ತಂದೆಯೇ ಸಿನಿಮಾ ಕ್ಷೇತ್ರದಲ್ಲಿ ಇದ್ದದ್ದರಿಂದ ಆರಂಭದಿಂದಲೂ ಅರ್ಜುನ್ ಪಾಲಿಗೆ ಸಿನಿಮಾ ವಾತಾವರಣ ಸಿಕ್ಕಿತ್ತು. ಸಿನಿಮಾ ಮಂದಿಯ ಸಂಗ, ಶೂಟಿಂಗ್ ಸ್ಪಾಟುಗಳೆಲ್ಲವೂ ಬದುಕಿನ ಭಾಗವಾಗಿತ್ತು. ಈ ಎಲ್ಲ ಕಾರಣಗಳಿಂದ ಸಿನಿಮಾದೆಡೆಗಿನ ಬೆರಗು ಅರ್ಜುನ್ ರೊಳಗೆ ಬಲವಾಗುತ್ತಾ ಸಾಗಿತ್ತು. ತೀರಾ ಎಳೇ ವಯಸ್ಸಿನಿಂದಲೇ ನಟನಾಗುವ ಕನಸು ಅಪ್ರಜ್ಞಾಪೂರ್ವಕವಾಗಿ ಚಿಗುರಲಾರಂಭಿಸಿತ್ತು. ಅದು ಒಂದು ಹಂತಕ್ಕೆ ಸಾಕಾರಗೊಂಡಿದ್ದು ನಂದ ಲವ್ಸ್ ನಂದಿತಾ ಚಿತ್ರದ ಮೂಲಕ. ಆ ಚಿತ್ರಕ್ಕೆ ಅಜಯ್ ಕುಮಾರ್ ಕಥೆ, ಚಿತ್ರಕಥೆ ಬರೆದಿದ್ದರು. ಅದರಲ್ಲಿ ನಾಯಕ ಲೂಸ್ ಮಾದ ಯೋಗಿಯ ಎಳವೆಯ ಪಾತ್ರ ಅರ್ಜುನ್ ಗೆ ಒಲಿದು ಬಂದಿತ್ತು. ಆ ಮೂಲಕ ಒಂದಷ್ಟು ಮೆಚ್ಚುಗೆಯನ್ನೂ ಕೂಡಾ ಅರ್ಜುನ್ ಗಳಿಸಿಕೊಂಡಿದ್ದರು. ಆ ನಂತರ ಅಜಯ್ ಕುಮಾರ್ ಓದಿನತ್ತ ಮಾತ್ರ ಗಮನ ಹರಿಸುವಂತೆ ಮಗನಿಗೆ ತಾಕೀತು ಮಾಡಿದ್ದರು.

ಈ ನಡುವೆ ಓದೆಲ್ಲ ಮುಗಿಸಿಕೊಂಡ ಮೇಲೂ ನಾಯಕನಾಗಿ ಬಿಡುವ ವಿಪುಲ ಅವಕಾಶಗಳು ಅರ್ಜುನ್ ಪಾಲಿಗಿದ್ದವು. ಆದರೆ, ತಂದೆ ಅಜಯ್ ಮಾತ್ರ ನಟನಾಗಲು ಬೇಕಾದ ಎಲ್ಲ ದಿಕ್ಕಿನಲ್ಲಿಯೂ ಪಳಗಿಕೊಂಡ ನಂತರವಷ್ಟೇ ನಾಯಕನಾಗಲು ಪ್ರಯತ್ನಿಸಬೇಕೆಂದು ಕಟ್ಟುನಿಟ್ಟಾಗಿ ತಾಕೀತು ಮಾಡಿದ್‌ದರಂತೆ. ಅದನ್ನು ಚಾಚೂತಪ್ಪದೆ ಪಾಲಿಸಿದ್ದ ಅರ್ಜುನ್, ಸಿನಿಮಾ ತರಬೇತಿಗೆ ಸೇರಿಕೊಂಡು ಮಾರ್ಷಲ್ ಆರ್ಟ್ಸ್, ಡ್ಯಾನ್ಸ್, ಫೈಟ್, ನಟನೆ ಸೇರಿದಂತೆ ಎಲ್ಲ ತರಬೇತಿಯನ್ನೂ ಪಡೆದುಕೊಂಡಿದ್ದರು. ಆ ನಂತರವೇ ನಾಯಕನಾಗಲು ಪ್ರಯತ್ನಿಸಲಾರಂಭಿಸಿದ್ದ ಅವರಿಗೆ ಗನ್ಸ್ ಅಂಡ್ ರೋಸಸ್ ಮೂಲಕ ಅದು ಕೈಗೂಡಿದೆ.

ಗನ್ಸ್ ಅಂಡ್ ರೋಸಸ್ ಚಿತ್ರದಲ್ಲಿ ಅರ್ಜುನ್ ಗೆ ಸಿಕ್ಕಿರೋ ಪಾತ್ರ ಅಕ್ಷರಶಃ ಸವಾಲಿನದ್ದು. ಕಡಿಮೆ ಮಾತಿಗೆ, ಆಕ್ಟೀವ್ ಆಗಿರುವ ಆ ಪಾತ್ರಕ್ಕೆ ಹಲವು ಶೇಡುಗಳಿವೆ. ಈ ಮೂಲಕವೇ ಸದರಿ ಸಮಾಜದ ಕಠೋರ ವಾಸ್ತವಕ್ಕೆ ಕನ್ನಡಿ ಹಿಡಿದು, ಯುವ ಸದಮುದಾಯವನ್ನು ಸರಿದಿಕ್ಕಿನತ್ತ ಚಲಿಸುವಂತೆ ಪ್ರೇರೇಪಿಸುವ ಈ ಪಾತ್ರ ಅರ್ಜುನ್ ಪಾಲಿಗೆ ಖುಷಿ ಕೊಟ್ಟಿದೆ. ಈಗಾಗಲೇ ಪರಭಾಷಾ ಚಿತ್ರರಂಗದ ವಿತರಕರನೇಕರು ಅರ್ಜುನ್ ನಟನೆಯನ್ನು ಮೆಚ್ಚಿ ಕೊಂಡಾಡಿದ್ದಾರೆ. ಎಲ್ಲ ಭಾಷೆಗಳ ಪ್ರೇಕ್ಷಕರಿಗೂ ಹಿಡಿಸುವಂತೆ ನಟಿಸಿದ್ದಾರೆಂಬ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ಅಂದಹಾಗೆ, ಈ ಸಿನಿಮಾ ಪ್ಯಾನಿಂಡಿಯಾ ಮಟ್ಟದಲ್ಲಿ ಬಿಡುಗಡೆಗೊಳ್ಳಲಿದೆ.

ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ನಿರ್ಮಾಣ ಮಾಡಿರುವ ಹೆಚ್.ಆರ್ ನಟರಾಜ್ ಅಂಥಾದ್ದೊಂದು ಅವಕಾಶವನ್ನು ಕಲ್ಪಿಸಿ ಕೊಟ್ಟಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಙ್ರಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಮೂಲಕ ಅರ್ಜುನ ಪರ್ವ ಶುರು! appeared first on Cini Shodha.

ದೇವನಹಳ್ಳಿಯ ಒಡಲಲ್ಲಿರೋ ಭಟ್ರೇನಹಳ್ಳಿ ಎಂಬೂರಿನ ರೈತಾಪಿ ವರ್ಗದಿಂದ ಬಂದವರು ಶರತ್. ಈವತ್ತಿಗೂ ಕೃಷಿಯೇ ಇವರ ತಂದೆ ಮತ್ತು ಕುಟುಂಬದ ಮೂಲ ಆಧಾರ. ಅಂಥಾ ರೈತಾಪಿ ಬದುಕು ಕರುಣಿಸಿದ ಸಂವೇದನೆಯ ಪಸೆಯನ್ನು ಮನಸಲ್ಲಿಟ್ಟುಕೊಂಡಿರುವ ಶರತ್ ಪಾಲಿಗೆ ಸಿನಿಮಾ ಅನ್ನೋದು ಎಳವೆಯಿಂದಲೇ ಆವರಿಸಿಕೊಂಡಿದ್ದ ಮಾಯೆ. ಆದರೆ, ಇಂಥಾ ಕನಸಿನ ಹಾದಿ ನೇರವಾಗಿ ಗಾಂಧಿನಗರಕ್ಕೆ ತಂದು ನಿಲ್ಲಿಸುವುದಿಲ್ಲ. ಬದುಕಿನ ಅನಿವಾರ್ಯತೆ ಯಾವತ್ತಿದ್ದರೂ ಕನಸಿಗೆ ವಿರುದ್ಧ ದಿಕ್ಕಿನಲ್ಲಿರುತ್ತೆ. ಅಂಥಾದ್ದೊಂದು ಅನಿವಾರ್ಯತೆಗೆ ಸಿಕ್ಕಿ ಐಟಿ ವಲಯದಲ್ಲಿ ಉದ್ಯೋಗ ಆರಂಭಿಸಿದ್ದವರು ಶರತ್. ಕಂಫರ್ಟ್ ಜೋನಿನಲ್ಲಿ ಜೀವನವನ್ನು ಪ್ರತಿಷ್ಠಾಪಿಸಿಕೊಳ್ಳುವ ಉಮೇದು ಹೊಂದಿರುವವರಿಗೆ ಏನೂ ತೊಂದರೆಯಿಲ್ಲದ ಕೆಲಸವದು. ಆದರೆ, ಒಂದು ಹಂತದಲ್ಲಿ ಶರತ್ ಪಾಲಿಗೆ ಕೈ ತುಂಬಾ ಸಂಬಳ ತರುವ ಕೆಲಸಕ್ಕಿಂತ, ಎದೆಯಲ್ಲಿದ್ದ ಕನಸನ್ನು ನನಸು ಮಾಡಿಕೊಳ್ಳೋದೇ ಒಳಿತೆನ್ನಿಸಿತ್ತು.

ಹಾಗೊಂದು ನಿರ್ಧಾರ ತಳೆಯುತ್ತಲೇ ಇನ್ನು ಮುಂದಿನ ಬದುಕೇನಿದ್ದರೂ ಸಿನಿಮಾಕ್ಕಾಗಿಯೇ ಮುಡಿಪೆಂಬ ದೃಢ ನಿರ್ಧಾರವೂ ಅವರೊಳಗೆ ಹದಗೊಂಡಿತ್ತು. ಆ ಕ್ಷಣದಲ್ಲಿಮ ಎದುರಾದದ್ದು ಚಿತ್ರರಂಗಕ್ಕೆ ಎಂಟ್ರಿ ಕೊಡುವುದು ಹೇಗೆಂಬ ಯಕ್ಷ ಪ್ರಶ್ನೆ. ಆ ಹೊತ್ತಿನಲ್ಲಿ ಒಂದು ಕಾಲದಲ್ಲಿ ಕಥೆಗಾರರಾದ ಅಜಯ್ ಕುಮಾರ್ ಅವರ ಬಳಿ ಕೆಲಸ ಮಾಡಿದ್ದ ತನ್ನ ಮಾವನ ಮೂಲಕವೇ ದಾರಿ ತೆರೆದುಕೊಂಡೀತೆಂಬ ಆಸೆಯೊಂದು ಶರತ್ ರೊಳಗೆ ಮೂಡಿಕೊಂಡಿತ್ತು. ಆ ದಿಕ್ಕಿನಲ್ಲಿ ಪ್ರಯತ್ನಿಸಿದಾಗ ಅಜಯ್ ಕುಮಾರ್ ಅವರ ಗರಡು ಸೇರಿಕೊಳ್ಳುವ ಸದವಕಾಶ ಬಂದಿತ್ತು. ಹಾಗೆ ಅಜಯ್ ಕುಮಾರ್ ಬಳಿ ಕಸುಬು ಕಲಿಯಲಾರಂಭಿಸಿದ್ದ ಶರತ್, ಎರಡು ವರ್ಷಗಳ ಕಾಲ ಅದನ್ನು ಧ್ಯಾನದಂತೆ ಆವಾಹಿಸಿಕೊಂಡಿದ್ದರು. ಕಡೆಗೂ ಗುರುಗಳಾದ ಅಜಯ್ ಕುಮಾರ್ ಕಡೆಯಿಂದಲೇ ಅಚ್ಚರಿದಾಯಕ ಅವಕಾಶವೊಂದು ಅಚಾನಕ್ಕಾಗಿ ಒಲಿದು ಬಂದಿತ್ತು!

ಅಜಯ್ ಕುಮಾರ್ ಮಗ ಅರ್ಜುನ್ ನಾಯಕನಾಗಿ ನಟಿಸಲಿರೋ ಚಿತ್ರದ ತಯಾರಿ ನಡೆದಿದ್ದ ಕಾಲವದು. ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಅದನ್ನು ನಿರ್ದೇಶನ ಮಾಡೋದು ನಿಕ್ಕಿಯಾಗಿತ್ತು. ಹೆಚ್.ಆರ್ ನಟರಾಜ್ ನಿರ್ಮಾಣ ಮಾಡಲು ತಯಾರಾಗಿದ್ದರು. ಈ ಹಂತದಲ್ಲಿ ಒಂದೊಳ್ಳೆ ಕಥೆ ರೆಡಿ ಮಾಡುವಂತೆ ಅಜಯ್ ಕುಮಾರ್ ತಮ್ಮ ಶಿಷ್ಯ ಶರತ್ ಗೆ ಸೂಚಿಸಿದ್ದರು. ಅದು ಶರತ್ ಪಾಲಿಗೆ ಬಯಸದೇ ಬಂದ ಭಾಗ್ಯ. ಹಾಗೊಂದು ಅವಕಾಶ ಬರುವ ಹೊತ್ತಿನಲ್ಲಿ ಸ್ಯಾಂಡಲ್ ವುಡ್ಡಿನಲ್ಲಿ ಡ್ರಗ್ಸ್‌ವಿಚಾರದ ಚರ್ಚೆ ನಡೆಯುತ್ತಿತ್ತು. ಬಾಲಿವುಡ್ಡಿನ ಖ್ಯಾತ ನಟನೊಬ್ಬನ ಪುತ್ರ ಡ್ರಗ್ಸ್ ಪಾರ್ಟಿ ಮಾಡಿ ತಗುಲಿಕೊಂಡಿದ್ದ. ಅದೆಲ್ಲದರಿಂದಾಗಿ ಕಥಾ ಎಳೆಯೊಂದನ್ನು ಸಿದ್ಧಪಡಿಸಿಕೊಂಡ ಶರತ್, ನಾನಾ ಮಾಹಿತಿಗಳನ್ನು ಕಲೆಹಾಕಿ, ಭೂಗತ ಜಗತ್ತು, ಡ್ರಗ್ಸ್ ಮಾಫಿಯಾ ಮತ್ತು ಪ್ರೇಮ ಕಥಾನಕದ ಸಾಲಿಡ್ ಸ್ಟೋರಿಯೊಂದನ್ನು ಸಿದ್ಧಪಡಿಸಿದ್ದರು.

ಈ ಕಥೆ ತಯಾರಾಗುವ ಪ್ರತೀ ಹಂತದಲ್ಲಿಯೂ ಅಜಯ್ ಕುಮಾರ್ ಮಾರ್ಗದರ್ಶನ ನೀಡಿದ್ದರಂತೆ. ಕಡೆಗೆ ನಿರ್ಮಾಪಕರಿಗೂ ಕೂಡಾ ಈ ಕಥೆ ಇಷ್ಟವಾದದ್ದೇ ಗನ್ಸ್ ಅಂಡ್ ರೋಸಸ್ ಚಿತ್ರಕ್ಕೆ ಚಾಲನೆ ಸಿಕ್ಕಿತ್ತು. ಈಗಾಗಲೇ ಟೀಸರಿನಲ್ಲಿ ಕಾಣಿಸಿಕೊಂಡಿರುವ ಒಂದಷ್ಟು ಅಂಶಗಳು, ಮತ್ತು ಚಿತ್ರತಂಡ ಹೇಳಿಕೊಂಡಿರುವ ವಿಚಾರಗಳ ಮೂಲಕ ಸದರಿ ಕಥನದ ಬಗ್ಗೆ ಕುತೂಹಲ ಮೂಡಿಕೊಂಡಿದೆ. ಈ ಮೂಲಕ ಕಥೆಗಾರನಾಗಿ ನೆಲೆ ಕಾಣುವ ಆಸೆ ಹೊಂದಿರುವ ಶರತ್ ಪಾಲಿಗೆ ನಿರ್ದೇಶಕನಾಗಬೇಕೆಂಬ ಕನಸಿದೆ. ಬಹುಶಃ ಆ ಕನಸಿಗೆ ಗನ್ಸ್ ಅಂಡ್ ರೋಸಸ್ ಮೂಲಕ ಮತ್ತಷ್ಟು ಬಲ ಬರೋದು ನಿಕ್ಕಿ. ಕೆಟ್ಟದ್ದು ಮಾಡೋದೇ ಫ್ಯಾಶನ್ ಆಗಿರುವ ಈ ಹೊತ್ತಿನಲ್ಲಿ ಯುವ ಸಮುದಾಯ ಯಾವ ಬಿಂದುವಿನಲ್ಲಿ ಹಾದಿ ತಪ್ಪುತ್ತಿದೆ, ಅದಕ್ಕೆ ಕಾರಣಗಳೇನು, ಅಂಥಾದ್ದರ ಹಿಂದೆ ಹೋದರೆ ಏನಾಗುತ್ತದೆ ಅನ್ನೋದನ್ನೆಲ್ಲ ಬೆರೆಸಿ, ಕಮರ್ಶಿಯಲ್ ಅಂಶಗಳು ಧಾರಾಳವಾಗಿರುವಂತೆ ಶರತ್ ಈ ಕಥೆ ಸೃಷ್ಟಿಸಿದ್ದಾರಂತೆ.

ನಿಖರವಾಗಿ ಹೇಳಬೇಕೆಂದರೆ, ಇದು ಗಟ್ಟಿ ಕಂಟೆಂಟು ಹೊಂದಿರುವ ಪಕ್ಕಾ ಕಮರ್ಶಿಯಲ್ ಚಿತ್ರ. ಈ ಮೂಲಕ ಎರಡು ವರ್ಷಗಳಿಂದ ಆವರಿಸಿಕೊಂಡಿದ್ದ ಗೊಂದಲ, ಅವಮಾನಗಳ ಪರ್ವವನ್ನು ಶರತ್ ದಾಟಿಕೊಂಡಿದ್ದಾರೆ. ಐಟಿ ಕ್ಷೇತ್ರದಲ್ಲಿನ ಒಳ್ಳೆ ಉದ್ಯೋಗ ಬಿಟ್ಟು ಸಿನಿಮಾ ಚುಂಗು ಹಿಡಿದು ಹೊರಟಿದ್ದ ಈ ಹುಡುಗನನ್ನು ಅವಮಾನಗಳು ಬಾಧಿಸಿದ್ದವು. ಊರ ಕಡೆ, ಸಂಬಂಧಿಕರ ವಲಯದಲ್ಲಿ ವಿಚಿತ್ರ ನೋಟ ಬೀರುವವರ ಸಂಖ್ಯೆ ಹೆಚ್ಚಿಕೊಂಡಿತ್ತು. ಆದರೆ, ಸಿನಿಮಾ ರಂಗದಲ್ಲಿ ಅಂದುಕೊಂಡಿದ್ದನ್ನು ಸಾಧಿಸುವ ಛಾತಿಕ ಇದ್ದ ಶರತ್ ಅದೆಲ್ಲವನ್ನೂ ಕಡೆಗಣಿಸಿ ಸಾಗಿ ಬಂದಿದ್ದರು. ರೈತಾಪಿ ಬದುಕು ಕೊಡಮಾಡಿದ ಗಟ್ಟಿತನ, ಆತ್ಮಾಭಿಮಾನ, ಸ್ವಾಭಿಮಾನಗಳನ್ನೇ ಇಂಧನವಾಗಿಸಿಕೊಂಡ ಶರತ್ ಸಿನಿಮಾ ಯಾನ ಗನ್ಸ್ ಅಂಡ್ ರೋಸಸ್ ಮೂಲಕ ಮತ್ತಷ್ಟು ವೇಗ ಪಡೆಯುವ ನಿರೀಕ್ಷೆಗಳಿವೆ.

ಕಂಪ್ಯೂಟರ್ ಸೈನ್ಸ್ ಬಿಎಸ್‌ಸಿ ಪದವಿ ಪಡೆದುಕೊಂಡಿದ್ದ ಶರತ್ ಪಾಲಿಗೆ ಸಿನಿಮಾಕ್ಕಿಂತಲೂ ತೀವ್ರವಾಗಿ ಕಾಡಿದ್ದದ್ದು ಕ್ರಿಕೆಟ್ ಆಸಕ್ತಿ. ಆ ಕನಸಿಂದಲೇ ಬಸವನಗುಡಿಯ ನ್ಯಾಷನಲ್ ಕಾಲೇಜು ಸೇರಿಕೊಂಡಿದ್ದ ಶರತ್ ಒಳ್ಳೆ ಆಟಗಾರ. ಕೆಸಿಎಗೆ ಆಡಿ ಸೈ ಅನ್ನಿಸಿಕೊಂಡರೂ, ಆಯ್ಕೆಯ ವಿಚಾರದಲ್ಲಿ ಕಣ್ಣೆದುರೇ ದೋಖಾ ನಡೆದದ್ದನ್ನು ಕಂಡು ಶರತ್ ಆಘಾತಗೊಂಡಿದ್ದರು. ಕಡೇಗೆ ಇದು ಕಾಸು, ಪ್ರಭಾವ ಇರುವವರಿಗೆ ಮಾತ್ರವೇ ಕೈಗೆಟುಕಬಹುದಾದ ಕನಸೆಂಬ ವಿಚಾರ ಅವರಿಗೆ ಸ್ಪಷ್ಟವಾಗಿತ್ತು. ನಂತರ ಕ್ರಿಕೆಟ್ಟಿನ ಜೊತೆಗೇ ಕಾಡಿದ್ದ ಸಿನಿಮಾ ಕನಸಿನ ಚುಂಗು ಹಿಡಿದು ಹೊರಟಿದ್ದ ಶರತ್ ಈಗ ಬಹುಮುಖ್ಯ ಹಂತ ತಲುಪಿಕೊಂಡಿದ್ದಾರೆ. ಗನ್ಸ್ ಅಂಡ್ ರೋಸಸ್ ಮೂಲಕ ತನ್ನ ಮುಂದಿನ ಹೆಜ್ಜೆಗಳಿಗೆ ಮತ್ತಷ್ಟು ಬಲ ಬರುವ ನಂಬಿಕೆ ಅವರಲ್ಲಿದೆ. ಅಜಯ್ ಕುಮಾರ್ ಅವರನ್ನು ಗುರು ಮತ್ತು ಗಾಡ್ ಫಾದರ್ ಅಂದುಕೊಂಡಿರುವ ಶರತ್ ಅವರ ಇಷಾರೆಯಂತೆಯೇ ಮುಂದಿನ ನಡೆ ಅನುಸರಿಸುವ ಯೋಜನೆಯಲ್ಲಿದ್ದಾರೆ.

ದ್ರೋಣ ಕ್ರಿಯೇಷನ್ಸ್ ಮೂಲಕ ಈ ಚಿತ್ರವನ್ನು ನಿರ್ಮಾಣ ಮಾಡಿರುವ ಹೆಚ್.ಆರ್ ನಟರಾಜ್ ಅಂಥಾದ್ದೊಂದು ಅವಕಾಶವನ್ನು ಕಲ್ಪಿಸಿ ಕೊಟ್ಟಿದ್ದಾರೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಙ್ರಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ ೩ರಂದು ತೆರೆಗಾಣಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಕಥೆಗಾರನ ಜೀವನಗಾಥೆ! appeared first on Cini Shodha.

ಜನವರಿ 3ರಂದು ಕನ್ನಡವೂ ಸೇರಿದಂತೆ ಐದು ಭಾಷೆಗಳಲ್ಲಿ (guns and roses movie) ಗನ್ಸ್ ಅಂಡ್ ರೋಸಸ್ ಬಿಡುಗಡೆಗೊಳ್ಳಲಿದೆ. ಇದನ್ನು ದ್ರೋಣ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣ ಮಾಡಿರುವವರು (h.r nataraj) ಹೆಚ್.ಆರ್ ನಟರಾಜ್. ಮೂಲತಃ ಲ್ಯಾಂಡ್ ಡೆವಲಪರ್ ಆಗಿರುವ ನಟರಾಜ್, ರಾಜಕಾರಣದಲ್ಲಿಯೂ ಸಕ್ರಿಯರಾಗಿದ್ದವರು. ಇಪ್ಪತ್ತೆರಡು ವರ್ಷಗಳಿಂದ ಲ್ಯಾಂಡ್ ಡೆವಲಪರ್ ಆಗಿ ವ್ಯವಹಾರ ನಡೆಸಿದ್ದ ಅವರು 2015ರಲ್ಲಿ ವಿಧಾನ ಪರಿಷತ್ ಚುನಾವಣೆಗೆ ತುಮಕೂರು ಕ್ಷೇತ್ರದಿಂದ ಕಣಕ್ಕಿಳಿದಿದ್ದರು. ಹೀಗೆ ವ್ಯವಹಾರ ಮತ್ತು ರಾಜಕಾರಣದ ನಡುವಲ್ಲಿಯೇ ಸಿನಿಮಾ ಸಾಹಚರ್ಯ ಹೊಂದಿದ್ದ ನಟರಾಜ್ ಅವರ ಪಾಲಿಗೆ ಬಣ್ಣದ ಜಗತ್ತಿನ ಬಗ್ಗೆ ಆರಂಭ ಕಾಲದಿಂದಲೂ ಬೆರಗಿತ್ತು. ಈ ಕಾರಣದಿಂದಲೇ ಸಿನಿಮಾ ಜಗತ್ತಿನ ಅನೇಕರೊಂದಿಗೆ ನಿಕಟ ನಂಟು ಹೊಂದಿದ್ದರು. ಕಡೆಗೂ ಅವರೀಗ ಗನ್ಸ್ ಅಂಡ ರೋಸಸ್ ಚಿತ್ರದ ಮೂಲಕ ನಿರ್ಮಾಪಕರಾಗಿದ್ದಾರೆ.

ಕನಕಪುರ ಮೂಲದ ಹೆಚ್.ಆರ್ ನಟರಾಜ್ ಮತ್ತು ಈ ಚಿತ್ರದ ನಿರ್ದೇಶಕ ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಇಪ್ಪತೈದು ವರ್ಷಗಳಿಂದಲೂ ಪರಿಚಿತರು. ಈಗ್ಗೆ ವರ್ಷಗಳ ಹಿಂದೆ ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಪುತ್ರ ಅರ್ಜುನ್ ನಾಯಕನಾಗಿ ಎಂಟ್ರಿ ಕೊಡಲಿರುವ ಚಿತ್ರದ ತಯಾರಿ ನಡೆದಿತ್ತು. ಅದರ ಸಾರಥ್ಯವನ್ನು ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ವಹಿಸಿಕೊಂಡರೆ, ನಿರ್ಮಾಪಕರಾಗಲು ನಟರಾಜ್ ತಯಾರಾಗಿದ್ದರು. ಅಜಯ್ ಕುಮಾರ್ ಬಳಿ ಕಾರ್ಯನಿರ್ವಹಿಸುತ್ತಿದ್ದ ಶರತ್ ಬರೆದ ಕಥೆ ಎಲ್ಲರಿಗೂ ಹಿಡಿಸಿದ್ದೇ ಗನ್ಸ್ ಅಂಡ್ ರೋಸಸ್ ಚಿತ್ರಕ್ಕೆ ವಿದ್ಯುಕ್ತ ಚಾಲನೆ ಸಿಕ್ಕಂತಾಗಿತ್ತು. ನಟರಾಜ್ ರ ಪಾಲಿಗೆ ಸದರಿ ಕಥೆ ಹಿಡಿಸಲು ಕಾರಣವಾಗಿದ್ದದ್ದು ಅದರಲ್ಲಿನ ಸಾಮಾಜಿಕ ಕಳಕಳಿ ಮತ್ತು ನಿರ್ದೇಶಕರು ಅದನ್ನು ಸಮರ್ಥವಾಗಿ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗುವಂತೆ ಕಟ್ಟಿ ಕೊಡುತ್ತಾರೆಂಬ ಗಾಢ ನಂಬಿಕೆ.

ಹೀಗೊಂದು ಹೆಜ್ಜೆಯಿಡುವ ಮುನ್ನ ಹೆಚ್.ಆರ್ ನಟರಾಜ್ ಅವರು ಗುರು ಸಾನಿಧ್ಯಕ್ಕೆ ತೆರಳಿ ಅರಿಕೆ ಮಾಡಿಕೊಂಡಾಗ, ಅತ್ತಲಿಂದಲೂ ಸಕಾರಾತ್ಮಕ ಪ್ರತಿಕ್ರಿಯೆ ಬಂದಿತ್ತಂತೆ. ಸಿನಿಮಾ ಅಂದರೆ ಹೊರಜಗತ್ತಿನ ಕಲ್ಪನೆ ಸಾವಿರವಿದ್ದೀತು. ಆದರೆ, ಒಂದು ಸಿನಿಮಾ ಶುರುವಾದರೆ ಅದು ನೂರಾರು ಮಂದಿಯ ಅನ್ನದ ಮೂಲವಾಗುತ್ತದೆ. ಆ ದಿಕ್ಕಿನಲ್ಲಿ ಆಲೋಚಿಸಿದರೆ ನಿರ್ಮಾಪಕನ ಪಾಲಿಗೆ ಅದೊಂದು ಭಾಗ್ಯವೇ. ಅಂಥಾ ಅಧ್ಯಾತ್ಮಿಕ ಅನುಭೂತಿಯೊಂದಿಗೇ ಈ ಸಿನಿಮಾವನ್ನು ನಟರಾಜ್ ಅವರು ನಿರ್ಮಾಣ ಮಾಡಿದ್ದಾರೆ. ಇದನ್ನೂ ಕೂಡಾ ಕಲಾ ಸೇವೆಯೆಂದೇ ಪರಿಭಾವಿಸಿದ್ದಾರೆ. ಸಿನಿಮಾವನ್ನು ವ್ಯವಹಾರದಾಚೆಗೂ ಮೋಹಿಸುವ ಗುಣ ಹೊಂದಿರೋ ನಟರಾಜ್ ಪಾಲಿಗೆ ಗನ್ಸ್ ಅಂಡ್ ರೋಸಸ್ ಚಿತ್ರ ಮೂಡಿ ಬಂದಿರುವ ರೀತಿಯ ಬಗ್ಗೆ ತೃಪ್ತಿಯಿದೆ. ಒಂದಷ್ಟು ಹೊಸಾ ಪ್ರತಿಭೆಗಳು ಈ ಮೂಲಕವೇ ಬೆಳಕು ಕಾಣುತ್ತಿರೋದರ ಬಗ್ಗೆ ಖುಷಿಯಿದೆ. ಗನ್ಸ್ ಅಂಡ್ ರೋಸಸ್ ಎಲ್ಲ ವರ್ಗದ ಪ್ರೇಕ್ಷಕರನ್ನು ಸೆಳೆಯುತ್ತದೆಂಬ ನಂಬಿಕೆಯೂ ಗಟ್ಟಿಯಾಗಿದೆ.

ಇಂಥಾ ಅಪ್ಪಟ ಸಿನಿಮಾ ವ್ಯಾಮೋಹದ ನಿರ್ಮಾಪಕರ ನೆರಳಿನಲ್ಲಿ ಮಹತ್ವದ ಸಿನಿಮಾಗಳು ಸೃಷಿಯಾಗೋ ಸಾಧ್ಯತೆಗಳಿವೆ. ಒಂದು ಪ್ರತಿಭಾನ್ವಿತರ ತಂಡ ಸೇರಿಕೊಂಡು ಗನ್ಸ್ ಅಂಡ್ ರೋಸಸ್ ಚಿತ್ರವನ್ನು ಅನ್ನದಾತ ಸಂತೃಪ್ತಗೊಳಿಸುವಂತೆ ರೂಪಿಸಿದ್ದಾರೆ. ಅಂಥಾದ್ದೊಂದು ಛಾಯೆ ನೋಡುಗರಿಗೂ ದಾಟಿಕೊಂಡರೆ, ವರ್ಷಾರಂಭದಲ್ಲಿಯೇ ಕನ್ನಡ ಚಿತ್ರರಂಗ ಮತ್ತೊಂದು ಗೆಲುವಿನ ಹುರುಪು ತುಂಬಿಕೊಂಡಂತಾಗುತ್ತದೆ. ಸಿನಿಮಾ ಕಥೆಗಾರ ಅಜಯ್ ಕುಮಾರ್ ಅವರ ಪುತ್ರ ಅರ್ಜುನ್ ಈ ಮೂಲಕ ನಾಯಕ ನಟನಾಗಿ ಆಗಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಕಿಶೋರ್, ಶೋಭರಾಜ್, ಅವಿನಾಶ್, ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಜೀವನ್ ರಿಚ್ಚಿ, ಅರುಣಾ ಬಾಲರಾಜ್ ಮುಂತಾದವರ ತಾರಾಗಣವಿದೆ. ಥ್ರ್ರಿಲ್ಲರ್ ಮಂಜು ಸಾಹಸ ನಿರ್ದೇಶನ, ಎಂ. ಸಂಜೀವ್ ರೆಡ್ಡಿ ಸಂಕಲನವಿರುವ ಗನ್ಸ್ ಅಂಡ್ ರೋಸಸ್ ಜನವರಿ 3ರಂದು ಬಿಡುಗಡೆಗೊಳ್ಳಲಿದೆ.

The post Guns And Roses Movie: ಗನ್ಸ್ ಅಂಡ್ ರೋಸಸ್ ಅನ್ನದಾತನ ಇಂಟ್ರೆಸ್ಟಿಂಗ್ ಕಹಾನಿ! appeared first on Cini Shodha.

ಇದು ಹೇಳಿಕೇಳಿ ಪ್ಯಾನಿಂಡಿಯಾ ಸಿನಿಮಾಗಳ ಕಾಲಮಾನ. ಈ ರೇಸಿನಲ್ಲಿರುವ `ಗನ್ಸ್ ಅಂಡ್ ರೋಸಸ್’ ಕನ್ನಡ ಸೇರಿದಂತೆ, ತಮಿಳು, ತೆಲುಗು, ಮಲೆಯಾಳಂ ಮತ್ತು ಹಿಂದಿ ಭಾಷೆಗಳಲ್ಲಿ ಏಕಕಾಲದಲ್ಲಿ ಬಿಡುಗಡೆಗೊಳ್ಳಲಿದೆ. ಈ ಸಿನಿಮಾ ಮೂಲಕ ಅರ್ಜುನ್ ನಾಯಕ ನಟನಾಗಿ ಪ್ಯಾನಿಂಡಿಯಾ ಮಟ್ಟದಲ್ಲಿ ಲಗ್ಗೆಯಿಡಲು ಸಜ್ಜಾಗಿದ್ದಾರೆ. ಈತ ಕಥೆಗಾರರಾಗಿ, ಸಂಭಾಷಣಾಕಾರರಾಗಿ ಹಾಗೂ ನಟನಾಗಿ ಹೆಸರು ಮಾಡಿರುವ ಅಜಯ್ ಕುಮಾರ್ ಪುತ್ರ. ಹೊಸಾ ಹೀರೋನನ್ನಿಟ್ಟುಕೊಂಡು ಪ್ಯಾನಿಂಡಿಯಾ ಸಿನಿಮಾ ಮಾಡೋದೆಂದರೆ, ಅದೊಂದು ಸಾಹಸ. ಈ ಸಿನಿಮಾ ವಿಚಾರದಲ್ಲಿ ಅದು ಸಾಧ್ಯವಾದದ್ದು ಅರ್ಜುನನ ನಟನೆಯ ಕಸುವಿನಿಂದ ಅನ್ನೋದು ಚಿತ್ರತಂಡದ ಅಭಿಪ್ರಾಯ.

ಅರ್ಜುನ್ ಗಿಲ್ಲಿ ಸವಾಲಿನ ಪಾತ್ರವೇ ಸಿಕ್ಕಿದೆ. ಅದರಲ್ಲವರು ಸಿನಿಮಾ ಬಿಡುಗಡೆಗೂ ಮುನ್ನವೇ ಗೆದ್ದಿದ್ದಾರೆ. ಯಾಕೆಂದರೆ, ಪರಭಾಷಾ ಚಿತ್ರರಂಗದ ಮಂದಿಯೇ ಈತನ ನಟನೆಯ ಕಸುವು ಕಂಡು ಬೆರಗಾಗಿದ್ದಾರಂತೆ. ಬೇರೆ ಬೇರೆ ಭಾಷೆಗಳ ವಿತರಕರು ಈ ಚಿತ್ರವನ್ನು ವೀಕ್ಷಿಸಿದ್ದಾರೆ. ಅವರೆಲ್ಲರೂ ಅರ್ಜುನ್ ನಟನೆಯನ್ನು ಮನಸಾರೆ ಮೆಚ್ಚಿಕೊಂಡಿದ್ದಾರೆ. ಎಲ್ಲ ಭಾಷೆಗಳಿಗೂ ಪಕ್ಕಾ ಸೂಟ್ ಆಗುವಂಥಾ ಅರ್ಜುನ್ ಸ್ಪೆಷಾಲಿಟಿ ಕಂಡು ಅಚ್ಚರಿ ವ್ಯಕ್ತ ಪಡಿಸಿದ್ದಾರಂತೆ. ನಟನೆ, ಆಕ್ಷನ್ ಸೀನುಗಳು ಮತ್ತು ಡ್ಯಾನ್ಸ್ ನಲ್ಲಿ ಅರ್ಜುನ್ ಅಕ್ಷರಶಃ ಪಳಗಿದ ನಟನಂತೆ ಕಾಣಿಸಿಕೊಂಡಿದ್ದಾರೆಂದು ಪರಭಾಷಿಕರೇ ಕೊಂಡಾಡಿದ್ದಾರಂತೆ. ಇಂಥಾ ಮೆಚ್ಚುಗೆಯ ಮಾತುಗಳಿಂದ ಬಿಡುಗಡೆಯ ಹೊಸ್ತಿಲಲ್ಲಿರುವ ಚಿತ್ರತಂಡಕ್ಕೆ ಮತ್ತಷ್ಟು ಹುರುಪು ಮೂಡಿಕೊಂಡಿದೆ.

ದ್ರೋಣ ಕ್ರಿಯೇಷನ್ಸ್ ಬ್ಯಾನರಿನಡಿಯಲ್ಲಿ ಎಚ್ ಆರ್ ನಟರಾಜ್ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಹೆಚ್.ಎಸ್ ಶ್ರೀನಿವಾಸ್ ಕುಮಾರ್ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಪೊಲೀಸ್ ಸ್ಟೋರಿಯಿಂದ ಮೊದಲ್ಗೊಂಡು ಇಪ್ಪತೈದು ವರ್ಷದಿಂದೀಚೆಗೆ ನಿರ್ದೇಶನ ವಿಭಾಗದಲ್ಲಿ ಸಕ್ರಿಯರಾಗಿರುವವರು ಹೆ.ಎಸ್ ಶ್ರೀನಿವಾಸ ಕುಮಾರ್. ಇಷ್ಟೂ ವರ್ಷಗಳ ಅನುಭವವನ್ನು ಒಟ್ಟುಗೂಡಿಸಿಕೊಂಡು ಅವರು ಈ ಸಿನಿಮಾ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಯಶ್ವಿಕಾ ನಿಷ್ಕಲಾ ಅರ್ಜುನ್ ಗೆ ನಾಯಕಿಯಾಗಿ ಸಾಥ್ ಕೊಟ್ಟಿದ್ದಾರೆ. ಶಶಿಕುಮಾರ್ ಸಂಗೀತ ನಿರ್ದೇಶನ, ಜನಾರ್ದನ ಬಾಬು ಛಾಯಾಗ್ರಹಣವಿರುವ ಈ ಚಿತ್ರದಲ್ಲಿ ಸುಚೇಂದ್ರ ಪ್ರಸಾದ್, ನೀನಾಸಂ ಅಶ್ವಥ್, ಅವಿನಾಶ್, ಕಿಶೋರ್ ಮುಂತಾದವರ ತಾರಾಗಣವಿದೆ. ಈಗಾಗಲೇ ಲಹರಿ ಮ್ಯೂಸಿಕ್ ಮೂಲಕ ಒಂದು ಲಿರಿಕಲ್ ಸಾಂಗ್ ಬಿಡುಗಡೆಗೊಂಡಿದೆ. ಉಳಿದ ಹಾಡುಗಳು ಹಂತ ಹಂತವಾಗಿ ಬಿಡುಗಡೆಗೊಳ್ಳಲಿವೆ.

The post guns and roses movie: ಟೀಸರ್ ಕಂಡು ಪ್ರೇಕ್ಷಕರು ಫಿದಾ! appeared first on Cini Shodha.