ಕಿರುತೆರೆಯಲ್ಲಿ ಪ್ರಸಿದ್ಧಿ ಪಡೆದಿರುವ ಅಮೃತಧಾರೆ, ಮಿಥುನರಾಶಿ ಮುಂತಾದ ಧಾರಾವಾಹಿಗಳಲ್ಲಿ ನಟಿಸುವ ಮೂಲಕ ಕಿರುತೆರೆ ಪ್ರೇಕ್ಷಕರ ಮನಗೆದ್ದವರು ವೈಷ್ಣವಿ. ಒಂದಷ್ಟು ಸಿನಿಮಾಗಳಲ್ಲಿಯೂ ಕಾಣಿಸಿಕೊಂಡಿರುವ ಆಕೆ ಟೈಮ್ ಪಾಸ್ ಚಿತ್ರದ ಸಹ ನಿರ್ದೇಶಕಿಯಾಗಿ ಕಾರ್ಯ ನಿರ್ವಹಿಸಿದ್ದಾರೆ. ಆರಂಭದಿಂದ ಇಲ್ಲಿಯವರೆಗೂ ಪ್ರತೀ ಹಂತದಲ್ಲಿಯೂ ನಿರ್ದೇಶಕ ಚೇತನ್ ಜೋಡಿದಾರ್ ಅವರಿಗೆ ಸಾಥ್ ಕೊಟ್ಟಿದ್ದಾರೆ. ಇಷ್ಟು ಮಾತ್ರವಲ್ಲದೇ, ನೃತ್ಯ ನಿರ್ದೇಶಕಿಯಾಗಿಯೂ ಕೆಲಸ ಮಾಡಿದ್ದಾರೆ. ಎರಡು ಹಾಡುಗಳಿಗೆ ಸಾಹಿತ್ಯ ಬರೆಯುವ ಮೂಲಕವೂ ಗಮನ ಸೆಳೆದಿದ್ದಾರೆ. ಈಗಾಗಲೇ ಅವೆರಡೂ ಹಾಡುಗಳು ಬಿಡುಗಡೆಗೊಂಡು, ಕೇಳುಗರಿಂದ ಮೆಚ್ಚುಗೆ ಪಡೆದುಕೊಂಡ ಖುಷಿಯೂ ವೈಷ್ಣವಿಗಿದೆ.

ತೆರೆಮೇಲೆ ಕಾಣಿಸಿಕೊಂಡ ಅನುಭವವಿದ್ದ ವೈಷ್ಣವಿ ಸತ್ಯನಾರಾಯಣರದ್ದು ಸಿನಿಮಾ ಜಗತ್ತಿನ ಎಲ್ಲ ವಿಭಾಗಗಳನ್ನೂ ಕೂಡಾ ಅರಿತುಕೊಳ್ಳಬೇಕೆಂಬ ಹಂಬಲ. ನಟಿಯಾಗಿ ನೆಲೆಗೊಳ್ಳುವ ಸಾಧ್ಯತೆಗಳು ಇದ್ದಾಗಲೂ ಕೂಡಾ, ಅವರ ಪ್ರಧಾನ ಆಸಕ್ತಿ ನಿರ್ದೇಶನದತ್ತ ಕೀಲಿಸಿಕೊಂಡಿತ್ತು. ಅಂಥಾದ್ದೊಂದು ಅವಕಾಶವನ್ನು ಟೈಮ್ ಪಾಸ್ ಮೂಲಕ ನಿರ್ದೇಶಕ ಚೇತನ್ ಜೋಡಿದಾರ್ ಕಲ್ಪಿಸಿದ್ದಾರೆ. ಹಾಗೆ ಸಿಕ್ಕ ಅವಕಾಶವನ್ನು ಸರಿಕಟ್ಟಾಗಿ ಬಳಸಿಕೊಂಡ ಆತ್ಮತೃಪ್ತಿ ಮತ್ತು ಹೆಣ್ಣುಮಕ್ಕಳು ವಿರಳವಾಗಿರುವ ವಲಯದಲ್ಲಿ ಕಾರ್ಯನಿರ್ವಹಿಸಿದ ಹೆಮ್ಮೆ ವೈಷ್ಣವಿಯದ್ದು. ವರ್ಷಗಟ್ಟಲೆ ಹಾಕಿದ ಶ್ರಮದಿಂದ ಎಲ್ಲ ವರ್ಗಕ್ಕೂ ರುಚಿಸುವಂತೆ ಟೈಮ್ ಪಾಸ್ ಚಿತ್ರ ಮೂಡಿ ಬಂದಿದೆ ಎಂಬ ಖುಷಿಯೂ ಅವರಲ್ಲಿದೆ.

ಬೆಂಗಳೂರು ಹುಡುಗಿಯಾಗಿರುವ ವೈಷ್ಣವಿ ಬಿಕಾಂ ಪದವೀಧರೆ. ಶಾಲಾ ಕಾಲೇಜು ದಿನಗಳಲ್ಲಿಯೇ ನಟನೆಯ ಗುಂಗು ಹತ್ತಿಸಿಕೊಂಡಿದ್‌ದ ಅವರು, ಓದು ಮುಗಿಯುತ್ತಲೇ ರಂಗಭೂಮಿ ತಂಡಗಳೊಂದಿಗೆ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು. ಅಲ್ಲಿಯೂ ಕೂಡಾ ಬರೀ ನಟನೆಗೆ ಮಾತ್ರವೇ ಸೀಮಿತವಾಗದೆ ಎಲ್ಲ ವಿಭಾಗಗಳನ್ನೂ ಅರಗಿಸಿಕೊಳ್ಳಲು ಪ್ರಯತ್ನಿಸಿದ್ದರು. ಹೀಗೆ ರಂಗಭೂಮಿಯಲ್ಲಿ ಒಂದಷ್ಟು ಕಾಲ ಪಳಗಿಕೊಂಡ ನಂತರ ಧಾರಾವಾಹಿಗಳತ್ತ ವಾಲಿಕೊಂಡ ವೈಷ್ಣವಿ ಪಾಲಿಗೆ ಕಲರ್ಸ್ ಮತ್ತು ಜೀ ಕನ್ನಡ ವಾಹಿನಿಗಳ ಜನಪ್ರಿಯ ಧಾರಾವಾಹಿಗಳಲ್ಲಿ ಗುರುತಾಗುವಂಥಾ ಪಾತ್ರಗಳು ಸಿಕ್ಕಿದ್ದವು. ಪ್ರಿಯಾಂಕಾ ಉಪೇಂದ್ರ ನಟಿಸಿರುವ, ಇನ್ನಷ್ಟೇ ಬಿಡುಗಡೆಗೊಳ್ಳಬೇಕಿರುವ ಕತೃ ಕ್ರಿಯಾ ಕರ್ಮ ಚಿತ್ರದಲ್ಲಿಯೂ ಆಕೆ ನಟಿಸಿದ್ದಾರೆ. ಸ್ಲೋಗನ್ ಚಿತ್ರದಲ್ಲಿಯೂ ಮುಖ್ಯ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಹೀಗೆ ನಟಿಯಾಗಿ ಚಿಗುರಿಕೊಳ್ಳುತ್ತಿದ್ದ ವೈಷ್ಣವಿ ಪಾಲಿಗೆ ಟೈಮ್ ಪಾಸ್ ಚಿತ್ರ ರೂಪಾಂತರವಿದ್ದಂತೆ. ಇದರ ಮೂಲಕ ತನ್ನ ವೃತ್ತಿ ಬದುಕು ಮತ್ತೊಂದು ಬಗೆಯಲ್ಲಿ ಟಿಸಿಲೊಡೆಯಹುವ, ಗೆಲುವು ದಕ್ಕುವ ನಿರೀಕ್ಷೆ ವೈಷ್ಣವಿ ಅವರದ್ದು!

The post Timepass Kannada Movie: ವೈಷ್ಣವಿ ವೃತ್ತಿ ಬದುಕಲ್ಲಿ ಹೀಗೊಂದು ರೂಪಾಂತರ! appeared first on Cini Shodha.

ಬಿಳಿಗಿರಿರಂಗನ ಬೆಟ್ಟದ ತಪ್ಪಲಿನ ಪ್ರಾಕೃತಿಕ ದೈವೀಕ ವಾತಾವರಣದಲ್ಲಿ ಬೆಳೆದವರು ರಾಕ್ ರಘು. ಆರಂಭದಿಂದಲೂ ಸಿನಿಮಾ ಬಗೆಗೊಂದು ಸಹಜವಾದ ಆಕರ್ಷಣೆಯಿಟ್ಟುಕೊಂಡಿದ್ದ ರಘು ಪಾಲಿಗೆ ನಟನಾಗಬೇಕೆಂಬ ಆಸೆಯೇನೂ ಇರಲಿಲ್ಲ. ಬೆಟ್ಟದ ಇಕ್ಕೆಲದಲ್ಲಿ ತಲೆಮಾರುಗಳ ಹಿಂದಿನಿಂದಲೂ ಅವರ ಅಸ್ತಿತ್ವವಿತ್ತು. ಅಲ್ಲಿಯೇ ಒಂದು ಸಣ್ಣ ಹೊಟೇಲು ಒಂದಿಡೀ ರಘು ಕುಟುಂಬದ ಜೀವನಾಧಾರವಾಗಿತ್ತು. ಅದನ್ನೇ ನೆಚ್ಚಿಕೊಂಡು ಬದುಕುತ್ತಿದ್ದ ಈತನ ಬದುಕಿನಲ್ಲಿ ಅನಿರೀಕ್ಷಿತ ಅವಘಡವೊಂದು ನಡೆದದ್ದು ೨೦೧೩ರಲ್ಲಿ. ಅದಾಗ ತಾನೇ ಹೊಸತಾಗಿ ಕಾರು ತೆಗೆದುಕೊಂಡಿದ್ದ ರಘು ಭೀಕರ ಅಪಘಾತಕ್ಕೀಡಾಗಿದ್ದರು. ಗಂಭೀರವಾಗಿ ಗಾಯಗೊಂಡ ಕಾರಣದಿಂದ ಒಂದು ವರ್ಷಗಳ ಕಾಲ ಮನೆಯಲ್ಲಿಯೇ ವಿಶ್ರಾಂತಿ ತೆಗೆದುಕೊಳ್ಳಲು ವೈದ್ಯರು ಸೂಚಿಸಿದ್ದರು.

ಹಾಗೆ ಅಪಘಾತಕ್ಕೀಡಾಗಿ ಹಾಸಿಗೆಗೆ ಒರಗಿದ್ದ ರಘು ಪಾಲಿಗಾಗ ಟಿವಿಯೇ ಜಗತ್ತು. ಆ ಕಾಲಕ್ಕೆ ಆಂಡ್ರಾಯ್ಡ್ ಫೋನುಗಳಾಗಲಿ, ಈಗಿನಂತೆ ಇಂಟರ್ನೆಟ್ ಆಗಲಿ ಅಷ್ಟಾಗಿ ಪ್ರವರ್ಧಮಾನಕ್ಕೆ ಬಂದಿರಲಿಲ್ಲ. ಆ ಹಂತದಲ್ಲಿ ಹಲವಾರು ಸಿನಿಮಾಗಳನ್ನು ನೋಡುತ್ತಾ, ಹಾಸ್ಯ ನಟನೆಯತ್ತ ರಘು ಮನಸು ವಾಲಿಕೊಂಡಿತ್ತು. ಬುಲೆಟ್ ಪ್ರಕಾಶ್ ಥರದ ನಟರನ್ನು ನೋಡುತ್ತಾ, ತಾನೂ ಕೂಡಾ ಅದೇ ರೀತಿಯಲ್ಲಿ ಜನರನ್ನು ರಂ ಜಿಸಬೇಕೆಂಬ ಆಕಾಂಕ್ಷೆಯೊಂದು ರಘು ಮನಸಲ್ಲಿ ಮೊಳಕೆಯೊಡೆಯಲಾರಂಭಿಸಿತ್ತು. ಸಾಮಾನ್ಯವಾಗಿ ಹೀಗೆ ಅನಾರೋಗ್ಯದಿಂದಲೋ, ಅಪಘಾತದಿಂದಲೋ ಹಾಸಿಗೆ ಹಿಡಿದ ಸಂದರ್ಭದಲ್ಲಿ ಉತ್ಕಟವಾಗಿ ಹಬ್ಬಿಕೊಳ್ಳುವ ಕನಸೊಂದು ಪವಾಡ ಸದೃಶವಾಗಿ ಹಾಸಿಗೆಯಿಂದ ಎದ್ದು ಕೂರುವಂತೆ ಮಾಡಿಬಿಡೋದಿದೆ. ರಘು ಕೂಡಾ ನಟನಾಗಬೇಕೆಂಬ ಕನಸಿನ ಕಸುವಿನೊಂದಿಗೆ ಆರು ತಿಂಗಳಿಗೆಲ್ಲ ಚೇತರಿಸಿಕೊಂಡು ಬಿಟ್ಟಿದ್ದರು.

ಹಾಗೆ ಚೇತರಿಸಿಕೊಂಡ ಬಳಿಕ ರಘು ನಟನಾಗುವ ಸಲುವಾಗಿ ಗಂಭೀರವಾಗಿ ಪ್ರಯತ್ನಿಸಲಾರಂಭಿಸಿದ್ದರು. ಇದೇ ಹೊತ್ತಿನಲ್ಲಿ ಬಿಆರ್ ಹಿಲ್ಸ್‌ನಲ್ಲಿ ರಾಹಿ ಅಂತೊಂದು ಸಿನಿಮಾದ ಚಿತ್ರೀಕರಣ ನಡೆಯುತ್ತಿತ್ತು. ಗೆಳೆಯರೋರ್ವರ ಕಡೆಯಿಂದ ಈ ವಿಚಾರ ತಿಳಿದ ರಘು ನಿರ್ದೇಶಕ ಗಿರೀಶ್ ಅವರನ್ನು ಭೇಟಿಯಾದಾಗ, ಅಚ್ಚರಿದಾಯಕವಾಗಿ ಆ ಸಿನಿಮಾದ ಹನಾಸ್ಯ ಪಾತ್ರವೊಂದು ಸಿಕ್ಕಿಬಿಟ್ಟಿತ್ತು. ಅದು ನಟನಾಗಿ ರಘು ಪಾಲಿನ ಮೊದಲ ಹೆಜ್ಜೆ. ಆ ನಂತರ ನಿರ್ದೇಶಕ ಮಹೇಶ್ ಸುಖಧರೆ ಬಿಆರ್ ಹಿಲ್ಸ್‌ನ ಐಬಿಗೆ ಬಂದಿದ್ದಾಗ ರಘು ಅವರನ್ನು ಸಂಧಿಸಿ ಅವಕಾಶ ಕೇಳಿದ್ದರಂತೆ. ಆ ಹೊತ್ತಿನಲ್ಲಿ ಉಘೇ ಉಘೇ ಮಾದಪ್ಪ ಎಂಬ ಧಾರಾವಾಹಿ ನಿರ್ದೇಶನ ಮಾಡುತ್ತಿದ್ದ ಸುಖಧರೆ ಅದರಲ್ಲೊಂದು ಪಾತ್ರದಲ್ಲಿ ನಟಿಸೋ ಅವಕಾಶ ಕೊಟ್ಟಿದ್ದರು. ಆ ನಂತರ ಮಹಾದೇವಿ ಎಂಬ ಧಾರಾವಾಹಿಯಲ್ಲಿಯೂ ಒಂದೊಳ್ಳೆ ಪಾತ್ರವೇ ಸಿಕ್ಕಿತ್ತು.

ಅದಾದ ಬಳಿಕ ನಟ ದುನಿಯಾ ವಿಜಯ್ ಅದೊಂದು ಸಲ ಕುಟುಂಬ ಸಮೇತರಾಗಿ ಬಿಆರ್ ಹಿಲ್ಸ್‌ಗೆ ಬಂ ದುಳಿದಿದ್ದರು. ಅವರನ್ನು ಭೇಟಿಯಾದ ರಘುಗೆ ತಮ್ಮ ಚಿತ್ರದಲ್ಲಿ ನಟಿಸಲು ಅವಕಾಶ ಕೊಡೋದಾಗಿ ವಿಜಯ್ ಅಭಯ ಕೊಟ್ಟಿದ್ದರು. ಅದಕ್ಕನುಸಾರವಾಗಿ ಸಲಗ ಚಿತ್ರದಲ್ಲೊಂದು ಪುಟ್ಟ ಪಾತ್ರ ರಘುಗೆ ಸಿಕ್ಕಿತ್ತು. ಆ ನಂತರ ಭೀಮ ಚಿತ್ರದಲ್ಲಿ ಸದಾ ನಾಯಕನ ಜೊತೆಗಿರುವ ಮಹತ್ವದ ಪಾತ್ರದ ಮೂಲಕ ರಾಕ್ ರಘು ಮಿಂಚಿದ್ದರು. ಆ ಸಿನಿಮಾದಲ್ಲಿ ನಟನೆ ಮಾತ್ರವಲ್ಲದೆ, ನಿರ್ದೇಶನ ಸೇರಿದಂತೆ ಎಲ್ಲದರಲ್ಲಿಯೂ ಅನುಭವ ಗಿಟ್ಟಿಸಿಕೊಳ್ಳುವ ಅವಕಾಶವನ್ನು ದುನಿಯಾ ವಿಜಯ್ ಕಲ್ಪಿಸಿದ್ದರು. ಆ ಬಳಿಕ ಪ್ರಸಿದ್ಧ ಕೃಷ್ಣ ನಿರ್ದೇಶನದ, ಕನ್ನಡತಿ ಖ್ಯಾತಿಯ ಕಿರಣ್ ರಾಜ್ ನಾಯಕನಾಗಿ ನಟಿಸಿದ್ದ ಭರ್ಜರಿ ಗಂಡು ಚಿತ್ರದಲ್ಲಿಯೂ ರಘು ನಟಿಸಿದ್ದರು.

ಸದ್ಯ ಅದೇ ಕಿರಣ್ ರಾಜ್ ನಟಿಸಿರುವ ಶೇರ್ ಚಿತ್ರದಲ್ಲೊಂದು ಮಹತ್ವದ ಪಾತ್ರದಲ್ಲಿ ರಾಕ್ ರಘು ನಟಿಸಿದ್ದಾರೆ. ಎಸ್ ಮಹೇಂದರ್ ನಿರ್ದೇಶನದ ಕೊಂಬುಡಕಿ ಚಿತ್ರದಲ್ಲೂ ಅವಕಾಶ ಗಿಟ್ಟಸಿಕೊಂಡಿದ್ದಾರೆ. ವಿಕ್ಕಿ ವರುಣ್ ನಟನೆಯ ಸೈಕೋ ಚಿತ್ರದಲ್ಲೂ ಅವರೊಂದು ಪಾತ್ರವಾಗಿದ್ದಾರೆ. ಅದಲ್ಲದೇ ಮಹೇಶ್ ಸುಖಧರೆ ನಿರ್ದೇಶನದ ರಾಘವೇಂದ್ರ ಮಹಾತ್ಮೆ ಧಾರಾವಾಹಿಯಲ್ಲೂ ಅವರು ನಟಿಸಲಿದ್ದಾರೆ. ಬುರುಡೆ ಬಂಗ್ಲೆ ರಹಸ್ಯ ಬಿಡುಗಡೆಯ ಹಾದಿಯಲ್ಲಿದೆ. ಇನ್ನೇನು ಶುರುವಾಗಲಿರುವ ಗಿಚ್ಚಿಗಿಲಿಗಿಲಿ ಶೋನಲ್ಲಿ ಸಾಧು ಕೋಕಿಲಾ ಮಾರ್ಗದರ್ಶನದಲ್ಲಿ ಮಿಂಚಲು ರಾಕ್ ರಘು ಅಣಿಯಾಗಿದ್ದಾರೆ. ಸದ್ಯ ಆ ಶೋಗಾಗಿನ ತಯಾರಿ ಚಾಲ್ತಿಯಲ್ಲಿದೆ. ಒಟ್ಟಾರೆಯಾಗಿ, ಒಂದು ಅಪಘಾತದ ಆಘಾತದ ನಡುವೆ ನಟನ ಆಗೋ ಕನಸು ಕಂಡ ರಾಕ್ ರಘು ಇದೀಗ ಬಹುಬೇಡಿಕೆಯ ನಟರಾಗಿ ನೆಲೆ ಕಂಡುಕೊಳ್ಳುತ್ತಿದ್ದಾರೆ!

The post rock raghu: ಬಿಳಿಗಿರಿ ರಂಗನ ಬೆಟ್ಟದ ತಪ್ಪಲಿನ ಪ್ರತಿಭೆ! appeared first on Cini Shodha.

ಹಾಡೊಂದರ ಮೂಲಕ ಸದ್ದು ಮಾಡಿದ್ದ ಓಂ ಶಿವಂ ಚಿತ್ರ ಯಾವ ಗದ್ದಲವೂ ಇಲ್ಲದೆ ಚಿತ್ರೀಕರಣ ಮುಗಿಸಿಕೊಂಡಿತ್ತು. ಅದೇ ಹಾದಿಯಲ್ಲಿ ಎಲ್ಲ ಕೆಲಸ ಕಾರ್ಯಗಳನ್ನು ಮುಗಿಸಿಕೊಂಡಿರುವ ಚಿತ್ರತಂಡ ಹಂತ ಹಂತವಾಗಿ ಪ್ರೇಕ್ಷಕರ ಮುಂದೆ ಒಂದಷ್ಟು ಬೆರಗಿನ ಅಂಶಗಳನ್ನು ಹರವಲು ಅಣಿಗೊಂಡಿದೆ. ಅಂದಹಾಗೆ, ನಿರ್ದೇಶಕ ಅಲ್ವಿನ್ ಕನ್ನಡ ಸಿನಿಮಾ ರಂಗಕ್ಕೆ ಹೊಸಬರೇನಲ್ಲ. ಆದರೆ, ಹೊಸಬರ ತಂಡ ಕಟ್ಟಿಕೊಂಡು ಅವರು ಈ ಸಿನಿಮಾವನ್ನು ರೂಪಿಸಿದ್ದಾರೆ. ಭಾರ್ಗವ್ ಕೃಷ್ಣ ಓಂ ಶಿವಂ ಮೂಲಕವೇ ನಾಯಕನಾಗಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಕೃಷ್ಣ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ಹೊಸ ಹುಡುಗಿ ವಿರಾನಿಕಾ ಶೆಟ್ಟಿ ನಾಯಕಿಯಾಗಿ ಜೊತೆಯಾಗಿದ್ದಾರೆ.

ಹೀಗೆ ಒಂದಷ್ಟು ಸಕಾರಾತ್ಮಕ ವಾತಾವರಣದಲ್ಲಿ ಬಿಡುಗಡೆಗೆ ಸಜ್ಜುಗೊಂಡಿರುವ ಈ ಸಿನಿಮಾ ಅಲ್ವಿನ್ ಅವರ ಜೀವಮಾನದ ಕನಸು. ಇದರ ಗೆಲುವಿನಿಂದಲೇ ಈ ಹಾದಿಯಗುಂಟ ಕಂಡುಂಡ ಒಂದಷ್ಟು ನೋವು, ನಿರಾಸೆಗಳ ಗಾಯ ಮಾಯುವ ಗಾಢ ನಿರೀಕ್ಷೆ ಅಲ್ವಿನ್‌ಗಿದ್ದಂತಿದೆ. ಮಲೆನಾಡ ಹೆಬ್ಬಾಗಿಲು ಶಿವಮೊಗ್ಗದ ರಾಗಿಗುಡ್ಡದವರಾಗ ಅಲ್ವಿನ್ ಎಳವೆಯಿಂದಲೇ ರಂಗಭೂಮಿಯ ನಂಟು ಹೊಂದಿದ್ದವರು. ಸಹ್ಯಾದ್ರಿ ಕಾಲೇಜು ವಿದ್ಯಾರ್ಥಿಯಾಗಿದ್ದ ಅವರು ಮಧುಸೂಧನ್ ಘಾಟ್ ಮತ್ತು ಲವ ಜಿಯಾರ್ ಅವರಿಂದ ರಂಗ ತರಬೇತಿ ಪಡೆದುಕೊಂಡಿದ್ದರು. ಕಾಲೇಜು ದಿನಗಳಲ್ಲಿಯೇ ನಾಟಕ ರಚಿಸಿ, ನಿರ್ದೇಶನ ಮಾಡಿ ನಟಿಸುವ ಮೂಲಕ ಗಮನ ಸೆಳೆದುಕೊಂಡಿದ್ದವರು ಅಲ್ವಿನ್.

ಆ ನಂತರದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಕಡೆಯಿಂದಲೂ ಸೇರಿದಂತೆ ಆರು ನೂರಕ್ಕೂ ಹೆಚ್ಚಿನ ಬೀದಿ ನಾಟಕಗಳಲ್ಲಿ ಅಲ್ವಿನ್ ನಟಿಸಿದ್ದರು. ಶಾಲಾ ಕಾಲೇಜು ದಿನಗಳಲ್ಲಿಯೇ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿ ಮುಂದಿದ್ದ ಈತ, ಪದವಿ ಪಡೆದುಕೊಂಡಾದ ನಂತರ ಒಂದೊಳ್ಳೆ ವೃತ್ತಿಯಲ್ಲಿ ಮುಂದುವರೆಯಬಹುದಾದ ವಿಪುಲ ಅವಕಾಶಗಳಿದ್ದವು. ಆದರೆ, ಆ ಕ್ಷಣದಲ್ಲಿ ಕೈಹಿಡಿದು ಸೆಳೆದುಕೊಂಡಿದ್ದು ಸಿನಿಮಾ ಕನಸು. ಅದರ ಸೆಳವಿಗೆ ಸಿಕ್ಕ ಅಲ್ವಿನ್ ಬ್ಯಾಗೇರಿಸಿಕೊಂಡು ಊರು ಬಿಟ್ಟು ಸೀದಾ ಗಾಂಧಿನಗರದ ಗಲ್ಲಿಗೆ ಬಂದು ನಿಂತಾಗಲೇ ಬದುಕಿನ ಮತ್ತೊಂದು ಮಗ್ಗುಲಿನ ವಾಸ್ತವದರ್ಶನವಾಗಲಾರಂಭಿಸಿತ್ತು. ಅವರ ಒಂದಷ್ಟು ರಾತ್ರಿಗಳು ಪಾರ್ಕುಗಳಲ್ಲಿ ಕಳೆದಿದ್ದವು. ಅದೆಷ್ಟೋ ಮುಂಜಾವುಗಳು ಸಾರ್ವಜನಿಕ ಶೌಚಾಲಯಗಳಲ್ಲಿ ತೆರೆದುಕೊಂಡಿದ್ದವು. ಮತ್ತೊಂದಷ್ಟು ವರ್ಷಗಳು ಯಾರದ್ದೋ ರೂಮುಗಳಲ್ಲಿ ಮುದುರಿಕೊಂಡಿದ್ದವು.

ಇಷ್ಟೆಲ್ಲ ಆಗುವ ಹೊತ್ತಿಗೆ ಅಲ್ವಿನ್ ಒಂದಷ್ಟು ಸೀರಿಯಲ್ಲಿಗಳಲ್ಲಿ ಜ್ಯೂನಿಯರ್ ಆರ್ಟಿಸ್ಟ್ ಆಗಿ, ಸಾಕಷ್ಟು ಸಿನಿಮಾಗಳಲ್ಲಿ ನಿರ್ದೇಶನ ವಿಭಾಗದಲ್ಲಿ ಕಾರ್ಯನಿರ್ವಹಿಸುತ್ತಾ ಪಳಗಿಕೊಂಡಿದ್ದರು. ಆ ಹಂತದಲ್ಲಿಯೇ ನಿರ್ದೇಶನವೇ ತನ್ನ ಭವಿಷ್ಯ ಎಂಬ ತೀರ್ಮಾನಕ್ಕೆ ಬಂದಿದ್ದ ಅಲ್ವಿನ್ ಎರಡು ಸಿನಿಮಾಗಳನ್ನು ನಿರ್ದೇಶನ ಮಾಡಿದ್ದರು. ಅದರಲ್ಲೊಂದು ಬಿಡುಗಡೆಗೊಂಡರೆ, ಮತ್ತೊಂದು ಎಲ್ಲ ಚೆಂದಗಿದ್ದರೂ ಬಿಡುಗಡೆ ಭಾಗ್ಯ ಸಿಗದ ಆಘಾತ ಕಾಡಿತ್ತು. ಈಗಲೂ ಬುಡಕಟ್ಟು ಸಮುದಾಯದ ಹೆಣ್ಣು ಜೀವಗಳನ್ನು ಕಾಡುತ್ತಿರುವ ಅನಿಷ್ಠ ಪದ್ಧತಿಯೊಂದರ ಸುತ್ತಾ ಮತ್ತೊಂದು ಕಿರುಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಸಾಮಾನ್ಯವಾಗಿ ಓರ್ವ ನಿರ್ದೇಶಕನಾಗಿ ಸಿನಿಮಾಗಳಿಗೆ ಹಿನ್ನಡೆ ಉಂಟಾದರೆ ಅದರ ಸುತ್ತಾ ನಾನಾ ರೂಮರುಗಳೇಳುತ್ತವೆ. ವೃತ್ತಿ ಬದುಕಿಗೆ ಹೊಡೆತವೂ ಬೀಳುತ್ತದೆ. ಅಂಥಾ ಎಲ್ಲ ಆಘಾತ, ಅವಮಾನಗಳನ್ನು ದಾಟಿಕೊಂಡ ಅಲ್ವಿನ್ ಪಾಲಿಗೆ ವರವಾಗಿ ಸಿಕ್ಕ ಚಿತ್ರ ಓಂ ಶಿವಂ!

ಕೆ.ಎನ್ ಕೃಷ್ಣ ಅವರಿಗೆ ಅಲ್ವಿನ್ ಕಥೆ ಹೇಳಿದಾಗಲೇ ಅವರು ಖುಷಿಗೊಂಡಿದ್ದರಂತೆ. ಆ ಹಂತದಲ್ಲಿಯೇ ಕೃಷ್ಣರ ಪುತ್ರ ಭಾರ್ಗವ್ ಈ ಕಥೆಯ ನಾಯಕನ ಪಾತ್ರಕ್ಕೆ ಒಗ್ಗುತ್ತಾರೆಂದು ಅಲ್ವಿನ್‌ಗೆ ಅನ್ನಿಸಿತ್ತಂತೆ. ಅದಾಗಲೇ ಸರ್ವ ತಯಾರಿಗಳನ್ನು ಮುಗಿಸಿಕೊಂಡು ಒಂದೊಳ್ಳೆ ಅವಕಾಶಕ್ಕಾಗಿ ಕಾದಿದ್ದ ಭಾರ್ಗವ್‌ಗೂ ಈ ಕಥೆ ಇಷ್ಟವಾದದ್ದೇ ಓಂ ಶಿವಂಗೆ ವಿದ್ಯುಕ್ತ ಚಾಲನೆ ಸಿಕ್ಕಿತ್ತು. ಆರಂಭದಲ್ಲಿಯೇ ಚೌಕಟ್ಟು ಹಾಕಿಕೊಂಡು, ಆ ಪರಿಧಿಯಲ್ಲಿ ಹೊಸತನದ ಸಿನಿಮಾವೊಂದನ್ನು ಕಟ್ಟಿ ಕೊಟ್ಟಿರುವ ತೃಪ್ತಿ ಅಲ್ವಿನ್ ಅವರಲ್ಲಿದೆ. ಗಾಢ ಪ್ರೇಮದ ಸುತ್ತ ಹಬ್ಬಿಕೊಂಡಿರುವ ಡ್ರಗ್ಸ್ ಜಾಲ ಮುಂತಾದ ವಾಸ್ತವಿಕ ಅಂಶಗಳನ್ನು ಹೊಂದಿರುವ ಈ ಸಿನಿಮಾ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಹಿಡಿಸಲಿದೆ ಎಂಬ ತುಂಬು ಭರವಸೆಯೂ ಅಲ್ವಿನ್‌ಗಿದೆ.

ಇದೇ ವರ ಮಹಾಲಕ್ಷ್ಮಿ ಹಬ್ಬದ ದಿನದಂದು ಈ ಸಿನಿಮಾದ ಹಾಡೊಂದು ಬಿಡುಗಡೆಯಾಗಲಿದೆ. ಇದೇ ತಿಂಗಳ ಇಪ್ಪತೈದರಂದು ಜಬರ್ದಸ್ತಾದ ಟ್ರೈಲರ್ ಪ್ರೇಕ್ಷಕರನ್ನು ಮುಖಾಮುಖಿಯಾಗಲಿದೆ. ಆ ಮೂಲಕ ಒಟ್ಟಾರೆ ಚಿತ್ರದ ಆಂತರ್ಯದ ಚಿತ್ರಣ ಪ್ರೇಕ್ಷಕರನ್ನು ದಾಟಿಕೊಳ್ಳಲಿದೆ. ಇದು ಹೊಸಬರ ಚಿತ್ರ. ಇದರ ಹಿಂದೆ ಅಪ್ಪಟ ಸಿನಿಮಾ ವ್ಯಾಮೋಹಿಗಳ ಪರಿಶ್ರಮವಿದೆ. ಖುದ್ದು ನಿರ್ದೇಶಕ ಅಲ್ವಿನ್ ಇದುವರೆಗೂ ಸಾಕಷ್ಟು ಎಡರು ತೊಡರುಗಳನ್ನು ದಾಟಿ ಬಂದು ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಒಂದು ಹಂತದಲ್ಲಿ ಸಿನಿಮಾ ರಂಗದ ಬಾಗಿಲು ಮುಚ್ಚಿದ ಸ್ಥಿತಿ ಎದುರಾದಾಗ, ಉಪನ್ಯಾಸಕರಾಗಿಯಾದರೂ ಬದುಕೋ ಅವಕಾಶ ಅವರ ಮುಂದಿತ್ತು. ಆದರೆ, ಅದರತ್ತ ಓಗೊಟ್ಟು ಸೇಫ್ ಝೋನಿನತ್ತ ವಾಲದಂತೆ ನೋಡಿಕೊಂಡಿದ್ದದ್ದು ಅವರೊಳಗೆ ಉತ್ಕಟವಾಗಿದ್ದ ಸಿನಿಮಾ ವ್ಯಾಮೋಹ. ಅಂಥಾ ದೃಢವಾದ ಹೆಜ್ಜೆಗಳ ಪ್ರತಿಫಲದಂತಿರುವ ಓಂ ಶಿವಂ ಚಿತ್ರ ತೆರೆಗಾಣಲು ತಿಂಗಳಷ್ಟೇ ಬಾಕಿ ಉಳಿದುಕೊಂಡಿದೆ.

The post Om shivam director alwin: ಕಂಗೆಟ್ಟು ನಿಂತಾಗಲೂ ಬೆಂಬಿಡದ ಸಿನಿಮಾ ಮಾಯೆ! appeared first on Cini Shodha.

ಕಾಲೇಜು ದಿನಗಳಲ್ಲಿಯೇ ನಟನಾಗಬೇಕೆಂಬ ಕನಸನ್ನು ಸಾಕಿಕೊಂಡಿದ್ದವರು ಮಿಥುನ್. ಡಿಗ್ರಿ ವ್ಯಾಸಂಗದ ಸಮಯದಲ್ಲಿ ಅಚಾನಕ್ಕಾಗಿ ಅದಕ್ಕೊಂದು ವೇದಿಕೆ ಸಿಕ್ಕಿತ್ತು. ಆ ದಿನಗಳಲ್ಲಿ ವಿಜಯ್ ರಾಘವೇಂದ್ರ ನಟಿಸಿದ್ದ ಮಾಲ್ಗುಡಿ ಡೇಸ್ ಚಿತ್ರದ ಆಡಿಷನ್ ಕರೆಯಲಾಗಿತ್ತು. ಅದರಲ್ಲಿ ಭಾಗಿಯಾಗಿದ್ದ ಮಿಥುನ್ ಗೆ ರಾಜಣ್ಣ ಎಂಬ ಪಾತ್ರದಲ್ಲಿ ನಟಿಸೋ ಅವಕಾಶ ಸಿಕ್ಕಿತ್ತು. ಆ ಪಾತ್ರ ಪ್ರೇಕ್ಷರಿಗೂ ಹಿಡಿಸಿತ್ತು. ಆ ಬಳಿಕ ಸಿನಿಮಾ ರಂಗದಲ್ಲಿ ನಟನಾಗಿ ನೆಲೆ ಕಂಡುಕೊಳ್ಳಬೇಕೆಂಬ ಇರಾದೆಯಿಂದ ಬೆಂಗಳೂರಿಗೆ ಬಂದಿಳಿದಿದ್ದ ಮಿಥುನ್‌ಗೆ ವಾಸ್ತವವೆಂಬುದು ನಾನಾ ರೀತಿಯಲ್ಲಿ ದರ್ಶನ ಕೊಟ್ಟಿತ್ತು. ತೀರ್ಥಹಳ್ಳಿಯಲ್ಲಿರುವಾಗಲೇ ರಂಗಭೂಮಿಯ ನಂಟು ಹೊಂದಿದ್ದ ಮಿಥುನ್ ನಟನೆ, ನಿರ್ದೇಶನ ಸೇರಿದಂತೆ ನಾನಾ ವೀಭಾಗಗಳಲ್ಲಿ ಕಾರ್ಯ ನಿರ್ವಹಿಸಿದ್ದರು. ಆ ಅನುಭವವೇ ಕೈ ಹಿಡಿದೀತೆಂದುಕೊಂಡಿದ್ದ ಆತನಿಗೆ ಸಿನಿಮಾ, ಸೀರಿಯಲ್ ಜಗತ್ತಿನ ಬೇರೆ ಬೇರೆ ಮಾನದಂಡಗಳ ಅರಿವಾಗಿತ್ತು.

ಅನೇಕ ಸೀರಿಯಲ್, ಸಿನಿಮಾಗಳ ಆಡಿಷನ್ನುಗಳಲ್ಲಿ ಭಾಗಿಯಾದರೂ ಅದೇಕೋ ಅವಕಾಶವೆಂಬುಉದು ಕೈಗೆಟುಕದೆ ಸತಾಯಿಸಲಾರಂಭಿಸಿತ್ತು. ಆ ನಂತರ ನಿರ್ದೇಶನ ವಿಭಾಗದತ್ತ ಆಕರ್ಷಿತರಾದ ಮಿಥುನ್, ಯುಗದೋಳ್, ಡಿಸೆಂಬರ್ ೨೪ ಮುಂತಾದ ಸಿನಿಮಾಗಳಲ್ಲಿ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದರು. ಇತ್ತೀಚೆಗಷ್ಟೆ ವಿಕಲ್ಪ ಅನ್ನೋ ಸಿನಿಮಾದ ಭಾಗವಾಗಿದ್ದರು. ಹೀಗಿರುವಾಗಲೇ ಅಪಾಯವಿದೆ ಎಚ್ಚರಿಕೆ ಚಿತ್ರದ ಆಡಿಷನ್ ನಡೆಯುತ್ತಿರೋದನ್ನು ಮನಗಂಡ ಮಿಥುನ್ ಯಾವುದಕ್ಕೂ ಇರಲಿ ಅಂತ ಭಾಗಿಯಾಗಿದ್ದರು. ನಂತರ ಗಾಬ್ರಿ ಅನ್ನೋ ಮುಖ್ಯ ಪಾತ್ರಕ್ಕೆ ಆಯ್ಕೆಯಾಗಿದ್ದರು. ಆ ನಂತರದ ಯಾನ ಮಿಥುನ್ ಪಾಲಿಗೆ ಚೆಂದದ ಅನುಭವಗಳನ್ನು ಕೊಡಮಾಡಿದೆ. ಯಾಕೆಂದರೆ, ಗಾಬ್ರಿ ಅನ್ನೋ ಪಾತ್ರಕ್ಕಾಗಿ ನಿರ್ದೇಶಕ ಅಭಿಜಿತ್ ತೀರ್ಥಹಳ್ಳಿ ಎಂಟು ತಿಂಗಳ ಕಾಲ ರಿಹರ್ಸಲ್ ನಡೆಸಿದ್ದರಂತೆ. ಹಾಗೆ ಪಳಗಿಕೊಂಡಿದ್ದರಿಂದಲೇ ಗಾಬ್ರಿಒ ಎಂಬ ಪಾತ್ರಕ್ಕೆ ಪರಿಣಾಮಕಾರಿಯಾಗಿ ಜೀವ ತುಂಬಲು ಸಾಧ್ಯವಾಗಿದೆ ಎಂಬ ಭಾವ ಮಿಥುನ್ ರದ್ದು.

ಹೀಗೆ ನಟನಾಗೋ ಕನಸಿನ ಮೊದಲ ಹೆಜ್ಜೆಯಲ್ಲಿಯೇ ಮಿಥುನ್ ಗೆ ಆಶಾದಾಯಕ ಪ್ರತಿಕ್ರಿಯೆಗಳು ಸಿಕ್ಕಿವೆ. ಆದರೆ ಕಷ್ಟಕಾಲದಲ್ಲಿ ಬದುಕಲು ಅವಕಾಶ ಮಾಡಿಕೊಟ್ಟ ನಿರ್ದೇಶನ ವಿಭಾಗವೇ ಅವರ ಪಾಲಿನ ಮೊದಲ ಆಧ್ಯತೆ. ಮುಂದಿನ ದಿನಗಳಲ್ಲಿ ನಟನೆ ಮತ್ತು ನಿರ್ದೇಶನಗಳೆರಡನ್ನೂ ಸರಿದೂಗಿಸಿಕೊಂಡು ಹೋಗುವ ನಿರ್ಧಾರ ಅವರದ್ದಿದ್ದಂತಿದೆ. ಒಂದು ಯಶಸ್ಸಿನ ಆವೇಗಕ್ಕೊಳಗಾಗದೆ, ಅತ್ಯಂತ ಸಮಚಿತ್ತದಿಂದ ನಿರ್ಧಾರ ತಳೆಯಲು ಮಿಥುನ್ ಗೆ ಸಾಧ್ಯವಾದದ್ದರ ಹಿಂದೆ ಅವರೇ ಕಂಡುಂಡ ಕಷ್ಟಗಳ ಕಿಸುರಿದೆ. ಬೆಂಗಳೂರಿಗೆ ಬಂದ ಹೊಸತರಲ್ಲಿ ಬೇರೆ ದಾರಿ ಕಾಣದೆ ಗೆಳೆಯನ ಜೊತೆ ಲಾಡ್ಜಿನಲ್ಲಿ ಕೆಲಸಕ್ಕಿದ್ದುಕೊಂಡೇ ಅವಕಾಶಗಳಿಗಾಗಿ ಅರಸುವ ಸಂದರ್ಭವೂ ಬಂದೊದಗಿತ್ತು.

ಹೀಗೆ ನಾನಾ ಕೆಲಸಗಳನ್ನು ಮಾಡುತ್ತಲೇ ನಿರ್ದೇಶನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದರೂ ಬದುಕು ಸಲೀಸಾಗಿರಲಿಲ್ಲ. ಕೆಲವೊಂದು ಅವಕಾಶಗಳು ಸಿಕ್ಕ ಸಂದರ್ಭದಲ್ಲಿ ಜೊಮ್ಯಾಟೋದಂಥಾ ಡೆಲಿವರಿ ಕಸುಬು ಮಾಡುತ್ತಲೇ ಜೀವನ ನಡೆಸಿದ ಕಷ್ಟದ ದಿನಗಳನ್ನೂ ಮಿಥುನ್ ಕಂಡಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಬದುಕು ಒಂದಷ್ಟು ಸಹ್ಯವಾದ ಭಾವ ಅವರಲ್ಲಿದೆ. ಅಪಾಯವಿದೆ ಎಚ್ಚರಿಕೆ ಚಿತ್ರವಂತೂ ಈತನ ಪಾಲಿಗೆ ಆಕ್ಸಿಜನ್ನಿನಂಥಾ ಸಿನಿಮಾ. ಇದರ ಗ್ರಾಬ್ರಿ ಎಂಬ ಪಾತ್ರದ ಮೂಲಕವೇ ಮತ್ತೊಂದಷ್ಟು ಅವಕಾಶಗಳು ಸಿಕ್ಕರೂ ಅಚ್ಚರಿಯೇನಿಲ್ಲ. ಹೀಗೆ ಒಂದು ಸಿನಿಮಾ ಒಂದಷ್ಟು ಯಶ ಕಂಡರೆ ಅದರ ಭಾಗವಾಗಿದ್ದವರ ಬದುಕು ಹಸನಾಗುತ್ತೆ. ಅಭಿಜಿತ್ ತೀರ್ಥಹಳ್ಳಿ ನಿರ್ದೇಶನದ ಅಪಾಯವಿದೆ ಎಚ್ಚರಿಕೆ ಚಿತ್ರದ ಭೂಮಿಕೆಯಲ್ಲಿಯೂ ಅಂಥಾದ್ದೊಂದು ಚಮತ್ಕಾರ ನಡೆಯಲಾರಂಭಿಸಿದೆ!

The post apayavide echarike movie: ನಟನಾಗಿ ಗಮನ ಸೆಳೆದ ಮಿಥುನ್ ತೀರ್ಥಹಳ್ಳಿ! appeared first on Cini Shodha.

ಯಾವುದೇ ಸಿನಿಮಾ ತೆರೆಗಂಡಾಗಲೂ ಪ್ರೇಕ್ಷಕರ ಮುಂದೆ ಗರಿಬಿಚ್ಚಿಕೊಳ್ಳೋ ದೃಷ್ಯಗಳ ಹಿಂದೆ ಹತ್ತಾರು ವರ್ಷಗಳ ಶ್ರಮ, ಕನಸುಗಳಿರುತ್ತವೆ. ಸಾಕಷ್ಟು ಹತಾಶೆ, ಸೋಲು, ಬಿಕ್ಕಳಿಕೆಗಳೂ ಇದ್ದೇ ಇರುತ್ತವೆ. ಈಗ್ಗೆ ದಶಕಗಳಿಂದೀಚೆಗೆ ಕನ್ನಡ ಚಿತ್ರರಂಗದ ಭಾಗವಾಗಿ, ಹತ್ತಾರು ಸಿನಿಮಾಗಳ ನಿರ್ದೇಶನ ವಿಭಾಗದಲ್ಲಿ ಕಾರ್ಯನಿರ್ವಹಿಸಿದ್ದ ಅಭಿಜಿತ್ ತೀರ್ಥಹಳ್ಳಿ ಕೂಡಾ ಅದೆಲ್ಲವನ್ನೂ ದಾಟಿಕೊಂಡು ಬಂದಿದ್ದಾರೆ. ಶಾಲಾ ಕಾಲೇಜು ದಿನಗಳಲ್ಲಿಯೇ ಸಿನಿಮಾ ಧ್ಯಾನ ಹೊಂದಿದ್ದ ಅಭಿಜಿತ್ ಪಾಲಿಗೆ ನೀನಾಸಂ ವತಿಯಿಂದ ತೀರ್ಥಹಳ್ಳಿ ಸೀಮೆಯ್ಲ್ಲಿ ನಡೆಯುತ್ತಿದ್ದ ರಂಗ ಶಿಬಿರಗಳು ವರವಾಗಿ ಸಿಕ್ಕಿದ್ದವು. ಡಾ. ಮಾಲತಿ ಎಸ್.ಸಾಗರ ಅವರ ಮಾರ್ಗದರ್ಶನದಲ್ಲಿ ನಟನೆ ಮತ್ತು ನಿರ್ದೇಶನ ವಿಭಾದ ಬೆರಗುಗಳಿಗೆ ಒಡ್ಡಿಕೊಳ್ಳುವ ಅವಕಾಶವೂ ಸಿಕ್ಕಿತ್ತು.

ಹಾಗೆ ಕಾಲೇಜು ದಿನಮಾನದಲ್ಲಿಯೇ ನೀನಾಸಂ ರಂಗ ಶಿಬಿರಗಳಲ್ಲಿ ಭಾಗಿಯಾಗಿದ್ದ ಅಭಿಜಿತ್ ಪಾಲಿಗೆ ಓದು ಮುಗಿಯುವ ಹೊತ್ತಿಗೆಲ್ಲ ಗುರಿಯೆಂಬುದು ನಿಖರವಾಗಿತ್ತು. ಮಲೆನಾಡು ಭಾಗದ ಅಪ್ಪಟ ರೈತಾಪಿ ವರ್ಗದಿಂದ ಬಂದವರು ಅಭಿಜಿತ್. ಸಾಮಾನ್ಯವಾಗಿ ಮಧ್ಯಮ ವರ್ಗದಿಂದ ಬಂದವರನ್ನು ಅದೆಂಥಾದ್ದೇ ಕನಸು ಕಾಡುತ್ತಿದ್ದರೂ, ಅದೆಷ್ಟೇ ಪ್ರತಿಭೆ ಇದ್ದರೂ, ಬದುಕಿನ ಅನಿವಾರ್ಯತೆಗಳು ಮತ್ತೊಂದ್ಯಾವುದೋ ಗುರುತಿರದ ಗಮ್ಯದತ್ತ ಸೆಳೆದುಕೊಂಡು ಬಿಡೋದಿದೆ. ಆದರೆ, ಅಭಿಜಿತ್ ತೀರ್ಥಹಳ್ಳಿ ಅಂಥಾ ಅನಿವಾರ್ಯತೆಗಳನ್ನೆಲ್ಲ ಮೀರಿಕೊಂಡು, ಹತ್ತು ವರ್ಷಗಳ ಹಿಂದೆ ಹೋಗಿ ನಿಂತದ್ದು ಗಾಂಧಿನಗರವೆಂಬೋ ಮಾಯಾ ಜಗತ್ತಿಗೆ!

ಆ ಬಳಿಕ ಅವರ ಪಾಲಿಗೆ ಒಂದಷ್ಟು ಒಳ್ಳೆ ಅನುಭವಗಳು, ಮತ್ತೊಂದಷ್ಟು ವಾಸ್ತವಿಕ ದಿಗ್ಧರ್ಶನಗಳೆಲ್ಲ ಸಾಕಷ್ಟಾಗಿವೆ. ಇದೆಲ್ಲದರಾಚೆಗೆ ಪ್ರತಿಭೆಯನ್ನು ಹಿಂಡಿಕೊಳ್ಳುವ ಮಂದಿಯ ಸಂತೆಯಲ್ಲಿ ಸ್ವತಂತ್ರ ಅಸ್ತಿತ್ವ ಹುಡುಕಿಕೊಳ್ಳೋದೇ ಒಳ್ಳೆಯದ್ದೆಂಬ ಜ್ಞಾನೋದಯವೂ ಆಗಿತ್ತು. ಆ ಹೊತ್ತಿಗೆಲ್ಲ ನಿರ್ದೇಶನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸುತ್ತಲೇ ಒಂದಷ್ಟು ಹಿಟ್ ಸೀರಿಯಲ್ ಟೈಟಲ್ ಟ್ರ್ಯಾಕ್ ಗಳಿಗೆ ಸಾಹಿತ್ಯ ಬರೆಯುವ ಮೂಲಕವೂ ಅಭಿಜಿತ್ ಗಮನ ಸೆಳೆದಿದ್ದರು. ಈ ನಡುವೆ ಸ್ವಂತ್ರರ ನಿರ್ದೇಶಕರಾಗಬೇಕೆಂಬ ನಿರ್ಧಾರಕ್ಕೆ ಬಂದಿದ್ದ ಅಭಿಜಿತ್ ಪಾಲಿಗೆ ಕದ್ದುಮುಚ್ಚಿ ಅಂತೊಂದು ಸಿನಿಮಾದ ನಿರ್ದೇಶನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸುವ ಅವಕಾಶ ಸಿಕ್ಕಿತ್ತು. ಆ ಸಿನಿಮಾವನ್ನು ವಿ.ಜಿ ಮಂಜುನಾಥ್ ಅತ್ಯಂತ ಪ್ರೀತಿಯಿಂದ, ನಾನಾ ಮಹತ್ವಾಕಾಂಕ್ಷೆಗಳನ್ನಿಟ್ಟುಕೊಂಡು ನಿರ್ಮಾಣ ಮಾಡಿದ್ದರು.

ಆದರೆ, ಆ ಸಿನಿಮಾ ಭೂಮಿಕೆಯಲ್ಲಿ ಒಂದಷ್ಟು ಪಲ್ಲಟಗಳು ಜರುಗಿದ್ದವು. ಅದರ ಫಲವಾಗಿ ಅಭಿಜಿತ್ ತೀರ್ಥಹಳ್ಳಿ ಹೆಗರಿಗೆ ಒಂದಷ್ಟು ಗುರುತರ ಜವಾಬ್ದಾರಿಗಳೂ ಕೂಡಾ ರವಾನೆಯಾಗಿದ್ದವು. ಕಡೆಗೂ ಅಂಥಾ ಜವಾಬ್ದಾರಿಗಳನ್ನೆಲ್ಲ ಮುಗಿಸಿಕೊಂಡಿದ್ದ ಅಭಿಜಿತ್ ಇನ್ನು ಅಚ್ಚುಕಟ್ಟಾದೊಂದು ಕಥೆ ರೆಡಿ ಮಾಡಿ ನಿರ್ದೇಶನಕ್ಕಿಳಿಯುವ ಅಚಲ ತೀರ್ಮಾನಕ್ಕೆ ಬಂದಿದ್ದರು. ಅದರ ಫಲವಾಗಿಯೇ ವರ್ಷಗಟ್ಟಲೆ ಶ್ರಮ ವಹಿಸಿ, ಚೆಂದದ್ದೊಂದು ಕಥೆ ಸಿದ್ಧಪಡಿಸಿಕೊಂಡಿದ್ದ ಅಭಿಜಿತ್ ಅದನ್ನು ನಿರ್ಮಾಪಕ ವಿ.ಜಿ ಮಂಜುನಾಥ್ ಅವರ ಮುಂದೆ ಹರವಿದ್ದರು. ಅದಾಗಲೇ ಕದ್ದುಮುಚ್ಚಿ ಸಿನಿಮಾ ಮೂಲಕ ನಾನಾ ಆಘಾತಗಳನ್ನುಉ ಕಂಡುಂಡಿದ್ದ ವಿ.ಜಿ ಮಂಜುನಾಥ್ ಹೆಚ್ಚೂ ಕಡಿಮೆ ಚಿತ್ರ ನಿರ್ಮಾಣದ ಸಹವಾಸವೇ ಬೇಡ ಎಂಬಷ್ಟರ ಮಟ್ಟಿಗೆ ರೋಸತ್ತು ಹೋಗಿದ್ದರು.

ಆದರೂ ಕದ್ದುಮುಚ್ಚಿ ಚಿತ್ರದ ಸಂದರ್ಭದಲ್ಲಿ ಅಭಿಜಿತ್ ರನ್ನು ಹತ್ತಿರದಿಂದ ಕಂಡು, ಅವರ ಪ್ರತಿಭೆಯ ಅರಿವಿದ್ದ ವಿ.ಜಿ ಮಂಜುನಾಥ್ ಪಾಲಿಗೆ ಸದರಿ ಕಥೆ ಇಷ್ಟವಾಗಿತ್ತು. ಮೊದಲ ಅನುಭವದಿಂದ ಅಗಾಧವಾದ ಪಾಠ ಕಲಿತಿದ್ದ ನಿರ್ಮಾಪಕರು ಆರಂಭದಿಂದ ಕಡೆಯವರೆಗೂ ಅತ್ಯಂತ ಆಸ್ತೆಯಿಂದ, ಎಚ್ಚರದಿಂದ ಅಪಾಯವಿದೆ ಎಚ್ಚರಿಕೆ ಚಿತ್ರವನ್ನು ಪೊರೆದಿದ್ದಾರೆ. ಒಂದಿಡೀ ತಂಡವನ್ನು ಮುನ್ನಡೆಸಿದ್ದಾರೆ. ಆರಂಭದಲ್ಲಿ ಸಣ್ಣದೊಂದು ಬಜೆಟ್ಟಿನ ರೂಪುರೇಷೆಯೊಂದಿಗೆ ಈ ಸಿನಿಮಾ ಆರಂಭವಾಗಿತ್ತು. ಆ ನಂತರ ವಿ.ಜಿ ಮಂಜುನಾಥ್ ಅವರು ಬಜೆಟ್ಟಿನ ಮಿತಿಯಾಚೆಗೂ, ಯಾವುದಕ್ಕೂ ಕೊರತೆಯಾಗದಂತೆ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ಹಾಗೆ ತನ್ನ ಮೇಲೆ ನಂಬಿಕೆಯಿಟ್ಟು, ಕಹಿ ಅನುಭವದಾಚೆಗೂ ಸಾಥ್ ಕೊಟ್ಟ ನಿರ್ಮಾಪಕರ ಬಗ್ಗೆ ಅಭಿಜಿತ್ ಗೆ ಅಚ್ಚರಿ ಬೆರೆತ ಅಭಿಮಾನವಿದೆ.

ಕಡೆಗೂ ಈ ಸಿನಿಮಾ ತನ್ನ ಕಸುವಿನ ಕಾರಣದಿಂದಲೇ ಗೆಲುವಿನತ್ತ ಹೆಜ್ಜೆ ಹಾಕುತ್ತಿದೆ. ಇದರೊಂದಿಗೆ ನಿರ್ಮಾಪಕ ವಿ.ಜಿ ಮಂಜುನಾಥ್ ಅವರೂ ಖುಷಿಗೊಂಡಿದ್ದಾರೆ. ಹೆಚ್ಚೂ ಕಡಿಮೆ ಹೊಸಬರೇ ತುಂಬಿಕೊಂಡಿರುವ ಒಂದಿಡೀ ತಂಡ ಪ್ರೇಕ್ಷಕರ ಕಡೆಯಿಂದ ಸಿಗುತ್ತಿರೋ ಅಭೂತಪೂರ್ವ ಪ್ರತಿಕ್ರಿಯೆ ಕಂಡು ಸಂಭ್ರಮಿಸುತ್ತಿದೆ. ಕಥೆ, ಸಂಭಾಷಣೆ, ಹಾಡುಗಳು ಸೇರಿದಂತೆ ಎಲ್ಲ ವಿಚಾರದಲ್ಲಿಯೂ ಅಪಾಯವಿದೆ ಎಚ್ಚರಿಕೆ ಚಿತ್ರಕ್ಕೆ ಪ್ರೇಕ್ಷಕರು ಫುಲ್ ಮಾರ್ಕ್ಸ್ ಕೊಡುತ್ತಿದ್ದಾರೆ. ಈ ಮೂಲಕ ನವ ನಿರ್ದೇಶಕ ಅಭಿಜಿತ್ ತೀರ್ಥಹಳ್ಳಿಯ ಮೊದಲ ಹೆಜ್ಜೆಗೆ ಭರ್ಜರಿ ಆವೇಗ ಸಿಕ್ಕಿದೆ. ನಿರ್ದೇಶನದ ಕುಸುರಿಯನ್ನು ಸರಿಕಟ್ಟಾಗಿಯೇ ಅರ್ಥ ಮಾಡಿಕೊಂಡಿರೋ ಅಭಿಜಿತ್ ತೀರ್ಥಹಳ್ಳಿ ಇನ್ನೊಂದಷ್ಟು ಶ್ರಮ ಹಾಕಿದರೆ, ತಯಾರಿ ನಡೆಸಿದರೆ ಅವರ ಕಡೆಯಿಂದ ಮತ್ತೊಂದಷ್ಟುಉ ಬಗೆಯ ಸಿನಿಮಾಗಳನ್ನು ಖಮಡಿತವಾಗಿಯೂ ನಿರೀಕ್ಷಿಸಬಹುದು. ಹೀಗೊಂದು ನಂಬಿಕೆಯ ಭಾವ ಅಪಾಯವಿದೆ ಎಚ್ಚರಿಕೆ ಚಿತ್ರ ನೋಡಿದವರಲ್ಲೆಲ್ಲ ಮೂಡಿಕೊಂಡಿದೆ.

The post apayavide echarike movie: ಅಪಾಯವಿದೆ ಎಚ್ಚರಿಕೆ ಬಗ್ಗೆ ನಿರ್ದೇಶಕ ತೆರೆದಿಟ್ಟ ಅಚ್ಚರಿ! appeared first on Cini Shodha.

ಹೊಸಬರು ಸಿನಿಮಾ ರಂಗಕ್ಕೆ ಆಗಮಿಸೋದು ಚಿತ್ರರಂಗದ ಏಳಿಗೆಯ ದೃಷ್ಟಿಯಿಂದ ಅವಶ್ಯಕ ವಿದ್ಯಮಾನ. ಆದರೆ, ಹೊಸಾ ತಂಡವನ್ನು ನೆಚ್ಚಿಕೊಂಡು ಕೋಟಿ ಕೋಟಿ ಪಣಕ್ಕಿಡಲು ಹಿಂಜರಿಕೆ ಹೊಂದಿರುವವರೇ ಹೆಚ್ಚು. ಅಂಥವರ ನಡುವೆ ಕೆಲ ನಿರ್ಮಾಪಕರು ಲಾಭ ನಷ್ಟದ ಗೋಜಿಗೆ ಹೋಗದೆ ಹೊಸಬರನ್ನು ಬೆನ್ತಟ್ಟಿ ಪ್ರೋತ್ಸಾಹಿಸೋದೂ ಇದೆ. ನಿಸ್ಸಂದೇಹವಾಗಿ ಆ ಸಾಲಿಗೆ ಸೇರ್ಪಡೆಗೊಳ್ಳುವವರು ವಿ.ಜಿ ಮಂಜುನಾಥ್. ಮೂಲತಃ ಮಂಡ್ಯ ಜಿಲ್ಲೆ ನಾಗಮಂಗಲ ತಾಲೂಕಿನ ಬೆಳ್ಳೂರು ಹೋಬಳಿಗೆ ಸೇರುವ ವಡ್ಡರಹಳ್ಳಿಯವರು ವಿ.ಜಿ ಮಂಜುನಾಥ್. ಅಲ್ಲಿನ ಅಪ್ಪಟ ರೈತಾಪಿ ವರ್ಗದಲ್ಲಿ ಹುಟ್ಟಿ ಬೆಳೆದ ಅವರ ಪಾಲಿಗೆ ಆರಂಭದಿಂದಲೂ ಶಿಕ್ಷಕನಾಗಬೇಕೆಂಬ ಕನಸಿತ್ತು. ಕಷ್ಟಪಟ್ಟು ಓದಿ, ಆ ವೃತ್ತಿಯನ್ನು ದಕ್ಕಿಸಿಕೊಂಡ ಮೇಲೆ ಅವರು ಉದ್ಯಮದತ್ತ ಹೊರಳಿಕೊಂಡು ಯಶ ಕಂಡಿದ್ದೇ ಒಂದು ರೋಚಕ ಕಥನ.

ಹಾಗೆ ಯಶಸ್ವೀ ಉದ್ಯಮಿಯಾಗಿದ್ದ ವಿ.ಜಿ ಮಂಜುನಾಥ್ ಸಿನಿಮಾ ಕನಸಿನತ್ತ ಗಮನ ಹರಿಸಿದ್ದರು. ಅದರ ಫಲವಾಗಿಯೇ ವರ್ಷಾಂತರಗಳ ಹಿಂದೆ ಕದ್ದುಮುಚ್ಚಿ ಅಂತೊಂದು ಚಿತ್ರವನ್ನು ನಿರ್ಮಾಣ ಮಾಡಿದ್ದರು. ಆ ಹಂತದಲ್ಲಿ ನಿರ್ಮಾಣ ಕ್ರೇತ್ರದ ಬಗ್ಗೆ ಹೆಚ್ಚೇನೂ ತಿಳುವಳಿಕೆ ಹೊಂದಿರದಿದ್ದ ವಿ.ಜಿ ಮಂಜುನಾಥ್ ಪಾಲಿಗೆ ಹೆಜ್ಜೆ ಹೆಜ್ಜೆಗೂ ಸವಾಲುಗಳು ಎದುಉರಾಗಿದ್ದವು. ನಾನಾ ಸರ್ಕಸ್ಸು ನಡೆಸಿಬ ಬಳಿಕವೂ ಉಳಿದುಕೊಂಡಿದ್ದು ಕೆಟ್ಟ ಅನುಭವದ ಕಹಿ ಮಾತ್ರ. ಸಾಮಾನ್ಯವಾಗಿ ಆರಂಭದಲ್ಲಿ ಶ್ರಮ ಪಟ್ಟರೂ ಹಿನ್ನಡೆಯಾದಾಗ ಯಾರೇ ಆದರೂ ನಿರಾಸೆಗೀಡಾಗೋದು ಸಹಜ. ಓರ್ವ ಉದ್ಯಮಿಯಾಗಿ ಸಾಕಷ್ಟು ಏಳು ಬೀಳುಗಳನ್ನು ಕಂಡು ಗೆದ್ದಿರುವ ವಿ.ಜಿ ಮಂಜುನಾಥ್ ಅವರ ಪಾಲಿಗೇನು ಅಡೆತಡೆ ಹೊಸತಲ್ಲ. ಆದರೂ, ನಿರ್ಮಾಪಕನಾಗಿ ಮೊದಲ ಸಿನಿಮಾದಲ್ಲಿಯೇ ಅವರು ಅಕ್ಷರಶಃ ಹೈರಾಣಾಗಿದ್ದರು. 

ಇನ್ನು ಮುಂದೆ ಸಿನಿಮಾ ನಿರ್ಮಾಣದ ಸಹವಾಸವೇ ಬೇಡ ಎಂಬ ನಿರ್ಧಾರ ಮಾಡುವಷ್ಟರ ಮಟ್ಟಿಗವರು ಬೇಸತ್ತಿದ್ದರು. ಹಾಗೆ ಭ್ರಮನಿರಸನ ಹೊಂದಿದ್ದ ವಿ.ಜಿ ಮಂಜುನಾಥ್ ಅವರನ್ನು ಮತ್ತೆ ನಿರ್ಮಾಪಕನಾಗಿ ಅಖಾಡಕ್ಕಿಳಿಯುವಂತೆ ಮಾಡಿರೋದು ಅಪಾಯವಿದೆ ಎಚ್ಚರಿಕೆ ಚಿತ್ರದ ಚೆಂದದ ಕಥೆ ಎಂಬುದು ಅಸಲೀ ವಿಶೇಷ. ಯುವ ನಿರ್ದೇಶಕ ಅಭಿಜಿತ್ ತೀರ್ಥಹಳ್ಳಿ ಕದ್ದುಮುಚ್ಚಿ ಚಿತ್ರದ ನಿರ್ದೇಶನ ವಿಭಾಗದಲ್ಲಿ ಕಾರ್ಯನಿರ್ವಹಿಸಿದ್ದರು. ಆ ನಂತರ ಉಂಟಾದ ಅನೇಕ ಪಲ್ಲಟಗಳಿಂದಾಗಿ ಹೆಚ್ಚಿನ ಜವಾಬ್ದಾರಿ ತಾನೇ ತಾನಾಗಿ ಅವರ ಹೆಗಲೇರಿಕೊಂಡಿತ್ತು. ಕಡೆಗೂ ಪ್ರಯಾಸ ಪಟ್ಟು ಆ ಸಿನಿಮಾ ತೆರೆಗಂಡ ನಂತರವೂ ಅಭಿಜಿತ್ ನಿರ್ಮಾಪಕ ವಿ.ಜಿ ಮಂಜುನಾಥ್ ಅವರ ಸಂಪರ್ಕದಲ್ಲಿದ್ದರು.

ಅದಾಗಲೇ ದಶಕಗಳ ಕಾಲ ನಿರ್ದೇಶನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸಿದ್ದ ಅಭಿಜಿತ್ ತೀರ್ಥಹಳ್ಳಿ ಸ್ವತಂತ್ರ ನಿರ್ದೇಶಕರಾಗುವ ಇರಾದೆಯಿಂದ ಒಂದು ಕಥೆ ರೆಡಿ ಮಾಡಿಕೊಂಡಿದ್ದರು. ಹಾರರ್ ಅಂಶ ಸೇರಿದಂತೆ ಅನೇಕ ವಿಚಾರಗಳು ಅಡಕವಾಗಿದ್ದ ಆ ಕಥೆಯನ್ನು ವಿ.ಕೆ ಮಂಜುನಾಥ್ ಅವರ ಮುಂದೆ ಹರವಿದಾಗ ಅವರೊಳಗೊಂದು ಭರವಸೆ ಮೂಡಿಕೊಂಡಿತ್ತು. ಹಾಗಂತ ಏಕಾಏಕಿ ನಿರ್ಮಾಣಕ್ಕೆ ಇಳಿದು ಬಿಡುವಂಥಾ ವಾತಾವರಣವೂ ಇರಲಿಲ್ಲ. ಯಾಕೆಂದರೆ, ಮೊದಲ ಸಿನಿಮಾದ ಮೂಲಕ ಆಗಿದ್ದ ಕಹಿ ಅನುಭವಗಳಿನ್ನೂ ಅವರನ್ನು ಕಾಡುತ್ತಿದ್ದವು. ಹೀಗೆ ಮೊದಲ ಹೆಜ್ಜೆಗಂಟಿಗ ಅನುಭವಗಳನ್ನೆಲ್ಲ ಗಂಭೀರವಾಗಿ ಪರಿಗಣಿಸಿದ್ದ ವಿ.ಜಿ ಮಂಜುನಾಥ್ ಅವರು ಹಂಣತ ಹಂತವಾಗಿ ಅಭಿಜಿತ್ ಅವರನ್ನು ಪರೀಕ್ಷೆಗೊಡ್ಡಿ, ಎಲ್ಲ ರೀತಿಯಿಂದಲೂ ಸಮಯ ಪಕ್ವವಾದ ನಂತರವಷ್ಟೇ ಚಿತ್ರೀಕರಣಕ್ಕೆ ಹಸಿರು ನಿಶಾನೆ ತೋರಿಸಿದ್ದರಂತೆ.

ಅಂದಹಾಗೆ, ಆರಂಭಿಕವಾಗಿ ಅಪಾಯವಿದೆ ಎಚ್ಚರಿಕೆ ಚಿತ್ರವನ್ನು ಒಂದು ಸೀಮಿತ ಬಜೆಟ್ಟಿನಲ್ಲಿ ನಿರ್ಮಾಣ ಮಾಡಲು ವಿ.ಜಿ ಮಂಜುನಾಥ್ ತೀರ್ಮಾನಿಸಿದ್ದರಂತೆ. ಆದರೆ, ಚಿತ್ರೀಕರಣಕ್ಕಿಳಿದ ನಂತರ ಯಾವುದಕ್ಕೂ ಕಡಿಮೆಯಾಗದಂತೆ ನೋಡಿಕೊಂಡ ಅವರು, ಎಲ್ಲ ಕೋನಗಳಿಂದಲೂ ಈ ಸಿನಿಮಾ ಅಮೋಘವಾಗಿರುವಂತೆ ನೋಡಿಕೊಂಡಿದ್ದಾರೆ. ಕಡೆಗೂ ಆರಂಭಿಕ ಹೆಜ್ಜೆಗಳ ಕಹಿ ಮರೆತು, ಅಪಾಯವಿದೆ ಎಚ್ಚರಿಕೆ ಚಿತ್ರದ ಮೂಲಕ ಹೊಸಾ ಭರವಸೆಯೊಂದು ಅವರನ್ನು ಆವರಿಸಿಕೊಂಡಿದೆ. ದರಿ ಸಿನಿಮಾದೊಂದಿಗೆ ದೊಡ್ಡ ಮಟ್ಟದಲ್ಲಿ ಗೆಲುವು ಸಿಗುವ ನಿರೀಕ್ಷೆಯೂ ಅವರಲ್ಲಿದೆ. ಸದ್ಯದ ವಾತಾವರಣವಂತೂ ಅದಕ್ಕೆ ಪೂರಕವಾಗಿದೆ. ಸುನಾದ್ ಗೌತಮ್ ಛಾಯಾಗ್ರಹಣ ಮತ್ತು ಸಂಗೀತ ನಿರ್ದೇಶನ, ಗುರುಪ್ರಸಾದ್ ಸಹ ನಿರ್ದೇಶನ, ಹರ್ಶಿತ್ ಪ್ರಭು ಸಂಕಲನ, ವಿಕಾಸ್ ಉತ್ತಯ್ಯ, ರಾಧಾ ಭಗವತಿ, ರಾಘವ್ ಕೊಡಚಾದ್ರಿ, ಮಿಥುನ್ ತೀರ್ಥಹಳ್ಳಿ, ಹರಿಣಿ ಶ್ರೀಕಾಂತ್ ಮುಂತಾದವರ ತಾರಾಗಣದೊಂದಿಗೆ ಈ ಸಿನಿಮಾ ಮೂಡಿ ಬಂದಿದೆ.

The post apayavide eccharike movie: ಉದ್ಯಮಿಯೋರ್ವರ ಅಪ್ಪಟ ಸಿನಿಮಾ ಧ್ಯಾನ! appeared first on Cini Shodha.

ಈ ಹಿಂದೆ ಕಂಬ್ಳಿ ಹುಳ ಚಿತ್ರದ ಮೂಲಕ ನಾಯಕನಾಗಿ ಎಂಟ್ರಿ ಕೊಟ್ಟಿದ್ದವರು ಅಂಜನ್. ಮೊದಲ ಹೆಜ್ಜೆಯಲ್ಲಿಯೇ ಅವರ ನಟನೆಗೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿತ್ತು. ಆ ಸಿನಿಮಾದ ಭೂಮಿಕೆಯಲ್ಲಿಯೇ `ಎಲ್ಲೋ ಜೋಗಪ್ಪ ನಿನ್ನರಮನೆ’ ಚಿತ್ರದ ನಾಯಕನಾಗೋ ಅವಕಾಶ ಅವರ ಪಾಲಿಗೆ ಒಲಿದದ್ದು ನಿಜಕ್ಕೂ ಅಚ್ಚರಿಯ ಸಂಗತಿ. ಎಳವೆಯಿಂದಲೇ ರಂಗಭೂಮಿಯ ನಂಟು ಹೊಂದಿದ್ದ ಅಂಜನ್ ಪಾಲಿಗೆ ನಟನಾಗಿ ಯಾವ ದಿಕ್ಕಿನತ್ತ ಸಾಗಬೇಕು, ಯಾವ ಬಗೆಯ ಕಥೆಯನ್ನು ಆಯ್ಕೆ ಮಾಡಿಕೊಳ್ಳಬೇಕೆಂಬ ಬಗ್ಗೆ ಸ್ಪಷ್ಟವಾದ ಅಂದಾಜಿದೆ. ಕಂಬ್ಳಿ ಹುಳ ಚಿತ್ರದ ನಂತರ ಭಿನ್ನವಾದ ಪಾತ್ರದಲ್ಲಿ ನಟಿಸಬೇಕೆಂಬುದು ಅಂಜನ್ ಆಸೆಯಾಗಿತ್ತು. ಅದು ಕಂಬ್ಳಿಹುಳ ಚಿತ್ರ ಬಿಡುಗಡೆಗೆ ಮುನ್ನವೇ ಸಾಕಾರಗೊಂಡು ಸ್ವತಃ ಅಂಜನ್ ರನ್ನೇ ಅಚ್ಚರಿಗೀಡು ಮಾಡಿತ್ತು.

ಇಂಥಾದ್ದೊಂದು ಮಿರ್‍ಯಾಕಲ್ ಸಂಭವಿಸಿದ್ದು ಕಂಬ್ಳಿಹುಳ ಚಿತ್ರದ ಪ್ರೀಮಿಯರ್ ಶೋ ಭೂಮಿಕೆಯಲ್ಲಿ. ಈ ಪ್ರೀಮಿಯರ್ ಶೋಗೆ ನಿರ್ದೇಶಕ ಹಯವದನ ಕೂಡಾ ಆಗಮಿಸಿದ್ದರು. ಸಿನಿಮಾ ನೋಡುತ್ತಲೇ ಹಯವದನ ಅದಾಗಲೇ ರೆಡಿ ಮಾಡಿಟ್ಟುಕೊಂಡಿದ್ದ `ಎಲ್ಲೋ ಜೋಗಪ್ಪ ನಿನ್ನರಮನೆ’ ಚಿತ್ರಕ್ಕೆ ನಾಯಕನಾಗಲು ಅಂಜನ್ ನಾಗೇಂದ್ರ ಸೂಕ್ತ ಎಂಬಂಥಾ ತೀರ್ಮಾನಕ್ಕೆ ಬಂದಂತಿತ್ತು. ಈ ಕಾರಣದಿಂದಲೇ ಪ್ರೀಮಿಯರ್ ಶೋ ಮುಗಿಯುತ್ತಲೇ ಇಂಥಾದ್ದೊಂದು ಪ್ರಸ್ತಾವನೆಯನ್ನು ಅಂಜನ್ ಮುಂದಿಟ್ಟಿದ್ದರಂತೆ. ನಿಂತ ನಿಲುವಿನಲ್ಲಿಯೇ ಹಯವದನ ಒಂದೆಳೆ ಕಥೆ ಹೇಳಿದಾಕ್ಷಣವೇ ಅಂಜನ್ ನಾಗೇಂದ್ರ ಥ್ರಿಲ್ ಆಗಿ ಒಪ್ಪಿಗೆ ಸೂಚಿಸಿದ್ದರಂತೆ. ಹಾಗೆ ಎಲ್ಲೋ ಜೋಗಪ್ಪ ನಿನ್ನರಮನೆ ಸಿನಿಮಾ ಯಾನಕ್ಕೊಂದು ವಿದ್ಯುಕ್ತ ಚಾಲನೆ ಸಿಕ್ಕಂತಾಗಿತ್ತು. 

ಆ ನಂತರ ಅತ್ಯಂತ ವೇಗವಾಗಿ ರಿಹರ್ಸಲ್ಲು ನಡೆದಿತ್ತು. ಅದರಲ್ಲಿ ಅಂಜನ್ ನಾಗೇಂದ್ರ ಅತ್ಯಂತ ಉತ್ಸಾಹದಿಂದಲೇ ಭಾಗಿಯಾಗಿದ್ದರು. ಅಷ್ಟೆಲ್ಲ ಆದ ನಂತರ ಅತ್ಯಂತ ವ್ಯವಸ್ಥಿತವಾಗಿ ಈ ಚಿತ್ರದ ಚಿತ್ರೀಕರಣ ಶುರುವಾಗಿತ್ತು. ಇಲ್ಲಿ ಬೆಂಗಳೂರಿನಿಂದ ಹಿಮಾಲಯದವರೆಗೂ ಹಬ್ಬಿಕೊಂಡಿರೋ ಕಥೆ ಇರೋದರಿಂದ, ಚಿತ್ರೀಕರಣದ ಪ್ರತೀ ಘಟ್ಟದಲ್ಲೂ ಬೇರೆಯದ್ದೇ ಜಗತ್ತೊಂದು ಕಣ್ಮುಂದೆ ಪ್ರತ್ಯಕ್ಷವಾದಂಥಾ ಅನುಭೂತಿ ದಕ್ಕಲಾರಂಭಿಸಿತ್ತು. ಬೇರೆ ಬೇರೆ ಭೂಬಾಗ, ಭಿನ್ನವಾದ ಸಂಸ್ಕೃತಿಗಳನ್ನು ಮನತುಂಬಿಕೊಳ್ಳುತ್ತಾ, ಒಂದಷ್ಟು ರಿಸ್ಕು ತೆಗೆದುಕೊಂಡು ಚಿತ್ರೀಕರಣದಲ್ಲಿ ಭಾಗಿಯಾದ ಥ್ರಿಲ್ಲಿಂಗ್ ಅನುಭವವನ್ನು ಅಂಜನ್ ನಾಗೇಂದ್ರ ತಮ್ಮದಾಗಿಸಿಕೊಂಡಿದ್ದಾರೆ.

ಹೀಗೆ ಎಲ್ಲೋ ಜೋಗಪ್ಪ ನಿನ್ನರಮನೆ ಚಿತ್ರದ ನಾಯಕನಾಗಿ ನಟಿಸಿರುವ ಅಂಜನ್ ನಾಗೇಂದ್ರ ಮೂಲತಃ ಹಾಸನದವರು. ಇವರ ತಂದೆ ನಾರಾಯಣ ಆ ಕಾಲಕ್ಕೆ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದವರು. ಈ ಕಾರಣದಿಂದ ಅಂಜನ್ ಪಾಲಿಗೆ ಪುಟ್ಟ ವಯಸ್ಸಿನಲ್ಲಿಯೇ ರಂಗಭೂಮಿಯ ವಾತಾವರಣದಲ್ಲಿ ಬೆರೆಯುವ ಅವಕಾಶ ಸಿಕ್ಕಿತ್ತು. ಆ ಹಂತದಿಂದಲೇ ನಟಿಸುತ್ತಾ ಬಂದಿದ್ದ ಅವರ ಪಾಲಿಗೆ ಸಿನಿಮಾ ನಟನಾಗಬೇಕೆಂಬ ಕನಸು ಕಾಲೇಜು ದಿನಗಳವರೆಗೂ ಇರಲೇ ಇಲ್ಲವಂತೆ. ಕಡೆಗೂ ಹಾಸನದಲ್ಲಿಯೇ ಇಂಜಿನಿಯರಿಂಗ್ ಮುಗಿಸಿದ್ದ ಅಂಜನ್ ನಾಗೇಂದ್ರ ಒಂದೆರಡು ವರ್ಷ ಸಿನಿಮಾ ರಂಗದಲ್ಲಿ ನಟನಾಗಲು ಪ್ರಯತ್ನಿಸುವ ನಿರ್ಧಾರಕ್ಕೆ ಬಂದಿದ್ದರು. ಆದರೆ ಅದೇನೇ ಸರ್ಕಸ್ಸು ನಡೆಸಿದರೂ ಎರಡು ವರ್ಷಗಳಲ್ಲಿ ಯಾವ ಬೆಳವಣಿಗೆಗಳೂ ಸಾಧ್ಯವಾಗಿರಲಿಲ್ಲ.

ಆದರೆ, ಎರಡು ವರ್ಷಗಳ ನಂತರ ತಾನೇ ತಾನಾಗಿ ಕಂಬ್ಳಿಹುಳ ಚಿತ್ರದ ನಾಯಕನಾಗುವ ಅವಕಾಶ ಒಲಿದು ಬಂದಿತ್ತು. ಆ ಬಳಿಕ ಎಲ್ಲೋ ಜೋಗಪ್ಪ ನಿನ್ನರಮನೆ ಸಿನಿಮಾ ಅವಕಾಶವೂ ಹುಡುಕಿ ಬಂದಿತ್ತು. ಈಗ ಮತ್ತೊಂದಷ್ಟು ಅವಕಾಶಗಳೂ ಅಂಜನ್ ಮುಂದಿವೆ. ನಿಖರವಾಗಿ ಹೇಳಬೇಕೆಂದರೆ ಸಿನಿಮಾ ಕಲೆಯೆಂಬುದು ಅವರನ್ನು ಬರಸೆಳೆದು ಅಪ್ಪಿಕೊಂಡಿದೆ. ಎಲ್ಲೋ ಜೋಗಪ್ಪ ನಿನ್ನರಮನೆ ಚಿತ್ರದ ಮೂಲಕ ತನ್ನ ಮುಂದಿನ ಹಾದಿ ಮತ್ತಷ್ಟು ಸುಗಮವಾಗಲಿದೆ ಎಂಬ ಗಾಢ ನಂಬಿಕೆ ಅವರಲ್ಲಿದೆ. ಪವನ್ ಶಿಮಿಕೇರಿ ಮತ್ತು ಸಿಂಧು ಹಯವದನ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸೃಜನ್ ರಾಘವೇಂದ್ರ, ಚೇತನ್, ಹಯವದನ ಚಿತ್ರಕಥೆ, ವೇಣು ಹಸ್ರಾಳಿ ಸಂಭಾಷಣೆ, ನಟರಾಜು ಮದ್ದಾಲ ಛಾಯಾಗ್ರಹಣ, ಹೊಸ್ಮನೆ ಮೂರ್ತಿ ಕಲಾ ನಿರ್ದೇಶನ, ಶಿವಪ್ರಸಾದ್ ಸಂಗೀತ ನಿರ್ದೇಶನವಿರುವ ಈ ಚಿತ್ರ ತೆರೆಗಾಣಲು ದಿನಗಣನೆ ಶುರುವಾಗಿದೆ.

The post ello jogappa ninnaramane: ಎಲ್ಲೋ ಜೋಗಪ್ಪ ನಿನ್ನರಮನೆ ನಾಯಕ ಅಂಜನ್ ಅಂತರಾಳ! appeared first on Cini Shodha.

ಇತ್ತೀಚೆಗೆ ತೆರೆಗಂಡು ಭರ್ಜರಿ ಯಶ ಕಂಡಿರುವ (bhairathi ranagal movie) ಭೈರತಿ ರಣಗಲ್ ಚಿತ್ರದಲ್ಲಿ ಜೀವನ್ ರಿಚ್ಚಿ ವಿಲನ್ ಆಗಿ ಅಬ್ಬರಿಸಿದ್ದರು. (shivaraj kumar) ಶಿವರಾಜ್ ಕುಮಾರ್ ಜೊತೆಗಿನ ಮುಖಾಮುಖಿ ದೃಶ್ಯಗಳನ್ನು ಕಂಡು ಪ್ರೇಕ್ಷಕರು ಥ್ರಿಲ್ ಆಗಿದ್ದರು. ಇಂಥಾ ಜೀವನ್ ಬಿಡುಗಡೆಗೆ ತಯಾರಾಗಿರುವ ಗನ್ಸ್ ಅಂಡ್ ರೋಸಸ್ ಚಿತ್ರದಲ್ಲಿಯೂ ಖಳನಾಗಿ ಆರ್ಭಟಿಸಿದ್ದಾರೆ. ಭಾರೀ ಖದರ್ ಹೊಂದಿರುವ ಈ ಪಾತ್ರ ತನಗೆ ಒಲಿದು ಬಂದ ಬಗ್ಗೆ ಖುದ್ದು ಅವರೊಳಗೇ ಅಚ್ಚರಿಯಿದೆ. ಹೆಜ್ಜೆ ಹೆಜ್ಜೆಗೂ ಭಿನ್ನ ಪಾತ್ರಗಳನ್ನು ಧ್ಯಾನಿಸುವ ಕಲಾವಿದನಾಗಿ ಇಂಥಾದ್ದೊಂದು ಪಾತ್ರವನ್ನು ಆವಾಹಿಸಿಕೊಂಡ ಬಗ್ಗೆ ಜೀವನ್ ರಿಚ್ಚಿ ಅವರೊಳಗೊಂದು ತೃಪ್ತ ಭಾವ ಮೂಡಿಕೊಂಡಿದೆ. ಇದುವರೆಗೂ ಸಾಕಷ್ಟು ಸಿನಿಮಾಗಳಲ್ಲಿ ನಟಿಸಿ, ನಟನೆಯ ಕಸುವಿನಿಂದಲೇ ಗಮನ ಸೆಳೆದಿರುವ ಜೀವನ್ ಪಾಲಿಗೆ, ಗನ್ಸ್ ಅಂಡ್ ರೋಸಸ್ ಪಾತ್ರ ತನ್ನ ಸಿನಿಮಾ ಪಯಣದಲ್ಲೊಂದು ಮೈಲಿಗಲ್ಲಾಗುತ್ತದೆ ಎಂಬ ಭರವಸೆಯೂ ಇದೆ.

ಜೀವನ್ ರಿಚ್ಚಿ ಗನ್ಸ್ ಅಂಡ್ ರೋಸಸ್ ಚಿತ್ರತಂಡಕ್ಕೆ ಸೇರ್ಪಡೆಗೊಂಡಿದ್ದ ಹಿಂದೆ ಹಿರಿಯ ನಟ ಶೋಭರಾಜ್ ಅವರ ಪಾತ್ರವಿದೆ. ಶೋಭರಾಜ್ ಈ ಸಿನಿಮಾದ ಮಹತ್ವದ ಪಾತ್ರವೊಂದಕ್ಕೆ ಒಪ್ಪಿಕೊಂಡಿದ್ದರು. ಇದೇ ಹಂತದಲ್ಲಿ ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಇನ್ಸ್ ಪೆಕ್ಟರ್ ಪಾತ್ರಕ್ಕಾಗಿ ಕಲಾವಿದರ ಹುಡುಕಾಟದಲ್ಲಿದ್ದರು. ಈ ವಿಚಾರ ತಿಳಿದಿದ್ದ ಶೋಭರಾಜ್ ಜೀವನ್ ಗೆ ಕರೆ ಮಾಡಿ ಹೋಗಿ ನಿರ್ದೇಶಕರನ್ನು ಭೇಟಿಯಾಗುವಂತೆ ಸೂಚಿಸಿದ್ದರಂತೆ. ಶೋಭರಾಜ್ ರನ್ನು ಅಣ್ಣನ ಸ್ಥಾನದಲ್ಲಿಟ್ಟು ಶೋಭಣ್ಣ ಅಂತಲೇ ಕರೆಯುವ ಜೀವನ್ ಮರು ಮಾತಾಡದೆ ಒಪ್ಪಿಕೊಂಡು ನಿರ್ದೇಶಕರನ್ನು ಸಂಪರ್ಕಿಸಿದ್ದರು. ಮಾರನೇ ದಿನವೇ ಕಚೇರಿಗೆ ಹೋದಾಗ ಎದುರುಗೊಂಡಿದ್ದು ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಮುತ್ತು ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್.

ಜೀವನ್ ರನ್ನು ಮಾತಾಡಿಸುತ್ತಲೇ ಅಜಯ್ ಕುಮಾರ್ ನಿರ್ದೇಶಕರೊಂದಿಗೆ ಕ್ಯಾಬಿನ್ನಿನ ಒಳ ಹೋಗಿದ್ದರು. ಹಾಗೆ ಹೋದವರು ಸುದೀರ್ಘ ಡಿಸ್ಕಷನ್ನು ನಡೆಸಿದ್ದರು. ಗಂಟೆಗಟ್ಟಲೆ ಏನೂ ಸದ್ದಿಲ್ಲದಾಗ ಜೀವನ್‌ರನ್ನು ಇನ್ಸ್ ಪೆಕ್ಟರ್ ಪಾತ್ರ ಕೈತಪ್ಪಿದ ಕಸಿವಿಸಿ ಕಾಡಲಾರಂಭಿಸಿತ್ತು. ಕಡೆಗೂ ವಿಚಾರಕ್ಕೆ ಬಂದ ನಿರ್ದೇಶಕರು ಇನ್ಸ್ ಪೆಕ್ಟರ್ ಪಾತ್ರದ ಬದಲು ವಿಲನ್ ಪಾತ್ರ ಮಾಡುವಂತೆ ಸೂಚಿಸಿದ್ದರು. ಬಳಿಕ ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಒಂದೇ ವೇಗದಲ್ಲಿ ಒಂದಿಡೀ ಕಥೆ ಹೇಳಿ, ಆ ಪಾತ್ರದ ಬಗ್ಗೆ ವಿವರಿಸಿದಾಗ ಜೀವನ್ ರಿಚ್ಚಿ ಅಕ್ಷರಶಃ ಥ್ರಿಲ್ ಆಗಿದ್ದರಂತೆ. ಸಿನಿಮಾ ನೋಡಿದ ಪ್ರತಿಯೊಬ್ಬರೊಳಗೂ ಅಂಥಾದ್ದೇ ಥ್ರಿಲ್ ವ್ಯಾಪಿಸಿಕೊಳ್ಳುತ್ತದೆಂಬ ಭರವಸೆ ಜೀವನ್ ಅವರಲ್ಲಿದೆ.

ಕೊಡಗಿನ ವಿರಾಜಪೇಟೆ ತಾಲೂಕಿನ ಕುಕ್ಕುಲೂರಿನವರು ಜೀವನ್ ರಿಚ್ಚಿ. ಬಡತನದ ಕುಟುಂಬದಲ್ಲಿ ಹುಟ್ಟಿ, ಆ ಸಂಕಷ್ಟಗಳನ್ನು ಕಂಡುಂಡು ಬೆಳೆದ ಇವರಿಗೆ ಒಂದಿಡೀ ಬದುಕಿನ ಮಾರ್ಗದರ್ಶಿಯಂತಿದ್ದವರು ತಂದೆ. ಹಾಗೆ ಆ ವಾತಾವರಣದಲ್ಲಿ ಬಹುತೇಕ ಎಲ್ಲ ಕೆಲಸಗಳನ್ನೂ ಮಾಡಿ, ಕಡೆಗೊಂದು ದಿನ ಇಪ್ಪತೈದು ವರ್ಷಗಳ ಹಿಂದೆ ಜೇಬಿನಲ್ಲಿ ನೂರೈವತ್ತು ರೂಪಾಯಿ ಇಟ್ಟುಕೊಂಡು ಬೆಂಗಳೂರಿಗೆ ಬಂದಿಳಿದಿದ್ದವರು ಜೀವನ್. ಒಂಬತ್ತನೇ ತರಗತಿಯಷ್ಟೇ ಓದಿದ್ದ ಅವರಿಗೆ ಓದಿನ ಆಧಾರದಲ್ಲಿ ಕೆಲಸ ಹುಡುಕೋ ಅವಕಾಶವಿರಲಿಲ್ಲ. ಆದ್‌ದರಿಂದಲೇ ಎಸ್‌ಟಿಡಿ ಬೂತ್, ಹೋಟೆಲ್ ಅಂತೆಲ್ಲ ನಾನಾ ಕೆಲಸ ಮಾಡಿ ಬದುಕು ಕಟ್ಟಿಕೊಳ್ಳಲು ಪ್ರಯತ್ನಿಸಿದ್ದರು. ಕಷ್ಟಪಟ್ಟು ದುಡಿಕಯುತ್ತಾ ತಾವೇ ಹೊಟೇಲ್ ಉದ್ಯಮ ಶುರುವಿಟ್ಟುಕೊಂಡಿದ್ದರು. ಅದರಲ್ಲಿ ಕೈ ಸುಟ್ಟುಕೊಂಡು ಟ್ರಾವೆಲ್ಸ್ ಕಸುಬಿನತ್ತ ಹೊರಳಿಕೊಂಡಿದ್ದ ಜೀವನ್ ಕೆಟರಿಂಗ್ ಬ್ಯುಸಿನೆಸ್ ನಡೆಸುತ್ತಾ ಜೀವನದಲ್ಲಿ ನೆಲೆ ಕಂಡುಕೊಂಡಿದ್ದರು. ಮದುವೆಯಾದ ಬಳಿಕ ತಮ್ಮನ್ನು ಸದಾ ಕಾಡುತ್ತಿದ್ದ ನಟನಾಗುವ ಕನಸನ್ನು ನನಸು ಮಾಡಿಕೊಳ್ಳುವತ್ತ ಪ್ರಯತ್ನಿಸಿದ್ದರು.

ಇಂಥಾ ಪ್ರಯತ್ನದ ಹಾದಿಯಲ್ಲಿ ಮೊದಲು ಎದುರಾದದ್ದು ಅವಮಾನ. ನಂತರ ವರ್ಷಗಟ್ಟಲೆ ಅವಮಾನದೊಂದಿಗೆ ನೋವು, ನಿರಾಸೆಗಳ ಸರಣಿ ಮುಂದುವರೆದಿತ್ತು. ಸಿಕ್ಕ ಪುಟ್ಟ ಪಾತ್ರಗಳಲ್ಲಿಯೇ ಅಚ್ಚುಕಟ್ಟಾಗಿ ನಟಿಸುತ್ತಾ ಸಾಗಿ ಬಂದಿದ್ದ ಅವರಿಗೆ ಇತ್ತೀಚಿನ ವರ್ಷಗಳಲ್ಲಿ ಮಹತ್ವದ ಪಾತ್ರಗಳು ಸಿಗಲಾರಂಭಿಸಿವೆ. ಎಂಥಾ ಪಾತ್ರಕ್ಕಾದರೂ ಸೈ ಎಂಬಂಥಾ ಛಾತಿ ಹೊಂದಿರುವ ಜೀವನ್ ಅವರ ನಟನೆಯ ಕಸುವು ಎಲ್ಲರಿಗೂ ಪರಿಚಯವಾಗಿದೆ. ಭೈರತಿ ರಣಗಲ್ ಚಿತ್ರದ ಪಾತ್ರದ ಮೂಲಕ ಅವರ ಪ್ರಭೆ ಮತ್ತಷ್ಟು ಪ್ರಜ್ವಲಿಸಿದೆ. ಅವರು ಕನ್ನಡದಲ್ಲಿ ಮಾತ್ರವಲ್ಲದೇ ಬೇರೆ ಭಾಷೆಗಳಲ್ಲಿಯೂ ಮಿಂಚುವ ಸ್ಪಷ್ಟ ಲಕ್ಷಣಗಳು ಗೋಚರಿಸಲಾರಂಭಿಸಿವೆ. ಗನ್ಸ್ ಅಂಡ್ ರೋಸಸ್ ಪಾತ್ರ ಅವರ ವೃತ್ತಿ ಬದುಕಿಗೆ ಮತ್ತಷ್ಟು ಆವೇಗ ಕೊಡೋದರಲ್ಲಿ ಯಾವ ಸಂದೇಹವೂ ಇಲ್ಲ.

ದ್ರೋಣ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ಎಚ್.ಆರ್ ನಟರಾಜ್ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಈ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಶಶಿ ಕುಮಾರ್ ಸಂಗೀತ ನಿರ್ದೇಶನ, ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಇನ್ಸ್ಪೆಕ್ಟರ್ ಆಗಲು ಬಂದು ವಿಲನ್ ಆದ ರಿಚ್ಚಿ! appeared first on Cini Shodha.

ತಂದೆಯೇ ಸಿನಿಮಾ ಕ್ಷೇತ್ರದಲ್ಲಿ ಇದ್ದದ್ದರಿಂದ ಆರಂಭದಿಂದಲೂ ಅರ್ಜುನ್ ಪಾಲಿಗೆ ಸಿನಿಮಾ ವಾತಾವರಣ ಸಿಕ್ಕಿತ್ತು. ಸಿನಿಮಾ ಮಂದಿಯ ಸಂಗ, ಶೂಟಿಂಗ್ ಸ್ಪಾಟುಗಳೆಲ್ಲವೂ ಬದುಕಿನ ಭಾಗವಾಗಿತ್ತು. ಈ ಎಲ್ಲ ಕಾರಣಗಳಿಂದ ಸಿನಿಮಾದೆಡೆಗಿನ ಬೆರಗು ಅರ್ಜುನ್ ರೊಳಗೆ ಬಲವಾಗುತ್ತಾ ಸಾಗಿತ್ತು. ತೀರಾ ಎಳೇ ವಯಸ್ಸಿನಿಂದಲೇ ನಟನಾಗುವ ಕನಸು ಅಪ್ರಜ್ಞಾಪೂರ್ವಕವಾಗಿ ಚಿಗುರಲಾರಂಭಿಸಿತ್ತು. ಅದು ಒಂದು ಹಂತಕ್ಕೆ ಸಾಕಾರಗೊಂಡಿದ್ದು ನಂದ ಲವ್ಸ್ ನಂದಿತಾ ಚಿತ್ರದ ಮೂಲಕ. ಆ ಚಿತ್ರಕ್ಕೆ ಅಜಯ್ ಕುಮಾರ್ ಕಥೆ, ಚಿತ್ರಕಥೆ ಬರೆದಿದ್ದರು. ಅದರಲ್ಲಿ ನಾಯಕ ಲೂಸ್ ಮಾದ ಯೋಗಿಯ ಎಳವೆಯ ಪಾತ್ರ ಅರ್ಜುನ್ ಗೆ ಒಲಿದು ಬಂದಿತ್ತು. ಆ ಮೂಲಕ ಒಂದಷ್ಟು ಮೆಚ್ಚುಗೆಯನ್ನೂ ಕೂಡಾ ಅರ್ಜುನ್ ಗಳಿಸಿಕೊಂಡಿದ್ದರು. ಆ ನಂತರ ಅಜಯ್ ಕುಮಾರ್ ಓದಿನತ್ತ ಮಾತ್ರ ಗಮನ ಹರಿಸುವಂತೆ ಮಗನಿಗೆ ತಾಕೀತು ಮಾಡಿದ್ದರು.

ಈ ನಡುವೆ ಓದೆಲ್ಲ ಮುಗಿಸಿಕೊಂಡ ಮೇಲೂ ನಾಯಕನಾಗಿ ಬಿಡುವ ವಿಪುಲ ಅವಕಾಶಗಳು ಅರ್ಜುನ್ ಪಾಲಿಗಿದ್ದವು. ಆದರೆ, ತಂದೆ ಅಜಯ್ ಮಾತ್ರ ನಟನಾಗಲು ಬೇಕಾದ ಎಲ್ಲ ದಿಕ್ಕಿನಲ್ಲಿಯೂ ಪಳಗಿಕೊಂಡ ನಂತರವಷ್ಟೇ ನಾಯಕನಾಗಲು ಪ್ರಯತ್ನಿಸಬೇಕೆಂದು ಕಟ್ಟುನಿಟ್ಟಾಗಿ ತಾಕೀತು ಮಾಡಿದ್‌ದರಂತೆ. ಅದನ್ನು ಚಾಚೂತಪ್ಪದೆ ಪಾಲಿಸಿದ್ದ ಅರ್ಜುನ್, ಸಿನಿಮಾ ತರಬೇತಿಗೆ ಸೇರಿಕೊಂಡು ಮಾರ್ಷಲ್ ಆರ್ಟ್ಸ್, ಡ್ಯಾನ್ಸ್, ಫೈಟ್, ನಟನೆ ಸೇರಿದಂತೆ ಎಲ್ಲ ತರಬೇತಿಯನ್ನೂ ಪಡೆದುಕೊಂಡಿದ್ದರು. ಆ ನಂತರವೇ ನಾಯಕನಾಗಲು ಪ್ರಯತ್ನಿಸಲಾರಂಭಿಸಿದ್ದ ಅವರಿಗೆ ಗನ್ಸ್ ಅಂಡ್ ರೋಸಸ್ ಮೂಲಕ ಅದು ಕೈಗೂಡಿದೆ.

ಗನ್ಸ್ ಅಂಡ್ ರೋಸಸ್ ಚಿತ್ರದಲ್ಲಿ ಅರ್ಜುನ್ ಗೆ ಸಿಕ್ಕಿರೋ ಪಾತ್ರ ಅಕ್ಷರಶಃ ಸವಾಲಿನದ್ದು. ಕಡಿಮೆ ಮಾತಿಗೆ, ಆಕ್ಟೀವ್ ಆಗಿರುವ ಆ ಪಾತ್ರಕ್ಕೆ ಹಲವು ಶೇಡುಗಳಿವೆ. ಈ ಮೂಲಕವೇ ಸದರಿ ಸಮಾಜದ ಕಠೋರ ವಾಸ್ತವಕ್ಕೆ ಕನ್ನಡಿ ಹಿಡಿದು, ಯುವ ಸದಮುದಾಯವನ್ನು ಸರಿದಿಕ್ಕಿನತ್ತ ಚಲಿಸುವಂತೆ ಪ್ರೇರೇಪಿಸುವ ಈ ಪಾತ್ರ ಅರ್ಜುನ್ ಪಾಲಿಗೆ ಖುಷಿ ಕೊಟ್ಟಿದೆ. ಈಗಾಗಲೇ ಪರಭಾಷಾ ಚಿತ್ರರಂಗದ ವಿತರಕರನೇಕರು ಅರ್ಜುನ್ ನಟನೆಯನ್ನು ಮೆಚ್ಚಿ ಕೊಂಡಾಡಿದ್ದಾರೆ. ಎಲ್ಲ ಭಾಷೆಗಳ ಪ್ರೇಕ್ಷಕರಿಗೂ ಹಿಡಿಸುವಂತೆ ನಟಿಸಿದ್ದಾರೆಂಬ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ಅಂದಹಾಗೆ, ಈ ಸಿನಿಮಾ ಪ್ಯಾನಿಂಡಿಯಾ ಮಟ್ಟದಲ್ಲಿ ಬಿಡುಗಡೆಗೊಳ್ಳಲಿದೆ.

ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ನಿರ್ಮಾಣ ಮಾಡಿರುವ ಹೆಚ್.ಆರ್ ನಟರಾಜ್ ಅಂಥಾದ್ದೊಂದು ಅವಕಾಶವನ್ನು ಕಲ್ಪಿಸಿ ಕೊಟ್ಟಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಙ್ರಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಮೂಲಕ ಅರ್ಜುನ ಪರ್ವ ಶುರು! appeared first on Cini Shodha.

ದೇವನಹಳ್ಳಿಯ ಒಡಲಲ್ಲಿರೋ ಭಟ್ರೇನಹಳ್ಳಿ ಎಂಬೂರಿನ ರೈತಾಪಿ ವರ್ಗದಿಂದ ಬಂದವರು ಶರತ್. ಈವತ್ತಿಗೂ ಕೃಷಿಯೇ ಇವರ ತಂದೆ ಮತ್ತು ಕುಟುಂಬದ ಮೂಲ ಆಧಾರ. ಅಂಥಾ ರೈತಾಪಿ ಬದುಕು ಕರುಣಿಸಿದ ಸಂವೇದನೆಯ ಪಸೆಯನ್ನು ಮನಸಲ್ಲಿಟ್ಟುಕೊಂಡಿರುವ ಶರತ್ ಪಾಲಿಗೆ ಸಿನಿಮಾ ಅನ್ನೋದು ಎಳವೆಯಿಂದಲೇ ಆವರಿಸಿಕೊಂಡಿದ್ದ ಮಾಯೆ. ಆದರೆ, ಇಂಥಾ ಕನಸಿನ ಹಾದಿ ನೇರವಾಗಿ ಗಾಂಧಿನಗರಕ್ಕೆ ತಂದು ನಿಲ್ಲಿಸುವುದಿಲ್ಲ. ಬದುಕಿನ ಅನಿವಾರ್ಯತೆ ಯಾವತ್ತಿದ್ದರೂ ಕನಸಿಗೆ ವಿರುದ್ಧ ದಿಕ್ಕಿನಲ್ಲಿರುತ್ತೆ. ಅಂಥಾದ್ದೊಂದು ಅನಿವಾರ್ಯತೆಗೆ ಸಿಕ್ಕಿ ಐಟಿ ವಲಯದಲ್ಲಿ ಉದ್ಯೋಗ ಆರಂಭಿಸಿದ್ದವರು ಶರತ್. ಕಂಫರ್ಟ್ ಜೋನಿನಲ್ಲಿ ಜೀವನವನ್ನು ಪ್ರತಿಷ್ಠಾಪಿಸಿಕೊಳ್ಳುವ ಉಮೇದು ಹೊಂದಿರುವವರಿಗೆ ಏನೂ ತೊಂದರೆಯಿಲ್ಲದ ಕೆಲಸವದು. ಆದರೆ, ಒಂದು ಹಂತದಲ್ಲಿ ಶರತ್ ಪಾಲಿಗೆ ಕೈ ತುಂಬಾ ಸಂಬಳ ತರುವ ಕೆಲಸಕ್ಕಿಂತ, ಎದೆಯಲ್ಲಿದ್ದ ಕನಸನ್ನು ನನಸು ಮಾಡಿಕೊಳ್ಳೋದೇ ಒಳಿತೆನ್ನಿಸಿತ್ತು.

ಹಾಗೊಂದು ನಿರ್ಧಾರ ತಳೆಯುತ್ತಲೇ ಇನ್ನು ಮುಂದಿನ ಬದುಕೇನಿದ್ದರೂ ಸಿನಿಮಾಕ್ಕಾಗಿಯೇ ಮುಡಿಪೆಂಬ ದೃಢ ನಿರ್ಧಾರವೂ ಅವರೊಳಗೆ ಹದಗೊಂಡಿತ್ತು. ಆ ಕ್ಷಣದಲ್ಲಿಮ ಎದುರಾದದ್ದು ಚಿತ್ರರಂಗಕ್ಕೆ ಎಂಟ್ರಿ ಕೊಡುವುದು ಹೇಗೆಂಬ ಯಕ್ಷ ಪ್ರಶ್ನೆ. ಆ ಹೊತ್ತಿನಲ್ಲಿ ಒಂದು ಕಾಲದಲ್ಲಿ ಕಥೆಗಾರರಾದ ಅಜಯ್ ಕುಮಾರ್ ಅವರ ಬಳಿ ಕೆಲಸ ಮಾಡಿದ್ದ ತನ್ನ ಮಾವನ ಮೂಲಕವೇ ದಾರಿ ತೆರೆದುಕೊಂಡೀತೆಂಬ ಆಸೆಯೊಂದು ಶರತ್ ರೊಳಗೆ ಮೂಡಿಕೊಂಡಿತ್ತು. ಆ ದಿಕ್ಕಿನಲ್ಲಿ ಪ್ರಯತ್ನಿಸಿದಾಗ ಅಜಯ್ ಕುಮಾರ್ ಅವರ ಗರಡು ಸೇರಿಕೊಳ್ಳುವ ಸದವಕಾಶ ಬಂದಿತ್ತು. ಹಾಗೆ ಅಜಯ್ ಕುಮಾರ್ ಬಳಿ ಕಸುಬು ಕಲಿಯಲಾರಂಭಿಸಿದ್ದ ಶರತ್, ಎರಡು ವರ್ಷಗಳ ಕಾಲ ಅದನ್ನು ಧ್ಯಾನದಂತೆ ಆವಾಹಿಸಿಕೊಂಡಿದ್ದರು. ಕಡೆಗೂ ಗುರುಗಳಾದ ಅಜಯ್ ಕುಮಾರ್ ಕಡೆಯಿಂದಲೇ ಅಚ್ಚರಿದಾಯಕ ಅವಕಾಶವೊಂದು ಅಚಾನಕ್ಕಾಗಿ ಒಲಿದು ಬಂದಿತ್ತು!

ಅಜಯ್ ಕುಮಾರ್ ಮಗ ಅರ್ಜುನ್ ನಾಯಕನಾಗಿ ನಟಿಸಲಿರೋ ಚಿತ್ರದ ತಯಾರಿ ನಡೆದಿದ್ದ ಕಾಲವದು. ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಅದನ್ನು ನಿರ್ದೇಶನ ಮಾಡೋದು ನಿಕ್ಕಿಯಾಗಿತ್ತು. ಹೆಚ್.ಆರ್ ನಟರಾಜ್ ನಿರ್ಮಾಣ ಮಾಡಲು ತಯಾರಾಗಿದ್ದರು. ಈ ಹಂತದಲ್ಲಿ ಒಂದೊಳ್ಳೆ ಕಥೆ ರೆಡಿ ಮಾಡುವಂತೆ ಅಜಯ್ ಕುಮಾರ್ ತಮ್ಮ ಶಿಷ್ಯ ಶರತ್ ಗೆ ಸೂಚಿಸಿದ್ದರು. ಅದು ಶರತ್ ಪಾಲಿಗೆ ಬಯಸದೇ ಬಂದ ಭಾಗ್ಯ. ಹಾಗೊಂದು ಅವಕಾಶ ಬರುವ ಹೊತ್ತಿನಲ್ಲಿ ಸ್ಯಾಂಡಲ್ ವುಡ್ಡಿನಲ್ಲಿ ಡ್ರಗ್ಸ್‌ವಿಚಾರದ ಚರ್ಚೆ ನಡೆಯುತ್ತಿತ್ತು. ಬಾಲಿವುಡ್ಡಿನ ಖ್ಯಾತ ನಟನೊಬ್ಬನ ಪುತ್ರ ಡ್ರಗ್ಸ್ ಪಾರ್ಟಿ ಮಾಡಿ ತಗುಲಿಕೊಂಡಿದ್ದ. ಅದೆಲ್ಲದರಿಂದಾಗಿ ಕಥಾ ಎಳೆಯೊಂದನ್ನು ಸಿದ್ಧಪಡಿಸಿಕೊಂಡ ಶರತ್, ನಾನಾ ಮಾಹಿತಿಗಳನ್ನು ಕಲೆಹಾಕಿ, ಭೂಗತ ಜಗತ್ತು, ಡ್ರಗ್ಸ್ ಮಾಫಿಯಾ ಮತ್ತು ಪ್ರೇಮ ಕಥಾನಕದ ಸಾಲಿಡ್ ಸ್ಟೋರಿಯೊಂದನ್ನು ಸಿದ್ಧಪಡಿಸಿದ್ದರು.

ಈ ಕಥೆ ತಯಾರಾಗುವ ಪ್ರತೀ ಹಂತದಲ್ಲಿಯೂ ಅಜಯ್ ಕುಮಾರ್ ಮಾರ್ಗದರ್ಶನ ನೀಡಿದ್ದರಂತೆ. ಕಡೆಗೆ ನಿರ್ಮಾಪಕರಿಗೂ ಕೂಡಾ ಈ ಕಥೆ ಇಷ್ಟವಾದದ್ದೇ ಗನ್ಸ್ ಅಂಡ್ ರೋಸಸ್ ಚಿತ್ರಕ್ಕೆ ಚಾಲನೆ ಸಿಕ್ಕಿತ್ತು. ಈಗಾಗಲೇ ಟೀಸರಿನಲ್ಲಿ ಕಾಣಿಸಿಕೊಂಡಿರುವ ಒಂದಷ್ಟು ಅಂಶಗಳು, ಮತ್ತು ಚಿತ್ರತಂಡ ಹೇಳಿಕೊಂಡಿರುವ ವಿಚಾರಗಳ ಮೂಲಕ ಸದರಿ ಕಥನದ ಬಗ್ಗೆ ಕುತೂಹಲ ಮೂಡಿಕೊಂಡಿದೆ. ಈ ಮೂಲಕ ಕಥೆಗಾರನಾಗಿ ನೆಲೆ ಕಾಣುವ ಆಸೆ ಹೊಂದಿರುವ ಶರತ್ ಪಾಲಿಗೆ ನಿರ್ದೇಶಕನಾಗಬೇಕೆಂಬ ಕನಸಿದೆ. ಬಹುಶಃ ಆ ಕನಸಿಗೆ ಗನ್ಸ್ ಅಂಡ್ ರೋಸಸ್ ಮೂಲಕ ಮತ್ತಷ್ಟು ಬಲ ಬರೋದು ನಿಕ್ಕಿ. ಕೆಟ್ಟದ್ದು ಮಾಡೋದೇ ಫ್ಯಾಶನ್ ಆಗಿರುವ ಈ ಹೊತ್ತಿನಲ್ಲಿ ಯುವ ಸಮುದಾಯ ಯಾವ ಬಿಂದುವಿನಲ್ಲಿ ಹಾದಿ ತಪ್ಪುತ್ತಿದೆ, ಅದಕ್ಕೆ ಕಾರಣಗಳೇನು, ಅಂಥಾದ್ದರ ಹಿಂದೆ ಹೋದರೆ ಏನಾಗುತ್ತದೆ ಅನ್ನೋದನ್ನೆಲ್ಲ ಬೆರೆಸಿ, ಕಮರ್ಶಿಯಲ್ ಅಂಶಗಳು ಧಾರಾಳವಾಗಿರುವಂತೆ ಶರತ್ ಈ ಕಥೆ ಸೃಷ್ಟಿಸಿದ್ದಾರಂತೆ.

ನಿಖರವಾಗಿ ಹೇಳಬೇಕೆಂದರೆ, ಇದು ಗಟ್ಟಿ ಕಂಟೆಂಟು ಹೊಂದಿರುವ ಪಕ್ಕಾ ಕಮರ್ಶಿಯಲ್ ಚಿತ್ರ. ಈ ಮೂಲಕ ಎರಡು ವರ್ಷಗಳಿಂದ ಆವರಿಸಿಕೊಂಡಿದ್ದ ಗೊಂದಲ, ಅವಮಾನಗಳ ಪರ್ವವನ್ನು ಶರತ್ ದಾಟಿಕೊಂಡಿದ್ದಾರೆ. ಐಟಿ ಕ್ಷೇತ್ರದಲ್ಲಿನ ಒಳ್ಳೆ ಉದ್ಯೋಗ ಬಿಟ್ಟು ಸಿನಿಮಾ ಚುಂಗು ಹಿಡಿದು ಹೊರಟಿದ್ದ ಈ ಹುಡುಗನನ್ನು ಅವಮಾನಗಳು ಬಾಧಿಸಿದ್ದವು. ಊರ ಕಡೆ, ಸಂಬಂಧಿಕರ ವಲಯದಲ್ಲಿ ವಿಚಿತ್ರ ನೋಟ ಬೀರುವವರ ಸಂಖ್ಯೆ ಹೆಚ್ಚಿಕೊಂಡಿತ್ತು. ಆದರೆ, ಸಿನಿಮಾ ರಂಗದಲ್ಲಿ ಅಂದುಕೊಂಡಿದ್ದನ್ನು ಸಾಧಿಸುವ ಛಾತಿಕ ಇದ್ದ ಶರತ್ ಅದೆಲ್ಲವನ್ನೂ ಕಡೆಗಣಿಸಿ ಸಾಗಿ ಬಂದಿದ್ದರು. ರೈತಾಪಿ ಬದುಕು ಕೊಡಮಾಡಿದ ಗಟ್ಟಿತನ, ಆತ್ಮಾಭಿಮಾನ, ಸ್ವಾಭಿಮಾನಗಳನ್ನೇ ಇಂಧನವಾಗಿಸಿಕೊಂಡ ಶರತ್ ಸಿನಿಮಾ ಯಾನ ಗನ್ಸ್ ಅಂಡ್ ರೋಸಸ್ ಮೂಲಕ ಮತ್ತಷ್ಟು ವೇಗ ಪಡೆಯುವ ನಿರೀಕ್ಷೆಗಳಿವೆ.

ಕಂಪ್ಯೂಟರ್ ಸೈನ್ಸ್ ಬಿಎಸ್‌ಸಿ ಪದವಿ ಪಡೆದುಕೊಂಡಿದ್ದ ಶರತ್ ಪಾಲಿಗೆ ಸಿನಿಮಾಕ್ಕಿಂತಲೂ ತೀವ್ರವಾಗಿ ಕಾಡಿದ್ದದ್ದು ಕ್ರಿಕೆಟ್ ಆಸಕ್ತಿ. ಆ ಕನಸಿಂದಲೇ ಬಸವನಗುಡಿಯ ನ್ಯಾಷನಲ್ ಕಾಲೇಜು ಸೇರಿಕೊಂಡಿದ್ದ ಶರತ್ ಒಳ್ಳೆ ಆಟಗಾರ. ಕೆಸಿಎಗೆ ಆಡಿ ಸೈ ಅನ್ನಿಸಿಕೊಂಡರೂ, ಆಯ್ಕೆಯ ವಿಚಾರದಲ್ಲಿ ಕಣ್ಣೆದುರೇ ದೋಖಾ ನಡೆದದ್ದನ್ನು ಕಂಡು ಶರತ್ ಆಘಾತಗೊಂಡಿದ್ದರು. ಕಡೇಗೆ ಇದು ಕಾಸು, ಪ್ರಭಾವ ಇರುವವರಿಗೆ ಮಾತ್ರವೇ ಕೈಗೆಟುಕಬಹುದಾದ ಕನಸೆಂಬ ವಿಚಾರ ಅವರಿಗೆ ಸ್ಪಷ್ಟವಾಗಿತ್ತು. ನಂತರ ಕ್ರಿಕೆಟ್ಟಿನ ಜೊತೆಗೇ ಕಾಡಿದ್ದ ಸಿನಿಮಾ ಕನಸಿನ ಚುಂಗು ಹಿಡಿದು ಹೊರಟಿದ್ದ ಶರತ್ ಈಗ ಬಹುಮುಖ್ಯ ಹಂತ ತಲುಪಿಕೊಂಡಿದ್ದಾರೆ. ಗನ್ಸ್ ಅಂಡ್ ರೋಸಸ್ ಮೂಲಕ ತನ್ನ ಮುಂದಿನ ಹೆಜ್ಜೆಗಳಿಗೆ ಮತ್ತಷ್ಟು ಬಲ ಬರುವ ನಂಬಿಕೆ ಅವರಲ್ಲಿದೆ. ಅಜಯ್ ಕುಮಾರ್ ಅವರನ್ನು ಗುರು ಮತ್ತು ಗಾಡ್ ಫಾದರ್ ಅಂದುಕೊಂಡಿರುವ ಶರತ್ ಅವರ ಇಷಾರೆಯಂತೆಯೇ ಮುಂದಿನ ನಡೆ ಅನುಸರಿಸುವ ಯೋಜನೆಯಲ್ಲಿದ್ದಾರೆ.

ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ನಿರ್ಮಾಣ ಮಾಡಿರುವ ಹೆಚ್.ಆರ್ ನಟರಾಜ್ ಅಂಥಾದ್ದೊಂದು ಅವಕಾಶವನ್ನು ಕಲ್ಪಿಸಿ ಕೊಟ್ಟಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಙ್ರಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಕಥೆಗಾರನ ಜೀವನಗಾಥೆ! appeared first on Cini Shodha.