ಈ ಸಿನಿಮಾಕ್ಕೆ ಇನ್ನೂ ಶೀರ್ಷಿಕೆ ನಿಗಧಿಯಾಗಿಲ್ಲ. ಮೆಘಾ ೧೫೮ ಅಂತ ಹೆಸರಿಸಲಾಗಿರುವ ಈ ಚಿತ್ರವನ್ನು ಬಾಬಿ ಕೊಲ್ಲಿ ಅಂತಲೇ ಕರೆಸಿಕೊಳ್ಳುವ ಕೆ.ಎಸ್ ರವೀಂದ್ರ ನಿರ್ದೇಶನ ಮಾಡಲಿದ್ದಾರೆ. ಭಾರತೀಯ ಚಿತ್ರರಂಗದಲ್ಲಿ ಪ್ರತಿಭಾನ್ವಿತ ನಿರ್ದೇಶಕನಾಗಿ ಗುರುತಿಸಿಕೊಂಡಿಕರುವ ಬಾಬಿ ಕೊಲ್ಲಿ ಈ ಹಿಂದೆ ವಾಲ್ಟರ್ ವೀರಯ್ಯ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಪಕ್ಕಾ ಮನೋರಂಜನಾತ್ಮಕ ಚಿತ್ರವಾಗಿ ಅದು ಪ್ರೇಕ್ಷಕರನ್ನು ರಂಜಿಸಿತ್ತು. ಕಳೆದ ವರ್ಷ ಬಿಡುಗಡೆಗೊಂಡಿದ್ದ ವಾಲ್ಟರ್ ವೀರಯ್ಯ ಗೆಲುವು ದಾಖಲಿಸಿತ್ತು. ಇದೀಗ ಮತ್ತೆ ಚಿರಂಜೀವಿ ಬಾಬಿ ಕೊಲ್ಲಿಗೆ ಅವಕಾಶ ಕೊಟ್ಟಿದ್ದಾರೆ. ಬಾಬಿ ಈಗಾಗಲೇ ಸಂಪೂರ್ಣವಾಗಿ ತಯಾರಿ ಮಾಡಿಕೊಂಡು ತಾರಾಗಣದ ಆಯ್ಕೆಯಲ್ಲಿ ಬ್ಯುಸಿಯಾಗಿದ್ದಾರೆ.

ಅದರ ಮೊದಲ ಭಾಗವಾಗಿ ನಾಯಕಿಯ ಆಯ್ಕೆ ನಡೆದಿದೆ. ದಕ್ಷಿಣ ಭಾರತೀಯ ಚಿತ್ರರಂಗದಲ್ಲಿ ಬಹು ಬೇಡಿಕೆಯ ನಟಿಯಾಗಿ ಹೊರಹೊಮ್ಮಿರುವ ಮಾಳವಿಕಾ ಮೋಹನ್ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಗ್ಲಾಮರ್ ಮಾತ್ರವಲ್ಲದೇ ನಟನೆಯಲ್ಲಿಯೂ ಸೈ ಅನ್ನಿಸಿಕೊಂಡಿರುವ ಮಾಳವಿಕಾಗಿಲ್ಲಿ ಮಹತ್ವದ ಪಾತ್ರವಿದೆಯಂತೆ. ಮಿಕ್ಕುಳಿದಂತೆ ಮುಖ್ಯ ಪಾತ್ರಗಳಿಗಾಗಿ ಕಲಾವಿದರನ್ನು ಹುಡುಕೋ ಕಾರ್ಯ ಚಾಲ್ತಿಯಲ್ಲಿದೆ. ಇದೀಗ ವಿಶ್ವಂಬರ ದಲ್ಲಿ ತೊಡಗಿಸಿಕೊಂಡಿರುವ ಚಿರು, ಹೊಸಾ ಚಿತ್ರದ ಪಾತ್ರಕ್ಕಾಗಿ ತಾಲೀಮು ನಡೆಸುತ್ತಿದ್ದಾರೆ. ಶೀಘ್ರದಲ್ಲಿಯೇ ಈ ಸಿನಿಮಾದ ಶೀರ್ಷಿಕೆ ಜಾಹೀರಾಗಿ, ಅದರ ಬೆನ್ನಲ್ಲಿಯೇ ಚಿತ್ರೀಕರಣ ಚಾಲೂ ಆಗಲಿದೆ.

The post Megha Star Chiranjeevi: ಮತ್ತೆ ಒಂದಾದ ವಾಲ್ಟರ್ ವೀರಯ್ಯ ಜೋಡಿ! appeared first on Cini Shodha.

ಚಿರು ರೀಮೇಕ್ ಚಿತ್ರದಲ್ಲಿ ನಟಿಸಲಿದ್ದಾರೆಂಬ ಸುದ್ದಿ ಕೇಳಿದಾಕ್ಷಣವೇ ಅಭಿಮಾನಿ ಬಳಗಕ್ಕೆ ಭ್ರಮನಿರಸನವಾಗಿತ್ತು. ಇದೀಗ ತೆಲುಗಿನಲ್ಲಿಯೂ ಪ್ಯಾನಿಂಡಿಯಾ ಹವಾ ಶುರುವಾಗಿರೋದರಿಂದ ಚಿರು ಕೂಡಾ ಅಂಥಾದ್ದೇ ಸಿನಿಮಾದಲ್ಲಿ ನಟಿಸಿ ಗೆಲ್ಲಬೇಕೆಂಬ ಬಯಕೆ ಅಭಿಮಾನಿ ಪಡೆಯಲ್ಲಿತ್ತು. ಆದರೆ ತಮಿಳು ಚಿತ್ರದ ರೀಮೇಕ್ ಸರಕಾದ ಭೋಲಾ ಶಂಕರ ಚಿತ್ರ ಕೂಡಾ ನೆಟ್ಟಗೆ ರೂಪುಗೊಂಡಿರಲಿಲ್ಲ. ಆದ್ದರಿಂದಲೇ ಮೊದಲ ದಿನವೇ ಮುಗ್ಗರಿಸಿದ್ದ ಭೋಲಾ ಶಂಕರ, ಎರಡನೇ ದಿನ ಮಗುಚಿಕೊಳ್ಳುವ ಹೊತ್ತಿಗೆಲ್ಲ ಬೋರಲು ಬಿದ್ದಿತ್ತು. ಎರಡನೇ ವಾರವಾಗುವ ಹೊತ್ತಿಗೆಲ್ಲ ಭೋಲಾ ಶಂಕರ ಎಲ್ಲ ಚಿತ್ರಮಂದಿರಗಳಿಂದಲೂ ಎಗರಿಕೊಂಡಿರುವ ಸುದ್ದಿ ಬಂದಿದೆ.

ಇದು ಚಿರಂಜೀವಿ ಪಾಲಿಗೆ ನಿಜಕ್ಕೂ ಅವಮಾನಕರ ಸನ್ನಿವೇಶ. ತೆಲುಗು ಚಿತ್ರರಂಗವನ್ನು ಅಕ್ಷರಶಃ ಆಳಿದ್ದ ಚಿರಂಜೀವಿಯ ಚಿತ್ರವೊಂದು ಎರಡು ವಾತವೂ ನಿಲ್ಲಲಾಗದೆ ಎತ್ತಂಗಡಿಯಾಗೋದೆಂದರೆ ಅದೇನು ಕಡಿಮೆ ಅವಮಾನವೇ? ಸದ್ಯ ಅದರಿಂದೆದುರಾದ ಮುಜುಗರವನ್ನೆಲ್ಲ ಚಿರು ಅಭಿಮಾನಿಗಳು ನುಂಗಿಕೊಳ್ಳುತ್ತಿದ್ದಾರೆ. ಸೈರಾ ನರಸಿಂಹ ರೆಡ್ಡಿಗೆ ನಿರೀಕ್ಷಿತ ಗೆಲುವು ಸಿಗದಿದ್ದರೂ ಕೂಡಾ, ಅದೊಂದು ಒಳ್ಳೆ ಸಿನಿಮಾವಾಗಿ ಉಳಿದುಕೊಂಡಿತ್ತು. ಆದರೆ ಅದಾದ ನಂತರ ಯಾಕೋ ಚಿರುಗಾರು ಸವಕಲು ಸರಕಿನ ಮೋಹಕ್ಕೆ ಬಿದ್ದಿದ್ದರು. ಅದ್ಯಾವ ಭರವಸೆಯಿಂದ ಅವರು ರೀಮೇಕಿಗೆ ಒಪ್ಪಿಕೊಂಡರೋ ಗೊತ್ತಿಲ್ಲ; ಆ ನಿರ್ಧಾರವೇ ಅವರನ್ನು ಪಾತಾಳಕ್ಕಿಳಿಸಿ ಬಿಟ್ಟಿದೆ. ಒಟ್ಟಾರೆಯಾಗಿ ಈ ವಾರದಿಂದ ಭೋಲಾ ಶಂಕರ ಇತಿಹಾಸವಾಗಲಿದ್ದಾನೆ!

The post bhola shankara: ಮೆಘಾ ಸ್ಟಾರ್‍ಗೆ ಮಹಾ ಸೋಲಿನ ಮರ್ಮಾಘಾತ! appeared first on Cini Shodha.

ಮೆಹರ್ ರಮೇಶ್ ನಿರ್ದೇಶನ ಮಾಡಿದ್ದ ಭೋಳಾ ಶಂಕರ್ ಚಿತ್ರವನ್ನು ಎಕೆ ಎಂಟರ್‍ಟೈನ್‍ಮೆಂಟ್ ಬ್ಯಾನರಿನಡಿಯಲ್ಲಿ ಅನಿಲ್ ಸುಂಕರ ನಿರ್ಮಾಣ ಮಾಡಿದ್ದರು. ಸೋಲುಗಳ ಕಾರಣದಿಂದಾಗಿ ಒಂದಷ್ಟು ಆರ್ಥಿಕ ಸಂಕಷ್ಟದಿಂದ ನರಳುತ್ತಿದ್ದ ಸುಂಕರ, ಬಹಳಷ್ಟು ನಿರೀಕ್ಷೆ ಇಟ್ಟುಕೊಂಡೇ ಈ ಸಿನಿಮಾ ನಿರ್ಮಾಣಕ್ಕೆ ಕೈ ಹಾಕಿದ್ದರು. ಹೇಳಿಕೇಳಿ ಮೇಘಾ ಸ್ಟಾರ್ ಚಿರಂಜೀವಿ ನಾಯಕನಾಗಿರೋದರಿಂದ ಹಾಕಿದ ಹಣಕ್ಕೇನೂ ಮೋಸವಿಲ್ಲ ಎಂಬಂಥಾ ನಂಬಿಕೆ ಸುಂಕರಗಿತ್ತು. ಆದರೆ ಭೋಳಾ ಶಂಕರ ಚಿತ್ರ ಬಿಡುಗಡೆಯಾದ ಮೊದಲ ದಿನದಿಂದಲೇ ಡಲ್ಲು ಹೊಡೆದು, ವಾರ ಕಳೆಯುತ್ತಲೇ ಬೋರಲಾಗಿದೆ!

ಇದರ ಬೆನ್ನಲ್ಲಿಯೇ ನಿರ್ಮಾಪಕ ಸುಂಕರ ಸುತ್ತ ಒಂದಷ್ಟು ರೂಮರುಗಳು ಹಬ್ಬಿಕೊಂಡಿದ್ದವು. ಅವರು ಚಿರುಗೆ ಸಂಭಾವನೆ ಕೊಡುವ ಸಲುವಾಗಿ ಮನೆ ಮಾಡಿಕೊಂಡಿದ್ದಾರೆ ಅಂತೆಲ್ಲ ಸುದ್ದಿ ಹರಡಿತ್ತು. ಆದರೀಗ ಖುದ್ದು ಸುಂಕರರೇ ಅದೆಲ್ಲ ಸುಳ್ಳು ಎಂಬುದನ್ನು ಸ್ಪಷ್ಟಪಡಿಸಿದ್ದಾರೆ. ಅಷ್ಟಕ್ಕೂ ಭೋಳಾ ಶಂಕರ ತಮಿಳು ಚಿತ್ರದ ರೀಮೇಕ್. ಅಲ್ಲಿ ಅಜಿತ್ ನಾಯಕನಾಗಿ ನಟಿಸಿದ್ದರೆ, ಇಲ್ಲಿ ಅದೇ ಪಾತ್ರವನ್ನು ಚಿರು ಆವಾಹಿಸಿಕೊಂಡಿದ್ದಾರೆ. ಈ ಕಾಲದಲ್ಲಿಯೂ ತೆಲುಗು ಮಂದಿಗೆ ರೀಮೇಕ್ ಮಾಡುವ ದರ್ದು ಅದೇನಿತ್ತೋ ಗೊತ್ತಿಲ್ಲ. ಆದರೆ, ಪ್ರೇಕ್ಷಕರಂತೂ ಚಿರು ಮೇಲಿನ ಅಭಿಮಾನವನ್ನು ಸೈಡಿಗಿಟ್ಟು ಈ ಚಿತ್ರವನ್ನು ನಿರಾಕರಿಸಿದ್ದಾರೆ. ಅದಾಗಲೇ ಒಂದು ಸೋಲಿನಿಂದ ಕಂಗೆಟ್ಟಿದ್ದ ನಿರ್ಮಾಪಕ ಸುಂಕರ ಕೈ ಖಾಲಿ ಮಾಡಿಕೊಂಡಿರೋದಂತೂ ನಿಜ!

The post bhola shankar: ಮೆಘಾ ಸ್ಟಾರ್ ಗೆ ಮುಗ್ಗುಲ ಮುಳ್ಳಾಯ್ತೇ ಮಹಾ ಸೋಲು? appeared first on Cini Shodha.

ಬಾಹುಬಲಿ೨, ಆರ್‌ಆರ್‌ಆರ್, ಪುಷ್ಪಾ ಮುಂತಾದ ಚಿತ್ರಗಳು ಪ್ಯಾನಿಂಡಿಯಾ ಮಟ್ಟದಲ್ಲಿ ದೊಡ್ಡ ಗೆಲುವು ಕಂಡಿದ್ದವು. ಬಾಕ್ಸಾಫೀಸ್‌ನಲ್ಲಿಯೂ ಇವುಗಳ ದಾಖಲೆಯನ್ನು ಸಲೀಸಾಗಿ ಸರಿಗಟ್ಟಲು ಸಾಧ್ಯವಾಗುವಂತಿಲ್ಲ. ಆ ಗೆಲುವಿನ ಆವೇಗದಲ್ಲಿ ಇದುವರೆಗೂ ತೆಲುಗು ಚಿತ್ರರಂಗ ಪುಳಕಗೊಳ್ಳುತ್ತಿದೆ. ಈ ಕಾರಣದಿಂದಲೇ ತೆಲುಗು ಚಿತ್ರರಂಗದ ಸ್ಟಾರ್‌ಗಿರಿಯ ಪ್ರಭೆ ರಾಷ್ಟ್ರಮಟ್ಟದಲ್ಲಿ ಮಿರುಗುತ್ತಿದೆ. ಒಂದರ್ಥದಲ್ಲಿ ಅದು ದೇಶದ ಗಡಿ ದಾಟಿಯೂ ಹಬ್ಬಿಕೊಂಡಿದೆ. ವಿದೇಶಗಳಲ್ಲಿಯೂ ಕೂಡಾ ತೆಲುಗು ಸಿನಿಮಾಗಳಿಗೆ ಭರ್ಜರಿ ಓಪನಿಂಗ್ ಸಿಗುತ್ತಿದೆ. ತೆಲುಗಿನ ಹೀರೋಗಳಿಗೆ ವಿದೇಶದಲ್ಲಿಯೂ ಭರ್ಜರಿ ಫ್ಯಾನ್ ಬೇಸ್ ಕೂಡಾ ಸೃಷ್ಟಿಯಾಗಿದೆ.

ರಾಜಮೌಳಿಯ ಮುಂದಿನ ನಡೆ ಏನೆಂಬ ಕುತೂಹಲ ಎಲ್ಲರಲ್ಲಿಯೂ ಇತ್ತು. ಸಿನಿಮಾದಿಂದ ಸಿನಿಮಾಗೆ ಬೇರೆ ಬಗೆಯಲ್ಲಿ ಅಚ್ಚರಿ ಮೂಡಿಸುವ ರಾಜಮೌಳಿ ಮಹೇಶ್ ಬಾಬು ಜೊತೆ ಸಿನಿಮಾ ಮಾಡುವ ಸುದ್ದಿ ಈಗಾಗಲೇ ಹೊರಬಿದ್ದಿದೆ. ನಿರೀಕ್ಷೆಯಂತೆಯೇ ಅದೂ ಕೂಡಾ ಪ್ಯಾನಿಂಡಿಯಾ ಸಿನಿಮಾವಾಗಲಿದೆ. ಅದಕ್ಕಾಗಿನ ತಯಾರಿಯೀಗ ಭರ್ಜರಿಯಾಗಿಯೇ ನಡೆಯುತ್ತಿದೆ. ಡಿಸೆಂಬರ್ ಹೊತ್ತಿಗೆಲ್ಲ ರಾಜಮೌಳಿ ಅಖಾಡಕ್ಕಿಳಿಯಲಿದ್ದಾರೆ. ಇದೇ ಹೊತ್ತಿನಲ್ಲಿ ರಾಜಮೌಳಿ ಜೊತೆ ಸೇರಿ ಆರ್ ಆರ್ ಆರ್ ಎಂಬ ಬಿಗ್ ಹಿಟ್ ಚಿತ್ರದಲ್ಲಿ ನಟಿಸಿದ್ದ ಜ್ಯೂನಿಯರ್ ಎನ್‌ಟಿಆರ್ ಕೂಡಾ ಮತ್ತೊಂದು ಪ್ಯಾನಿಂಡಿಯಾ ಸಿನಿಮಾಗಾಗಿ ತಯಾರಿ ನಡೆಸುತ್ತಿದ್ದಾರೆ. ವಾರ್೨ ಎಂಬ ಈ ಚಿತ್ರದಲ್ಲಿ ಜ್ಯೂನಿಯರ್ ಎನ್‌ಟಿಆರ್ ಹೃತಿಕ್ ರೋಶನ್ ಮುಂತಾದವರೊಂದಿಗೆ ತೆರೆ ಹಂಚಿಕೊಳ್ಳಲಿದ್ದಾರೆ. ಖಸೆಂಬರ್ ಹೊತ್ತಿಗೆಲ್ಲಾ ಈ ಸಿನಿಮಾದ ಚಿತ್ರೀಕರಣ ಚಾಲೂ ಆಗಲಿದೆ.

ರಾಮ್ ಚರಣ್ ಇದೀಗ ಶಂಕರ್ ನಿರ್ದೇಶನದ ಚಿತ್ರದಲ್ಲಿ ಬ್ಯುಸಿಯಾಗಿದ್ದಾರೆ. ಅದರ ಜೊತೆ ಜೊತೆಗೇ ಮತ್ತೊಂದು ಪ್ಯಾನಿಂಡಿಯಾ ಸಿನಿಮಾವನ್ನೂ ಒಪ್ಪಿಕೊಂಡಿರುವ ಸುದ್ದಿ ಬಂದಿದೆ. ಅದನ್ನು ಯುವ ನಿರ್ದೇಶಕ ಬುಚಿ ಬಾಬು ನಿರ್ದೇಶನ ಮಾಡಲಿದ್ದಾರೆ. ಇದಕ್ಕಾಗಿನ ತಯಾರಿ ಕೂಡಾ ಅವ್ಯಾಹತವಾಗಿ ನಡೆಯುತ್ತಿದೆ. ಸದರಿ ಸಿನಿಮಾ ಕೂಡಾ ಇದೇ ಡಿಸೆಂಬರ್ ತಿಂಗಳಿನಿಂದ ಚಿತ್ರೀಕರಣಕ್ಕಿಳಿಯಲಿದೆ. ಇದರ ತಾರಾಗಣ ಮತ್ತುತಾಂತ್ರಿಕ ವರ್ಗ ಕೂಡಾ ತೆಲುಗು ಪ್ರೇಕ್ಷಕರನ್ನು ಥ್ರಿಲ್ ಆಗಿಸಿದೆ. ಈಗಾಗಲೇ ಭರವಸೆ ಮೂಡಿಸಿರುವ ಯುವ ನಿರ್ದೇಶಕ ಬಾಬು, ರಾಮ್‌ಚರಣ್ ಕಾಂಬಿನೇಷನ್ನಿನಲ್ಲಿ ಕಮಾಲ್ ಮಾಡುತ್ತಾರೆಂಬ ನಂಬಿಕೆ ಬಲವಾಗಿ ಬಿಟ್ಟಿದೆ. ಅಂದಹಾಗೆ, ಈ ಚಿತ್ರಕ್ಕೆ ಎ ಆರ್ ರೆಹಮನ್ ಸಂಗೀತ ನಿರ್ದೇಶನ ಮಾಡಲಿದ್ದಾರೆ.

ಹೀಗೆ ತೆಲುಗಿನ ಯುವ ನಟರೆಲ್ಲ ಭರ್ಜರಿಯಾಗಿ ಪ್ಯಾನಿಂಡಿಯಾ ಚಿತ್ರಗಳತ್ತ ವಾಲಿಕೊಂಡಿರುವಾಗಲೇ, ಮೆಘಾ ಸ್ಟಾರ್ ಚಿರಂಜೀವಿ ಕೂಡಾ ಹೊಸಾ ಉತ್ಸಾಹದೊಂದಿಗೆ ಎಂಟ್ರಿ ಕೊಡಲು ಸಜ್ಜುಗೊಂಡಿದ್ದಾರೆ. ಈ ಹಿಂದೆ ಬಿಂಬಿಸಾರ ಸಿನಿಮಾ ನಿರ್ದೇಶನ ಮಾಡಿ ಹೆಸರಾಗಿದ್ದ ಮಲ್ಲೀಡಿ ವಸಿಷ್ಟ ನಿರ್ದೇಶನದ ಚಿತ್ರದಲ್ಲಿ ಚಿರಂಜೀವಿ ನಟಿಸಲಿದ್ದಾರೆ. ವರ್ಷಗಳ ಹಿಂದೆ ಸೈರಾ ನರಸಿಂಹ ರೆಡ್ಡಿ ಅಂತೊಂದು ಪ್ಯಾನಿಂಡಿಯಾ ಚಿತ್ರದಲ್ಲಿ ಚಿರಂಜೀವಿ ನಟಿಸಿದ್ದರು. ದೊಡ್ಡ ಮಟ್ಟದಲ್ಲಿ ಹೈಪುಗಳು ಸೃಷ್ಟಿಯಾಗಿದ್ದರೂ ಕೂಡಾ ಆ ಚಿತ್ರ ಹೇಳಿಕೊಳ್ಳುವಂಥಾ ಗೆಲುವು ಕಂಡಿರಲಿಲ್ಲ. ಆ ನಂತರ ಸುದೀರ್ಘ ಕಾಲ ಮರೆಯಾಗಿದ್ದ ಚಿರು ಇದೀಗ ಮಲ್ಲೀಡಿ ವಸಿಷ್ಠ ಹೇಳಿದ ಕೆಯನ್ನು ಮೆಚ್ಚಿಕೊಂಡು ನಟಿಸಲು ಮುಂದಾಗಿದ್ದಾರೆ. ಈ ಚಿತ್ರ ಕೂಡಾ ಡಿಸೆಂಬರಿನಿಂದ ಚಿತ್ರೀಕರಣಗೊಳ್ಳಲಿದೆ. ಈ ಎಲ್ಲ ವಿದ್ಯಮಾನಗಳನ್ನು ಆಧರಿಸಿ ಹೇಳೋದಾದರೆ, ಈ ವರ್ಷದ ಅಂಚಿನಿಂದ ತೆಲುಗು ಚಿತ್ರರಂಗ ಮತ್ತಷ್ಟು ಆವೇಗದೊಂದಿಗೆ ಮೈಕೊಡವಿಕೊಳ್ಳಲಿದೆ!

The post bollywood sensation: ವರ್ಷದಂಚಿನಲ್ಲಿ ಶುರುವಾಗಲಿದೆ ಗೆಲುವಿನ ರೇಸ್! appeared first on Cini Shodha.

ಹಾಗೆ ನೋಡಿದರೆ, ಇದು ಆ ಕುಟುಂಬದ ಪಾಲಿಗೆ ಹೊಸಾ ಶಾಕ್ ಏನಲ್ಲ. ಇದು ಇಲ್ಲಿಗೇ ಬಂದು ನಿಲ್ಲುತ್ತದೆ ಎಂಬಂಥಾ ಸ್ಪಷ್ಟ ಸುಳಿವು ಈಗೊಂದಷ್ಟು ದಿನಗಳಿಂದ ಸಿಗಲಾರಂಭಿಸಿತ್ತು. ಈಗ್ಗೆ ಮೂರು ವರ್ಷಗಳ ಹಿಂದೆ ಮದುವೆಯಾಗಿದ್ದ ನಿಹಾರಿಕಾ ಕೊನಿಡೇಲಾ, ತನ್ನ ಸಂಸಾರ ಹಳಿ ತಪ್ಪುತ್ತಿರೋದರ ಬಗ್ಗೆ ಸಾಮಾಜಿಕ ಜಾಲತಾಣಗಳ ಮೂಲಕ ಸಂದೇಶ ರವಾನಿಸಲಾರಂಭಿಸಿದ್ದಳು. ಅಂದಹಾಗೆ, ಈ ನಿಹಾರಿಕಾ ಮೆಘಾಸ್ಟಾರ್ ಚಿರಂಜೀವಿಯ ಸಹೋದರ ಕಂ ನಟ ನಾಗ ಬಾಬು ಮಗಳು. ಈಗೆ 2020ರಲ್ಲಿ ಗುಂಟೂರಿನ ಪ್ರತಿಷ್ಟಿತ ಮನೆತನದ ಚೈತನ್ಯ ಜೊನ್ನಲಗಡ್ಡ ಎಂಬಾತನೊಂದಿಗೆ ವೈಭವೋಪೇತವಾಗಿ ನಡೆದಿತ್ತು. ಅದೇನು ಕಿಸುರೋ ಗೊತ್ತಿಲ್ಲ; ಕೈಯ ಮೇಲಿನ ಮದರಂಗಿಯ ರಂಗು ಮಾಯುವ ಮುನ್ನವೇ ಈ ಸಂಸಾರದಲ್ಲಿ ಅಪಸ್ವರಗಳು ಏಳಲಾರಂಭಿಸಿದ್ದವು.

ಒಂದು ಮೂಲದ ಪ್ರಕಾರ, ಅದಾಗಲೇ ಒಂದಷ್ಟು ವಿಚ್ಛೇದನಗಳ ಮೂಲಕ ಪ್ರಹಾರ ಅನುಭವಿಸಿದ್ದ ಮೆಘಾ ಸ್ಟಾರ್ ಫ್ಯಾಮಿಲಿಯ ಹಿರೀಕರು ಈ ಬಗ್ಗೆ ಎಚ್ಚರ ವಹಿಸಿದ್ದರು. ರಾಜಿ ಸಂಧಾನ ನಡೆಸಿ, ತಿಳಿ ಹೇಳುವ ಮೂಲಕ ಮತ್ತೆ ನಿಹಾರಿಕಾಳ ಸಂಸಾರವನ್ನು ಹಳಿಗೆ ಮರಳಿಸಲು ಹರಸಾಹಸ ಪಟ್ಟಿದ್ದರು. ಇದೆಲ್ಲದರಿಂದಾಗಿ, ಒಂದೆರಡು ವರ್ಷಗಳ ಕಾಲ ಈ ಸಂಸಾರ ನೌಕೆ ವಾಲಾಡುತ್ತಲೇ ಪಯಣ ನಡೆಸಿತ್ತು. ಆದರೆ, ಗಂಡ ಹೆಂಡಿರ ನಡುವಿನ ಮನಸ್ಥಾಪಗಳು ಸುಪ್ರಬಾತದಂತೆ ಪ್ರತಿನಿತ್ಯವೂ ಮೊಳಗಲಾರಂಭಿಸಿದ್ದೇ, ನಿಹಾರಿಕಾ ಮತ್ತು ಚೈತನ್ಯ ಅತ್ಯಂತ ಪ್ರೌಢ ಮನಸ್ಥಿತಿಯಿಂದ ನಿರ್ಧಾರ ತಳೆದಿದ್ದಾರೆ. ಯಾವುದೇ ಗಲಾಟೆ, ಗದ್ದಲಗಳಿಗೆ ಎಡೆ ಮಾಡಿಕೊಡದಂತೆ ದೂರಾಗುವ ತೀರ್ಮಾನಕ್ಕೆ ಬಂದಿದ್ದಾರೆ.

ಈಗ್ಗೆ ವರ್ಷದ ಹಿಂದೆಯೇ ಇಬ್ಬರೂ ಸಮ್ಮತಿಯ ಮೇರೆಗೆ ವಿಚ್ಚೇಧನಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. ಅದೀಗ ಊರ್ಜಿತಗೊಂಡಿದೆಯಂತೆ. ಈ ಮೂಲಕ ನಿಹಾರಿಕಾ ಮತ್ತು ಚೈತನ್ಯ ಅಧಿಕೃತವಾಗಿಯೇ ದೂರಾಗಿದ್ದಾರೆ. ಅಲ್ಲಿಗೆ ಮೆಘಾ ಸ್ಟಾರ್ ಕುಟುಂಬದ ಮತ್ತೊಂದು ಸಂಸಾರ ಪರ್ಮನೆಂಟಾಗಿಯೇ ಮಗುಚಿಕೊಂಡಿದೆ. ಚಿರಂಜೀವಿ ಸಹೋದರ ಪವನ್ ಕಲ್ಯಾಣ್ ಒಂದರ ಹಿಂದೊಂದರಂತೆ ಎರಡು ವಿಚ್ಚೇಧನ ಪಡೆದುಕೊಂಡಿದ್ದಾರೆ. ಇತ್ತೀಚೆಗಷ್ಟೇ ಮೂರನೇ ಮದುವೆಯಾಗಿದ್ದ ಪವನ್, ಆಕೆಗೂ ವಿಚ್ಚೇಧನ ಕೊಡುವ ತಯಾರಿಯಲ್ಲಿದ್ದಾರೆ ಎನ್ನಲಾಗುತ್ತಿದೆ. ಅಂತೂ ಈ ಮೂಲಕ ಬಣ್ಣಗಳ ಲೋಕದಲ್ಲಿ ಬಂಧಕ್ಕೆ ಆಯಸ್ಸು ಕಡಿಮೆ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ!

The post niharika konidela: ಬಣ್ಣಗಳ ಲೋಕದಲ್ಲಿ ಬಂಧಕ್ಕೆ ಬೆಲೆಯಿಲ್ಲ! appeared first on Cini Shodha.