ನಸಾಬ್ (nasab) ಅಂತೊಂದು ಪದ ಕಿವಿ ಸೋಕುತ್ತಲೇ ಮಾಸ್ ಫೀಲೊಂದು ಗರಿಗೆದರಿಕೊಳ್ಳುತ್ತೆ. ಹಾಗಾದರೆ, ಇದು ಯಾವ ಬಗೆಯ ಚಿತ್ರ? ಅದರ ಕಥೆಯ ಅಸಲೀ ಆಂತರ್ಯ ಎಂಥಾದ್ದು? ಹೀಗೆ ಹತ್ತಾರು ಪ್ರಶ್ನೆಗಳು ಹುಟ್ಟಿಕೊಳ್ಳುತ್ತವೆ. ಅದಕ್ಕೆ ಚಿತ್ರತಂಡ ಉತ್ತರ ಕೊಡುವ ಪ್ರಯತ್ನವನ್ನೂ ಮಾಡಿದೆ. ಅದರನ್ವಯ ಹೇಳೋದಾದರೆ, ನಸಾಬ್ ಎಬುದು ಉತ್ತರ ಕರ್ನಾಟಕದ ಮೂಲೆಯೊಂದರ ಲಂಬಾಣಿ ತಾಂಡವೊಂದನ್ನು ಕೇಂದ್ರವಾಗಿರಿಸಿಕೊಂಡಿರುವ ಕಥಾನಕ. ಬಂಜಾರ ತಾಂಡವೊಂದರ ಹುಡುಗನೊಬ್ಬ ತನಗೆ ಕವುಚಿಕೊಂಡ ಎಲ್ಲ ಮಬ್ಬುಗಳನ್ನು ಮೀರಿಕೊಂಡು, ಅಕ್ಷರವನ್ನು ಧ್ಯಾನಿಸಿ ಹೊರಡುವ ಕಥೆ ಇಲ್ಲಿದೆಯಂತೆ.

ಅಂದಹಾಗೆ, ಇದು ಎಂಭತೈದರ ಕಾಲಮಾನದಲ್ಲಿ ಘಟಿಸೋ ಕಥನ. ಕಾಲೇಜು ಶಿಕ್ಷಣ ಇಲಾಖೆ ಆಯುಕ್ತರ ಆಪ್ತ ಸಹಾಯಕರಾದ ಕೆ. ಕಿಶೋರ್ ಕುಮಾರ್ ಅವರ ಜೀವನಾಧಾರಿತ ಕಥೆ `ನಸಾಬ್’. ಕಿಶೋರ್ ಕುಮಾರ್ ಜೀವನ ಕಥನವೊಂದು ಈ ಹಿಂದೆಯೇ ಪುಸ್ತಕ ರೂಪ ಪಡೆದುಕೊಂಡಿತ್ತು. ನಿರ್ದೇಶಕ ಶಿಜ ಅದಕ್ಕೆ ದೃಷ್ಯರೂಪ ಕೊಟ್ಟಿದ್ದಾರೆ. ಕಿಶೋರ್ ಕುಮಾರ್ ಅವರ ಮಡದಿ ಕೆ. ಸುಜಾತ ಕೀರ್ತಿ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಚಿತ್ರಕಥೆ, ಸಂಭಾಷಣೆ ಮತ್ತು ಸಂಗೀತ ನಿರ್ದೇಶನವನ್ನು ರಾಗಂ ನಿರ್ವಹಿಸಿದ್ದಾರೆ.

ನಸಾಬ್ ಅಂದರೆ ಪರಮೋಚ್ಛ ನಾಯಕ ಎಂಬ ಅರ್ಥವಿದೆಯಂತೆ. ಅದಕ್ಕೂ ಇಲ್ಲಿನ ಕಥೆಗೂ ಅವಿನಾಭಾವ ನಂಟಿದೆ. ಎಂಭತ್ತರ ದಶಕದಲ್ಲಿ ಬಡತನವೂ ಸೇರಿದಂತೆ, ಸಖಲ ಸಮಸ್ಯೆಗಳ ಕೂಪದಂತಿದ್ದ ಬಂಜಾರ ತಾಂಡಾದಿಂದ ಎದ್ದು ನಿಲ್ಲುವ ಕಿಶೋರ್ ಕುಮಾರ್ ಪಾತ್ರವನ್ನು ಕೀರ್ತಿ ಕುಮಾರ್ ನಿರ್ವಹಿಸಿದ್ದಾನೆ. ನಾಯಕಿಯಾಗಿ ಅಮೃತಾ ನಟಿಸಿದ್ದಾರೆ. ಮುಂಬೈ ಹುಡುಗಿ ಶಫಾನಿ ಸಿಂಗ್ ಮುಖ್ಯ ಪಾತ್ರೊಂದಕ್ಕೆ ಜೀವ ತುಂಬಿದ್ದಾಳೆ. ಇನ್ನುಳಿದಂತೆ ಘಟಾನುಘಟಿ ಕಲಾವಿದರ ದಂಡೇ ಈ ಚಿತ್ರದಲ್ಲಿದೆ. ಪದ್ಮಜಾ ರಾವ್ ಮತ್ತು ವಿಜಯ್ ಕಾಶಿ ತಂದೆ ತಾಯಿಯ ಪಾತ್ರಗಳಿಗೆ ಜೀವ ತುಂಬಿದ್ದರೆ, ಜಯಶ್ರೀ, ಉದಯ ಟೀವಿ ಪ್ರಕಾಶ್, ಹೇಮಂತ್ ಮುಂತಾದವರ ತಾರಾಗಣವಿದೆ. ಮಹಮದ್ ಹಸೀಬ್ ಛಾಯಾಗ್ರಹಣ, ಆರ್ಯನ್ ನೃತ್ಯ ನಿರ್ದೇಶನ, ಧ್ರುವ, ನಂದಿ ಶಿವಮೊಗ್ಗ, ಹರ್ಷ ಸಹ ನಿರ್ದೇಶಕರಾಗಿ ಕಾರ್ಯ ನಿರ್ವಹಿಸಿದ್ದಾರೆ. ಗುಣವರ್ಧನ್ ಗೌಡ ಕಲಾ ನಿರ್ದೇಶನವಿರುವ ಈ ಚಿತ್ರಕ್ಕೆ ಅಮೀನಗಡ, ಪಟ್ಟದಕಲ್ಲು ಮುಂತಾದೆಡೆಗಳಲ್ಲಿ ಚಿತ್ರೀಕರಣ ನಡೆಸಲಾಗಿದೆ.

ವಿಶೇಷವೆಂದರೆ, ಹಿರಿಯ ನಟಿ, ರಂಗಭೂಮಿ ಕಲಾವಿದೆ ಬಿ ಜಯಶ್ರೀಯವರು ನಸಾಬ್ ಮೂಲಕ ಬಹುಕಾಲದ ನಂತರ ಪ್ರೇಕ್ಷಕರನ್ನು ಮುಖಾಮುಖಿಯಾಗುತ್ತಿದ್ದಾರೆ. ಇನ್ನುಳಿದಂತೆ, ಇದೊಂದು ಜೀವನಾಧಾರಿತ ಕಥನ ಎಂದಾಕ್ಷಣ ಸಿದ್ಧ ಸೂತ್ರಗಳ ಭೂಮಿಕೆಯಲ್ಲಿ ಈ ಸಿನಿಮಾವನ್ನು ಅಳೆಯುವಂತಿಲ್ಲ. ಯಾಕೆಂದರೆ, ಬಡತನದ ಬೇಗೆಯಲ್ಲಿ ಬೇಯುವ ಲಂಬಾಣಿ ತಾಂಡಾದ ಹುಡುಗನೊಬ್ಬ ಅಕ್ಷರಗಳಿಗೆ ತೆರೆದುಕೊಂಡು, ಅಂದುಕೊಂಡಿದ್ದನ್ನು ಸಾಧಿಸೋ ಈ ಕಥೆಯಲ್ಲಿ ಒಂದು ವಿಶಿಷ್ಟ ಸಾಮಾಜಿಕ ಬದುಕು ಹಾದು ಹೋಗಲಿದೆ. ಮಾಸ್ ಅಂಶಗಳನ್ನೂ ಸೇರಿಸಿಕೊಂಡು, ಕಮರ್ಶಿಯಲ್ ಧಾಟಿಯಲ್ಲಿಯೇ ನಿರ್ದೇಶಕರು ನಸಾಬ್ ಅನ್ನು ರೂಪಿಸಿದ್ದಾರಂತೆ.

ಈ ಮೂಲಕ ಶಿವು ಜಮಖಂಡಿ ಮತ್ತೊಂದು ಆಯಾಮದತ್ತ ಹೊರಳಿಕೊಂಡಿದ್ದಾರೆ. ತಮ್ಮ ಹೆಸರನ್ನು `ಶಿಜ’ ಎಂಬುದಾಗಿ ಬದಲಿಸಿಕೊಂಡು ಅದೃಷ್ಟ ಪರೀಕ್ಷೆಗಿಳಿದಿರುವ ಶಿವು ಚಿತ್ರರಂಗಕ್ಕೆ ಹೊಬರೇನಲ್ಲ. ಅವರು ಈ ಹಿಂದೆ ವಿಜಯ ರಾಘವೇಂದ್ರ ನಾಯಕನಾಗಿ ನಟಸಿದ್ದ `ನನ್ನ ನಿನ್ನ ಪ್ರೇಮ ಕಥೆ’ ಅಂತೊಂದು ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಅದಾದ ನಂತರ ಗುಲಾಲ್ ಡಾಟ್ ಕಾಮ್ ಎಂಬ ಕಾಮಿಡಿ ಚಿತ್ರವೊಂದನ್ನು ನಿರ್ದೇಶಿಸಿದ್ದರು. ಅದರ ಮುಖ್ಯ ಭೂಮಿಕೆಯಲ್ಲಿ ತಬಲಾ ನಾಣಿ ನಟಿಸಿದ್ದರು. ಅದಾದ ನಂತರ ಒಂದು ಗ್ಯಾಪಿನ ಬಳಿಕ ಶಿವು ಜಮಖಂಡಿ `ನಸಾಬ್’ ಎಂಬ ಭಿನ್ನ ಕಥಾನಕದ ಬೆಂಬಿದ್ದು, ಅದಕ್ಕೆ ದೃಷ್ಯರೂಪ ನೀಡಿದ್ದಾರೆ. ಇದೀಗ ಅದರ ಶೀರ್ಷಿಕೆ ಬಿಡುಗಡೆಯಾಗಿದೆಯಷ್ಟೆ. ಮಿಕ್ಕುಳಿದ ಮತ್ತೊಂದಷ್ಟು ಆಸಕ್ತಿದಾಯಕ ವಿಚಾರಗಳು ಸದ್ಯದಲ್ಲಿಯೇ ಜಾಹೀರಾಗಲಿವೆ…

The post nasaab: ಇದು ಎಂಬತ್ತರ ದಶಕದ ಸಾಧಕನ ನೈಜ ಕಥೆ! appeared first on Cini Shodha.

ವಿಶಿಷ್ಟ ಕಥೆಗಳ ಸೃಷಿಯ ಮೂಲಕವೇ ಕನ್ನಡ ಸಾಹಿತ್ಯ ಲೋಕದಲ್ಲಿ ಹೆಸರಾಗಿರುವವರು ಬೆಸಗರಹಳ್ಳಿ ರಾಮಣ್ಣ. ಅವರ ಕಥೆಗಳ ಮೇಲೆ ತಲೆಮಾರುಗಳಾಚೆಗೂ ಬೆರಗೊಂದು ಹಾಗೆಯೇ ಉಳಿದುಕೊಂಡಿದೆ ಎಂಬುದೇ ಅವರ ಸಾಹಿತ್ಯಕ್ಕಿರುವ ಶಕ್ತಿಗೊದು ನಿದರ್ಶನ. ಅವರದ್ದೊದು ಕಥೆಯನ್ನು ಓದಿ ಕಾಡಿಸಿಕೊಂಡಿದ್ದ ಕೃಷ್ಣೇಗೌಡರು, ಅದಕ್ಕೆ ಸಿನಿಮಾ ಚೌಕಟ್ಟು ಹಾಕೋ ದೃಢ ನಿರ್ಧಾರಕ್ಕೆ ಬಂದ ಫಲವಾಗಿಯೇ `ನಾನಮು ಕುಸುಮ’ ಚಿತ್ರ ರೂಪುಗೊಂಡಿದೆ. ಈಗಾಗಲೇ ಅನೇಕಾರು ಸಿನಿಮೋತ್ಸವಗಳಲ್ಲಿ ಪ್ರದರ್ಶನಗೊಂಡು, ಪ್ರಶಸ್ತಿಗೂ ಪಾತ್ರವಾಗಿರುವ ಈ ಚಿತ್ರ ವಾರದೊಪ್ಪತ್ತಿನಲ್ಲಿಯೇ ಸಿನಿಮಾ ಮಂದಿರಗಳಲ್ಲಿ ಪ್ರತ್ಯಕ್ಷವಾಗಲಿದೆ.

ಗ್ರೀಷ್ಮಾ ಶ್ರೀಧರ್, ಸನಾತನಿ ಜೋಶಿ, ಕಾವ್ಯಾ ಶ್ರೀಧರ್, ಸೌಮ್ಯ ಭಾಗವತ್, ಕೃಷ್ಣೇಗೌಡ, ಪ್ರತಿಭಾ ಸಂಶಿಮಠ, ವಿಜಯ್ ಮುಂತಾದವರು ಈ ಸಿನಿಮಾದ ಪಾತ್ರಗಳಾಗಿದ್ದಾರೆ. ಈ ಸಮಾಜದಲ್ಲಿ ಸರ್ವ ಕಾಲಕ್ಕೂ ಸಲ್ಲುವಂಥಾ ಕೆಲ ಕಾಯಿಲೆಗಳಿದ್ದಾವೆ. ಅದರಲ್ಲಿ ಹೆಣ್ಣು ಜೀವಗಳನ್ನು ನರಳಿಸುವ ಲೈಂಗಿಕ ದೌರ್ಜನ್ಯವೂ ಪ್ರಧಾನವಾಗಿ ಗುರುತಿಸಿಕೊಳ್ಳುತ್ತದೆ. ಸಮಾಜ ಎಷ್ಟೇ ಮುಂದುವರೆದರೂ, ಅದೆಷ್ಟೇ ಕಠಿಣವಾದ ಕಾನೂನುಗಳು ಬಂದರೂ ಹೆಂಗಳೆಯರ ನರಳಿಎ ಮಾತ್ರ ಇನ್ನೂ ನಿಂತಿಲ್ಲ. ಬಹುಶಃ ಅದು ಅಷ್ಟು ಸಲೀಸಾಗಿ ನಿಲ್ಲುವಂಥಾದ್ದೂ ಅಲ್ಲ. ಈ ಪಿಡುಗಿನ ಸಾರ ಹೊತ್ತ ಕಥಾನಕದೊಂದಿಗೆ ಅಣಿಗೊಂಡಿರುವ ಚಿತ್ರ ನಾನು ಕುಸುಮ!

ಈ ಚಿತ್ರ ಬಿಡುಗಡೆಗೂ ಮುನ್ನವೇ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿದೆ. ಇತ್ತೀಚೆಗೆ ನಡೆದಿದ್ದ 14ನೇ ಬೆಂಗಳೂರು ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶನಗೊಂಡು ಅತ್ಯುತ್ತಮ ಚಿತ್ರ ಪ್ರಶಸ್ತಿಯನ್ನು ಪಡೆದುಕೊಂಡಿದೆ. ಇಂಡಿಯನ್ ಪನೋರಮಾ, ರಾಜಸ್ಥಾನ್ ಫಿಲಂ ಫೆಸ್ಟಿವಲ್, ಕೇರಳದ ತ್ರಿಶೂರ್ ಫಿಲಂ ಫೆಸ್ಟಿವಲ್‍ಗಳಲ್ಲಿಯೂ ಪ್ರದರ್ಶನಗೊಂಡಿದೆ. ಇದೂ ಸೇರಿದಂತೆ ಅನೇಕ ಚಲನ ಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಳ್ಳುವ ಮೂಲಕ ಅಪಾರವಾದ ಪ್ರಶಂಶೆಯನ್ನೂ ತನ್ನದಾಗಿಸಿಕೊಂಡಿದೆ. ಈ ಮೂಲಕ ಕನ್ನಡ ಚಿತ್ರರಂಗದ ಘನತೆಗೆ ಮತ್ತಷ್ಟು ಗರಿ ಮೂಡಿಸುವ ಕೆಲಸವನ್ನೂ ಮಾಡಿದೆ.

ಈ ಚಿತ್ರಕ್ಕಾಗಿ ಬೆಂಗಳೂರಿನ ಸುತ್ತಮುತ್ತಲ ಪ್ರದೇಶಗಳಲ್ಲಿ ಚಿತ್ರೀಕರಣ ನಡೆಸಲಾಗಿದೆ. ಸಿಂಕ್ ಸೌಂಡ್‍ನಲ್ಲಿಯೇ ಒಂದಿಡೀ ಚಿತ್ರವನ್ನು ದೃಷ್ಯೀಕರಿಸಿರುವುದು ಈ ಸಿನಿಮಾದ ಮತ್ತೊಂದು ವಿಶೇಷತೆ. ನಾವು ದಿನನಿತ್ಯ ಇಂಥಾ ಲೈಂಗಿಕ ದೌರ್ಜನ್ಯಗಳ ಸುದ್ದಿಗಳನ್ನು ನೋಡುತ್ತಿರುತ್ತೇವೆ. ಆದರೆ, ಹಾಗೆ ಸುದ್ದಿಯಾಗುವವೆಲ್ಲ ಮೇಲ್ ಸ್ಥರದ ಸಮಾಜದವುಗಳಷ್ಟೇ. ಅದೆಷ್ಟೋ ಲೈಂಗಿಕ ದೌರ್ಜನ್ಯಗಳ ಕರುಣ ಕಥೆಗಳು ಮುಖ್ಯ ವಾಹಿನಿಯನ್ನು ಸೋಕುವುದೇ ಇಲ್ಲ. ಅಂಥವುಗಳೆಲ್ಲ ಕಣ್ಣೀರಾಗಿ, ಜೀವ ಹಿಂಡುವ ನೋವಾಗಿ, ನಿಟ್ಟುಸಿರಾಗಿಯಷ್ಟೇ ಪರ್ಯಾವಸಾನ ಹೊಂದುತ್ತವೆ. ಆ ಥರದ್ದೊಂದು ಕಥೆ ನಾನು ಕುಸುಮ ಚಿತ್ರದಲ್ಲಿದೆ. ಈ ಮನ ಕಲಕುವ ಕಥೆ ಮನಸಿಗಿಳಿಯುವ ಘಳಿಗೆ ಸನ್ನಿಹಿತವಾಗಿದೆ.

The post naanu kusuma: ಮನ ಕಲಕುವ ಕಥೆಯೊಂದು ಮನಸಿಗಿಳಿಯುವ ಹೊತ್ತು…! appeared first on Cini Shodha.

ಈಗಾಗಲೇ ಐದು ವರ್ಷಗಳ ಕಾಲ ಹಲವಾರು ನಿರ್ದೇಶಕರ ಗರಡಿಯಲ್ಲಿ ಪಳಗಿಕೊಂಡಿರುವವರು ಸಂಗಮೇಶ್ ಪಾಟೀಲ್. (sangamesh patil) ನಿರ್ದೇಶಕನಾಗಬೇಕೆಂಬ ಕನಸು ಹೊತ್ತು ಗದಗ ಜಿಲ್ಲೆಯ ನರಗುಂದದಿಂದ ಬೆಂಗಳೂರಿಗೆ ಬಂದಿದ್ದ ಸಂಗಮೇಶ್ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಪದವೀಧರ. ಆದರೆ ಆ ಹೊತ್ತಿಗಾಗಲೇ ಸಿನಿಮಾ ಕನಸನ್ನು ಆಳವಾಗಿ ಹಚ್ಚಿಕೊಂಡಿದ್ದ ಆತ, ತನ್ನಿಷ್ಟದ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿದ್ದರು. ಹಾಗೆ ಒಂದಷ್ಟು ಕಲಿತುಕೊಂಡು ಗಿರ್ಕಿ, ಲೈಫ್ ಜೊತೆ ಒಂದ್ ಸೆಲ್ಫಿ, ಗಾಂಧಿಗಿರಿ ಮುಂತಾದ ಸಿನಿಮಾಗಳಿಗೆ ಕೆಲಸ ಮಾಡಿದ್ದ ಸಂಗಮೇಶ್, ಆ ನಂತರ ಸ್ವತಂತ್ರ ನಿರ್ದೇಶಕರಾಗ ಬಯಸಿದ್ದರು. ಅಂಥಾ ನಿರ್ಧಾರ ತಳೆದ ಬಳಿಕ ದೊಡ್ಡ ಸಿನಿಮಾ ಮಾಡುವ ಮುನ್ನ ಸಣ್ಣ ಪ್ರಮಾಣದಲ್ಲಿ ತನ್ನನ್ನು ತಾನೇ ಪರೀಕ್ಷೆಗೊಡ್ಡಿಕೊಳ್ಳುವ ಸಲುವಾಗಿ ನಿರ್ದೇಶಿಸಿರುವ ಕಿರುಚಿತ್ರ `ಜೀವಸಖಿ’.

ಇದು ಮೂವತೈದು ನಿಮಿಷಗಳ ಕಿರುಚಿತ್ರ. ಹೆಣ್ತನದ ಸೂಕ್ಷ್ಮ ಭಾವಗಳ ಕಥಾ ಹಂದರವಿರೋದರಿಂದಾಗಿ ಈ ಕಿರುಚಿತ್ರಕ್ಕೆ ಜೀವಸಖಿ ಎಂಬ ನಾಮಕರಣ ಮಾಡಲಾಗಿದೆಯಂತೆ. ಇದರ ನಾಯಕನ ಪಾತ್ರಕ್ಕೆ ಪಕ್ಕಾ ಹೊಂದುವವರಿಗಾಗಿ ವ್ಯಾಪಕವಾಗಿ ತಲಾಷು ನಡೆಸಿ, ಕಡೆಗೂ ರಂಗಭೂಮಿಯ ಪ್ರತಿಭೆ ಯುವರಾಜ್ ಪಾಟೀಲ್‍ನನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ. ಈತ ಮೈಸೂರಿನ ರಂಗಾಯಣದಲ್ಲಿ ಎರಡು ವರ್ಷಗಳ ನಟನಾ ತರಬೇತಿ ಪಡೆದುಕೊಂಡಿದ್ದಾರೆ. ಇನ್ನುಳಿದಂತೆ ಸವಾಲಿನದ್ದಾದ ನಾಯಕಿಯ ಪಾತ್ರವನ್ನು ಸೌಂದರ್ಯ ಗೌಡ ನಿರ್ವಹಿಸಿದ್ದಾರೆ. ಈಗಾಗಲೇ ಹಲವಾರು ವೆಬ್ ಸೀರೀಸ್, ಧಾರಾವಾಹಿ, ಸಿನಿಮಾಗಳಲ್ಲಿ ಪಾತ್ರ ಮಾಡಿ ಅನುಭವ ಹೊಂದಿರುವ ಈ ಹುಡುಗಿಗೆ ಜೀವಸಖಿಯಿಂದ ಲಕ್ಕು ಕುದುರೋ ಲಕ್ಷಣಗಳಿದ್ದಾವೆ.

ಈಗಾಗಲೇ ಹಲವಾರು ತಂತ್ರಜ್ಞರು ತಮ್ಮ ಕೆಲಸದ ಭಾಗವಾಗಿ ಈ ಕಿರುಚಿತ್ರವನ್ನು ವೀಕ್ಷಿಸಿದ್ದಾರಂತೆ. ಅವರೆಲ್ಲರೂ ಅಚ್ಚರಿಯಿಂದ ನಾಯಕ ನಾಕಿಯ ಬಗ್ಗೆ ವಿಚಾರಿಸುತ್ತಿದ್ದಾರಂತೆ. ಯುವರಾಜ್ ಪಾಟೀಲ್ ಮತ್ತು ಸೌಂದರ್ಯ ಗೌಡ ಅಷ್ಟು ಚೆಂದಗೆ ನಟಿಸಿದ್ದಾರೆಂಬ ಮೆಚ್ಚುಗೆ, ಇಡೀ ಸಿನಿಮಾ ನೋಡುಗರ ಮನಗೆಲ್ಲುತ್ತದೆಂಬ ಭರವಸೆ ನಿರ್ದೇಶಕರಲ್ಲಿದೆ. ಇನ್ನುಳಿದಂತೆ ಈಗಾಗಲೇ ಕಿರುಚಿತ್ರ ನೋಡಿರುವ ತಂತ್ರಜ್ಞರು ನಿರ್ದೇಶಕ ಸಂಗಮೇಶ್ ಪಾಟೀಲ್ ಕಸುಬುದಾರಿಕೆಯನ್ನೂ ಮೆಚ್ಚಿಕೊಂಡಿದ್ದಾರೆ. ಈ ಕಿರುಚಿತ್ರದಿಂದಲೇ ಹೊಸಾ ಹಾದಿ ತೆರೆದುಕೊಳ್ಳುತ್ತದೆಂಬ ಭರವೆಯ ಮಾತುಗಳನ್ನೂ ಆಡಿದ್ದಾರೆ. ಈ ಮೂಲಕ ನಿರ್ದೇಶಕನಾಗಿ ನೆಲೆ ಕಂಡುಕೊಳ್ಳುವ ಹುರುಪಿನಲ್ಲಿರುವ ಸಂಗಮೇಶ್‍ಗೆ ಆರಂಭಿಕ ಗೆಲುವೊಂದು ಕೈ ಹಿಡಿದಂತಾಗಿದೆ.

ಇದೀಗ ಜೀವಸಖಿ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ ಎಸ್‍ಎಫ್‍ಎಕ್ಸ್, ಮ್ಯೂಸಿಕ್ ಕಾರ್ಯಗಳು ಭರದಿಂದ ಸಾಗುತ್ತಿವೆ. ಎಲ್ಲವೂ ಅಂದುಕೊಂಡಂತ ಆದರೆ ತಿಂಗಳೋಪ್ಪತ್ತಿನಲ್ಲಿಯೇ ಜೀವಸಖಿ ನಿಮ್ಮ ಮುಂದೆ ಬರಲಿದ್ದಾಳೆ. ಈ ಕಿರುಚಿತ್ರದ ಬಿಡುಗಡೆಗೂ ಕೂಡಾ ಈಗಾಗಲೇ ಭೂಮಿಕೆ ಸಿದ್ಧಗೊಂಡಿದೆ. ಒಂದು ಪ್ರಸಿದ್ಧ ಯೂ ಟ್ಯೂಬ್ ಚಾನೆಲ್ಲಿನಲ್ಲಿ ಜೀವಸಖಿ ಬಿಡುಗಡೆಗೊಳ್ಳಲಿದೆ. ಇದಾದ ನಂತರ ಸಂಗಮೇಶ್ ಪಾಟೀಲ್ ಒಂದು ಬಿಗ್ ಬಜೆಟ್ ಚಿತ್ರ ನಿರ್ದೇಶನ ಮಾಡಲಿದ್ದಾರಂತೆ. ಸುನೀಲ್ ಎಲ್ ಎಸ್ ಆರ್ ಸಂಕಲನ, ಜೀವನ್ ಎಸ್ ಛಾಯಾಗ್ರಹಣ ಮತ್ತು ಆತ್ಮಿಕ್ ರೈ ಸಂಗೀತ ನಿರ್ದೇಶನ, ಅಕ್ಷಯ್ ಬಿಂದುಸಾಗರ ಪ್ರಚಾರ ವಿನ್ಯಾಸ ಈ ಕಿರುಚಿತ್ರಕ್ಕಿದೆ.

The post jeevasakhi: ಕಿರುಚಿತ್ರದೊಂದಿಗೆ ಪರೀಕ್ಷೆಗೊಡ್ಡಿಕೊಂಡ ಸಂಗಮೇಶ್ ಪಾಟೀಲ್! appeared first on Cini Shodha.