ಇತ್ತೀಚೆಗೆ ತೆರೆಗಂಡು ಭರ್ಜರಿ ಯಶ ಕಂಡಿರುವ (bhairathi ranagal movie) ಭೈರತಿ ರಣಗಲ್ ಚಿತ್ರದಲ್ಲಿ ಜೀವನ್ ರಿಚ್ಚಿ ವಿಲನ್ ಆಗಿ ಅಬ್ಬರಿಸಿದ್ದರು. (shivaraj kumar) ಶಿವರಾಜ್ ಕುಮಾರ್ ಜೊತೆಗಿನ ಮುಖಾಮುಖಿ ದೃಶ್ಯಗಳನ್ನು ಕಂಡು ಪ್ರೇಕ್ಷಕರು ಥ್ರಿಲ್ ಆಗಿದ್ದರು. ಇಂಥಾ ಜೀವನ್ ಬಿಡುಗಡೆಗೆ ತಯಾರಾಗಿರುವ ಗನ್ಸ್ ಅಂಡ್ ರೋಸಸ್ ಚಿತ್ರದಲ್ಲಿಯೂ ಖಳನಾಗಿ ಆರ್ಭಟಿಸಿದ್ದಾರೆ. ಭಾರೀ ಖದರ್ ಹೊಂದಿರುವ ಈ ಪಾತ್ರ ತನಗೆ ಒಲಿದು ಬಂದ ಬಗ್ಗೆ ಖುದ್ದು ಅವರೊಳಗೇ ಅಚ್ಚರಿಯಿದೆ. ಹೆಜ್ಜೆ ಹೆಜ್ಜೆಗೂ ಭಿನ್ನ ಪಾತ್ರಗಳನ್ನು ಧ್ಯಾನಿಸುವ ಕಲಾವಿದನಾಗಿ ಇಂಥಾದ್ದೊಂದು ಪಾತ್ರವನ್ನು ಆವಾಹಿಸಿಕೊಂಡ ಬಗ್ಗೆ ಜೀವನ್ ರಿಚ್ಚಿ ಅವರೊಳಗೊಂದು ತೃಪ್ತ ಭಾವ ಮೂಡಿಕೊಂಡಿದೆ. ಇದುವರೆಗೂ ಸಾಕಷ್ಟು ಸಿನಿಮಾಗಳಲ್ಲಿ ನಟಿಸಿ, ನಟನೆಯ ಕಸುವಿನಿಂದಲೇ ಗಮನ ಸೆಳೆದಿರುವ ಜೀವನ್ ಪಾಲಿಗೆ, ಗನ್ಸ್ ಅಂಡ್ ರೋಸಸ್ ಪಾತ್ರ ತನ್ನ ಸಿನಿಮಾ ಪಯಣದಲ್ಲೊಂದು ಮೈಲಿಗಲ್ಲಾಗುತ್ತದೆ ಎಂಬ ಭರವಸೆಯೂ ಇದೆ.

ಜೀವನ್ ರಿಚ್ಚಿ ಗನ್ಸ್ ಅಂಡ್ ರೋಸಸ್ ಚಿತ್ರತಂಡಕ್ಕೆ ಸೇರ್ಪಡೆಗೊಂಡಿದ್ದ ಹಿಂದೆ ಹಿರಿಯ ನಟ ಶೋಭರಾಜ್ ಅವರ ಪಾತ್ರವಿದೆ. ಶೋಭರಾಜ್ ಈ ಸಿನಿಮಾದ ಮಹತ್ವದ ಪಾತ್ರವೊಂದಕ್ಕೆ ಒಪ್ಪಿಕೊಂಡಿದ್ದರು. ಇದೇ ಹಂತದಲ್ಲಿ ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಇನ್ಸ್ ಪೆಕ್ಟರ್ ಪಾತ್ರಕ್ಕಾಗಿ ಕಲಾವಿದರ ಹುಡುಕಾಟದಲ್ಲಿದ್ದರು. ಈ ವಿಚಾರ ತಿಳಿದಿದ್ದ ಶೋಭರಾಜ್ ಜೀವನ್ ಗೆ ಕರೆ ಮಾಡಿ ಹೋಗಿ ನಿರ್ದೇಶಕರನ್ನು ಭೇಟಿಯಾಗುವಂತೆ ಸೂಚಿಸಿದ್ದರಂತೆ. ಶೋಭರಾಜ್ ರನ್ನು ಅಣ್ಣನ ಸ್ಥಾನದಲ್ಲಿಟ್ಟು ಶೋಭಣ್ಣ ಅಂತಲೇ ಕರೆಯುವ ಜೀವನ್ ಮರು ಮಾತಾಡದೆ ಒಪ್ಪಿಕೊಂಡು ನಿರ್ದೇಶಕರನ್ನು ಸಂಪರ್ಕಿಸಿದ್ದರು. ಮಾರನೇ ದಿನವೇ ಕಚೇರಿಗೆ ಹೋದಾಗ ಎದುರುಗೊಂಡಿದ್ದು ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಮುತ್ತು ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್.

ಜೀವನ್ ರನ್ನು ಮಾತಾಡಿಸುತ್ತಲೇ ಅಜಯ್ ಕುಮಾರ್ ನಿರ್ದೇಶಕರೊಂದಿಗೆ ಕ್ಯಾಬಿನ್ನಿನ ಒಳ ಹೋಗಿದ್ದರು. ಹಾಗೆ ಹೋದವರು ಸುದೀರ್ಘ ಡಿಸ್ಕಷನ್ನು ನಡೆಸಿದ್ದರು. ಗಂಟೆಗಟ್ಟಲೆ ಏನೂ ಸದ್ದಿಲ್ಲದಾಗ ಜೀವನ್‌ರನ್ನು ಇನ್ಸ್ ಪೆಕ್ಟರ್ ಪಾತ್ರ ಕೈತಪ್ಪಿದ ಕಸಿವಿಸಿ ಕಾಡಲಾರಂಭಿಸಿತ್ತು. ಕಡೆಗೂ ವಿಚಾರಕ್ಕೆ ಬಂದ ನಿರ್ದೇಶಕರು ಇನ್ಸ್ ಪೆಕ್ಟರ್ ಪಾತ್ರದ ಬದಲು ವಿಲನ್ ಪಾತ್ರ ಮಾಡುವಂತೆ ಸೂಚಿಸಿದ್ದರು. ಬಳಿಕ ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಒಂದೇ ವೇಗದಲ್ಲಿ ಒಂದಿಡೀ ಕಥೆ ಹೇಳಿ, ಆ ಪಾತ್ರದ ಬಗ್ಗೆ ವಿವರಿಸಿದಾಗ ಜೀವನ್ ರಿಚ್ಚಿ ಅಕ್ಷರಶಃ ಥ್ರಿಲ್ ಆಗಿದ್ದರಂತೆ. ಸಿನಿಮಾ ನೋಡಿದ ಪ್ರತಿಯೊಬ್ಬರೊಳಗೂ ಅಂಥಾದ್ದೇ ಥ್ರಿಲ್ ವ್ಯಾಪಿಸಿಕೊಳ್ಳುತ್ತದೆಂಬ ಭರವಸೆ ಜೀವನ್ ಅವರಲ್ಲಿದೆ.

ಕೊಡಗಿನ ವಿರಾಜಪೇಟೆ ತಾಲೂಕಿನ ಕುಕ್ಕುಲೂರಿನವರು ಜೀವನ್ ರಿಚ್ಚಿ. ಬಡತನದ ಕುಟುಂಬದಲ್ಲಿ ಹುಟ್ಟಿ, ಆ ಸಂಕಷ್ಟಗಳನ್ನು ಕಂಡುಂಡು ಬೆಳೆದ ಇವರಿಗೆ ಒಂದಿಡೀ ಬದುಕಿನ ಮಾರ್ಗದರ್ಶಿಯಂತಿದ್ದವರು ತಂದೆ. ಹಾಗೆ ಆ ವಾತಾವರಣದಲ್ಲಿ ಬಹುತೇಕ ಎಲ್ಲ ಕೆಲಸಗಳನ್ನೂ ಮಾಡಿ, ಕಡೆಗೊಂದು ದಿನ ಇಪ್ಪತೈದು ವರ್ಷಗಳ ಹಿಂದೆ ಜೇಬಿನಲ್ಲಿ ನೂರೈವತ್ತು ರೂಪಾಯಿ ಇಟ್ಟುಕೊಂಡು ಬೆಂಗಳೂರಿಗೆ ಬಂದಿಳಿದಿದ್ದವರು ಜೀವನ್. ಒಂಬತ್ತನೇ ತರಗತಿಯಷ್ಟೇ ಓದಿದ್ದ ಅವರಿಗೆ ಓದಿನ ಆಧಾರದಲ್ಲಿ ಕೆಲಸ ಹುಡುಕೋ ಅವಕಾಶವಿರಲಿಲ್ಲ. ಆದ್‌ದರಿಂದಲೇ ಎಸ್‌ಟಿಡಿ ಬೂತ್, ಹೋಟೆಲ್ ಅಂತೆಲ್ಲ ನಾನಾ ಕೆಲಸ ಮಾಡಿ ಬದುಕು ಕಟ್ಟಿಕೊಳ್ಳಲು ಪ್ರಯತ್ನಿಸಿದ್ದರು. ಕಷ್ಟಪಟ್ಟು ದುಡಿಕಯುತ್ತಾ ತಾವೇ ಹೊಟೇಲ್ ಉದ್ಯಮ ಶುರುವಿಟ್ಟುಕೊಂಡಿದ್ದರು. ಅದರಲ್ಲಿ ಕೈ ಸುಟ್ಟುಕೊಂಡು ಟ್ರಾವೆಲ್ಸ್ ಕಸುಬಿನತ್ತ ಹೊರಳಿಕೊಂಡಿದ್ದ ಜೀವನ್ ಕೆಟರಿಂಗ್ ಬ್ಯುಸಿನೆಸ್ ನಡೆಸುತ್ತಾ ಜೀವನದಲ್ಲಿ ನೆಲೆ ಕಂಡುಕೊಂಡಿದ್ದರು. ಮದುವೆಯಾದ ಬಳಿಕ ತಮ್ಮನ್ನು ಸದಾ ಕಾಡುತ್ತಿದ್ದ ನಟನಾಗುವ ಕನಸನ್ನು ನನಸು ಮಾಡಿಕೊಳ್ಳುವತ್ತ ಪ್ರಯತ್ನಿಸಿದ್ದರು.

ಇಂಥಾ ಪ್ರಯತ್ನದ ಹಾದಿಯಲ್ಲಿ ಮೊದಲು ಎದುರಾದದ್ದು ಅವಮಾನ. ನಂತರ ವರ್ಷಗಟ್ಟಲೆ ಅವಮಾನದೊಂದಿಗೆ ನೋವು, ನಿರಾಸೆಗಳ ಸರಣಿ ಮುಂದುವರೆದಿತ್ತು. ಸಿಕ್ಕ ಪುಟ್ಟ ಪಾತ್ರಗಳಲ್ಲಿಯೇ ಅಚ್ಚುಕಟ್ಟಾಗಿ ನಟಿಸುತ್ತಾ ಸಾಗಿ ಬಂದಿದ್ದ ಅವರಿಗೆ ಇತ್ತೀಚಿನ ವರ್ಷಗಳಲ್ಲಿ ಮಹತ್ವದ ಪಾತ್ರಗಳು ಸಿಗಲಾರಂಭಿಸಿವೆ. ಎಂಥಾ ಪಾತ್ರಕ್ಕಾದರೂ ಸೈ ಎಂಬಂಥಾ ಛಾತಿ ಹೊಂದಿರುವ ಜೀವನ್ ಅವರ ನಟನೆಯ ಕಸುವು ಎಲ್ಲರಿಗೂ ಪರಿಚಯವಾಗಿದೆ. ಭೈರತಿ ರಣಗಲ್ ಚಿತ್ರದ ಪಾತ್ರದ ಮೂಲಕ ಅವರ ಪ್ರಭೆ ಮತ್ತಷ್ಟು ಪ್ರಜ್ವಲಿಸಿದೆ. ಅವರು ಕನ್ನಡದಲ್ಲಿ ಮಾತ್ರವಲ್ಲದೇ ಬೇರೆ ಭಾಷೆಗಳಲ್ಲಿಯೂ ಮಿಂಚುವ ಸ್ಪಷ್ಟ ಲಕ್ಷಣಗಳು ಗೋಚರಿಸಲಾರಂಭಿಸಿವೆ. ಗನ್ಸ್ ಅಂಡ್ ರೋಸಸ್ ಪಾತ್ರ ಅವರ ವೃತ್ತಿ ಬದುಕಿಗೆ ಮತ್ತಷ್ಟು ಆವೇಗ ಕೊಡೋದರಲ್ಲಿ ಯಾವ ಸಂದೇಹವೂ ಇಲ್ಲ.

ದ್ರೋಣ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ಎಚ್.ಆರ್ ನಟರಾಜ್ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಈ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಶಶಿ ಕುಮಾರ್ ಸಂಗೀತ ನಿರ್ದೇಶನ, ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಇನ್ಸ್ಪೆಕ್ಟರ್ ಆಗಲು ಬಂದು ವಿಲನ್ ಆದ ರಿಚ್ಚಿ! appeared first on Cini Shodha.

ಜಾಹ್ನವಿ ರಂಗಭೂಮಿಯ ನಂಟು ಹೊಂದಿರುವ ಕಲಾವಿದೆ. ರಂಗಭೂಮಿಯಲ್ಲಿ ನಟಿಯಾಗಿ ತಾಲೀಮು ನಡೆಸುತ್ತಲೇ, ಎಲ್ಲ ಪಟ್ಟುಗಳನ್ನು ಕರಗತ ಮಾಡಿಕೊಂಡಿದ್ದ ಜಾಹ್ನವಿ ಗನ್ಸ್ ಅಂಡ್ ರೋಸಸ್ ಮೂಲಕ ಹಿರಿತೆರೆಗೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ಇಲ್ಲಿ ಅವರಿಗೆ ಬಹುಮುಖ್ಯವಾದ, ಚಿತ್ರದುದ್ದಕ್ಕೂ ಕಾಣಿಸಿಕೊಳ್ಳುವ ಪಾತ್ರವೇ ಸಿಕ್ಕಿದೆ. ಅವರಿಲ್ಲಿ ನಾಯಕಿಯ ಗೆಳತಿಯಾಗಿ ನಟಿಸಿದ್ದಾರೆ. ನಾಯಕಿಯ ಗೆಳತಿ ಅಂದಾಕ್ಷಣ ಹಾಗೆ ಬಂದು ಹೀಗೆ ಹೋಗೋ ಪಾತ್ರಗಳು ಕಣ್ಮುಂದೆ ಸುಳಿಯೋದು ಸಹಜ. ಆದರೆ, ಇಲ್ಲಿರೋ ಪಾತ್ರ ಗಟ್ಟಿತನ ಹೊಂದಿರುವಂಥಾದ್ದು. ಸದಾ ನಾಯಕಿಯ ಜೊತೆಗಿರುತ್ತಾ, ಆಯಾ ಘಟ್ಟಗಳಲ್ಲಿ ಅನ್ನಿಸಿದ್ದನ್ನು ಹೇಳಿ, ನಾಯಕಿಗೆ ತಿಳಿ ಹೇಳುವ ಚಹರೆ ಹೊಂದಿರುವ ಪಾತ್ರವಾಗಿ ಜಾಹ್ನವಿ ಕಾಣಿಸಿಕೊಂಡಿದ್ದಾರೆ.

ದಾಬಸ್ ಪೇಟೆ ಬಳಿಯ ಹಳ್ಳಿಯೊಂದರಿಂದ ಬಂದಿರುವ ಜಾಹ್ನವಿ ಪಾಲಿಗೆ ನಟಿಯಾಗಬೇಕೆಂಬುದು ಏಕಮಾತ್ರ ಕನಸಾಗಿತ್ತು. ಕಂಪ್ಯೂಟರ್ ಸೈನ್ಸ್ ಇಂಜಿನಿಯರಿಂಗ್ ಮುಗಿಸಿಕೊಂಡಿದ್ದ ಅವರಿಗೆ ಒಂದೊಳ್ಳೆ ಕೆಲಸ ಹಿಡಿದು ಸೆಟಲ್ ಆಗಿ ಬಿಡುವ ಅವಕಾಶಗಳಿದ್ದವು. ಆದರೆ, ಓದು ಮುಗಿಯುತ್ತಲೇ ಸಿನಿಮಾ ರಂಗಕ್ಕೆ ದುಮುಕುವ ನಿರ್ಧಾರ ಮಾಡಿದ್ದ ಜಾಹ್ನವಿ ಅದಕ್ಕಾಗಿ ಅವಸರ ಮಾಡಲಿಲ್ಲ. ಎಲ್ಲ ರೀತಿಯಿಂದಲೂ ಕಲಿಕೆ ನಡೆಸಿದ ನಂತರವೇ ಅವಕಾಶಕ್ಕಾಗಿ ಅರಸುವ ತೀರ್ಮಾನ ಮಾಡಿ, ರಂಗಭೂಮಿಯನ್ನು ಆರಿಸಿಕೊಂಡಿದ್ದರು. ಅಲ್ಲಿ ವರ್ಷಗಟ್ಟಲೆ ನಾನಾ ಪಾತ್ರಗಳ ಮೂಲಕ ಪಳಗಿಕೊಂಡಿದ್ದರು. ಹಾಗೆ ನಟಿಯಾಗಿ ಹದಗೊಂಡ ನಂತರವಷ್ಟೇ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಲು ತಯಾರಾಗಿದ್ದರು.

ಇದೇ ಹೊತ್ತಿನಲ್ಲಿ ಗನ್ಸ್ ಅಂಡ್ ರೋಸಸ್ ಚಿತ್ರದ ಆಡಿಷನ್ ನಡೆಯುತ್ತಿರುವ ವಿಚಾರ ಜಾಹೀರಾಗಿತ್ತು. ಕೂಡಲೆ ಆ ಆಡಿಷನ್ನಿನಲ್ಲಿ ಪಾಲ್ಗೊಂಡಿದ್ದ ಜಾಹ್ನವಿ ಹಲವು ಪರೀಕ್ಷೆಗಳನ್ನು ದಾಟಿಕೊಂಡಿದ್ದರು. ಆ ಮೂಲಕ ನಿರ್ದೇಶ ಹೆಚ್.ಎಸ್ ಶ್ರೀನಿವಾಸ ಕುಮಾರ್ ನಾಯಕಿಯ ಗೆಳತಿಯ ಪಾತ್ರ ಕೊಟ್ಟಿದ್ದರು. ಇದೀಗ ಈ ಸಿನಿಮಾ ಬಿಡುಗಡೆಗೆ ತಯಾರಾಗಿದೆ. ಅದರ ನಡುವಲ್ಲಿಯೇ ಮತ್ತೊಂದು ಚಿತ್ರದಲ್ಲಿಯೂ ಅವರು ನಟಿಸಿದ್ದಾರೆ. ಗನ್ಸ್ ಅಂಡ್ ರೋಸಸ್ ಮೂಲಕ ತನಗೆ ಭರ್ಜರಿ ಓಪನಿಂಗ್ ಸಿಗುವ ನಿರೀಕ್ಷೆ ಜಾಹ್ನವಿಗಿದೆ.

ದ್ರೋಣ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ಹೆಚ್.ಆರ್ ನಟರಾಜ್ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಶಶಿ ಕುಮಾರ್ ಸಂಗೀತ ನಿರ್ದೇಶನ, ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಜಾಹ್ನವಿ ವಿಶ್ವನಾಥ್ ಗೆ ಚೆಂದದ ಪಾತ್ರ ಸಿಕ್ಕ ಪುಳಕ! appeared first on Cini Shodha.

ತಂದೆಯೇ ಸಿನಿಮಾ ಕ್ಷೇತ್ರದಲ್ಲಿ ಇದ್ದದ್ದರಿಂದ ಆರಂಭದಿಂದಲೂ ಅರ್ಜುನ್ ಪಾಲಿಗೆ ಸಿನಿಮಾ ವಾತಾವರಣ ಸಿಕ್ಕಿತ್ತು. ಸಿನಿಮಾ ಮಂದಿಯ ಸಂಗ, ಶೂಟಿಂಗ್ ಸ್ಪಾಟುಗಳೆಲ್ಲವೂ ಬದುಕಿನ ಭಾಗವಾಗಿತ್ತು. ಈ ಎಲ್ಲ ಕಾರಣಗಳಿಂದ ಸಿನಿಮಾದೆಡೆಗಿನ ಬೆರಗು ಅರ್ಜುನ್ ರೊಳಗೆ ಬಲವಾಗುತ್ತಾ ಸಾಗಿತ್ತು. ತೀರಾ ಎಳೇ ವಯಸ್ಸಿನಿಂದಲೇ ನಟನಾಗುವ ಕನಸು ಅಪ್ರಜ್ಞಾಪೂರ್ವಕವಾಗಿ ಚಿಗುರಲಾರಂಭಿಸಿತ್ತು. ಅದು ಒಂದು ಹಂತಕ್ಕೆ ಸಾಕಾರಗೊಂಡಿದ್ದು ನಂದ ಲವ್ಸ್ ನಂದಿತಾ ಚಿತ್ರದ ಮೂಲಕ. ಆ ಚಿತ್ರಕ್ಕೆ ಅಜಯ್ ಕುಮಾರ್ ಕಥೆ, ಚಿತ್ರಕಥೆ ಬರೆದಿದ್ದರು. ಅದರಲ್ಲಿ ನಾಯಕ ಲೂಸ್ ಮಾದ ಯೋಗಿಯ ಎಳವೆಯ ಪಾತ್ರ ಅರ್ಜುನ್ ಗೆ ಒಲಿದು ಬಂದಿತ್ತು. ಆ ಮೂಲಕ ಒಂದಷ್ಟು ಮೆಚ್ಚುಗೆಯನ್ನೂ ಕೂಡಾ ಅರ್ಜುನ್ ಗಳಿಸಿಕೊಂಡಿದ್ದರು. ಆ ನಂತರ ಅಜಯ್ ಕುಮಾರ್ ಓದಿನತ್ತ ಮಾತ್ರ ಗಮನ ಹರಿಸುವಂತೆ ಮಗನಿಗೆ ತಾಕೀತು ಮಾಡಿದ್ದರು.

ಈ ನಡುವೆ ಓದೆಲ್ಲ ಮುಗಿಸಿಕೊಂಡ ಮೇಲೂ ನಾಯಕನಾಗಿ ಬಿಡುವ ವಿಪುಲ ಅವಕಾಶಗಳು ಅರ್ಜುನ್ ಪಾಲಿಗಿದ್ದವು. ಆದರೆ, ತಂದೆ ಅಜಯ್ ಮಾತ್ರ ನಟನಾಗಲು ಬೇಕಾದ ಎಲ್ಲ ದಿಕ್ಕಿನಲ್ಲಿಯೂ ಪಳಗಿಕೊಂಡ ನಂತರವಷ್ಟೇ ನಾಯಕನಾಗಲು ಪ್ರಯತ್ನಿಸಬೇಕೆಂದು ಕಟ್ಟುನಿಟ್ಟಾಗಿ ತಾಕೀತು ಮಾಡಿದ್‌ದರಂತೆ. ಅದನ್ನು ಚಾಚೂತಪ್ಪದೆ ಪಾಲಿಸಿದ್ದ ಅರ್ಜುನ್, ಸಿನಿಮಾ ತರಬೇತಿಗೆ ಸೇರಿಕೊಂಡು ಮಾರ್ಷಲ್ ಆರ್ಟ್ಸ್, ಡ್ಯಾನ್ಸ್, ಫೈಟ್, ನಟನೆ ಸೇರಿದಂತೆ ಎಲ್ಲ ತರಬೇತಿಯನ್ನೂ ಪಡೆದುಕೊಂಡಿದ್ದರು. ಆ ನಂತರವೇ ನಾಯಕನಾಗಲು ಪ್ರಯತ್ನಿಸಲಾರಂಭಿಸಿದ್ದ ಅವರಿಗೆ ಗನ್ಸ್ ಅಂಡ್ ರೋಸಸ್ ಮೂಲಕ ಅದು ಕೈಗೂಡಿದೆ.

ಗನ್ಸ್ ಅಂಡ್ ರೋಸಸ್ ಚಿತ್ರದಲ್ಲಿ ಅರ್ಜುನ್ ಗೆ ಸಿಕ್ಕಿರೋ ಪಾತ್ರ ಅಕ್ಷರಶಃ ಸವಾಲಿನದ್ದು. ಕಡಿಮೆ ಮಾತಿಗೆ, ಆಕ್ಟೀವ್ ಆಗಿರುವ ಆ ಪಾತ್ರಕ್ಕೆ ಹಲವು ಶೇಡುಗಳಿವೆ. ಈ ಮೂಲಕವೇ ಸದರಿ ಸಮಾಜದ ಕಠೋರ ವಾಸ್ತವಕ್ಕೆ ಕನ್ನಡಿ ಹಿಡಿದು, ಯುವ ಸದಮುದಾಯವನ್ನು ಸರಿದಿಕ್ಕಿನತ್ತ ಚಲಿಸುವಂತೆ ಪ್ರೇರೇಪಿಸುವ ಈ ಪಾತ್ರ ಅರ್ಜುನ್ ಪಾಲಿಗೆ ಖುಷಿ ಕೊಟ್ಟಿದೆ. ಈಗಾಗಲೇ ಪರಭಾಷಾ ಚಿತ್ರರಂಗದ ವಿತರಕರನೇಕರು ಅರ್ಜುನ್ ನಟನೆಯನ್ನು ಮೆಚ್ಚಿ ಕೊಂಡಾಡಿದ್ದಾರೆ. ಎಲ್ಲ ಭಾಷೆಗಳ ಪ್ರೇಕ್ಷಕರಿಗೂ ಹಿಡಿಸುವಂತೆ ನಟಿಸಿದ್ದಾರೆಂಬ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ಅಂದಹಾಗೆ, ಈ ಸಿನಿಮಾ ಪ್ಯಾನಿಂಡಿಯಾ ಮಟ್ಟದಲ್ಲಿ ಬಿಡುಗಡೆಗೊಳ್ಳಲಿದೆ.

ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ನಿರ್ಮಾಣ ಮಾಡಿರುವ ಹೆಚ್.ಆರ್ ನಟರಾಜ್ ಅಂಥಾದ್ದೊಂದು ಅವಕಾಶವನ್ನು ಕಲ್ಪಿಸಿ ಕೊಟ್ಟಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಙ್ರಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಮೂಲಕ ಅರ್ಜುನ ಪರ್ವ ಶುರು! appeared first on Cini Shodha.

ಎಂಬಿಎ ಮುಗಿಸಿಕೊಂಡು ಬದುಕಿಗಾಗಿ ಯಾವುದಾದರೊಂದು ಕೆಲಸ ಮಾಡುವ ಅನುವಾರ್ಯತೆ ಶಶಿ ಕುಮಾರ್ ಮುಂದಿತ್ತು. ಆದರೆ, ಸಂಗೀತವನ್ನು ಬಿಟ್ಟು ಬೇರೇನೇ ಮಾಡಿದರೂ ವ್ಯರ್ಥ ಎಂಬಂಥಾ ಮನಃಸ್ಥಿತಿ ಕೂಡಾ ಅವರನ್ನು ಆವರಿಸಿಕೊಂಡಿತ್ತು. ಒಂದು ವೇಳೆ ಬೇರೆ ಕಸುಬು ಮಾಡಿದರೂ ಅದು ತನ್ನ ಕನಸಿಗೆ ಮೆಟ್ಟಿಲಾಗುವಂತಿರಬೇಕು ಅನ್ನೋ ಆಕಾಂಕ್ಷೆಯೇ ಅನೇಕ ಸಾಹಸಗಳಿಗೂ ಪ್ರೇರೇಪಿಸಿತ್ತು. ಬಹುಶಃ ಬಂದ ಕಷ್ಟ ನಷ್ಟಗಳನ್ನೆಲ್ಲ ಅನುಭವಿಸಿ, ಅವುಡುಗಚ್ಚಿ ಮುಂದುವರೆಯದಿದ್ದರೆ, ಸಿಂಪೋನಿಯನ್ಸ್ ಎಂಬ ಕಂಪೆನಿ ಹುಟ್ಟುತ್ತಿರಲಿಲ್ಲ. ನಾನಾ ದಿಕ್ಕಿನಲ್ಲಿ ಪಳಗಿಕೊಂಡು, ಗನ್ಸ್ ಅಂಡ್ ರೋಸಸ್ ಚಿತ್ರದ ಸಂಗೀತ ನಿರ್ದೇಶಕರಾಗೋದೂ ಸಹ ಕನಸಿನ ಮಾತಾಗಿರುತ್ತಿತ್ತು.

ಶಶಿ ಕುಮಾರ್ 2018ರಿಂದ ಸಿಂಫೋನಿಯನ್ಸ್ ಎಂಬ ಕಂಪೆನಿಯನ್ನು ಮುನ್ನಡೆಸುತ್ತಿದ್ದಾರೆ. ಇದರ ನೆರಳಿನಲ್ಲಿ ಆಡಿಯೋ ಮತ್ತು ಮ್ಯೂಸಿಕ್ ಸಂಬಂಧಿತ ಕೆಲಸ ಕಾರ್ಯಗಳು ನಡೆಯುತ್ತವೆ. ಲೈವ್ ರೆಕಾರ್ಡಿಂಗ್, ಮಿಕ್ಸಿಂಗ್, ಮಾಸ್ಟರಿಂಗ್ ಸೇರಿದಂತೆ ಪೋಸ್ಟ್ ಪ್ರೊಡಕ್ಷನ್ ಕೆಲಸ ಕಾರ್ಯಗಳೆಲ್ಲವೂ ಇಲ್ಲಿಯೇ ನಡೆಯುವಂಥಾ ವಾತಾವರಣ ಕಲ್ಪಿಸಲಾಗಿದೆ. ಹೀಗೆ ಸಂಗೀತದ ಅಪ್ಪುಗೆಯಲ್ಲಿಯೇ ಅನ್ನದ ಮೂಲ ಕಂಡುಕೊಂಡಿರುವ ಶಶಿ ಕುಮಾರ್ ಪಾಲಿಗೆ ಈ ಕ್ಷೇತ್ರದಲ್ಲಿಯೇ ಸಾಧಿಸಬೇಕೆಂಬ ಹಂಬಲವಿತ್ತು. ಅದರ ಸಲುವಾಗಿಯೇ ಪ್ರಯತ್ನ ಚಾಲ್ತಿಯಲ್ಲಿಟ್ಟಿದ್ದ ಫಲವಾಗಿಯೇ ಗನ್ಸ್ ಅಂಡ್ ರೋಸಸ್ ಚಿತ್ರದ ಸಂಗೀತ ನಿರ್ದೇಶನದ ಅವಕಾಶ ಒಲಿದು ಬಂದಿತ್ತು.

ಇಲ್ಲಿರುವ ನಾಲಕ್ಕು ಹಾಡುಗಳನ್ನು ಒಂದಕ್ಕೊಂದು ಭಿನ್ನವೆಂಬಂತೆ ರೂಪಿಸುವ ಜವಾಬಾರಿ ಶಶಿ ಮೇಲಿತ್ತು. ಒಂದು ಥೀಮ್ ಸಾಂಗ್, ಎಣ್ಣೆ ಕಂ ಪ್ಯಾಥೋ, ಈಗಿನ ಯುವ ಜನಾಂಗವನ್ನು ಪಟ್ಟಂಪೂರಾ ಆವರಿಸಿಕೊಳ್ಳಬಲ್ಲ ರ್‍ಯಾಪ್ ಸಾಂಗ್ ಅನ್ನು ಬಲು ಆಸ್ಥೆಯಿಂದ ಶಶಿ ರೂಪಿಸಿದ್ದಾರಂತೆ. ಇದುವರೆಗೂ ಶಾರ್ಟ್ ಮೂವಿಗಳಿಗೆ ಶಶಿ ಕೆಲಸ ಮಾಡಿದ್ದರು. ಖ್ಯಾತ ನಿರ್ದೇಶಕ ಪಿ.ಹೆಚ್ ವಿಶ್ವನಾಥ್ ಅವರ ತಂಬೂರ ಚಿತ್ರಕ್ಕೂ ಹಿನ್ನೆಲೆ ಸಂಗೀತ ನೀಡಿದ್ದರು. ಇದೆಲ್ಲವೂ ಸಂಗೀತದ ಭಾಗವೇ ಆಗಿದ್ದರೂ ಕೂಡಾ, ಪೂರ್ಣಪ್ರಮಾಣದ ಸಂಗೀತ ನಿರ್ದೇಶಕರಾಗಬೇಂಬುದು ಶಶಿ ಕುಮಾರ್ ರ ಇರಾದೆಯಾಗಿತ್ತು. ಅದು ಗನ್ಸ್ ಅಂಡ್ ರೋಸಸ್ ಮೂಲಕ ಸಾಕಾರಗೊಂಡಿದೆ. ಈ ಹಾಡುಗಳೆಲ್ಲವೂ ಕೇಳುಗರಿಗೆ ಹಿಡಿಸುವ ಮೂಲಕ ಮೊದಲ ಹೆಜ್ಜೆ ಸಾರ್ಥಕಗೊಳ್ಳುತ್ತದೆಂಬ ನಂಬಿಕೆಯೂ ಅವರಲ್ಲಿದೆ.

ಹಾಗೆ ನೋಡಿದರೆ, ಶಶಿ ಕುಮಾರ್ ಬಹುಮುಖ ಪ್ರತಿಭೆ. ಸಂಗೀತದ ಹಲವು ಆಯಾಮಗಳನ್ನು ಒಳಗಿಳಿಸಿಕೊಂಡು ಪಳಗಬೇಕೆಂಬ ತಪನೆಯೊಂದನ್ನು ಬೆಚ್ಚಗಿಟ್ಟುಕೊಂಡವರು ಶಶಿ. ತಾನು ಏನೇ ಮಾಡಿದರೂ ಅದು ಸಂಗೀತಕ್ಕೆ ಸಂಬಂಧಿಸಿದ್ದೇ ಆಗಿರಬೇಕೆಂಬುದು ಅವರ ಹಂಬಲ. ಅದರ ಭಾಗವಾಗಿಯೇ ಸಂಗೀತಕ್ಕೆ ಸಂಬಂಧಿಸಿದ ಟೀಚಿಂಗ್ ವೃತ್ತಿಯನ್ನೂ ಸಂಭಾಳಿಸಿಕೊಂಡು ಹೋಗುತ್ತಿದ್ದಾರೆ. ಆರಂಭದಿಂದಲೂ ಮ್ಯೂಸಿಕ್ ಕಂಪೆನಿ ಒಂದನ್ನು ಕಟ್ಟಬೇಕೆಂಬ ಆಸೆ ಹೊಂದಿದ್ದ ಅವರು, ಅದಕ್ಕಾಗಿ ನಡೆಸಿದ್ದ ಸರ್ಕಸ್ಸುಗಳು ಒಂದೆರಡಲ್ಲ. ಕಾಸು ಹೊಂದಿಸುವ ಉದ್‌ದೇಶದಿಂದಲೇ ಕಂಪೆನಿ ಒಂದರಲ್ಲಿ ಕೆಸಕ್ಕೆ ಸೇರಿಕೊಂಡಿದ್ದ ಶಶಿ, ೨೦೧೮ರಲ್ಲಿ ಸಿಂಪೋನಿಯನ್ಸ್ ಎಂಬ ಸಂಸ್ಥೆ ಕಟ್ಟುವ ಮೂಲಕ ಕನಸನ್ನು ನನಸಾಗಿಸಿಕೊಂಡಿದ್ದರು. ಇದೀಗ ಗನ್ಸ್ ಅಂಡ್ ರೋಸಸ್ ಮೂಲಕ ಅವರ ವೃತ್ತಿ ಬದುಕು ನಿರ್ಣಾಯಕ ಘಟ್ಟದತ್ತ ಹೊರಳಿಕೊಂಡಿದೆ. ಈಗಿರುವ ವಾತಾವರಣ ಗಮನಿಸಿದರೆ, ಅದು ಅಲ್ಲಿಯೇ ಹುಲುಸಾಗಿ ಬೆಳೆದು ನಿಲ್ಲುವ ಎಲ್ಲ ಲಕ್ಷಣಗಳೂ ಗೋಚರಿಸುತ್ತಿವೆ.

ಇಂಥಾ ಹಲವಾರು ಪ್ರತಿಭಾನ್ವಿತರು ಗನ್ಸ್ ಅಂಡ್ ರೋಸಸ್ ಮೂಲಕ ಚಿತ್ರರಂಗಕ್ಕೆ ಆಗಮಿಸುತ್ತಿದ್ದಾರೆ. ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ನಿರ್ಮಾಣ ಮಾಡಿರುವ ಹೆಚ್.ಆರ್ ನಟರಾಜ್ ಅಂಥಾದ್ದೊಂದು ಅವಕಾಶವನ್ನು ಕಲ್ಪಿಸಿ ಕೊಟ್ಟಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಸಂಗೀತವನ್ನೇ ಜಗತ್ತಾಗಿಸಿಕೊಂಡ ಸಾಹಸಿ! appeared first on Cini Shodha.

ಮೈಸೂರಿನ ಹುಣಸೂರು ಮೂಲದವರಾದ (director h.s shrinivas kumar) ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಪಾಲಿಗೆ ಸಿನಿಮಾ ಎಂಬುದು ಆರಂಭದಿಂದಲೇ ಆವರಿಸಿಕೊಂಡಿದ್ದ ಮಾಯೆ. ಅದಾಗಲೇ ಆ ನೆಲದಿಂದ (hunasuru krishnamurthy) ಹುಣಸೂರು ಕೃಷ್ಣಮೂರ್ತಿ, ಭಾರ್ಗವರಂಥಾ ನಿರ್ದೇಶಕರು ಚಿತ್ರರಂಗದಲ್ಲಿ ದೊಡ್ಡ ಹೆಸರು ಮಾಡಿದ್ದರು. ಅದೆಲ್ಲವನ್ನೂ ಬೆರಗುಗಣ್ಣಿನಿಂದ ನೋಡುತ್ತಾ, ಶಾಲಾ ಕಾಲೇಜು ದಿನಗಳಲ್ಲಿಯೇ ಸಿನಿಮಾ ಕನಸನ್ನು ತಮ್ಮೊಳಗೆ ಸಾಕಿಕೊಂಡಿದ್ದವರು ಹೆಚ್.ಎಸ್ ಶ್ರೀನಿವಾಸ್ ಕುಮಾರ್. ಓದು ಮುಗಿಸಿಕೊಂಡ ಬಳಿಕ ಬಲು ಪ್ರಯಾಸಪಟ್ಟು ಸಿನಿಮಾ ರಂಗಕ್ಕೆ ಪ್ರವೇಶ ಪಡೆಯಲು ಪ್ರಯತ್ನಿಸಿದ್ದರು. ಎರಡು ದಶಕಗಳ ಹಿಂದೆ ಚಿತ್ರರಂಗಕ್ಕೆ ಎಂಟ್ರಿ ಕೊಡೋದು ಎಷ್ಟು ಕಷ್ಟವಾಗಿತ್ತೆಂಬುದರ ಅರಿವಿರುವವರಿಗೆ ಆ ಬಗ್ಗೆ ಹೆಚ್ಚೇನೂ ವಿವರಿಸುವ ಅಗತ್ಯವಿಲ್ಲ.

ಹಾಗೆ ಶತಪ್ರಯತ್ನ ಪಟ್ಟ ಬಳಿಕ ಥ್ರಿಲ್ಲರ್ ಮಂಜು ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಗೆ ಅವಕಾಶ ಕೊಟ್ಟಿದ್ದರು. ಆ ನಂತರದಲ್ಲಿ ಹಲವಾರು ಸಿನಿಮಾಗಳ ನಿರ್ದೇಶನ ವಿಭಾಗದಲ್ಲಿ ಕಾರ್ಯನಿರ್ವಹಿಸಿದ್ದರು. ಆ ಘಳಿಗೆಯಲ್ಲಿ ಎಲ್ಲದರಲ್ಲಿಯೂ ಪಳಗಿಕೊಳ್ಳಬೇಕು, ಎಲ್ಲವನ್ನೂ ಅರಿತುಕೊಳ್ಳಬೇಕೆಂಬ ಆಕಾಂಕ್ಷೆಯೇ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಅವರನ್ನು ಚಿತ್ರರಂಗದಲ್ಲಿ ಉಳಿದುಕೊಳ್ಳುವಂತೆ ಮಾಡಿತ್ತು. ಈ ನಡುವೆ ಸಹಜವಾಗಿಯೇ ಅನೇಕ ಸವಾಲುಗಳು, ಪರೀಕ್ಷೆಗಳು ಅವರನ್ನೆದುರಾಗಿದ್ದವು. ಅದೆಲ್ಲವನ್ನೂ ಎದುರಿಸಿ ಮುನ್ನಡೆಯುವ ಕಸುವು ತುಂಬಿದ್ದು ನಿರ್ದೇಶಕನಾಗಬೇಕೆಂಬ ಗುರಿ. ಈ ಹಾದಿಯಲ್ಲಿ ಇದುವರೆಗೂ ಎಂಭತ್ತಕ್ಕೂ ಹೆಚ್ಚು ಸಿನಿಮಾಗಳ ನಿರ್ದೇಶನ ವಿಭಾಗದಲ್ಲವರು ಕೆಲಸ ಮಾಡಿದ್ದಾರೆ. ನಾನಾ ನಿರ್ದೇಶಕರ ಗರಡಿಯಲ್ಲಿ ಪಳಗಿಕೊಂಡಿದ್ದಾರೆ. ಅನೇಕ ಘಟಾನುಘಟಿ ಕಲಾವಿದರ ಪ್ರೀತಿ, ನಂಬಿಕೆ ಸಂಪಾದಿಸಿಕೊಂಡಿದ್ದಾರೆ. ಆ ಎಲ್ಲ ಅನುಭವಗಳನ್ನು ಒಟ್ಟುಗೂಡಿಸಿಕೊಂಡು ಗನ್ಸ್ ಅಂಡ್ ರೋಸಸ್ ಚಿತ್ರವನ್ನು ರೂಪಿಸಿದ್ದಾರೆ.

ಒಟ್ಟಾರೆಯಾಗಿ, ಇಪ್ಪತೈದು ವರ್ಷಗಳ ತಪಸ್ಸಿನ ಫಲವೆಂಬಂತೆ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಗನ್ಸ್ ಅಂಡ್ ರೋಸಸ್ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಈ ಮೂಲಕ ಇಷ್ಟು ವರ್ಷಗಳ ಸುದೀರ್ಘ ಯಾನ ಫಲ ಕೊಡುತ್ತದೆಂಬ ಅಗಾಧ ನಂಬಿಕೆ ಅವರಲ್ಲಿದೆ. ಈಗಾಗಲೇ ಟೀಸರ್ ಕಂಡವರು ಒಳ್ಳೆ ಮಾತುಗಳನ್ನಾಡುತ್ತಿದ್ದಾರೆ. ಪರಭಾಷಾ ನೆಲದಲ್ಲಿಯೂ ಸಕಾರಾತ್ಮಕ ವಾತಾವರಣ ಹರಳುಗಟ್ಟಿಕೊಂಡಿದೆ. ಈ ಸಿನಿಮಾ ಆರಂಭ ಹಾಗೂ ಬಿಡುಗಡೆಯ ಘಟ್ಟ ತಲುಪಿಕೊಳ್ಳುವ ನಡುವಿನ ಹಾದಿಯೇನು ಸಲೀಸಿನದ್ದಾಗಿರಲಿಲ್ಲ. ಕನ್ನಡವೂ ಸೇರಿದಂತೆ ಐದು ಭಾಷೆಗಳಲ್ಲಿ ಇದನ್ನು ಅಣಿಗೊಳಿಸಿ, ಎಲ್ಲ ಪ್ರೇಕ್ಷಕರಿಗೂ ಹಿಡಿಸುವಂತೆ ನೋಡಿಕೊಳ್ಳುವ ಜವಾಬ್ದಾರಿ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಹೆಗಲೇರಿಕೊಂಡಿತ್ತು. ಆರಂಭಿಕವಾಗಿ ಮೂಡಿಕೊಂಡಿರುವ ವಾತಾವರಣ, ಪರಭಾಷಾ ಚಿತ್ರರಂಗದ ವಿತರಕರೇ ಆಡುತ್ತಿರುವ ಒಳ್ಳೆ ಮಾತುಗಳೆಲ್ಲವೂ ಅವರೊಳಗಿನ ಭರವಸೆ ಗಟ್ಟಿಗೊಳ್ಳುವಂತೆ ಮಾಡಿದೆ.

ಈ ಚಿತ್ರ ಆರಂಭಿಸುವಾಗಲೇ ಒಂದಷ್ಟು ಪಾತ್ರಗಳನ್ನು ಇಂತಿಂಥಾ ಕಲಾವಿದರೇ ನಿಭಾಯಿಸಬೇಕೆಂದು ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ನಿರ್ಧರಿಸಿದ್ದರು. ಈ ಸಂಬಂಧವಾಗಿ ಶೋಭರಾಜ್, ಅವಿನಾಶ್, ಕಿಶೋರ್ ರಂಥಾ ನಟರನ್ನು ಸಂಪರ್ಕಿಸಿದ್ದರು. ಅವರ ಮುಂದೆ ಕಥೆ ಹೇಳಿ ಪಾತ್ರದ ಬಗ್ಗೆ ವಿವರಿಸುತ್ತಲೇ ಮರುಮಾತಿಲ್ಲದೆ ಒಪ್ಪಿಕೊಂಡಿದ್ದರು. ಅವರೆಲ್ಲರೂ ರೇಟಿನ ಬಗ್ಗೆ ಸೊಲ್ಲೆತ್ತದೆ ಡೇಟಿನ ಬಗ್ಗೆ ವಿಚಾರಿಸಿಕೊಂಡಿದ್ದರು. ಅದು ಈ ಇಪ್ಪತೈದು ವರ್ಷಗಳ ಕಾಲ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಚಿತ್ರರಂಗದೊಂದಿಗೆ ಬೆರೆತಿರುವ ರೀತಿಗೆ ಸಿಕ್ಕ ಪ್ರತಿಫಲ. ಕಡೆಗೂ ನುರಿತ ಕಲಾವಿದರ ಜೊತೆಗೆ, ಹೊಸಬರಿಗೂ ಅವಕಾಶ ಕೊಟ್ಟು ಒಂದಿಡೀ ಸಿನಿಮಾವನ್ನು ಅಂದುಕೊಂಡಂತೆಯೇ ರೂಪಿಸಿದ ತೃಪ್ತ ಭಾವ ನಿರ್ದೇಶಕರಲ್ಲಿದೆ.

ಒಂದು ಸಾಮಾಜಿಕ ಸಂದೇಶವಿರುವ ಕಥೆಯನ್ನು ಕಮರ್ಶಿಯಲ್ ಚೌಕಟ್ಟಿಗೆ ಒಗ್ಗಿಸಿಕೊಂಡು ಸಿನಿಮಾ ರೂಪಿಸೋದಿದೆಯಲ್ಲಾ? ಅದು ನಿರ್ದೇಶಕರ ಪಾಲಿಗೆ ನಿಜವಾದ ಸವಾಲು. ಭೂಗತ ಜಗತ್ತಿನೊಂದಿಗೆ ತಟಿಕೆ ಹಾಕಿಕೊಂಡಿರುವ ನಶೆಯ ಲೋಕ ಮತ್ತು ಅಂಥಾ ಅಡ್ಡದಾರಿಗಿಳಿದರೆ ಏನಾಗುತ್ತದೆಂಬ ಕಥೆ ಹೊಂದಿಒರುವ ಈ ಸಿನಿಮಾದಲ್ಲಿ ಈ ಸಮಾಜದ ಒಡಲು ಕೊರೆಯುತ್ತಿರುವ ಒಂದಷ್ಟು ಪಲ್ಲಟಗಳತ್ತಲೂ ಫೋಕಸ್ ಮಾಡಲಾಗಿದೆಯಂತೆ. ಇಂಥಾದ್ದರ ನಡುವಲ್ಲಿಯೇ ಅರಳೋ ಪ್ರೇಮ, ಕಥೆಯೊಂದಿಗೇ ಸಾಗುವ ಆಕ್ಷನ್ ಸೀನುಗಳನ್ನೆಲ್ಲ ಎಲ್ಲಿಯೂ ಕೃತಕವೆನ್ನಿಸದಂತೆ ಕಟ್ಟಿ ಕೊಡುವ ಸವಾಲೂ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ರನ್ನು ಎದುರಾಗಿತ್ತು. ಅದೆಲ್ಲವನ್ನೂ ಮೀರಿಕೊಂಡು ಪಕ್ಕಾ ಮನೋರಂಜನಾತ್ಮಕ ಅಂಶಗಳೊಂದಿಗೆ ಗನ್ಸ್ ಅಂಡ್ ರೋಸಸ್ ಚಿತ್ರವನ್ನು ರೂಪಿಸಲಾಗಿದೆಯಂತೆ.

ಯಾರ ಪಾಲಿಗಾದರೂ ಇದೊಂದು ಮಹತ್ವದ ಘಳಿಗೆ. ಬದುಕಿನ ಇಪ್ಪತೈದು ವರ್ಷಗಳನ್ನು ಕನಸೊಂದಕ್ಕೆ ಧಾರೆ ಎರೆಯೋದೆಂದರೆ ಅದು ಸಲೀಸಿನ ಸಂಗತಿಯಲ್ಲ. ಅಂಥಾದ್ದೊಂದು ಸುದೀರ್ಘ ಯಾನ ಮಾಡಿರುವ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಪಾಲಿಗೆ ಗನ್ಸ್ ಅಂಡ್ ರೋಸಸ್ ನಿಜಕ್ಕೂ ನಿರ್ಣಾಯಕ ಸಿನಿಮಾ. ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ಹೆಚ್.ಆರ್ ನಟರಾಜ್ ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಕನಸಿನ ಹಾದಿಯ ಬಗ್ಗೆ ಶ್ರೀನಿವಾಸ್ ಕುಮಾರ್ ತೆರೆದಿಟ್ಟ ಅಚ್ಚರಿ! appeared first on Cini Shodha.

ಜನವರಿ 3ರಂದು ಕನ್ನಡವೂ ಸೇರಿದಂತೆ ಐದು ಭಾಷೆಗಳಲ್ಲಿ (guns and roses movie) ಗನ್ಸ್ ಅಂಡ್ ರೋಸಸ್ ಬಿಡುಗಡೆಗೊಳ್ಳಲಿದೆ. ಇದನ್ನು ದ್ರೋಣ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣ ಮಾಡಿರುವವರು (h.r nataraj) ಹೆಚ್.ಆರ್ ನಟರಾಜ್. ಮೂಲತಃ ಲ್ಯಾಂಡ್ ಡೆವಲಪರ್ ಆಗಿರುವ ನಟರಾಜ್, ರಾಜಕಾರಣದಲ್ಲಿಯೂ ಸಕ್ರಿಯರಾಗಿದ್ದವರು. ಇಪ್ಪತ್ತೆರಡು ವರ್ಷಗಳಿಂದ ಲ್ಯಾಂಡ್ ಡೆವಲಪರ್ ಆಗಿ ವ್ಯವಹಾರ ನಡೆಸಿದ್ದ ಅವರು 2015ರಲ್ಲಿ ವಿಧಾನ ಪರಿಷತ್ ಚುನಾವಣೆಗೆ ತುಮಕೂರು ಕ್ಷೇತ್ರದಿಂದ ಕಣಕ್ಕಿಳಿದಿದ್ದರು. ಹೀಗೆ ವ್ಯವಹಾರ ಮತ್ತು ರಾಜಕಾರಣದ ನಡುವಲ್ಲಿಯೇ ಸಿನಿಮಾ ಸಾಹಚರ್ಯ ಹೊಂದಿದ್ದ ನಟರಾಜ್ ಅವರ ಪಾಲಿಗೆ ಬಣ್ಣದ ಜಗತ್ತಿನ ಬಗ್ಗೆ ಆರಂಭ ಕಾಲದಿಂದಲೂ ಬೆರಗಿತ್ತು. ಈ ಕಾರಣದಿಂದಲೇ ಸಿನಿಮಾ ಜಗತ್ತಿನ ಅನೇಕರೊಂದಿಗೆ ನಿಕಟ ನಂಟು ಹೊಂದಿದ್ದರು. ಕಡೆಗೂ ಅವರೀಗ ಗನ್ಸ್ ಅಂಡ ರೋಸಸ್ ಚಿತ್ರದ ಮೂಲಕ ನಿರ್ಮಾಪಕರಾಗಿದ್ದಾರೆ.

ಕನಕಪುರ ಮೂಲದ ಹೆಚ್.ಆರ್ ನಟರಾಜ್ ಮತ್ತು ಈ ಚಿತ್ರದ ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಇಪ್ಪತೈದು ವರ್ಷಗಳಿಂದಲೂ ಪರಿಚಿತರು. ಈಗ್ಗೆ ವರ್ಷಗಳ ಹಿಂದೆ ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಪುತ್ರ ಅರ್ಜುನ್ ನಾಯಕನಾಗಿ ಎಂಟ್ರಿ ಕೊಡಲಿರುವ ಚಿತ್ರದ ತಯಾರಿ ನಡೆದಿತ್ತು. ಅದರ ಸಾರಥ್ಯವನ್ನು ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ವಹಿಸಿಕೊಂಡರೆ, ನಿರ್ಮಾಪಕರಾಗಲು ನಟರಾಜ್ ತಯಾರಾಗಿದ್ದರು. ಅಜಯ್ ಕುಮಾರ್ ಬಳಿ ಕಾರ್ಯನಿರ್ವಹಿಸುತ್ತಿದ್ದ ಶರತ್ ಬರೆದ ಕಥೆ ಎಲ್ಲರಿಗೂ ಹಿಡಿಸಿದ್ದೇ ಗನ್ಸ್ ಅಂಡ್ ರೋಸಸ್ ಚಿತ್ರಕ್ಕೆ ವಿದ್ಯುಕ್ತ ಚಾಲನೆ ಸಿಕ್ಕಂತಾಗಿತ್ತು. ನಟರಾಜ್ ರ ಪಾಲಿಗೆ ಸದರಿ ಕಥೆ ಹಿಡಿಸಲು ಕಾರಣವಾಗಿದ್ದದ್ದು ಅದರಲ್ಲಿನ ಸಾಮಾಜಿಕ ಕಳಕಳಿ ಮತ್ತು ನಿರ್ದೇಶಕರು ಅದನ್ನು ಸಮರ್ಥವಾಗಿ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗುವಂತೆ ಕಟ್ಟಿ ಕೊಡುತ್ತಾರೆಂಬ ಗಾಢ ನಂಬಿಕೆ.

ಹೀಗೊಂದು ಹೆಜ್ಜೆಯಿಡುವ ಮುನ್ನ ಹೆಚ್.ಆರ್ ನಟರಾಜ್ ಅವರು ಗುರು ಸಾನಿಧ್ಯಕ್ಕೆ ತೆರಳಿ ಅರಿಕೆ ಮಾಡಿಕೊಂಡಾಗ, ಅತ್ತಲಿಂದಲೂ ಸಕಾರಾತ್ಮಕ ಪ್ರತಿಕ್ರಿಯೆ ಬಂದಿತ್ತಂತೆ. ಸಿನಿಮಾ ಅಂದರೆ ಹೊರಜಗತ್ತಿನ ಕಲ್ಪನೆ ಸಾವಿರವಿದ್ದೀತು. ಆದರೆ, ಒಂದು ಸಿನಿಮಾ ಶುರುವಾದರೆ ಅದು ನೂರಾರು ಮಂದಿಯ ಅನ್ನದ ಮೂಲವಾಗುತ್ತದೆ. ಆ ದಿಕ್ಕಿನಲ್ಲಿ ಆಲೋಚಿಸಿದರೆ ನಿರ್ಮಾಪಕನ ಪಾಲಿಗೆ ಅದೊಂದು ಭಾಗ್ಯವೇ. ಅಂಥಾ ಅಧ್ಯಾತ್ಮಿಕ ಅನುಭೂತಿಯೊಂದಿಗೇ ಈ ಸಿನಿಮಾವನ್ನು ನಟರಾಜ್ ಅವರು ನಿರ್ಮಾಣ ಮಾಡಿದ್ದಾರೆ. ಇದನ್ನೂ ಕೂಡಾ ಕಲಾ ಸೇವೆಯೆಂದೇ ಪರಿಭಾವಿಸಿದ್ದಾರೆ. ಸಿನಿಮಾವನ್ನು ವ್ಯವಹಾರದಾಚೆಗೂ ಮೋಹಿಸುವ ಗುಣ ಹೊಂದಿರೋ ನಟರಾಜ್ ಪಾಲಿಗೆ ಗನ್ಸ್ ಅಂಡ್ ರೋಸಸ್ ಚಿತ್ರ ಮೂಡಿ ಬಂದಿರುವ ರೀತಿಯ ಬಗ್ಗೆ ತೃಪ್ತಿಯಿದೆ. ಒಂದಷ್ಟು ಹೊಸಾ ಪ್ರತಿಭೆಗಳು ಈ ಮೂಲಕವೇ ಬೆಳಕು ಕಾಣುತ್ತಿರೋದರ ಬಗ್ಗೆ ಖುಷಿಯಿದೆ. ಗನ್ಸ್ ಅಂಡ್ ರೋಸಸ್ ಎಲ್ಲ ವರ್ಗದ ಪ್ರೇಕ್ಷಕರನ್ನು ಸೆಳೆಯುತ್ತದೆಂಬ ನಂಬಿಕೆಯೂ ಗಟ್ಟಿಯಾಗಿದೆ.

ಇಂಥಾ ಅಪ್ಪಟ ಸಿನಿಮಾ ವ್ಯಾಮೋಹದ ನಿರ್ಮಾಪಕರ ನೆರಳಿನಲ್ಲಿ ಮಹತ್ವದ ಸಿನಿಮಾಗಳು ಸೃಷಿಯಾಗೋ ಸಾಧ್ಯತೆಗಳಿವೆ. ಒಂದು ಪ್ರತಿಭಾನ್ವಿತರ ತಂಡ ಸೇರಿಕೊಂಡು ಗನ್ಸ್ ಅಂಡ್ ರೋಸಸ್ ಚಿತ್ರವನ್ನು ಅನ್ನದಾತ ಸಂತೃಪ್ತಗೊಳಿಸುವಂತೆ ರೂಪಿಸಿದ್ದಾರೆ. ಅಂಥಾದ್ದೊಂದು ಛಾಯೆ ನೋಡುಗರಿಗೂ ದಾಟಿಕೊಂಡರೆ, ವರ್ಷಾರಂಭದಲ್ಲಿಯೇ ಕನ್ನಡ ಚಿತ್ರರಂಗ ಮತ್ತೊಂದು ಗೆಲುವಿನ ಹುರುಪು ತುಂಬಿಕೊಂಡಂತಾಗುತ್ತದೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ 3ರಂದು ಬಿಡುಗಡೆಗೊಳ್ಳಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಅನ್ನದಾತನ ಇಂಟ್ರೆಸ್ಟಿಂಗ್ ಕಹಾನಿ! appeared first on Cini Shodha.