veena sundar – Cini Shodha

Bilichukki Hallihakki Review: ಮೈಮನಸುಗಳಿಗಾದ ಗಾಯಗಳ ಮುಖಾಮುಖಿ!

Santhosh Bagilagadde — Sat, 25 Oct 2025 05:49:58 +0000

ಪ್ಯಾನಿಂಡಿಯಾ ಅಲೆ, ಮಾಸ್ ಸಿನಿಮಾಗಳ ಭರಾಟೆಗಳ ನಡುವೆ ಒಂದು ಭಿನ್ನ ಪ್ರಯತ್ನದ ಸುಳಿವು ಸಿಕ್ಕರೂ ಸಾಕು; ಕನ್ನಡದ ಪ್ರೇಕ್ಷಕರು ರೋಮಾಂಚಿತರಾಗುತ್ತಾರೆ. ಹಾಗಿರುವಾಗ ವಿಟಿಲಿಗೋದಂಥಾ ಸಮಸ್ಯೆಯ ಸುತ್ತ ಕಮರ್ಶಿಯಲ್ ಹಾದಿಯಲ್ಲಿ ರೂಪುಗೊಂಡಿರುವ ಚಿತ್ರವೊಂದು ತಯಾರಾಗಿದೆ ಎಂದರೆ ಕುತೂಹಲ ಮೂಡದಿರಲು ಸಾಧ್ಯವೇ? ಮಹಿರಾ ಖ್ಯಾತಿಯ ಮಹೇಶ್ ಗೌಡ ನಿರ್ಮಾಣ ಮಾಡಿ, ನಿರ್ದೇಶಿಸಿ ನಟಿಸಿರುವ ಬಿಳಿಚುಕ್ಕಿ ಹಳ್ಳಿಹಕ್ಕಿ ಚಿತ್ರ ಪ್ರೇಕ್ಷಕರನ್ನು ಸೆಳೆದುಕೊಂಡಿದ್ದದ್ದು ಆ ಕಾರಣದಿಂದಲೇ. ಅಂಥಾದ್ದೊಂದು ಗಾಢ ನಿರೀಕ್ಷೆಯ ಒಡ್ಡೋಲಗದಲ್ಲಿ ಬಿಳಿಚುಕ್ಕಿ ಹಳ್ಳಿಹಕ್ಕಿ ಚಿತ್ರ ಬಿಡುಗಡೆಗೊಂಡಿದೆ.

ಎಲ್ಲರಿಗೂ ಗೊತ್ತಿರುವಂತೆ ವಿಟಿಲಿಗೋ ಅಥವಾ ತೊನ್ನಿನ ಸುತ್ತ ಹಬ್ಬಿಕೊಂಡಿರುವ ಕಥೆ ಈ ಚಿತ್ರದ ಜೀವಾಳ. ತೊನ್ನೆಂಬುದು ನಮಗೇನೂನ ಅಪರಿಚಿತವಾದ ದೈಹಿಕ ಸಮಸ್ಯೆಯಲ್ಲ. ಮೈ ತುಂಬಾ ಬಿಳಿಮಚ್ಚೆ ಹಬ್ಬಿರುವ ಜೀವಗಳು ನಮ್ಮ ಸುತ್ತಲೇ ಸುಳಿದಾಡುತ್ತಿರುತ್ತವೆ. ವಿಚಿತ್ರವೆಂದರೆ, ದೇಹದೊಳಗಿನ ಕೆಲ ವ್ಯತ್ಯಯಗಳಿಂದ ಹರಡಿಕೊಳ್ಳುವ ಈ ಕಾಯಿಲೆಯಲ್ಲದ ಕಾಯಿಲೆಯ ಬಗ್ಗೆ ಈ ಸಮಾಜದಲ್ಲಿ ಒಂದಷ್ಟು ಮೌಢ್ಯ ತುಂಬಿಕೊಂಡಿದೆ. ಅದುವೇ ತೊನ್ನುಪೀಡಿತ ವ್ಯಕ್ತಿಗಳು ಸಾಮಾಜಿಕವಾಗಿಯೂ ಘಾಸಿಗೊಳ್ಳುವಂತೆ ಮಾಡುತ್ತದೆ. ಸ್ವತಃ ತೊನ್ನಿನ ಸಮಸ್ಯೆ ಹೊಂದಿರುವ ಮಹೇಶ್ ಗೌಡ ಅವರು ಕೌಟುಂಬಿಕ ಹಿನ್ನೆಲೆಯಲ್ಲಿ ಬಿಳಿಚುಕ್ಕಿ ಹಳ್ಳಿಹಕ್ಕಿಯ ಕಥೆಯನ್ನು ಹರವಿದ್ದಾರೆ.

ಶಿವ ಅಮ್ಮನ ಪ್ರೀತಿಯ ಕೂಸು. ಬದುಕಿಗೆ ಬೇಕಾದ ಕಸುಬಿನ ಮೂಲವೂ ಆತನ ಮುಂದಿರುತ್ತೆ. ಆದರೆ ಆತನನ್ನು ಹೆಜ್ಜೆ ಹೆಜ್ಜೆಗೂ ಎಳವೆಯಿಂದಲೇ ಕಾಡಿಸಲಾರಂಭಿಸಿದ್ದು ಮೈಮೇಲೆ ಮೂಡಿಕೊಂಡಿದ್ದ ತೊನ್ನಿನ ಕಲೆಗಳು. ಅಮ್ಮನ ಅದ್ಮ್ಯ ಪ್ರೀತಿ, ಆಕೆ ನೀಡುವ ಬೆಚ್ಚನೆಯ ಭಾವದಾಚೆಗೂ ಸಾಮಾಜಿಕವಾಗಿ ತನ್ನತ್ತ ಬೀರುವ ತೀಕ್ಷ್ಣ ದೃಷ್ಟಿ ಮತ್ತು ಸಹಪಾಠಿಗಳ ಮೂದಲಿಕೆಗಳು ಶಿವನ ಮನಸಿಗೂ ಗಾಯವಾಗಿಸಿರುತ್ತೆ. ಇಂಥಾ ಹುಡುಗ ಬೆಳೆದು ದೊಡ್ಡವನಾಗಿ, ತನ್ನ ಅನ್ನ ತಾನೇ ಸಂಪಾದಿಸುವಷ್ಟು ಶಕ್ತನಾದರೂ ಕೂಡಾ ಮೈಮೇಲಿನ ತೊನ್ನು ಕೀಳರಿಮೆಯಾಗಿ ಕಾಡಲಾರಂಭಿಸುತ್ತೆ. ಅಮ್ಮನ ಒತ್ತಾಸೆಗೆ ಕಟ್ಟು ಬಿದ್ದು ಮದುವೆಯಾಗುವ ಪ್ರಯತ್ನದಲ್ಲೂ ಮೈಮೇಲಿನ ಬಿಳಿ ಕಲೆಗಳು ವಿಲನ್‌ನಂತೆ ಕಂಗೆಡಿಸುತ್ತವೆ. ಆತನ ಮನಸಿನ ಗಾಯ ಮತ್ತಷ್ಟು ವ್ರಣವಾಗುತ್ತೆ.

ಇದೆಲ್ಲದರ ನಡುವೆ ಓರ್ವ ಹುಡುಗಿ ಶಿವನ ಬದುಕಿಗೆ ಬಂದಲ್ಲಿಂದಾಚೆಗೆ ಕಥೆ ಗರಿಬಿಚ್ಚಿಕೊಳ್ಳುತ್ತೆ. ಹಾಗೆ ಶಿವನ ಬದುಕಿಗೆ ಬಂದವಳ ಮನಸಲ್ಲೂ ಎಂದೂ ಮಾಸದ ಗಾಯವೊಂದಿರುತ್ತೆ. ಕಥೆಯುದ್ದಕ್ಕೂ ಅವರೊಳಗಿನ ಗಾಯಗಳು ಮುಖಾಮುಖಿಯಾಗುತ್ತವೆ. ಒಂದಷ್ಟು ಹಂತದಲ್ಲಿ ಸೀರಿಯಲ್ಲಿನ ಛಾಯೆ ಕಥೆಯ ಗಾಂಭೀರ್ಯಕ್ಕೆ ಪೆಟ್ಟು ಕೊಟ್ಟಿತೇನೋ ಅನ್ನಿಸೋದು ನಿಜ. ಇದೂ ಸೇರಿ ಸಿನಿಮಾದ ಅಲ್ಲಲ್ಲಿ ಒಂದಷ್ಟು ಕೊರತೆಗಳು ಕಾಣಿಸುತ್ತವೆ. ಆದರೆ ಕೈಮ್ಯಾಕ್ಸ್ ಸನ್ನಿವೇಶ ಎಲ್ಲ ಕೊರತೆಗಳನ್ನೂ ನೀಗಿಸುತ್ತದೆ. ವಿಶೇಷವಾಗಿ ತೊನ್ನಿನ ಸುತ್ತಲೇ ರೂಪುಗೊಂಡ ಈ ಸಿನಿಮಾ, ಅದರ ಬಗ್ಗೆ ಮ ನಮುಟ್ಟುವಂಥಾ ಸಂದೇಶ ರವಾನಿಸುವಲ್ಲಿ ಗೆದ್ದಿದೆ. ಅದು ಮಹೇಶ್ ಗೌಡರ ಒಟ್ಟಾರೆ ಶ್ರಮದ ಸಾರ್ಥಕ್ಯದಂತೆಯೂ ಭಾಸವಾಗುತ್ತದೆ.

ಎಲ್ಲ ಜವಾಬ್ದಾರಿಗಳನ್ನು ಮೈಮೇಲೆಳೆದುಕೊಂಡಿದ್ದರೂ ಓರ್ವ ನಟನಾಗಿಯೂ ಮಹೇಶ್ ಗೌಡ ಆಪ್ತವಾಗುತ್ತಾರೆ. ಭಾವಗಳ ಮೂಲಕವೇ ಸಂವಹನ ನಡೆಸುವ ನಾಯಕಿಯಾಗಿ ಕಾಜಲ್ ಕುಂದರ್ ಮನಸಿಗಿಳಿಯುತ್ತಾರೆ. ವೀಣಾ ಸುಂದರ್, ಲಕ್ಷ್ಮಿ ಸಿದ್ದಯ್ಯ, ಜಹಾಂಗೀರ್, ರವಿಭಟ್ ಸೇರಿದಂತೆ ಎಲ್ಲ ಕಲಾವಿದರೂ ತಂತಮ್ಮ ಪಾತ್ರದ ಒಳಗಿಳಿದು ನಟಿಸಿದ್ದಾರೆ. ಪ್ರತಿಭಾನ್ವಿತ ಪೋಶಕ ನಟರಾಗಿ ಗುರುತಿಸಿಕೊಂಡಿರುವ ರವಿ ಭಟ್ ನಾಯಕಿಯ ತಂದೆಯಾಗಿ ಅದ್ಭುತವಾಗಿ ನಟಿಸಿದ್ದಾರೆ. ಅವರ ಪಾತ್ರ ಒಟ್ಟಾರೆ ಸಿನಿಮಾದ ಅಂತಃಶಕ್ತಿಯಂತಿದೆ. ಇನ್ನು ತೊನ್ನಿನ ಸಮಸ್ಯೆ ಹೊಂದಿರುವ ಮಗನನ್ನು ಕೀಳರಿಮೆ ಕಾಡದಂತೆ ಕಾಪಿಟ್ಟುಕೊಳ್ಳುವ, ಪ್ರತೀ ಹಂತದಲ್ಲಿಯೂ ನೆತ್ತಿ ನೇವರಿಸಿ ಜೊತೆಯಾಗುವ ಲಕ್ಷ್ಮಿ ಸಿದ್ದಯ್ಯರ ತಾಯಿ ಪಾತ್ರ ನೋಡುಗರಿಗೆ ತಾಯ್ತನದ ಮಧುರಾನುಭೂತಿಯನ್ನು ದಾಟಿಸುವಂತಿದೆ. ಇನ್ನು ಅಳಿಯನ ತೊನ್ನಿನ ಸಮಸ್ಯೆಯನ್ನು ಆಡಿಕೊಳ್ಳುತ್ತಲೇ ಮಗಳ ಬದುಕಿಗೆ ಮಗ್ಗುಲಮುಳ್ಳಾಗುವ ಬಜಾರಿ ತಾಯಿಯಾಗಿ ವೀಣಾ ಸುಂದರ್ ಅವರ ನಟನೆಯೂ ಈ ಸಿನಿಮಾದ ಹೈಲೈಟ್‌ಗಳಲ್ಲೊಂದು. ಆ ಪಾತ್ರ ತೊನ್ನಿನ ಸಮಸ್ಯೆಯ ಬಗ್ಗೆ ಈ ಸಮಾಜದಲ್ಲಿರುವ ಮನಃಸ್ಥಿತಿಯ ರೂಪಕದಂತಿದೆ. ಭೋಳೇ ಸ್ವಭಾವದ ಮಾವನಾಗಿ ಜಹಾಂಗೀರ್ ಅವರ ನಟನೆಯೂ ಗಮನ ಸೆಳೆಯುತ್ತದೆ.

The post Bilichukki Hallihakki Review: ಮೈಮನಸುಗಳಿಗಾದ ಗಾಯಗಳ ಮುಖಾಮುಖಿ! appeared first on Cini Shodha.

Bilichukki Hallihakki Movie: ಅವಳು ಅಂತಿಂಥಾ ಅಮ್ಮನಲ್ಲ!

Santhosh Bagilagadde — Thu, 23 Oct 2025 18:34:05 +0000

ಮಹೇಶ್ ಗೌಡ ನಿರ್ಮಾಣ ಮಾಡಿ, ನಿರ್ದೇಶಿಸಿ ನಾಯಕನಾಗಿ ನಟಿಸಿರುವ ಬಿಳಿಚುಕ್ಕಿ ಹಳ್ಳಿಹಕ್ಕಿ ಚಿತ್ರ ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ. ಪುನೀತ್ ರಾಜ್ ಕುಮಾರ್ ಅವರ ಪ್ರೇರಣೆಯಿಂದ ಈ ಸಿನಿಮಾದ ಕಥೆ ಹೊಸೆದಿದ್ದ ನಿರ್ದೇಶಕರು, ಕಥೆಯ ಘಟ್ಟದಲ್ಲಿಯೇ ಆಯಾ ಪಾತ್ರಗಳನ್ನು ಇಂತಿಂಥಾ ಕಲಾವಿದರೇ ನಿರ್ವಹಿಸಬೇಕೆಂದು ನಿರ್ಧರಿಸಿದ್ದರಂತೆ. ವಿಶೇಷವೆಂದರೆ, ಆ ಎಲ್ಲ ಕಲಾವಿದರೂ ಕೂಡಾ ಕಥೆ ಕೇಳಿದಾಕ್ಷಣವೇ ಅತ್ಯಂತ ಸಂಭ್ರಮದಿಂದ ಒಪ್ಪಿಕೊಂಡಿದ್ದರು. ಅದೇ ಹುರುಪಿನೊಂದಿಗೆ ತಂತಮ್ಮ ಪಾತ್ರಗಳಿಗೆ ಜೀವ ತುಂಬಿದ್ದರು. ಬಿಡುಗಡೆಯ ಹೊಸ್ತಿಲಿಗೆ ಬಂದು ನಿಂತಿರುವ ಈ ಘಳಿಗೆಯಲ್ಲಿ ಎಲ್ಲ ಕಲಾವಿದರೊಳಗೂ ಅತ್ಯಪರೂಪದ ಸಿನಿಮಾವೊಂದರ ಭಾಗವಾದ ಧನ್ಯತಾ ಭಾವವಿದೆ. ಕಿರುತೆರೆ, ಹಿರಿತೆರೆಗಳಲ್ಲಿಯೂ ಥರ ಥರದ ಪಾತ್ರಗಳ ಮೂಲಕ ಪರಿಚಿತರಾಗಿರುವ ವೀಣಾ ಸುಂದರ್ ಬಿಳಿಚುಕ್ಕಿ ಹಳ್ಳಿಹಕ್ಕಿಯ ಮಹತ್ವದ ಪಾತ್ರವೊಂದಕ್ಕೆ ಜೀವತುಂಬಿದ್ದಾರೆ.

ಕಿರುತೆರೆ ಜಗತ್ತಿನಲ್ಲಿ ತಮ್ಮದೇ ಛಾಪು ಮೂಡಿಸಿರುವ ವೀಣಾ ಸುಂದರ್ ಅನೇಕ ಸಿನಿಮಾಗಳ ಮೂಲಕ ಹಿರಿತೆರೆಗೂ ಚಿರಪರಿಚಿತರು. ಯಾವುದೇ ಪಾತ್ರ ಸಿಕ್ಕರೂ ಅದಕ್ಕೆ ನ್ಯಾಯ ಒದಗಿಸೋ ಛಾತಿ ಹೊಂದಿರುವ ಅವರಿಗೆ ಅಪರೂಪದ ಪಾತ್ರಗಳೇ ಒಲಿಯುತ್ತಾ ಬಂದಿವೆ. ಅದರಲ್ಲಿಯೂ ಅಮ್ಮನಾಗಿ ಅನೇಕ ಧಾರಾವಾಹಿಗಳಲ್ಲಿ, ಸಿನಿಮಾಗಳಲ್ಲಿ ವೀಣಾ ಸುಂದರ್ ಕಾಣಿಸಿಕೊಂಡಿದ್ದಾರೆ. ಬಿಳಿಚುಕ್ಕಿ ಹಳ್ಳಿಹಕ್ಕಿ ಚಿತ್ರದಲ್ಲಿಯೂ ಅವರು ನಾಯಕಿಯ ತಾಯಿಯ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಆದರೆ, ಇಲ್ಲಿರೋದು ಮೃದು ಸ್ವಭಾವದ ಟಿಪಿಕಲ್ ಅಮ್ಮನಲ್ಲ; ಮಗಳ ಏಳಿಗೆಯ ಸದುದ್ದೇಶವಿದ್ದರೂ, ಬಿರುಸು ಮಾತಿನ ಮೂಲಕ ಮಗಳ ಮನಸಿಗೆ ಘಾಸಿಯುಂಟು ಮಾಡುವ, ಮೆಲುಮಾತಿನಲ್ಲಿಯೇ ತಿಳಿಹೇಳ ಬಂದ ಗಂಡನ ಬಾಯಿ ಮುಚ್ಚಿಸುವ ಘಾಟಿ ಅಮ್ಮನ ಪಾತ್ರ!

ನಿರ್ದೇಶಕ ಮಹೇಶ್ ಗೌಡ ಈ ಸಿನಿಮಾದ ಪ್ರತೀ ಪಾತ್ರಗಳನ್ನೂ ಕೂಡಾ ಅತ್ಯಂತ ಜತನದಿಂದ ರೂಪಿಸಿದ್ದಾರೆ. ಒಂದಕ್ಕಿಂತ ಒಂದು ಭಿನ್ನವಾದ್ ಪಾತ್ರಗಳು ಇಲ್ಲಿವೆ. ವೀಣಾ ಸುಂದರ್ ನಿರ್ವಹಿಸಿರುವ ತಾಯಿಯ ಪಾತ್ರಕ್ಕೆ ಬೇರೆಯದ್ದೇ ಥರದ ಛಾಯೆಯಿದೆಯಂತೆ. ಅದರಲ್ಲಿನ ಮಾತಗು, ವರ್ತನೆ, ಸಂಭಾಷಣೆಗಳು ಕೆಲ ಘಟ್ಟದಲ್ಲಿ ತನ್ನ ಬಗ್ಗೆ ತನಗೇ ಇರುಸುಮುರುಸುಂಟು ಮಾಡಿದ್ದವೆಂದು ಸ್ವತಃ ವೀಣಾ ಅವರೇ ಹೇಳಿಕೊಂಡಿದ್ದಿದೆ. ಆ ಪಾತ್ರವನ್ನು ಅಷ್ಟೊಂದು ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟಿರುವ ನಿರ್ದೇಶಕರ ಬಗ್ಗೆಯೂ ಅವರಲ್ಲೊಂದು ಹೆಮ್ಮೆಯಿದೆ. ವೀಣಾ ಸುಂದರ್ ಅವರು ನಿವ ಹಿಸಿರುವ ಪಾತ್ರವೂ ಸೇರಿದಂತೆ ಒಂದಿಡೀ ಚಿತ್ರ ನಾಳಿನ ಮುಂಜಾವದ ಹೊತ್ತಿಗೆಲ್ಲ ನಿಮ್ಮೆದುರು ತೆರೆದುಕೊಳ್ಳಲಿದೆ.

ಪಾತ್ರ ಎಂಥಾದ್ದೇ ಇದ್ದರೂ ಅದು ನೋಡುಗರಿಗೆ ನೇರವಾಗಿ ನಾಟುವಂತಿದ್ದರೆ ಕಲಾವಿದರ ಪಾಲಿಗೆ ಅದಕ್ಕಿಂತಲೂ ಖುಷಿ ಬೇರೊಂದಿಲ್ಲ. ತನ್ನ ಪಾತ್ರಕ್ಕೆ ಅಂಥಾದ್ದೇ ಚಹರೆ ಇರೋದರಿಂದ, ಅದನ್ನು ಪ್ರೇಕ್ಷಕರು ಯಾವ ರೀತಿಯಲ್ಲಿ ಸ್ವೀಕರಿಸುತ್ತಾರೆಂಬ ಕುತೂಹಲ, ಈ ಸಿನಿಮಾ ಎಲ್ಲರಿಗೂ ಇಷ್ಟವಾಗಿ ಗೆಲುವು ದಾಖಲಿಸುತ್ತದೆಂಬ ಭರವಸೆ ವೀಣಾ ಸುಂದರ್ ಅವರದ್ದು. ಈ ಚಿತ್ರದಲ್ಲಿ ಕಾಜಲ್ ಕುಂದರ್ ನಾಯಕಿಯಾಗಿ ನಟಿಸಿದ್ದಾರೆ. ವೀಣಾ ಸುಂದರ್, ರವಿ ಭಟ್, ಜಹಾಂಗೀರ್ ಮತ್ತು ಲಕ್ಷ್ಮಿ ಸಿದ್ದಯ್ಯ ಪ್ರಮುಖ ಪಾತ್ರಗಳಿಗೆ ಜೀವ ತುಂಬಿದ್ದಾರೆ. ಕಿರಣ್ ಸಿಹೆಚ್‌ಎಂ ಛಾಯಾಗ್ರಹಣ, ಮೊನಿಷ್ ಸಂಕಲನ, ರಿಯೋ ಆಂಟನಿ ಸಂಗೀತ ಮತ್ತು ಹಿನ್ನೆಲೆ ಸಂಗೀತ, ಅದಿತಿ ನಾರಾಯಣ್ ಮತ್ತು ರಘು ನೃತ್ಯ ನಿರ್ದೇಶನ, ಪ್ರತಾಪ್ ಭಟ್ ಮತ್ತು ಮಹೇಂದ್ರ ಗೌಡ ಸಾಹಿತ್ಯ ಈ ಚಿತ್ರಕ್ಕಿದೆ.

The post Bilichukki Hallihakki Movie: ಅವಳು ಅಂತಿಂಥಾ ಅಮ್ಮನಲ್ಲ! appeared first on Cini Shodha.