ಯಾರೋ ಬರೆದುಕೊಟ್ಟ ಸ್ಕ್ರಿಪ್ಟ್ ಓದಿಕೊಂಡು ನಟಿಸುತ್ತಾ ಕಾಮಿಡಿ ಪಟುಗಳೆನ್ನಿಸಿಕೊಂಡವರು ಸಾಕಷ್ಟಿದ್ದಾರೆ. ಡಬಲ್ ಮೀನಿಂಗ್ ಜೋಕುಗಳ ಮೂಲಕ ಚಾಲ್ತಿಯಲ್ಲಿದ್ದು, ಈ ಬಾರಿ ಸ್ಪರ್ಧಿಯಾಗಿದ್ದ ಚಂದ್ರಪ್ರಭಾ ಕೂಡಾ ಅಂಥವರಲ್ಲೊಬ್ಬ. ಈತ ಆಯಾ ಸಂದರ್ಭಕ್ಕನುಗುಣವಾಗಿ ಹಾಸ್ಯ ಸೃಷ್ಟಿಸಲಾಗದೆ ವಾರದೊಪ್ಪತ್ತಿನಲ್ಲಿಯೇ ಜುಟ್ಟು ಕೆದರಿಕೊಂಡಿದ್ದ. ಈ ಹಿಂದೆ ಕುರಿಪ್ರತಾಪ ಕೂಡಾ ಹೀಗೆಯೇ ಕೆಕರುಮಕರಾಗಿ ನಿಂತಿದ್ದ. ಆದರೆ, ಈ ಗಿಲ್ಲಿಯದ್ದು ಅದೆಲ್ಲದರಾಚೆಗಿನ ಪ್ರತಿಭೆ. ಆ ಕ್ಷಣಕ್ಕೆ ಸರಿ ಹೊಂದುವಂತೆ ಮಾತಾಡಿ, ಎಲ್ಲರೂ ನಗುವಂತೆ ಮಾಡೋದಿದೆಯಲ್ಲಾ? ಅದಕ್ಕೆ ಅಸೀಮವಾದೊಂದು ಸೆನ್ಸ್ ಆಫ್ ಹ್ಯೂಮರ್ ಬೇಕಾಗುತ್ತೆ. ಅದನ್ನು ಅರೆದು ಕುಡಿದಂತಿರುವ ಗಿಲ್ಲಿ ಯಾವ ಹಂತದಲ್ಲಿಯೂ ಮುಖವಾಡ ಧರಿಸದೆ, ಯಾರ ಸವಾಲಿಗೂ ಜಗ್ಗದೆ, ಬಿಗ್ ಬಾಸ್ ಮನೆಯ ಅಸಹನೆಗಳ ಸಾಗರವನ್ನು ನಗುವಿನ ಹಾಯಿದೋಣಿಯ ಮೂಲಕವೇ ದಾಟಿಕೊಂಡಿದ್ದಾನೆ.

ಬಹುಶಃ ಬಿಗ್ ಬಾಸ್ ಶೋನ ಹಿಸ್ಟರಿಯಲ್ಲಿಯೇ ಓರ್ವ ಸ್ಪರ್ಧಿ ಈ ಪರಿಯಾಗಿ ಕ್ರೇಜ್ ಮೂಡಿಸಿದ್ದು ಇದೇ ಮೊದಲು. ಆರಂಭದಲ್ಲಿ ಕಾವ್ಯಾಳೊಂದಿಗಿನ ಪ್ರೇಮ ಪುರಾಣದ ಮೂಲಕ ಚಾಲ್ತಿಯಲ್ಲಿದ್ದ ಗಿಲ್ಲಿ, ಆ ನಂತರದಲ್ಲಿ ಸ್ವತಂತ್ರ ಅಸ್ತಿತ್ವ ಕಂಡುಕೊಂಡಿದ್ದ. ಒಂದಷ್ಟು ಹಂತಗಳಲ್ಲಿ ವಿನಾ ಕಾರಣ ಯಾರ್‍ಯಾರನ್ನೋ ಕೆಣಕಿ ರಾಡಿಯೆಬ್ಬಿಸುತ್ತಾನೆಂಬಂತೆ ಅಸಹನೆ ಮೂಡಿದರೂ, ಅವನಿಲ್ಲದೆ ಈ ಶೋ ಇರಲು ಸಾಧ್ಯವಿಲ್ಲ ಎಂಬಂಥಾ ಭಾವ ಮೂಡುವಂತೆ ಮಾಡಿದ್ದ. ಯಾವ ದಿಕ್ಕಿನಿಂದ ನೋಡಿದರೂ ಈ ಬಾರಿಯದ್ದು ಗಿಲ್ಲಿಯ ಒನ್ ಮ್ಯಾನ್ ಶೋ ಎಂಬುದರಲ್ಲಿ ಎರಡು ಮಾತಿಲ್ಲ. ನಿಂತಲ್ಲಿ ಕುಂತಲ್ಲಿ ಕಾಮಿಡಿ ಮಾಡುತ್ತಾ, ಮನೆ ಮಂದಿಯ ಕದಲಿಕೆಯನ್ನು ಸೂಕ್ಷ್ಮವಾಗಿ ಮನಗಂಡು ಟಕ್ಕರ್ ಕೊಡುತ್ತಾ ಸಾಗಿ ಬಂದ ಗಿಲ್ಲಿ ಟಾಸ್ಕುಗಳಲ್ಲಿಯೂ ಹಿಂದೆ ಬಿದ್ದವನಲ್ಲ. ಬರ ಬರುತ್ತಾ ಕೆಲ ಸ್ಪರ್ಧಿಗಳತ್ತ ಒಲವು ಹೊಂದಿದ್ದವರೂ ಕೂಡಾ ತನಗೇ ಓಟು ಹಾಕುವಂತೆ ಮಾಡುವಲ್ಲಿಯೂ ಗಿಲ್ಲಿ ಗೆದ್ದಿದ್ದ.

ಹೀಗೆ ಬಿಗ್ ಬಾಸ್‌ನಂಥಾ ದೊಡ ರಿಯಾಲಿಟಿ ಶೋನ ವಿನ್ನರ್ ಆಗಿರುವ ಗಿಲ್ಲಿಯ ಗೆಲುವು ಕರುನಾಡ ಸಂಭ್ರಮವಾಗಿರೋದಕ್ಕೆ ಕಾರಣ ಆತನ ಹಿನ್ನೆಲೆ. ಮಳವಳ್ಳಿಯ ಸಾಮಾನ್ಯ ರೈತಾಪಿ ವರ್ಗದಲ್ಲಿ ಹುಟ್ಟಿದ್ದ ನಟರಾಜ್ ಕೊರೋನಾ ಕಾಲಘಟ್ಟದಲ್ಲಿ ನಲ್ಲಿಮೂಳೆ ಅಂತೊಂದು ಕಿರುಚಿತ್ರದ ಮೂಲಕ ಗಿಲ್ಲಿ ನಟನಾಗಿ ಪರಿಚಯಗೊಂಡಿದ್ದ. ಮಾರುದ್ಧ ಡೈಲಾಗುಗಳನ್ನು ತಡವರಿಸದೆ ಹೇಳುತ್ತಿದ್ದ ಈ ಹುಡುಗನ ಚಾತುರ್ಯ, ನಟನಾ ಶೈಲಿ ಕಂಡು ವೀಕ್ಷಕರು ಥ್ರಿಲ್ ಆಗಿದ್ದರು. ಈ ನಡುವೆ ಸಿನಿಮಾ ಭಾಗವಾಗುವ ಕನಸು ಹೊತ್ತು ಬೆಂಗಳೂರಿಗೆ ಹೊರಟಿದ್ದ ಗಿಲ್ಲಿ ನಟ, ಅಲ್ಲಿಯೂ ನಾನಾ ವಿಭಾಗದಲ್ಲಿ ಕೆಲಸ ಮಾಡಿದ್ದ. ಆ ಬಳಿಕ ಕಾಮಿಡಿ ಕಿಲಾಡಿಗಳು ಶೋ ಆತನ ಪ್ರತಿಭೆಯನ್ನು ಬೆಳಗಿಸಿತ್ತು. ಆ ಬಳಿಕ ನಾನಾ ಶೋಗಳಲ್ಲಿ ಪ್ರಾಪರ್ಟಿ ಕಾಮಿಡಿ ಅಂತೆಲ್ಲ ಸದ್ದು ಮಾಡಿದ್ದ ಗಿಲ್ಲಿ, ಬಿಗ್ ಬಾಸ್ ಮನೆ ತಲುಪಿದ್ದು, ಅಲ್ಲಿಂದ ವಿನ್ನರ್ ಆಗಿ ಹೊರ ಬಂದಿದ್ದೆಲ್ಲವೂ ಪ್ರತಿಭೆಯಿಂದಲೇ.

ಹೀಗೊಂದು ಗೆಲುವು ದಕ್ಕಿಸಿಕೊಂಡಿಕರುವ ಈ ಹುಡುಗನನ್ನು ಯಾರಾದರೂ ದಾರಿ ತಪ್ಪಿಸಿ ಹಳ್ಳ ಹಿಡಿಸಬಹುದೆಂಬ ಆತಂಕವೂ ಇಲ್ಲ. ಮುಗ್ಧತೆಯನ್ನು ಮೈಗೂಡಿಸಿಕೊಂಡಿರೋ ಗಿಲ್ಲಿಗೆ ಲೋಕಜ್ಞಾನವಿದೆ. ಯಾರನ್ನು ಹೇಗೆ ಸಂಭಾಳಿಸಬೇಕೆಂಬ ಅರಿವಿದೆ. ಎತ್ತರಕ್ಕೇರುವ ಕನಸಿನ ಜೊತೆಗೆ, ಹುಟ್ಟಿದೂರಲ್ಲಿಯೇ ಬೇರಿಳಿಸಿ ಬೆಳೆಯಬೇಕೆಂಬ ಅಪ್ಪಟ ರೈತಾಪಿ ತುಮುಲವೂ ಇದೆ. ಆತ ಇನ್ನು ಮುಂದೆಯೂ ಈಗಿರುವ ಗಿಲ್ಲಿಯಾಗಿಯೇ ಉಳಿಯುವಂತಾದರೆ ಕರುನಾಡು ಮತ್ತಷ್ಟು ಸಂಭ್ರಮಿಸುತ್ತದೆ. ಈ ಬಾರಿ ಬಿಗ್ ಬಾಸ್ ನೋಡದ ಮಂದಿಯನ್ನೂ ಕೂಡಾ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದ್ದ ಕ್ಲಿಪಿಂಗ್ಸ್ ಮೂಲಕ ಸೆಳೋಎದುಕೊಂಡ ಕೀರ್ತಿಯೂ ಗಿಲ್ಲಿಗೆ ಸಲ್ಲುತ್ತದೆ. ನಿಖರವಾಗಿ ಹೇಳೋದಾದರೆ, ಗಿಲ್ಲಿಯದ್ದು ಪರಿಪೂರ್ಣ ಗೆಲುವು. ಅದು ಆತನ ಅಗಾಧ ಪ್ರತಿಭೆಗೆ ಸಂದ ಗೌರವವೂ ಹೌದು…

keywords: gilli, gillinata, winner, biggboss, biggbosskannada, kiccha

The post biggboss12 winner gilli: ನಗಿಸುತ್ತಲೇ ಗೆದ್ದ ನೋಡಿ ಗಿಲ್ಲಿ ನಟ! appeared first on Cini Shodha.

ಈ ಬಾರಿಯ ಕಂಟೆಸ್ಟೆಂಟುಗಳ ಮಟ್ಟಿಗೆ ಹೇಳೋದಾದರೆ ಸಂಪೂರ್ಣ ಹುಚ್ಚರ ಸಂಖ್ಯೆ ಕಡಿಮೆಯಿದೆ. ಸೋಶಿಯಲ್ ಮೀಡಿಯಾ ಮೂಲಕ ಅಪದ್ಧ ಒದರಾಟ ನಡೆಸುವವರು, ಅದ್ಯಾವುದೋ ಯಕ್ಕಾಚಿಕ್ಕಿ ಕಾಪಿ ಮ್ಯೂಸಿಕ್ಕಿಗೆ ಗಂಟಲು ಹರಿಯುವಂತೆ, ಕಿವಿಯ ತಮಟೆ ಕಿತ್ತೆದ್ದು ಹೋಗುವಂತೆ ಅರಚಾಡುವವರು, ಅವನ್ಯಾವನೋ ಕೋಟಿ ಕಥೆ ಕಟ್ಟುವ ನಾಯಿ ಸತೀಶ, ನಟನೆಯ ಗಂಧ ಗಾಳಿಯೂ ಗೊತ್ತಿಲ್ಲದ ಕಿರುತೆರೆ ಸ್ಟಾರ್… ಬಿಗ್ ಬಾಸ್ ಮನೆಯೊಳಗೆ ಇಂಥಾ ಸರಕುಗಳದ್ದೇ ಮೇಲುಗೈ. ಕನ್ನಡದ ಸೂಪರ್ ಸ್ಟಾರ್ ಕಿಚ್ಚಾ ಸುದೀಪನ ಪಾಲಿಗೆ ಇಕನ್ನು ಮೂರು ತಿಂಗಳು ಇಂಥಾ ವಿಚಿತ್ರ ಪ್ರಾಣಿಗಳನ್ನು ಮೇಯಿಸುವ ಕೆಲಸ ನಿಕ್ಕಿ. ಕರ್ನಾಟಕದ ಬಡಪಾಯಿ ಪ್ರೇಕ್ಷಕರ ಪ್ರತೀ ದಿನ ಇವುಗಳ ತಾರಾತಿಗಡಿಗಳನ್ನು ಕಣ್ತುಂಬಿಕೊಳ್ಳುವ ಮಹಾಭಾಗ್ಯ ಪುಕ್ಕಟೆಯೆಂಬಂತೆ ಅಮರಿಕೊಂಡಿದೆ!

ಇದ್ದುದರಲ್ಲಿ ಎಲ್ಲರ ನಿರೀಕ್ಷೆಯಂತೆ ಪ್ರತಿಭಾವಂತ ಹುಡುಗ ಗಿಲ್ಲಿ ನಟ ಸ್ಪರ್ಧಿಯಾಗಿದ್ದಾನೆ. ಈತನ ಬಗ್ಗೆ ನಿರೀಕ್ಷೆ ಮೂಡುವುದಕ್ಕೂ ಕಾರಣಗಳಿದ್ದಾವೆ. ಇಂಥಾ ಕಾಮಿಡಿ ಶೋಗಳಲ್ಲಿ ನಟಿಸಿ ಸೈ ಅನ್ನಿಸಿಕೊಂಡವರು, ಕಾಮಿಡಿ ಕಿಲಾಡಿಗಳಡೆನ್ನಿಸಿಕೊಂಡ ಅನೇಕರು ಸ್ಕ್ರಿಫ್ಟ್ ಇಲ್ಲದೆ ನಗಿಸುವ ಛಾತಿ ಹೊಂದಿರುವುದಿಲ್ಲ. ಯಾರೋ ಬರೆದು ಕೊಟ್ಟ ಡೈಲಾಗುಗಳನ್ನು ಉರು ಹೊಡೆದು ಮೈಲೇಜು ಗಿಟ್ಟಿಸಿಕೊಂಡಿದ್ದ ಕುರಿಪ್ರತಾಪ ಇದೇ ವೇದಿಕೆಯಲ್ಲಿ ಏದುಸಿರು ಬಿಟ್ಟಿದ್ದ. ಕಡೆಕಡೆಗೆ ಈತ ನಗಿಸಲಾಗದೆ ಉಬುಕಾಡೋದೇ ಮಹಾನ್ ಕಾಮಿಡಿಯಂತಾಗಿತ್ತು. ಈ ಸೀಜನ್ನಿನಲ್ಲಿ ಚಂ ದ್ರಪ್ರಭ ಎಂಬ ಪ್ರತಿಭೆ ಕುರಿ ಪ್ರತಾಪನ ಸ್ಥಾನ ತುಂಬುವಂತಿದ್ದಾನೆ. ಕೆಟ್ಟಾಕೊಳಕು ಡೈಲಾಗುಗಳ ಮೂಲಕವೇ ಪ್ರಸಿದ್ಧನಾಗಿದ್ದ ಈತ ಅದರಾಚೆಗೆ ನಗಿಸುವ ಸಾಧ್ಯತೆಗಳು ಕಡಿಮೆ.

ಇಂಥಾ ಹೊತ್ತಿನಲ್ಲಿ ಗಿಲ್ಲಿನಟ ಭಿನ್ನವಾಗಿ ಕಾಣಿಸುತ್ತಾನೆ. ಯಾಕೆಂದರೆ, ಆತ ಸ್ವತಃ ಡೈಲಾಗುಗಳನ್ನು ಸೃಷ್ಟಿಸಿ ಗೆದ್ದವನು. ಹಲವಾರು ಶೋಗಳಲ್ಲಿ ತನ್ನ ಅಸಲೀ ಪ್ರತಿಭೆ ಸಾಬೀತುಪಡಿಸಿರುವವನು. ಆರಂಭಿಕವಾಗಿಯೇ ಗಿಲ್ಲಿ ಗೆಲ್ಲೋ ಸಾಧ್ಯತೆಗಳ ಬಗ್ಗೆ ಚರ್ಚೆಗಳಾಗುತ್ತಿವೆ. ಇನ್ನುಳಿದಂತೆ ಗೀತಾ ಸೀರಿಯಲ್ಲಿನ ನಾಯಕನಾಗಿದ್ದ ಧನುಷ್ ಗೌಡ ನಟನಾಗುವ ಹಾದಿಯಲ್ಲಿನ್ನೂ ಫರ್ಲಾಂಗುಗಟ್ಟಲೆ ಸಾಗೋದಿದೆ. ಗೀತಾ ಸೀರಿಯಲ್ಲಿನ ಮಾಸ್ ಸೀನುಗಳಲ್ಲಿ ಮುಕ್ಕರಿದು ನಟಿಸಲು ಹರಸಾಹಸ ಪಡುತ್ತಿದ್ದ ಈತನ ಬಗ್ಗೆ ಹೆಚ್ಚಿನ ನಿರೀಕ್ಷೆಗಳಿಲ್ಲ. ಇನ್ನು ಹಂತ ಹಂತವಾಗಿ ಅತ್ತು ಬಿಗ್ ಬಾಸ್ ಮನೆಯನ್ನು ರಂಗೇರಿಸಲೆಂದೇ ಒಂದಷ್ಟು ನಟೀಮಣಿಯರನ್ನು ತುಂಬಿಕೊಳ್ಳಲಾಗಿದೆ. ಒಂದು ಕಾಲದಲ್ಲಿ ಆಂಕರ್ ಆಗಿ ಹೆಸರಾಗಿದ್ದ ಜಾನ್ವಿ ಬಗ್ಗೆಯೂ ಹೆಚ್ಚಿನ ನಿರೀಕ್ಷೆಗಳಿದ್ದಂತಿಲ್ಲ.

ಅಷ್ಟಕ್ಕೂ ಈ ಬಿಗ್ ಬಾಸ್ ಅನ್ನೋದೇ ಒಂದು ಭ್ರಾಮಕ ಶೋ. ಇದರಲ್ಲಿ ಮುಸುಡಿ ತೋರಿಸಿದವರು ವಿಶ್ದವಪ್ರಸಿದ್ಧಿ ಹೊಂದಿ ಬಿಡುತ್ತಾರೆಂಬ ಭ್ರಮೆ ಇದೆ. ಆದರೆ, ಒಂದು ಸೀಜನ್ನಿನಲ್ಲಿ ಸ್ಪರ್ಧಿಯಾಗಿದ್ದವರು ಮತ್ತೊಂದು ಸೀಜನ್ನಿನ ಹೊತ್ತಿಗೆ ಮರೆತೇ ಹೋಗುತ್ತಾರೆ. ಇಷ್ಟೂ ಸೀಜನ್ನುಗಳಲ್ಲಿ ಈ ಶೋನಿಂದ ಉದ್ದಾರಾದವರನ್ನು ದುರ್ಬೀನು ಹಾಕಿಕೊಂಡು ಹುಡುಕಿದರೂ ಸಿಗೋದು ಕಷ್ಟ. ತಿಕ್ಕಲುತನವನ್ನೇ ಬಂಡವಾಳವಾಗಿಸಿಕೊಂಡ ಬಿಗ್ ಬಾಸ್ ಪ್ರಾಡಕ್ಟುಗಳಂತೂ ಊರು ತುಂಬಾ ಇಟ್ಟಾಡುತ್ತಿವೆ. ಆ ಸಾಲಿನಲ್ಲಿ ಪ್ರಥಮ್ ಮತ್ತು ಕಿರಿಕ್ ಕೀರ್ತಿಯದ್ದು ಮುಂಚೂಣಿ ಸ್ಥಾನ. ಪ್ರಥಮ ಮತ್ತು ಕಿರಿಕ್ಕಿಗೆ ಮಾತಢೇ ಬಂಡವಾಳ. ಈ ಕೀರ್ತಿಯಂತೂ ಆಯಾ ಕಾಲಕ್ಕೆ ಪ್ರಚಾರ ಸಿಗಬಹುದಾದ ಟೊಂಗೆಯೊಂದಕ್ಕೆ ಛಕ್ಕನೆ ಹಾರಿ ಕೂರುವ ಓತಿಕ್ಯಾತದಂಥವನು. ಅಷ್ಟು ಭೀಕರವಾಗಿ ಅತ್ಯಾಚಾರಕ್ಕೀಡಾಗಿ ಸತ್ತ ಸೌಜನ್ಯಾಳದ್ದು ಪವಿತ್ರ ಸಾವೆಂಬ ಈತ ಪರಮ ನೀಚ.

ಇಂಥಾ ಅಯೋಗ್ಯರನ್ನೇ ಹೆಚ್ಚಾಗಿ ಸೃಷ್ಟಿಸಿದ ಬಿಗ್ ಬಾಸ್ ಶೋ ಬಗ್ಗೆ ಯಾರೂ ಗಂಭೀರವಾದ ನಿರೀಕ್ಷೆ ಇಟ್ಟುಕೊಳ್ಳಲು ಸಾಧ್ಯವಿಲ್ಲ. ಬೀದಿ ಬದಿಯಲ್ಲೆಲ್ಲೋ ಸರ್ಕಸ್ಸು ನಡೆಯುತ್ತಿದ್ದರೆ ಸುಮ್ಮನೆ ಅರೆಘಳಿಗೆ ನಿಂತು ನೋಡಿ ಹೊರಡುತ್ತೇವಲ್ಲ? ಅಂಥಾದ್ದೊಂದು ಕ್ಷಣಿಕ ಕುತೂಹಲಕ್ಕೆ ಮಾತ್ರವೇ ಅರ್ಹವಾದ ಶೋ ಇದು. ಖಂಡಿತವಾಗಿಯೂ ಈ ಬಾರಿ ಒಂದಷ್ಟು ಬದಲಾವಣೆಗಳಿರುತ್ತವೆ. ಟಾಸ್ಕುಗಳಲ್ಲಿಯೂ ಅದು ಇಣುಕಬಹುದೇನೋ. ಈ ಬಾರಿ ಶುರುವಾತಿಗಿಂತಲೂ ಮುನ್ನವೇ ಸ್ಪರ್ಧಿಗಳ ಗುರುತು ಬಯಲಾಗಿರೋದನ್ನೇ ಕಿಚ್ಚಗಾರು ಹೊಸತನ ಎಂಬಂತೆ ಸಂಭ್ರಮಿಸುತ್ತಿದ್ದಾರೆ. ಇಂಥಾ ಸಂಭ್ರಮಗಳೊಂದಿಗೆ ಇನ್ನು ಮೂರು ತಿಂಗಳ ಬಿಗ್ ಬೂಸಾ ಸಂಪನ್ನಗೊಳ್ಳಲಿದೆ!

The post Biggboss Season12: ಹೊಸಾ ವೇಷದಲ್ಲಿ ಬಿಗ್ ಬೂಸಾ! appeared first on Cini Shodha.

ರಾಕಿಂಗ್ ಸ್ಟಾರ್ ಯಶ್ ಅಮ್ಮನ ಮಾತುಗಳ ಧಾಟಿಯ ಬಗ್ಗೆಯೇ ಈಗ ಎಲ್ಲೆಡೆ ವ್ಯಾಪಕವಾಗಿ ಚರ್ಚೆಗಳಾಗುತ್ತಿವೆ. ಆರಂಭದಲ್ಲಿ ಗಟ್ಟಿಗಿತ್ತಿ ನಿರ್ಮಾಪಕಿಯಂತೆ ಎಂಟ್ರಿ ಕೊಟ್ಟಿದ್ದ ಪುಷ್ಪಾ ಅರುಣ್ ಕುಮಾರ್ ಅವರ ಮಾತಿನ ಧಾಟಿ ಕಂಡವರು ಮೆಚ್ಚಿಕೊಂಡಿದ್ದದ್ದು ಸತ್ಯ. ಪುರುಷ ಪಾರುಪಥ್ಯವಿರುವ ಚಿತ್ರರಂಗಕ್ಕೆ ಮಹಿಳೆಯರು ಎಂಟ್ರಿ ಕೊಟ್ಟಾಗ ಅಂಥಾದ್ದೊಂದು ಮೆಚ್ಚುಗೆ ಸಹಜವಾಗಿಯೇ ಮೂಡಿಕೊಳ್ಳುತ್ತೆ. ಪ್ರೇಕ್ಷಕರ ವಲಯದಲ್ಲಿ ಪುಷ್ಪಾರ ಬಗ್ಗೆ ಹಬ್ಬಿಕೊಂಡಿದ್ದ ಮೆಚ್ಚುಗೆ ಎಂಥಾದ್ದಿತ್ತೆಂದರೆ, ಆಕೆಯನ್ನು ಕನ ನಡ ಚಿತ್ರರಂಗ ಕಂಡ ದಿಟ್ಟ ನಿರ್ಮಾಪಕಿ ಪಾರ್ವತಮ್ಮ ರಾಜ್‌ಕುಮಾರ್ ಅವರೊಂದಿಗೆ ಹೋಲಿಕೆ ಮಾಡಲಾರಂಭಿಸಿದ್ದರು. ಅಂಥಾದ್ದೊಂದು ಇಮೇಜನ್ನು ಲಕ್ಷಣವಾಗಿ ಸಂಭಾಳಿಸಿಕೊಂಡಿದ್ದರೆ ಬಹುಶಃ ಆಕೆ ನಿರ್ಮಾಣ ಮಾಡಿರುವ ಕೊತ್ತಲವಾಡಿ ಚಿತ್ರ ಇಷೊಂದು ಹೀನಾಯವಾಗಿ ಕವುಚಿಕೊಳ್ಳುತ್ತಿರಲಿಲ್ಲ!

ಸಾಮಾನ್ಯವಾಗಿ ಒಂದು ಸಿನಿಮಾ ಬಗ್ಗೆ ಪ್ರಚಾರಕ್ಕೆ ನಿಂತಾಗ ನಿರ್ಮಾಪಕರು, ನಿರ್ದೇಶಕರು ಅದರ ಆಂತರ್ಯವನ್ನು ಬಿಟ್ಟು ಬೇರೇನೂ ಮಾತಾಡೋದಿಲ್ಲ. ಯಾವ ವೇದಿಕೆಯಲ್ಲಿ ಮಾತಿಗೆ ನಿಂತರೂ ಕಂಟೆಂಟಿನ ಸುತ್ತಲಷ್ಟೇ ಗಮನ ಕೇಂದ್ರೀಕರಿಸಿಕೊಳ್ಳುತ್ತೆ. ಆದರೆ ಪುಷ್ಪಾ ಮೇಡಮ್ಮು ಮಾತ್ರ ಬರಬರುತ್ತಾ ಬೇಡದ ಅಜ್ಜಿಪುರಾಣಗಳಲ್ಲಿಯೇ ಕಾಲಹರಣ ಮಾಡಿದ್ದರು. ಕೊತ್ತಲವಾಡಿಯ ಭೂಮಿಕೆಯಲ್ಲಿ ಮಾತಿಗೆ ಕೂತ ಪುಷ್ಪಾರ ಕಡೆಯಿಂದ ಆ ಸಿನಿಮಾ ಬಗ್ಗೆ ಕೇಳಿ ಬಂದಿದ್ದು ಅತ್ಯಂತ ಕಡಿಮೆ ಮಾತುಗಳು ಮಾತ್ರ. ಮಿಕ್ಕೆಲ್ಲವೂ ಕೆಲಸಕ್ಕೆ ಬಾರದ ವಿಚಾರಗಳೇ. ಕಡೇಗೆ ಪರಿಸ್ಥಿತಿ ಹೇಗಾಯಿತೆಂದರೆ, ಪುಷ್ಪಾರ ಮಾತುಗಳ ಬಗೆಗಿನ ಚರ್ಚೆಗಳ ಭರಾಟೆಯಲ್ಲಿ ಕೊತ್ತಲವಾಡಿ ಅಕ್ಷರಶಃ ಕೊಚ್ಚಿಕೊಂಡು ಹೋಗಿತ್ತು.

ಆರಂಭದಲ್ಲಿ ಯಶ್ ತಾಯಿ ಈ ಸಿನಿಮಾ ನಿರ್ಮಾಣ ಮಾಡುತ್ತಿದ್ದಾರೆಂಬ ಕಾರಣದಿಂದಲೇ ಸದ್ದು ಮಾಡಿದ್ದದ್ದು ಕೊತ್ತಲವಾಡಿ. ಆದರೆ, ಸಿನಿಮಾ ಪ್ರಮೋಷನ್ನುಗಳ ಸಂದರ್ಭದಲ್ಲಿ ಕೊತ್ತಲವಾಡಿ ಸಿನಿಮಾದ ಬಗ್ಗೆ ಪ್ರೇಕ್ಷಕರು ಸಹಜವಾಗಿಯೇ ಆಸಕ್ತಿ ಕಳೆದುಕೊಂಡಿದ್ದರು. ಅದೆಲ್ಲದರ ಫಲವಾಗಿ ಈ ಚಿತ್ರಕ್ಕೆ ಆರಂಭದಿಂದಲೇ ನೀರಸ ಪ್ರತಿಕ್ರಿಯೆ ಸಿಕ್ಕಿದೆ. ಒಟ್ಟಾರೆ ಸಿನಿಮಾ ಕೂಡಾ ಹೇಳಿಕೊಳ್ಳುವಷ್ಟು ಚೆನ್ನಾಗಿಲ್ಲ ಎಂಬಂಥಾ ವಿಮರ್ಶೆಗಳು ಮೇಲುಗೈ ಪಡೆದಿವೆ. ತಣ್ಣಗೆ ತೆರೆಗಂಡಿದ್ದ ಸು ಫ್ರಂ ಸೋ ಅಲೆಯಲ್ಲಿ ಕೊತ್ತಲವಾಡಿ ನಿತ್ರಾಣಗೊಂಡಿದೆ. ಇದೀಗ ಯಶ್ ಅಮ್ಮ ಮತ್ತೊಂದು ಪ್ರವರ ಶುರುವಿಟ್ಟುಕೊಂಡಿದ್ದಾರೆ.

ಕೆಲವರು ವಿನಾ ಕಾರಣ ನೆಗೆಟಿವ್ ವಿಮರ್ಶೆ ಕೊಡುತ್ತಿದ್ದಾರೆ. ಇದರ ವಿರುದ್ಧ ಸಿಎಂಗೆ ದೂರು ಕೊಡುತ್ತೇನೆ ಅಂತೆಲ್ಲ ಕಾಮಿಡಿ ಮಾಡಲಾರಂಭಿಸಿದ್ದಾರೆ. ತಾಯೀ… ತಾವೇ ಮಾತಿನ ಭರದಲ್ಲಿ `ಸಿನಿಮಾ ಚನಾಗಿದ್ರೆ ನೋಡಿ, ಚನಾಗಿಲ್ಲದಿದ್ರೂ ಹೇಳಿ’ ಅಂದಿದ್ದು ಎಲ್ಲರಿಗೂ ನೆನಪಿದೆ. ತಮ್ಮ ಮಾತಿನಂತೆಯೇ ಕೆಲ ಮಂದಿ ಸಿನಿಮಾ ನೋಡಿದ್ದಾರೆ. ಸಿನಿಮಾ ಸಪ್ಪೆ ಅನಿಸಿದೆ. ಹಾಗನಿಸಿದ್ದನ್ನು ತಮ್ಮಷ್ಟೇ ನೇರವಾಗಿ ಹೇಳಿದ್ದಾರೆ. ವಿಷಯ ಹೀಗಿರುವಾಗ ಸಿಎಂ ಸಿದ್ದಣ್ಣನಿಗೆ ದೂರು ಕೊಟ್ಟು ಅದೇನು ಮಾಡುತ್ತಿರೋ ಭಗವಂತನೇ ಬಲ್ಲ!

The post yash mother pushpa controvercy: ಸಿಎಂ ಸಿದ್ದಣ್ಣನಿಗೆ ದೂರು ಕೊಡ್ತಾರಂತೆ ರಾಕಿಂಗ್ ಮಾತೆ! appeared first on Cini Shodha.