ಧ್ರುವ್ ವಿಕ್ರಂ ನಿರೀಕ್ಷೆಗೂ ಮೀರಿ ತಮಿಳು ಚಿತ್ರರಂಗದಲ್ಲಿ ಮಿಂಚುತ್ತಿದ್ದಾನೆ. ಅದ್ಭುತ ನಟನಾಗಿರುವ ತಂದೆಯ ಗರಡಿಯಲ್ಲಿ ಪಳಗಿಕೊಂಡಿರುವ ಧ್ರುವ್ ಈಗಾಗಲೇ ಮೂರು ಸಿನಿಮಾಗಳ ಮೂಲಕ ಮುಖ್ಯ ನಟನಾಗುವತ್ತ ದಾಪುಗಾಲಿಡುತ್ತಿದ್ದಾನೆ. ಇದೀಗ ಆತನ ನಾಲಕ್ಕನೇ ಚಿತ್ರಕ್ಕಾಗಿ ತಂಡವೊಂದು ಒಗ್ಗೂಡಿದೆ. ಸದಾ ಹೊಸತನ, ಹೊಸಾ ಪಾತ್ರಗಳ ಧ್ಯಾನದಲ್ಲಿರುವವರು ವಿಕ್ರಮ್. ಖುದ್ದು ಅವರೇ ತನ್ನ ಮಗನ ಸಿನಿಮಾದ ಪ್ರತಿಯೊಂದನ್ನೂ ನಿರ್ಧರಿಸುತ್ತಿದ್ದಾರೆ. ವಿಶೆಷವೆಂದರೆ, ಯುವ ನಿರ್ದೇಶಕನೊಬ್ಬನಿಗೆ ಸಾರಥ್ಯ ವಹಿಸಿದ್ದಾರೆ. ಸಾಮಾನ್ಯವಾಗಿ ವಿಕ್ರಂ ಥರದ ನಟರು ಪಳಗಿಕೊಂಡ ನಿರ್ದೇಶಕರಿಗೆ ಮಾತ್ರವೇ ಆದ್ಯತೆ ಕೊಡುತ್ತಾರೆ. ಆದರೆ, ಈ ಸಿನಿಮಾದಲ್ಲಿ ಹೊಸಾ ಹುಡುಗ ದೀಪಕ್ ರೆಡ್ಡಿಗೆ ಸ್ವತಂತ್ರ ನಿರ್ದೇಶಕನಾಗೋ ಅವಕಾಶ ಲಭಿಸಿದೆ.

ದೀಪಕ್ ರೆಡ್ಡಿ ಈ ಹಿಂದೆ ಕಿರುಚಿತ್ರವೊಂದನ್ನು ನಿರ್ದೇಶನ ಮಾಡಿದ್ದ. ಇದರತ ಬಗ್ಗೆ ವ್ಯಾಪಕ ಮೆಚ್ಚುಗೆ ಕೇಳಿ ಬಂದಿತ್ತು.ಆ ಕಿರುಚಿತ್ರವನ್ನು ನೋಡಿ, ದೀಪಕ್‌ನ ನಿರ್ದೇಶನಾ ಕೌಶಲ್ಯವನ್ನು ಮೆಚ್ಚಿಕೊಂಡಿರೋ ವಿಕ್ರಂ ಮಗನ ನಾಲಕ್ಕನೇ ಚಿತ್ರದ ಜವಾಬ್ದಾರಿಯನ್ನು ಹೊರಿಸಿದ್ದಾರೆ. ಇದೀಗ ಈ ಚಿತ್ರದ ತಾರಾಗಣ ಮತ್ತು ತಾಂತ್ರಿಕ ವರ್ಗದ ಭರ್ತಿ ಕಾರ್ಯ ಭರದಿಂದ ಸಾಗುತ್ತಿದೆ. ಆದರೆ, ಆರಂಭದಲ್ಲಿಯೇ ನಾಯಕಿಯಾಗಿಕ ರುಕ್ಮಿಣಿ ವಸಂತ್ ನಿಕ್ಕಿಯಾಗಿದ್ದರಂತೆ. ಇತ್ತೀಚೆಗೆ ಕಥೆ ಕೇಳಿದ ರುಕ್ಮಿಣಿ ಕೂಡಾ ಖುಷಿಯಿಂದಲೇ ಒಪ್ಪಿಗೆ ಸೂಚಿಸಿದ್ದಾರೆ. ಈ ಹಿಂದೆ ಸಪ್ತಸಾಗರದಾಚೆ ಎಲ್ಲೋ ಚಿತ್ರದ ನಂತರ ವಿಜಯ್ ಸೇತುಪತಿಯ ಚಿತ್ರದಲ್ಲಿ ರುಕ್ಮಿಣಿ ನಾಯಕಿಯಾಗಿ ನಟಿಸಿದ್ದರು. ಆ ಚಿತ್ರ ನಿರೀಕ್ಷಿತ ಗೆಲುವು ಕಂಡಿರಲಿಲ್ಲ. ಇದೀಗ ಆಕೆ ಮತ್ತೊಂದು ಸಿನಿಮಾ ಮೂಲಕ ತಮಿಳು ಪ್ರೇಕ್ಷಕರನ್ನು ಮುಖಾಮುಖಿಯಾಗಲು ಸಜ್ಜಾಗಿದ್ದಾರೆ.

keywords: rukmini vasanth, toxic, rukmini upcoming project

The post Rukmini Vasanth: ಎಲ್ಲವನ್ನೂ ಆವರಿಸಿಕೊಂಡ ಟಾಕ್ಸಿಕ್ ಗರ್ಲ್! appeared first on Cini Shodha.

ಹಾಗೆನೋಡಿದರೆ, ಕಾಂತಾರಾ ಚಾಪ್ಟರ್೧ ಬಗ್ಗೆ ಮಿಶ್ರ ಪ್ರತಿಕ್ರಿಯೆಗಳಿದ್ದಾವೆ. ಈ ಹಿಂದೆ ಕಾಂತಾರ ತೆರೆಗಂಡಾಗ ಯಾವ ನಿರೀಕ್ಷೆಗಳೂ ಇರಲಿಲ್ಲ. ಆದರೆ, ತನ್ನೊಳಗಿನ ಬೆರಗುಗಳ ಕಾರಣದಿಂದಲೇ ಅದು ಪ್ಯಾನಿಂಡಿಯಾ ಮಟ್ಟದಲ್ಲಿ ಸಂಚಲನ ಸೃಷ್ಟಿಸಿತ್ತು. ಆದರೆ, ಚಾಪ್ಟರ್೧ ಅನ್ನು ಪ್ಯಾನಿಂಡಿಯಾ ಮಟ್ಟದಲ್ಲಿಯೇ ತಯಾರಿಸಿ, ಪ್ರೇಕ್ಷಕರ ನಿರೀಕ್ಷೆ ತಣಿಸುವ ಮಹಾ ಸವಾಲು ರಿಷಭ್ ಶೆಟ್ಟರ ಮುಂದಿತ್ತು. ಅದು ಯಾವ ನಿರ್ದೇಶಕರ ಪಾಲಿಗಾದರೂ ಅತ್ಯಂತ ಕಠಿಣವಾದ ಸವಾಲು.

Rukmini Vasanth: ಚಿತ್ರೀಕರಣದಲ್ಲಿ ನಡೆದಿದ್ದ ಅಪಘಾತವೂ ಗೆಲುವಾದ ಅಚ್ಚರಿ!

ಈವತ್ತಿಗೆ ಕಾಂತಾರಾ ಚಾಪ್ಟರ್ ೧ ಬಗ್ಗೆ ಸಮೂಹ ಸನ್ನಿಯಂತೆ ಕೆಲ ಮಂದಿ ಒಳ್ಳೆ ಮಾತುಗಳನ್ನಾಡುತ್ತಿದ್ದರೂ ಕೂಡಾ ನೋಡಿದ ಮಂದಿ ಒಂದಷ್ಟು ಹಿನ್ನಡೆಗಳನ್ನು ಎತ್ತಿ ತೋರಿಸುತ್ತಿದ್ದಾರೆ. ಅದೆಲ್ಲವೂ ಕಾಂತಾರ ಚಾಪ್ಟರ್೧ ನಿರೀಕ್ಷೆಯಂತೆ ಮೂಡಿ ಬಂದಿಲ್ಲ ಎಂಬುದನ್ನು ಧ್ವನಿಸುತ್ತಿರೋದು ಸತ್ಯ.

ಆದರೆ, ಈ ಸಿನಿಮಾ ಸಿನಿಮಾ ಮಂದಿರಗಳಲ್ಲಿ ಸಮ್ಮೋಹಕ ಫೀಲ್ ಮೂಡಿಸುವಲ್ಲಿ ಒಂದಷ್ಟು ಗೆದ್ದಿದೆ. ದೀಪಾವಳಿಯ ಶುರುವಾತಿನ ಹೊತ್ತಿಗೆಲ್ಲ ಗಳಿಕೆಯೆಂಬುದು ಏಳುನೂರು ಕೋಟಿಯ ಹಂತ ತಲುಪಿತ್ತು. ಆದರೆ ದೀಪಾವಳಿಯ ನಂತರದಲ್ಲಿ ಎಂಟು ಕೋಟಿ, ಆರುಕೋಟಿಯಂತೆ ಈ ಸಿನಿಮಾದ ಗಳಿಕೆ ಒಂದಂಕಿ ತಲುಪಿಕೊಂಡಿದೆ. ಹಿಂದಿಯಲ್ಲಿ ದೊಡ್ಡ ಸಿನಿಮಾ ಬಿಡುಗಡೆಯಾದರೂ ಕೂಡಾ ಹೇಳಿಕೊಳ್ಳುವಂಥಾ ಹಿನ್ನಡೆ ಆಗಿಲ್ಲ. ಆದರೆ, ಸಾವಿರ ಕೋಟಿಯ ಕ್ಲಬ್ ಸೇರಿಕೊಳ್ಳುವ ನಿಟ್ಟಿನಲ್ಲಿ ಕಡೇ ಕ್ಷಣದಲ್ಲಿ ಒಂದಷ್ಟು ಅಡೆತಡೆಗಳು ಎದುರಾಗಿರೋದಂತೂ ಸತ್ಯ. ಹೀಗೆ ಗಳಿಕೆಯಲ್ಲಿ ದಾಖಲೆಯತ್ತ ಮುನ್ನಡೆದರೂ ಕೂಡಾ, ಈ ಬಾರಿಯ ಗೆಲುವು ರಿಷಭ್ ಶೆಟ್ಟರಿಗೆ ಎಚ್ಚರಿಕೆಯೊಂದನ್ನು ರವಾನಿಸಿರೋದಂತೂ ನಿಜ.

ಕಾಂತಾರದ ಪಂಜುರ್ಲಿ ದೈವದ ಅಬ್ಬರ ಜನಮನ ಸೆಳೆಯುತ್ತಲೇ, ಕರಾವಳಿ ಸೀಮೆಯ ಅಷ್ಟೂ ದೈವಗಳನ್ನಿಟ್ಟುಕೊಂಡು ಮತ್ತೊಂದಷ್ಟು ಸರಣಿಯ ರೀಲು ಸುತ್ತಿ ಗೆಲ್ಲುವ ಉಮೇದು ಶೆಟ್ಟರೊಳಗಿತ್ತು. ಆದರೆ, ಅದುಹೆಚ್ಚು ಕಾಲ ರೋಚಕತೆ ಉಳಿಸಿಕೊಳ್ಳೋದಿಲ್ಲ ಎಂಬ ವಿಚಾರ ಈ ಮೂಲಕವೇ ಸಾಬೀತಾಗಿದೆ. ಕಾಂತಾರ ಗೆಲ್ಲುತ್ತಲೇ ಪಂಜುರ್ಲಿ ದೈವವನ್ನು ಗಣಮಗನಾಗಿ ಆವಾಹಿಸಿಕೊಂಡಿದ್ದೇನೋ ಎಂಬಂತೆ ರಿಷಭ್ ಶೆಟ್ಟಿ ಭಳಾಂಗು ಬಿಟ್ಟಿದ್ದರು. ಈ ಸರಣಿ ಕೂಡಾ ತುಳುನಾಡ ದೈವಗಳ ಅಸಲೀ ಕಥೆಯ ಡಾಮಕ್ಯುಮೆಂಟರಿ ಎಂಬಂತೆ ಪುಂಗಿದ್ದರು. ಅದೆಲ್ಲವೂ ಅವರಿಗೇ ಉಲ್ಟಾ ಹೊಡೆದಿದೆ. ಅಷ್ಟಕ್ಕೂ ಇಂಥಾ ದೈವಗಳನ್ನು ಬ್ಯುಸಿನೆಸ್ಸಿಗೆ ಬಳಸಿಕೊಂಡು ಯಾವುದೋ ಕಾಲವಾಗಿದೆ. ಪಂಜುರ್ಲಿ ಮುಂತಾದ ದೈವಗಳನ್ನು ಮೈಮೇಲೆ ಬರಿಸಿಕೊಳ್ಳುವ ಭ್ರಮೆ ಬಿತ್ತುತ್ತಲೇ ಕೆಲ ಖದೀಮರು ಅದೆಷ್ಟೋ ಕುಟುಂಬಗಳ ಕೈ ಖಾಲಿ ಮಾಡಿದ್ದಾರೆ. ಹಾಗಿರುವಾಗ ಶೆಟ್ಟರು ಮತ್ತೆ ಮತ್ತೆ ಅದದೇ ರೀಲು ಸುತ್ತಿದರೆ ಬರಖತ್ತಾಗೋದು ಕಷ್ಟವಿದೆ. ಇದರಾಚೆಗೆ ಕಾಂತಾರ ೧ ಚಿತ್ರದ ಅಮೋಘ ಗೆಲುವು ಕನ್ನಡಿಗರೆಲ್ಲರ ಪಾಲಿನ ಸಂಭ್ರಮವೆಂಬುದರಲ್ಲಿ ಎರಡು ಮಾತಿಲ್ಲ. ಹಾಗಂತ ಮುಂದೆಯೂ ಇಂಥಾದ್ದೇ ಸರಣಿ ಶುರುವಿಟ್ಟುಕೊಂಡರೆ ಕರಾವಳಿಯ ದೈವಗಳೂ ರಿಷಭ್ ಪಡೆಯನ್ನು ಕಾಪಾಡಲಿಕ್ಕಿಲ್ಲ!

The post Kantara Chapter 1: ಕಾಂತಾರಕ್ಕೆ ಬೆಳಕಿನ ಹಬ್ಬವೇ ಸ್ಪೀಡ್ ಬ್ರೇಕರ್! appeared first on Cini Shodha.

ರೆಟ್ರೋ ಶೈಲಿಯ ಟಾಕ್ಸಿಕ್ ಚಿತ್ರ ಅತ್ಯಂತ ಅದ್ದೂರಿಯಾಗಿ ನಿರ್ಮಾಣಗೊಳ್ಳುತ್ತಿದೆ. ಈಗಾಗಲೇ ಪ್ಯಾನಿಂಡಿಯಾ ಮಟ್ಟದ ಘಟಾನುಘಟಿ ಕಲಾವಿದರು ಈ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಕಿಯಾರಾ ಅಡ್ವಾಣಿ ನಾಯಕಿಯಾಗಿ ನಟಿಸುತ್ತಿದ್ದರೆ, ಹುಮಾ ಖುರೇಶಿ ಕೂಡಾ ಪ್ರಧಾನ ಪಾತ್ರವೊಂದಕ್ಕೆ ಬಣ್ಣ ಹಚ್ಚುತ್ತಿದ್ದಾರೆ. ಇದೇ ಹೊತ್ತಿನಲ್ಲಿ ಮತ್ತೊಂದು ಮಹತ್ವದ ಪಾತ್ರಕ್ಕೆ ನಿರ್ದೇಶಕಿ ಗೀತು ಮೋಹನ್ ದಾಸ್ ಹುಡುಕಾಟ ನಟೆಸುತ್ತಿದ್ದರು. ಕಡಸೆಗೂ ರಾಕಿ ಭಾಯ್ ಕನ್ನಡದ ಹುಡುಗಿ ರುಕ್ಮಿಣಿ ವಸಂತ್‌ರನ್ನೇ ಆಯ್ಕೆ ಮಾಡಿಕೊಂಡಿದ್ದಾರೆ. ರುಕ್ಮಿಣಿ ಯಾವ ಥರದ ಪಾತ್ರದಲ್ಲಿ ನಟಿಸಲಿದ್ದಾರೆಂಬುದೂ ಸೇರಿದಂತೆ ಎಲ್ಲ ಪ್ರಶ್ನೆಗಳಿಗೂ ಇಷ್ಟರಲ್ಲಿಯೇ ಉತ್ತರ ಸಿಗಲಿದೆ.

ರುಕ್ಮಿಣಿ ವಸಂತ್ ಪಾಲಿಗೆ ಟಾಕ್ಸಿಕ್ ಮೂಲಕ ಎರಡನೇ ಪ್ಯಾನಿಂಡಿಯಾ ಚಿತ್ರದಲ್ಲಿ ಅವಕಾಶ ಸಿಕ್ಕಂತಾಗಿದೆ. ಈಗಾಗಲೇ ಕಾಂತಾರ ಅಧ್ಯಾಯ ಒಂದರಲ್ಲಿಯೂ ರುಕ್ಮಿಣಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಕಾಂತಾರಾ ಅಂತೂ ಪ್ಯಾನಿಂಡಿಯಾ ಮಟ್ಟದಲ್ಲಿ ಹವಾ ಸೃಷ್ಟಿ ಮಾಡೋದು ಪಕ್ಕಾ. ಅದರ ಬೆನ್ನಲ್ಲಿಯೇ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಟಾಕ್ಸಿಕ್ ಕೂಡಾ ದೊಡ್ಡ ಮಟ್ಟದಲ್ಲಿಯೇ ಗೆಲ್ಲುವ ಲಕ್ಷಣಗಳಿದ್ದಾವೆ. ಈ ಎಲ್ಲವನ್ನೂ ನೋಡಿದರೆ ರುಕ್ಮಿಣಿ ವಸಂತ್ ನಿಸ್ಸಂದೇಹವಾಗಿಯೂ ಪ್ಯಾನಿಂಡಿಯಾ ಮಟ್ಟದಲ್ಲಿ ನಾಯಕಿಯಾಗಿ ಮಿಂಚಲಿದ್ದಾರೆ. ಹಾಗಂತ ಸಿನಿಮಾ ಪ್ರೇಮಿಗಳೇ ಅಭಿಪ್ರಾಯ ಪಡುತ್ತಿದ್ದಾರೆ.

The post rukmini vasanth: ಟಾಕ್ಸಿಕ್‌ನಲ್ಲಿ ರುಕ್ಮಿಣಿಯದ್ದು ಎಂಥಾ ಪಾತ್ರ? appeared first on Cini Shodha.

ಜೆರ್ಸಿ ಖ್ಯಾತಿಯ ಗೌತಮ್ ತಿನ್ನನೂರಿ ಕಿಂಗ್ಡಮ್ ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಆರಂಭದಿಂದಲೂ ಸಹ ಈ ಸಿನಿಮಾ ಸಾಕಷ್ಟು ಸುದ್ದುಇ ಮಾಡುತ್ತಲೇ ಬಂದಿತ್ತು. ವಿಜಯ್ ದೇವರಕೊಂಡ ಕೂಡಾ ಬಲು ಆಸ್ಥೆಯಿಂದಲೇ ಈ ಸಿನಿಮಾದ ಭಾಗವಾಗಿದ್ದ. ಕಿಂಗ್ಡಮ್ ಈ ಪರಿಯ ಚರ್ಚೆ ಹುಟ್ಟು ಹಾಕಿರೋದಕ್ಕೂ ಕಾರಣವಿತ್ತು. ಸತತ ಸೋಲು ಕಾಣುತ್ತಾ ಬಂದಿರುವ ವಿಜಯ್ ಪಾಲಿಗೆ ಈ ಚಿತ್ರ ಮಾಡು ಇಲ್ಲವೇ ಮಡಿ ಎಂಬಂತಿತ್ತು. ಅದೆಲ್ಲದರ ಫಲವಾಗಿ ಕಿಂಗ್ಡಮ್ ಅದ್ದೂರಿಯಾಗಿ ಮೂಡಿ ಬಂದಿದೆ. ಮೊದಲ ದಿನ ಭರ್ಜರಿ ಕಲೆಕ್ಷನ್ನನ ನೂ ಮಾಡಿದೆ. ಆದರೆ, ನಿರೀಕ್ಷೆಗೆ ತಕಮ್ಕುದಾಗಿ ಮೂಡಿ ಬಂದಿಲ್ಲ ಎಂಬಂಥಾ ಅಪಸ್ವರವೂ ಕೇಳಿ ಬರುತ್ತಿದೆ.

ಈ ಚಿತ್ರ ತಾಂತ್ರಿಕವಾಗಿ ಶ್ರೀಮಂತಿಕೆಯಿಂದ ಕೂಡಿದೆ. ಆದರೆ ಕಥೆಯಲ್ಲಿನ ಬಿಗು ಕಳೆದುಕೊಂಡು ಖುದ್ದು ವಿಜಯ್ ದೇವರಕೊಂಡನ ಅಭಿಮಾನಿಗಳನ್ನೇ ತೃಪ್ತಗೊಳಿಸಿಲ್ಲ. ಇನ್ನು ಸಿನಿಮಾ ತಂಡ, ನಿರ್ಮಾಪಕರು ಅದೇನೇ ಸರ್ಕಸ್ಸು ನಡೆಸಿದರೂ ಕೂಡಾ ನೆಗೆಟಿವ್ ವಿಮರ್ಶೆಗಳು ಹಬ್ಬಿಕೊಳ್ಳುತ್ತಿವೆ. ಅಂತೂ ಕಿಂಗ್ಡಮ್ ಕೂಡಾ ನಿರೀಕ್ಷೆಯಂತೆ ಮೂಡಿ ಬಂದಿಲ್ಲ ಎಂಬುದು ನಿಚ್ಚಳವಾಗಿದೆ. ಅಲ್ಲಿಗೆ ಲೈಗರ್ ಮೂಲಕ ಸುತ್ತಿಕೊಂಡಿದ್ದ ಸೋಲಿನ ಪರ್ವ ದೇವರಕೊಂಡನನ್ನು ಮತ್ತಷ್ಟು ಬಿಗಿಯಾಗಿ ಅಪ್ಪಿಕೊಂಡಿದೆ. ಒಂದು ಮಟ್ಟಕ್ಕೆ ಆತನ ವೃತ್ತಿ ಬದುಕೀಗ ಸೋಲಿನ ಪ್ರಪಾತದ ಅಂಚಿಗೆ ಬಂದು ನಿಂತಿದೆ. ಮುಂದಿನ ಸಿನಿಮಾದಲ್ಲಿಯಾದರೂ ಗೆಲುವು ದಕ್ಕದಿದ್ದರೆ ದೇವರಕೊಂಡನ ವೃತ್ತಿ ಬದುಕು ಸಂಪೂರ್ಣವಾಗಿ ಮಾಸಲಾಗೋದು ಗ್ಯಾರಂಟಿ!

The post vijay devarakonda kingdom: ರಶ್ಮಿಕಾ ಸಖನ ಮುಂದಿನ ಹಾದಿ ದುರ್ಗಮ! appeared first on Cini Shodha.

ಪ್ರಭಾಸ್ ನಟನೆಯ ಸ್ಪಿರಿಟ್ ಚಿತ್ರಕ್ಕೆ ಈಕೆಯೇ ನಾಯಕಿ ಎಂಬಂಥಾ ಸುದ್ದಿ ಹಬ್ಬಿಕೊಂಡಿದೆ. ಅದರ ಬೆನ್ನಲ್ಲಿಯೇ ಪ್ರಶಾಂತ್ ನೀಲ್ ಮತ್ತು ಜ್ಯೂ ಎನ್ಟಿಆರ್ ಕಾಂಬಿನೇಷನ್ನಿನ ಸಿನಿಮಾಕ್ಕೂ ರುಕ್ಮಿಣಿ ನಾಯಕಿಯಾಗಲಿದ್ದಾರೆಂಬ ಸುದ್ದಿ ಹಬ್ಬಿಕೊಂಡಿದೆ. ಈ ಬಗೆಗಿನ ಅಧಿಕೃತ ಮಾಹಿತಿಗಳು ಹೊರಬಿದ್ದರೆ, ಖಂಡಿತವಾಗಿಯೂ ದಕ್ಷಿಣ ಭಾರತೀಯ ಚಿತ್ರರಂಗದಲ್ಲಿ ರುಕ್ಮಿಣಿಯ ಶಖೆ ಶುರುವಾಯ್ತೆಂದೇ ಅರ್ಥ. ಬಹುಶಃ ಸಲೀಸಾಗಿ ಆಕೆ ರಶ್ಮಿಕಾ ಮಂದಣ್ಣ, ಶ್ರೀಲೀಲಾಳಂಥಾ ನಟಿಯರನ್ನು ಹಿಂದಿಕ್ಕಿ ಮಿಂಚುವಂತಾದರೂ ಅಚ್ಚರಿಯೇನಿಲ್ಲ. ಹಾಗಂತ ತೆಲುಗು ಸೇರಿದಂತೆ ಅನೇಕ ಭಾಷೆಯ ಚಿತ್ರರಂಗಗಳ ಮಂದಿಯೇ ಭವಿಷ್ಯ ನಿಡಿಯಲಾರಂಭಿಸಿದ್ದಾರೆ. ಅಂಥಾದ್ದೊಂದು ಮಟ್ಟ ಮುಟ್ಟಬಲ್ಲ ಛಾತಿ ಖಂಡಿತವಾಗಿಯೂ ಕನ್ನಡದ ಹುಡುಗಿ ರುಕ್ಮಿಣಿಗಿದ್ದೇ ಇದೆ.

ಹಾಗೆನೋಡಿದರೆ, ಈ ಹುಡುಗಿಗೆ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದಲ್ಲಿ ನಾಯಕಿಯಾಗಿ ನಟಿಸುವ ಅವಕಾಶ ಕೂಡಿ ಬಂದಿದ್ದೇ ಅಚಾನಕ್ಕಗಿ. ಅದಾಗಲೇ ನಟಿಯಾಗಬೇಕೆಂಬ ಕನಸಿಟ್ಟುಕೊಂಡಿದ್ದ ರುಕ್ಮಿಣಿಗೆ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದ ನಾಯಕಿಗಾಗಿ ಆಡಿಷನ್ ನಡೆಸುತ್ತಿರುವ ವಿಚಾರ ಗಮನಕ್ಕೆ ಬಂದಿತ್ತು. ತುಸು ಅಳುಕಿನೊಂದಿಗೆ ಚಿತ್ರತಂಡವನ್ನು ಸಂಪರ್ಕಿಸಿದ್ದ ರುಕ್ಮಿಣಿ, ನಂತರ ಒಂದಷ್ಟು ಸ್ಪರ್ಧೆಯನ್ನು ದಾಟಿಕೊಂಡು ನಾಯಕಿಯಾಗಿ ಆಯ್ಕೆಯಾಗಿದ್ದರು. ಅದಕ್ಕೆ ತನ್ನ ಪ್ರತಿಭೆ ಮಾತ್ರವಲ್ಲದೇ ಅದೃಷ್ಟವೂ ಕಾರಣವೆಂಬ ಮನಃಸ್ಥಿತಿ ಹೊಂದಿರುವ ರುಕ್ಮಿಣಿಯೀಗ ತಮಿಳು ಚಿತ್ರರಂಗದಲ್ಲಿಯೂ ಬ್ಯುಸಿಯಾಗಿದ್ದಾರೆ. ಅದೇ ಹೊತ್ತಿನಲ್ಲಿ ತೆಲುಗಿನಲ್ಲಿಯೂ ಒಂದಷ್ಟು ಅವಕಾಶಗಳು ಅರಸಿ ಬರಲಾರಂಭಿಸಿವೆ.

ಒಂದು ವೇಳೆ ಈಗ ತೆಲುಗು ಚಿತ್ರರಂಗದಲ್ಲಿ ಹಬ್ಬಿಕೊಂಡಿರುವ ಸುದ್ದಿಗಳು ನಿಜವಾದರೆ, ಖಂಡಿತವಾಗಿಯೂ ಅದು ರುಕ್ಮಿಣಿ ಪಾಲಿಗೆ ಜಾಕ್ ಪಾಟ್. ಅಲ್ಲಿಂದ ಬಾಲಿವುಡ್ ಎಂಟ್ರಿಗೆ ಹಾದಿ ಮತ್ತಷ್ಟು ಸಲೀಸಾಗುತ್ತದೆ. ಪ್ರಭಾಸ್ ಮತ್ತು ಜ್ಯೂನಿಯರ್ ಎನ್ಟಿಆರ್ ಗೆ ನಾಯಕಿಯಾಗಬೇಕೆಂದು ಬಾಲಿವುಡ್ ನಟಿಯರೇ ಪ್ರಯತ್ನ ಪಡುತ್ತಾರೆ. ಅಂಥಾದ್ದರಲ್ಲಿ ಆ ಅವಕಾಶ ರುಕ್ಮಿಣಿಗೆ ತಾನೇತಾನಾಗಿ ಒಲಿದು ಬಂದರೆ ಅದು ಅದೃಷ್ಟವಲ್ಲದೆ ಬೇರೇನಲ್ಲ. ಇಂಥಾ ಸುದ್ದಿಗಳ ಕೇಂದ್ರ ಬಿಂದುವಾಗಿರುವ ರುಕ್ಮಿಣಿ ವ್ಯಕ್ತಿಗತವಾಗಿಯೂ ಗಮನ ಸೆಳೆಯೋ ನಟಿ. ಥಳುಕು ಬಳುಕಿನ ಧಿಮಾಕುಗಳನ್ನು ಮೀರಿಕೊಂಡಂತಿರುವ ಈಕೆ ಒಂದಷ್ಟು ಸೂಕ್ಷ್ಮ ಮನಃಸ್ಥಿತಿಯಿಂದಲೂ ಮೆಚ್ಚುಗೆ ಗಳಿಸಿಕೊಂಡಿದ್ದಾರೆ. ಇಂಥಾ ಹುಡುಗಿ ಕನ್ನಡದಲ್ಲಿ ಸಕ್ರಿಯವಾಗಿದ್ದುಕೊಂಡೇ ಪರಭಾಷೆಗಳಲ್ಲೂ ಮಿಂಚಿದರೆ ಕನ್ನಡಗರೆಲ್ಲ ಖುಷಿ ಪಡದಿರಲು ಸಾಧ್ಯವೇ?

The post rukmini vasanth: ಬಾಲಿವುಡ್ಡಿಗಿನ್ನು ದಾರಿ ದೂರವಿಲ್ಲ! appeared first on Cini Shodha.

ಸಪ್ತ ಸಾಗರದಾಚೆ ಎಲ್ಲೋ ಸೈಡ್ ಎ ಬಿಡುಗಡೆಯಾಗಿ ತಿಂಗಳಾಗುತ್ತಾ ಬಂದಿದೆ. ಮೊದಲ ಭಾಗದ ಬಿಡುಗಡೆಯ ಅಂಚಿನಲ್ಲಿ ಚಿತ್ರತಂಡ ಸೈಡ್ ಬಿ ಬಗ್ಗೆ ಅನೌನ್ಸ್ ಮಾಡೋ ಮೂಲಕ ಅಚ್ಚರಿ ಮೂಡಿಸಿತ್ತು. ಅದರನ್ವಯ ಇದೇ ತಿಂಗಳ ಇಪ್ಪತ್ತೇಳರಂದು ಸೈಡ್ ಬಿ ತೆರೆಗಾಣಬೇಕಿತ್ತು. ಬಹುಶಃ ಸೈಡ್ ಎ ನೋಡಿದ ಬಹುತೇಕ ಪ್ರೇಕ್ಷಕರು ಇಪ್ಪತ್ತೇಳನೇ ತಾರೀಕಿನತ್ತ ಕಣ್ಣಿಟ್ಟು ಕಾದು ಕೂತಿದ್ದರು. ಆದರೆ, ಕಡೇ ಘಳಿಗೆಯಲ್ಲಿ ಚಿತ್ರತಂಡ ಬಿಡುಗಡೆ ದಿನಾಂಕವನ್ನು ಪೋಸ್ಟ್ ಫೋನ್ ಮಾಡಿದ ಸುದ್ದಿ ಬಂದಿದೆ. ಹಾಗಾದರೆ, ಸೈಡಿ ಬಿ ಕಥೆಯೇನು? ಅದ್ಯಾವಾಗ ಬಿಡುಗಡೆಯಾಗುತ್ತೆ ಎಂಬಿತ್ಯಾದಿ ಪ್ರಶ್ನೆಗಳೇಳೋದು ಸಹಜ. ಒಂದು ಮೂಲದ ಪ್ರಕಾರ ನವೆಂಬರ್ ತಿಂಗಳಲ್ಲಿ, ದೀಪಾವಳಿಯ ಹಿಂಚುಮುಂಚಿನಲ್ಲಿ ಸೈಡ್ ಬಿ ನೋಡೋ ಭಾಗ್ಯ ಸಿಗಲಿದೆ.

ಈ ತಿಂಗಳ ಇಪ್ಪತ್ತೇಳರಂದು ದೊಡ್ಡ ಸಿನಿಮಾಗಳ ನಡುವೆ ಪೈಪೋಟಿ ಇದೆ. ಪರಭಾಷಾ ಚಿತ್ರಗಳಿಗೆ ಮಣೆ ಹಾಕಿದರೆ, ಥಿಯೇಟರ್ ಸಮಸ್ಯೆ ಕೂಡಾ ಕಾಡಲಿದೆ. ಅಂಥಾ ಇಕ್ಕಟ್ಟಿನಲ್ಲಿ ಗುದ್ದಾಡಿ ಕಳೆದು ಹೋಗುವ ಬದಲು, ಸರಿಕಟ್ಟಾದ ಮುತೂರ್ತ ನೋಡಿ ತೆರೆಗೆ ಬರಲು ಚಿತ್ರತಂಡ ತೀರ್ಮಾನಿಸಿದಂತಿದೆ. ಸಪ್ತಸಾಗರದಾಚೆ ಎಲ್ಲೋ ಚಿತ್ರದ ಸೈಡ್ ಎ ಕ್ಲಾಸ್ ಶೈಲಿಯಲ್ಲಿ ಜನರನ್ನು ಸೆಳೆದಿತ್ತು. ಕ್ಲೈಮ್ಯಾಕ್ಷಿನಲ್ಲಿ ಸೈಡ್ ಬಿಯ ಒಂದಷ್ಟು ಝಲಕ್ಕುಗಳನ್ನು ಚಿತ್ರತಂಡ ಕಾಣಿಸಿತ್ತು. ಅದರಲ್ಲಿ ಪಕ್ಕಾ ಮಾಸ್ ಕಂಟೆಂಟಿನ ಕುರುಹುಗಳಿದ್ದವು. ಈವತ್ತಿಗೆ ಸೈಡ್ ಬಿ ಬಗ್ಗೆ ಅಗಾಧ ಕೌತುಕ ಮೂಡಿಕೊಂಡಿದ್ದರ ಹಿಂದೆ ಆ ಮಾಸ್ ಮಾಯೆ ಕೆಲಸ ಮಾಡಿರೋದು ಸುಳ್ಳಲ್ಲ. ಒಟ್ಟಾರೆಯಾಗಿ ಬಿಡುಗಡೆ ದಿನಾಂಕ ಮುಂದಕ್ಕೆ ಹೋಗಿರೋದರಿಂದ ಒಂದಷ್ಟು ಪ್ರೇಕ್ಷಕರಿಗೆ ಭ್ರಮನಿರಸನ ವಾಗಿರೋದಂತೂ ಸತ್ಯ!

The post sse side b release date postponed: ಸಪ್ತ ಸಾಗರದಾಚೆ ಸುಪ್ತ ಲೆಕ್ಕಾಚಾರ! appeared first on Cini Shodha.

ಪ್ರೇಮವೆಂಬುದು ಸಿನಿಮಾ ಚೌಕಟ್ಟಿಗೆ ಯಾವತ್ತಿದ್ದರೂ ತಾಜಾತನದಿಂದಲೇ ಒಗ್ಗಿಕೊಳ್ಳುವ ಮಾಯೆ. ಪ್ರೇಮ ಕಥನದ ಚುಂಗು ಹಿಡಿದು ಹೊರಟವರ ಕ್ರಿಯಾಶೀಲತೆ, ಸ್ವಂತಿಕೆಯ ಮೇಲೆ ಅದರ ಪರಿಣಾಮ ನಿಂತಿರುತ್ತೆ. ಆ ನಿಟ್ಟಿನಲ್ಲಿ ಹೇಳೋದಾದರೆ, ನಿರ್ದೇಶಕ ಹೇಮಂತ್ ಈ ಚಿತ್ರವನ್ನು ಮೆಲುವಾಗಿ ಆವರಿಸಿಕೊಂಡು ಬಿಡುವ ದೃಷ್ಯಕಾವ್ಯವಾಗಿಸುವಲ್ಲಿ ಗೆದ್ದಿದ್ದಾರೆ. ಸಪ್ತ ಸಾಗರದಾಚೆ ಎಲ್ಲೋ ಎರಡು ಭಾಗಗಳಲ್ಲಿ ತೆರೆಗಾಣುವ ಸುದ್ದಿ ಹೊರ ಬಿದ್ದಾಕ್ಷಣ ಇದು ಬೇಕಿತ್ತಾ ಎಂಬಂಥಾ ಪ್ರಶ್ನೆ ಹಲವರಲ್ಲಿ ಮೂಡಿಕೊಂಡಿತ್ತು. ಹಾಗೊಂದು ಪ್ರಶ್ನೆ ಮೂಡಿದ ಮನಸುಗಳಲ್ಲೇ, ಬಿ ಸೈಡ್ ಬಗ್ಗೆ ಕುತೂಹಲ ಮಿಸುಕಾಡುವಂತೆ ಮಾಡಿದೆ ಎಂದರೆ, ಸಪ್ತ ಸಾಗರದಾಚೆಯ ಬೆರಗುಗಳ ಬಗ್ಗೆ ಬೇರೇನೂ ವಿವರಿಸುವ ಅವಶ್ಯಕತೆಯಿಲ್ಲ.

ಇಲ್ಲಿರೋದು ಮಧ್ಯಮ ವರ್ಗದ ಎರಡು ಮನಸುಗಳ ನಡುವೆ ಪ್ರವಹಿಸುವ ಗಾಢ ಪ್ರೇಮ. ವಿನಾ ಕಾರಣ ರೊಮ್ಯಾಂಟಿಕ್ ಅಂಶಗಳನ್ನು ಬೆರೆಸದೆ, ಬಿಲ್ಡಪ್ಪುಗಳಲ್ಲಿ ದೃಷ್ಯಗಳನ್ನು ಮೆರೆಸದೆ ಸಹಾಜಾತಿ ಸಹಜವಾಗಿ ಭಾವನೆಗಳು ಇಲ್ಲಿ ಅನುರಣಿಸುತ್ತವೆ. ಸಿನಿಮಾ ಶುರುವಾಗುತ್ತಲೇ ನಾಯಕ ನಾಯಕಿಯ ಪ್ರೇಮ ಕಥೆ ತೆರೆದುಕೊಳ್ಳುತ್ತದೆ. ಆಕೆ ಕಡಲೂರಿನಿಂದ ಬಂದ ಹುಡುಗಿ. ಗಿಜಿಗುಡುವ ಊರಲ್ಲಿ ನಿಂತಿದ್ರೂ ಕಡನ್ನೇ ಧ್ಯಾನವಾಗಿಸಿಕೊಂಡವಳು. ಆತ ಬದುಕಿಗಾಗಿ ಒಂದು ವೃತ್ತಿ ಮಾಡುತ್ತಾ, ಶ್ರೀಮಂತಿಕೆಯ ವಾತಾವರಣದಲ್ಲಿದ್ದರೂ ಮಧ್ಯಮ ವರ್ಗದ ತಲ್ಲಣಗಳನ್ನು ಹಾಸಿ ಹೊದ್ದಂತಿರುವ ಹುಡುಗ. ಆದರೆ, ಆತನನ್ನು ಆವರಿಸಿಕೊಂಡ ಪ್ರೇಮ ಎಲ್ಲ ಮಿತಿಗಳನ್ನು ಮೀರಿ, ಅಸಾಧ್ಯವೆಂಬುದರತ್ತ ಕೈ ಚಾಚುವಂತೆ ಮಾಡುತ್ತೆ.

ಅದು ನೈಜ ಪ್ರೇಮಕ್ಕಿರುವ ನಿಜವಾದ ಶಕ್ತಿ. ಪ್ರೀತಿಸಿದ ಜೀವವನ್ನು ದಕ್ಕಿಸಿಕೊಳ್ಳಲು ಅದು ಎಂಥಾ ಸಾಹಸಕ್ಕೂ ಪ್ರೇರೇಪಿಸಿ ಬಿಡುತ್ತೆ. ಅದರ ಸೆಳವಿಗೆ ಸಿಕ್ಕು ಮಹತ್ತರವಾದನ್ನು ಸಾಧಿಸಿದವರಿದ್ದಾರೆ. ಸೋಲಿನ ಹುದುಲಿಂದಲೇ ಪುಟಿದೆದ್ದು ಗೆದ್ದವರೂ ಇದ್ದಾರೆ. ಅದೆಲ್ಲವೂ ಹೆಜ್ಜೆಯೂರುವ ಹಾದಿಯನ್ನ ಅವಲಂಬಿಸಿರುತ್ತೆ. ಇಲ್ಲಿ ನಾಯಕ ತನ್ನ ಜತ್ತಿನಂಥವಳ ಕನಸು ನನಸು ಮಾಡಲು ತುಳಿದ ಹಾದಿ ಯಾವುದು? ಅದು ಆತನನ್ನು ಯಾವ ತೀರಕ್ಕೆ ಕರೆದೊಯ್ದು ಬಿಡುತ್ತೆ? ಇಂಥಾ ಪ್ರಶ್ನೆಗಳಿಗೆ ಸಿಗಬಹುದಾದ ಉತ್ತರವೇ ಒಂದಿಡೀ ಸಿನಿಮಾದ ಸಾರ. ಅದು ಹಪುಗಳಾಚೆಗೂ ಕಳೆಗಟ್ಟಿಕೊಂಡಿದೆ ಎಂಬುದೇ ಸಪ್ತ ಸಾಗರದಾಚೆಯ ನಿಜವಾದ ಸಾರ್ಥಕತೆ.

ಇಲ್ಲಿ ಮಧ್ಯಮ ವರ್ಗದ ಕನವರಿಕೆಗಳಿಗೆ, ಶ್ರೀಮಂತಿಕೆಯ ಠೇಂಕಾರ, ಹುನ್ನಾರಗಳು ಮುಖಾಮುಖಿಯಾಗುತ್ತವೆ. ಸಂವೇದನೆ ಕಳೆದುಕೊಂಡು, ಯಾರನ್ನ ಪಣಕ್ಕಿಟ್ಟಾದರೂ ಕಂಟಕದಿಂದ ಪಾರಾಗುವ ಕಾಂಚಾಣದ ಮನಸಲತ್ತುಗಳು ಕಂಗಾಲಾಗಿಸುತ್ತವೆ. ಓರ್ವ ನಿರ್ದೇಶಕನಾಗಿ ಪ್ರತೀ ಸೂಕ್ಷ್ಮವನ್ನೂ ಪರಿಗಣಿಸಿ, ಈ ಸಿನಿಮಾವನ್ನು ರೂಪಿಸಿರುವ ನಿರ್ದೇಶಕರು ನಿಜಕ್ಕೂ ಅಚ್ಚರಿ ಮೂಡಿಸುತ್ತಾರೆ. ಮೊದಲಾರ್ಧದ ತುಂಬಾ ನಾಯಕ, ನಾಯಕಿಯ ನಡುವಿನ ಮಧುರ ಪ್ರೇಮದ ಕನವರಿಕೆಯಲ್ಲಿಯೇ ಸಾಗುತ್ತದೆ. ದೃಷ್ಯಗಳು ಸರಿಯುತ್ತ ಕುತೂಹಲ ಹರಳುಗಟ್ಟುತ್ತಾ, ದ್ವಿತೀಯಾರ್ಧ ದಾಟಿಕೊಂಡ ನಂತರ ಅದು ಅಕ್ಷರಶಃ ನಿಗಿನಿಗಿಸುತ್ತೆ. ಇತ್ತೀಚಿನ ದಿನಮಾನದಲ್ಲಿ ನಾಯಕ ನಾಯಕಿಯರ ಕೆಮಿಸ್ಟ್ರಿಯೊಂದಿಗೆ ಗೆದ್ದ ಪ್ರೇಮ ಕಥನಗಳು ವಿರಳ. ಆ ಸಾಲಿಗೆ ನಿಸ್ಸಂದೇಹವಾಗಿಯೂ ಸಪ್ತ ಸಾಗರಾದಾಚೆ ಎಲ್ಲೋ ಸೇರಿಕೊಳ್ಳುತ್ತೆ. ಕ್ಲೈಮ್ಯಾಕ್ಸಿನ ಹೊತ್ತಿಗೆಲ್ಲ ನಿರ್ದೇಶಕ ದುನಿಯಾ ಸೂರಿಯ ಫಾರ್ಮುಲಾಕ್ಕೆ ಪಕ್ಕಾದಂತೆ ಕಾಣಿಸುವ ನಿರ್ದೇಶಕರು, ಸೈಡ್ ಬಿಯ ತುಣುಕುಗಳ ಮೂಲಕ ಕುತೂಹಲವನ್ನು ಕಾಪಿಟ್ಟುಕೊಳ್ಳುತ್ತಾರೆ. ಮೊದಲ ಭಾಗ ನೋಡಿದವರಲ್ಲೆಲ್ಲ ಎರಡನೇ ಭಾಗ ನೋಡುವ ಉತ್ಕಟ ತುಡಿತವೊಂದು ಊಟೆಯೊಡೆಯುತ್ತೆ.

ಹೀಗೆ ಎರಡು ಭಾಗಗಳಲ್ಲಿ ಸಿನಿಮಾವೊಂದನ್ನು ರೂಪಿಸುವಾಗ ನಾನಾ ರೀತಿಯಲ್ಲಿ ಎಚ್ಚರ ವಹಿಸಬೇಕಾಗುತ್ತದೆ. ಅದೆಲ್ಲವನ್ನೂ ನಿರ್ದೇಶಕರು ಲೀಲಾಜಾಲವಾಗಿಯೇ ನಿಭಾಯಿಸಿದ್ದಾರೆ. ನಟನೆಯ ವಿಚಾರಕ್ಕೆ ಬಂದರೆ ರಕ್ಷಿತ್ ಶೆಟ್ಟಿ, ರುಕ್ಮಿಣಿ ವಸಂತ್ ಪಾತ್ರದಲ್ಲಿಯೇ ಲೀನಾವಾದಂತೆ ಕಾಣುತ್ತಾರೆ. ಈ ಹುಡುಗಿ ರುಕ್ಮಿಣಿಯಂಥಾ ಪ್ರತೀ ಫ್ರೇಮಿನಲ್ಲಿಯೂ ಒಳಗಿಳಿಯುತ್ತಾಳೆ. ಹಾಗೆ ಪಾತ್ರಗಳೆಲ್ಲವನ್ನೂ ಪರಿಣಾಮಕಾರಿಯಾಗಿ ರೂಪಿಸಿದ ಫಾಯಿದೆ ನಿರ್ದೇಶಕರಿಗೂ ಸಲ್ಲುತ್ತದೆ. ಸೂಕ್ಷವಂತಿಕೆ ಇರುವ ಪ್ರೇಕ್ಷಕರನ್ನೆಲ್ಲ ಕ್ಷಣಾರ್ಧದಲ್ಲಿ ಆವರಿಸಿಕೊಳ್ಳುವ ಗುಣ ಹೊಂದಿರುವ ಈ ಸಿನಿಮಾ, ಭಿನ್ನ ಆಸಕ್ತಿಯ ನೋಡುಗರಿಗೂ ಸಲೀಸಾಗಿ ರುಚಿಸುತ್ತದೆ ಅನ್ನುವಂತಿಲ್ಲ. ಆದರೆ ಎಲ್ಲ ವರ್ಗದವರನ್ನೂ ಆವರಿಸಿಕೊಳ್ಳುವಂಥಾ ಭಾವತೀವ್ರತೆಯಂತೂ ಖಂಡಿತಾ ಇಲ್ಲಿದೆ. ಸಂಭಾಷಣೆಗೂ ಕೂಡಾ ಅಂಥಾದ್ದೊಂದು ಕಸುವಿದೆ.

ಹಾಗಾದರೆ, ಎಲ್ಲ ಕೋನಗಳಿಂದಲೂ ಸಪ್ತ ಸಾಗರದಾಚೆ ಎಲ್ಲೋ ಪರಿಪೂರ್ಣ ಚಿತ್ರವಾ? ಕೊರತೆಗಳಿಲ್ಲವಾ ಅಂತ ನೋಡ ಹೋದರೆ, ಒಂದಷ್ಟು ವಿಚಾರಗಳು ಗಮನಕ್ಕೆ ಬರುತ್ತವೆ. ಆ ಯಾದಿಯಲ್ಲಿ ದೊಡ್ಡ ಕೊರತೆಯಾಗಿ ಕಾಣಿಸೋದು ಹಾಡುಗಳು. ಈ ಸಿನಿಮಾದಲ್ಲಿ ಹಿಟ್ ಹಾಡುಗಳಿಲ್ಲ. ಈ ಬಗೆಯ ಸಿನಿಮಾಗಳ ಗೆಲುವಿನಲ್ಲಿ ಅದರ ಪಾಲೂ ಖಂಡಿತಾ ಇರುತ್ತದೆ. ಆದರೇಕೋ ಚರಣ್ ರಾಜ್ ಅದರತ್ತ ಗಮನ ಹರಿಸಿಲ್ಲ. ಆದರೆ ಹಿನ್ನೆಲೆ ಸಂಗೀತದಲ್ಲವರು ಗಮನ ಸೆಳೆಯುತ್ತಾರೆ. ಇನ್ನುಳಿದಂತೆ ಕಾಸ್ಟ್ಯೂಮು, ಒಟ್ಟಾರೆ ಲುಕ್ಕಿನ ವಿಚಾರದಲ್ಲಿ ರಕ್ಷಿತ್ ಶೆಟ್ಟಿ ಪಾತ್ರವನ್ನು ಬೊಟ್ಟು ಮಾಡದಂತೆ ರೂಪಿಸುವಲ್ಲಿಯೂ ನಿರ್ದೇಶಕರು ಒಂದಷ್ಟು ಎಚ್ಚರ ತಪ್ಪಿದಂತೆ ಭಾಸವಾಗುತ್ತೆ. ಆದರೆ ಒಟ್ಟಾರೆ ಸಿನಿಮಾದ ಅಂದವೆಂಬುದು ಒಂದಷ್ಟು ತಪ್ಪುಗಳು ಮತ್ತು ಕೊರತೆಯನ್ನು ಮಾಫಿ ಮಾಡಿ, ದೃಷ್ಯಗಳಲ್ಲಿ ಲೀನವಾಗುವಂತೆ ಮಾಡಿ ಬಿಡುತ್ತದೆ. ಒಟ್ಟಾರೆಯಾಗಿ, ಇದು ಈ ಕಾಲಮಾನದ ಒಂದೊಳ್ಳೆ ಪ್ರೇಮ ಕಥಾನಕ. ಸಿನಿಮಾ ನೋಡಿಯಾದ ಮೇಲೂ ಗಾಢ ಪ್ರೇಮದ ಪರಾಗ ಮನಸಿಗಂಟಿಕೊಳ್ಳುತ್ತೆ. ಪ್ರೀತಿಯ ಕಿರುಬೆರಳು ಉಣುಚಿಕೊಂಡ ಕರುಳ ಸಂಕಟ ನಮ್ಮದೇ ಅನ್ನಿಸಿ ಬಿಡುತ್ತೆ. ಬಿ ಸೈಡ್ ನೋಡೋ ಹಂಬಲದೊಂದಿಗೆ, ಬೊಗಸೆಯ ತುಂಬಾ ಭಾವದ ಕಡಲೊಂದು ಭೋರ್ಗರೆದಂತೆ ಭಾಸವಾಗುತ್ತೆ. ಇದಕ್ಕಿಂತ ಸಾರ್ಥಕತೆ ಮತ್ತೇನಿದೆ?

The post saptha sgagaradache ello review: ಮುಗಿದ ಮೇಲೂ ಮನಸಿಗಂಟುತ್ತೆ ಗಾಢ ಪ್ರೇಮದ ಪರಾಗ! appeared first on Cini Shodha.

ಈ ಟ್ರೈಲರ್ ಮೂಲಕ ರಕ್ಷಿತ್ ಶೆಟ್ಟಿ ಪ್ರೇಮದ ನವಿರು ಭಾವಗಳ ಚುಂಗು ಹಿಡಿದು ಹೊರಟಿರುವುದು ಸ್ಪಷ್ಟವಾಗಿದೆ. ಪ್ರೇಮದ ಜೊತೆ ಜೊತೆಗೆ ಬೇರೆತ್ತಲೋ ಹಬ್ಬಿಕೊಂಡ, ಕಡಲಿನಷ್ಟೇ ನಿಗೂಢವಾದ ಕಥನವೊಂದು ಇಲ್ಲಿದೆ ಎಂಬುದೂ ಕೂಡಾ ಈ ಟ್ರೈಲರ್ ಮೂಲಕ ಮನದಟ್ಟಾಗಿದೆ. ನಾಯಕಿ ರುಕ್ಮಿಣಿ ವಸಂತ್ ಧ್ವನಿಯಿಂದಲೇ ಮಂದ್ರವಾಗಿ ತೆರೆದುಕೊಳ್ಳುವ ಕಥನ ನಾನಾ ಭಾವಗಳ ಕಡಲಾಗಿ ಭೋರ್ಗರೆಯುತ್ತದೆ. ಸುಂದರ ದೃಷ್ಯಗಳು, ಚರಣ್ ರಾಜ್ ಅವರ ಸಮ್ಮೋಹಕ ಹಿನ್ನೆಲೆ ಸಂಗೀತದ ಮೂಲಕ ಇಲ್ಲಿನ ದೃಷ್ಯಗಳು ನಾನಾ ದಿಕ್ಕಿನಲ್ಲಿ ಆಲೋಚನೆಗೆ ಹಚ್ಚುತ್ತವೆ. ಇಲ್ಲಿರೋದು ಪ್ರೇಮ ಕಥೆ ಎಂಬುದನ್ನು ಮನದಟ್ಟು ಮಾಡಿಸುತ್ತಲೇ, ಅದಕ್ಕೊಂದಷ್ಟು ತಿರುವುಗಳೂ ಕೂಡಾ ತಟಿಕೆ ಹಾಕಿಕೊಳ್ಳುತ್ತವೆ.

ಖುದ್ದು ರಕ್ಷಿತ್ ಶೆಟ್ಟಿ `ಮನು ಮತ್ತು ಪ್ರಿಯಾಳ ಪ್ರಪಂಚದ ಸಣ್ಣ ಪರಿಚಯವಿದು’ ಎಂಬರ್ಥದ ಒಕ್ಕಣೆಯೊಂದಿಗೆ ಈ ಟ್ರೈಲರ್ ಅನ್ನು ಹಂಚಿಕೊಂಡಿದ್ದಾರೆ. ಈ ಮೂಲಕ ಮನು ಮತ್ತು ಪ್ರಿಯಾಳ ಪ್ರೇಮ ಪ್ರಪಂಚ ಮಾತ್ರವಲ್ಲದೇ, ಮತ್ತೊಂದಷ್ಟು ಆಘಾತ, ಒಳಸುಳಿ, ತಿರುವಿಗಳನ್ನೂ ಪರಿಣಾಕಾರಿಯಾಗಿ ದಾಟಿಸಲಾಗಿದೆ. ಹೇಮಂತ್ ರಾವ್ ಗಟ್ಟಿ ಕಥೆಯೊಂದರ ಮೂಲಕ ಈ ಸಿನಿಮಾವನ್ನು ನಿರ್ದೇಶನ ಮಾಡಿದ್ದಾರೆ, ಇದರಲ್ಲಿ ಗಹನವಾದುದೇನೋ ಇದೆ ಎಂಬಷ್ಟರ ಮಟ್ಟಿಗೆ ಈ ಟ್ರೈಲರ್ ಪ್ರೇಕ್ಷಕರ ಮನಸಲ್ಲಿ ರಿಜಿಸ್ಟರ್ ಆಗುವಂತಿದೆ. ಅಷ್ಟರಮಟ್ಟಿಗೆ ಸಪ್ತ ಸಾಗರದಾಚೆ ಎಲ್ಲೋ ಟ್ರೈಲರ್ ಪರಿಣಾಮಕಾರಿ ಎನ್ನಿಸಿಕೊಂಡಿದೆ.

ಸಪ್ತ ಸಾಗರದಾಚೆ ಎಲ್ಲೋ ಚಿತ್ರವನ್ನು ರಕ್ಷಿತ್ ಶೆಟ್ಟಿ ಪರಂವಃ ಸ್ಟುಡಿಯೋಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣ ಮಾಡಿದ್ದಾರೆ. ಇದು ಎರಡು ಭಾಗಗಳಲ್ಲಿ ಪ್ರೇಕ್ಷಕರನ್ನು ಮುಖಾಮುಖಿಯಾಗಲಿದೆ. ರಕ್ಷಿತ್ ಶೆಟ್ಟಿ ಒಂದು ಗೆಲುವಿನ ಮೂಲಕ ಮೈ ಕೊಡವಿಕೊಳ್ಳುವ ಅನಿವಾರ್ಯತೆಯ ಅಂಚಿನಲ್ಲಿದ್ದಾರೆ. ಅವನೇ ಶ್ರೀಮನ್ನಾರಾಯಣ ದೊಡ್ಡ ಮಟ್ಟದಲ್ಲಿ ಕ್ರೇಜ್ ಸೃಷ್ಟಿಸಿದ್ದರೂ ಕೂಡಾ, ಅದೇಕೋ ನಿರೀಕ್ಷಿತ ಗೆಲುವು ಕಂಡಿರಲಿಲ್ಲ. 777 ಚಾರ್ಲಿ ಗೆಲುವು ರಕ್ಷಿತ್‍ರನ್ನು ಕೊಂಚ ನಿರಾಳವಾಗಿದೆ. ಸಪ್ತ ಸಾಗರದಾಚೆ ಎಲ್ಲೋ ಮೂಲಕ ದೊಡ್ಡ ಮಟ್ಟದಲ್ಲಿ ಗೆಲ್ಲುವ ಶಪಥದೊಂದಿಗೆ ರಕ್ಷಿತ್ ಅಖಾಡಕ್ಕಿಳಿದಂತಿದೆ. ಅಂಥಾದ್ದೊಂದು ಕಸುವು ಸದರಿ ಟ್ರೈಲರ್ ಮೂಲಕ ಕಾಣಿಸಿದೆ.

The post saptha sagaradache ello trailer review: ಬೆರಗಿನ ಕಡಲನ್ನು ಒಡಲಲ್ಲಿಟ್ಟುಕೊಂಡಿರೋ ಸುಳಿವು! appeared first on Cini Shodha.