ಸಾಮಾನ್ಯವಾಗಿ ನೆಲಮೂದಲ ಕಥೆ ಹೊಂದಿರುವ ಸಿನಿಮಾ ಎಂಬ ಹೆಗ್ಗಳಿಕೆಗೆ ಅನೇಕ ಸಿನಿಮಾಗಳು ಭಾಜನವಾಗೋದಿದೆ. ಲವ್ ಸೀಸನ್ಸ್‌ನಲ್ಲಿ ನಮ್ಮೆಲ್ಲರನ್ನೂ ಅಚ್ಚರಿಗೀಡು ಮಾಡಬಲ್ಲಿ ಗಲ್ಲಿ ಗಲ್ಲಿಯ ಕಥೆಯಿದೆಯಂತೆ. ನಮ್ಮೆಲ್ಲರ ಬದುಕಿನ ಜೀವ ಬಿಂದುವಿನಂತಿರುವ ನಂಬಿಕೆಯೆಂಬ ಮಾಯೆಯ ಸುತ್ತಾ ಹೊಸೆದುಕೊಂಡಿರುವ ಗಟ್ಟಿ ಕಥೆಯನ್ನು ನವಿರು ಪ್ರೇಮದ ಮೂಲಕ ದಾಟಿಸುವ ಭಿನ್ನ ಪಥವನ್ನು ನಿರ್ದೇಶಕ ಕೃತ್ವಿಕ್ ಅನುಸರಿಸಿದ್ದಾರಂತೆ. ಈಗಾಗಲೇ ಒಂದಷ್ಟು ಸಿನಿಮಾಗಳ ಭಾಗವಾಗಿದ್ದುಕೊಂಡು, ನಿರ್ದೇಶಕನಾಗೋ ಕನಸು ಕಂಡಿದ್ದ ಕೃತ್ವಿಕ್ ಕನಸು ಈ ಚಿತ್ರದ ಮೂಲಕ ನನಸಾಗಿದೆ. ಕಥೆಯ ಕಸುವಿನ ಮೇಲೆ ನಂಬಿಕೆಯಿಟ್ಟಿರೋ ಕೃತ್ವಿಕ್, ಹೊಸಬರನ್ನೇ ಚಿತ್ರತಂಡಕ್ಕೆ ಸೇರಿಸಿಕೊಂಡು ಲವ್ ಸೀಸನ್ಸ್ ಅನ್ನು ರೂಪಿಸಿದ್ದಾರಂತೆ.

ಮಂಡ್ಯ ರಮೇಶ್ ಅವರ ನಟನಾ ಸಂಸ್ಥೆಯಲ್ಲಿ ಕೋರ್ಸ್ ಪೂರೈಸಿಕೊಂಡಿರುವ ಮುಕುಂದ ರಾಮಸ್ವಾಮಿ ಈ ಚಿತ್ರದ ಮೂಲಕ ನಾಯಕ ನಟನಾಗಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ದಿಯಾ ಕೀರ್ತಿ, ಚಂದನ ಗೌಡ ಮತ್ತು ಶ್ವೇತಾ ಕೊಗ್ಲೂರ್ ನಾಯಕಿಯರಾಗಿ ಸಾಥ್ ಕೊಟ್ಟಿದ್ದಾರೆ. ಒಂದು ಮಹತ್ತರವಾದ ಸಂದೇಶವನ್ನು ರವಾನಿಸುತ್ತಲೇ, ಈ ಜನರೇಷನ್ನಿಗೆ ಪೂರ್ತಿಯಾಗಿ ಕನೆಕ್ಟಾಗುವ, ಎಲ್ಲ ವರ್ಗದ ಪ್ರೇಕ್ಷಕರಿಗೂ ಹಿಡಿಸುವ ಸಿನಿಮಾ ಮಾಡಬೇಕೆಂಬ ತುಡಿತದೊಂದಿಗೆ ಕೃತ್ವಿಕ್ ಈ ಕಥೆಯನ್ನು ಸಿದ್ಧಪಡಿಸಿದ್ದಾರೆ. ಈಗಿನ ದಿನಮಾನದಲ್ಲಿ ನಂಬಿಕೆಯೆಂಬುದು ಅಕ್ಷರಶಃ ದುಬಾರಿಯಾಗುತ್ತಿದೆ. ಅದು ಎರಡಲಗಿನ ಕತ್ತಿಯಂತೆ ಪ್ರತಿಯೊಬ್ಬರ ಬದುಕಿನಲ್ಲೂ ವರಸೆ ಪ್ರದರ್ಶಿಸುತ್ತಿದೆ. ಅಂಥಾದ್ದೊಂದು ಸೂಕ್ಷ್ಮ ಕಥಾ ಬಿಂದುವಿನೊಂದಿಗೆ ಘಟಿಸುವ ಚೇತೋಹಾರಿ ಘಟನಾವಳಿಗಳ ಗುಚ್ಛದಂತೆ ಈ ಸಿನಿಮಾ ಮೂಡಿ ಬಂದಿದೆ ಎಂಬುದು ನಿರ್ದೇಶಕರ ಮಾತು.

ಎನ್.ಆರ್ ಸ್ಟುಡಿಯೋಸ್ ಬ್ಯಾನರಿನಡಿಯಲ್ಲಿ ಎನ್.ಆರ್ ಮಂಜುನಾಥ್ (ನೀಲೇರಿ) ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ಪ್ರೇಮ ಹೊಂದಿರೋ ಮಂಜುನಾಥ್ ಪಾಲಿಗಿದು ಮೊದಲ ಹೆಜ್ಜೆ. ಈ ಮೂಲಕ ಮತ್ತೊಂದಷ್ಟು ಹೊಸಬರಿಗೆ ಅವಕಾಶ ಕೊಡುವ ಮೂಲಕ ಅವರು ಗಮನ ಸೆಳೆದಿದ್ದಾರೆ. ಈ ಚಿತ್ರದ ಚಿತ್ರೀಕರಣ ಬೆಂಗಳೂರಿನ ಹಲವಾರು ಏರಿಯಾಗಳಲ್ಲಿ ಯಶಸ್ವಿಯಾಗಿ ನಡೆದಿದೆ. ಇನ್ನೇನು ಕೆಲ ದಿನಗಳಲ್ಲಿಯೇ ಟೀಸರ್ ಬಿಡುಗಡೆಗೊಳಿಸಲು ತಯಾರಿ ಆರಂಭವಾಗಿದೆ. ಅದರ ಬೆನ್ನಲ್ಲಿಯೇ ವೀರ್ ಸಮರ್ಥ್ ಸಂಗೀತ ಸಂಯೋಜನೆಯಲ್ಲಿ ಮೂಡಿ ಬಂದಿರುವ ಹಾಡುಗಳು ಬಿಡುಗಡೆಗೊಳ್ಳಲಿವೆ. ಕೆ.ಕಲ್ಯಾಣ್, ಪ್ರಮೋದ್ ಮರವಂತೆ ಮುಂತಾದವರು ಸಾಹಿತ್ಯ ಬರೆದಿದ್ದಾರೆ. ಅವಿನಾಶ ಶಾಸ್ತ್ರಿ ಛಾಯಾಗ್ರಹಣ, ಮಧು ತುಂಬಕೆರೆ ಸಂಕಲನ, ಭಜರಂಗಿ ಲೋಕಿ ನೃತ್ಯ ಸಂಯೋಜನೆಯಿರುವ ಈ ಚಿತ್ರದಲ್ಲಿ ಮಂಡ್ಯ ರಮೇಶ್, ರಾಜೇಶ್ ನಟರಂಗ, ಸಂಗೀತಾ ಅನಿಲ್, ಜಯತೀರ್ಥ, ಚೇತನ್ ದುರ್ಗ, ಹುಲಿ ಕಾರ್ತಿಕ್, ಬೇಬಿ ರಿತು ಸಿಂಗ್ ಮುಂತಾದವರ ತಾರಾಗಣ ಈ ಚಿತ್ರದಲ್ಲಿದೆ.

keywords: love seasons movie, kruthvik, nr manjunatha, mandya ramesh, sandalwood

The post Love Seasons Movie: ಪ್ರೇಮದ ಪರಿಧಿಯಲ್ಲೊಂದು ವಿಶಿಷ್ಟ ಕಥನ! appeared first on Cini Shodha.

ಒಮ್ಮೊಮ್ಮೆ ಮಹತ್ತರವಾದದ್ದು ಘಟಿಸಲು ವರ್ಷಗಟ್ಟಲೆ ಕಾಯಬೇಕಾಗುತ್ತೆ. ಅಂಥಾದ್ದೊಂದು ತಪನೆ ಹೊಂದಿದ್ದ ಲೂಸ್ ಮಾದ ಯೋಗಿಗೆ ಐವತ್ತನೇ ಚಿತ್ರದ ಮೂಲಕ ಅಂಥಾದ್ದೊಂದು ಅಮೂರ್ಥ ಘಳಿಗೆ ಹತ್ತಿರವಾಗಿದೆಯಾ? ಸದ್ಯ ಕಿಂಗ್ ಸುತ್ತಾ ಹಬ್ಬಿಕೊಂಡಿರುವ ಪಾಸಿಟಿವ್ ಪ್ರಭೆ ಹೌದೆಂಬಂಥಾ ಉತ್ತರವನ್ನೇ ಧ್ವನಿಸುತ್ತಿದೆ. ಜಾಕ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಈ ಸಿನಿಮಾದ ಟೀಸರ್ ಕಂಡವರೆಲ್ಲ ಅಕ್ಷರಶಃ ಥ್ರಿಲ್ ಆಗಿದ್ದಾರೆ. ಈ ಕಾಲಮಾನಕ್ಕೆ ತಕ್ಕಂಥಾ, ವಿಭಿನ್ನ ಕಥಾನಕವನ್ನೊಳಗೊಂಡಿರುವ ಲಕ್ಷಣದ ಈ ಟೀಸರ್ ಅದ್ದೂರಿ ಮೇಕಿಂಗ್‌ನ ಸುಳಿವನ್ನೂ ಬಿಟ್ಟು ಕೊಟ್ಟಿದೆ. ಯೋಗಿಯ ಗೆಟಪ್ಪು ಕೂಡಾ ಸಿನಿಮಾಸಕ್ತರನ್ನು ಬೆರಗಾಗಿಸಿದೆ. ಒಟ್ಟಾರೆಯಾಗಿ ಐವತ್ತನೇ ಚಿತ್ರದ ಮೂಲಕ ಯೋಗಿಯ ವೃತ್ತಿಬದುಕಿಗೆ ಮತ್ತಷ್ಟು ಓಘ ಸಿಗುವ ಲಕ್ಷಣಗಳೇ ದಟ್ಟವಾಗಿವೆ.

ಸಾಮಾನ್ಯವಾಗಿ ಯಾವುದೇ ನಟ ಒಂದು ಪಾತ್ರದ ಮೂಲಕ ಸದ್ದು ಮಾಡಿದರೆ, ಅಂಥಾ ಛಾಯೆಯ ಪಾತ್ರಗಳನ್ನೇ ಸೃಷ್ಟಿಸುತ್ತಾ, ಪ್ರೇಕ್ಷಕರಲ್ಲಿ ರೇಜಿಗೆ ಹುಟ್ಟಿಸುವ ಪ್ರಯತ್ನಗಳು ನಡೆಯುತ್ತವೆ. ಒಂದು ಹಂತದಲ್ಲಿ ಯೋಗಿ ಕೂಡಾ ಅಂಥಾದ್ದೊಂದು ಏಕತಾನತೆಯನ್ನು ಅನುಭವಿಸುವಂತಾಗಿತ್ತು. ಈ ನಡುವೆ ಯೋಗಿ ಅಭಿನಯದ ಸಾಲು ಸಾಲು ಸಿನಿಮಾಗಳು ತೆರೆಗಂಡರೂ ಕೂಡಾ ಗೆಲುವು ಸಿಕ್ಕಿದ್ದು ಕೆಲವೇ ಕೆಲವು ಚಿತ್ರಗಳಿಗೆ ಮಾತ್ರ. ಒಮ್ಮೊಮ್ಮೆ ತನ್ನ ಇಮೇಜಿನಾಚೆಯ ಪಾತ್ರಗಳಲ್ಲಿ ಯೋಗಿ ಮಿಂಚಿದರೆ, ಮತ್ತೆ ಕೆಲ ಘಟ್ಟಗಳಲ್ಲಿ ಮತ್ತದೇ ಕಲಸುಮೇಲೋಗರ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದರು. ಇದೆಲ್ಲದರ ನಡುವೆ ಒಂದಷ್ಟು ಕಾಲ ಅಜ್ಞಾತವಾಸಿಯಾಗಿದ್ದ ಯೋಗಿ, ಇತ್ತೀಚಿನ ದಿನಗಳಲ್ಲಿ ಪ್ರೌಢ ವ್ಯಕ್ತಿತ್ವದೊಂದಿಗೆ ಬೆರಗು ಮೂಡಿಸುತ್ತಿದ್ದಾರೆ. ಇದರ ನಡುವೆಯೇ ಒಂದಷ್ಟು ಪ್ರಯತ್ನಗಳಲ್ಲಿ ಭಾಗಿಯಾಗಿದ್ದ ಯೋಗಿ ಪಾಲಿಗೆ ಕಿಂಗ್ ವರವಾಗಿ ಸಿಕ್ಕಂತಿದೆ. ಈ ಸಿನಿಮಾ ನಿರೀಕ್ಷೆಗೆ ತಕ್ಕಂತೆ ರೂಪುಗೊಂಡರೆ, ಯೋಗಿಯ ವೃತ್ತಿ ಬದುಕು ಮತ್ತೊಂದು ಎತ್ತರಕ್ಕೆ ತಲುಪೋದರಲ್ಲಿ ಯಾವ ಅಚ್ಚರಿಯೂ ಇಲ್ಲ!

keywords: loose mada yogi, king, sandalwood, loose mada

The post Loose Mada Yogi: ಏಳುಬೀಳಿನ ಹಾದಿಯಲ್ಲಿ ಅಚಾನಕ್ಕಾಗಿ ಮಿಣುಕಿದ ಕಂದೀಲು! appeared first on Cini Shodha.

ನಿರ್ದೇಶಕ ಶಕ್ತಿ ಪ್ರಸಾದ್ ಈ ಚಿತ್ರದ ಕಥೆಯನ್ನು ಸಿದ್ಧಪಡಿಸಿಕೊಂಡು, ಬಹುತೇಕ ಎಲ್ಲ ಭಾಷೆಗಳ ನಿರ್ಮಾಪಕರುಗಳಿಗೂ ಒಂದೊಂದು ಸುತ್ತು ಕಥೆ ಹೇಳಿದ್ದರಂತೆ. ಹಾಗೆ ಕಥೆ ಸಿದ್ಧಪಡಿಸಿಕೊಂಡಿದ್ದ ಶಕ್ತಿ ಪ್ರಸಾದ್‌ಗೆ ಅದರ ಪ್ರಧಾನ ಪಾತ್ರವನ್ನು ಚೈತ್ರ ಆಚಾರ್ ಮಾಡಬೇಕೆಂಬ ಆಸೆ ಹೊಂದಿದ್ದಂತೆ. ಆ ಬಳಿಕ ಶಕ್ತಿ ಪ್ರಸಾದ್ ಚೈತ್ರಾರನ್ನು ಸಂಪರ್ಕಿಸಿ ಕಥೆ ಹೇಳಿದಾಕ್ಷಣವೇ ಥ್ರಿಲ್ ಆಗಿ ಒಪ್ಪಿಗೆ ಸೂಚಿದ್ದರಂತೆ. ಹೀಗೆ ಸದರಿ ಕಥೆಯನ್ನು ಚೈತ್ರಾ ಕೇಳಿದ್ದು ವರ್ಷದ ಹಿಂದೆ. ಆ ನಂತರ ನಿರಂತರವಾಗಿ ಒಟ್ಟಾರೆ ಸಿನಿಮಾದ ಪೂರ್ವಭಾವಿ ತಯಾಠರಿಯಲ್ಲಿ ಖುದ್ದು ಚೈತ್ರಾ ಭಾಗಿಯಾಗಿದ್ದರು. ಅಂಥಾ ನಿರಂತರ ಧ್ಯಾನವೀಗ ಲೈಲಾಸ್ ಸ್ವೀಟ್ ಡ್ರೀಮ್ಸ್ ಚಿತ್ರದ ಮೂಲಕ ನಿರ್ಣಾಯಕ ಘಟ್ಟ ತಲುಪಿಕೊಂಡಿದೆ.

Chaithra Achar: ಫೌಜಿ ಪೋಸ್ಟರ್‌ನಲ್ಲಿ ಪೌರ್ಣಮಿಯ ಫೋಟೋ!

ನಿರ್ದೇಶಕ ಶಕ್ತಿ ಪ್ರಸಾದ್ ಪಾಲಿಗಿದು ಚೊಚ್ಚಲ ಸಿನಿಮಾ. ಈ ಕಥೆಯನ್ನು ಬೇರೆ ಬೇರೆ ನಿರ್ಮಾಪಕರಿಗೆ ಹೇಳಿದ್ದಾಗ ಅವರೆಲ್ಲರೂ ತಂತಮ್ಮ ಭಾಷೆಯಲ್ಲಿಯೇ ಸಿನಿಮಾ ಮಾಡಬೇಕೆಂದು ಕೇಳಿಕೊಂಡಿದ್ದರಂತೆ. ಆದರೆ, ಕನ್ನಡತಿ ಚೈತ್ರಾ ಆಸಾರ್ ಮುಖ್ಯಭೂಮಿಕೆಯಲ್ಲಿರೋ ಈ ಚಿತ್ರ ಕನ್ನಡದಲ್ಲಿಯೇ ಸಿದ್ಧಗೊಳ್ಳಬೇಕೆಂಬ ಇಂಗಿತವನ್ನು ಶಕ್ತಿ ಪ್ರಸಾದ್ ಸಾಧ್ಯವಾಗಿಸಿಕೊಂಡಿದ್ದಾರೆ. ಸದ್ಯದ ಮಟ್ಟಿಗೆ ಇವಿಷ್ಟು ವಿಚಾರಗಳನ್ನು ಚಿತ್ರತಂಡ ಹಂಚಿಕೊಂಡಿದೆ. ಟೈಟಲ್ ಮೂಲಕವೇ ವಿಶೇಷ ಆಸಕ್ತಿ ಹುಟ್ಟಿಸಿರೋ ಲೈಲಾಸ್ ಸ್ವೀಟ್ ಡ್ರೀಮ್ಸ್‌ನಲ್ಲಿ ಖ್ಯಾತ ಗಾಯಕಿ ಎಚಿಡಿ ಪಲ್ಲವಿ ನಾಯಕಿಯ ತಾಯಿಯ ಪಾತ್ರವನ್ನು ನಿರ್ವಹಿಸಿದ್ದಾರೆ. ಅವಿನಾಶ್ ಕೂಡಾ ಪ್ರಧಾನ ಪಾತ್ರಕ್ಕೆ ಜೀವ ತುಂಬಲಿದ್ದಾರೆ. ಮಿಕ್ಕುಳಿದ ಮಾಹಿತಿಗಳು ಇಷ್ಟರಲ್ಲಿಯೇ ಜಾಹೀರಾಗಲಿವೆ.

The post Chaithra Achar New Movie : ಭಿನ್ನ ಬಗೆಯ ಪಾತ್ರದಲ್ಲಿ ಮಿಂಚಲಣಿಯಾದ ಚೈತ್ರಾ! appeared first on Cini Shodha.

ಪೂರ್ಣಚಂದ್ರ ತೇಜಸ್ವಿ ಅವರ ಕಾದಂಬರಿಗಳು ಸಿನಿಮಾ ರೂಪ ಧರಿಸಬೇಕೆಂಬುದು ಅವರ ಓದುಗರೆಲ್ಲರ ಬಯಕೆ. ಅದು ಆಗಾಗ ಸಾಕಾರಗೊಳ್ಳುತ್ತಾ ಬಂದಿತ್ತು. ಇತ್ತೀಚೆಗಷ್ಟೇ ಡೇರ್ ಡೆವಿಲ್ ಮುಸ್ತಫಾ ಅಂತೊಂದು ಸಿನಿಮಾ ತೆರೆಗಂಡು ಮೆಚ್ಚುಗೆ ಗಳಿಸಿಕೊಂಡಿತ್ತು. ಹೀಗೆ ತೇಜಸ್ವಿ ಕಥನಗಳು ದೃಷ್ಯ ರೂಪ ಧರಿಸಬೇಕೆಂಬ ಇಂಗಿತ ಹೊಂ ದಿದ್ದವರ ಪ್ರಧಾನ ಆಯ್ಕೆಯಾಗಿದ್ದದ್ದು ಜಗಾರಿ ಕ್ರಾಸ್. ಇದೀಗ ಗುರುದತ್ ಗಾಣಿಗ ಅದನ್ನೇ ಕೈಗೆತ್ತಿಕೊಂಡಿದ್ದಾರೆ. ಅದರಲ್ಲಿನ ಮುಖ್ಯ ಪಾತ್ರವನ್ನು ರಾಜ್ ಬಿ ಶೆಟ್ಟಿ ನಿರ್ವಹಿಸಲಿದ್ದಾರೆಂಬ ಮಾಹಿತಿಯೂ ಹೊರಬಿದ್ದಿದೆ. ಸದ್ಯದ ಮಟ್ಟಿಗೆ ಸಾಹಿತ್ಯ ಕ್ಷೇತ್ರದಲ್ಲಿಯೂ ಗುರುದತ್ ಸಾಹಸದ ಬಗೆಗಿನ ಚರ್ಚೆಗಳು ಕಾವುಗಟ್ಟಿಕೊಂಡಿವೆ.

ಯಾವುದೇ ಕಥೆ, ಕಾದಂಬರಿಗಳನ್ನು ಸಿನಿಮಾ ಚೌಕಟ್ಟಿಗೆ ಒಗ್ಗಿಸೋದು ತ್ರಾಸದಾಯಕ ಕೆಲಸ. ಅದರಲ್ಲಿಯೂ ತೇಜಸ್ವಿ ಕಥನಗಳು ಮತ್ತೊಂದಷ್ಟು ಸವಾಲುಗಳನ್ನೊಡ್ಡುತ್ತವೆ. ಅದರಲ್ಲಿಯೂ ಪಕ್ಕಾ ಕಮರ್ಶಿಯಲ್ ಧಾಟಿಯಲ್ಲಿ ಗುರುದತ್ ಜುಗಾರಿ ಕ್ರಾಸ್‌ಗೆ ದೃಷ್ಯರೂಪ ಕೊಡಲು ಮುಂದಾಗಿದ್ದಾರೆ. ಸದ್ಯದ ಮಟ್ಟಿಗೆ ಕರಾವಳಿ ಅಂತೊಂದು ನ ಎಲಮೂಲದ ಕಥೆಯನ್ನು ಆತ ನಿರ್ದೇಶನ ಮಾಡುತ್ತಿದ್ದಾರೆ. ಅದರ ಬೆನ್ನಲ್ಲಿಯೇ ಜುಗಾರಿ ಕ್ರಾಸ್ಗೆ ಚಾಲನೆ ಸಿಕ್ಕಿದೆ. ಇಂಥಾ ಘಳಿಗೆಯಲ್ಲಿ ಗುರುದತ್‌ಗೆ ಜುಗಾರಿ ಕ್ರಾಸ್ ಅನ್ನು ದೃಷ್ಯದಲ್ಲಿ ಸಮರ್ಥವಾಗಿ ಹಿಡಿಕದಿಡುವ ಛಾತಿ ಇದೆಯಾ ಎಂಬ ದಿಕ್ಕಿನಲ್ಲಿಯೂ ಚರ್ಚೆಗಳು ನಡೆಯುತ್ತಿವೆ. ಒಂದು ವೇಳೆ ಈ ಹುಡುಗ ಪರಿಣಾಮಕಾರಿಯಾಗಿ ನಿರ್ದೇಶನ ಮಾಡಿದರೆ ಜುಗಾರಿ ಕ್ರಾಸ್ ದಾಖಲೆ ಸೃಷ್ಟಿಸಬಹುದಾದ ಎಲ್ಲ ಸಾಧ್ಯತೆಗಳೂ ನಿಚ್ಚಳವಾಗಿವೆ!

The post Jugari Cross Movi: ಮತ್ತೆ ಪೂರ್ಣಚಂದ್ರ ತೇಜಸ್ವಿ ಮ್ಯಾಜಿಕ್! appeared first on Cini Shodha.

ಎಂಥಾ ಪಾತ್ರಗಳನ್ನಾದರೂ ಮಾಡಬಲ್ಲ ಕಸುವಿದ್ದರೂ ಕೂಡಾ, ಈಗಿನ ಜಮಾನದಲ್ಲಿ ಬೇಕಿರೋದು ಕಮರ್ಶಿಯಲ್ ಸಿನಿಮಾಗಳಲ್ಲಿನ ಗೆಲುವು. ಈ ಕಾರಣದಿಂದಲೇ ಅನೇಕ ನಟರು ಬೇರ್‍ಯಾವ ಬಗೆಯ ಪಾತ್ರಗಳು, ಸಿನಿಮಾಗಳತ್ತಲೂ ಲಕ್ಷ್ಯ ವಹಿಸೋದಿಲ್ಲ. ಆದರೆ, ಧನಂಜಯ್ ಮಾತ್ರ ಅಚ್ಚರಿದಾಯಕ ನಿರ್ಧಾರಗಳನ್ನು ಕೈಗೊಳ್ಳುತ್ತಿದ್ದಾರೆ. ಅದರ ಭಾಗವಾಗಿಯೇ ಈಗ ಸ್ವಾತಂತ್ರ್ಯ ಸಂಗ್ರಾಮದ ಸಂದರ್ಭದಲ್ಲಿ ಬ್ರಟೀಶರ ವಿರುದ್ಧ ಸಿಡಿದೆದ್ದಿದ್ದ ಬೇಡ ಸಮುದಾಯದ ನಾಯಕನ ಪಾತ್ರವನ್ನು ಒಪ್ಪಿಕೊಂಡಿದ್ದಾರೆ. ಅವರು ನಟಿಸುತ್ತಿರೋ ಐತಿಹಾಸಿಕ ಹಲಗಲಿ ಚಿತ್ರದ ಫಸ್ಟ್ ಲುಕ್ ಸ್ವಾತಂತ್ರ್ಯೋತ್ಸವದ ಸಂದರ್ಭದಲ್ಲಿ ಬಿಡುಗಡೆಗೊಂಡಿದೆ.

ಸ್ವಾತಂತ್ರೋತ್ತರ ಭಾರತದಲ್ಲಿ ಇಲ್ಲಿನ ನಾನಾ ಭಾಗಗಳ ವೀರರು ಬ್ರಟೀಶ್ ದಬ್ಬಾಳಿಕೆಯ ವಿರುದ್ಧ ಸಿಡಿದೆದ್ದಿದ್ದರು. ಅಂಥಾ ನೂರಾರು ಸಂಗ್ರಾಮಗಳ ಒಟ್ಟು ಮೊತ್ತವಾಗಿಯೇ ಭಾರತಕ್ಕೆ ಸ್ವಾತಂತ್ರ್ಯ ಸಿಕ್ಕಿದೆ. ಅದರಲ್ಲಿ ನಮ್ಮ ನೆಲವಾದ ಹಲಗಲಿಯ ಹೋರಾಟವೂ ಪ್ರಧಾನವಾಗಿ ಸೇರಿಕೊಳ್ಳುತ್ತದೆ. ಇಂಥಾ ವೀರಸೇನಾನಿಗಳ ಕಥೆಯನ್ನು ಸುಕೇಶ್ ಡಿ.ಕೆ ನಿರ್ದೇಶನ ಮಾಡಲಿದ್ದಾರೆ. ಒಂದೊಳ್ಳೆ ತಂಡವೇ ಇಲ್ಲಿ ಜಮಾವಣೆಗೊಂಡಿದೆ. ನಮ್ಮ ನೆಲದಲ್ಲಿ ಘಟಿಸಿದ್ದ ಹಲಗಲಿಯ ಬೇಡರ ಹೋರಾಟದ ಕಥನವನ್ನು ಅದ್ದೂರಿಯಾಗಿ ಮರುಸೃಷ್ಟಿಸಲಾಗುತ್ತಿದೆ. ಈ ಮೂಲಕ ದೇಶಪ್ರೇಮದ ತಂರಂಗಗಳನ್ನು ಹಬ್ಬಿಸಲಿರುವ ಹಲಗಲಿಯ ಮತ್ತೊಂದಷ್ಟು ವಿಚಾರಗಳು ಇಷ್ಟರಲ್ಲಿಯೇ ಜಾಹೀರಾಗಲಿವೆ.

The post halagali movie daali dhananjay: ಇದು ಬ್ರಿಟೀಶರ ವಿರುದ್ಧ ಬಂಡೆದ್ದ ವೀರರ ಕಥನ! appeared first on Cini Shodha.

ಯಾವುದೇ ಸಿನಿಮಾದ ಕಥೆಯ ಘಟ್ಟದಲ್ಲಿಯೇ ಆಯಾ ಪಾತ್ರಗಳಿಗೆ ಇಂತಿಂಥಾ ಕಲಾವಿದರೇ ಸೂಕ್ತ ಅಂತೊಂದು ನಿರ್ಧಾರ ಗಟ್ಟಿಗೊಂಡಿರುತ್ತದೆ. ಆದರೆ, ಗೆಲ್ಲುವ ಛಲದೊಂದಿಗೆ ಯಾವುದೂ ನಿಖರವಾಗಿರದ ದಿನಗಳಲ್ಲಿ ಈ ಕಥೆ ಸಿದ್ಧಪಡಿಸಿದ್ದ ಅಭಿಜಿತ್ ಪಾಲಿಗೆ ಅಂಥಾ ಅವಕಾಶವೇನೂ ಇರಲಿಲ್ಲ. ಆದರೆ, ಈ ಕಥೆಯ ಬಹುಮುಖ್ಯ ತಿರುವಿನ ಪಾತ್ರವೊಂದಕ್ಕೆ ಮಾತ್ರ ಹರಿಣಿ ಶ್ರೀಕಾಂತ್ ಅವರೇ ಜೀವ ತುಂಬಿದರೆ ಸೂಕ್ತ ಎಂಬ ನಿರ್ಧಾರ ಅವರೊಳಗೆ ಊಟೆಯೊಡೆದಿತ್ತು. ನಂತರ ಕಥೆಯೆಲ್ಲ ರೆಡಿಯಾಗಿ, ನಿರ್ಮಾಪಕರಾದ ವಿ.ಜಿ ಮಂಜುನಾಥ್ ಅವರ ಕಡೆಯಿಂದಲೂ ಗ್ರೀನ್ ಸಿಗ್ನಲ್ ಬಂದ ನಂತರ ಅಭಿಜಿತ್ ಹರಿಣಿಯವರನ್ನು ಈ ಪಾತ್ರಕ್ಕಾಗಿ ಸಂಪರ್ಕಿಸಿ, ವಿವರಿಸಿದ್ದರಂತೆ.

ಒಟ್ಟಾರೆ ಕಥೆ ಮತ್ತು ಆ ಪಾತ್ರದ ಚಹರೆ ತಿಳಿಯುತ್ತಲೇ ಹರಿಣಿ ಶ್ರೀಕಾಂತ್ ಕೂಡಾ ಒಪ್ಪಿಗೆ ಸೂಚಿಸಿದ್ದರು. ಆ ನಂತರ ಚಿತರ್ರೀಕರಣದಲ್ಲಿ ಭಾಗಿಯಾದ ಹರಿಣಿ ಪಾಲಿಗೆ ಅಮೋಘವಾದ ಅನುಭವ ದಕ್ಕಿದೆ. ಆ ಪಾತ್ರದ ಬಗ್ಗೆ ಇದುವರೆಗೂ ಚಿತ್ರತಂಡ ಹೆಚ್ಚೇನೂ ಹೇಳಿಕೊಂಡಿಲ್ಲ. ಹರಿಣಿಯವರ ಕಡೆಯಿಂದಲೂ ರಹಸ್ಯ ಬಯಲಾಗಿಲ್ಲ. ಅದರರ್ಥವೇನೆಂದರೆ, ಆ ಪಾತ್ರದಲ್ಲಿ ಈ ಕಥೆಯ ಬಹುಮುಖ್ಯ ತಿರುವುಗಳಿದ್ದಾವೆ. ಅದರ ಕೆಲ ಚಹರೆಗಳನ್ನ ಗಮನಿಸಿದರೆ, ಈ ಕಥೆಗೆ ಮತ್ಯಾವುದೋ ಕಾಲಘಟ್ಟದ ಕೊಂಡಿಯೊಂದು ಬೆಸೆದುಕೊಂಡಿರೋದೂ ಪಕ್ಕಾ ಆಗುತ್ತದೆ. ಹರಿಣಿ ಅವರು ನಿಭಾಯಿಸಿರುವ ಪಾತ್ರ ಯಾವುದು? ಅದರ ಕಿಮ್ಮತ್ತೇನೆಂಬ ಪ್ರಶ್ನೆಗಳಿಗೆ ಈ ರಾತ್ರಿ ಕರಗಿ, ಮುಂಜಾವು ಅರಳುತ್ತಲೇ ನಿಖರ ಉತ್ತರ ಸಿಗಲಿದೆ.

ಸೀರಿಯಲ್ಲುಗಳ ಮೂಲಕ ಅಪಾರ ಜನಪ್ರಿಯತೆ ಪಡೆದುಕೊಂಡಿರೋ ಹರಿಣಿ ಶ್ರೀಕಾಂತ್, ಕೆಲ ರಿಯಾಲಿಟಿ ಶೋ ಮೂಲಕವೂಊ ಕಿರುತೆರೆ ಪ್ರೇಕ್ಷಕರ ಮನ ಗೆದ್ದಿದ್ದಾರೆ. ಹಾಗಂತ ಹಿರಿತೆರೆ ಪ್ರೇಕ್ಷಕರಿಗೆ ಹರಿಣಿ ಶ್ರೀಕಾಂತ್ ಅಪರಿಚಿತರು ಅಂದುಕೊಳ್ಳುವಂತಿಲ್ಲ. ಸಿನಿಮಾಗಳಲ್ಲಿಯೂ ಥರ ಥರದ ಪಾತ್ರ ಮಾಡುವ ಮೂಲಕ ಅವರು ಗೆದ್ದಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಒಂದಷ್ಟು ಭಿನ್ನ ಪಾತ್ರಗಳ ಮೂಲಕ ಗಮನ ಸೆಳೆದುಕೊಂಡಿದ್ದಾರೆ. ಅಪಾಯವಿದೆ ಎಚ್ಚರಿಕೆ ಚಿತ್ರದ ಪಾತ್ರ ಅವರ ವೃತ್ತಿ ಬದುಕಿನಲ್ಲಿ ಮತ್ತೊದು ಮೈಲಿಗಲ್ಲಾಗೋ ಸಾಧ್ಯತೆಗಳಿದ್ದಾವೆ. ವಿ.ಜಿ ಮಂಜುನಾಥ್ ಮತ್ತು ಪೂರ್ಣಿಮಾ ಎಂ. ಗೌಡ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸುನಾದ್ ಗೌತಮ್ ಛಾಯಾಗ್ರಹಣ ಮತ್ತು ಸಂಗೀತ ನಿರ್ದೇಶನ, ಗುರುಪ್ರಸಾದ್ ಸಹ ನಿರ್ದೇಶನ, ಹರ್ಶಿತ್ ಪ್ರಭು ಸಂಕಲನ, ವಿಕಾಸ್ ಉತ್ತಯ್ಯ, ರಾಧಾ ಭಗವತಿ, ರಾಘವ್ ಕೊಡಚಾದ್ರಿ, ಮಿಥುನ್ ತೀರ್ಥಹಳ್ಳಿ, ಹರಿಣಿ ಶ್ರೀಕಾಂತ್ ಮುಂತಾದವರ ತಾರಾಗಣವಿದೆ.

The post apayavide eccharike movie: ಅಪಾಯವಿದೆ ಎಚ್ಚರಿಕೆ ಬಗ್ಗೆ ಹರಿಣಿ ಶ್ರೀಕಾಂತ್ ಹೇಳಿದ್ದಿಷ್ಟು! appeared first on Cini Shodha.

ಕಿರುತೆರೆಯಲ್ಲಿ ಭಾರೀ ಪ್ರಸಿದ್ಧಿ ಪಡೆದುಕೊಂಡಿರುವ ರಾಮಾಚಾರಿ ಸೀರಿಯಲ್ ರಾಧಾ ಭಗವತಿಗೆ ಜನಪ್ರಿಯತೆ ತಂದುಕೊಟ್ಟಿತ್ತು. ಅದರಲ್ಲಿ ರಾಮಾಚಾರಿಯ ತಂಗಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಅವರು, ಇತ್ತೀಚೆಗಷ್ಟೇ ಬೇರೆ ಕನಸುಗಳ ಬೆಂಬತ್ತಿ ಆ ಪಾತ್ರದಿಂದ ಹೊರ ಬಂದಿದ್ದರು. ಈಗ ಭಾರ್ಗವಿ ಎಲ್ ಎಲ್ ಬಿ ಎಂಬ ಹೊಸಾ ಸೀರಿಯಲ್ ಮೂಲಕ ಕಿರುತೆರೆಯಲ್ಲಿ ನಾಯಕಿಯಾಗಿಯೂ ಬಡ್ತಿ ಪಡೆದುಕೊಂಡಿದ್ದಾರೆ. ಇಂಥಾ ಭಾರ್ಗವಿಗೆ ಅಪಾಯವಿದೆ ಎಚ್ಚರಿಕೆ ಚಿತ್ರದ ನಾಯಕಿಯ ಪಾತ್ರ ಒಲಿದು ಬಂದಿದ್ದು ಆಡಿಷನ್ ಮೂಲಕ. ಈ ಸಿನಿಮಾಗಾಗಿನ ಆಡಿಷನ್ ನಡೆಯುತ್ತಿರೋ ವಿಚಾರವನ್ನ ಸ್ನೇಹಿತನಿಂದ ತಿಳಿದುಕೊಂಡಿದ್ದ ರಾಧಾ, ಕೂಡಲೆ ನಿರ್ದೇಶಕರನ್ನು ಸಂಪರ್ಕಿಸಿದ್ದರಂತೆ.

ಬಳಿಕ ಆಡಿಷನ್ನಿನಲ್ಲಿ ಪಾಲ್ಗೊಂಡಿದ್ದ ರಾಧಾಗೆ ತಿಂಗಳ ನಂತರ ಆಯ್ಕೆಯಾಗಿರುವ ವಿಚಾರ ರವಾನೆಯಾಗಿತ್ತು. ಆ ನಂತರ ಸದರಿ ಪಾತ್ರಕ್ಕಾಗಿ ನಿರ್ದೇಶಕ ಅಭಿಜಿತ್ ತೀರ್ಥಹಳ್ಳಿ ಅತ್ಯಂತ ವ್ಯವಸ್ಥಿತವಾಗಿ ರಿಹರ್ಸಲ್ ನಡೆಸಿದ್ದರಂತೆ. ಅದರ ಮೂಲಕ ಪಾತ್ರವನ್ನು ಒಳಗಿಳಿಸಿಕೊಂಡಿದ್ದ ರಾಧಾ ತುಂಬು ಖುಷಿಯಿಂದಲೇ ಚಿತ್ರೀಕರಣದಲ್ಲಿ ಭಾಗಿಯಾಗಿದ್ದಾರೆ. ಟ್ರೈಲರಿನಲ್ಲಿ ಕಾಣಿಸಿರುವ ಪ್ರಕಾರ ಹಾಗೂ ಚಿತ್ರತಂಡ ಬಿಚ್ಚಿಟ್ಟಿರುವ ಒಂದಷ್ಟು ವಿಚಾರಗಳ ಆಧಾರದಲ್ಲಿ ಹೇಳೋದಾದರೆ ಈ ಸಿನಿಮಾದ ಕಥೆ ಕಾಡಿನ ಗರ್ಭದಲ್ಲಿ ಘಟಿಸುತ್ತದೆ. ಆದರೆ, ರಾಧಾ ಭಗವತಿ ಕಾಡಿನಾಚೆಗೆ ಹಬ್ಬಿಕೊಂಡಿರುವ ಪಾತ್ರವಾಗಿ ಕಾಣಿಸಿಕೊಂಡಿದ್ದಾರಂತೆ. ಅಲ್ಲಿಗೆ ಕಾಡ ಗರ್ಭದ ಕಥೆಗೆ ನಾಡಿನ ಕನೆಕ್ಷನ್ನಿರೋದು ಪಕ್ಕಾ ಆದಂತಾಗಿದೆ.  

ಒಟ್ಟಾರೆಯಾಗಿ ರಾಧಾ ಭಗವತಿಗೆ ಈ ಪಾತ್ರದ ಮೂಲಕ ಪ್ರೇಕ್ಷಕರನ್ನು ಸೆಳೆದುಕೊಳ್ಳತ್ತೇನೆಂಬ ಗಾಢವಾದ ನಂಬಿಕೆ ಇದೆ. ಅಚಾನಕ್ಕಾಗಿ ಗಟ್ಟಿ ಕಥನದ ಈ ಅಪರೂಪದ ಸಿನಿಮಾದಲ್ಲಿ ನಾಯಕಿಯಾಗೋ ಅವಕಾಶ ಸಿಕ್ಕಿದ್ದರ ಬಗ್ಗೆ ಥ್ರಿಲ್ ಕೂಡಾ ಇದೆ. ಇಂಥಾ ರಾಧಾ ಭಗವತಿ ಆರಂಭ ಕಾಲದಿಂದಲೂ ಗಾಯಕಿಯಾಗಬೇಕೆಂಬ ಕನಸು ಹೊಂದಿದ್ದವರು. ಆ ದಿಸೆಯಲ್ಲಿ ಒಂದಷ್ಟು ಪ್ರಯತ್ನ ಪಟ್ಟಿದ್ದ ಅವರಿಗೆ ನಟಿಯಾಗೋ ಅವಕಾಶ ತಾನೇ ತಾನಾಗಿ ಒಲಿದು ಬಂದಿತ್ತು. ಅವರ ಪಾಲಿಗೆ ಬಹು ದೊಡ್ಡ ಮಟ್ಟದಲ್ಲಿ ಜನಪ್ರಿಯತೆ ತಂದು ಕೊಟ್ಟಿದ್ದದ್ದು ರಾಮಾಚಾರಿ ಸೀರಿಯಲ್ಲಿನ ತಂಗಿ ಪಾತ್ರ. ಇದುವರೆಗೂ ಆ ಪಾತ್ರದಿಂದಲೇ ಅವರಿಗೆ ಅಪಾರ ಪ್ರಮಾಣದಲ್‌ಲಿ ಪ್ರೀತಿ ಸಿಕ್ಕಿದೆ. ಮುಂದಿನ ದಿನಗಳಲ್ಲಿ ಅಪಾಯವಿದೆ ಎಚ್ಚರಿಕೆ ಚಿತ್ರದ ಪಾತ್ರದ ಮೂಲಕವೇ ಆಕೆ ಗುರುತಿಸಿಕೊಳ್ಳುವಂತಾಗೋದು ಗ್ಯಾರೆಂಟಿ.

The post apayavide eccharike movie: ಕಾಡ ಗರ್ಭದ ಕಥೆಗಿದೆಯಾ ಸಿಟಿಯ ಕನೆಕ್ಷನ್ನು? appeared first on Cini Shodha.

ಹೊಸಬರು ಸಿನಿಮಾ ರಂಗಕ್ಕೆ ಆಗಮಿಸೋದು ಚಿತ್ರರಂಗದ ಏಳಿಗೆಯ ದೃಷ್ಟಿಯಿಂದ ಅವಶ್ಯಕ ವಿದ್ಯಮಾನ. ಆದರೆ, ಹೊಸಾ ತಂಡವನ್ನು ನೆಚ್ಚಿಕೊಂಡು ಕೋಟಿ ಕೋಟಿ ಪಣಕ್ಕಿಡಲು ಹಿಂಜರಿಕೆ ಹೊಂದಿರುವವರೇ ಹೆಚ್ಚು. ಅಂಥವರ ನಡುವೆ ಕೆಲ ನಿರ್ಮಾಪಕರು ಲಾಭ ನಷ್ಟದ ಗೋಜಿಗೆ ಹೋಗದೆ ಹೊಸಬರನ್ನು ಬೆನ್ತಟ್ಟಿ ಪ್ರೋತ್ಸಾಹಿಸೋದೂ ಇದೆ. ನಿಸ್ಸಂದೇಹವಾಗಿ ಆ ಸಾಲಿಗೆ ಸೇರ್ಪಡೆಗೊಳ್ಳುವವರು ವಿ.ಜಿ ಮಂಜುನಾಥ್. ಮೂಲತಃ ಮಂಡ್ಯ ಜಿಲ್ಲೆ ನಾಗಮಂಗಲ ತಾಲೂಕಿನ ಬೆಳ್ಳೂರು ಹೋಬಳಿಗೆ ಸೇರುವ ವಡ್ಡರಹಳ್ಳಿಯವರು ವಿ.ಜಿ ಮಂಜುನಾಥ್. ಅಲ್ಲಿನ ಅಪ್ಪಟ ರೈತಾಪಿ ವರ್ಗದಲ್ಲಿ ಹುಟ್ಟಿ ಬೆಳೆದ ಅವರ ಪಾಲಿಗೆ ಆರಂಭದಿಂದಲೂ ಶಿಕ್ಷಕನಾಗಬೇಕೆಂಬ ಕನಸಿತ್ತು. ಕಷ್ಟಪಟ್ಟು ಓದಿ, ಆ ವೃತ್ತಿಯನ್ನು ದಕ್ಕಿಸಿಕೊಂಡ ಮೇಲೆ ಅವರು ಉದ್ಯಮದತ್ತ ಹೊರಳಿಕೊಂಡು ಯಶ ಕಂಡಿದ್ದೇ ಒಂದು ರೋಚಕ ಕಥನ.

ಹಾಗೆ ಯಶಸ್ವೀ ಉದ್ಯಮಿಯಾಗಿದ್ದ ವಿ.ಜಿ ಮಂಜುನಾಥ್ ಸಿನಿಮಾ ಕನಸಿನತ್ತ ಗಮನ ಹರಿಸಿದ್ದರು. ಅದರ ಫಲವಾಗಿಯೇ ವರ್ಷಾಂತರಗಳ ಹಿಂದೆ ಕದ್ದುಮುಚ್ಚಿ ಅಂತೊಂದು ಚಿತ್ರವನ್ನು ನಿರ್ಮಾಣ ಮಾಡಿದ್ದರು. ಆ ಹಂತದಲ್ಲಿ ನಿರ್ಮಾಣ ಕ್ರೇತ್ರದ ಬಗ್ಗೆ ಹೆಚ್ಚೇನೂ ತಿಳುವಳಿಕೆ ಹೊಂದಿರದಿದ್ದ ವಿ.ಜಿ ಮಂಜುನಾಥ್ ಪಾಲಿಗೆ ಹೆಜ್ಜೆ ಹೆಜ್ಜೆಗೂ ಸವಾಲುಗಳು ಎದುಉರಾಗಿದ್ದವು. ನಾನಾ ಸರ್ಕಸ್ಸು ನಡೆಸಿಬ ಬಳಿಕವೂ ಉಳಿದುಕೊಂಡಿದ್ದು ಕೆಟ್ಟ ಅನುಭವದ ಕಹಿ ಮಾತ್ರ. ಸಾಮಾನ್ಯವಾಗಿ ಆರಂಭದಲ್ಲಿ ಶ್ರಮ ಪಟ್ಟರೂ ಹಿನ್ನಡೆಯಾದಾಗ ಯಾರೇ ಆದರೂ ನಿರಾಸೆಗೀಡಾಗೋದು ಸಹಜ. ಓರ್ವ ಉದ್ಯಮಿಯಾಗಿ ಸಾಕಷ್ಟು ಏಳು ಬೀಳುಗಳನ್ನು ಕಂಡು ಗೆದ್ದಿರುವ ವಿ.ಜಿ ಮಂಜುನಾಥ್ ಅವರ ಪಾಲಿಗೇನು ಅಡೆತಡೆ ಹೊಸತಲ್ಲ. ಆದರೂ, ನಿರ್ಮಾಪಕನಾಗಿ ಮೊದಲ ಸಿನಿಮಾದಲ್ಲಿಯೇ ಅವರು ಅಕ್ಷರಶಃ ಹೈರಾಣಾಗಿದ್ದರು. 

ಇನ್ನು ಮುಂದೆ ಸಿನಿಮಾ ನಿರ್ಮಾಣದ ಸಹವಾಸವೇ ಬೇಡ ಎಂಬ ನಿರ್ಧಾರ ಮಾಡುವಷ್ಟರ ಮಟ್ಟಿಗವರು ಬೇಸತ್ತಿದ್ದರು. ಹಾಗೆ ಭ್ರಮನಿರಸನ ಹೊಂದಿದ್ದ ವಿ.ಜಿ ಮಂಜುನಾಥ್ ಅವರನ್ನು ಮತ್ತೆ ನಿರ್ಮಾಪಕನಾಗಿ ಅಖಾಡಕ್ಕಿಳಿಯುವಂತೆ ಮಾಡಿರೋದು ಅಪಾಯವಿದೆ ಎಚ್ಚರಿಕೆ ಚಿತ್ರದ ಚೆಂದದ ಕಥೆ ಎಂಬುದು ಅಸಲೀ ವಿಶೇಷ. ಯುವ ನಿರ್ದೇಶಕ ಅಭಿಜಿತ್ ತೀರ್ಥಹಳ್ಳಿ ಕದ್ದುಮುಚ್ಚಿ ಚಿತ್ರದ ನಿರ್ದೇಶನ ವಿಭಾಗದಲ್ಲಿ ಕಾರ್ಯನಿರ್ವಹಿಸಿದ್ದರು. ಆ ನಂತರ ಉಂಟಾದ ಅನೇಕ ಪಲ್ಲಟಗಳಿಂದಾಗಿ ಹೆಚ್ಚಿನ ಜವಾಬ್ದಾರಿ ತಾನೇ ತಾನಾಗಿ ಅವರ ಹೆಗಲೇರಿಕೊಂಡಿತ್ತು. ಕಡೆಗೂ ಪ್ರಯಾಸ ಪಟ್ಟು ಆ ಸಿನಿಮಾ ತೆರೆಗಂಡ ನಂತರವೂ ಅಭಿಜಿತ್ ನಿರ್ಮಾಪಕ ವಿ.ಜಿ ಮಂಜುನಾಥ್ ಅವರ ಸಂಪರ್ಕದಲ್ಲಿದ್ದರು.

ಅದಾಗಲೇ ದಶಕಗಳ ಕಾಲ ನಿರ್ದೇಶನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸಿದ್ದ ಅಭಿಜಿತ್ ತೀರ್ಥಹಳ್ಳಿ ಸ್ವತಂತ್ರ ನಿರ್ದೇಶಕರಾಗುವ ಇರಾದೆಯಿಂದ ಒಂದು ಕಥೆ ರೆಡಿ ಮಾಡಿಕೊಂಡಿದ್ದರು. ಹಾರರ್ ಅಂಶ ಸೇರಿದಂತೆ ಅನೇಕ ವಿಚಾರಗಳು ಅಡಕವಾಗಿದ್ದ ಆ ಕಥೆಯನ್ನು ವಿ.ಕೆ ಮಂಜುನಾಥ್ ಅವರ ಮುಂದೆ ಹರವಿದಾಗ ಅವರೊಳಗೊಂದು ಭರವಸೆ ಮೂಡಿಕೊಂಡಿತ್ತು. ಹಾಗಂತ ಏಕಾಏಕಿ ನಿರ್ಮಾಣಕ್ಕೆ ಇಳಿದು ಬಿಡುವಂಥಾ ವಾತಾವರಣವೂ ಇರಲಿಲ್ಲ. ಯಾಕೆಂದರೆ, ಮೊದಲ ಸಿನಿಮಾದ ಮೂಲಕ ಆಗಿದ್ದ ಕಹಿ ಅನುಭವಗಳಿನ್ನೂ ಅವರನ್ನು ಕಾಡುತ್ತಿದ್ದವು. ಹೀಗೆ ಮೊದಲ ಹೆಜ್ಜೆಗಂಟಿಗ ಅನುಭವಗಳನ್ನೆಲ್ಲ ಗಂಭೀರವಾಗಿ ಪರಿಗಣಿಸಿದ್ದ ವಿ.ಜಿ ಮಂಜುನಾಥ್ ಅವರು ಹಂಣತ ಹಂತವಾಗಿ ಅಭಿಜಿತ್ ಅವರನ್ನು ಪರೀಕ್ಷೆಗೊಡ್ಡಿ, ಎಲ್ಲ ರೀತಿಯಿಂದಲೂ ಸಮಯ ಪಕ್ವವಾದ ನಂತರವಷ್ಟೇ ಚಿತ್ರೀಕರಣಕ್ಕೆ ಹಸಿರು ನಿಶಾನೆ ತೋರಿಸಿದ್ದರಂತೆ.

ಅಂದಹಾಗೆ, ಆರಂಭಿಕವಾಗಿ ಅಪಾಯವಿದೆ ಎಚ್ಚರಿಕೆ ಚಿತ್ರವನ್ನು ಒಂದು ಸೀಮಿತ ಬಜೆಟ್ಟಿನಲ್ಲಿ ನಿರ್ಮಾಣ ಮಾಡಲು ವಿ.ಜಿ ಮಂಜುನಾಥ್ ತೀರ್ಮಾನಿಸಿದ್ದರಂತೆ. ಆದರೆ, ಚಿತ್ರೀಕರಣಕ್ಕಿಳಿದ ನಂತರ ಯಾವುದಕ್ಕೂ ಕಡಿಮೆಯಾಗದಂತೆ ನೋಡಿಕೊಂಡ ಅವರು, ಎಲ್ಲ ಕೋನಗಳಿಂದಲೂ ಈ ಸಿನಿಮಾ ಅಮೋಘವಾಗಿರುವಂತೆ ನೋಡಿಕೊಂಡಿದ್ದಾರೆ. ಕಡೆಗೂ ಆರಂಭಿಕ ಹೆಜ್ಜೆಗಳ ಕಹಿ ಮರೆತು, ಅಪಾಯವಿದೆ ಎಚ್ಚರಿಕೆ ಚಿತ್ರದ ಮೂಲಕ ಹೊಸಾ ಭರವಸೆಯೊಂದು ಅವರನ್ನು ಆವರಿಸಿಕೊಂಡಿದೆ. ದರಿ ಸಿನಿಮಾದೊಂದಿಗೆ ದೊಡ್ಡ ಮಟ್ಟದಲ್ಲಿ ಗೆಲುವು ಸಿಗುವ ನಿರೀಕ್ಷೆಯೂ ಅವರಲ್ಲಿದೆ. ಸದ್ಯದ ವಾತಾವರಣವಂತೂ ಅದಕ್ಕೆ ಪೂರಕವಾಗಿದೆ. ಸುನಾದ್ ಗೌತಮ್ ಛಾಯಾಗ್ರಹಣ ಮತ್ತು ಸಂಗೀತ ನಿರ್ದೇಶನ, ಗುರುಪ್ರಸಾದ್ ಸಹ ನಿರ್ದೇಶನ, ಹರ್ಶಿತ್ ಪ್ರಭು ಸಂಕಲನ, ವಿಕಾಸ್ ಉತ್ತಯ್ಯ, ರಾಧಾ ಭಗವತಿ, ರಾಘವ್ ಕೊಡಚಾದ್ರಿ, ಮಿಥುನ್ ತೀರ್ಥಹಳ್ಳಿ, ಹರಿಣಿ ಶ್ರೀಕಾಂತ್ ಮುಂತಾದವರ ತಾರಾಗಣದೊಂದಿಗೆ ಈ ಸಿನಿಮಾ ಮೂಡಿ ಬಂದಿದೆ.

The post apayavide eccharike movie: ಉದ್ಯಮಿಯೋರ್ವರ ಅಪ್ಪಟ ಸಿನಿಮಾ ಧ್ಯಾನ! appeared first on Cini Shodha.

ರಾಮಾಯಣ ಚಿತ್ರದ ರಾವಣನ ಪಾತ್ರಕ್ಕಾಗಿ ನಿರ್ದೇಶಕ ನಿತೇಶ್ ತಿವಾರಿ ಯಶ್ ರನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಆರಂಭದಲ್ಲಿ ಶೂಟಿಂಗ್ ಡೇಟ್ಸ್ ಸಮಸ್ಯೆ ಉಂಟಾಗಬಹುದೆಂಬ ಕಾರಣದಿಂದ ಯಶ್ ಕೊಂಚ ಹಿಂದೇಟು ಹಾಕಿದ್ದರೆಂದೂ ಹೇಳಲಾಗುತ್ತಿದೆ. ಇತ್ತ ಟಾಕ್ಸಿಕ್ ಚಿತ್ರೀಕರಣವೂ ನಡೆಯುತ್ತಿರೋದರಿಂದ ರಾವಣನಾಗಿ ಅಬ್ಬರಿಸಲು ಯಶ್ ಗೆ ಕೊಂಚ ಅಡೆತಡೆ ಉಂಟಾಗಿದ್ದು ನಿಜ. ಹಾಗಂತ ಟಾಕ್ಸಿಕ್ ಸಂಪೂರ್ಣವಾಗಿ ಚಿತ್ರೀಕರಣ ಮುಗಿಸಿಕೊಂಡ ನಂತರ ರಾಮಾಯಣದತ್ತ ಗಮನ ಹರಿಸುವಂತೆಯೂ ಇರಲಿಲ್ಲ. ಇದೆಲ್ಲದರಿಂದ ಕಂಗೆಟ್ಟಿರುವ ಯಶ್ ಕೊಂಚ ಹೈರಾಣಾದರೂ ಎರಡೂ ಸಿನಿಮಾಗಳನ್ನು ಏಕಕಾಲದಲ್ಲಿಯೇ ಸಂಭಾಳಿಸುವ ನಿರ್ಧಾರಕ್ಕೆ ಬಂದಂತಿದೆ. ಅದರ ಫಲವಾಗಿಯೇ ಅವರು ರಾಮಾಯಣ ಚಿತ್ರೀಕರಣದಲ್ಲಿಯೂ ಭಾಗಿಯಾಗಿದ್ದಾರೆ.

ಒಂದು ಮೂಲದ ಪ್ರಕಾರ ಮುಂಬೈನ ಅಕ್ಸಾ ಬೀಚ್ ನಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ಯುದ್ಧ ಸನ್ನಿವೇಶಗಳಲ್ಲಿ ಯಶ್ ರಾವಣನಾಗಿ ಅಬ್ಬರಿಸುತ್ತಿದ್ದಾರೆ. ನಿರ್ದೇಶಕ ತಿವಾರಿ ಯರ್ಶ ಭಾಗದ ಎಲ್ಲ ಸೀನುಗಳನ್ನು ಒಂದೇ ಹಂತದಲ್ಲಿ ಚಿಕತ್ರೀಕರಿಸಿಕೊಳ್ಳುವ ನಿರ್ಧಾರಕ್ಕೆ ಬಂದಿದ್ದಾರೆ. ಯಶ್ ಕೂಡಾ ಅದಕ್ಕೆ ಎಸ್ ಅಂದಿದ್ದಾರೆ. ಅದು ಒಂದು ಹಂತದಲ್ಲಿ ಮುಗಿದು ಬಿಟ್ಟರೆ ಟಾಕ್ಸಿಕ್ ನತ್ತ ಸಂಪೂರ್ಣ ಗಮನ ಹರಿಸಬಹುದೆಂಬ ನಿರ್ಧಾರ ಯಶ್ ಗಿದ್ದಂತಿದೆ. ಅಲ್ಲಿಗೆ ಟಾಕ್ಸಿಕ್ ಮತ್ತು ರಾಮಾಯಣ ಚಿತ್ರಗಳತ್ತ ಅಭಿಮಾನಿಗಳು ಥ್ರಿಲ್ ಆಗಿ ಕಾಯುವಂತಾಗಿದೆ. ಎಲ್ಲವೂ ಅಂದುಕೊಂಡಂತೆಯೇ ಆದರೆ, ಈ ಎರಡೂ ಸಿನಿಮಾಗಳು ಒಂದರ ಬೆನ್ನಿಗೊಂದರಂತೆ ತೆರೆಗಂಡರೂ ಅಚ್ಚರಿಯೇನಿಲ್ಲ. ಅದು ಸಾಧ್ಯವಾದರೆ, ಪ್ಯಾನಿಂಡಿಯಾ ಲೆವೆಲ್ಲಿನಲ್ಲಿ ಹಬ್ಬವಾಗೋದು ಖಾತರಿ!

The post ramayan movie updates: ಟಾಕ್ಸಿಕ್ ನಡುವಲ್ಲೊಂದು ರಾಮಾಯಣ! appeared first on Cini Shodha.

ನಿರ್ದೇಶಕ ರುದ್ರಶಿವ ಅಂದುಕೊಂಡಂತೆಯೇ ಮೊದಲ ಹಂತದ ಚಿತ್ರೀಕರಣವನ್ನು ಬೆಂಗಳೂರಿನ ಆಸುಪಾಸಿನ ಸುಂದರ ಪ್ರದೇಶಗಳಲ್ಲಿ ಆರಂಭಿಸಿದ್ದಾರೆ. ಆರೇಳು ದಿನಗಳ ಕಾಲ ಅಲ್ಲಿಯೇ ಅವ್ಯಾಹತವಾಗಿ ಚಿತ್ರೀಕರಣ ಮುಗಿಸಿಕೊಂಡ ನಂತರ, ಇಡೀ ತಂಡ ಚೆನ್ನಗಿರಿಯ ಪ್ರಸಿದ್ಧ ಶಾಂತಿಸಾಗರ ಪ್ರದೇಶಕ್ಕೆ ತೆರಳಿದೆ. ಅಲ್ಲಿನ ಪ್ರಾಕೃತಿಕ ಸೌದರ್ಯದ ನಡುವೆ ಚಿತ್ರೀಕರಣ ಸಾಂಘವಾಗಿ ನೆರವೇರಿದೆ. ಈ ಶಾಂತಿಸಾಗರ ಕರ್ನಾಟಕದ ಪ್ರಸಿದ್ಧ ಪ್ರೇಕ್ಷಣೀಯ ಸ್ಥಳಗಳಲ್ಲೊಂದಾಗಿ ಗುರುತಿಸಿಕೊಂಡಿದೆ. ಏಷ್ಯಾ ಖಂಡದಲ್ಲಿಯೇ ಎರಡನೇ ಅತೀ ದೊಡ್ಡ ಕೆರೆಯೆಂಬ ಹೆಗ್ಗಳಿಕೆಯೂ ಅದಕ್ಕಿದೆ.

ಈ ಕೆರೆ ಸಾಮಾನ್ಯವಾದುದಲ್ಲ; ಅದಕ್ಕೂ ಹನ್ನೆರಡನೇ ಶತಮಾನಕ್ಕೂ ನೇರಾನೇರ ಕನೆಕ್ಷನ್ನುಗಳಿದ್ದಾವೆ. ಇಲ್ಲಿಯ ಆ ಕಾಲದಲ್ಲಿ ಸ್ವರ್ಗಾವತಿ ಎಂಬ ಹೆಸರಿತ್ತೆಂಬ ಪ್ರತೀತಿಯಿದೆ. ಆ ಸೀಮೆಯ ದೊರೆ ವಿಕ್ರಮರಾಜನ ಮಗಳು ಶಾಂತವ್ವ ತನಗಾದ ಸಾಮಾಜಿಕ ಅವಮಾನಕ್ಕೆ ಪ್ರತೀಕಾರವಾಗಿ ಈ ಬೃಹತ್ ಕೆರೆಯನ್ನು ಸೃಷ್ಟಿಸಿದ್ದಳಂತೆ. ಇಂಥಾ ಕೆರೆಗೆ ಸೂಳೆ ಕೆರೆ ಎಂದೇ ಲಾಗಾಯ್ತಿನಿಂದ ಕರೆಯಲಾಗುತ್ತಿತ್ತು. ಅದಕ್ಕೀಗ ಶಾಂತಿಸಾಗರವೆಂಬ ನಾಮಕರಣವಾಗಿ, ಅದುವೇ ಜನಜನಿತವಾಗಿದೆ. ಇಂಥಾ ಪ್ರದೇಶದಲ್ಲಿ ಎರಡು ಬೆಟ್ಟಗಳ ನಡುವೆ ಸರ್ ಎಂ. ವಿಶ್ವೇಶ್ವರಯ್ಯನವರು ಒಂದು ಸೇತುವೆ ಕಟ್ಟಿದ್ದಾರೆ. ಅದು ಈ ಪ್ರದೇಶದ ಪ್ರಧಾನ ಆಕರ್ಷಣೆ. ಅತ್ಯಂತ ಎತ್ತರದಲ್ಲಿರುವ ಆ ಪ್ರದೇಶದಲ್ಲಿ ಚಿತ್ರೀಕರಣ ನಡೆಸೋದು ರಿಸ್ಕಿನ ಕೆಲಸ. ಕೆಲವೇ ಕೆಲ ಕಲಾವಿದರು ಮತ್ತು ತಂತ್ರಜ್ಞರು ಮಾತ್ರವೇ ಅಲ್ಲಿಗೆ ಹೋಗಲು ಸಾಧ್ಯವಾಗಿತ್ತು. ಅಂಥಾ ಪ್ರದೇಶದಲ್ಲಿ ಅಂದುಕೊಂಡಂತೆಯೇ ಚಿತ್ರೀಕರಣ ನಡೆಸಲಾಗಿದೆಯಂತೆ.
ಅಂಥಾದ್ದೊಂದು ಅಮೋಘ ಅನುಭವ ದಕ್ಕಿಸಿಕೊಂಡ ನಂತರ ಚಿತ್ರತಂಡ ಮತ್ತದೇ ಉತ್ಸಾಹದಿಂದ ಆಸುಪಾಸಿನ ಹಳ್ಳಿಗಳ ದೇವಾಲಯ ಮುಂತಾದ ಸ್ಥಳಗಳಲ್ಲಿ ಚಿತ್ರೀಕರಣ ನಡೆಸಿದೆ. ಅಲ್ಲಿಯೇ ಆಕ್ಷನ್ ಡ್ರಾಮಾ ಜಾನರಿನ ಶಭ್ಬಾಷ್ ಚಿತ್ರದ ಮೊದಲ ಹಂತದ ಚಿತ್ರೀಕರಣ ಸಮಾಪ್ತಿಗೊಂಡಿದೆ. ಏಸ್22 ಬ್ಯಾನರಿನಡಿಯಲ್ಲಿ ಪವೀಂದ್ರ ಮುತ್ತಪ್ಪ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. `ಕ’ ಹಾಗೂ ಮಳೆಬಿಲ್ಲು ಚಿತ್ರಗಳಲ್ಲಿ ನಟಿಸಿದ್ದ ಶರತ್ ಬಹುಕಾಲದ ನಂತರ ಈ ಚಿತ್ರದ ನಾಯಕನಾಗಿ ಬಣ್ಣ ಹಚ್ಚಿದ್ದಾರೆ. ನಿಸರ್ಗ ನಾಯಕಿಯಾಗಿ ಜೊತೆಯಾಗಿದ್ದಾರೆ. ಎರಡನೇ ಹಂತದ ಚಿತ್ರೀಕರಣ ಮುಕ್ತಾಯಗೊಂಡೇಟಿಗೆ ಮತ್ತಷ್ಟು ಬೆರಗಿನ ವಿಚಾರಗಳು ಪ್ರೇಕ್ಷಕರನ್ನು ತಲುಪಲಿದ್ದಾವೆ!

The post shabbash movie updates: ಶಾಂತಿಸಾಗರ ಕೆರೆಯ ಸುತ್ತಾ ಚಿತ್ರತಂಡದ ಸಾಹಸ! appeared first on Cini Shodha.