ ದರ್ಶನ್ ನನ್ನು ಸಂಪರ್ಕಿಸಿದ್ದೂ ಇದೆ. ಹಾಗೆ ಎದುರುನಿಂತ ಒಂದಷ್ಟು ನಸೀಬುಗೇಡಿಗಳಿಗೆ ದರ್ಶನ್ ಆವಾಜು ಬಿಟ್ಟು ಕಳಿಸಿದ್ದನೆಂಬ ಮಾತೂ ಇದೆ. ಹಾಗೆ 2018ರ ಮಧ್ಯಭಾಗದಲ್ಲಿ ನಾಪತ್ತೆಯಾಗಿದ್ದ ಮಲ್ಲಿ ಯಾರೆಂದರೆ ಯಾರಿಗೂ ಸಿಕ್ಕಿಲ್ಲ. ಮೂಲತಃ ಗುಲ್ಬರ್ಗದವನಾದ ಈತ ಹುಟ್ಟೂರಿನಲ್ಲಿಯೂ ಸುಳಿದಿರಲಿಲ್ಲ. ಹೇಳಿಕೇಳಿ ಉತ್ತರ ಕರ್ನಾಟಕದಲ್ಲಿಯೂ ದರ್ಶನ್ ಗೆ ಫ್ಯಾನ್ ಬೇಸ್ ಇದೆ. ಆ ಭಾಗದಲ್ಲಿ ಸುಮ್ಮನೆ ಕಾಣಿಸಿಕೊಂಡರೂ ಮಲ್ಲಿಯನ್ನು ಮೂಟೆಗಟ್ಟಿ ಟೆಂಪೋಗೆ ತುಂಬಿ ದರ್ಶನ್ ಮುಂದೆ ತಂದು ಬಿಡೋ ಸಾಧ್ಯತೆಗಳೂ ಇದ್ದವು!

ಇಂಥಾ ಅನಾಹುಗಳನ್ನರಿತಿದ್ದ ಚಾಲಾಕಿ ಮಲ್ಲಿ ಆ ಕಾಲದಲ್ಲಿಯೇ ಕರ್ನಾಟಕ ತೊರೆದು ಹೋಗಿದ್ದನೆಂಬ ಮಾತಿದೆ. ಒಂದು ಹಂತದಲ್ಲಿ ಯಾಮಾರಿಸಿದ ಕಾಸಲ್ಲಿ ವಿದೇಶಕ್ಕೆ ತೆರಳಿ ಸೆಟಲ್ ಆಗಿದ್ದಾನೆಂಬ ರೂಮರೂ ಹರಿದಾಡಿತ್ತು. ಇಂಥಾ ಮಲ್ಲಿ ತಿಂಗಳ ಹಿಂದೆ ಕರ್ನಾಟಕಕ್ಕೆ ಬಂದು ಹೋಗಿದ್ದಾನೆ. ತನ್ನ ಕುಟುಂಬದ ಕೆಲವರೊಂದಿಗೆ ದಕ್ಷಿಣ ಕನ್ನಡ, ಉತ್ತರ ಕನ್ನಡದ ಪ್ರಸಿದ್ಧ ದೇವಸ್ಥಾನಗಳಿಗೆ ಭೇಟಿ ನೀಡಿದ್ದಾನೆ. ಹೀಗೆ ತಿರ್ಪೆ ಕಾಸಲ್ಲಿ ಲಕ್ಷಣವಾಗಿ ತೀರ್ಥ ಯಾತ್ರೆ ಮುಗಿಸಿಕೊಂಡ ಮಲ್ಲಿ ಮತ್ತೆ ಪರರಾಜ್ಯದಲ್ಲಿರೋ ಬಿಲ ಸೇರಿಕೊಂಡಿದ್ದಾನೆ. ಸದ್ಯಕ್ಕೀತ ಕಲ್ಕತ್ತಾದಲ್ಲಿರುವ ಮಾಹಿತಿ ಹರಿದಾಡಿದರೂ ಕೂಡಾ, ಅದರಲ್ಲಿಯೂ ಮಲ್ಲಿ ಹಾದಿತಪ್ಪಿಸುವ ಚಾಣಾಕ್ಷತನ ತೋರಿಸಿರುತ್ತಾನೆಂಬುದರಲ್ಲಿ ಯಾವ ಅನುಮಾನವೂ ಇಲ್ಲ. ಉತ್ತರ ಭಾರತವೋ, ದಕ್ಷಿಣ ಭಾರತವೋ… ಅಂತೂ ಮಲ್ಲಿ ದೇಶದೊಳಗೇ ಇದ್ದಾನೆ. ಸೇಫಾಗಿಯೂ ಬದುಕುತ್ತಿದ್ದಾನೆ!

ಹೀಗೆ ಇದೀಗ ಮರ್ಡರ್ ಕೇಸಿನ ನೆಪದಲ್ಲಿ ನೆನಪಾಗಿರುವ ಮಲ್ಲಿ ಅಸಾಮಾನ್ಯ ಪ್ರತಿಭೆಯೇ. ಬೇರೆಲ್ಲ ತಕರಾರುಗಳೇನಿದ್ದರೂ, ದರ್ಶನ್ ಥರದ ಸ್ಟಾರ್ ನಟನನ್ನು ಯಾಮಾರಿಸಿ, ಆತನ ಪಟಾಲಮ್ಮಿನ ಕಣ್ಣಿಗೆ ಮಣ್ಣೆರಚಿ ಕೋಟಿ ಕೋಟಿ ಲಫಡಾ ನಡೆಸಿದ ಈತ ವ್ಯವಹಾರ ಚತುರ. ಆರಂಭದ ದಿನಗಳಲ್ಲಿ ರಾಕಿಂಗ್ ಸ್ಟಾರ್ ಯಶ್ ಪಾಳೆಯದಲ್ಲಿದ್ದವನು ಮಲ್ಲಿ. ಆ ಕಾಲದಲ್ಲಿ ಯಶ್ ಈ ಪರಿಯಾಗಿ ಬೆಳೆದು ನಿಲ್ಲಬಹುದೆಂಬ ಅಂದಾಜು ಮಲ್ಲಿಗೆ ಸಿಕ್ಕಿರಲಿಲ್ಲವೇನೋ. ಭಾರೀ ಮಹತ್ವಾಕಾಂಕ್ಷೆ ಹೊಂದಿದ್ದ ಮಲ್ಲಿ ಮೆತ್ತಗೆ ಓಡೋ ಕುದುರೆ ದರ್ಶನ್ ಪಾಳೆಯಕ್ಕೆ ಎಡತಾಕಲಾರಂಭಿಸಿದ್ದ. ಹಾಗೆ ಬಂದವನು ಹಂತ ಹಂತವಾಗಿ ದರ್ಶನ್ ನಂಬಿಕೆ ಗಳಿಸಿಕೊಂಡಿದೆ. ದರ್ಶನ್ ಯಾವ ರೇಂಜಿಗೆ ಮಲ್ಲಿಯನ್ನ ನಂಬಿದ್ದನೆಂದರೆ, ಆತನ ಎಲ್ಲ ದೇಖಾರೇಖಿಗಳೂ ಮಲ್ಲಿಯ ಸರಹದ್ದಿಗೆ ಬಂದುಬಿಟ್ಟಿದ್ದವು.

ದರ್ಶನ್ ಎಂಬೋ ದೈತ್ಯ ನಟನನ್ನು ಮಲ್ಲಿ ಸಲೀಸಾಗಿಯೇ ಮ್ಯಾನೇಜು ಮಾಡಲಾರಂಭಿಸಿದ್ದ. ಬರಬರುತ್ತಾ ದರ್ಶನ್ ವ್ಯವಹಾರವನ್ನೆಲ್ಲ ಈತನೇ ನೋಡಿಕೊಳ್ಳುತ್ತಿದ್ದ. ಮೆತ್ತಗೆ ದರ್ಶನ್ ಹೆಸರಲ್ಲಿ ಕಾಸು ಗುಂಜಲಾರಂಭಿಸಿದ್ದ ಮಲ್ಲಿ, ವಂಚಕನಾಗಿ ಬದಲಾಗಿ ಬಿಟ್ಟಿದ್ದ. ಕಂಡೋರ ಮುಂದೆ ದೈನೇಸಿಯಂತೆ ನಿಂತು ಕಷ್ಟ ಕಾರ್ಪಣ್ಯಗಳ ಸ್ಕ್ರಿಪ್ಟು ಒದರಲಾರಂಭಿಸಿದ್ದ. ದರ್ಶನ್ ನಂಥಾ ಸ್ಟಾರ್ ನಟನ ಮ್ಯಾನೇಜರಿಗೆ ಇದೆಂಥಾ ಗತಿಯೆಂಬ ಕರುಣೆಯಿಂದಲೋ, ಇವನನ್ನು ವಿಶ್ವಾಸಕ್ಕೆ ತೆಗೆದುಕೊಂಡರೆ ದರ್ಶನ್ ಸಲೀಸಾಗಿ ಕೈಗೆ ಸಿಗುತ್ತಾನೆಂಬ ದೂರದೃಷ್ಟಿಯಿಂದಲೋ ಗೊತ್ತಿಲ್ಲ; ಚಿತ್ರರಂಗದ ಒಂದಷ್ಟು ಮಂದಿ ಈತನಿಗೆ ಲಕ್ಷಗಟ್ಟಲೆ ಸಹಾಯ ಮಾಡಿದ್ದಾರೆ. ಆ ನಂತರದಲ್ಲಿ ಡಿಸ್ಟ್ರಿಬ್ಯೂಷನ್ನು ಸೇರಿದಂತೆ ಎಲ್ಲದರಲ್ಲಿಯೂ ಮಲ್ಲಿ ದೋಖಾ ಮಾಡಿದ್ದ. ದರ್ಶನ್‍ಗೇ ಕೋಟಿಗಳ ಲೆಕ್ಕದಲ್ಲಿ ಉಂಡೇನಾಮ ತೀಡಿದ್ದ!

ಬಹುಶಃ ದರ್ಶನ್ ತಲೆ ಆ ಕಾಲದಲ್ಲಿ ತುಸು ನೆಟ್ಟಗಿತ್ತೇನೋ. ಅಥವಾ ಇತ್ತೀಚೆಗೆ ಸುತ್ತಾ ಗುಡ್ಡೆಬಿದ್ದಿರುವ ದುಷ್ಟಕೂಟ ಆಗಿನ್ನೂ ಎಂಟ್ರಿ ಕೊಟ್ಟಿರಲಿಲ್ಲವೇನೋ. ಒಂದು ವೇಳೆ ಆ ಕಾಲಕ್ಕೆ ದರ್ಶನ್ ಈಗಿನಂತಿದ್ದಿದ್ದರೆ ಖಂಡಿತವಾಗಿಯೂ ಯಾವುದೋ ಗೋಡೌನಿನಲ್ಲಿ ಮಲ್ಲಿಯ ದೇಹ ನಜ್ಜುಗುಜ್ಜಾಗುತ್ತಿತ್ತು. ಆತನ ದೇಹ ಸುಳಿವೇ ಇಲ್ಲದಂತೆ ಮತ್ಯಾವುದೋ ಮೋರಿಯ ಪಾಲಾಗುತ್ತಿತ್ತೋ ಏನೋ. ಅಂಥಾ ದುರಂತದಿಂದ ಮಲ್ಲಿ ಪಾರಾಗಿದ್ದಾನೆ. ಬಹುಶಃ ಆ ಘಳಿಗೆಯಲ್ಲಿ ದರ್ಶನ್ ತೆಗೆದುಕೊಂಡಿದ್ದ ತುಸು ಮನುಷ್ಯತ್ವದ ನಿರ್ಧಾರ ಖುದ್ದು ಆತನನ್ನೇ ಮತ್ತೊಂದು ಕುಣಿಕೆಯಿಂದ ಪಾರುಗಾಣಿಸಿದೆ. ಆದರೆ, ಘಟಾನುಘಟಿಗಳಿಗೆ ವಂಚಿಸಿ, ಹೊರರಾಜ್ಯದಲ್ಲಿ ಸೇಫಾಗಿರುವ ಮಲ್ಲಿಗೀಗ ಭಯ ಶುರುವಾಗಿದ್ದಿರಬಹುದು. ಪೊಲೀಸರೇನಾದರೂ ಈತ ಬದುಉಕಿರೋದು ನಿಜವಾ ಅನ್ನೋ ಜಾಡು ಹಿಡಿದು ಹೊರಟರೆ, ಕಾಸು ಕೊಟ್ಟು ಕೈಸುಟ್ಟುಕೊಂಡಿರೋ ಸಾಲಗಾರರೂ ಹಿಂಬಾಲಿಸಿ ಹೋಗೋ ಅಪಾಯ ಮಲ್ಲಿಯನ್ನು ಕಂಗೆಡಿಸಿರಬಹುದು!

The post darshan manager malli: ತಿರ್ಪೆ ಕಾಸಲ್ಲಿ ತೀರ್ಥ ಯಾತ್ರೆ! appeared first on Cini Shodha.

ಎಂಥಾ ಕಚಡಾ ಕೆಲಸ ಮಾಡಿ ಬಂದರೂ ಜನ ಸಿನಿಮಾ ನೋಡಿ ಗೆಲ್ಲಿಸ್ತಾರೆಂಬ ತಿಮಿರು ದರ್ಶನನ ನೆತ್ತಿಗೇರಿ ನರ್ತನ ಶುರುವಿಟ್ಟುಕೊಂಡಿತ್ತು. ತನ್ನ ಫ್ಯಾನ್ ಬೇಸಿನ ಮುಂದೆ ರಾಜ್ಯ ಮುಖ್ಯಮಂತ್ರಿಗಳೂ ಮಂಕಾಗ್ತಾರೆಂಬಂಥಾ ಅಹಂ ಆತನನ್ನು ಅಪಾದಮಸ್ತಕ ಆವರಿಸಿಕೊಂಡಿತ್ತು. ಸಿಕ್ಕವರ ಮೇಲೆ ಹಲ್ಲೆ ನಡೆಸೋದು, ಎಣ್ಣೆ ಏಟಲ್ಲಿ ಆವಾಜು ಬಿಡೋದು ಈತನ ಪಾಲಿಗೆ ಮಾಮೂಲಾಗಿ ಹೋಗಿತ್ತು. ಇಂಥಾ ದುಂಡಾವರ್ತನೆಗಳಿಗೆ ನೇರವತಿಂಕೆಯ ಮುಸುಕು ಹಾಕಿ ಬಚಾವಾಗುವ ಕ್ರಿಮಿನಲ್ಲು ಬುದ್ಧಿಯನ್ನ ದಾಸ ಪ್ರದರ್ಶಿಸಲಾರಂಭಿಸಿದ್ದ. ತನ್ನ ವಿಕೃತ ಮನಃಸ್ಥಿತಿಗೆ ತಕ್ಕುದಾದೊಂದು ಅಭಿಮಾನಿ ಪಡೆ ಕಟ್ಟಿಕೊಂಡಿದ್ದ. ಅದನ್ನ ನಂಬಿಕೊಂಡು ತೊಡೆ ತಟ್ಟಲಾರಂಭಿಸಿದ್ದ ದರ್ಶನ್ ಈಗ ಖಡಕ್ ಖಾಕಿ ಪಡೆಯ ಮುಂದೆ ಕೆಕರುಮಕರಾಗಿ ಕೈಕಟ್ಟಿ ನಿಲ್ಲುವಂತಾಗಿದೆ.

ಪವಿತ್ರಾಗೆ ಅಶ್ಲೀಲ ಮೆಸೇಜು ಕಳಿಸಿದನೆಂದು ಬಡಪಾಯಿಯೊಬ್ಬನ ಜೀವ ತೆಗೆದನಲ್ಲಾ ದರ್ಶನ್? ಹಾಗೊಂದು ಅವಘಡ ನಡೆದ ಘಳಿಗೆಯಲ್ಲಿಯೂ ಸಲೀಸಾಗಿ ಬಚಾವಾಗಿ ಬಿಡುವ ಭರವಸೆಯಿತ್ತು. ಮೈಸೂರಿನ ಹೊಟೇಲಿನಲ್ಲಿ ಕಸರತ್ತು ನಡೆಸುತ್ತಿದ್ದವನ ಮುಂದೆ ಖಾಕಿ ಪಡೆ ಪ್ರತ್ಯಕ್ಷವಾದಾಗಲೂ ಆ ತಿಮಿರೇನು ಕಡಿಮೆಯಾಗಿರಲಿಲ್ಲ. ಅಲ್ಲಿದ್ದ ಪೊಲೀಸ್ ಅಧಿಕಾರಿಯೊಬ್ಬರ ಒಂದೇ ಒಂದು ಆವಾಜಿಗೆ ಚಾಲೆಂಜಿಂಗ್ ಸ್ಟಾರ್ ನ ದುರಹಂಕಾರ ತಲ್ಲಣಿಸಿ ಹೋಗಿತ್ತು. ಅಲ್ಲಿಂದಾಚೆಗೆ ಇದರಿಂದ ಪಾರಾಗಲು ನಾನಾ ರೀತಿಯ ಕಸರತ್ತು ನಡೆಸಿದ್ದ. ಕಡೆಗೂ ರಾತ್ರಿ ಪೊಲೀಸ್ ಠಾಣೆಯಲ್ಲಿ ಚಾಪೆ ಹಾಸಿಕೊಂಡು ಮಲಗುವ ಸ್ಥಿತಿ ಬಂದಾಗ ಬಹುಶಃ ಕಾನೂನಿನ ಮುಂದೆ ಬಾಸೂ ಒಂದೇ ಬೂಸಾವೂ ಒಂದೇ ಎಂಬ ದಿಗ್ಧರ್ಶನವಾಗಿರಬಹುದು!

ದರ್ಶನ್‍ಗೆ ಎಣ್ಣೆ, ಸಿಗರೇಟು ಸೇರಿದಂತೆ ಒಂದಷ್ಟು ಚಟಗಳಿರೋದು ಗುಟ್ಟಾಗುಳಿದಿಲ್ಲ. ಸಾಮಾನ್ಯವಾಗಿ ಇಂಥಾ ಅಡಿಕ್ಷನ್ನು ಸರಿಯಾದ ಸಮಯಕ್ಕೆ ಮಾಲು ಸಿಗದೇ ಹೋದಾಗ ಉಲ್ಬಣಿಸುತ್ತೆ. ಹಾಗೆ ರೊಚ್ಚಿಗೆದ್ದ ದರ್ಶನ್ ಪೊಲೀಸ್ ಅಧಿಕಾರಿಗಳ ಮುಂದೆ ಗಾಂಚಾಲಿ ತೋರಿಸಿದನಾ? ಈತನ ದುರಹಂಕಾರ ಕಂಡು ತಾಳ್ಮೆ ಕಳೆದುಕೊಂಡ ಅಧಿಕಾರಿಯೊಬ್ಬರು ರಪ್ಪನೆ ಕೆನ್ನೆಗೊಂದು ಬಿಗಿದು ಕೂರಿಸಿದರಾ? ಹಾಗೊಂದು ಸುದ್ದಿ ಸದ್ಯ ಹರಿದಾಡ್ತಿದೆ. ಪೊಲೀಸ್ ವ್ಯಾನಿನಲ್ಲಿ ಕುಂತ ದರ್ಶನ್ ಮುಖ ಕೊಂಚ ಬಾತುಕೊಂಡಂತೆ ಭಾಸವಾಗುತ್ತಿತ್ತು. ಅದು ಖಾಕಿ ಕೈಚಳಕವಾಗಿದ್ದರೂ ಅಚ್ಚರಿಯೇನಿಲ್ಲ. ಓರ್ವ ಸ್ಟಾರ್ ನಟ ಈ ಸ್ಥಿಗೆ ತಲುಪಿಕೊಳ್ಳುತ್ತಾನಂದ್ರೆ ಅದಕ್ಕಿಂತ ನೋವಿನ ಸಂಗತಿ ಬೇರ್ಯಾವುದಿದೆ?

The post darshan: ಕಾನೂನಿನ ಮುಂದೆ ಮಂಡಿಯೂರಿತು ಸ್ಟಾರ್ ಗಿರಿ! appeared first on Cini Shodha.

ಮೊನ್ನೆಯಷ್ಟೇ ದರ್ಶನ್ ಮಾಧ್ಯಮದವರೊಂದಿಗೂ ರಾಜಿಯಾಗಿದ್ದರು. ಎಲ್ಲವೂ ಸುಸೂತ್ರವಾಗಿ ನಡೆದರೆ ಕಿಚ್ಚನ ಕೈ ಕುಲುಕಿ, ಮತ್ತೆ ಸ್ನೇಹ ಪರ್ವವನ್ನು ಮುಂದುವರೆಸಿದರೂ ಅಚ್ಚರಿಯೇನಿಲ್ಲ. ಒಂದು ವೇಳೆ ಈ ಸ್ನೇಹ ಮತ್ತೆ ಬೆಸೆದುಕೊಂಡರೆ, ಅಭಿಮಾನಿಗಳ ಹೆಸರಲ್ಲಿ ಕಿತ್ತಾಡುವವರ ಅಬ್ಬರ ಕೊಂಚ ತಗ್ಗಬಹುದು. ಸೋಶಿಯಲ್ ಮೀಡಿಯಾದ ತುಂಬಾ ಒಂದಷ್ಟು ಸಹ್ಯ ವಾತಾವರಣ ಮೂಡಬಹುದು. ಅಲ್ಲಿಂದಿಲ್ಲಿಗೆ, ಇಲ್ಲಿಂದ ಅಲ್ಲಿಗೆ ತಂದಿಡುತ್ತಿದ್ದ ಕೆಲ ಆಲ್ಕಾಟಿ ಆಸಾಮಿಗಳು ನಿರುದ್ಯೋಗಿಗಳಾಗಬಹುದು. ಕಿಚ್ಚ ಮತ್ತು ದರ್ಶನ್ ಇಂಥಾ ಮಾನಸಿಕ ಒತ್ತಡಗಳಿಂದ ಹೊರಬಂದು ತುಸು ನಿಸೂರಾಗಬಹುದು. ಅದರ ಹೊರತಾಗಿ ಈ ಸ್ನೇಹದ ಮರು ಕೂಡಿಕೆಯಿಂದ ಮತ್ಯಾವ ಸೀಮೆಗಿಲ್ಲದ ಕ್ರಾಂತಿಯೂ ಆಗೋದಿಲ್ಲ!

ಹೀಗೆ ಕಿಚ್ಚಾ ಮತ್ತು ದರ್ಶನ್ ಸ್ನೇಹ ಕೂಡಿಕೊಳ್ಳುತ್ತದೆಂಬ ಸೂಚನೆ ಸಿಕ್ಕಾಕ್ಷಣವೇ, ಕೆಂ ಮಂದಿ ಅವರಿಬ್ಬರನ್ನೂ ಸೇರಿಸಿಕೊಂಡು ಮಲ್ಟಿ ಸ್ಟಾರರ್ ಸಿನಿಮಾ ಮಾಡಲು ಸನ್ನದ್ಧರಾಗಿರುವ ಸುದ್ದಿಯಿದೆ. ಹಾಗೊಂದು ವೇಳೆ, ದರ್ಶನ್ ಮತ್ತು ಸುದೀಪ್ ಒಟ್ಟಿಗೆ ನಟಿಸಲು ಒಪ್ಪಿಕೊಂಡರೂ ಅದನ್ನು ಚಾಲಾಕಿ ಚತುರ ರಾಕ್ ಲೈನ್ ವೆಂಕಣ್ಣನೇ ಪ್ರೊಡ್ಯೂಸು ಮಾಡೋದಂತೂ ಪಕ್ಕಾ. ಆದರೆ, ಈ ಇಬ್ಬರು ಸ್ಟಾರ್ ನಟರನ್ನು ಒಂದು ಸಿನಿಮಾದಲ್ಲಿ ಒಟ್ಟುಗೂಡಿಸಬೇಕೆಂದರೆ, ಅದಕ್ಕೆ ಬೇರೆಯದ್ದೇ ತೆರನಾದ ಖದರ್ ಇರುವ ನಿರ್ದೇಶಕ ಬೇಕೇ ಬೇಕು. ಇದೀಗ ಆ ಕಸುವ ಯಾರಿಗಿದೆ ಎಂಬ ದಿಕ್ಕಿನಲ್ಲಿಯೂ ಒಂದಷ್ಟು ಚರ್ಚೆಗಳು ಶುರುವಾಗಿವೆ. ಇಂಥಾ ಬೆಳವಣಿಗೆಗಳ ನಡುವೆ ಅಯೋಗ್ಯ ಖ್ಯಾತಿಯ ಯುವ ನಿರ್ದೇಶಕ ಮಹೇಶ್ ಭಯಂಕರ ಜೋಕೊಂದನ್ನು ಸಿಡಿಸುವ ಮೂಲಕ ಸುದ್ದಿ ಕೇಂದ್ರಕ್ಕೆ ಬಂದಿದ್ದಾನೆ!

ನೀನಾಸಂ ಸತೀಶ್ ನಟನೆಯ ಅಯೋಗ್ಯ ಎಂಬ ಸಿನಿಮಾ ಮೂಲಕ ನಿರ್ದೇಶಕನಾಗಿ ಅವತರಿಸಿದ್ದಾತ ಮಹೇಶ್. ಆ ಸಿನಿಮಾ ಗೆಲುವು ಕಂಡಿತ್ತು. ಹಾಗೆ ಮೊದಲ ಹೆಜ್ಜೆಯಲ್ಲಿಯೇ ಒಂದು ಮಟ್ಟದ ಗೆಲುವು ಕಂಡಿದ್ದ ಎಳಸು ಸ್ವಭಾವದ ಮಹೇಶನ ತಲೆ ಭುಜದ ಮೇಲೆ ನಿಲ್ಲಲಾರದಂತೆ ಗಿರಕಿ ಹೊಡೆಯಲಾರಂಭಿಸಿತ್ತು. ಮಹಾನ್ ಚಾಲಾಕಿಯೂ, ಚುರುಕುತನ ಹೊಂದಿರುಇವವನೂ ಆಗಿರುವ ಮಹೇಶ ಆ ನಂತರ ಮೆತ್ತಗೆ ಮೆರೆಯಲಾರಂಭಿಸಿದ್ದ ಅಂತೊಂದು ಆರೋಪ ಗಾಂಧಿನಗರದಲ್ಲಿ ಹಬ್ಬಿಕೊಂಡಿತ್ತು. ಪೋಸು ಕೊಡೋದರಲ್ಲಿ ಜೋಗಿ ಪ್ರೇಮ್ ನನ್ನೇ ಈತ ಮೀರಿಸುತ್ತಾನೆಂಬ ಮಾತುಗಳೂ ಹರಿದಾಡಿದ್ದವು. ನಂತರ ರೋರಿಂಗ್ ಸ್ಟಾರ್ ಶ್ರೀ ಮುರುಳಿಯ ಮದಗಜ ಅಂತೊಂದು ಚಿತ್ರ ಮಾಡಿದ್ದ ಮಹೇಶ, ನಗೆಪಾಟಲಿಗೀಡಾಗಿದ್ದ. ಯಾಕೆಂದರೆ, ಮದಗಜ ಸಿನಿಮಾ ಮಂದಿರದ ಹೊಸ್ತಿಲಲ್ಲೇ ಮಗುಚಿಕೊಂಡಿತ್ತು!

ಇಂಥಾ ಮಹೇಶ ಸುದೀಪ್ ಹಾಗೂ ದರ್ಶನ್ ಒಪ್ಪಿಗೆ ಕೊಟ್ಟರೆ ರಾತ್ರಿ ಹಗಲಾಗೋದರೊಳಗೆ ಕಥೆ ಬರೆದು, ಮಾರನೇ ದಿನ ಮುಂಜಾನೆಹೊತ್ತಿಗೆಲ್ಲ ನಿರ್ದೇಶನ ಮಾಡಲು ತಾನು ರೆಡಿ ಎಂಬರ್ಥದಲ್ಲಿ ಮಾತಾಡಿರುವ ಸುದ್ದಿಯೊಂದು ಹೊರ ಬಿದ್ದಿದೆ. ಮಾಧ್ಯಮವೊಂದರಲ್ಲಿ ಕಾಣಿಸಿಕೊಂಡಿರೋ ಈ ಸುದ್ದಿ ನಿಜವೇ ಆಗಿದ್ದರೆ, ಅದನ್ನು ಮಹೇಶ ಹೇಳಿದ್ದೇ ಸತ್ಯವಾಗಿದ್ದರೆ, ಅದು ಈ ಸಂವತ್ಸರದ ಬಹುದೊಡ್ಡ ಕಾಮಿಡಿ ಎಂಬುದರಲ್ಲಿ ಯಾವ ಸಂದೇಹವೂ ಇಲ್ಲ. ನಿಜ, ಮಹೇಶನ ಪ್ರತಿಭೆಯನ್ನು ತಳ್ಳಿ ಹಾಕುವಂತಿಲ್ಲ. ಆದರೆ, ಈ ಕ್ಷಣಕ್ಕೆ ಎರಡು ಮದಗಜಗಳನ್ನು ಒಟ್ಟೊಟ್ಟಿಗೆ ಸಂಭಾಳಿಸುವ ಯಾವ ಕಸುವೂ ಆತನಿಗಿಲ್ಲ. ಯಾಕೆಂದರೆ, ಶ್ರೀ ಮುರುಳಿ ಎಂಬ ಸಾಧಾರಣ ಗಜವನ್ನೇ ಮ್ಯಾನೇಜು ಮಾಡಲಾಗದೆ ಈ ಮಹೇಶ ಕೈ ಚೆಲ್ಲಿದ್ದ!

ಸದ್ಯಕ್ಕೆ ಇಂಥಾದ್ದೊಂದು ಜೋಕು ಮಾಡಿರುವ ಮಹೇಶ, ಇದೀಗ ಅಭಿಷೇಕ್ ಅಂಬರೀಶ್ ನಾಯಕನಾಗಿ ನಟಿಸುತ್ತಿರುವ ಚಿತ್ರವೊಂದನ್ನು ನಿರ್ದೇಶನ ಮಾಡುತ್ತಿದ್ದಾನೆ. ಅದಾಗಲೇ ಅಭಿಷೇಕ್ ನನ್ನು ಹಾಡಿ ಹೊಗಳುತ್ತಾ ಮೂದಲಿಕೆಗೂ ಒಳಗಾಗುತ್ತಿದ್ದಾನೆ. ಹೇಳಿಕೇಳಿ ಈ ಅಭಿಷೇಕ್ ನಟನಾಗಿ ಒಂದು ಹೆಜ್ಜೆಯನ್ನೂ ಇಟ್ಟಿಲ್ಲ. ಆತನಿಂದ ನಟನೆ ತೆಗೆಸುವಲ್ಲಿ ನಾಗಣ್ಣನಂಥಾ ನಾಗಣ್ಣನೇ ಅಮರ್ ಚಿತ್ರದ ಸಂದರ್ಭದಲ್ಲಿ ನಿತ್ರಾಣಗೊಂಡಿದ್ದರು. ಲಾಂಗ್ ಶಾಟ್ ಇಡುವ ಮೂಲಕ ಅಭಿಷೇಕನ ಎಕ್ಸ್‍ಪ್ರೆಷನ್ನು ಕಾಣಿಸದಂತೆ ಮ್ಯಾನೇಜು ಮಾಡಿದ್ದರು. ಇದೀಗ ಮಹೇಶ ಚಿತ್ರವಿಚಿತ್ರ ಕವಚಗಳನ್ನು ಮುಕಮುಸುಡಿಗೆಲ್ಲ ಕವುಚುವ ಮೂಲಕ, ನಾಗಣ್ಣನ ಐಡಿಯಾವನ್ನು ಮತ್ತೊಂದು ಲೆವೆಲ್ಲಿಗೇರಿಸಿರೋ ಲಕ್ಷಣಗಳಿದ್ದಾವೆ. ಹಾಗೆ ನೋಡಿದರೆ, ಆ ಚಿತ್ರದ ಬಗ್ಗೆ ಯಾರಿಗೂ ಹೇಳಿಕೊಳ್ಳುವಂಥಾ ನಿರೀಕ್ಷೆಗಳಿಲ್ಲ. ಮಹೇಶನ ಎರಡನೇ ಚಿತ್ರ ಮದಗಜ ಖುದ್ದು ಆತನೇ ಹೇಳಿದಂತೆ ಬೂಬ್ಸ್ ಬಂಪ್ಸ್ ಬರಿಸುವಲ್ಲಿ ವಿಫಲವಾಗಿದೆ. ಮೂರನೇ ಚಿತ್ರ ಇನ್ನಷ್ಟೇ ತೆರೆಗಾಣಬೇಕಿದೆ. ಅಷ್ಟರಲ್ಲೇ ದರ್ಶನ್ ಸುದೀಪ್ ಗೆ ಸಿನಿಮಾ ನಿರ್ದೇಶನ ಮಾಡ್ತೀನಿ ಅನ್ನುತ್ತಿದ್ದಾನೆ ಮಹೇಶ. ಅದೇನಾದರೂ ನಿಜವಾದರೆ ಬಡಪಾಯಿ ಪ್ರೇಕ್ಷಕರು ಮತ್ತೊಂದು ಬೂಬ್ಸ್ ಬಂಪ್ಸ್ ಅನುಭವಕ್ಕೆ ಅಣಿಗೊಳ್ಳಬೇಕಾಗಬಹುದು!

The post ayogya director mahesh: ಮಹೇಶನ ಮಾತು ನಿಜವಾದ್ರೆ `ಬೂಬ್ಸ್ ಬಂಪ್ಸ್’ ಖಾತರಿ! appeared first on Cini Shodha.

ನಿಜ, ಒಂದು ಕಾಲಘಟ್ಟ ಎಂಥವರನ್ನು ಎಂತೆಂಥಾ ಅವತಾರವೆತ್ತುವಂತೆ ಮಾಡಿ ಬಿಡುತ್ತದೆ. ಅದರ ಸೆಳವಿಗೆ ಸಿಕ್ಕ ದರ್ಶನ್ ಹಾಗೆಲ್ಲ ಆಡಿದ್ದರೂ ಇರಬಹುದು. ಹೆಚ್ಚೇನು ಅಲ್ಲ; ಕಾಲ ಚಕ್ರ ಒಂದೇ ಒಂದು ವರ್ಷದ ಪರಿಧಿಯಲ್ಲಿ ಸುತ್ತುತ್ತಲೇ ಎಲ್ಲವೂ ಅದಲುಬದಲಾಗಿದೆ. ಖುದ್ದು ದರ್ಶನ್ ಕೊಂಚ ಬದಲಾದಂತೆ ಕಾಣುತ್ತಿದ್ದಾರೆ. ಅದರ ಫಲವಾಗಿಯೇ ಇಪ್ಪತ್ತು ವರ್ಷಗಳಷ್ಟು ಹಳೇಯ ಸ್ನೇಹವೊಂದಕ್ಕೆ ಮತ್ತೆ ಕೈಚಾಚಿದ್ದಾರೆ. ಅದರ ಫಲವಾಗಿಯೇ ಕೆವಿಎನ್ ಬ್ಯಾನರಿನಡಿಯಲ್ಲಿ ನಿರ್ದೇಶಕ ಪ್ರೇಮ್ ಗೆ ಜೊತೆಯಾಗಿದ್ದಾರೆ. ರಕ್ಷಿತಾ ಮತ್ತಾಕೆಯ ಪತಿ ಪ್ರೇಮ್ ಜೊತೆ ಆತ್ಮೀಯವಾಗಿ ಬೆರೆತಿದ್ದಾರೆ. ಒಂದು ಕಾಲದ ಉರಿನಾಲಗೆಯ ಮೇಲೀಗ ಪ್ರೀತಿಯ ಬುರುಗು ಮೂಡಿಕೊಂಡಿದೆ. ಇವರಿಬ್ಬರ ಕಾಂಬಿನೇಷನ್ನಿನ ಸಿನಿಮಾ ಅದ್ಯಾವ ದಾಖಲೆ ಬರೆಯುತ್ತೋ, ಗೆಲುವು ದಕ್ಕಿಸಿಕೊಳ್ಳುತ್ತದೋ ಗೊತ್ತಿಲ್ಲ; ಮುನಿಸು ಮರೆತು ಹಳೆಯ ಸ್ನೇಹವೊಂದು ಜೊತೆಗೂಡಿರೋದಂತೂ ಸತ್ಯ.

ಅತ್ತ ಪ್ರೇಮ್ ಜೊತೆ ರಾಜಿಯಾಗಿರುವ ದರ್ಶನ್ ಇತ್ತ ಮೀಡಿಯಾಗಳೊಂದಿಗಿನ ಕದನಕ್ಕೂ ಕೂಡಾ ಫುಲ್ ಸ್ಟಾಪ್ ಇಟ್ಟಿದ್ದಾರೆ. ಪತ್ರವೊಂದರ ಮೂಲಕ ಮಾಧ್ಯಮಗಳ ಜೊತೆ ಸ್ನೇಹಕ್ಕೆ ಕೈ ಚಾಚಿದ್ದಾರೆ. ವಿಶೇಷವಾಗಿ ದೃಷ್ಯ ಮಾಧ್ಯಮಗಳಿಗೂ ದರ್ಶನ್ ಗೂ ತಿಕ್ಕಾಟ ಆರಂಭವಾಗಿತ್ತು. ಹಲವಾರು ಪಲ್ಲಟಗಳ ನಡುವೆಯೂ ಮಾಧ್ಯಮ ಘನತೆಯನ್ನು ಕಾಪಿಟ್ಟುಕೊಂಡಿರುವ ಪ್ರಿಂಟ್ ಮೀಡಿಯಾ ಇದರಿಂದ ಆಚೆ ಉಳಿದಿತ್ತು. ಈ ವಿವಾದದ ಆಸುಪಾಸಲ್ಲಿಯೇ ದರ್ಶನ್ ನಿರ್ದೇಶಕ ಪ್ರೇಮ್ ಬಗ್ಗ ಕೇವಲವಾಗಿ ಮಾತಾಡಿ ಬಿಟ್ಟಿದ್ದರು. ಯಾವುದ ಪ್ರಶ್ನೆ ಎದುರಾದಾಗ ಅದಾಗ ತಾನೇ ಗಡಂಗಿನಿಂದ ಎದ್ದು ಬಂದವರಂತೆ `ಅವ್ನೇನು ಪುಡಾಂಗಾ’ ಎಂಬರ್ಥದಲ್ಲಿ ಬಡಬಡಿಸಿದ್ದರು. ಏನೇ ಇದ್ದರೂ ಇಪ್ಪತ್ತು ವರ್ಷಗಳ ಹಿಂದೆ ದರ್ಶನ್‍ಗಾಗಿ ಸಿನಿಮಾ ನಿರ್ದೇಶನ ಮಾಡಿದ್ದವರು ಪ್ರೇಮ್. ದರ್ಶನ್ ಯಶಸ್ಸಿನ ಹಾದಿಯಲ್ಲಿ ಪ್ರೇಮ್ ಪಾತ್ರವನ್ನು ಅಲ್ಲಗಳೆಯಲಾಗೋದಿಲ್ಲ.

ಆದರೂ ನಡೆದು ಬಂದ ಹಾದಿಯನ್ನು ಮರೆತವರಂತೆ ದರ್ಶನ್ ಮೆರೆದಿದ್ದರು. ಇದೀಗ ಪ್ರೇಮ್ ಜೊತೆ ಮತ್ತೆ ಜೊತೆಯಾದ ದರ್ಶನ್ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ಮೂದಲಿಕೆ ಶುರುವಾಗಿದೆ. ಅದು ಸಹಜ. ಅದರ ಫಲವಾಗಿಯೇ ಪುಡಾಂಗ್ ಪ್ರೇಮ್ ಜೊತೆ ದಾಸನ ಚಿತ್ರ ಎಂಬಂಥಾ ಅಭಿಪ್ರಾಯವೂ ಮೂಡಿಕೊಂಡಿದೆ. ಅದರ ಹಿಂದೆ ದರ್ಶನ್ ಅಹಮ್ಮಿಕೆಯ ಪಾಲಿದೆ. ದರ್ಶನ್ ಪ್ರೇಮ್ ಜೊತೆ ಮತ್ತೆ ಒಂದುಗೂಡುವಲ್ಲಿ ರಕ್ಷಿತಾ ಪಾತ್ರವೂ ಇದೆ. ರತನ್ನ ಗಂಡನ ಬಗ್ಗೆ ಆತ್ಮೀಯ ಸ್ನೇಹಿತನೇ ಬಾಯಿಗೆ ಬಂದಂತೆ ಮಾತಾಡಿದ್ದನ್ನು ಕಂಡು ರಕ್ಷಿತಾ ನೊಂದುಕೊಂಡಿದ್ದರು. ಆ ಬಳಿಕ ಒದಷ್ಟು ಮಾತುಕಥೆಗಳಾಗಿ ಇಬ್ಬರೂ ಮುನಿಸು ಮರೆತು ಒಂದಾಗಿದ್ದಾರಷ್ಟೆ. ಇದು ನಿಜಕೂ ಸಕಾರಾತ್ಮಕ ಬೆಳವಣಿಗೆ. ಸನೇಹದಲ್ಲಿ ಬಿರುಕು ಮೂಡಿದಾಗ ದೂರಾಓದು ಮತ್ತೆ ಕಚಾಚೋದು ಸಹಜ. ಆದರೆ ಸ್ನೇಹದ ಹೆಸರಲ್ಲಿ ಬಗನೀ ಗೂಟ ಹೆಟ್ಟುವ, ಹೆಜ್ಜೆ ಹೆಜ್ಜೆಗೂ ಮಿಣ್ಣಗೆ ವಂಚನೆ ಮಾಡುತ್ತಾ ಸಾಗುವ, ಯಾರದ್ದೋ ಬೆವರಲ್ಲಿ ತಮ್ಮ ಸಾಮ್ರಾಜ್ಯ ಕಟ್ಟಲು ನೋಡುವ ನಸುಗುನ್ನಿಗಳನ್ನು ಎಂದಿಗೂ ಕ್ಷಮಿಸಬಾರದು. ದರ್ಶನ್ಗೆ ಪ್ರೇಮ್ ಕಡೆಯಂದ ಅಂಥಾ ಯಾವುದೇ ದ್ರೋಹವಾದಂತಿಲ್ಲ. ಆದ್ದರಿಂದಲೇ ಈ ಸ್ನೇಹ ಮತ್ತೆ ಕೂಡಿಕೊಂಡಿದೆ.

ದರ್ಶನ್ ಪಾಲಿಗೆ ಇಷ್ಟು ಕಾಲ ಇದ್ದದ್ದು ಅಗ್ನಿ ಪರೀಕ್ಷೆ. ಆ ಹಾದಿಯಲ್ಲಿ ಹಲವಾರು ಕಟು ಸತ್ಯಗಳನ್ನವರು ಮನದಟ್ಟು ಮಾಡಿಕೊಂಡಂತಿದೆ. ಈ ಕ್ಷಣಕ್ಕೆ ಸಿಕ್ಕ ಗೆಲುವ, ಸ್ಟಾರ್ ಗಿರಿಗಳೆಲ್ಲವೂ ಕ್ಷಣಿಕ. ಜನರ ಮನಸಲ್ಲುಳಿಯುವುದು ವ್ಯಕ್ತಿತ್ವ ಮಾತ್ರ. ನಿಜ ದೃಷ್ಯ ಮಾಧ್ಯಮದ ಕೆಲ ಮಂದಿ ಘನತೆ ಮರೆತು ಸ್ಟಾರುಗಳ ಬೆಂಬೀಳುತ್ತಾರೆ. ಈಗ ದರ್ಶನ್ ಹೇಳಿಕೊಂಡಿರುವಂತೆ, ಒಬ್ಬನ್ಯಾವನೋ ಅವರಿಗೆ ನೋವಾಗುವಂತೆ ಮಾಡಿದ್ದಾನೆ. ಅದೊಂದು ವಿಚಾರಕ್ಕಾಗಿ ಒಂದಿಡೀ ಮಾಧ್ಯಮವನ್ನೇ ಶಾಟಕ್ಕೆ ಸಮ ಅಂದುಬಿಟ್ಟರೆ ಹೇಗೆ? ಮಾನವಂತರಾಗುಳಿದ ಕೆಲ ಮಾಧ್ಯಮದ ಮಂದಿ ದರ್ಶನ್ ರನ್ನೂ ಕೂಡಾ ಅವರ ಮಾತಿನಂತೆಯೇ ಕೊಡವಿಕೊಂಡು ಮುಂದುವರೆದರು. ಹಾಗೆ ನೋಡಿದರೆ, ಮಾಧ್ಯಮ ಜಗತ್ತು ಕೂಡಾ ದರ್ಶನ್ ರಂಥಾ ಅದೆಷ್ಟೋ ಸ್ಟಾರ್‍ಗಳನ್ನು ಕಂಡಿದೆ. ಅಲ್ಲಿ  ಸಕಾರಣವಾಗಿ ವಿಮರ್ಶಿಸುವ ನಿಷ್ಠುರವಾದಿಗಳೂ ಇದ್ದಾರೆ. ಇಂಥಾ ವಿಮರ್ಶೆಗಳು ಕೇಳಿ ಬಂದಾಗ ಮೈಮೇಲೇರಿ ಹೋಗೋ ಸೆಲೆಬ್ರಿಟಿಗಳನ್ನೂ ದರ್ಶನ್ ಇನ್ನು ಮುಂದೆ ಹದ್ದುಬಸ್ತಿನಲ್ಲಿಟ್ಟುಕೊಳ್ಳಬೇಕಿದೆ. ಇನ್ನಾದರೂ ದರ್ಶನ್ ವಿವಾದಗಳಿಂದ ಮುಕ್ತರಾಗಲೆಂಬುದು ಹಾರೈಕೆ!

The post challenging star darshan: ಗಡಂಗು ಪುಡಾಂಗು ಮತ್ತು ಗೆಳೆತನ! appeared first on Cini Shodha.