ಯುವ ನಿರ್ದೇಶಕ ಮಧು ಗೌಡ ಗಂಗೂರ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರ ದಿಲ್‌ದಾರ್. ಒಂದು ಅಪರೂಪದ ಪ್ರೇಮಕಥಾನಕಕ್ಕೆ ದಿಲ್ ದಾರ್ ಮೂಲಕ ದೃಶ್ಯರೂಪ ಕೊಡಲಾಗಿದೆ ಎಂಬ ವಿಚಾರವನ್ನವರು ಈ ಹಿಂದೆಯೇ ಜಾಹೀರು ಮಾಡಿದ್ದಾರೆ. ಈ ಚಿತ್ರದಲ್ಲಿ ಭಜರಂಗಿ ಲೋಕಿ ವಿಲನ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆಂಬ ವಿಚಾರ ಆರಂಭದಿಂದಲೂ ಒಂದಷ್ಟು ಕುತೂಹಲ ಮೂಡಿಕೊಂಡಿತ್ತು. ಆರಂಭದಿಂದ ಇಲ್ಲಿಯವರೆಗೂ ಸಿನಿಮಾದಿಂದ ಸಿನಿಮಾಕ್ಕೆ ಭಿನ್ನ ಬಗೆಯ ಪಾತ್ರಗಳನ್ನು ಆವಾಹಿಸಿಕೊಂಡು ಬರುತ್ತಿರುವವರು ಲೋಕಿ. ಅಂಥಾ ಲೋಕಿ ದಿಲ್‌ದಾರ್ ಚಿತ್ರದಲ್ಲಿ ಎಂಥಾ ಪಾತ್ರ ನಿರ್ವಹಿಸಿದ್ದಾರೆ? ಅವರ ಲುಕ್ಕು ಹೇಗಿರಲಿದೆ? ಇಂಥಾ ಒಂದಷ್ಟು ಪ್ರಶ್ನೆಗಳು ಸಹಜವಾಗಿಯೇ ಪ್ರೇಕ್ಷಕರನ್ನು ಕಾಡಿದ್ದವು.

ಹುಟ್ಟುಹಬ್ಬಕ್ಕೆ ಶುಭಾಶಯ ಕೋರುವ ಮೂಲಕವೇ ಚಿತ್ರತಂಡ ಆ ಕುತೂಹಲ ತಣಿಸಲು ಪ್ರಯತ್ನಿಸಿದಂತಿದೆ. ಜೊತೆಗೆ ಭಜರಂಗಿ ಲೋಕಿ ನಿರ್ವಹಿಸಿರೋ ಪಾತ್ರದ ಬಗ್ಗೆ ಸಣ್ಣದೊಂದು ಸುಳಿವನ್ನೂ ನಿರ್ದೇಶಕ ಮಧು ಗೌಡ ಗಂಗೂರ್ ಬಿಟ್ಟುಕೊಟ್ಟಿದ್ದಾರೆ. ಅದರನ್ವಯ ಹೇಳೋದಾದರೆ, ಭಜರಂಗಿ ಲೋಕಿ ಇಲ್ಲಿ ಕಾಲೇಜ್ ಬಾಯ್ ಆಗಿ, ವಿಲನ್ ಗೆಟಪ್ಪಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಅವರ ಪಾತ್ರ ಪ್ರೇಕ್ಷಕರನ್ನು ಚಕಿತಗೊಳಿಸಲಿದೆ. ಭಜರಂಗಿ ಲೋಕಿ ಪಾತ್ರಗಳ ಆಯ್ಕೆಯಲ್ಲಿ ಒಂದಷ್ಟು ಗುಣಮಟ್ಟ ಕಾಯ್ದುಕೊಂಡು ಬಂದಿದ್ದಾರೆ. ಅದು ಅವರ ಯಶಸ್ಸಿನ ಗುಟ್ಟೂ ಹೌದು. ಈ ಕಾರಣದಿಂದಲೇ ಅವರೊಂದು ಸಿನಿಮಾ ಒಪ್ಪಿಕೊಂಡರೆ ಆ ಬಗ್ಗೆ ಸಹಜವಾಗಿ ಕುತೂಹಲ ಮೂಡಿಕೊಳ್ಳುತ್ತೆ. ಈ ವಿಚಾರದಲ್ಲಿಯೂ ದಿಲ್‌ದಾರ್ ಗಮನ ಸೆಳೆಯುತ್ತಿದೆ.  

ಇನ್ನುಳಿದಂತೆ, ಶ್ರೇಯಸ್ ಮಂಜು ಕೂಡಾ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿರೋ ಸೂಚನೆಗಳಿದ್ದಾವೆ. ಅತ್ಯಂತ ಲವಲವಿಕೆಯ ಪಾತ್ರವನ್ನು ಆವಾಹಿಸಿಕೊಂಡಿರೋ ಶ್ರೇಯಸ್ ಮಂಜು ನೃತ್ಯದ ಮೂಲಕವೂ ಥ್ರಿಲ್ ಮೂಡಿಸಲು ಕಾತರರಾಗಿದ್ದಾರೆ. ನಟ ಶರಣ್ ಅವರ ತಂಗಿ ಮಗಳಾದ ಕೀರ್ತಿ ಕೃಷ್ಣ ಈ ಚಿತ್ರದ ಮೂಲಕವೇ ನಾಯಕಿಯಾಗಿ ಪಾದಾರ್ಪಣೆ ಮಾಡುತ್ತಿದ್ದಾರೆ. ಸಾಧು ಕೋಕಿಲಾ, ಚಂದ್ರಪ್ರಭ, ಕಾರ್ತಿಕ್, ಚಿಲ್ಲರ್ ಮಂಜು ಮುಂತಾದ ಹಾಸ್ಯ ನಟರ ದಂಡೇ ಈ ಚಿತ್ರದಲ್ಲಿದೆ. ಕೆಜಿಎಫ್ ಖ್ಯಾತಿಯ ಆಂಡ್ರೋ ಅವಿನಾಶ್, ಭಜರಂಗಿ ಲೋಕಿ, ಅರ್ಪಿತ್ ಖಳ ನಟರಾಗಿ ನಟಿಸಿದ್ದಾರೆ. ಬಿಡುಗಡೆ ದಿನಾಂಕವೂ ಸೇರಿದಂತೆ ಮತ್ತೊಂದಷ್ಟು ಮಾಹಿತಿಗಳು ಶೀಘ್ರದಲ್ಲಿಯೇ ಪ್ರೇಕ್ಷಕರನ್ನು ತಲುಪಿಕೊಳ್ಳಲಿವೆ.

The post bhajarangi loki: ಅಬ್ಬರಿಸೋ ಲೋಕಿಗೆ ಸಿಕ್ಕಿದ್ದು ಎಂಥಾ ಪಾತ್ರ? appeared first on Cini Shodha.

ವಿ.ಕೆ ಪ್ರಕಾಶ್ (director v.k prakash) ನಿರ್ದೇಶನದ ಈ ಸಿನಿಮಾ ಈಗಾಗಲೇ ಗಾಢ ಪ್ರೇಮದ ಘಮಲು ಮೆತ್ತಿಕೊಂಡಂತಿದ್ದ ಹಾಡುಗಳ ಮೂಲಕ ಪ್ರೇಕ್ಷಕರನ್ನು ತಾಕಿದೆ. ಈ ಹಾಡುಗಳಲ್ಲಿದ್ದ ತಾಜಾತನದ ಛಾಯೆಯನ್ನು ಆವಾಹಿಸಿಕೊಂಡಂತಿರೋ ಸದರಿ ಟ್ರೈಲರ್ ಕೂಡಾ ಒಂದಷ್ಟು ನಿರೀಕ್ಷೆಗಳನ್ನು ಮೂಡಿಸುವಂತೆ ಮೂಡಿ ಬಂದಿದೆ. ಬಹುಶಃ ಬರೀ ಪ್ರೀತಿ, ಪ್ರೇಮಗಳ ಸುಳಿವಷ್ಟೇ ಸಿಕ್ಕಿದ್ದರೆ ಪ್ರತಿಕ್ರಿಯೆಗಳು ಬೇರೆಯದ್ದಿರುತ್ತಿತ್ತೇನೋ. ಆದರೆ, ನಿರ್ದೇಶಕರಿಲ್ಲಿ ಪ್ರೇಮದ ಚುಂಗು ಹಿಡಿದೆ ಹಲವಾರು ಕೊಂಬೆ ಕೋವೆಗಳಿರುವ ಸಂಕೀರ್ಣ ಕಥೆಯೊಂದಕ್ಕೆ ದೃಷ್ಯ ರೂಪ ಕೊಟ್ಟಂತಿದೆ. ಈ ಕಾರಣದಿಂದಲೇ ಸದರಿ ಟ್ರೈಲರ್ ಸಿನಿಮಾಸಕ್ತರ ನಡುವೆ ಒಂದಷ್ಟು ಚರ್ಚೆ ಹುಟ್ಟು ಹಾಕಿ, ನಿರೀಕ್ಷೆ ಮೂಡಿಸಿರೋದಂತೂ ನಿಜ!

ಈ ಹಿಂದೆ ಪಡ್ಡೆಹುಲಿ ಚಿತ್ರದ ಮೂಲಕ ಮೆಚ್ಚುಗೆಗೆ ಪಾತ್ರರಾಗಿದ್ದವರು ಶ್ರೇಯಸ್ ಮಂಜು. ಅವರಿಲ್ಲಿ ಪ್ರೇಮಿಯಾಗಿ ಮಾತ್ರವಲ್ಲದೇ ಮಾಸ್ ಲುಕ್ಕಿನಲ್ಲಿಯೂ ಮಿಂಚಿರುವ ಲಕ್ಷಣಗಳು ಢಾಳಾಗಿಯೇ ಗೋಚರಿಸಿದೆ. ಶ್ರೇಯಸ್ ಪಾತ್ರದ ಒಂದಷ್ಟು ಚಹರೆಗಳೂ ಟ್ರೈಲರ್‌ನಲ್ಲಿ ಮಿಂಚಿದೆ. ಕಣ್ಸನ್ನೆ ಹುಡುಗಿ ಪ್ರಿಯಾ ವಾರಿಯರ್ ಮತ್ತು ಶ್ರೇಯಸ್ ಮಂಜು ಜೋಡಿ ಮೋಡಿ ಮಾಡುತ್ತಾ ಅನ್ನೋ ಪ್ರಶ್ನೆ ತೀವ್ರಗೊಂಡಿದೆ. ವಾರದೊಪ್ಪತ್ತಿನಲ್ಲಿಯೇ ಅದಕ್ಕೆ ನಿಖರವಾದ ಉತ್ತರವೂ ಸಿಗಲಿದೆ. ಪ್ರೇಮದ ಭೂಮಿಕೆಯಲ್ಲಿ ಗಹನವಾದ ಕಥೆ ತೆರೆದುಕೊಳ್ಳಬಹುದಾದ ಲಕ್ಷಣವೊಂದು ಪ್ರೇಕ್ಷಕರ ಮುಂದೆ ಫಳಗುಟ್ಟಿದೆ. ಟ್ರೈಲರ್ ನಲ್ಲಿಯ ತಾಜಾತನ, ಅಲ್ಲಿ ಕಾಣಿಸಿರುವ ಕುತೂಹಲ ಕಾಪಿಟ್ಟುಕೊಂಡೇ ಒಂದಿಡೀ ಸಿನಿಮಾ ಪ್ರೇಕ್ಷಕರ ಮುಂದೆ ಬಂದರೆ, ಪ್ರೇಮಿಗಳ ದಿನದ ಪ್ರಭೆಯಲ್ಲಿಯೇ ಪ್ರೇಮ ಕಥನಕ್ಕೆ ಗೆಲುವಾಗೋ ಸಾಧ್ಯತೆಗಳೂ ಕಾಣಿಸುತ್ತಿವೆ.

ಅಂದಹಾಗೆ, ಕೆ.ಮಂಜು ಸಿನಿಮಾಸ್ ಬ್ಯಾನರಿನಡಿಯಲ್ಲಿ ವಿಷ್ಣುಪ್ರಿಯ ಚಿತ್ರ ನಿರ್ಮಾಣಗೊಂಡಿದೆ. ಇದೊಂದು ತೊಂಬತ್ತರ ದಶಕದಲ್ಲಿ ನಡೆಯೋ ಕಥಾನಕದ ಸಿನಿಮಾ ಎಂಬ ಸುಳಿವನ್ನು ಈ ಹಿಂದೆ ಚಿತ್ರ ತಂಡ ಬಿಟ್ಟುಕೊಟ್ಟಿತ್ತು. ಆ ಕಾಲಘಟ್ಟದ ಪರಿಮಳವೊಂದು ದೃಷ್ಯರೂಪ ಧರಿಸಿ ಈ ಟ್ರೈಲರ್ ಮೂಲಕ ನೋಡುಗರನ್ನು ಸೋಕಿದೆ. ಅಷ್ಟಕ್ಕೂ ಎಲ್ಲವೂ ಆನ್‌ಲೈನ್ ಮಯವಾಗಿರುವ, ಭಾವನೆಗಳೂ ಬೆರಳ ಮೊನೆಗಿಳಿದಿರುವ ಈ ಕಾಲಘಟ್ಟದಲ್ಲಿ ತೊಂಬತ್ತರ ದಶಕದ ಪ್ರೇಮದ ಪುಳಕಗಳನ್ನು ಧ್ಯಾನಿಸೋದೇ ಥ್ರಿಲ್ಲಿಂಗ್ ವಿಚಾರ. ಅಂಥಾದ್ದೊಂದು ಥ್ರಿಲ್ ಈ ಟ್ರೈಲರ್ ಮೂಲಕ ದಾಟಿಕೊಂಡಿದೆ. ಆ ಕಾಲದ ವಾತಾವರಣ, ಕೆಂಪು ಪೋಸ್ಟ್ ಡಬ್ಬಿ ಸೇರಿದಂತೆ ಅನೇಕ ಆಹ್ಲಾದ ಟ್ರೈಲರ್ ಮೂಲಕವೇ ಮೂಡಿಕೊಂಡಿದೆ. ಅಚ್ಯುತ್ ರಾವ್, ಸುಚೇಂದ್ರ ಪ್ರಸಾದ್, ನಿಹಾಲ್ ರಾಜ್ ಮುಂತಾದವರ ತಾರಾಗಣವಿದೆ. ವಿನೋದ್ ಭಾರತಿ ಛಾಯಾಗ್ರಹಣ, ಗೋಪಿ ಸುಂದರ್ ಸಂಗೀತ ನಿರ್ದೇಶನ, ಸುರೇಶ್ ಅರಸ್ ಸಂಕಲನವಿರುವ ವಿಷ್ಣುಪ್ರಿಯ ಚಿತ್ರ ಫೆಬ್ರವರಿ ೨೧ರಂದು ಬಿಡುಗಡೆಗೊಳ್ಳಲಿದೆ.

The post Vishnupriya movie trailer: ಇಲ್ಲಿರೋದು ಬರೀ ಪ್ರೇಮ ಕಥನವಲ್ಲ! appeared first on Cini Shodha.