ಪೂರ್ಣಚಂದ್ರ ತೇಜಸ್ವಿ ಅವರ ಕಾದಂಬರಿಗಳು ಸಿನಿಮಾ ರೂಪ ಧರಿಸಬೇಕೆಂಬುದು ಅವರ ಓದುಗರೆಲ್ಲರ ಬಯಕೆ. ಅದು ಆಗಾಗ ಸಾಕಾರಗೊಳ್ಳುತ್ತಾ ಬಂದಿತ್ತು. ಇತ್ತೀಚೆಗಷ್ಟೇ ಡೇರ್ ಡೆವಿಲ್ ಮುಸ್ತಫಾ ಅಂತೊಂದು ಸಿನಿಮಾ ತೆರೆಗಂಡು ಮೆಚ್ಚುಗೆ ಗಳಿಸಿಕೊಂಡಿತ್ತು. ಹೀಗೆ ತೇಜಸ್ವಿ ಕಥನಗಳು ದೃಷ್ಯ ರೂಪ ಧರಿಸಬೇಕೆಂಬ ಇಂಗಿತ ಹೊಂ ದಿದ್ದವರ ಪ್ರಧಾನ ಆಯ್ಕೆಯಾಗಿದ್ದದ್ದು ಜಗಾರಿ ಕ್ರಾಸ್. ಇದೀಗ ಗುರುದತ್ ಗಾಣಿಗ ಅದನ್ನೇ ಕೈಗೆತ್ತಿಕೊಂಡಿದ್ದಾರೆ. ಅದರಲ್ಲಿನ ಮುಖ್ಯ ಪಾತ್ರವನ್ನು ರಾಜ್ ಬಿ ಶೆಟ್ಟಿ ನಿರ್ವಹಿಸಲಿದ್ದಾರೆಂಬ ಮಾಹಿತಿಯೂ ಹೊರಬಿದ್ದಿದೆ. ಸದ್ಯದ ಮಟ್ಟಿಗೆ ಸಾಹಿತ್ಯ ಕ್ಷೇತ್ರದಲ್ಲಿಯೂ ಗುರುದತ್ ಸಾಹಸದ ಬಗೆಗಿನ ಚರ್ಚೆಗಳು ಕಾವುಗಟ್ಟಿಕೊಂಡಿವೆ.

ಯಾವುದೇ ಕಥೆ, ಕಾದಂಬರಿಗಳನ್ನು ಸಿನಿಮಾ ಚೌಕಟ್ಟಿಗೆ ಒಗ್ಗಿಸೋದು ತ್ರಾಸದಾಯಕ ಕೆಲಸ. ಅದರಲ್ಲಿಯೂ ತೇಜಸ್ವಿ ಕಥನಗಳು ಮತ್ತೊಂದಷ್ಟು ಸವಾಲುಗಳನ್ನೊಡ್ಡುತ್ತವೆ. ಅದರಲ್ಲಿಯೂ ಪಕ್ಕಾ ಕಮರ್ಶಿಯಲ್ ಧಾಟಿಯಲ್ಲಿ ಗುರುದತ್ ಜುಗಾರಿ ಕ್ರಾಸ್‌ಗೆ ದೃಷ್ಯರೂಪ ಕೊಡಲು ಮುಂದಾಗಿದ್ದಾರೆ. ಸದ್ಯದ ಮಟ್ಟಿಗೆ ಕರಾವಳಿ ಅಂತೊಂದು ನ ಎಲಮೂಲದ ಕಥೆಯನ್ನು ಆತ ನಿರ್ದೇಶನ ಮಾಡುತ್ತಿದ್ದಾರೆ. ಅದರ ಬೆನ್ನಲ್ಲಿಯೇ ಜುಗಾರಿ ಕ್ರಾಸ್ಗೆ ಚಾಲನೆ ಸಿಕ್ಕಿದೆ. ಇಂಥಾ ಘಳಿಗೆಯಲ್ಲಿ ಗುರುದತ್‌ಗೆ ಜುಗಾರಿ ಕ್ರಾಸ್ ಅನ್ನು ದೃಷ್ಯದಲ್ಲಿ ಸಮರ್ಥವಾಗಿ ಹಿಡಿಕದಿಡುವ ಛಾತಿ ಇದೆಯಾ ಎಂಬ ದಿಕ್ಕಿನಲ್ಲಿಯೂ ಚರ್ಚೆಗಳು ನಡೆಯುತ್ತಿವೆ. ಒಂದು ವೇಳೆ ಈ ಹುಡುಗ ಪರಿಣಾಮಕಾರಿಯಾಗಿ ನಿರ್ದೇಶನ ಮಾಡಿದರೆ ಜುಗಾರಿ ಕ್ರಾಸ್ ದಾಖಲೆ ಸೃಷ್ಟಿಸಬಹುದಾದ ಎಲ್ಲ ಸಾಧ್ಯತೆಗಳೂ ನಿಚ್ಚಳವಾಗಿವೆ!

The post Jugari Cross Movi: ಮತ್ತೆ ಪೂರ್ಣಚಂದ್ರ ತೇಜಸ್ವಿ ಮ್ಯಾಜಿಕ್! appeared first on Cini Shodha.

ಓರ್ವ ನಟನಾಗಿ, ನಿರ್ದೇಶಕನಾಗಿ, ನಿರ್ಮಾಪಕನಾಗಿಯೂ ಕೂಡಾ ರಾಜ್ ಶೆಟ್ಟಿಯದ್ದು ಭಿನ್ನ ಪಥ. ಇತ್ತೀಚೆಗಷ್ಟೆ ತೆರೆಗಂಡು ಸೂಪರ್ ಹಿಟ್ ಆಗಿರುವ ಸು ಫ್ರಂ ಸೋ ಚಿತ್ರ ಓರ್ವ ನಿರ್ಮಾಪಕನಾಗಿ ರಾಜ್ ಶೆಟ್ಟಿಯ ಕಸುವಿಗೊಂದು ಉದಾಹರಣೆಯಂತೆ ಕಾಣಿಸುತ್ತೆ. ಈ ನಡುವೆ ನಟನಾಗಿಕ ಬೇರೆ ನಿರ್ದೇಶಕರ ಸಿನಿಮಾಗಳಲ್ಲಿಯೂ ಕೂಡಾ ರಾಜ್ ಶೆಟ್ಟರಿಗೆ ಒಳ್ಳೆ ಅವಕಾಶಗಳೇ ಕೂಡಿ ಬರುತ್ತಿವೆ. ಗುರುದತ್ ಗಾಣಿಗ ನಿರ್ದೇಶನದ ಕರಾವಳಿ ಚಿತ್ರದಲ್ಲಿ ರಾಜ್ ಪಾತ್ರದ ಝಲಕ್ಕೊಂದೀಗ ಭಾರೀ ಚರ್ಚೆ ಹುಟ್ಟು ಹಾಕಿದೆ. ರಾಜ್ ಶೆಟ್ಟಿ ಇಲ್ಲಿ ಮಾವೀರನಾಗಿ ಮಿಂಚಲಿರೋದು ಪಕ್ಕಾ.

ಗುರುದತ್ ಗಾಣಿಗ ಈ ಹಿಂದೆ ಅಂಬಿ ನಿಂಗ್ ವಯಸ್ಸಾಯ್ತೋ ಅಂತೊಂದು ಸಿನಿಮಾ ನಿರ್ದೇಶನ ಮಾಡಿದ್ದರು. ಆ ಮೂಲಕ ದೊಡ್ಡ ಮಟ್ಟದಲ್ಲಿ ಗೆಲುವು ದಕ್ಕದಿದ್ದರೂ ಒಂದಷ್ಟು ಮೆಚ್ಚುಗೆಯನ್ನಂತೂ ಪಡೆದುಕೊಂಡಿದ್ದರು. ಕರಾವಳಿ ಮೂಲಕ ಈತ ಪಕ್ಕಾ ಮಾಸ್ ಕಂಟೆಂಟಿನತ್ತ ಮುಖಮಾಡಿದಂತೆ ಕಾಣಿಸುತ್ತಿದೆ. ಅದೆಲ್ಲ ಏನೇ ಇದ್ದರೂ ರಾಜ್ ಶೆಟ್ಟಿ ಆ ಪಾತ್ರವನ್ನು ಒಲಪ್ಪಿಕೊಂಡಿದ್ದಾರೆಂದ ಮೇಲೆ ಒಟ್ಟಾರೆ ಕಂಟೆಂಟು ಚೆಂದಗಿತ್ತೆಂದೇ ಅರ್ಥ. ಅಂಥಾದ್ದೊಂದು ನಂಬಿಕೆ ಕನ್ನಡದ ಸಮಸ್ತ ಸಿನಿಮಾ ಪ್ರೇಮಿಗಳಲ್ಲಿಯೂ ಮೂಡಿಕೊಂಡಿದೆ. ಬಹುಶಃ ಅದು ಅತ್ಯಂತ ಕಡಿಮೆ ಅವಧಿಯಲ್ಲಿ ರಾಜ್ ಶೆಟ್ಟಿ ಜನರ ನಂಬಿಕೆ ಸಂಪಾದಿಸಿದ್ದಕ್ಕೊಂದು ಉದಾಹರಣೆಯಷ್ಟೆ.

ಹೀಗೆ ರಾಜ್ ಶೆಟ್ಟಿ ಕರಾವಳಿಯಲ್ಲಿ ಮಾವೀರನಾದ ವಿಚಾರದ ಆಸುಪಾಸಲ್ಲಿಯೇ ಮತ್ತೊಂದು ದಿಕ್ಕಿನ ಗಂಭೀರ ಚರ್ಚೆಯೂ ಶುರುವಾಗಿದೆ. ಕನ್ನಡ ಚಿಕತ್ರರಂಗಕ್ಕೆ ಆಗಾಗ ಉಸಿರು ನೀಡುತ್ತಿರೋದು ಕಡಲ ಕಿನಾರೆಯ ಕಥೆಗಳೇ ಎಂಬುದು ಆ ಚರ್ಚೆಯ ಮೂಲ. ಒಂದು ಕಾಲದಲ್ಲಿ ಹಳ್ಳಿ ಸೊಗಡೆಂದರೆ ಮಂಡ್ಯ ಸೀಮೆಯ ಟಿಪಿಕಲ್ ಶೈಲಿಯ ಭಾಷೆ, ಜನಜೀವನ ಮಾತ್ರ ಎಂಬಂತಾಗಿತ್ತು. ಬಹುತೇಕ ಎಲ್ಲ ನಿರ್ದೇಶಕರೂ ಕೂಡಾಶ ತಮ್ಮ ಮೂಲ ಬೇರುಗಳನ್ನೇ ಕಿತ್ತಿಟ್ಟುಕೊಂಡವರಂತೆ ಅಂಥಾದ್ದೊಂದು ಸೂತ್ರಕ್ಕೆ ಪಕ್ಕಾಗಿದ್ದರು. ಆದರೀಗ ಕರಾವಳಿಯ ನೆಲಮೂಲದ ಕಥನಗಳೂ ಮುನ್ನೆಲೆಗೆ ಬಂದಿವೆ. ಇದೇ ರೀತಿ ಕರ್ನಾಟಕದ ಬೇರೆ ಬೇರೆ ಭೂಭಾಗಗಳ ಮಣ್ಣಿನ ಘಮ ಹೊದ್ದ ಕಥೆಗಳತ್ತ ಗಮನ ಹರಿಸಿದರೆ ಬಹುಶಃ ಕನ್ನಡ ಚಿತ್ರರಂಗದ ಪಾಲಿಗೆ ಸುವರ್ಣ ಯುಗವೊಂದು ಆರಂಭವಾದೀತೇನೋ…

The post raj b shetty: ಕನ್ನಡ ಚಿತ್ರರಂಗದಲ್ಲೀಗ ಕಿನಾರೆಯ ಕಥೆಗಳದ್ದೇ ಹವಾ! appeared first on Cini Shodha.

ಈ ಚಿತ್ರ ತೆರೆದುಕೊಳ್ಳೋದೇ ಉತ್ತರ ಕನ್ನಡ ಸೀಮೆಯ ಕಮಟಾ ಎಂಬೂರಿನ ಪೊಲೀಸ್ ಠಾಣೆಯ ಮೂಲಕ. ಅಲ್ಲಿಗೆ ಹೊಸದಾಗಿ ಬಂದ ನರರಹಿತ ಪೊಲೀಸನೊಬ್ಬನ ಹಿನ್ನೆಲೆಯಲ್ಲಿ ತೆರೆದುಕೊಳ್ಳುವ ಕಥೆ ನೇರವಾಗಿ ಟೋಬಿಯ ಜಾಡು ಹಿಡಿಯುತ್ತೆ. ಒಂದು ಮಟ್ಟಿಗೆ ಮೊದಲಾರ್ಧವೇ ಪರವಾಗಿಲ್ಲ; ದ್ವಿತೀಯಾರ್ಧವಂತೂ ಅಧ್ವಾನ. ಅಲ್ಲಿ ದೃಷ್ಯಗಳು ಎತ್ತೆತ್ತಲೋ ಚಲಿಸುತ್ತವೆ. ಮಾರಿಯ ಅವತಾರದ ಟೋಬಿ, ಚಿಮ್ಮುವ ರಕ್ತ, ಖೂಳರ ಅಟ್ಟಹಾಸದ ನಡುವೆ ಪಾತ್ರಗಳ ಸಂವೇದನೆ, ಕಣ್ಣೀರುಗಳೆಲ್ಲವೂ ಮಾಸಲಾಗಿರುತ್ತವೆ. ಪ್ರೇಕ್ಷಕರ ಮನಸಿಗೆ ಅದಾಗಲೇ ಒಂದಷ್ಟು ಲೇಯರುಗಳ ರಕ್ತ ಮೆತ್ತಿಕೊಂಡಿರೋದರಿಂದ, ತೀವ್ರವಾಗಿ ಕಾಡುವ ಗುಣ ಹೊಂದಿದ್ದ ಒಂದಷ್ಟು ದೃಷ್ಯಗಳು ತಾಕದೆ ಉಳಿದುಬಿಡುತ್ತವೆ.

ಈ ಸಿನಿಮಾ ನಿರ್ದೇಶಕ ರಾಜ್ ಬಿ ಶೆಟ್ಟಿಯ ಪಟ್ಟದ ಶಿಷ್ಯ. ಹಾಗಿರುವಾಗ ಶೆಟ್ಟರು ತಾವೇ ನಿರ್ದೇಶನದಲ್ಲಿಯೂ ಕೈಯಾಡಿಸಿರುತ್ತಾರೆಂಬುದು ಬಹಿರಂಗ ಸತ್ಯ. ಆದರೆ, ನಿರ್ದೇಶನದ ಪಟ್ಟುಗಳನ್ನು ಕರಗತ ಮಾಡಿಕೊಂಡಿರೋ ರಾಜ್ ಬಿ ಶೆಟ್ಟಿ ಕೂಡಾ ಯಾಕೆ ಯಾಮಾರಿದರೆಂಬ ಪ್ರಶ್ನೆಯೊಂದು ಪ್ರೇಕ್ಷಕರನ್ನೆಲ್ಲ ಬಿಡದೇ ಕಾಡುತ್ತೆ. ಇದರಾಚೆಗೆ ರಾಜ್ ಶೆಟ್ಟರ ನಟನೆ ಮಾತ್ರ ಖಂಡಿತಾ ಫಲ್ ಮಾಕ್ರ್ಸ್ ಪಡೆದುಕೊಳ್ಳುತ್ತೆ. ಈ ಮೂಲಕ ಅವರೋರ್ವ ಅಪರೂಪದ ಕಲಾವಿದ ಎಂಬುದು ಮತ್ತೆ ಸಾಬೀತಾಗುತ್ತದೆ. ಚೈತ್ರಾ ಆಚಾರ್ ಕೂಡಾ ಶೆಟ್ಟರಿಗೆ ಪೈಪೋಟಿ ನೀಡುವಂತೆ ನಟಿಸಿದ್ದಾರೆ. ಇಷ್ಟಿದ್ದರೂ ಕೂಡಾ ಟೋಬಿ ಯಾವ ಹಂತದಲ್ಲಿಯೂ ನಿರೀಕ್ಷೆಯ ಮಟ್ಟ ಮುಟ್ಟುವುದಿಲ್ಲ. ಭರೀ ನಿರೀಕ್ಷೆಯಿಟ್ಟುಕೊಂಡು ಬಂದ ಪ್ರೇಕ್ಷಕರ ಮನ ತಣಿಸುವುದಿಲ್ಲ. ಅದು ಟೋಬಿಯ ಬಹುದೊಡ್ಡ ಕೊರತೆ.

ಗಮನೀಯ ಅಂಶವೆಂದರೆ, ರಾಜ್ ಶೆಟ್ಟಿ ಗರುಡ ಗಮನ ವೃಷಭ ವಾಹನದ ಗೆಲುವನ್ನು ಮನಸಲ್ಲಿಟ್ಟುಕೊಂಡೇ, ದಯಾನಂದ್ ಅವರ ಕೆಗೆ ಸಿನಿಮಾ ರೂಪ ಕೊಟ್ಟಿದ್ದಾರೆ. ಅದರ ಫಲವಾಗಿಯೇ ಟೋಬಿಯ ಮೇಲೆ ಗರುಡನ ಛಾಯ ಪ್ರತೀ ಸೀನುಗಳಲ್ಲಿಯೂ ಕಾಣಿಸುತ್ತೆ. ಹಾಗೆ ನೋಡಿದರೆ, ಕಾಂತಾರದ ಕ್ಲೈಮ್ಯಾಕ್ಷಿನಲ್ಲಿಯೂ ಶೆಟ್ಟರು ಅದೇ ಪಟ್ಟು ಪ್ರದರ್ಶಿಸಿದ್ದರು. ಗರುಡ ಗಮನದ ಫಾರ್ಮುಲಾವನ್ನು ಪರಿಣಾಮಕಾರಿಯಾಗಿ ಬಳಸಿಕೊಂಡಿದ್ದರೂ ಟೋಬಿಯ ಖದರ್ರು ಬೇರೆಯದ್ದಿರುತ್ತಿತ್ತೋ ಏನೋ… ಆದರೆ, ಟೋಬಿಗಿಲ್ಲಿ ಆ ಖದರ್ರು ಕೂಡಾ ಇಲ್ಲ. ರಾಜ್ ಶೆಟ್ಟಿ ಗರುಡಗಮನ ವೃಷಭ ವಾಹನದಲ್ಲಿ ನೆಲದ ಘಮಲು ಬೆರೆತ ಕಥೆಗೆ ಕಮರ್ಶಿಯಲ್ ಸ್ಪರ್ಶ ನೀಡಿ ಗೆದ್ದಿದ್ದರು. ಇಲ್ಲಿಯೂ ಸಹ ಅವೆರಡೂ ಇಮೇಜುಗಳನ್ನು ಒಟ್ಟೊಟ್ಟಿಗೆ ಮ್ಯಾನೇಜು ಮಾಡಲು ಹೋಗಿ ಶೆಟ್ಟರು ಮುಗ್ಗರಿಸಿದಂತಿದೆ.

ಇನ್ನುಳಿದಂತೆ ತೀರಾ ನಿಧಾನಗತಿಯ ಚಲನೆ ಕೂಡಾ ಟೋಬಿಗೆ ಕೈ ಕೊಟ್ಟಿದೆ. ಅದು ಸಿನಿಮಾ ಮಂದಿರವನ್ನು ಕೆಲ ಘಟ್ಟಗಳಲ್ಲಿ ಅಸಹನೆಯಾಗಿ ಆವರಿಸಿಕೊಂಡು ಬಿಡುತ್ತದೆ. ಅಂಥಾ ದೃಷ್ಯಗಳಲ್ಲಿ ಪ್ರೇಕ್ಷಕರು ವಿಲಗುಟ್ಟೋದನ್ನು ನೋಡಿದಾಗ, ಇದು ಓಟಿಟಿಗೆ ಮಾತ್ರವೇ ಸಹ್ಯವಾಗಬಹುದೇನೋ ಅನ್ನಿಸುತ್ತೆ. ಯಾಕೆಂದರೆ, ಅಲಿ ಫಾಸ್ಟ್ ಫಾರ್ವರ್ಡ್ ಆಪ್ಷನ್ನಿರುತ್ತದೆ. ಇನ್ನುಳಿದಂತೆ ಚಿತ್ರತಂಡ ಪ್ರಮೋಷನ್ನಿನಲ್ಲಿ ಬಿಂಬಿಸಿದ್ದ ರೀತಿಗೂ, ಸಿನಿಮಾದೊಳಗಿನ ವಾಸ್ತವಕ್ಕೂ ಅಜಗಜಾಂತರ ವ್ಯತ್ಯಾಸವಿದೆ. ಯಾಕೆಂದರೆ, ಕುರಿಯೊಂದು ಮಾರಿಯಾಗುವ ರೂಪಕವನ್ನಿಟ್ಟುಕೊಂಡು ಟೋಬಿ ಪಾತ್ರವನ್ನು ಬಿಂಬಿಸಲಾಗಿತ್ತು. ಆದರೆ, ಸಿನಿಮಾದಲ್ಲಿ ಮಾತ್ರ ಕುರಿಯಂತೆ ಒತ್ತಾಯಪೂರ್ವಕವಾಗಿ ಬಿಂಬಿಸಿದ್ದ ಮಾರಿಯೇ ಎದುರಾಗುತ್ತೆ. ಟೋಬಿ ಅನ್ನೋದೊಂದು ಪಕ್ಕಾ ವೈಲೆಂಟ್ ಪಾತ್ರ. ಒಂದು ವೇಳೆ ಕುರಿಯೊಂದು ಮಾರಿಯಾಗೋ ಅಲೀ ಕಾನ್ಸೆಪ್ಟ್ ಇದ್ದಿದ್ದರೆ ಅದರ ಮಜವೇ ಬೇರೆಯದ್ದಿರುತ್ತಿತ್ತೇನೋ.

ಹೀರೋ ಕ್ಯಾರೆಕ್ಟರಿಗಿಲ್ಲಿ ಚಾಲೆಂಜುಗಳೇ ಇಲ್ಲ. ರಾಜ್ ಶೆಟ್ಟಿ ಯಾವ ಭಿನ್ನ ಗೆಟಪ್ಪಿನಲ್ಲಿಯೂ ಪ್ರೇಕ್ಷಕರನ್ನು ಅಚ್ಚರಿಗೀಡು ಮಾಡೋದಿಲ್ಲ. ಅದೆಲ್ಲವನ್ನೂ ಬಿಡುಗಡೆಯ ಪೂರ್ವದಲ್ಲಿಯೇ ತೆರೆದಿಟ್ಟಿರೋದರಿಂದ, ಒಂದು ಸಿನಿಮಾದ ನಿಜವಾದ ಮುದವೇ ಮರೆಯಾದಂತಿದೆ. ಒಂದು ಕೋನದಲ್ಲಿ ಆರ್ಟ್ ಮೂವಿಯಂತೆ ಗೋಚರಿಸೋ ಈ ಚಿತ್ರದಲ್ಲಿ, ಪಕ್ಕಾ ಕಮರ್ಶಿಯಲ್ ಜಾಡಿನ ಫೈಟುಗಳು ಪ್ರೇಕ್ಷಕರನ್ನು ಕೆಕರುಮಕರಾಗಿಸುತ್ತವೆ. ರಾಜ್ ಶೆಟ್ಟಿ ಈ ಸಿನಿಮಾದಲ್ಲಿ ಸ್ಕ್ರಿಫ್ಟ್, ಸ್ಕ್ರೀನ್ ಪ್ಲೇನಲ್ಲಿಯೂ ಎಡವಿದ್ದಾರೆ. ತಮ್ಮ ಪಾತ್ರದಲ್ಲಿ ತಾವು ತನ್ಮಯರಾಗಿ ನಟಿಸುತ್ತಾ, ಮಿಕ್ಕುಳಿದವುಗಳನ್ನು ಕಡೆಗಣಿಸಿದಂತೆಯೇ ಭಾಸವಾಗುತ್ತೆ. ಇನ್ನುಳಿದಂತೆ ಮಿಥುನ್ ಮುಕುಂದನ್ ಬಿಜಿಎಂ ಕೂಡಾ, ರಾಜ್ ಶೆಟ್ಟಿ ನಟನೆಯಷ್ಟೇ ಪರಿಣಾಮಕಾರಿಯಾಗಿದೆ. ನೆಲಮೂಲದ ಕಥೆಗಳನ್ನು ಹೆಕ್ಕಿ ತರುವಲ್ಲಿ ನಿಸ್ಸೀಮರಾದ ಟಿ.ಕೆ ದಯಾನಂದ್ ಅವರ ಕಥೆಯೂ ಚೆನ್ನಾಗಿದೆ. ಆದರೆ, ಅದು ಹಾಳೆಯಿಂದ ದೃಷ್ಯಕ್ಕಿಳಿಯುವಲ್ಲಿ ಅಸಲೀ ಕಸುವು ಕಳೆದುಕೊಂಡಿದೆ. ಒಟ್ಟಾರೆಯಾಗಿ ರಾಜ್ ಶೆಟ್ಟಿ ಕಡೆಯಿಂದ ಮಹತ್ತರವಾದುದೇನನ್ನೋ ನಿರೀಕ್ಷಿಸಿದ್ದ ಪ್ರೇಕ್ಷಕರಿಗೆ ನಿರಾಸೆಯಾಗಿರೋದಂತೂ ನಿಜ!

The post toby movie review: ಶೆಟ್ರು ತೋರಿಸಿದ್ದು ಬಂಗುಡೆ; ಥಿಯೇಟರಿನಲ್ಲಿ ಕಂಡಿದ್ದು ಸಣಕಲು ಬೂತಾಯಿ! appeared first on Cini Shodha.

ಈ ಟ್ರೈಲರ್ ಬಗ್ಗೆ ಒಂದಷ್ಟು ದೊಡ್ಡ ಧ್ವನಿಯ ಮೆಚ್ಚುಗೆಗಳು ಆರಂಭದಲ್ಲಿ ಕೇಳಿ ಬಂದಿದ್ದವು. ಅದರ ಮಗ್ಗುಲಲ್ಲಿಯೇ ಇಷ್ಟೇನಾ ಎಂಬಂಥಾ ಅತೃಪ್ತಿಯ ಅಲೆಯೆದ್ದಿದ್ದು ಕೂಡಾ ಸುಳ್ಳಲ್ಲ. ಒಂದಷ್ಟು ಹೊಸತನಗಳಿರುವಂತೆ ಭಾಸವಾಗುವ ಟೋಬಿ ಟ್ರಲರ್ ಬಗ್ಗೆ ಇಂಥಾದ್ದೊಂದು ನೆಗೆಟಿವ್ ವಿಮರ್ಶೆ ಮೂಡಿಕೊಳ್ಳಲು ಕಾರಣವೇನು? ಒಂದಷ್ಟು ಮಂದಿಗೆ ನಿರಾಸೆ ಕವುಚಿಕೊಂಡಿದ್ದರ ಹಿಂದಿರೋ ಮರ್ಮವೇನು? ಇಂಥಾ ಪ್ರಶ್ನೆಗಳನ್ನಿಟ್ಟುಕೊಂಡು, ಈ ಟ್ರೈಲರ್ ಅನ್ನು ಪರಾಮಾರ್ಶಿಸಿದರೆ, ಒಂದಷ್ಟು ಸೂಕ್ಷ್ಮಾತಿ ಸೂಕ್ಷ್ಮ ಅಂಶಗಳು ಪತ್ತೆಯಾಗುತ್ತವೆ. ಅದರಲ್ಲಿಯೇ ಅತೃಪ್ತಿಯ ಮೂಲವಿರೋದೂ ಕೂಡಾ ನಿಕ್ಕಿಯಾಗುತ್ತೆ.

ಟೋಬಿಯ ಟ್ರೈಲರ್‍ನ ತುಂಬಾ ಗರುಡ ಗಮನ ವೃಷಭ ವಾಹನ ಚಿತ್ರದ ನೆರಳು ದಟ್ಟವಾಗಿಯೇ ಗೋಚರಿಸುತ್ತಿದೆ. ಆ ಚಿತ್ರದ ಯಶಸ್ಸಿನ ಫಾರ್ಮುಲಾದ ಚುಂಗು ಹಿಡಿದೇ, ಶೆಟ್ಟರು ಟೋಬಿಯಲ್ಲಿನ ಮಾರಿತ್ತಿರೋದೂ ಕೂಡಾ ಸ್ಪಷ್ಟವಾಗುತ್ತದೆ. ಗರುಡ ಗಮನ ಚಿತ್ರದಲ್ಲಿ ಶೆಟ್ಟರ ಪಾತ್ರ ಜನರಿಗೆ ಹಿಡಿಸಲು ಬಹಳಷ್ಟು ಕಾರಣಗಳಿದ್ದವು.. ಆ ಮೂಲಕ ಅವರಿಗೊಂದು ಇಮೇಜು ಸುತ್ತಿಕೊಂಡಿತ್ತು. ಹಾಗೆ ನೋಡಿದರೆ, ರಾಜ್ ಬಿ ಶೆಟ್ಟಿಯಂಥಾ ಕ್ರಿಯೇಟಿವ್ ಮನಸುಗಳ ಪಾಲಿಗೆ ಗೆಲುವೊಂದು ಬೇಗನೆ ಬೋರು ಹೊಡೆಸುತ್ತೆ. ಆದ್ದರಿದಲೇ ಅದಾಗಲೇ ಸಿಕ್ಕ ಗೆಲುವನ್ನು ಮಂಕಾಗಿಸುವ ಮತ್ತೊಂದು ಮಹಾ ಗೆಲುವಿನತ್ತ ಕೈ ಚಾಚುತ್ತಾರೆ. ತಮ್ಮನ್ನು ಸುತ್ತುವರಿದ ಇಮೇಜನ್ನು ಕಳಚಿ ಎಸೆದು ಮತ್ತೊಂದು ಅಚ್ಚರಿಯತ್ತ ಕಣ್ತೆರೆಯುತ್ತಾರೆ. ಹಾಗಿರುವಾಗ, ಶೆಟ್ಟರೇಕೆ ಮತ್ತದೇ ಗರುಡ ಗಮನ ವೃಷಭ ವಾಹನದ ಶಿವನ ಧ್ಯಾನಕ್ಕೆ ಬಿದ್ದಿದ್ದಾರೆಂಬ ಅಚ್ಚರಿ ಕಾಡೇ ಕಾಡುತ್ತದೆ. ಟೋಬಿ ಟ್ರೇಲರಿನ ತುಂಬೆಲ್ಲ ಅದಕ್ಕೆ ಸಹಮತವೂ ಸಿಗುತ್ತಾ ಹೋಗುತ್ತದೆ.

ಟೋಬಿಯಲ್ಲಿ ಮಾರಿಯಾದ ಶೆಟ್ಟರ ಮೋರೆಗೆ ತಗುಲಿಕೊಂಡ ಬೃಹದಾಕಾರದ ರಿಂಗೊಂದನ್ನು ಪಕ್ಕಕ್ಕಿಟ್ಟರೆ, ಸಾಕ್ಷಾತ್ತು ಗರುಡಗಮನದ ಶಿವನೇ ಮಾರಿಯಾದಂತೆಯೂ ಭಾಸವಾಗುತ್ತದೆ. ನಿಖರವಾಗಿ ಹೇಳಬೇಕೆಂದರೆ ಗರುಡ ಗಮನ ವೃಷಭ ವಾಹನದ ಶಿವನ ಪಾತ್ರಕ್ಕೂ, ಟೋಬಿಯ ಪಾತ್ರಕ್ಕೂ ಸಾಮ್ಯತೆ ಕಾಣಿಸುತ್ತದೆ. ಇದು ಅದರ ಮುಂದುವರೆದ ಭಾಗದಂತಿದೆ ಅಂತ ಅನೇಕರಿಗೆ ಈಗಾಗಲೇ ಅನ್ನಿಸಿದೆ. ರೌಧ್ರ ಸ್ಥಿತಿಯಾಚೆಗೂ ಟೋಬಿ ಪಾತ್ರಕ್ಕೆ ಶಿವನ ಛಾಯೆಯೇ ಮೆತ್ತಿಕೊಂಡಂತಿದೆ. ಇದೆಲ್ಲವನ್ನೂ ನೋಡಿದರೆ, ರಾಜ್ ಬಿ ಶೆಟ್ಟಿ ಕೂಡಾ ಇತರೇ ಹೀರೋಗಳತೆ ಇಮೇಜಿಗೆ ಕಟ್ಟು ಬಿದ್ದರಾ ಅಂತೊಂದು ಪ್ರಶ್ನೆಯೂ ಗಾಢವಾಗಿಯೇ ಕಾಡುತ್ತದೆ.

ಹಾಗೆ ನೋಡಿದರೆ, ದೈವದ ಭಾಗದ ಕೆಲ ದೃಷ್ಯಗಳನ್ನು ನಿರ್ದೇಶನ ಮಾಡಿದ್ದ ರಾಜ್ ಶಟ್ಟಿ ಕಾಂತಾರ ಚಿತ್ರಕ್ಕೂ ಗರುಡ ಗಮನ ವೃಷಭ ವಾಹನದ ಪ್ರಭೆಯನ್ನು ಹಬ್ಬಿಸಿದ್ದರು. ಅದೇನೋ ಆವಾಹನೆಯಾದಂತೆ, ಹುಚ್ಚೆದ್ದು ಫೈಟ್ ಸೀನುಗಳಲ್ಲಿ ಅಬ್ಬರಿಸುವ ಫಾರ್ಮುಲಾ ಇದೆಯಲ್ಲಾ? ಅದು ಗರುಡ ಗಮನ ವೃಷಭ ವಾಹನದಿಂದ ಕಡ ತಂದಿದ್ದೆಂದೇ ಅನ್ನಿಸುತ್ತೆ. ಅಂಥಾದ್ದನ್ನೇ ಟೋಬಿಯಲ್ಲೂ ಕೂಡಾ ವ್ಯವಸ್ಥಿತವಾಗಿ ಬಳಸಿಕೊಂಡಂತಿದೆ. ಗರುಡ ಗಮನ ವೃಷಭ ವಾಹನದಲ್ಲಿ ಶೆಟ್ಟರ ಪಾತ್ರದ ಬಗ್ಗೆ ಒಂದಷ್ಟು ರಹಸ್ಯ ಕಾಪಾಡಿಕೊಳ್ಳಲಾಗಿತ್ತು. ಅದು ಟೋಬಿ ವಿಚಾರದಲ್ಲಿ ಟ್ರೈಲರ್ ಮೂಲಕ ಬಯಲಾಗಿದೆ. ಆ ಪಾತ್ರದ ಪ್ರತೀ ಕದಲಿಕೆಗಳ ಅಂದಾಜೂ ಕೂಡಾ ಸಿಕ್ಕಿ ಹೋಗಿದೆ. ಏನಾದರೂ ಕೌತುಕ ಉಳಿದಿದ್ದರೆ ಅದು ಕಥೆಯ ಬಗ್ಗೆ ಮಾತ್ರ!

ಹಾಗೆ ಕಥೆಯ ವಿಚಾರದಲ್ಲಿ ಪ್ರೇಕ್ಷಕರಲ್ಲೊಂದು ನಂಬಿಕೆ ಉಳಿದಿರೋದಕ್ಕೆ ಕಾರಣ ಟಿ.ಕೆ ದಯಾನಂದ್. ಜನರ ನಡುವೆ ಅವಧೂತನಂತೆ ಸುಳಿದಾಡುತ್ತಾ, ಚಿತ್ರವಿಚಿತ್ರ ಕಥೆಗಳನ್ನು ಹೆಕ್ಕಿತರುವ ಛಾತಿ ಹೊಂದಿರುವವರು ದಯಾನಂದ್. ಅವರೇ ಟೋಬಿಯ ಸೃಷ್ಟಿಕರ್ತನಾಗಿರೋದರಿಂದ ಕಥನ ಭಿನ್ನವಾಗಿರುತ್ತದೆಂಬ ನಂಬಿಕೆ ಇದೆ. ಟೋಬಿ ಟ್ರೈಲರ್ ಬಗ್ಗೆ ಇಷ್ಟೆಲ್ಲ ದಿಕ್ಕಿಲ್ಲಿ ಪರಾಮರ್ಶೆ ನಡೆಯುತ್ತಿದೆ, ಒಂದಷ್ಟು ನಿರಾಸೆ ಮೂಡಿಕೊಂಡಿವೆ ಎಂದಾಕ್ಷಣ ಅದನ್ನು ಪ್ಲಾಪ್ ಟ್ರೈಲರ್ ಅನ್ನುವಂತಿಲ್ಲ. ಯಾಕೆಂದರೆ, ನಿಗಧಿತ ಪ್ರೇಕ್ಷಕರನ್ನು ಅದು ಪರಿಣಾಮಕಾರಿಯಾಗಿ ತಲುಪಿದೆ. ಅದರ ಬಲದಿಂದಲೇ ಟೋಬಿಗೆ ಭರ್ಜರಿ ಓಪನಿಂಗ್ ಸಿಗುವ ನಿರೀಕ್ಷೆಗಳೂ ಇದ್ದಾವೆ. ಅದುವೇ ಮಧ್ಯ ಮಳೆಗಾಲದಲ್ಲೊಂದು ಮಾರಿಹಬ್ಬದ ಆವೇಗ ಸೃಷ್ಟಿಸುವ ಸಾಧ್ಯತೆಗಳನ್ನು ತಳ್ಳಿ ಹಾಕುವಂತಿಲ್ಲ. ಇದೆಲ್ಲ ಏನೇ ಇದ್ದರೂ, ಟೋಬಿಯ ಮಾರಿಯಾದ ರಾಜ್ ಶೆಟ್ಟರ ಪಾತ್ರ ಗತದ ಛಾಯೆಗಳನ್ನೆಲ್ಲ ಕಳಚಿಕೊಂಡು ಮಿಂಚಿದ್ದರೆ ಅದರ ಖದರ್ರೇ ಬೇರೆಯದ್ದಿರುತ್ತಿತ್ತು!

The post toby trailer review: ಮಧ್ಯ ಮಳೆಗಾಲದಲ್ಲಿ ವಿಜೃಂಭಿಸೀತೇ `ಮಾರಿ’ಹಬ್ಬ? appeared first on Cini Shodha.