ನಿರ್ದೇಶನ: ಶಶಾಂಕ್
ತಾರಾಗಣ: ಡಾರ್ಲಿಂಗ್ ಕೃಷ್ಣ, ಮನಿಷಾ ಕಂದಕೂರ್, ಅಚ್ಯುತ್ ಕುಮಾರ್, ರಮೇಶ್ ಇಂದಿರಾ, ಡ್ರ್ಯಾಗನ್ ಮಂಜು

ರೇಟಿಂಗ್: 3

ಟೈಟಲ್ ಮೂಲಕವೇ ಒಂದಷ್ಟು ಚರ್ಚೆ ಹುಟ್ಟು ಹಾಕಿ, ಆ ಮೂಲಕ ಸೆಳೆದುಕೊಳ್ಳುವ ಫಾರ್ಮುಲಾದೊಂದಿಗೆ ಪ್ರಚಲಿತಕ್ಕೆ ಬಂದಿದ್ದ ಚಿತ್ರ ಬ್ರ್ಯಾಟ್. ಅಷ್ಟೇನೂ ಪರಿಚಿತವಲ್ಲದ ಇಂಥಾದ್ದೊಂದು ಟೈಟಲ್ಲು ಟ್ರೈಲರ್ ಮೂಲಕ ಮತ್ತೊಂದು ಆಯಾಮದಲ್ಲಿ ಕ್ರೇಜ್ ಮೂಡಿಸಿತ್ತು. ನಿರ್ದೇಶಕ ಶಶಾಂಕ್ ಇತ್ತೀಚಿನ ದಿನಗಳಲ್ಲಿ ಸೆಳೆತ ಕಳೆದುಕೊಂಡಿದ್ದರೂ ಕೂಡಾ ಡಾರ್ಲಿಂಗ್ ಕೃಷ್ಣ ಜೊತೆಗಿನ ಕಾಂಬಿನೇಷನ್ನಿನಲ್ಲಿ ಮ್ಯಾಜಿಕ್ಕು ನಡೆದೀತೆಂಬ ಆಶಾವಾದವೊಂದು ಚಿಗಿತುಕೊಂಡಿತ್ತು. ಇದೀಗ ಬ್ರ್ಯಾಟ್ ತೆರೆಗಂಡಿದೆ. ಸಮರ್ಥವಾದ ಬರವಣಿಗೆಯೊಂದಿದ್ದರೆ, ನಿರ್ದೇಶನದ ತೊಡಕುಗಳನ್ನೂ ಪ್ರೇಕ್ಷಕ ಮಾಫಿ ಮಾಡೋದಿದೆ. ಇದೀಗ ಊರೂರನ್ನೂ ಆವರಿಸಿಕೊಂಡಿರುವ ಬೆಟ್ಟಿಂಗ್ ದಂಧೆಯ ಕರಾಳ ಲೋಕದೊಳಗೆ ಪಾತಾಳ ಗರಡಿ ಹಾಕುತ್ತಲೇ, ಅದರ ಸೂಕ್ಷ್ಮಗಳನ್ನು ತೆರೆದಿಟ್ಟಿರುವ ಕಥೆ, ಅಲ್ಲಲ್ಲಿ ನಿರ್ದೇಶನದ ಬಿಗುವು ಕಳೆದುಕೊಂಡರೂ ಮತ್ತೊಂದು ತಿರುವಿನಲ್ಲಿ ಅದನ್ನು ಮರೆಸುವ ಗುಣದೊಂದಿಗೆ ಬ್ರ್ಯಾಟ್ ಪ್ರೇಕ್ಷಕರನ್ನು ತಲುಪಿದೆ.

ಡಾರ್ಲಿಂಗ್ ಕೃಷ್ಣ ನಟನೆಯ ವಿಚಾರದಲ್ಲಿ ಮಿತಿಗಳ ಸರಹದ್ದಿನಲ್ಲಿಯೇ ಗಿರಕಿ ಹೊಡೆಯುವ ನಟ. ಚಿತ್ರದಿಂದ ಚಿತ್ರಕ್ಕೆ ಅಂಥಾ ಮಿತಿಗಳ ಸರಹದ್ದು ದಾಟಿ ಚಕಿತಗೊಳಿಸಬೇಕೆಂಬ ಇರಾದೆಯೇ ಈತನಿಗಿಲ್ಲವೇನೋ ಅಂತ ಪ್ರೇಕ್ಷಕರಿಗೆ ಅನ್ನಿಸಿದ್ದಿದೆ. ಈ ಕಾರಣದಿಂದಲೇ ಒಂದೇ ಬಗೆಯ ಆತನ ನಟನೆ ಏಕತಾನತೆ ಮೂಡಿಸಿದ್ದೂ ಇದೆ. ಬ್ರ್ಯಾಟ್ ಚಿತ್ರದಲ್ಲಿಯೂ ಡಾರ್ಲಿಂಗು ಅದನ್ನು ಮೀರಿಕೊಂಡಿಲ್ಲ. ಆದರೆ, ಆತನ ಒರಿಜಿನಲ್ ಛಾಯೆಗೆ ತಕ್ಕಂಥಾ ಪಾತ್ರವನ್ನೇ ನಿರ್ದೇಶಕ ಶಶಾಂಕ್ ಸೃಷ್ಟಿಸಿದ್ದಾರೆ. ಈ ಕಾರಣದಿಂದಲೇ ಸದರಿ ಪಾತ್ರ ಕೃಷ್ಣನಿಗೆ ಬಿಟ್ಟರೆ ಮತ್ಯಾರಿಗೂ ಸರಿಹೊಂದೋದಿಲ್ಲ ಎಂಬ ಭಾವವೊಂದು ಪ್ರೇಕ್ಷಕನ ಮನದಲ್ಲಿ ಹಾದು ಹೋಗುತ್ತೆ. ಹೆಂಗಾದ್ರೂ ಕಾಸು ಮಾಡ್ಬೇಕು ಮಗಾ ಅನ್ನೋದು ಹೊಸಾ ಜನರೇಷನ್ನಿನ ಮೂಲಮಂತ್ರ. ಅದರ ಚುಂಗು ಹಿಡಿದುಕೊಂಡೇ ಒಂದುಷ್ಟು ಅಧ್ಯಯನ, ಗಟ್ಟಿ ಕಥೆಯೊಂದಿಗೆ ಈ ಸಿನಿಮಾವನ್ನು ಕಟ್ಟಿಕೊಡಲಾಗಿದೆ.

ಶಾಲಾ ದಿನಗಳಲ್ಲಿಯೇ ಸಹಪಾಠಿ ಹುಡುಗರಿಗೆ ಬೆಟ್ಟಿಂಗಿನಂಥಾ ಆಟ ಆಡಿಸಿ, ಒಂದಷ್ಟು ಕಾಸು ಮಾಡಿಕೊಳ್ಳೋ ಪ್ರಳಯಾಂತಕ ಹುಡುಗ ಕೃಷ್ಣ ಅಲಿಯಾಸ್ ಕ್ರಿಸ್ಟಿ. ಇಂಥಾ ಹುಡುಗ ಶಿಸ್ತಿನ ಸಿಪಾಯಿಯಂಥಾ ಹೆಡ್ ಕಾನ್ಟೇಬಲ್ ಮಗ. ಆರಂಭದಿಂದಲೇ ಕ್ರಿಕೆಟರ್ ಆಗಬೇಕೆಂಬ ಕನಸು ಹೊತ್ತಿರೋ ಈ ಹುಡುಗನದ್ದು ಕೈ ತುಂಬಾ ಕಾಸು ಮಾಡಿಕೊಳ್ಳಬೇಕೆಂಬ ಬಯಕೆ. ಅದಕ್ಕಾಗಿ ತಂದೆಯಿಂದ ಕಲಿತುಕೊಂಡ ಆದರ್ಶಗಳಂತೆ ಬಲು ಕಷ್ಟದ ಹಾದಿಯನ್ನು ಆರಿಸಿಕೊಳ್ಳೋ ಕೃಷ್ಣ, ಬಹಳಷ್ಟು ಶ್ರಮ ಹಾಕುತ್ತಾನೆ. ಕಡೆಗೂ ಆ ಹಾದಿಯಲ್ಲಿ ಸೋತಂತೆ ಕಾಣೋ ನಾಯಕನಿಗೆ ನಿರ್ದೇಶಕರು ನಾಯಿಯ ಮೂಲಕ ತಿರುವೊಂದನ್ನು ಕರುಣಿಸುತ್ತಾರೆ. ಆ ನಂತರ ಈ ಹುಡುಗ ಕ್ರಿಸ್ಟಿ ಭಯಾನಕ ಬೆಟ್ಟಿಂಗ್ ಮಾಫಿಯಾಕ್ಕಿಳಿಯುವ ಕಥನವೇ ಒಟ್ಟಾರೆ ಸಿನಿಮಾದ ಜೀವಾಳ. ಕ್ರಿಕೆಟ್ಟಿಗೆ ಅಂಟಿಕೊಂಡಂತಿರುವ ಬೆಟ್ಟಿಂಗ್ ಮಾಫಿಯಾ, ಅದು ನಡೆಯುವ ರೀತಿ, ಅದರಾಳದ ದಂಧೆ ದುಷ್ಮನಿಗಳನ್ನು ನಿರ್ದೇಶಕರು ಸಮರ್ಥವಾಗಿ ಕಟ್ಟಿ ಕೊಟ್ಟಿದ್ದಾರೆ.

ಕ್ರಿಟೆಟ್ ಜಗತ್ತು ಹಾಗೂ ಬೆಟ್ಟಿಂಗ್ ಮಾಫಿಯಾದ ಬಗ್ಗೆ ಆಳವಾದ ಅಧ್ಯಯನ ನಡೆಸಿಯೇ ಈ ಸಿನಿಮಾ ಕಥೆ ಹೊಸೆಯಲಾಗಿದೆ. ಅದು ಈ ಸಿನಿಮಾದ ನಿಜವಾದ ಶಕ್ತಿ. ಆದರೆ, ಕೆಲವಾರು ದೃಷ್ಯಗಳಲ್ಲಿ ನಿರ್ದೇಶಕರು ಸಿನಿಮಾತ್ಮಕವಾಗಿ ದಾಟಿಸಬಹುದಾದ ಪರಿಣಾಮಕಾರಿ ಹಾದಿಗೆ ಎಳಸು ಎಳಸಾದ ಶೈಲಿಯ ಕಲ್ಲುಮುಳ್ಳು ಸುರಿದಿದ್ದಾರೆ. ಆದರೆ, ಅದಾದ ನಂತರ ಸರಿಯುವ ದೃಷ್ಯಗಳು ಅಸಹನೆಯನ್ನೆಲ್ಲ ಮರೆತು ಮುನ್ನಡೆಯುವಂತೆ ಮಾಡುತ್ತವೆ. ಬೆಟ್ಟಿಂಗ್ ಮಾಫಿಯಾ ಅನ್ನೋದು ಹೇಗೆಲ್ಲ ಅಧಿಕಾರಸ್ಥರ ನೆರಳಲ್ಲಿಯೇ ನಡೆಯುತ್ತೆ, ಅದರ ಆಳ ಅಗಲಗಳೇನು, ಯುವ ಸಮುದಾಯ ಆ ವರ್ತುಲದೊಳಗೆ ಹೇಗೆಲ್ಲ ಸಿಲುಕಿಕೊಳ್ಳುತ್ತೆ… ಇಂಥಾ ವಿಚಾರಗಳನ್ನಿಲ್ಲಿ ರೋಚಕವಾಗಿಯೇ ಪ್ರಚುರಪಡಿಸಲಾಗಿದೆ. ನಿರ್ದೇಶನದ ಸೂತ್ರ ಸಡಿಲವಾದರೂ ಗಟ್ಟಿ ಕಥೆ ಹೇಗೋ ದಡ ಸೇರಿಸುತ್ತೆ. ನಾಯಕನ ತಂದೆಯಾಗಿ, ಹೆಡ್ ಕಾನ್ಟೇಬಲ್ ಆಗಿ ಅಚ್ಯತ ಕುಮಾರ್, ಪೊಲೀಸ್ ಅಧಿಕಾರಿಯಾಗಿ ರಮೇಶ್ ಇಂದಿರಾ ಹಾಗೂ ಖಡಕ್ ವಿಲನ್ ಆಗಿ ಡ್ರ್ಯಾಗನ್ ಮಂಜು ನಟನೆ ಅಚ್ಚುಕಟ್ಟಾಗಿದೆ. ನಾಯಕನಾಗಿ ಡಾರ್ಲಿಂಗ್ ಕೃಷ್ಣ ಕೂಡಾ ತಮ್ಮ ಮಿತಿಯೊಳಗಿನ ಪಾತ್ರವನ್ನು ಚೆಂದಗೆ ನಿಭಾಯಿಸಿದ್ದಾರೆ.

ಇಲ್ಲಿ ಕೊರತೆಯಂತೆ ಭಾಸವಾಗೋದು ನಾಯಕಿ ಮನಿಷಾ ಕಂದಕೂರ್. ಈ ಹುಡುಗಿ ಮನಿಷಾಳನ್ನು ನಾಯಕಿಯಾಗಿ ಲಾಂಚ್ ಮಾಡಲೆಂದೇ ನಿರ್ಮಾಪಕರು ಈ ಸಿನಿಮಾ ಮಾಡಿದ್ದಾರೆಂಬ ಮಾತು ಚಿತ್ರರಂಗದ ವಲಯದಲ್ಲಿ ಹರಿದಾಡಿತ್ತು. ಆಕೆಯ ನಟನೆ ಕಂಡರೆ ಯಾರಿಗಾದರೂ ಆ ರೂಮರ್ ಸತ್ಯ ಅನ್ನಿಸುತ್ತೆ. ಯಾಕೆಂದರೆ, ನಟಿಯಾಗಿ ಮನಿಷಾಗೆ ಈ ಪಾತ್ರವನ್ನು ನಿಭಾಯಿಸುವ ಛಾತಿ ಯಾವ ಫ್ರೇಮಿನಲ್ಲಿಯೂ ಕಾಣಿಸುವುದಿಲ್ಲ. ಅನ್ನದಾತನ ಮಗಳೆಂಬ ಕಾರಾಣದಿಂದ ನಿರ್ದೇಶಕರಿಗೆ ಮನಿಷಾಳ ನಟನೆ ಸಹ್ಯವಾಗ ಬಹುದು. ಆದರೆ ಕಾಸು ಕೊಟ್ಟು ನೋಡುವ ಪ್ರೇಕ್ಷಕರಿಗೆ ಅದು ಕೊರತೆಯಾಗಿ ಕಾಡುತ್ತೆ. ಇನ್ನುಳಿದಂತೆ ಈ ಚಿತ್ರದ ಮಹಾ ಮೈನಸ್ ಪಾಯಿಂಟು ಅರ್ಜುನ್ ಜನ್ಯಾರ ಭೀಕರ ಹಿನ್ನೆಲೆ ಸಂಗೀತ. ಅವರೇ ಸಂಗೀತ ನೀಡಿದ್ದ ಹಾಡೊಂದು ಹಿಟ್ ಆಗಿ ವೈರಲ್ ಆಗಿತ್ತು. ಆದರೆ ಹಿನ್ನೆಲೆ ಸಂಗೀತವನ್ನು ಜನ್ಯಾ ಅಕ್ಷರಶಃ ಹಡಾಲೆಬ್ಬಿಸಿದ್ದಾರೆ. ತಾನು ಬೆರಳಾಡಿಸಿದ್ದನ್ನೆಲ್ಲ ಪ್ರೇಕ್ಷಕರು ಒಪ್ಪಿಕೊಳ್ಳುತ್ತಾರೆಂಬ ಅಹಮ್ಮಿಕೆಯೋ, ಕೆಲಸದ ಒತ್ತಡವೋ ಗೊತ್ತಿಲ್ಲ; ಜನ್ಯಾ ಕಡೆಯಿಂದ ಈ ಚಿತ್ರಕ್ಕೆ ದೋಖಾ ಸಂಭವಿಸಿದೆ.

ಇದೆಲ್ಲದರಾಚೆಗೆ ಬರವಣಿಗೆಯ ಕಸುವಿನೊಂದಿಗೇ ಈ ಸಿನಿಮಾ ಒಂದಷ್ಟು ಪರಿಣಾಮಕಾರಿಯಾಗಿದೆ ಎಂಬ ಅಭಿಪ್ರಾಯ ಸಿನಿಮಾಸಕ್ತರಲ್ಲಿ ಮೂಡಿಕೊಳ್ಳುತ್ತೆ. ಈ ವಿಚಾದಲ್ಲಿ ರಘುನಂದನ್ ಮತ್ತು ರವಿ ಚಕ್ರವರ್ತಿ ಅವರ ಶ್ರಮವನ್ನು ಮೆಚ್ಚಿಕೊಳ್ಳಲೇಬೇಕು. ಯಾಕೆಂದರೆ, ಈ ಕಥೆ ಹಾಗೂ ಸ್ಕ್ರೀನ್ ಪ್ಲೇ ಅವರು ಕಲೆ ಹಾಕಿರುಜವ ಸಮೃದ್ಧವಾದ ಮಾಹಿತಿಗಳಿಂದಲೇ ಕಳೆಗಟ್ಟಿಕೊಂಡಿದೆ. ಅಂಥಾ ಸಮರ್ಥವಾದ ಕಥೆಯನ್ನು ನಿರೂಪಣೆ ಮಾಡೋ ಹಾದಿಯಲ್ಲಿ ನಿರ್ದೇಶಕ ಶಶಾಂಕ್ ಅಲ್ಲಲ್ಲಿ ಮುಗ್ಗರಿಸಿದ್ದಾರೆ. ಆದರೆ, ಕ್ಲೈಮ್ಯಾಕ್ಸಿನಲ್ಲಿಯೇ ಒಂದಷ್ಟು ಟ್ವಿಸ್ಟುಗಳು ಮತ್ತು ನಗು ಬೆರೆಸುವ ಮೂಲಕ ಎಲ್ಲವನ್ನೂ ಬ್ಯಾಲೆನ್ಸ್ ಮಾಡಿದ್ದಾರೆ. ಒಟ್ಟಾರೆಯಾಗಿ ಬ್ರ್ಯಾಟ್ ಸಿನಿಮಾ ಈ ಜನರೇಷನ್ನಿನ ಹುಡುಗರ ಮನಃಸ್ಥಿತಿಗೆ ತಕ್ಕುದಾಗಿ, ಒಂದು ಭಯಾನಕ ಮಾಫಿಯಾದ ಗರ್ಭದೊಳಗಿನ ಜಗತ್ತನ್ನು ದೃಷ್ಯಗಳಲ್ಲಿ ಹಿಡಿದಿಡುವ ಮೂಲಕ ಪ್ರೇಕ್ಷಕರನ್ನು ತೃಪ್ತಗೊಳಿಸುತ್ತೆ!

The post Brat Movie Review: ಕಥೆ ರೋಚಕ; ಅರ್ಜುನ್ ಜನ್ಯಾ ಕೈಚಳಕ ಭಯಾನಕ! appeared first on Cini Shodha.

ಶಶಾಂಕ್ ನಿರ್ದೇಶನದ ಚಿತ್ರವೆಂದ ಮೇಲೆ, ಅದು ಯಾವುದೇ ಜಾನರಿನದ್ದಾಗಿದ್ದರೂ ಕುಟುಂಬ ಸಮೇತವಾಗಿ ನೋಡಿಸಿಕೊಳ್ಳುವ ಗುಣ ಹೊಂದಿರುತ್ತದೆ. ಆ ನಂಬಿಕೆ ಕೌಸಲ್ಯ ಸುಪ್ರಜಾ ರಾಮ ಚಿತ್ರದ ಮೂಲಕವೂ ನಿಜವಾಯಿತಾ? ಟ್ರೈಲರ್‌ನಲ್ಲಿದ್ದ ಬಿಸುಪು ಒಂದಿಡೀ ಚಿತ್ರದಲ್ಲಿಯೂ ಅಡಕವಾಗಿದೆಯಾ? ಅಷ್ಟಕ್ಕೂ ಶಶಾಂಕ್ ಈ ಮೂಲಕ ಯಾವ ಥರದಲ್ಲಿ ಮ್ಯಾಜಿಕ್ ಮಾಡಿದ್ದಾರೆ? ಇಂಥಾ ಪ್ರಶ್ನಗಳನ್ನಿಟ್ಟುಕೊಂಡು ಸಿನಿಮಾ ಮಂದಿರ ಹೊಕ್ಕವರಿಗೆ ಒಂದಷ್ಟು ಕೊರತೆಗಳಾಚೆಗೂ ಮಧುರಾನುಭೂತಿ ನೀಡುವಲ್ಲಿ ಈ ಸಿನಿಮಾ ಗೆದ್ದಿದೆ. ಇದೀಗ ಚಿತ್ರರಂಗದಲ್ಲಿ ಬೇರೆಯದ್ದೇ ಧಾಟಿಯ ಭರಾಟೆ ಶುರುವಾಗಿದೆ. ಬಹುತೇಕರು ಆಕ್ಷನ್ ಗುಂಗಿಗೆ ಬಿದ್ದು, ಅದಕ್ಕೆ ತಕ್ಕುದಾದ ದೃಷ್ಯ ಹೊಸೆಯುತ್ತಿದ್ದಾರೆ. ಇಂಥಾ ಹೊತ್ತಿನಲ್ಲಿ ಮತ್ತೊಂದು ದಿಕ್ಕಿನತ್ತ ಹೊರಳಿಕೊಳ್ಳಲು ಶಶಾಂಕ್ ಮನಸು ಮಾಡಿರೋದೇ ಮೆಚ್ಚಿಕೊಳ್ಳುವಂಥಾ ವಿಚಾರ. ಆದರೆ, ಅದು ನಿರೀಕ್ಷಿತ ಪ್ರಮಾಣದ ತುದಿ ಮುಟ್ಟಿಲ್ಲ ಅನ್ನೋದೇ ತಕರಾರು!

ಹಾಗೆ ನೋಡಿದರೆ, ಟ್ರೈಲರ್‌ನಲ್ಲಿ ಕಾಣಿಸಿದ್ದಕ್ಕೂ ಮಧ್ಯಂತರದವರೆಗೆ ತೆರೆದುಕೊಳ್ಳುವ ದೃಷ್ಯಗಳಿಗೂ ಹೆಚ್ಚೇನೂ ವ್ಯತ್ಯಾಸವಿಲ್ಲ. ಗಂಡಸ್ತನದ ಅಹಮ್ಮಿಕೆಯನ್ನು ಅಪಾದಮಸ್ತಕ ಹೊದ್ದುಕೊಂಡ ತಂದೆ, ಅಂಥಾ ಅಹಮ್ಮಿಕೆಯನ್ನೆಲ್ಲ ಗಾಢವಾದ ಪ್ರೀತಿಯ ಮೂಲಕವೇ ತಣಿಸುವ ಸ್ವಭಾವದ ಅಮ್ಮ ಮತ್ತು ಅದಾಗತಾನೇ ಜಗತ್ತಿನತ್ತ ಕಣ್ತೆರೆಯುತ್ತಿರೋ ಮಗ… ಅಪ್ಪನೆಂಬೋ ಪುರುಷಹಂಕಾರದ ಮೂಟೆ, ತನ್ನ ಬುದ್ಧಿಯನ್ನೇ ಮಗನಿಗೂ ಧಾರೆಯೆರೆದು ಬೆಳೆಸುತ್ತಾನೆ. ಬುದ್ಧಿ ಬಲಿಯುವ ಮುನ್ನವೇ ಗಂಡಸ್ತನದ ತಿಮಿರು ಮೂಡಿಸಿಕೊಂಡು ಬೆಳೆಯುವ ಮಗನ ವ್ಯಕ್ತಿತ್ವಕ್ಕೂ ಅದು ಅನಾಯಾಸವಾಗಿ ಅಂಟಿಕೊಳ್ಳುತ್ತೆ. ಅದು ಕಾಲೇಜು ಹಂತ ದಾಟಿ, ಕೆಲಸ ಹಿಡಿದ ಮೇಲೂ ಮುಂದುವರೆಯುತ್ತೆ.

ಈ ನಡುವೆ ಕಾಲೇಜಿನಲ್ಲೇ ಗಂಡಸ್ತನದ ಕಿರೀಟ ಹೊತ್ತುಕೊಂಡಿದ್ದ ನಾಯಕನನ್ನು ಹುಡುಗಿಯೊಬ್ಬಳು ಮೋಹಿಸುತ್ತಾಳೆ. ಹೇಗೋ ಕೊಸರಾಡಿಕೊಂಡು ನಾಯಕನೂ ಲವ್ವಲ್ಲಿ ಬೀಳುತ್ತಾನೆ. ಪ್ರೀತಿಯಿರುವ ಜಾಗವನ್ನು ಒಣ ಅಹಮ್ಮಿಕೆ ಆಳಲು ಸಾಧ್ಯವಾಗೋದಿಲ್ಲ. ಈ ಮಾತಿಗೆ ತಕ್ಕುದಾಗಿ ಪ್ರೀತಿಯಲ್ಲಿ ಬಿರುಕು. ಅದರ ಫಲವಾಗಿ ಬ್ರೇಕಪ್ಪು. ಅಹಮ್ಮಿಕೆಯ ಒಡಲಲ್ಲೇ ಪ್ರೀತಿ ಸಾಕಿಕೊಂಡರೂ, ಅದನ್ನು ತೋರ್ಪಡಿಸಿಕೊಳ್ಳಲಾಗದ ಒಣ ಜಂಭ ನಾಯಕನ ಮನಸನ್ನಾವರಿಸುತ್ತೆ. ಆ ನಂತರ ನಡೆಯುವ ಘಟನಾವಳಿಗಳೇ ಈ ಸಿನಿಮಾದ ಜೀವಾಳ. ಅದಾದ ಬಳಿಕ ಸೆಂಟಿಮೆಂಟಿನ ಕಥನಗಳು, ಅನಿರೀಕ್ಷಿತ ತಿರುವುಗಳು ಮೂಡಿಕೊಳ್ಳುತ್ತವೆ. ಅವೆಲ್ಲವೂ ಅನಾಯಾಸವಾಗಿ ನೋಡಿಸಿಕೊಳ್ಳುತ್ತವೆ.

ಪುರುಷ ಘನತೆಯನ್ನು ನೆತ್ತಿ ಮೇಲಿಟ್ಟುಕೊಂಡು, ಹೆಣ್ಣನ್ನು ನಿಕೃಷ್ಟವಾಗಿ ಕಾಣೋ ನಾಯಕನಿಗೆ ಎಂಥಾ ಹುಡುಗಿ ಬಾಳ ಸಂಗಾತಿಯಾಗಿ ಸಿಗುತ್ತಾಳೆ? ಆ ನಂತರದಲ್ಲಿ ಎಂತೆಂಥಾ ವಿದ್ಯಮಾನಗಳು ಜರುಗುತ್ತವೆಂಬುದರಲ್ಲಿಯೇ ಈ ಚಿತ್ರದ ಆತ್ಮವಿದೆ. ಅದರೊಳಗೆ ಮನಸಿಗೆ ತಾಕುವ, ಬದುಕಲ್ಲಿ ಅಳವಡಿಸಿಕೊಳ್ಳಬೇಕೆನ್ನಿಸುವ ಒಂದಷ್ಟು ಪಲ್ಲಟಗಳೂ ಎದುರಾಗುತ್ತವೆ. ಡಾರ್ಲಿಂಗ್ ಕೃಷ್ಣ ಇಲ್ಲಿ ಭಿನ್ನ ಶೇಡಿನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಅದಕ್ಕವರು ಯಾಯವನ್ನೂ ಸಲ್ಲಿಸಿದ್ದಾರೆ. ಬೃಂದಾ ಆಚಾರ್ಯ ತನ್ನ ಇಮೇಜಿಗೆ ತಕ್ಕಂತೆ ನಟಿಸಿದ್ದಾರೆ. ಇನ್ನುಳಿದಂತೆ, ಮಿಲನಾ ನಾಗರಾಜ್ ಈ ಸಿನಿಮಾದಲ್ಲಿ ನಟಿಸಿದ್ದಾಎಂಬುದನ್ನೇ ಚಿತ್ರತಂಡ ಮರೆಮಾಚಿಕೊಂಡು ಬಂದಿತ್ತು. ಆದರೆ, ಆಕೆಯ ಪಾತ್ರವೇ ಇಲ್ಲಿ ಮಹಾ ತಿರುವುಗಳನ್ನು ತಂದೊಡ್ಡುತ್ತದೆ. ಅದರ ಮೂಲಕವೇ ಕುಂಟುತ್ತಾ ಸಾಗೋ ಕಥೆಗೊಂದು ಓಘ ಕೊಡುತ್ತಾ, ಜೊತೆ ಜೊತೆಗೆ ಒಂದಷ್ಟು ಗಂಭೀರ ವಿಚಾರಗಳನ್ನೂ ಶಶಾಂಕ್ ದಾಟಿಸಿದ್ದಾರೆ. ಆ ಪಾತ್ರದ ಸುತ್ತಲೇ ಈ ಸಮಾಜಕ್ಕೆ, ಅಲ್ಲಿ ಹಾಸುಹೊಕ್ಕಾಗಿರುವ ಮನಸ್ಥಿತಿಗಳಿಗೆ ಕನ್ನಡಿಯನ್ನೂ ಹಿಡಿದಿದ್ದಾರೆ.

ಇನ್ನುಳಿದಂತೆ, ಕಾಲೇಜೂ ಸೇರಿದಂತೆ ಒಂದಷ್ಟು ದೃಷ್ಯಾವಳಿಗಳು ಅದೇಕೋ ಪೇಲವವೆನ್ನಿಸುತ್ತವೆ. ಮೊದಲಾರ್ಧಕ್ಕೆ ಇನ್ನಷ್ಟು ಆವೇಗವಿದ್ದಿದ್ದರೆ ಮತ್ತೊಂದಷ್ಟು ಮುದವಿರುತ್ತಿತ್ತು. ಇಂಥಾ ಮಿತಿಗಳಾಚೆಗೂ ಕೌಸಲ್ಯ ಸುಪ್ರಜಾ ರಾಮಾ ಈ ದಿನಮಾನದ ಮಟ್ಟಿಗೆ ಕೊಂಚ ಅಪರೂಪದ ಚಿತ್ರವಾಗಿ ಕಾಣಿಸುತ್ತದೆ. ಪ್ರೇಕ್ಷಕರು ಕುಟುಂಬ ಸಮೇತರಾಗಿ ಬಂದು ನೋಡಿ ನಿಸೂರಾಗುವಂಥಾ ಅವಕಾಶವನ್ನೂ ಕಲ್ಪಿಸಿದೆ. ಶಶಾಂಕ್ ಕನ್ನಡ ಚಿತ್ರರಂಗದಲ್ಲಿ ಭಿನ್ನ ಪಥದ ಜಾಡು ಹಿಡಿದು ಹೊರಟಿರುವ ನಿರ್ದೇಶಕ. ಚಿತ್ರದಿಂದ ಚಿತ್ರಕ್ಕೆ ಅವರು ಪಕ್ವವಾಗುತ್ತಾ ಬಂದಿದ್ದಾರೆ. ಈ ಕಥೆ, ನಿರೂಪಣೆ, ಮತ್ತು ದೃಷ್ಯ ಕಟ್ಟುವ ಬಗೆಯಲ್ಲಿ ಒಂದಷ್ಟು ಪರಿಣಾಮಕಾರಿಯಾಗಿ ಆಲೋಚಿಸಿದ್ದರೆ, ಈ ಚಿತ್ರ ಮತ್ತೊಂದಷ್ಟು ಚೆಂದಗೆ ಮೂಡಿ ಬರುತ್ತಿತ್ತೇನೋ… ಒಟ್ಟಾರೆಯಾಗಿ ಕೌಸಲ್ಯ ಸುಪ್ರಜಾ ರಾಮ ಕುಟುಂಬ ಸಮೇತವಾಗಿ ಒಂದು ಸಲ ನೋಡಬಹುದಾದ ಚಿತ್ರ…

The post movie review: ಕೌಸಲ್ಯಾ ಸುಪ್ರಜಾ ರಾಮ ಸಿನಿಮಾ ವಿಮರ್ಶೆ… appeared first on Cini Shodha.