ಸದ್ದೇ ಇಲ್ಲದಂತೆ ಕಾಂತಾರಾ ಚಾಪ್ಟರ್೧ ಸಿನಿಮಾದ ನಾಯಕಿಯಾಗಿ ಆಯ್ಕೆಯಾಗಿದ್ದವರು ರುಕ್ಮಿಣಿ ವಸಂತ್. ಇದು ಆ ಕ್ಷಣದಲ್ಲಿ ಕ್ರಾಂತಿಕಾರಕ ಅಂಶವಾಗಿ ಕಂಡಿರಲಿಲ್ಲ. ಅದಾಗಲೇ ಸಪ್ತಸಾಗರದಾಚೆ ಎಲ್ಲೋ ಚಿತ್ರದ ಮೂಲಕ ಗೆಲುವು ಕಂಡಿದ್ದ ಈಕೆ, ತಮಿಳಿಗೆ ಹಾರಿ, ವಿಜಯ್ ಸೇತುಪಥಿಗೆ ನಾಯಕಿಯಾಗಿ ನಟಿಸಿ ಮುಗ್ಗರಿಸಿದ್ದರು. ಆ ಸಿನಿಮಾ ಸೋಲು ಕಂಡಿತ್ತು.

Kantara Chapter 1: ಕಾಂತಾರಕ್ಕೆ ಬೆಳಕಿನ ಹಬ್ಬವೇ ಸ್ಪೀಡ್ ಬ್ರೇಕರ್!

ಒಂದು ಗೆಲುವಿನ ನಂತರ ಹೀಗೆ ಏಕಾಏಕಿ ಸೋಲೊಂದು ಸುತ್ತಿಕೊಂಡರೆ, ಅದು ವೃತ್ತಿ ಜೀವನದ ಓಘವನ್ನು ಕಡಿಮೆ ಮಾಡುವುದು ಸಹಜ. ಇಂಥಾ ಸೋಲಿನ ಬೆನ್ನಲ್ಲಿಯೇ ರುಕ್ಮಿಣಿ ತೆಲುಗು ಚಿತ್ರದಲ್ಲಿ ಅವಕಾಶ ಪಡದ ಸುಳ್ಳು ಸುದ್ದಿಯೂ ಹಬ್ಬಿಕೊಂಡಿತ್ತು. ಇದರ ಬೆನ್ನಲ್ಲಿಯೇ ರುಕ್ಮಿಣಿಗೆ ಕಾಂತಾರ ಮೂಲಕ ಅದೃಷ್ಟದ ಹೆಬ್ಬಾಗಿಲು ತೆರೆದುಕೊಂಡಿತ್ತು.

ಹಾಗಂತ ರಿಷಭ್ ಶೆಟ್ಟಿ ರುಕ್ಮಿಣಿ ನಾಯಕಿಯಾದ ಬಗ್ಗೆ ಹೆಚ್ಚೇನು ಹೈಪ್ ಸೃಷ್ಟಿಸಿರಲಿಲ್ಲ. ಕಡೇಯ ಹಂತದವರೆಗೂ ರುಕ್ಮಿಣಿ ಈ ಸಿನಿಮಾ ನಾಯಕಿ ಎಂಬ ವಿಚಾರ ಬಹುತೇಕರಿಗೆ ಗೊತ್ತಿರಲೂ ಇಲ್ಲ. ಆದರೆ, ಕಾಂತಾರದ ಕನಕಾವತಿಯಾಗಿ ರುಕ್ಮಿಣಿ ಕಾಣಿಸಿಕೊಂಡ ರೀತಿ ಕಂಡು ನೋಡುಗರೆಲ್ಲ ಅವಾಕ್ಕಾಗಿದ್ದಾರೆ. ಆಕೆಯ ನಟನೆಗೆ, ಸೌಂದರ್ಯಕ್ಕೆ ಪರಭಾಷಿಗರೂ ಫಿದಾ ಆಗಿದ್ದಾರೆ. ಭಾರತೀಯ ಚಿತ್ರರಂಗದಲ್ಲಿ ಈಕೆಯ ಬಗ್ಗೆ ಚರ್ಚೆಗಳಾಗುತ್ತಿವೆ. ಇದು ನಿಜಕ್ಕೂ ಸಮ್ಮೋಹಕ ಗೆಲುವೆಂಬುದು ಎರಡು ಮಾತಿಲ್ಲ. ಹೀಗೆ ರುಕ್ಮಿಣಿಯ ಗೆಲುವಿನ ಝಗಮಗದ ನಡುವೆ ಒಂದಷ್ಟು ಅಭಿಮಾನಿಗಳು ನಿಶ್ವಿಕಾ ನಾಯ್ಢುವನ್ನು ನೆನಪಿಸಿಕೊಳ್ಳುತ್ತಿದ್ದಾರೆ. ಆಕೆಯ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿಯೇ ನಿಶ್ವಿಕಾಗಾಗುತ್ತಿರೋ ಹಿನ್ನಡೆಯ ಬಗ್ಗೆ ಬೇಸರದ ಮಾತುಗಳನ್ನಾಡುತ್ತಿದ್ದಾರೆ.

ನಿಶ್ವಿಕಾ ಕೂಡಾ ಪ್ರತಿಭಾನ್ವಿತ ನಟಿ. ನಟನೆ, ರೂಪದಲ್ಲಿಯೂ ಗಮನಸೆಳೆದಿದ್ದ ಹುಡುಗಿ. ಆದರೆ, ಅದೇಕೋ ಸರಿಕಟ್ಟಾದ ಅವಕಾಶಗಳು ಆಕೆಗೆ ದಕ್ಕುತ್ತಿಲ್ಲ. ಒಂದು ವೇಳೆ ಚೆಂದದ ಅವಕಾಶಗಳು ಸಿಕ್ಕರೆ ನಿಶ್ವಿಕಾ ಕೂಡಾ ನಿಸ್ಸಂದೇಹವಾಗಿಯೂ ರುಕ್ಮಿಣಿಯಂತೆಯೇ ಮಿಂಚುತ್ತಾರೆ. ಪ್ರತಿಭೆ ಇದ್ದರೆ ಅವಕಾಶಗಳು ಅರಸಿ ಬರುತ್ತವೆಂಬುದು ಅನೇಕ ನಟ ನಟಿಯರ ವಿಚಾರದಲ್ಲಿ ಸುಳ್ಳಾಗಿದೆ. ಸದ್ಯದ ಮಟ್ಟಿಗೆ ನಿಶ್ವಿಕಾರದ್ದೂ ಕೂಡಾ ಅಂಥಾದ್ದೇ ಸ್ಥಿತಿ. ಒಂದೇ ಒಂದು ಚೆಂದದ ಅವಕಾಶ ಸಿಕ್ಕರೆ ಆಕೆ ಖಂಡಿಕಯವಾಗಿಯೂ ಮೈಕೊಡವಿ ಮುನ್ನುಗ್ಗಬಹುದು. ನಿಶ್ವಿಕಾಗೆ ಅಂಥಾ ಅವಕಾಶಗಳು ಸಿಗವಂತಾಗಲೆಂದು ಅಭಿಮಾನಿ ಬಳಗ ಹಾರೈಸುತ್ತಿದೆ. ಹಾಗಂತ ಇದರ ಹಿಂದೆ ರುಕ್ಮಿಣಿ ಮಿಂಚುತ್ತಿರೋದರ ಬಗ್ಗೆ ಹೊಟ್ಟೆಕಿಚ್ಚಿನ ಕಿಸುರಿದೆ ಅಂದುಕೊಳ್ಳಬೇಕಿಲ್ಲ. ನಾಯಕಿಯಾಗಿ ಮಿಂಚುವ ಎಲ್ಲ ಅರ್ಹತೆಗಳೂ ಇರುವ ನಿಶ್ವಿಕಾ ಕೆಲ ಶೋಗಳಲ್ಲಿ ಜಡ್ಜ್ ಆಗಿ ಕಾಣಿಸಿಕೊಳ್ಳಲಾರಂಭಿಸಿರೋದು ಅನೇಕರಿಗೆ ಬೇಸರ ತರಿಸಿದೆ. ಈ ಕಾರಣದಿಂದಲೇ ಆಕೆಗೂ ಒಳ್ಳೊಳ್ಳೆ ಅವಕಾಶಗಳು ಅರಸಿ ಬರಲೆಂದು ಆಶಿಸುತ್ತಿದ್ದಾರೆ.

ಈ ನಿಟ್ಟಿನಲ್ಲಿ ರುಕ್ಮಿಣಿಗೆ ಕೂಡಿ ಬರುತ್ತಿರುವ ಅವಕಾಶಗಳನ್ನು ಅದೃಷ್ಟದ ಉಡಿಗೆ ಹಾಕುವಂತೆಯೂ ಇಲ್ಲ. ಕೆಲವೊಮ್ಮೆ ಆಯ್ಕೆ, ಕಾಯುವ ತಾಳ್ಮೆ, ಒಂದೊಂದು ಹೆಜ್ಜೆ ಕೂಡಾ ವೃತ್ತಿ ಬದುಕಿನ ದಿಕ್ಕು ಬದಲಿಸುತ್ತೆ. ಅಂಥಾದ್ದೊಂದು ಸರಿಕಟ್ಟಾದ ಹಾದಿಯಲ್ಲಿ ಎದುರಾಗೋ ಅವಘಡಗಳೂ ಕೂಡಾ ವರವಾಗಿ ಪರಿಣಮಿಸುತ್ತವೆ. ಕಾಂತಾರಾ ಚಾಪ್ಟರ್೧ ಚಿತ್ರೀಕರಣದ ಹಂತದಲ್ಲಿ ಒಂದಷ್ಟು ಆಘಾತಗಳು ಎದುರಾಗಿದ್ದವು.ತೀರ್ಥಹಳ್ಳಿ ಸಮೀಪ ನೀರಿನಲ್ಲಿ ಚಿತ್ರೀಕರಣ ನಡೆಸುತ್ತಿದ್ದಾಗ ತೆಪ್ಪ ಮಗುಚಿಕೊಂಡು ಅವಘಡ ಸಂಬಂವಿಸಿತ್ತು. ರಿಷಭ್ ಶೆಟ್ಟರು ಬಲು ನಾಜೂಕಿನಿಂದ ಅದನ್ನು ಸಂಭಾಳಿಸಿದ್ದರು. ಹಾಗೆ ತೆಪ್ಪ ಮಗುಚಿಕೊಂಡಾಗ ರುಕ್ಮಿಣಿ ವಸಂತ್ ಕೂಡಾ ನೀರಿಗೆ ಬಿದ್ದು ನಿತ್ರಾಣಗೊಂಡಿದ್ದರು. ಆಕೆಯನ್ನು ತಕ್ಷಣವೇ ಆಸ್ಪತ್ರೆಗೆ ದಾಖಲಿಸಿ ಬಚಾವು ಮಾಡಲಾಗಿತ್ತು.  ವಿಶೇಷವೆಂದರೆ, ಇಂಥಾ ಘಟನೆಗಳಾಚೆಗೂ ಸದರಿ ಸಿನಿಮಾ ಗೆದ್ದಿದೆ. ರುಕ್ಮಿಣಿಗೂ ಗೆಲುವಾಗಿದೆ. ಇಂಥಾ ಒಳಿತಿನ ಕಾಲದ ಕಾರುಣ್ಯ ನಿಶ್ವಿಕಾ ಥರದ ಅರ್ಹ ನಟಿಗೂ ಸಿಗುವಂತಾಗಲೆಂದು ಸಿನಿಮಾಸಕ್ತರು ಹಾರೈಸುತ್ತಿದ್ದಾರೆ!

The post Rukmini Vasanth: ಚಿತ್ರೀಕರಣದಲ್ಲಿ ನಡೆದಿದ್ದ ಅಪಘಾತವೂ ಗೆಲುವಾದ ಅಚ್ಚರಿ! appeared first on Cini Shodha.

ಹಾಗೆನೋಡಿದರೆ, ಕಾಂತಾರಾ ಚಾಪ್ಟರ್೧ ಬಗ್ಗೆ ಮಿಶ್ರ ಪ್ರತಿಕ್ರಿಯೆಗಳಿದ್ದಾವೆ. ಈ ಹಿಂದೆ ಕಾಂತಾರ ತೆರೆಗಂಡಾಗ ಯಾವ ನಿರೀಕ್ಷೆಗಳೂ ಇರಲಿಲ್ಲ. ಆದರೆ, ತನ್ನೊಳಗಿನ ಬೆರಗುಗಳ ಕಾರಣದಿಂದಲೇ ಅದು ಪ್ಯಾನಿಂಡಿಯಾ ಮಟ್ಟದಲ್ಲಿ ಸಂಚಲನ ಸೃಷ್ಟಿಸಿತ್ತು. ಆದರೆ, ಚಾಪ್ಟರ್೧ ಅನ್ನು ಪ್ಯಾನಿಂಡಿಯಾ ಮಟ್ಟದಲ್ಲಿಯೇ ತಯಾರಿಸಿ, ಪ್ರೇಕ್ಷಕರ ನಿರೀಕ್ಷೆ ತಣಿಸುವ ಮಹಾ ಸವಾಲು ರಿಷಭ್ ಶೆಟ್ಟರ ಮುಂದಿತ್ತು. ಅದು ಯಾವ ನಿರ್ದೇಶಕರ ಪಾಲಿಗಾದರೂ ಅತ್ಯಂತ ಕಠಿಣವಾದ ಸವಾಲು.

Rukmini Vasanth: ಚಿತ್ರೀಕರಣದಲ್ಲಿ ನಡೆದಿದ್ದ ಅಪಘಾತವೂ ಗೆಲುವಾದ ಅಚ್ಚರಿ!

ಈವತ್ತಿಗೆ ಕಾಂತಾರಾ ಚಾಪ್ಟರ್ ೧ ಬಗ್ಗೆ ಸಮೂಹ ಸನ್ನಿಯಂತೆ ಕೆಲ ಮಂದಿ ಒಳ್ಳೆ ಮಾತುಗಳನ್ನಾಡುತ್ತಿದ್ದರೂ ಕೂಡಾ ನೋಡಿದ ಮಂದಿ ಒಂದಷ್ಟು ಹಿನ್ನಡೆಗಳನ್ನು ಎತ್ತಿ ತೋರಿಸುತ್ತಿದ್ದಾರೆ. ಅದೆಲ್ಲವೂ ಕಾಂತಾರ ಚಾಪ್ಟರ್೧ ನಿರೀಕ್ಷೆಯಂತೆ ಮೂಡಿ ಬಂದಿಲ್ಲ ಎಂಬುದನ್ನು ಧ್ವನಿಸುತ್ತಿರೋದು ಸತ್ಯ.

ಆದರೆ, ಈ ಸಿನಿಮಾ ಸಿನಿಮಾ ಮಂದಿರಗಳಲ್ಲಿ ಸಮ್ಮೋಹಕ ಫೀಲ್ ಮೂಡಿಸುವಲ್ಲಿ ಒಂದಷ್ಟು ಗೆದ್ದಿದೆ. ದೀಪಾವಳಿಯ ಶುರುವಾತಿನ ಹೊತ್ತಿಗೆಲ್ಲ ಗಳಿಕೆಯೆಂಬುದು ಏಳುನೂರು ಕೋಟಿಯ ಹಂತ ತಲುಪಿತ್ತು. ಆದರೆ ದೀಪಾವಳಿಯ ನಂತರದಲ್ಲಿ ಎಂಟು ಕೋಟಿ, ಆರುಕೋಟಿಯಂತೆ ಈ ಸಿನಿಮಾದ ಗಳಿಕೆ ಒಂದಂಕಿ ತಲುಪಿಕೊಂಡಿದೆ. ಹಿಂದಿಯಲ್ಲಿ ದೊಡ್ಡ ಸಿನಿಮಾ ಬಿಡುಗಡೆಯಾದರೂ ಕೂಡಾ ಹೇಳಿಕೊಳ್ಳುವಂಥಾ ಹಿನ್ನಡೆ ಆಗಿಲ್ಲ. ಆದರೆ, ಸಾವಿರ ಕೋಟಿಯ ಕ್ಲಬ್ ಸೇರಿಕೊಳ್ಳುವ ನಿಟ್ಟಿನಲ್ಲಿ ಕಡೇ ಕ್ಷಣದಲ್ಲಿ ಒಂದಷ್ಟು ಅಡೆತಡೆಗಳು ಎದುರಾಗಿರೋದಂತೂ ಸತ್ಯ. ಹೀಗೆ ಗಳಿಕೆಯಲ್ಲಿ ದಾಖಲೆಯತ್ತ ಮುನ್ನಡೆದರೂ ಕೂಡಾ, ಈ ಬಾರಿಯ ಗೆಲುವು ರಿಷಭ್ ಶೆಟ್ಟರಿಗೆ ಎಚ್ಚರಿಕೆಯೊಂದನ್ನು ರವಾನಿಸಿರೋದಂತೂ ನಿಜ.

ಕಾಂತಾರದ ಪಂಜುರ್ಲಿ ದೈವದ ಅಬ್ಬರ ಜನಮನ ಸೆಳೆಯುತ್ತಲೇ, ಕರಾವಳಿ ಸೀಮೆಯ ಅಷ್ಟೂ ದೈವಗಳನ್ನಿಟ್ಟುಕೊಂಡು ಮತ್ತೊಂದಷ್ಟು ಸರಣಿಯ ರೀಲು ಸುತ್ತಿ ಗೆಲ್ಲುವ ಉಮೇದು ಶೆಟ್ಟರೊಳಗಿತ್ತು. ಆದರೆ, ಅದುಹೆಚ್ಚು ಕಾಲ ರೋಚಕತೆ ಉಳಿಸಿಕೊಳ್ಳೋದಿಲ್ಲ ಎಂಬ ವಿಚಾರ ಈ ಮೂಲಕವೇ ಸಾಬೀತಾಗಿದೆ. ಕಾಂತಾರ ಗೆಲ್ಲುತ್ತಲೇ ಪಂಜುರ್ಲಿ ದೈವವನ್ನು ಗಣಮಗನಾಗಿ ಆವಾಹಿಸಿಕೊಂಡಿದ್ದೇನೋ ಎಂಬಂತೆ ರಿಷಭ್ ಶೆಟ್ಟಿ ಭಳಾಂಗು ಬಿಟ್ಟಿದ್ದರು. ಈ ಸರಣಿ ಕೂಡಾ ತುಳುನಾಡ ದೈವಗಳ ಅಸಲೀ ಕಥೆಯ ಡಾಮಕ್ಯುಮೆಂಟರಿ ಎಂಬಂತೆ ಪುಂಗಿದ್ದರು. ಅದೆಲ್ಲವೂ ಅವರಿಗೇ ಉಲ್ಟಾ ಹೊಡೆದಿದೆ. ಅಷ್ಟಕ್ಕೂ ಇಂಥಾ ದೈವಗಳನ್ನು ಬ್ಯುಸಿನೆಸ್ಸಿಗೆ ಬಳಸಿಕೊಂಡು ಯಾವುದೋ ಕಾಲವಾಗಿದೆ. ಪಂಜುರ್ಲಿ ಮುಂತಾದ ದೈವಗಳನ್ನು ಮೈಮೇಲೆ ಬರಿಸಿಕೊಳ್ಳುವ ಭ್ರಮೆ ಬಿತ್ತುತ್ತಲೇ ಕೆಲ ಖದೀಮರು ಅದೆಷ್ಟೋ ಕುಟುಂಬಗಳ ಕೈ ಖಾಲಿ ಮಾಡಿದ್ದಾರೆ. ಹಾಗಿರುವಾಗ ಶೆಟ್ಟರು ಮತ್ತೆ ಮತ್ತೆ ಅದದೇ ರೀಲು ಸುತ್ತಿದರೆ ಬರಖತ್ತಾಗೋದು ಕಷ್ಟವಿದೆ. ಇದರಾಚೆಗೆ ಕಾಂತಾರ ೧ ಚಿತ್ರದ ಅಮೋಘ ಗೆಲುವು ಕನ್ನಡಿಗರೆಲ್ಲರ ಪಾಲಿನ ಸಂಭ್ರಮವೆಂಬುದರಲ್ಲಿ ಎರಡು ಮಾತಿಲ್ಲ. ಹಾಗಂತ ಮುಂದೆಯೂ ಇಂಥಾದ್ದೇ ಸರಣಿ ಶುರುವಿಟ್ಟುಕೊಂಡರೆ ಕರಾವಳಿಯ ದೈವಗಳೂ ರಿಷಭ್ ಪಡೆಯನ್ನು ಕಾಪಾಡಲಿಕ್ಕಿಲ್ಲ!

The post Kantara Chapter 1: ಕಾಂತಾರಕ್ಕೆ ಬೆಳಕಿನ ಹಬ್ಬವೇ ಸ್ಪೀಡ್ ಬ್ರೇಕರ್! appeared first on Cini Shodha.

ಓರ್ವ ನಟನಾಗಿ, ನಿರ್ದೇಶಕನಾಗಿ, ನಿರ್ಮಾಪಕನಾಗಿಯೂ ಕೂಡಾ ರಾಜ್ ಶೆಟ್ಟಿಯದ್ದು ಭಿನ್ನ ಪಥ. ಇತ್ತೀಚೆಗಷ್ಟೆ ತೆರೆಗಂಡು ಸೂಪರ್ ಹಿಟ್ ಆಗಿರುವ ಸು ಫ್ರಂ ಸೋ ಚಿತ್ರ ಓರ್ವ ನಿರ್ಮಾಪಕನಾಗಿ ರಾಜ್ ಶೆಟ್ಟಿಯ ಕಸುವಿಗೊಂದು ಉದಾಹರಣೆಯಂತೆ ಕಾಣಿಸುತ್ತೆ. ಈ ನಡುವೆ ನಟನಾಗಿಕ ಬೇರೆ ನಿರ್ದೇಶಕರ ಸಿನಿಮಾಗಳಲ್ಲಿಯೂ ಕೂಡಾ ರಾಜ್ ಶೆಟ್ಟರಿಗೆ ಒಳ್ಳೆ ಅವಕಾಶಗಳೇ ಕೂಡಿ ಬರುತ್ತಿವೆ. ಗುರುದತ್ ಗಾಣಿಗ ನಿರ್ದೇಶನದ ಕರಾವಳಿ ಚಿತ್ರದಲ್ಲಿ ರಾಜ್ ಪಾತ್ರದ ಝಲಕ್ಕೊಂದೀಗ ಭಾರೀ ಚರ್ಚೆ ಹುಟ್ಟು ಹಾಕಿದೆ. ರಾಜ್ ಶೆಟ್ಟಿ ಇಲ್ಲಿ ಮಾವೀರನಾಗಿ ಮಿಂಚಲಿರೋದು ಪಕ್ಕಾ.

ಗುರುದತ್ ಗಾಣಿಗ ಈ ಹಿಂದೆ ಅಂಬಿ ನಿಂಗ್ ವಯಸ್ಸಾಯ್ತೋ ಅಂತೊಂದು ಸಿನಿಮಾ ನಿರ್ದೇಶನ ಮಾಡಿದ್ದರು. ಆ ಮೂಲಕ ದೊಡ್ಡ ಮಟ್ಟದಲ್ಲಿ ಗೆಲುವು ದಕ್ಕದಿದ್ದರೂ ಒಂದಷ್ಟು ಮೆಚ್ಚುಗೆಯನ್ನಂತೂ ಪಡೆದುಕೊಂಡಿದ್ದರು. ಕರಾವಳಿ ಮೂಲಕ ಈತ ಪಕ್ಕಾ ಮಾಸ್ ಕಂಟೆಂಟಿನತ್ತ ಮುಖಮಾಡಿದಂತೆ ಕಾಣಿಸುತ್ತಿದೆ. ಅದೆಲ್ಲ ಏನೇ ಇದ್ದರೂ ರಾಜ್ ಶೆಟ್ಟಿ ಆ ಪಾತ್ರವನ್ನು ಒಲಪ್ಪಿಕೊಂಡಿದ್ದಾರೆಂದ ಮೇಲೆ ಒಟ್ಟಾರೆ ಕಂಟೆಂಟು ಚೆಂದಗಿತ್ತೆಂದೇ ಅರ್ಥ. ಅಂಥಾದ್ದೊಂದು ನಂಬಿಕೆ ಕನ್ನಡದ ಸಮಸ್ತ ಸಿನಿಮಾ ಪ್ರೇಮಿಗಳಲ್ಲಿಯೂ ಮೂಡಿಕೊಂಡಿದೆ. ಬಹುಶಃ ಅದು ಅತ್ಯಂತ ಕಡಿಮೆ ಅವಧಿಯಲ್ಲಿ ರಾಜ್ ಶೆಟ್ಟಿ ಜನರ ನಂಬಿಕೆ ಸಂಪಾದಿಸಿದ್ದಕ್ಕೊಂದು ಉದಾಹರಣೆಯಷ್ಟೆ.

ಹೀಗೆ ರಾಜ್ ಶೆಟ್ಟಿ ಕರಾವಳಿಯಲ್ಲಿ ಮಾವೀರನಾದ ವಿಚಾರದ ಆಸುಪಾಸಲ್ಲಿಯೇ ಮತ್ತೊಂದು ದಿಕ್ಕಿನ ಗಂಭೀರ ಚರ್ಚೆಯೂ ಶುರುವಾಗಿದೆ. ಕನ್ನಡ ಚಿಕತ್ರರಂಗಕ್ಕೆ ಆಗಾಗ ಉಸಿರು ನೀಡುತ್ತಿರೋದು ಕಡಲ ಕಿನಾರೆಯ ಕಥೆಗಳೇ ಎಂಬುದು ಆ ಚರ್ಚೆಯ ಮೂಲ. ಒಂದು ಕಾಲದಲ್ಲಿ ಹಳ್ಳಿ ಸೊಗಡೆಂದರೆ ಮಂಡ್ಯ ಸೀಮೆಯ ಟಿಪಿಕಲ್ ಶೈಲಿಯ ಭಾಷೆ, ಜನಜೀವನ ಮಾತ್ರ ಎಂಬಂತಾಗಿತ್ತು. ಬಹುತೇಕ ಎಲ್ಲ ನಿರ್ದೇಶಕರೂ ಕೂಡಾಶ ತಮ್ಮ ಮೂಲ ಬೇರುಗಳನ್ನೇ ಕಿತ್ತಿಟ್ಟುಕೊಂಡವರಂತೆ ಅಂಥಾದ್ದೊಂದು ಸೂತ್ರಕ್ಕೆ ಪಕ್ಕಾಗಿದ್ದರು. ಆದರೀಗ ಕರಾವಳಿಯ ನೆಲಮೂಲದ ಕಥನಗಳೂ ಮುನ್ನೆಲೆಗೆ ಬಂದಿವೆ. ಇದೇ ರೀತಿ ಕರ್ನಾಟಕದ ಬೇರೆ ಬೇರೆ ಭೂಭಾಗಗಳ ಮಣ್ಣಿನ ಘಮ ಹೊದ್ದ ಕಥೆಗಳತ್ತ ಗಮನ ಹರಿಸಿದರೆ ಬಹುಶಃ ಕನ್ನಡ ಚಿತ್ರರಂಗದ ಪಾಲಿಗೆ ಸುವರ್ಣ ಯುಗವೊಂದು ಆರಂಭವಾದೀತೇನೋ…

The post raj b shetty: ಕನ್ನಡ ಚಿತ್ರರಂಗದಲ್ಲೀಗ ಕಿನಾರೆಯ ಕಥೆಗಳದ್ದೇ ಹವಾ! appeared first on Cini Shodha.

ತೆಲುಗಿನಲ್ಲಿ ನಿತಿನ್ ಜೊತೆ ತಮ್ಮುಡು ಅಂತೊಂದು ಚಿತ್ರದಲ್ಲಿ ನಾಯಕಿಯಾಗಿ ನಟಿಸೋ ಅವಕಾಶ ಸಪ್ತಮಿಗೆ ಒಲಿದು ಬಂದಿತ್ತು. ಇಂಥಾದ್ದೊಂದು ಸುದ್ದಿ ಹೊರ ಬಿದ್ದೇಟಿಗೆ, ರಶ್ಮಿಕಾ ಮಂದಣ್ಣಳಂತೆ ಕಾಂತಾರಾ ಹುಡುಗಿ ಕೂಡಾ ತೆಲುಗು ಚಿತ್ರರಂಗದಲ್ಲಿ ಮಿಂಚಬಹುದೆಂಬ ನಿರೀಕ್ಷೆಗಳಿದ್ದವು. ಖುದ್ದು ಸಪ್ತಮಿಗೂ ಕೂಡಾ ಅಂಥಾದ್ದೊಂದು ನಿರೀಕ್ಷೆ ಇದ್ದೇ ಇತ್ತು. ಯಾಕೆಂದರೆ, ಕಾಂತಾರ ಚಿತ್ರದಲ್ಲಿ ಡೀ ಗ್ಲಾಮ್ ಪಾತ್ರದ ಮೂಲಕವೇ ಸಪ್ತಮಿಗೆ ಗೆಲುವು ಒಲಿದಿತ್ತು. ತಮ್ಮುಡು ಚಿತ್ರದಲ್ಲಿಯೂ ಕೂಡಾ ಅಂಥಾದ್ದೇ ಪಾತ್ರ ಸಿಕ್ಕಿತ್ತು. ದಿಲ್ ರಾಜು ನಿರ್ಮಾಣ ಮ ಆಡಿದ್ದ ಈ ಸಿನಿಮಾವನ್ನು ವೇಣು ಶ್ರೀರಾಮ್ ನಿರ್ದೇಶನ ಮಾಡಿದ್ದರು. ಇಷ್ಟೆಲ್ಲ ಇದ್ದರೂ ಕೂಡಾ ತಮ್ಮುಡು ತೆಲುಗು ಪ್ರೇಕ್ಷಕರಿಗೆ ಹಿಡಿಸದೆ, ಬಿಡುಗಡೆಯಾಗಿ ವಾರದೊಪ್ಪತ್ತಿನಲ್ಲಿಯೇ ನೆಲ ತಡವಿದ್ದಾನೆ!

ಅಲ್ಲಿಗೆ ತೆಲುಗಿನಲ್ಲಿ ಆರಂಭದಲ್ಲಿಯೇ ಸಪ್ತಮಿಗೆ ಭಾರೀ ಹಿನ್ನಡೆ ಆದಂತಾಗಿದೆ. ಕಾಂತಾರಾದಂಥಾ ಬಿಗ್ ಹಿಟ್ ಮೂವಿಯ ನಂತರದಲ್ಲಿ ಆ ಗೆಲುವನ್ನು ಸಂಭಾಳಿಸಿಕೊಂಡು ಹೋಗೋದು ಕಲಾವಿದರ ಪಾಲಿಗೆ ಬಲು ಸವಾಲಿನ ಕೆಲಸ. ಆ ಹಿನ್ನೆಲೆಯಲ್ಲಿ ನೋಡೋದಾದರೆ, ಸಪ್ತಮಿಗೆ ಕನ್ನಡದಲ್ಲಿಯೇ ಒಂಷದರ ಹಿಂದೊಂದರಂತೆ ಸೋಲುಗಳು ಎದುರಾಗಿವೆ. ವ್ಯಾಕ್ಸಿನ್ ವಾರ್ ಅಂತೊಂದು ಚಿತ್ರದಲ್ಲಿ ಈಕೆ ನಟಿಸಿದ್ದರಾದರೂ, ಅದು ಬರಖತ್ತಾಗಲಿಲ್ಲ. ಯುವ ಚಿತ್ರದಲ್ಲಿ ನಾಯಕಿಯಾಗಿದ್ದ ಸಪ್ತಮಿಗೆ ನಿರಾಸೆ ಮಾತ್ರವೇ ಸಿಕ್ಕಿತ್ತು. ಯುವನೊಂದಿಗಿನ ಅಫೇರಿನ ವಿಚಾರದಲ್ಲಿ ವಿವಾದವೆದ್ದಿತ್ತೇ ಹೊರತು, ಆ ಸಿನಿಮಾ ಗೆಲುವಿನ ದಡ ಸೇರಲಿಲ್ಲ. ಗೆದ್ದರೆ ತೆಲುಗಲ್ಲಾದರೂ ಚಾಲ್ತಿಯಲ್ಲಿರುವ ಇರಾದೆಯಿಟ್ಟುಕೊಂಡಿದ್ದ ಸಪ್ತಮಿಗೀಗ ತಮ್ಮುಡು ಸೋಲಿನ ಆಘಾತ ಎದುರಾಗಿದೆ!

The post sapthami gowda: ತೆಲುಗು ಚಿತ್ರರಂಗದಲ್ಲಿ ಭಾರೀ ಹಿನ್ನಡೆ! appeared first on Cini Shodha.

ಕಾಂತಾರ (kanthara movie) ಚಿತ್ರ ತೆರೆಗಂಡ ನಂತರದಲ್ಲಿ ಕರಾವಳಿ, ಮಲೆನಾಡು ಭಾಗದ ಆರಾಧ್ಯ ದೈವವವಾದ ಪಂಜುರ್ಲಿಗೊಂದು ಸ್ಟಾರ್ ವ್ಯಾಲ್ಯೂ ಬಂದಿದೆ. ಶೆಟ್ಟರು ಮಾಡಿರುವ ಒಂದಷ್ಟು ರಿಯಲ್ ಸ್ಟಂಟುಗಳಿಂದಾಗಿ ದೈವ ಪಾತ್ರಿಗಳ ಕಿಮ್ಮತ್ತೂ ಕೊಂಚ ಏರಿಕೊಂಡಿದೆ. ದುರಂತವೆಂದರೆ, ಜುಟ್ಟು ಕೆದರಿಕೊಂಡು ಮೈ ಕುಣಿಸುವ ಕೆಲ ಕಳ್ಳ ನರ್ತಕರ ನಸೀಬೂ ಕೂಡಾ ಕಾಂತಾರದ ಪ್ರಭೆಯಲ್ಲಿ ಲಕಲಕಿಸಿದೆ. ಇದೆಲ್ಲಾ ಹಾಗಿರಲಿ; ಸಿನಿಮಾ ವಿಚಾರಕ್ಕೆ ಬಂದರೆ, ದೈವದ ಇರುವಿಕೆ ಕೂಡಾ ಈಗ ಗೆಲುವಿನ ಫಾರ್ಮುಲಾದಂತಾಗಿ ಬಿಟ್ಟಿದೆ. ಇದರ ಭಾಗವಾಗಿಯೇ ಸಿಕ್ಕ ಸಣ್ಣ ಗ್ಯಾಪಿನಲ್ಲಿ ದೈವಲೀಲೆ ತೋರಿಸುವ ಹೊಸಾ ವರಸೆಯೊಂದು ಚಾಲ್ತಿಗೆ ಬಂದಹಾಗಿದೆ!

ಸದ್ಯದ ಮಟ್ಟಿಗೆ ಹೇಳೋದಾದರೆ, ಕನ್ನಡತಿ ಖ್ಯಾತಿಯ ರಂಜನಿ ರಾಘವನ್ ಗೆ ಕೂಡಾ ಅಂಥಾದ್ದೇ ಗುಂಗು ಹತ್ತಿದಂತಿದೆ. ಸತ್ಯಂ ಅಂತೊಂದು ಸಿನಿಮಾದಲ್ಲಿ ರಂಜನಿ ನಟಿಸುತ್ತಿದ್ದಾರೆಂಬ ಸುದ್ದಿನ ಹರಿದಾಡಿತ್ತು. ಗಣಪ ಖ್ಯಾತಿಯ ಸಂತೋಷ್ ಬಾಲರಾಜ್ ನಾಯಕನಾಗಿ ನಟಿಸಿರು ಈ ಸಿನಿಮಾದಲ್ಲಿ ರಂಜನಿ ನಾಯಕಿಯಾಗಿದ್ದಾರೆ. ಹಾರರ್, ಮಾಸ್ ಅಂಶಗಳನ್ನು ಒಳಗೊಂಡಿರೋ ಈ ಸಿನಿಮಾದಲ್ಲಿ ದೈವಲೀಲೆಯೂ ಇದೆ ಎಂಬುದೀಗ ಜಾಹೀರಾಗಿದೆ. ನಿರ್ದೇಶಕರು ಒಂದಷ್ಟು ಅನುಭವಸ್ಥರಾಗಿರೋದರಿಂದ, ಸತ್ಯಂನಲ್ಲಿ ಗಿಮಿಕ್ಕುಗಳು ನಡೆದಿರಲಿಕ್ಕಿಲ್ಲ ಎಂಬ ನಂಬಿಕೆ ಇದೆ. ಅಂತೂ ಘಟ್ಟದ ಆಚೀಚೆ ಹಬ್ಬಿಕೊಂಡಿದ್ದ ಪಂಜುರ್ಲಿಯ ಪ್ರಭೆಯೀಗ ರಾಜಧಾನಿಗೂ ದಾಟಿಕೊಂಡಿದೆ!

The post ranjini raghavan: ರಂಜಿನಿ ರಾಘವನ್ ಗೂ ಅದರದ್ದೇ ಗುಂಗು! appeared first on Cini Shodha.

ಸಾಮಾನ್ಯವಾಗಿ ಒಂದು ದೊಡ್ಡ ಗೆಲುವು ಸಿಕ್ಕ ನಂತರದ ಹೆಜ್ಜೆ ನಿರ್ಣಾಯಕ. ಸೋಲೊಂದನ್ನು ಸಂಭಾಳಿಸುವುದು, ಗೆಲುವೊಂದನ್ನು ಮುಂದುವರೆಸಿಕೊಂಡು ಹೋಗುವುದೆಲ್ಲ ಹೆಚ್ಚು ಕಮ್ಮಿ ಒಂದೇ ತೆರನಾದ ಸವಾಲುಗಳನ್ನು ತಂದೊಡ್ಡುತ್ತವೆ. ಅದನ್ನು ದಾಟಿಕೊಳ್ಳುವುದಕ್ಕೆ ಬಲು ನಾಜೂಕು ನಡೆಗಳೇ ಬೇಕಾಗುತ್ತವೆ. ಆಪ್ತ ಮೂಲವೇ ಹೇಳುವ ಪ್ರಕಾರ, ಕಾಂತಾರ ನಂತರದಲ್ಲಿ ಹಲವಾರು ಅವಕಾಶಗಳು ಸಪ್ತಮಿಯನ್ನು ಅರಸಿ ಬಂದಿದ್ದವು. ಅವೆಲ್ಲವನ್ನೂ ಆಕೆ ನಯವಾಗಿಯೇ ನಿರಾಕರಿಸಿದ್ದಾರೆ. ಕಡೆಗೂ ವಿವೇಕ್ ಅಗ್ನಿಹೋತ್ರಿಯ `ವ್ಯಾಕ್ಸಿನ್ ವಾರ್’ ಎಂಬ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ಈಗಾಗಲೇ ಈ ಸಿನಿಮಾದ ಟೀಸರ್ ಲಾಂಚ್ ಆಗಿದೆ. ಅದರಲ್ಲಿ ಸಪ್ತಮಿ ಡಾಕ್ಟರ್ ಗೆಟಪ್ಪಿನಲ್ಲಿ ಕಾಣಿಸಿಕೊಂಡಿದ್ದಾರೆ.

ಕಾಶ್ಮೀರ್ ಫೈಲ್ಸ್ ಎಂಬ ಸಿನಿಮಾ ಮೂಲಕ ಸದ್ದು ಮಾಡಿರುವಾತ ವಿವೇಕ್ ಅಗ್ನಿಹೋತ್ರಿ. ಇದೀಗ ಆತ ವ್ಯಾಕ್ಸಿನ್ ವಾರ್ ಚಿತ್ರವನ್ನು ನಿರ್ದೇಶನ ಮಾಡಿ ಸೆಪ್ಟೆಂಬರ್ ನಲ್ಲಿ ಬಿಡುಗಡೆಗೊಳಿಸಲು ತೀರ್ಮಾನಿಸಿದ್ದಾರೆ. ಈ ಚಿತ್ರ ಬಾಲಿವುಡ್ಡಿನಲ್ಲಿಯೂ ಸಪ್ತಮಿಯನ್ನು ನೆಲೆಗಾಣಿಸುವ ಲಕ್ಷಣಗಳು ದಟ್ಟವಾಗಿ ಕಾಣಿಸುತ್ತಿವೆ. ಸಪ್ತಮಿಯಂತೂ ವ್ಯಾಕ್ಸಿನ್ ವಾರ್ ಬಗ್ಗೆ ಬಹಳಷ್ಟು ಹೋಪ್ ಗಳನ್ನಿಟ್ಟುಕೊಂಡಿದ್ದಾರೆ. ಕನ್ನಡ ಚಿತ್ರರಂಗದಲ್ಲಿ ಕಾಲೂರಿ ನಿಲ್ಲುತ್ತಲೇ, ಬಾಲಿವುಡ್ ಸೇರಿದಂತೆ ಮತ್ತೊಂದಷ್ಟು ಭಾಷೆಗಳ ಸಿನಿಮಾಗಳಲ್ಲಿ ನಟಿಸ ಬೇಕೆಂಬ ಮಹದಾಸೆ ಸಪ್ತಮಿಯದ್ದಿದ್ದಂತಿದೆ.

ಕರ್ನಾಟಕ ಕಂಡ ಟಫ್ ಪೊಲೀಸ್ ಅಧಿಕಾರಿಯಾಗಿದ್ದ ಎಸ್.ಕೆ ಉಮೇಶ್ ಅವರ ಮಗಳು ಸಪ್ತಮಿ ಗೌಡ. ಮೂಲರ್ತ ಸ್ವಮ್ಮರ್ ಆಗಿರುವ ಸಪ್ತಮಿ ದುನಿಯಾ ಸೂರಿ ನಿರ್ದೇಶನದ ಪಾಪ್ ಕಾರ್ನ್ ಮಂಕಿ ಟೈಗರ್ ಸಿನಿಮಾ ಮೂಲಕ ನಟಿಯಾಗಿ ಎಂಟ್ರಿ ಕೊಟ್ಟಿದ್ದರು. ಆ ಪಾತ್ರದ ಮೂಲಕವೇ ಪ್ರೇಕ್ಷಕರನ್ನು ಸೆಳೆದುಕೊಂಡಿದ್ದ ಸಪ್ತಮಿಗೆ ವರವಾಗಿ ಸಿಕ್ಕ ಸಿನಿಮಾ ಕಾಂತಾರ. ಈ ಸಿನಿಮಾದ ಲೀಲಾ ಪಾತ್ರಧಾರಿಯಾಗಿ ಎಲ್ಲರನ್ನೂ ಆವರಿಸಿಕೊಂಡಿರುವ ಸಪ್ತಮಿ ಪಾಲಿಗೀಗ ಅವಕಾಶಗಳ ರಾಜ ಮಾರ್ಗವೇ ತೆರೆದುಕೊಂಡಿದೆ. ವ್ಯಾಕ್ಸಿನ್ ವಾರ್ ಆಕೆಯ ಪಾಲಿಗೆ ಮಹತ್ವದ ಚಿÀತ್ರ. ಯಾಕೆಂದರೆ, ಅದರ ಸೋಲು ಗೆಲುವಿನ ಮೇಲೆಯೇ ಸಪ್ತಮಿಯ ಬಾಲಿವುಡ್ ಯಾನದ ದಿಕ್ಕು ದೆಸೆಗಳು ನಿರ್ಧಾರವಾಗುತ್ತವೆ!

The post sapthami gowda: ವಾಕ್ಸಿನ್ ವಾರ್ ನಲ್ಲಿ ಮಿಂಚಬಹುದೇ ಸಪ್ತಮಿ ಗೌಡ? appeared first on Cini Shodha.

ಇತ್ತೀಚೆಗಷ್ಟೇ ರಿಷಭ್ ನಿರ್ಮಾಣದ `ಲಾಫಿಂಗ್ ಬುದ್ಧ’ ಎಂಬ ಚಿತ್ರ ಶುಭಾರಂಭಗೊಂಡಿತ್ತು. ಪಕ್ಕಾ ಕಂಟೆಂಟ್ ಓರಿಯಂಟೆಡ್ ಆಗಿರೋ ಈ ಸಿನಿಮಾದ್ಲಿ ಪ್ರಮೋದ್ ಶೆಟ್ಟಿ ಮುಂತಾದವರು ನಟಿಸಿದ್ದಾರೆಂಬ ಸುದ್ದಿಯೂ ಹೊರಬಿದ್ದಿತ್ತು. ಆ ಸಿನಿಮಾ ಬಗೆರಗಿನ ಕುತೂಹಲವಿನ್ನೂ ಚಾಲ್ತಿಯಲ್ಲಿರುವಾಗಲೇ `ವಾಘಚಿಪಾಣಿ’ ಅಂತೊಂದು ಸಿನಿಮಾ ಸುದ್ದಿ ಕೇಂದ್ರದಲ್ಲಿದೆ. ಶೀರ್ಷಿಕೆಯಲ್ಲಿಯೇ ಗಾಢ ಕೌತುಕವನ್ನು ಬಚ್ಚಿಟ್ಟುಕೊಂಡಂತಿರುವ ಈ ಸಿನಿಮಾವೀಗ ಚಿತ್ರೀಕರಣ ಮುಗಿಸಿಕೊಂಡಿದೆ. ಯಾವ ಸದ್ದುಗದ್ದಲವೂ ಇಲ್ಲದೆ ಚಿತ್ರೀಕರಣ ಸಮಾಪ್ತಿ ಮಾಡಿಕೊಂಡಿರುವ ಸದರಿ ಸಿನಿಮಾ ಬಗೆಗೀಗ ಪ್ರೇಕ್ಷಕ ವಲಯದಲ್ಲೊಂದು ಕ್ಯೂರಿಯಾಸಿಟಿ ಮಡುಗಟ್ಟಿಕೊಂಡಿದೆ.

ವಾಘಚಿಪಾಣಿಯನ್ನು ನಟೇಶ್ ಹೆಗ್ಡೆ ನಿರ್ದಶನ ಮಾಡಿದ್ದಾರೆ. ಶಿರಸಿಯ ಸುತ್ತಮುತ್ತಲ ಪ್ರದೇಶಗಳಲ್ಲಿ ಅವ್ಯಾಹತವಾಗಿ ಮೂವತೈದು ದಿನಗಳ ಕಾಲ ಚಿತ್ರೀಕರಣ ನಡೆಸಲಾಗಿದೆ. ಆದರೆ, ಚಿತ್ರೀಕರಣ ಮುಗಿದ ಖುಷಿಯನ್ನಷ್ಟೇ ಹಂಚಿಕೊಂಡಿರುವ ಚಿತ್ರತಂಡ, ಕಥೆ ಮೊದಲಾದ ಮುಖ್ಯ ವಿಚಾರಗಳ ಬಗ್ಗೆ ಸಣ್ಣ ಸುಳಿವನ್ನೂ ಬಿಟ್ಟು ಕೊಡದಂತೆ ಗೌಪ್ಯತೆ ಕಾಯ್ದುಕೊಂಡಿದೆ. ಅಂತೂ ರಿಷಭ್ ನಿರ್ದೇಶನದ ಜೊತೆಗೆ, ನಟನಾಗಿಯೂ ಮಿಂಚುತ್ತಾ, ನಿರ್ಮಾಪಕನಾಗಿಯೂ ಪ್ರಜ್ವಲಿಸುತ್ತಿದ್ದಾರೆ. ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಕಾಸರಗೋಡು ಚಿತ್ರದ ಮೂಲಕ ನಿರ್ಮಾಣ ಆರಂಭಿಸಿದ್ದ ರಿಷಭ್, ಆ ನಂತರದಲ್ಲಿ ಕಥಾ ಸಂಗಮ, ಹೀರೋ, ಪೆದ್ರೋ ಮುಂತಾದ ಚಿತ್ರಗಳನ್ನು ನಿರ್ಮಾಣ ಮಾಡಿದ್ದರು. ಒಟ್ಟಾರೆಯಾಗಿ ರಿಷಭ್ ನಿರ್ಮಾಪಕರಾಗಿಯೂ ಕ್ರಿಯಾಶೀಲ ಸಿನಿಮಾಗಳತ್ತ ಹೆಚ್ಚು ಫೋಕಸ್ ಮಾಡುತ್ತಿರೋದಂತೂ ಸತ್ಯ!

The post vaghachipani: ವಾಘಚಿಪಾಣಿಯ ಕಥೆ ಏನಾಯ್ತು? appeared first on Cini Shodha.