ಅಪ್ಪು ಭಿನ್ನ ಪ್ರಯತ್ನಗಳನ್ನು ಪ್ರೇರೇಪಿಸಿ ಸಾಥ್ ಕೊಡಲೆಂದೇ ಪಿಆರ್‌ಕೆ ಸ್ಟುಡಿಯೋಸ್ ಎಂಬ ನಿರ್ಮಾಣ ಸಂಸ್ಥೆಯನ್ನು ಹುಟ್ಟು ಹಾಕಿದ್ದದ್ದು ಗೊತ್ತಿರುವ ಸಂಗತಿ. ಆದರೆ, ಎದುರು ಯಾರೇ ಬಂದು ಕೂತರೂ, ಅವರೊಳಗಿನ ಅಸಲೀ ಶಕ್ತಿಯನ್ನು ಗುರುತಿಸಿ, ಹೊಸಾ ಸೃಷ್ಟಿಗಾಗಿ ಪ್ರೇರೇಪಿಸುವ ವಿಶಿಷ್ಟ ಗುಣವೂ ಪುನೀತ್ ಅವರಲ್ಲಿತ್ತು. ಚಿತ್ರರಂಗದಲ್ಲಿ ಅಂಥಾ ಅನುಭೂತಿ ಪಡೆದುಕೊಂಡವರು ಸಾಕಷ್ಟು ಸಂಖ್ಯೆಯಲ್ಲಿದ್ದಾರೆ. ಅಪ್ಪುವಿನ ಅಂಥಾ ಗುಣದಿಂದಲೇ ಮಹೇಶ್ ಗೌಡರೊಳಗೆ ಬಿಳಿಚುಕ್ಕಿ ಹಳ್ಳಿಹಕ್ಕಿ ಕಥೆ ಊಟೆಯೊಡೆದಿದ್ದೊಂದು ರೋಮಾಂಚಕ ಸಂಗತಿ. ಆ ಹಠಾತ್ ರೋಮಾಂಚನದ ಬಗ್ಗೆ ಖುದ್ದು ನಿರ್ದೇಶಕ ಮಹೇಶ್ ಗೌಡ ಅವರು ಒಂದಷ್ಟು ವಿಚಾರಗಳನ್ನು ತೆರೆದಿಟ್ಟಿದ್ದಾರೆ.

ಅದಾಗಲೇ ಮಹಿರಾ ಎಂಬ ಸಿನಿಮಾ ನಿರ್ದೇಶನ ಮಾಡಿ ತನ್ನೊಳಗಿನ ಕಸುವೇನೆಂಬುದನ್ನು ಜಾಹೀರು ಮಾಡಿದ್ದವರು ಮಹೇಶ್ ಗೌಡ. ಹಾಗೊಂದು ಮೈಲಿಗಲ್ಲು ನೆಟ್ಟ ಹಿಂಚುಮುಂಚಿನ ಕಾಲದಿಂದಲೂ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅವರ ಸಿನಿಮಾ ನಿರ್ದೇಶನ ಮಾಡಬೇಕೆಂಬುದು ಮಹೇಶ್ ಗೌಡರ ಮಹಾ ಕನಸಾಗಿತ್ತು. ಕಡೆಗೂ ಒಂದೊಳ್ಳೆ ಕಥೆ ರೆಡಿ ಮಾಡಿಕೊಂಡು ಪುನೀತ್‌ರನ್ನು ಭೇಟಿಯಾಗಿದ್ದರು. ಮಾತುಕಥೆ ನಡೆದು ಪುನೀತ್ ಕೂಡಾ ಹಸಿರು ನಿಶಾನೆ ತೋರಿಸಿದ್ದರು. ತನ್ನ ಜೀವಮಾನದ ಕನಸೊಂದು ನನಸಾದ ಖುಷಿಯಲ್ಲಿದ್ದ ಮಹೇಶ್ ಗೌಡರಿಗೆ ಮತ್ತೊಂದು ಸರ್‌ಪ್ರೈಸ್ ಪುನೀತ್ ಕಡೆಯಿಂದಲೇ ಸಿಕ್ಕಿ ಬಿಟ್ಟಿತ್ತು.

ಸಿನಿಮಾ ಮಾತುಕತೆಯ ಸಂದರ್ಭದಲ್ಲಿ ಪುನೀತ್, ಮಹೇಶ್ ಗೌಡ ಅವರ ದೇಹದಲ್ಲಿದ್ದ ವಿಟಿಲಿಗೋ ಛಾಯೆಯನ್ನು ಗುರುತಿಸಿದ್ದರು. ಅದರ ಬಗ್ಗೆ ಒಂದಷ್ಟು ವಿಚಾರಗಳನ್ನು ಕೇಳಿ ತಿಳಿದುಕೊಂಡಿದ್ದರು. ಅದಾದಾಕ್ಷಣವೇ ವಿಟಿಲಿಗೋ ಸಮಸ್ಯೆಯನ್ನು ಕೇಂದ್ರವಾಗಿಟ್ಟುಕೊಂಡು ಒಂದು ಸಿನಿಮಾವನ್ನು ಪಿಆರ್‌ಕೆ ಸ್ಟುಡಿಯೋಸ್‌ಗಾಗಿ ನಿರ್ದೇಶನ ಮಾಡುವಂತೆ ಕೇಳಿಕೊಂಡಿದ್ದರು. ಇದು ಕನ್ನಡದ ಹೆಮ್ಮೆಯ ಸಿನಿಮಾವಾಗುತ್ತದೆಂಬ ಭವಿಷ್ಯವನ್ನೂ ನುಡಿದಿದ್ದರು. ಆ ಘಳಿಗೆಯವರೆಗೂ ತನ್ನನ್ನು ಎಳವೆಯಿಂದಲೇ ಬಾಧಿಸಿದ್ದ ವಿಟಿಲಿಗೋ ಸಮಸ್ಯೆಯ ಸುತ್ತ ಸಿನಿಮಾ ನಿರ್ದೇಶನ ಮಾಡುವ ಸಣ್ಣ ಆಲೋಚನೆಯೂ ಮಹೇಶ್ ಗೌಡರ ಬಳಿ ಸುಳಿದಿರಲಿಲ್ಲ.

ಪುನೀತ್ ಅವರ ಒತ್ತಾಸೆ ಮತ್ತು ಪ್ರೇರಣೆಯಿಂದಲೇ ಮಹೇಶ್ ಗೌಡ ಅವರು ಈ ಸಿನಿಮಾಕ್ಕೆ ಚಾಲನೆ ನೀಡಿದ್ದರು. ಒಂದು ವೇಳೆ ಪುನೀತ್ ಅಕಾಲದಲ್ಲಿ ಇಲ್ಲವಾಗದೇ ಇದ್ದಿದ್ದರೆ, ಬಿಳಿಚುಕ್ಕಿ ಹಳ್ಳಿಹಕ್ಕಿಯನ್ನು ಅವರೇ ಪಿಆರ್‌ಕೆ ಸ್ಟುಡಿಯೋಸ್ ಮೂಲಕ ನಿರ್ಮಾಣ ಮಾಡುತ್ತಿದ್ದರು. ಆದರೆ, ಆ ನಂತರ ಉಳಿದುಕೊಂಡಿದ್ದು ಪುನೀತ್ ನಿರ್ಗಮಿಸಿದ ನಿರ್ವಾತ ಸ್ಥಿತಿ ಮಾತ್ರ. ಅಂಥಾ ಆಘಾತದ ನಡುವೆ ತಮ್ಮದೇ ಹೊನ್ನುಡಿ ಪ್ರೊಡಕ್ಷನ್ಸ್ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಈ ಕ್ಷಣದಲ್ಲಿ ಪುನೀತ್ ಇದ್ದಿದ್ದರೆ ಖಂಡಿತವಾಗಿಯೂ ಅ ಖುಷಿಪಡುತ್ತಿದ್ದರು. ಈ ಹೊತ್ತಿನಲ್ಲಿ ಸಾಕಷ್ಟು ಸವಾಲುಗಳನ್ನು ಎದುರಿಸಿ ಈ ಚಿತ್ರ ಬಿಡುಗಡೆಗೆ ಹತ್ತಿರಾಗಿದೆ. ಇಂಥಾ ಸಂಭ್ರಮದ ಘಳಿಗೆಯಲ್ಲಿ ಅಪ್ಪು ಇರಬೇಕಿತ್ತೆಂಬ ಕೊರಗೊಂದು ಮಹೇಶ್ ಗೌಡ ಅವರನ್ನು ಇನ್ನಿಲ್ಲದಂತೆ ಕಾಡುತ್ತಿದೆ…

The post Bilichukki Hallihakki Movie: ಅಪ್ಪು ಇದ್ದಿದ್ದರೆ ಅದೆಷ್ಟು ಸಂಭ್ರಮಿಸುತ್ತಿದ್ದರೋ… appeared first on Cini Shodha.

ಇದೀಗ ಒಂದಷ್ಟು ಸಿನಿಮಾಗಳ ಭಾಗವಾಗಿರುವ ಅಥರ್ವ ಪ್ರಕಾಶ್ ಮಂಗಳೂರು ಸೀಮೆಯವರು. ಕಲೆಯ ವಾತಾವರಣದಲ್ಲಿಯೇ ಬೆಳೆದಿದ್ದ ಅವರ ಪಾಲಿಗೆ ಹದಿನಾರನೇ ವಯಸ್ಸಿನಲ್ಲಿಯೇ ಒಂದೊಳ್ಳೆ ಅವಕಾಶ ಕೂಡಿ ಬಂದಿತ್ತು. ತುಳುವಿನಲ್ಲಿ ಸೂಪರ್ ಹಿಟ್ ಆಗಿದ್ದ, ಐನೂರು ದಿನಗಳ ಕಾಲ ಯಶಸ್ವೀ ಪ್ರದರ್ಶನ ಕಂಡಿದ್ದ ಚಾಲಿ ಪೋಲಿಲು ಚಿತ್ರದಲ್ಲಿ ನಟಿಸುವ ಅವಕಾಶವೊಂದು ಅಥರ್ವಗೆ ಸಿಕ್ಕಿತ್ತು. ಆ ಚಿತ್ರದಲ್ಲಿ ಬಾಲ ನಟನಾಗಿ, ನಾಯಕನ ಬಾಲ್ಯದ ಪಾತ್ರಕ್ಕೆ ಜೀವ ತುಂಬಿದ್ಧ ಅಥರ್ವ ಪಾಲಿಗೆ ಆ ದಿನಗಳಿಂದಲೇ ನಟನಾಗಿ ಬೆಳೆದು ನಿಲ್ಲುವ ಹಂಬಲವಿತ್ತು. ಆ ನಂತರದಲ್ಲಿ ಓದಿನ ನಡುವೆಯೇ ನಟನಾಗೋ ತಾಲೀಮು ನಡೆಸುತ್ತಾ ಬಂದು, ಇದೀಗ ಎಂಥಾ ಸವಾಲಿನ ಪಾತ್ರವನ್ನಾದರೂ ಸಲೀಸಾಗಿ ನಿಭಾಯಿಸುವ ಕಸುವು ತುಂಬಿಕೊಂಡಿರೋದು ಅಥರ್ವನ ಹೆಚ್ಚುಗಾರಿಕೆ.

ಹೀಗೆ ತುಳು ಚಿತ್ರರಂಗದಲ್ಲಿ ದೇವದಾಸ್ ಕಾಪಿಕಾಡ್, ಶೋಭರಾಜ್ ಮುಂತಾದ ನಿರ್ದೇಶಕರ ಗರಡಿಯಲ್ಲಿ ನಟನಾಗಿ ಪಳಗಿಕೊಂಡಿದ್ದ ಅಥರ್ವ ಕನ್ನಡಕ್ಕೆ ಅಡಿಯಿರಿಸಿದ್ದದ್ದು ಪಿಆರ್‌ಕೆ ಪ್ರೊಡಕ್ಷನ್ಸ್ ಮೂಲಕ. ನವ ಪ್ರತಿಭೆಗಳಿಗೆ ಅವಕಾಶ ಕಲ್ಪಿಸಿ ಪ್ರೋತ್ಸಾಹಿಸುತ್ತಾ ಬಂದಿದ್ದ ಪುನೀತ್ ರಾಜ್ ಕುಮಾರ್ ತನ್ನ ಬ್ಯಾನರ್ ಮೂಲಕ ಮ್ಯಾ ಆಫ್ ದ ಮ್ಯಾಚ್ ಎಂಬ ಚಿತ್ರವನ್ನು ನಿರ್ಮಾಣ ಮಾಡಿದ್ದರು. ಆ ಚಿತ್ರದ ಮೂಲಕ ಅಥರ್ವ ಕನ್ನಡ ಸಿನಿಮಾಭಿಮಾನಿಗಳನ್ನು ನಾಯಕ ನಟನಾಗಿ ಮುಖಾಮುಖಿಯಾಗಿದ್ದರು. ಚೇತನ್ ಮುಂಡಾಡಿ ಜನಿರ್ದೇಶನದ ಭಾವಪೂರ್ಣ ಚಿತ್ರದಲ್ಲಿಯೂ ಪ್ರಧಾನ ಪಾತ್ರವನ್ನು ನಿರ್ವಹಿಸಿ ಸೈ ಅನ್ನಿಸಿಕೊಂಡಿದ್ದರು. ಅದಾದ ನಂತರ ಮತ್ತೆ ಸತ್ಯಪ್ರಕಾಶ್ ಸಾರಥ್ಯದ ಎಕ್ಸ್ ಆಂಡ್ ರೇ ಸಿನಿಮಾ ಮೂಲಕ ಮತ್ತೆ ನಾಯಮಕನಾಗಿ ಗಮನ ಸೆಳೆದುಕೊಂಡಿದ್ದಾರೆ.

ಕಣ್ಣಾಮುಚ್ಚೆ ಕಾಡೇಗೂಡೆ ಎಂಬ ಚಿತ್ರದಲ್ಲಿಯೂ ನಾಯಕನಾಗಿ ನಟಿಸಿದ್ದ ಅಥರ್ವ ನಾನ್‌ವೆಜ್ ಅಂತೊಂದು ಚಿತ್ರದಲ್ಲಿಯೂ ನಟಿಸಿದ್ದಾರೆ. ಆ ಸಿನಿಮಾ ಮುಂದಿನ ತಿಂಗಳು ತೆರೆಗಾಣುವ ಸಾಧ್ಯತೆಗಳಿದ್ದಾವೆ. ಇದೀಗ ತುಳು ಮತ್ತು ಕನ್ನಡದಲ್ಲಿ ಏಕಕಾಲದಲ್ಲಿ ನಿರ್ಮಾಣಗೊಳ್ಳಲಿರುವ ಚಿತ್ರಕ್ಕಾಗಿ ತಯಾರಿ ಆರಂಭವಾಗಿದೆ. ವಿಶೇಷವೆಂದರೆ, ಪೃಥ್ವಿ ಅಂಬಾರ್ ಆ ಸಿನಿಮಾವನ್ನು ನಿರ್ದೇಶನ ಮಾಡಲಿದ್ದಾರೆ. ಮೂಲತಃ ಆರ್ಕಿಟೆಕ್ಟ್ ಆಗಿರುವ ಅಥರ್ವ ಪಾಲಿಗೆ ಮೊದಲು ಸಿನಿಮಾ ಮೋಹ ಶುರುವಾದದ್ದು ಮೋಹನ್ ಲಾಲ್ ಅಭಿನಯದ ಸಿನಿಮಾ ಮೂಲಕ. ಅದರೊಂದಿಗೆ ಸಿನಿಮಾ ಸೆಳೆತಕ್ಕೆ ಬಿದ್ದಿದ್ದ ಅಥರ್ವ, ಕಾಲೇಜು ದಿನಗಳಲ್ಲಿ ತಮ್ಮ ಮಿತಿಯಲ್ಲಿಯೇ ಒಂದಷ್ಟು ತಯಾರಿ, ಪ್ರಯೋಗಗಳನ್ನು ಮಾಡಿದ್ದರು. ಕಡೆಗೂ ಕನಸಿನ ಹಾದಿಯಲ್ಲಿ ಕಾಲೂರಿ ನಿಂತಿರುವ ಅವರೀಗ ಕನ್ನಡ ಮತ್ತು ತುಳುವಿನಲ್ಲಿ ಬಹು ಬೇಡಿಕೆಯ ನಟನಾಗಿ ಹೊರಹೊಮ್ಮಿದ್ದಾರೆ…

The post atharva prakash: ತುಳು-ಕನ್ನಡದಲ್ಲಿ ಅಥರ್ವ ಪ್ರಕಾಶ್ ಸಿನಿಮಾ ಯಾನ! appeared first on Cini Shodha.

ಈ ಹಿಂದೆ (yuva rajkumar) ಯುವ ರಾಜ್ ಕುಮಾರ್ ಪೊರಕೆ ಹಿಡಿದು ನಿಂತ ಪೋಸ್ ಒಂದು ಪ್ರೇಕ್ಷಕರನ್ನು ಎದುರುಗೊಂಡಿತ್ತು. ಅದು ಥೇಟು (powerstar puneethrajkumar) ಪವರ್ ಸ್ಟಾರ್ ಪುನೀತರ್ ರಾಜ್ ಕುಮಾರ್ ನಟಿಸಿದ್ದ ಜಾಕಿ (jackie movie) ಸಿನಿಮಾವನ್ನು ಕಾಪಿ ಹೊಡೆದಂತಿತ್ತು. ಹೇಳಿಕೇಳಿ ಅಪ್ಪು ಉತ್ತರಾಧಿಕಾರಿ ಎಂಬಂತೆ ಬಿಂಬಿಸಿಕೊಂಡಿರುವಾತ ಯುವ. ಅದರ ಭಾಗವಾಗಿಯೇ ಇಂಥಾದ್ದೊಂದು ಅವತಾರ ಸೃಷ್ಟಿಯಾಗಿರಬಹುದು ಅಂತನ್ನಿಸಿತ್ತು. ಆದರೀಗ ಸಿನಿಮಾ ನೋಡಿದ ಮಂದಿಗೇ ಒಟ್ಟಾರೆ ಎಕ್ಕ ಮೂಡಿ ಬಂದಿರುವ ರೀತಿಯಲ್ಲಿಯೂ ಕೂಡಾ ಜಾಕಿಯ ಛಾಯೆ ಢಾಳಾಗಿದೆ ಅನ್ನಿಸಿದೆ. ಹಾಗಂತ ಎಕ್ಕದಲ್ಲಿರೋದು ಮತ್ತದೇ ಕಥೆಯಾ ಅಂದುಕೊಂಡರೆ ಅದು ಪಕ್ಕಾ ಸುಳ್ಳು. ಕಥೆ ಹೊಸತೇ ಆದರೂ, ಅದು ದೃಶ್ಯರೂಪ ಪಡೆದ ರೀತಿ ಮಾತ್ರ ಹಳೇ ಜಾಡಿನದ್ದೇ!

ಸಮೃದ್ಧ ಹಳ್ಳಿಯೊಂದರಲ್ಲಿ ತನ್ನದೇ ಲೋಕದಲ್ಲಿ ವಿಹರಿಸುತ್ತಿದ್ದ ಯುವಕ ಮುತ್ತು. ಮಗು ಮನಸಿನ ಈತ ಒಲ್ಲದ ಮನಸ್ಸಿಂದಲೇ ಊರು ಬಿಟ್ಟು ಬೆಂಗಳೂರು ಸೇರಿಕೊಂಡ ನಂತರ ಗರಿಬಿಚ್ಚಿಕೊಳ್ಳುವ ಕಥನವೇ ಎಕ್ಕದ ಅಸಲೀ ಜೀವಾಳ. ಹಾಗೆ ಬೆಂಗಳೂರು ಸೇರಿಕೊಂಡ ಮುತ್ತುವಿನ ಬದುಕಲ್ಲಿ ಎಂತೆಂಥಾ ಘಟನೆಗಳು ನಡೆಯುತ್ತವೆ? ಹಳ್ಳಿಗಾಡಿನ ಮುಗ್ಧತೆಯನ್ನು ಮೈಗೂಡಿಸಿಕೊಂಡು ಬೆಳೆದ ಮುತ್ತು ಮಾಸ್ ಅವತಾರವೆತ್ತಲು ಕಾರಣವೇನು? ಇಂಥಾ ಪ್ರಶ್ನೆಗಳಿಗೆ ಸಿನಿಮಾ ಮಂದಿರದಲ್ಲೇ ಉತ್ತರ ಹುಡುಕಿದರೊಳಿತು. ಆದರೆ, ನಿರ್ದೇಶಕ ರೋಹಿತ್ ಪದಕಿ ತಾಂತ್ರಿಕವಾಗಿ ಎಕ್ಕವನ್ನು ಶ್ರೀಮಂತಿಕೆಯಿಂದ ಕಟ್ಟಿ ಕೊಟ್ಟಿದ್ದರಾದರೂ, ಯುವನನ್ನು ಮಾಸ್ ಲುಕ್ಕಿನಲ್ಲಿ ಬಿಂಬಿಸುವ ಭರಾಟೆಯಲ್ಲಿ ಈ ಕಥೆಯ ಭಾವನಾತ್ಮಕ ಸನ್ನಿವೇಶಗಳೇ ಮಂಕಾಗುವಂತೆ ಮಾಡಿದ್ದಾರೆ. ಭಾವನಾತ್ಮಕ ಸನ್ನಿವೇಶಗಳೆಲ್ಲ ಮಾಸ್ ಸೀನುಗಳಲ್ಲು ಕಲೆಸಿಕೊಂಡು ಎರಡೂ ಕೂಡಾ ಪ್ರೇಕ್ಷಕರ ಮನಸಿಗೆ ತಾಕದೆ ಪೇಲವ ಭಾವವನ್ನಷ್ಟೇ ಮೂಡಿಸುತ್ತೆ.

ಇನ್ನು ಪಾತ್ರ ಕಟ್ಟುವ ವಿಚಾರದಲ್ಲಿ (rohit padaki) ರೋಹಿತ್ ಪದಕಿಯದ್ದು ಗಮನಾರ್ಹ ಪ್ರಯತ್ನ. ಖುದ್ದು ರೋಹಿತ್ ಅವರಿಗೆ ಮಾಸ್ ಕಥನ ಹೊಸತು. ತಮ್ಮ ಆತ್ಮದ ಅಭಿರುಚಿಯನ್ನು ಮಾಸ್ ಧಾಟಿಯೊಂದಿಗೆ ಸರಿದೂಗಿಸುವಲ್ಲಿ ಅವರು ಅಲ್ಲಲ್ಲಿ ಬ ಲಾಲೆನ್ಸು ತಪ್ಪಿದಂತೆ ಭಾಸವಾಗುತ್ತೆ. ಇನ್ನು ಸಾಹಿತ್ಯದ ನಂಟು ಹೊಂದಿರುವ (vikram hathwar) ವಿಕ್ರಮ್ ಹತ್ವಾರ್ ಕಥೆಯೊಂದಿಗೆ ಸಂಭಾಷಣೆಯಲ್ಲಿಯೂ ಈ ಚಿತ್ರಕ್ಕೆ ಸಾಥ್ ಕೊಟ್ಟಿಯದ್ದಾರೆ. ಇಂಥಾ ಸಾಹಿತ್ಯಕ ಹಿನ್ನೆಲೆಯವರು ಸಿನಿಮಾರಂಗಕ್ಕೆ ಎಂಟ್ರಿ ಕೊಟ್ಟಾಗ ಸಹಜವಾಗಿಯೇ ನಿರೀಕ್ಷೆ ಮೂಡುತ್ತೆ. ಹತ್ವಾರ್ ಈ ಚಿತ್ರದ ಕಥೆ ಚಿತ್ರಕಥೆ ಮತ್ತು ಸಭಾಷಣೆಗಳ ಭಾಗವಾಗಿದ್ದಾರೆ.

ಇನ್ನುಳಿದಂತೆ ಎಕ್ಕ ಚಿತ್ರದ ವಿಚಾರದಲ್ಲಿ ಯುವ ರಾಜ್ ಕುಮಾರ್ ನಟನೆಯತ್ತ ಎಲ್ಲರ ಚಿತ್ತ ನೆಟ್ಟುಕೊಂಡಿತ್ತು. ಯಾಕೆಂದರೆ, ಮೊದಲ ಚಿತ್ರ ಯುವದಲ್ಲಿ ಆತನ ನಟನೆಯ ಬಗ್ಗೆ ದೊಡ್ಡ ಮಟ್ಟದಲ್ಲಿಯೇ ಅಪಸ್ವರ ಕೇಳಿ ಬಂದಿತ್ತು. ಜೊತೆಗೆ ಆ ಸಿನಿಮಾ ಭೂಮಿಕೆಯಲ್ಲಿಯೇ ವಿವಾದವೂ ತಲೆಯಿತ್ತಿತ್ತು. ಅಷದರ ಬೆನ್ನಲ್ಲಿಯೇ ಎಕ್ಕ ಚಿತ್ರ ಘೋಷಣೆಯಾಗಿದ್ದರಿಂದ ಅದರ ಬಗೆಗೊಂದು ಕುತೂಹಲವಿತ್ತು. ಈ ಸಿನಿಮಾ ಮಟ್ಟಿಗೆ ಹೇಳೋದಾದರೆ, ಯುವನ ನಟನೆಯಲ್ಲಿ ಒಂದಷ್ಟು ಸಕಾರಾತ್ಮಕ ಬೆಳವಣಿಗೆ ಕಾಣಿಸುತ್ತದೆ. ಆದರೆ, ಓರ್ವ ನಾಯಕ ನಟನಾಗಿ ನೆಲೆ ಕಂಡುಕೊಳ್ಳಬೇಕೆಂದರೆ, ಯುವ ನಟನೆಯಲ್ಲಿ ಮತ್ತಷ್ಟು ಪಳಗಿಕೊಳ್ಳೋದು ಅತ್ಯವಶ್ಯಕ. ಅಂತೂ ಎಕ್ಕ ಚಿತ್ರ ನ ಇರೀಕ್ಷೆಯ ಮಟ್ಟ ಮುಟ್ಟುವಂತೆ ಮೂಡಿ ಬಂದಿಲ್ಲ ಅನ್ನೋದಂತೂ ಪಕ್ಕಾ!

The post Ekka movie review: ಎರಡನೇ ಪ್ರಯತ್ನದಲ್ಲೂ ತಪ್ಪಿತೇ ಯುವನ ಲೆಕ್ಕ! appeared first on Cini Shodha.

ರೋಹಿತ್ ಪದಕಿ (director rohit padaki) ಎಕ್ಕ ಚಿತ್ರದ ಸಾರಥ್ಯ ವಹಿಸಿಕೊಂಡಾಗಲೇ ಒಂದಷ್ಟು ಕುತೂಹಲ ಮೂಡಿಕೊಂಡಿತ್ತು. ಒಂದು ಧಾಟಿಯ ಸಿನಿಮಾದಿಂದ ಪ್ರವರ್ಧಮಾನಕ್ಕೆ ಬಂದಿದ್ದ ರೋಹಿತ್, ಎಕ್ಕದ ಮೂಲಕ ಎಂಥಾ ಕಥೆಯನ್ನು ಕೈಗೆತ್ತಿಕೊಂಡಿರಬಹುದು? ಅದನ್ನು ಮಾಸ್ ಶೈಲಿಯಲ್ಲಿ ಹೇಗೆ ರೂಪಿಸಿರಬಹುದು? ಇಂಥಾ ಒಂದಷ್ಟು ಪ್ರಶ್ನೆಗಳು ಸಹಜವಾಗಿಯೇ ಮೂಡಿಕೊಂಡಿದ್ದವು. ಅದೆಲ್ಲವಕ್ಕೂ ಕೂಡಾ ಟ್ರೈಲರ್ ಮೂಲಕ ನಿಖರ ಉತ್ತರ ಸಿಕ್ಕಿದೆ. ಹಳ್ಳಿ ಬದುಕಿನ ಹಿನ್ನೆಲೆಯಲ್ಲಿ ತೆರೆದುಕೊಂಡು, ಬೆಂಗಳೂರೆಂಬೋ ಸಮುದ್ರದಲ್ಲಿ ಅರಳುವ ಕಥೆಗಿಲ್ಲಿ ರೋಹಿತ್ ಪದಕಿ ದೃಷ್ಯ ರೂಪ ಕೊಟ್ಟಿದ್ದಾರೆ. ಎಲ್ಲೋ ಇರುಕ್ಕಿನಲ್ಲಿ ಹುಟ್ಟುವ ತೊರೆಯೊಂದು ನಾನಾ ರೂಪ ತಾಳಿ, ನದಿಯಾಗಿ, ಸಮುದ್ರ ಸೇರುವ ರೂಪಕದೊಂದಿಗೆ ಹಳ್ಳಿ ಹುಡುಗನೋರ್ವ ಬೆಂಗಳೂರು ಸೇರಿಕೊಂಡಾದ ನಂತರ ಮಾಸ್ ಕಥನ ಎಕ್ಕದ ಮೂಲ ಬಿಂದುವಾಗಿರೋ ವಿಚಾರವೂ ಟ್ರೈಲರ್ ಮೂಲಕ ಸಾಬೀತಾಗಿದೆ.

ಯುವ ನಿರ್ವಹಿಸಿರುವ ಪಾತ್ರಕ್ಕೆ ಒಂದಷ್ಟು ಭಿನ್ನ ಚಹರೆಗಳಿದ್ದಂತಿದೆ. ಹಳ್ಳಿ ಶೇಡೂ ಸೇರಿದಂತೆ ಯುವ ಅದನ್ನು ಎಲ್ಲಿಯೂ ಅಸಹಜ ಎನ್ನಿಸದಂತೆ ನಿಭಾಯಿಸಿರೋದೂ ಕೂಡಾ ಎದ್ದು ಕಾಣಿಸುತ್ತೆ. ಈವತ್ತಿಗೆ ಎಕ್ಕ ಸಿನಿಮಾದ ಸುತ್ತಾ ಗೆಲುವಿನ ಲೆಕ್ಕಾಚಾರಗಳು ಹುರಿಗೊಂಡಿರೋದರ ಹಿಂದೆ ಯುವ ಅಭಿನಯದ ಝಲಕ್ಕುಗಳೇ ಪ್ರಧಾನವಾಗಿ ಕೆಲಸ ಮಾಡಿವೆ. ಈ ಹಿಂದೆ ಎಕ್ಕದ ಬ್ಯಾಂಲ್ ಬಂಗಾರಿ ಅಂತೊಂದು ಹಾಡು ಬಿಡುಗಡೆಗೊಂಡಿತ್ತು. ಅದೀಗ ರೀಲ್ಸುಗಳ ಮೂಲಕ ಎಲ್ಲೆಡೆ ಪ್ರಸಿದ್ಧಿ ಪಡೆದುಕೊಂಡಿದೆ. ಅದರಲ್ಲಿ ಯುವ ಹಾಕಿರೋ ಸ್ಟೆಪ್ಪುಗಳೂ ಕೂಡಾ ಪ್ರಶಂಸೆಗೆ ಪಾತ್ರವಾಗಿವೆ. ಒಟ್ಟಾರೆಯಾಗಿ ಇದೀಗ ಬಿಡುಗಡೆಗೊಂಡಿರುವ ಟ್ರೈಲರ್ ಮೂಲಕ ಎಕ್ಕದ ಸುತ್ತಾ ಪಾಸಿಟಿವ್ ಪ್ರಭೆ ತಂತಾನೇ ಹಬ್ಬಿಕೊಂಡಿರೋದಂತೂ ಸತ್ಯ!

ತಿಂಗಳುಗಳ ಹಿಂದೆ ಟೀಸರ್ ಬಿಡುಗಡೆಗೊಂಡಿದ್ದಾಗ ಯುವ ಎನರ್ಜಿಟಿಕ್ ಅವತಾರದಲ್ಲಿ ಕಾಣಿಸಿಕೊಂಡಿದ್ದರು. ಬರೀ ವೇಷಭೂಷಣದಲ್ಲಿ ಮಾತ್ರವಲ್ಲ; ಯುವ ಆವಾಹಿಸಿಕೊಂಡಿದ್ದ ಲವಲವಿಕೆಯಲ್ಲಿಯೂ ಕೂಡಾ ಪುನೀತ್ ರಾಜ್ ಕುಮಾರ್ ಛಾಯೆ ಸ್ಪಷ್ಟವಾಗಿಯೇ ಕಾಣಿಸಿಕೊಂಡಿತ್ತು. ಪುನೀತ್ ಅಕಾಲಿಕ ನಿರ್ಗಮನದ ನಂತರ ಆ ಸ್ಥಾನವನ್ನು ಯುವ ತುಂಬುತ್ತಾನೆ ಎಂಬಂಥಾ ನಿರೀಕ್ಷೆ ಅಭಿಮಾನಿ ವಲಯದಲ್ಲಿತ್ತು. ಅಪ್ಪುವಿನಂಥ ನಟರ ಸ್ಥಾನವನ್ನು ಮತ್ತೋರ್ವ ತುಂಬಲು ಸಾಧ್ಯವಿಲ್ಲದಿದ್ದರೂ, ಅಪ್ಪು ಅಭಿಮಾನಿಗಳಿಗೆ ಸಮಾಧಾನಕರ ವಾತಾವರಣವೊಂದು ಎಕ್ಕದ ಮೂಲಕ ಸೃಷ್ಟಿಯಾದರೂ ಅಚ್ಚರಿಯೇನಿಲ್ಲ. ಮಾಸ್ ಅಂಶುಗಳಿದ್ದರೂ ಕೂಡಾ ಕುಟುಂಬ ಸಮೇತರಾಗಿ ಕೂತು ನೋಡುವಂಥಾ ರೀತಿಯಲ್ಲಿರೋ ರೋಹಿತ್ ಈ ಚಿತ್ರವನ್ನು ರೂಪಿಸಿದಂತಿದೆ. ಅದೂ ಕೂಡಾ ಎಕ್ಕದ ಪಾಲಿಗೆ ಪ್ಲಸ್ ಪಾಯಿಂಟಾಗೋ ಸಾಧ್ಯತೆಗಳಿದ್ದಾವೆ!

The post Ekka movie trailer review: ಎರಡನೇ ಚಿತ್ರದಲ್ಲಿ ದಡ ಸೇರಬಹುದಾ ದೊಡ್ಮನೆ ಹುಡ್ಗ? appeared first on Cini Shodha.