ಸಾಮಾನ್ಯವಾಗಿ, ಸಿನಿಮಾ ಸರಹದ್ದಿನಲ್ಲಿ ಹುಟ್ಟು ಪಡೆಯುವ ಬಹುತೇಕ ಕಥನಗಳು ಪ್ರೀತಿಯ ಸುತ್ತಲೇ ಗಿರಕಿ ಹೊಡೆಯುತ್ತವೆ. ಯಾಕೆಂದರೆ, ಅದು ಮುಟ್ಟಲು ಪ್ರಯತ್ನಿಸಿದಷ್ಟೂ ಅಗಾಧವಾಗುತ್ತಾ ಸಾಗುವ ಮುಗಿಲಿನಂಥಾದ್ದೇ ಅನೂಹ್ಯ ಮಾಯೆ. ಆದರೆ, ಪ್ರೀತಿಯ ಪ್ರತೀ ಸೂಕ್ಷ್ಮ ಫಲುಕುಗಳಿಗೂ ಕಣ್ಣಾಗುವ ಛಾತಿ ಇದ್ದವರು ಮಾತ್ರವೇ ಪ್ರೇಮ ಕಥನಕ್ಕೆ ಸಿನಿಮಾ ಚೌಕಟ್ಟು ಹಾಕಿ ಗೆದ್ದಿದ್ದಾರೆ. ಸದ್ಯ ಸಂಗಮ್ ಟಾಕೀಸ್ ಮೂಲಕ ಬಿಡುಗಡೆಗೊಂಡಿರುವ ಜೀವಸಖಿ ಅದನ್ನು ಸಾಧ್ಯವಾಗಿಸಿಕೊಂಡಂತೆ ಭಾಸವಾಗುತ್ತದೆ. ಒಂದು ಅಚ್ಚುಕಟ್ಟಾದ ಸಮಾರಂಭದಲ್ಲಿ ಮೂವತ್ತಾರು ನಿಮಿಷಗಳ ಈ ಕಿರುಚಿತ್ರ ಬಿಡುಗಡೆಗೊಂಡಿತ್ತು. ಅಲ್ಲಿ ಅದನ್ನು ಕಣ್ತುಂಬಿಕೊಂಡ ಪ್ರತಿಯೊಬ್ಬರೂ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಅವರೆಲ್ಲರಿಗೂ ಒಂದು ದೊಡ್ಡ ಸಿನಿಮಾ ಕೊಡಮಾಡಬಹದಾದ ಅನುಭೂತಿಯೊಂದನ್ನು ಜೀವಸಖಿ ಕೊಡಮಾಡಿದೆ.

ನವಿರಾದ ಪ್ರೇಮ ಕಥನವನ್ನು ಒಳಗೊಂಡಿರು ಈ ಕಿರುಚಿತ್ರದಲ್ಲಿ ಹೆಣ್ಣು ಮನಸಿನ ಒಳತೋಟಿಗಳಿವೆ. ಪ್ರೀತಿಯನ್ನು ಸುತ್ತುವರೆವಗಳಿವೆ. ಅದೆಲ್ಲವನ್ನು ದೃಷ್ಯರೂಪಕ್ಕಿಳಿಸುವಲ್ಲಿ, ಪ್ರೇಕ್ಷಕರತ್ತ ತಾಜಾತನ ಮುಕ್ಕಾಗದಂತೆ ದಾಟಿಸುವಲ್ಲಿ ನಿರ್ದೇಶಕರು ಗೆದ್ದಿದ್ದಾರೆ. ಅದರ ಫಲವಾಗಿಯೇ ಸಾಮಾಜಿಕ ಜಾಲತಾಣದ ತುಂಬೆಲ್ಲ ಜೀವಸಖಿಯ ಪ್ರಭೆ ಹಬಿಕೊಂಡಿದೆ. ಸಿನಿಮಾ ಮಂದಿರದಲ್ಲಿ ಬಿಡುಗಡೆಗೊಂಡ ಚಿತ್ರಗಳ ಬಗ್ಗೆ ಬಾಯಿಂದ ಬಾಯಿಗೆ ಒಳ್ಳೆ ಮಾತುಗಳು ಹಬ್ಬಿಕೊಳ್ಳುತ್ತವಲ್ಲಾ? ಅದೇ ಆವೇಗದಲ್ಲಿ ಜೀವಸಖಿ ಜೀಕಾಡುತ್ತಿದ್ದಾಳೆ. ಬಹುತೇಕ ಎಲ್ಲ ಅಭಿರುಚಿಯ ಪ್ರೇಕ್ಷಕರನ್ನೂ ಒಳಗೊಳ್ಳುತ್ತಾ ಮುಂದುವರೆಯುತ್ತಿದ್ದಾಳೆ.

ಹೀಗೆ ಚೆಂದದ ಕಿರುಚಿತ್ರದ ಮೂಲಕ ಗಮನ ಸೆಳೆದಿರುವ ಸಂಗಮೇಶ್ ಪಾಟೀಲ್, ಈಗ್ಗೆ ಐದು ವರ್ಷಗಳಿಂದ ನಾನಾ ನಿರ್ದೇಶಕರ ಗರಡಿಯಲ್ಲಿ ಪಳಗಿಕೊಂಡಿದ್ದವರು. ನಿರ್ದೇಶಕನಾಗಬೇಕೆಂಬ ಹಂಬಲದೊಂದಿಗೆ ಸಾಗಿ ಬಂದಿದ್ದ ಸಂಗಮೇಶ್ ಒಂದು ದೊಡ್ಡ ಕನಸನ್ನು ಸಾಕಾರಗೊಳಿಸಿಕೊಳ್ಳುವ ಮುನ್ನ, ಈ ಕಿರುಚಿತ್ರದ ಮೂಲಕ ತನ್ನನ್ನು ತಾನೇ ಪರೀಕ್ಷೆಗೊಡ್ಡಿಕೊಂಡಿದ್ದಾರೆ. ಪ್ರೇಕ್ಷಕರ ಕಡೆಯಿಂದ ಫುಲ್ ಮಾರ್ಕ್ಸ್ ಸಿಗುತ್ತಿರೋದರಿಂದ ಆರಂಭಿಕ ಗೆಲುವು ದಕ್ಕುತ್ತಿರುವ ಖುಷಿಯಲ್ಲಿದ್ದಾರೆ. ಅಂದಹಾಗೆ ಒಂದೊಳ್ಳೆ ತಂಡದ ಸಾಹಚರ್ಯದೊಂದಿಗೆ ಸಂಗಮೇಶ್ ಈ ಕಿರುಚಿತ್ರವನ್ನು ರೂಪಿಸಿದ್ದಾರೆ. ಸುನೀಲ್ ಎಲ್ ಎಸ್ ಆರ್ ಸಂಕಲನ, ಜೀವನ್ ಎಸ್ ಛಾಯಾಗ್ರಹಣ, ಸೂರಜ್ ಜೋಯಿಸ್ ಸಂಗೀತ ನಿರ್ದೇಶನ, ಅಕ್ಷಯ್ ಬಿಂದುಸಾರ ಪ್ರಚಾರ, ರವಿ ಕರಳ್ಳಿ ವಿ ಎಫ್ ಎಕ್ಸ್, ರವಿ ಹಿರೇಮಠ್ ಸೌಂಡ್ ಡಿಸೈನ್ ವಿನ್ಯಾಸ ಈ ಚಿತ್ರಕ್ಕಿದೆ. ಸದ್ಯ ಒಂದು ಬಿಗ್ ಪ್ರಾಜೆಕ್ಟಿಗಾಗಿ ಸಂಗಮೇಶ್ ಅಣಿಗೊಳ್ಳುತ್ತಿದ್ದಾರೆ…

The post jeevasakhi filme: ಸಂಗಮೇಶ್ ಪಾಟೀಲ್ ಚೊಚ್ಚಲ ಪ್ರಯತ್ನ ಫಲಿಸೋ ಲಕ್ಷಣ! appeared first on Cini Shodha.

ಈಗಾಗಲೇ ಐದು ವರ್ಷಗಳ ಕಾಲ ಹಲವಾರು ನಿರ್ದೇಶಕರ ಗರಡಿಯಲ್ಲಿ ಪಳಗಿಕೊಂಡಿರುವವರು ಸಂಗಮೇಶ್ ಪಾಟೀಲ್. (sangamesh patil) ನಿರ್ದೇಶಕನಾಗಬೇಕೆಂಬ ಕನಸು ಹೊತ್ತು ಗದಗ ಜಿಲ್ಲೆಯ ನರಗುಂದದಿಂದ ಬೆಂಗಳೂರಿಗೆ ಬಂದಿದ್ದ ಸಂಗಮೇಶ್ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಪದವೀಧರ. ಆದರೆ ಆ ಹೊತ್ತಿಗಾಗಲೇ ಸಿನಿಮಾ ಕನಸನ್ನು ಆಳವಾಗಿ ಹಚ್ಚಿಕೊಂಡಿದ್ದ ಆತ, ತನ್ನಿಷ್ಟದ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿದ್ದರು. ಹಾಗೆ ಒಂದಷ್ಟು ಕಲಿತುಕೊಂಡು ಗಿರ್ಕಿ, ಲೈಫ್ ಜೊತೆ ಒಂದ್ ಸೆಲ್ಫಿ, ಗಾಂಧಿಗಿರಿ ಮುಂತಾದ ಸಿನಿಮಾಗಳಿಗೆ ಕೆಲಸ ಮಾಡಿದ್ದ ಸಂಗಮೇಶ್, ಆ ನಂತರ ಸ್ವತಂತ್ರ ನಿರ್ದೇಶಕರಾಗ ಬಯಸಿದ್ದರು. ಅಂಥಾ ನಿರ್ಧಾರ ತಳೆದ ಬಳಿಕ ದೊಡ್ಡ ಸಿನಿಮಾ ಮಾಡುವ ಮುನ್ನ ಸಣ್ಣ ಪ್ರಮಾಣದಲ್ಲಿ ತನ್ನನ್ನು ತಾನೇ ಪರೀಕ್ಷೆಗೊಡ್ಡಿಕೊಳ್ಳುವ ಸಲುವಾಗಿ ನಿರ್ದೇಶಿಸಿರುವ ಕಿರುಚಿತ್ರ `ಜೀವಸಖಿ’.

ಇದು ಮೂವತೈದು ನಿಮಿಷಗಳ ಕಿರುಚಿತ್ರ. ಹೆಣ್ತನದ ಸೂಕ್ಷ್ಮ ಭಾವಗಳ ಕಥಾ ಹಂದರವಿರೋದರಿಂದಾಗಿ ಈ ಕಿರುಚಿತ್ರಕ್ಕೆ ಜೀವಸಖಿ ಎಂಬ ನಾಮಕರಣ ಮಾಡಲಾಗಿದೆಯಂತೆ. ಇದರ ನಾಯಕನ ಪಾತ್ರಕ್ಕೆ ಪಕ್ಕಾ ಹೊಂದುವವರಿಗಾಗಿ ವ್ಯಾಪಕವಾಗಿ ತಲಾಷು ನಡೆಸಿ, ಕಡೆಗೂ ರಂಗಭೂಮಿಯ ಪ್ರತಿಭೆ ಯುವರಾಜ್ ಪಾಟೀಲ್‍ನನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ. ಈತ ಮೈಸೂರಿನ ರಂಗಾಯಣದಲ್ಲಿ ಎರಡು ವರ್ಷಗಳ ನಟನಾ ತರಬೇತಿ ಪಡೆದುಕೊಂಡಿದ್ದಾರೆ. ಇನ್ನುಳಿದಂತೆ ಸವಾಲಿನದ್ದಾದ ನಾಯಕಿಯ ಪಾತ್ರವನ್ನು ಸೌಂದರ್ಯ ಗೌಡ ನಿರ್ವಹಿಸಿದ್ದಾರೆ. ಈಗಾಗಲೇ ಹಲವಾರು ವೆಬ್ ಸೀರೀಸ್, ಧಾರಾವಾಹಿ, ಸಿನಿಮಾಗಳಲ್ಲಿ ಪಾತ್ರ ಮಾಡಿ ಅನುಭವ ಹೊಂದಿರುವ ಈ ಹುಡುಗಿಗೆ ಜೀವಸಖಿಯಿಂದ ಲಕ್ಕು ಕುದುರೋ ಲಕ್ಷಣಗಳಿದ್ದಾವೆ.

ಈಗಾಗಲೇ ಹಲವಾರು ತಂತ್ರಜ್ಞರು ತಮ್ಮ ಕೆಲಸದ ಭಾಗವಾಗಿ ಈ ಕಿರುಚಿತ್ರವನ್ನು ವೀಕ್ಷಿಸಿದ್ದಾರಂತೆ. ಅವರೆಲ್ಲರೂ ಅಚ್ಚರಿಯಿಂದ ನಾಯಕ ನಾಕಿಯ ಬಗ್ಗೆ ವಿಚಾರಿಸುತ್ತಿದ್ದಾರಂತೆ. ಯುವರಾಜ್ ಪಾಟೀಲ್ ಮತ್ತು ಸೌಂದರ್ಯ ಗೌಡ ಅಷ್ಟು ಚೆಂದಗೆ ನಟಿಸಿದ್ದಾರೆಂಬ ಮೆಚ್ಚುಗೆ, ಇಡೀ ಸಿನಿಮಾ ನೋಡುಗರ ಮನಗೆಲ್ಲುತ್ತದೆಂಬ ಭರವಸೆ ನಿರ್ದೇಶಕರಲ್ಲಿದೆ. ಇನ್ನುಳಿದಂತೆ ಈಗಾಗಲೇ ಕಿರುಚಿತ್ರ ನೋಡಿರುವ ತಂತ್ರಜ್ಞರು ನಿರ್ದೇಶಕ ಸಂಗಮೇಶ್ ಪಾಟೀಲ್ ಕಸುಬುದಾರಿಕೆಯನ್ನೂ ಮೆಚ್ಚಿಕೊಂಡಿದ್ದಾರೆ. ಈ ಕಿರುಚಿತ್ರದಿಂದಲೇ ಹೊಸಾ ಹಾದಿ ತೆರೆದುಕೊಳ್ಳುತ್ತದೆಂಬ ಭರವೆಯ ಮಾತುಗಳನ್ನೂ ಆಡಿದ್ದಾರೆ. ಈ ಮೂಲಕ ನಿರ್ದೇಶಕನಾಗಿ ನೆಲೆ ಕಂಡುಕೊಳ್ಳುವ ಹುರುಪಿನಲ್ಲಿರುವ ಸಂಗಮೇಶ್‍ಗೆ ಆರಂಭಿಕ ಗೆಲುವೊಂದು ಕೈ ಹಿಡಿದಂತಾಗಿದೆ.

ಇದೀಗ ಜೀವಸಖಿ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ ಎಸ್‍ಎಫ್‍ಎಕ್ಸ್, ಮ್ಯೂಸಿಕ್ ಕಾರ್ಯಗಳು ಭರದಿಂದ ಸಾಗುತ್ತಿವೆ. ಎಲ್ಲವೂ ಅಂದುಕೊಂಡಂತ ಆದರೆ ತಿಂಗಳೋಪ್ಪತ್ತಿನಲ್ಲಿಯೇ ಜೀವಸಖಿ ನಿಮ್ಮ ಮುಂದೆ ಬರಲಿದ್ದಾಳೆ. ಈ ಕಿರುಚಿತ್ರದ ಬಿಡುಗಡೆಗೂ ಕೂಡಾ ಈಗಾಗಲೇ ಭೂಮಿಕೆ ಸಿದ್ಧಗೊಂಡಿದೆ. ಒಂದು ಪ್ರಸಿದ್ಧ ಯೂ ಟ್ಯೂಬ್ ಚಾನೆಲ್ಲಿನಲ್ಲಿ ಜೀವಸಖಿ ಬಿಡುಗಡೆಗೊಳ್ಳಲಿದೆ. ಇದಾದ ನಂತರ ಸಂಗಮೇಶ್ ಪಾಟೀಲ್ ಒಂದು ಬಿಗ್ ಬಜೆಟ್ ಚಿತ್ರ ನಿರ್ದೇಶನ ಮಾಡಲಿದ್ದಾರಂತೆ. ಸುನೀಲ್ ಎಲ್ ಎಸ್ ಆರ್ ಸಂಕಲನ, ಜೀವನ್ ಎಸ್ ಛಾಯಾಗ್ರಹಣ ಮತ್ತು ಆತ್ಮಿಕ್ ರೈ ಸಂಗೀತ ನಿರ್ದೇಶನ, ಅಕ್ಷಯ್ ಬಿಂದುಸಾಗರ ಪ್ರಚಾರ ವಿನ್ಯಾಸ ಈ ಕಿರುಚಿತ್ರಕ್ಕಿದೆ.

The post jeevasakhi: ಕಿರುಚಿತ್ರದೊಂದಿಗೆ ಪರೀಕ್ಷೆಗೊಡ್ಡಿಕೊಂಡ ಸಂಗಮೇಶ್ ಪಾಟೀಲ್! appeared first on Cini Shodha.