ಅಗ್ನಿಸಾಕ್ಷಿ, ನಾಗಿಣಿ, ಕಮಲಿಯಂಥಾ ಅನೇಕ ಹಿಟ್ ಧಾರಾವಾಹಿಗಳ ಮೂಲಕ ಕಿರುತೆರೆ ಪ್ರೇಕ್ಷಕರ ಮನ ಗೆದ್ದುಕೊಂಡಿರುವವರು ಹಯವದನ. ಹೀಗೆ ದಶಕಗಟ್ಟಲೆ ಕಿರುತೆರೆಯಲ್ಲಿ ಬ್ಯುಸಿಯಾಗಿದ್ದ ಅವರ ಪಾಲಿಗೆ ಮಹಾ ಕನಸಾಗಿದ್ದದ್ದು ಸಿನಿಮಾ ನಿರ್ದೇಶನ. ಬ್ಯುಸಿ ಶೆಡ್ಯೂಲ್ ಗಳ ನಡುವೆಯೂ ಅದಕ್ಕಾಗಿ ತಯಾರಿ ನಡೆಸುತ್ತಾ ಬಂದಿದ್ದ ಹಯವದನ, ಬೇರೆಯದ್ದೇ ಅನುಭೂತಿ ನೀಡುವಂಥಾ, ಭಿನ್ನ ಬಗೆಯ ಕಥೆಯ ಮೂಲಕವೇ ಎಂಟ್ರಿ ಕೊಡಬೇಕೆಂಬ ತೀರ್ಮಾನಕ್ಕೆ ಬಂದಿದ್ದರು. ಈ ಕಾಲದ ಟ್ರೆಂಡಿಗೆ ತಕ್ಕಂತಿರುವ ಕಥಾ ಎಳೆಯನ್ನು ಸೃಷ್ಟಿಸಿ, ವರ್ಷಗಟ್ಟಲೆ ಶ್ರಮವಹಿಸಿ ಅದಕ್ಕೆ ಸಿನಿಮಾ ಸ್ಪರ್ಶ ನೀಡಿದ್ದರು. ಇದು ಹೇಳಿಕೇಳಿ ವ್ಲಾಗಿಂಗ್ ಟ್ರೆಂಡು ಹಬ್ಬಿರೋ ದಿನಮಾನ. ಇನ್ನು ಜರ್ನಿ ಕಥನಗಳಿಗಂತೂ ಚಿತ್ರರಂಗದಲ್ಲೊಂದು ಪ್ರತ್ಯೇಕ ಸ್ಥಾನವೇ ಇದೆ. ಅದೆಲ್ಲದರಲ್ಲಿ ಭಿನ್ನವಾಗಿ ನೆಲೆಗೊಳ್ಳುವಂತೆ ಹಯವದನ ಈ ಸಿನಿಮಾವನ್ನು ರೂಪಿಸಿದ್ದಾರಂತೆ.

ಮೂಲತಃ ಬಾಗಲಕೋಟೆಯವರಾದ ಹಯವದನ ಸಿನಿಮಾ ಲೋಕದ ಕನಸಿನ ಸೆಳವಿಗೆ ಸಿಕ್ಕು ಬೆಂಗಳೂರು ಸೇರಿಕೊಂಡವರು. ಆದರೆ, ಅವರನ್ನು ಬರಮಾಡಿಕೊಂಡಿದ್ದು ಮಾತ್ರ ಸೀರಿಯಲ್ ಲೋಕ. ವೈಶಾಲಿ ಕಾಸರವಳ್ಳಿ ನಿರ್ದೇಶನದ ಮೂಡಲಮನೆ ಧಾರಾವಾಹಿಯ ಮೂಲಕ ಹಯವದನ ಸೀರಿಯಲ್ ಲೋಕಕ್ಕೆ ಪಾದಾರ್ಪಣೆ ಮಾಡಿದ್ದರು. ಆ ನಂತರ ಮುಕ್ತ ಧಾರಾವಾಹಿಯ ಮೂಲಕ ಟಿ.ಎನ್ ಸೀತಾರಾಂ ಗರಡಿಯಲ್ಲಿ ಪಳಗಿಕೊಳ್ಳುವ ಅವಕಾಶ ಕೂಡಿ ಬಂದಿತ್ತು. ಆ ನಂತರ ಸ್ವತಂತ್ರ ನಿರ್ದೇಶಕರಾಗಿದ್ದ ಹಯವದನ, ಬಾಹುಬಲಿ ಚಿತ್ರವನ್ನು ನಿರ್ಮಾಣ ಮಾಡಿದ್ದ ಪ್ರತಿಷ್ಠಿತ ಅರ್ಕಾ ಮೀಡಿಯಾ ವರ್ಕ್ಸ್ ಸಂಸ್ಥೆಯ ಭಾಗವಾಗಿಯೂ ಕಾರ್ಯ ನಿರ್ವಹಿಸಿದ ಹೆಗ್ಗಳಿಕೆ ಹೊಂದಿದ್ದಾರೆ. ಈ ಸಂಸ್ಥೆ ಅಗ್ನಿಸಾಕ್ಷಿ ಮತ್ತು ಶುಭ ಮಂಗಳ ಧಾರಾವಾಹಿಗಳನ್ನು ನಿರ್ಮಾಣ ಮಾಡಿತ್ತು.

ಹೀಗೆ ಕಿರುತೆರೆಯಲ್ಲಿ ಪ್ರಸಿದ್ಧಿ ಪಡೆದಿದ್ದ ಹಯವದನ ಎಲ್ಲೋ ಜೋಗಪ್ಪ ಮೂಲಕ ಹಿರಿತೆರೆಗೂ ಪ್ರವೇಶಿಸಿದ್ದಾರೆ. ಅವರಿಗೆ ಕಿರುತೆರೆ ಮತ್ತು ಹಿರಿತೆರೆಗಳ ನಡುವಿನ ಫರಕು ಮತ್ತು ಅವೆರಡನ್ನೂ ಹೇಗೆಲ್ಲ ಸಂಭಾಳಿಸಬೇಕೆಂಬುದರ ಸ್ಪಷ್ಟವಾದ ಅರಿವಿದೆ. ಒಂದು ಕಥೆಯ ಮೂಲಕ ವರ್ಷಗಟ್ಟಲೆ ಕಿರುತೆರೆ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುವ ಕಲೆ ಅವರಿಗೆ ಸಿದ್ಧಿಸಿದೆ. ಹಾಗಿರುವಾಗ ಗಟ್ಟಿ ಕಥೆಯ ಮೂಲಕ ಎರಡು ಗಂಟೆಗಳ ಕಾಲಾವಧಿಯಲ್ಲಿ ಹಿರಿತೆರೆ ಪ್ರೇಕ್ಷಕರನ್ನು ತೃಪ್ತಗೊಳಿಸೋದು ಅವರ ಪಾಲಿಗೇನೂ ಕಷ್ಟವಾಗಲಿಕ್ಕಿಲ್ಲ. . ಪವನ್ ಶಿಮಿಕೇರಿ ಮತ್ತು ಸಿಂಧು ಹಯವದನ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸೃಜನ್ ರಾಘವೇಂದ್ರ, ಚೇತನ್, ಹಯವದನ ಚಿತ್ರಕಥೆ, ವೇಣು ಹಸ್ರಾಳಿ ಸಂಭಾಷಣೆ, ನಟರಾಜು ಮದ್ದಾಲ ಛಾಯಾಗ್ರಹಣ, ಹೊಸ್ಮನೆ ಮೂರ್ತಿ ಕಲಾ ನಿರ್ದೇಶನ, ಶಿವಪ್ರಸಾದ್ ಸಂಗೀತ ನಿರ್ದೇಶನವಿರುವ ಈ ಚಿತ್ರ ಈ ವಾರ ರಾಜ್ಯಾದ್ಯಂತ ಬಿಡುಗಡೆಗೊಳ್ಳಲಿದೆ.

The post ello jogappa ninnaramane movie: ಕಥೆ ಹುಟ್ಟಿದ ಬಗ್ಗೆ ಹಯವದನ ಹೇಳಿದ್ದಿಷ್ಟು! appeared first on Cini Shodha.

ಸಂಜನಾ ದಾಸ್ ಮೂಲತಃ ಬೆಂಗಳೂರು ಹುಡುಗಿ. ಎಳವೆಯಿಂದಲೇ ಭರತನಾಟ್ಯದತ್ತ ಆಕರ್ಷಿತರಾಗಿದ್ದ ಆಕೆಯ ಪಾಲಿಗೆ ಬರಬರುತ್ತಾ ನಟನೆಯ ಸೆಳೆತ ಮೂಡಿಕೊಂಡಿತ್ತು. ಈ ನಿಟ್ಟಿನಲ್ಲಿ ಮಒಂದಷ್ಟು ಅವಕಾಶ ಪಡೆದುಕೊಂಡಿದ್ದ ಸಂಜನಾ ವರ್ಷದ ಹಿಂದೆ ಬಿಡುಗಡೆಗೊಂಡಿದ್ದ ಕೇಟಿಎಂ ಎಂಬ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ್ದರು. ಆ ಸಿನಿಮಾದ ಟೀಸರ್ ನೋಡಿದ ನಿರ್ದೇಶಕ ಹಯವದನ ಸಂಜನಾರನ್ನು ಸದರಿ ಪಾತ್ರಕ್ಕೆ ನಿಕ್ಕಿಯಾಗಿಸಿದ್ದರಂತೆ. ಇಂಥಾದ್ದೊಂದು ಪಾತ್ರ ಅಚಾನಕ್ಕಾಗಿ ಒಲಿಯುತ್ತಲೇ ಸಂಜನಾ ಸಹಜವಾಗಿಯೇ ಥ್ರಿಲ್ ಆಗಿದ್ದರು. ನಂತರ ಚಿತ್ರೀಕರಣದುದ್ದಕ್ಕೂ ಆ ಪಾತ್ರದ ಆವೇಗಕ್ಕೆ ತಕ್ಕಂಥಾ ಅನುಭೂತಿ ಪಡೆಯುತ್ತಾ, ಹೊಸಾ ಅನುಭವಗಳಿಗೆ ತೆರೆದುಕೊಳ್ಳುತ್ತಾ ಸಾಗಿದ ಸಂಜನಾ ಪಾಲಿಗೆ ಸದರಿ ಸಿನಿಮಾ ತನಗೊಂದು ಬ್ರೇಕ್ ನೀಡುವ ಗಾಢ ಭರವಸೆ ಇದೆ.

ಸಂಜನಾ ದಾಸ್ ಇಲ್ಲಿ ತಮಿಳು ಹುಡುಗಿಯಾಗಿ ನಟಿಸಿದ್ದಾರೆ. ಅವರ ಭಾಗದ ಚಿತ್ರೀಕರಣ ಮನಾಲಿಯ ಸುಂದರ ವಾತಾವರಣದಲ್ಲಿ ನಡೆದಿದೆ. ಸಾಹಸೀ ಪ್ರವೃತ್ತಿ ಹೊಂದಿರುವ ಆ ಪಾತ್ರಕ್ಕೆ ತೃಪ್ತಿದಾಯಕವಾಗಿ ಜೀವ ತುಂಬಿದ ಖುಷಿ ಸಂಜನಾಗಿದೆ. ಟ್ರೈಲರ್ ನಲ್ಲಿಯೂ ಈಕೆಯ ಪಾತ್ರ ಪ್ರೇಕ್ಷಕರನ್ನು ಸೆಳೆದುಕೊಂಡಿದೆ. ಒಂದಷ್ಟು ಕಿರುಚಿತ್ರಗಳಲ್ಲಿ ನಟಿಸುತ್ತಾ ಬಂದಿದ್ದ ಸಂಜನಾ, ಮತ್ತೊಂದೆರಡು ಸಿನಿಮಾಗಳಲ್ಲಿಯೂ ನಟಿಸಿದ್ದಾರೆ. ಸದ್ದಯ ಎಲ್ಲೋ ಜೋಗಪ್ಪ ನಿನ್ನರಮನೆ ಚಿತ್ರದತ್ತ ಅವರ ಗಮನ ಕೇಂದ್ರೀಕರಿಸಿಕೊಂಡಿದೆ. ಪವನ್ ಶಿಮಿಕೇರಿ ಮತ್ತು ಸಿಂಧು ಹಯವದನ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸೃಜನ್ ರಾಘವೇಂದ್ರ, ಚೇತನ್, ಹಯವದನ ಚಿತ್ರಕಥೆ, ವೇಣು ಹಸ್ರಾಳಿ ಸಂಭಾಷಣೆ, ನಟರಾಜು ಮದ್ದಾಲ ಛಾಯಾಗ್ರಹಣ, ಹೊಸ್ಮನೆ ಮೂರ್ತಿ ಕಲಾ ನಿರ್ದೇಶನ, ಶಿವಪ್ರಸಾದ್ ಸಂಗೀತ ನಿರ್ದೇಶನವಿರುವ ಈ ಚಿತ್ರ ಈ ವಾರ ರಾಜ್ಯಾದ್ಯಂತ ಬಿಡುಗಡೆಗೊಳ್ಳಲಿದೆ.

The post ello jogappa ninnaramane movie: ಥ್ರಿಲ್ಲಿಂಗ್ ಅನುಭವ ಹಂಚಿಕೊಂಡ್ರು ಸಂಜನಾ ದಾಸ್! appeared first on Cini Shodha.

ನಿರ್ದೇಶಕ ಹಯವದನ ಈ ಸಿನಿಮಾಗಾಗಿ ಕಥೆಯನ್ನು ಸಿದ್ಧಪಡಿಸಿ, ಸ್ಕ್ರಿಫ್ಟ್ ಸೇರಿದಂತೆ ಎಲ್ಲವೂ ತಯಾರಾದ ಬಳಿಕ ಆಯಾ ಪಾತ್ರಕ್ಕೊಪ್ಪುವ ಕಲಾವಿದರ ಹುಡುಕಾಟಕ್ಕಿಳಿದಿದ್ದರು. ಹೆಚ್ಚೂಕಡಿಮೆ ಎಲ್ಲ ಪಾತ್ರಗಳಿಗೂ ಕಲಾವಿದರು ನಿಕ್ಕಿಯಾಗಿದ್ದರೂ, ನಾಯಕಿಯ ಪಾತ್ರ ಮಾತ್ರ ಪ್ರಶ್ನೆಯಾಗುಳಿದಿತ್ತು. ಅದೊಂದು ಸಾರಿ ಹಯವದನ ನಿರ್ದೇಶಕ ಚೇತನ್ ಮುಂಡಾಡಿ ಅವರನ್ನು ಭೇಟಿಯಾಗಿದ್ದಾಗ ನಾಯಕಿ ಪಾತ್ರಕ್ಕೆ ಫ್ರೆಶ್ ಫೇಸಿನ ಹುಡುಕಾಟದಲ್ಲಿರುವ ವಿಚಾರವನ್ನು ಹೇಳಿಕೊಂಡಿದ್ದರಂತೆ. ಆ ಕ್ಷಣವೇ ಚೇತನ್ ಮುಂಡಾಡಿ ಸೂಚಿಸಿದ್ದು ವೆನ್ಯಾ ರೈ ಹೆಸರನ್ನು. ವೆನ್ಯಾ ಅದಾಗಲೇ ಚೇತನ್ ನಿರ್ದೇಶನದ ಭಾವಪೂರ್ಣ ಚಿತ್ರದಲ್ಲಿ ನಟಿಸಿದ್ದರು. ಅದರ ಒಂದಷ್ಟು ತುಣುಕುಗಳನ್ನು ಕಂಡ ಹಯವದನ ಈಕೆಯೇ ಆ ಪಾತ್ರಕ್ಕೆ ಸೂಕ್ತ ಎಂಬಂಥಾ ನಿರ್ಧಾರಕ್ಕೆ ಬಂದಿದ್ದರಂತೆ.

ಆರಂಭದಲ್ಲಿ ಈ ಆಫರ್ ಒಪ್ಪಿಕೊಳ್ಳಲು ವೆನ್ಯಾ ತಂದೆ ಚೇತನ್ ರೈ ಹಿಂದೇಟು ಹಾಕಿದರೂ, ಕಥೆ ಮತ್ತು ಆ ಪಾತ್ರದ ಬಗ್ಗೆ ತಿಳಿದ ನಂತರ ಒಪ್ಪಿಗೆ ಸೂಚಿಸಿದ್ದರಂತೆ. ವೆನ್ಯಾ ತಂದೆ ಚೇತನ್ ರೈ ಮಾಣಿ ಕೂಡಾ ತುಳು ಚಿತ್ರರಂಗದ ಖ್ಯಾತ ನಟ. ಯಕ್ಷಗಾನದಲ್ಲಿಯೂ ಛಾಪು ಮೂಡಿಸಿರುವವರು. ಹೀಗೊಂದು ಬೆಳವಣಿಗೆ ನಡೆಯುತ್ತಲೇ ಆನ್‌ಲೈನ್ ಮೂಲಕವೇ ವೆನ್ಯಾಗೆ ನಿರ್ದೇಶಕ ಹಯವದನ ರಿಹರ್ಸಲ್ ನಡೆಸುತ್ತಾ ಬಂದಿದ್ದರಂತೆ. ಕಡೆಗೂ ಚಿತ್ರೀಕರಣದಲ್ಲಿ ಭಾಗಿಯಾದ ವೆನ್ಯಾ ಪಂಡಟಾಪುರದ ಟೆಂಪಲ್ ಟೌನಿನ ಮರಾಠಿ ಹುಡುಗಿಯ ಪಾತ್ರಕ್ಕೆ ಜೀವ ತುಂಬಿದ್ದಾರೆ.

ಸದ್ಯಕ್ಕೆ ಓದಿನತ್ತ ಗಮನ ಹರಿಸುತ್ತಿದ್ದರೂ ನಟಿಯಾಗ ಬೇಕೆಂಬ ಹಂಬಲ ಹೊಂದಿರುವ ವೆನ್ಯಾ ಪಾಲಿಗೆ ಈ ಸಿನಿಮಾದ ಅವಕಾಶ ವರವೆಂಬಂತೆ ಒಲಿದು ಬಂದಿದೆ. ಎಲ್ಲೋ ಜೋಗಪ್ಪ ನಿನ್ನರಮನೆ ಚಿತ್ರ ಆಕೆಯ ಮುಂದಿನ ಹಾದಿಗೆ ಮತ್ತಷ್ಟು ಕಸುವು ತುಂಬುವ ಲಕ್ಷಣಗಳೂ ಕಾಣಿಸುತ್ತಿವೆ. ಟ್ರೈಲರಿನಲ್ಲಿ ಈಕೆಯ ಪಾತ್ರದ ಒಂದಷ್ಟು ಚಹರೆಗಳು ಜಾಹೀರಾಗಿವೆ. ಪ್ರೇಕ್ಷಕರ ಕಡೆಯಿಂದ ಮೆಚ್ಚುಗೆಯೂ ಹರಿದು ಬರಲಾರಂಭಿಸಿದೆ. ಪವನ್ ಶಿಮಿಕೇರಿ ಮತ್ತು ಸಿಂಧು ಹಯವದನ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸೃಜನ್ ರಾಘವೇಂದ್ರ, ಚೇತನ್, ಹಯವದನ ಚಿತ್ರಕಥೆ, ವೇಣು ಹಸ್ರಾಳಿ ಸಂಭಾಷಣೆ, ನಟರಾಜು ಮದ್ದಾಲ ಛಾಯಾಗ್ರಹಣ, ಹೊಸ್ಮನೆ ಮೂರ್ತಿ ಕಲಾ ನಿರ್ದೇಶನ, ಶಿವಪ್ರಸಾದ್ ಸಂಗೀತ ನಿರ್ದೇಶನವಿರುವ ಈ ಚಿತ್ರ ಈ ವಾರ ರಾಜ್ಯಾದ್ಯಂತ ಬಿಡುಗಡೆಗೊಳ್ಳಲಿದೆ.

The post ello jogappa ninnaramane movie: ನಾಯಕಿಯ ಕಣ್ಣಲ್ಲಿ ಎಲ್ಲೋ ಜೋಗಪ್ಪ ನಿನ್ನರಮನೆ! appeared first on Cini Shodha.

ಈ ಹಿಂದೆ ಕಂಬ್ಳಿ ಹುಳ ಚಿತ್ರದ ಮೂಲಕ ನಾಯಕನಾಗಿ ಎಂಟ್ರಿ ಕೊಟ್ಟಿದ್ದವರು ಅಂಜನ್. ಮೊದಲ ಹೆಜ್ಜೆಯಲ್ಲಿಯೇ ಅವರ ನಟನೆಗೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿತ್ತು. ಆ ಸಿನಿಮಾದ ಭೂಮಿಕೆಯಲ್ಲಿಯೇ `ಎಲ್ಲೋ ಜೋಗಪ್ಪ ನಿನ್ನರಮನೆ’ ಚಿತ್ರದ ನಾಯಕನಾಗೋ ಅವಕಾಶ ಅವರ ಪಾಲಿಗೆ ಒಲಿದದ್ದು ನಿಜಕ್ಕೂ ಅಚ್ಚರಿಯ ಸಂಗತಿ. ಎಳವೆಯಿಂದಲೇ ರಂಗಭೂಮಿಯ ನಂಟು ಹೊಂದಿದ್ದ ಅಂಜನ್ ಪಾಲಿಗೆ ನಟನಾಗಿ ಯಾವ ದಿಕ್ಕಿನತ್ತ ಸಾಗಬೇಕು, ಯಾವ ಬಗೆಯ ಕಥೆಯನ್ನು ಆಯ್ಕೆ ಮಾಡಿಕೊಳ್ಳಬೇಕೆಂಬ ಬಗ್ಗೆ ಸ್ಪಷ್ಟವಾದ ಅಂದಾಜಿದೆ. ಕಂಬ್ಳಿ ಹುಳ ಚಿತ್ರದ ನಂತರ ಭಿನ್ನವಾದ ಪಾತ್ರದಲ್ಲಿ ನಟಿಸಬೇಕೆಂಬುದು ಅಂಜನ್ ಆಸೆಯಾಗಿತ್ತು. ಅದು ಕಂಬ್ಳಿಹುಳ ಚಿತ್ರ ಬಿಡುಗಡೆಗೆ ಮುನ್ನವೇ ಸಾಕಾರಗೊಂಡು ಸ್ವತಃ ಅಂಜನ್ ರನ್ನೇ ಅಚ್ಚರಿಗೀಡು ಮಾಡಿತ್ತು.

ಇಂಥಾದ್ದೊಂದು ಮಿರ್‍ಯಾಕಲ್ ಸಂಭವಿಸಿದ್ದು ಕಂಬ್ಳಿಹುಳ ಚಿತ್ರದ ಪ್ರೀಮಿಯರ್ ಶೋ ಭೂಮಿಕೆಯಲ್ಲಿ. ಈ ಪ್ರೀಮಿಯರ್ ಶೋಗೆ ನಿರ್ದೇಶಕ ಹಯವದನ ಕೂಡಾ ಆಗಮಿಸಿದ್ದರು. ಸಿನಿಮಾ ನೋಡುತ್ತಲೇ ಹಯವದನ ಅದಾಗಲೇ ರೆಡಿ ಮಾಡಿಟ್ಟುಕೊಂಡಿದ್ದ `ಎಲ್ಲೋ ಜೋಗಪ್ಪ ನಿನ್ನರಮನೆ’ ಚಿತ್ರಕ್ಕೆ ನಾಯಕನಾಗಲು ಅಂಜನ್ ನಾಗೇಂದ್ರ ಸೂಕ್ತ ಎಂಬಂಥಾ ತೀರ್ಮಾನಕ್ಕೆ ಬಂದಂತಿತ್ತು. ಈ ಕಾರಣದಿಂದಲೇ ಪ್ರೀಮಿಯರ್ ಶೋ ಮುಗಿಯುತ್ತಲೇ ಇಂಥಾದ್ದೊಂದು ಪ್ರಸ್ತಾವನೆಯನ್ನು ಅಂಜನ್ ಮುಂದಿಟ್ಟಿದ್ದರಂತೆ. ನಿಂತ ನಿಲುವಿನಲ್ಲಿಯೇ ಹಯವದನ ಒಂದೆಳೆ ಕಥೆ ಹೇಳಿದಾಕ್ಷಣವೇ ಅಂಜನ್ ನಾಗೇಂದ್ರ ಥ್ರಿಲ್ ಆಗಿ ಒಪ್ಪಿಗೆ ಸೂಚಿಸಿದ್ದರಂತೆ. ಹಾಗೆ ಎಲ್ಲೋ ಜೋಗಪ್ಪ ನಿನ್ನರಮನೆ ಸಿನಿಮಾ ಯಾನಕ್ಕೊಂದು ವಿದ್ಯುಕ್ತ ಚಾಲನೆ ಸಿಕ್ಕಂತಾಗಿತ್ತು. 

ಆ ನಂತರ ಅತ್ಯಂತ ವೇಗವಾಗಿ ರಿಹರ್ಸಲ್ಲು ನಡೆದಿತ್ತು. ಅದರಲ್ಲಿ ಅಂಜನ್ ನಾಗೇಂದ್ರ ಅತ್ಯಂತ ಉತ್ಸಾಹದಿಂದಲೇ ಭಾಗಿಯಾಗಿದ್ದರು. ಅಷ್ಟೆಲ್ಲ ಆದ ನಂತರ ಅತ್ಯಂತ ವ್ಯವಸ್ಥಿತವಾಗಿ ಈ ಚಿತ್ರದ ಚಿತ್ರೀಕರಣ ಶುರುವಾಗಿತ್ತು. ಇಲ್ಲಿ ಬೆಂಗಳೂರಿನಿಂದ ಹಿಮಾಲಯದವರೆಗೂ ಹಬ್ಬಿಕೊಂಡಿರೋ ಕಥೆ ಇರೋದರಿಂದ, ಚಿತ್ರೀಕರಣದ ಪ್ರತೀ ಘಟ್ಟದಲ್ಲೂ ಬೇರೆಯದ್ದೇ ಜಗತ್ತೊಂದು ಕಣ್ಮುಂದೆ ಪ್ರತ್ಯಕ್ಷವಾದಂಥಾ ಅನುಭೂತಿ ದಕ್ಕಲಾರಂಭಿಸಿತ್ತು. ಬೇರೆ ಬೇರೆ ಭೂಬಾಗ, ಭಿನ್ನವಾದ ಸಂಸ್ಕೃತಿಗಳನ್ನು ಮನತುಂಬಿಕೊಳ್ಳುತ್ತಾ, ಒಂದಷ್ಟು ರಿಸ್ಕು ತೆಗೆದುಕೊಂಡು ಚಿತ್ರೀಕರಣದಲ್ಲಿ ಭಾಗಿಯಾದ ಥ್ರಿಲ್ಲಿಂಗ್ ಅನುಭವವನ್ನು ಅಂಜನ್ ನಾಗೇಂದ್ರ ತಮ್ಮದಾಗಿಸಿಕೊಂಡಿದ್ದಾರೆ.

ಹೀಗೆ ಎಲ್ಲೋ ಜೋಗಪ್ಪ ನಿನ್ನರಮನೆ ಚಿತ್ರದ ನಾಯಕನಾಗಿ ನಟಿಸಿರುವ ಅಂಜನ್ ನಾಗೇಂದ್ರ ಮೂಲತಃ ಹಾಸನದವರು. ಇವರ ತಂದೆ ನಾರಾಯಣ ಆ ಕಾಲಕ್ಕೆ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದವರು. ಈ ಕಾರಣದಿಂದ ಅಂಜನ್ ಪಾಲಿಗೆ ಪುಟ್ಟ ವಯಸ್ಸಿನಲ್ಲಿಯೇ ರಂಗಭೂಮಿಯ ವಾತಾವರಣದಲ್ಲಿ ಬೆರೆಯುವ ಅವಕಾಶ ಸಿಕ್ಕಿತ್ತು. ಆ ಹಂತದಿಂದಲೇ ನಟಿಸುತ್ತಾ ಬಂದಿದ್ದ ಅವರ ಪಾಲಿಗೆ ಸಿನಿಮಾ ನಟನಾಗಬೇಕೆಂಬ ಕನಸು ಕಾಲೇಜು ದಿನಗಳವರೆಗೂ ಇರಲೇ ಇಲ್ಲವಂತೆ. ಕಡೆಗೂ ಹಾಸನದಲ್ಲಿಯೇ ಇಂಜಿನಿಯರಿಂಗ್ ಮುಗಿಸಿದ್ದ ಅಂಜನ್ ನಾಗೇಂದ್ರ ಒಂದೆರಡು ವರ್ಷ ಸಿನಿಮಾ ರಂಗದಲ್ಲಿ ನಟನಾಗಲು ಪ್ರಯತ್ನಿಸುವ ನಿರ್ಧಾರಕ್ಕೆ ಬಂದಿದ್ದರು. ಆದರೆ ಅದೇನೇ ಸರ್ಕಸ್ಸು ನಡೆಸಿದರೂ ಎರಡು ವರ್ಷಗಳಲ್ಲಿ ಯಾವ ಬೆಳವಣಿಗೆಗಳೂ ಸಾಧ್ಯವಾಗಿರಲಿಲ್ಲ.

ಆದರೆ, ಎರಡು ವರ್ಷಗಳ ನಂತರ ತಾನೇ ತಾನಾಗಿ ಕಂಬ್ಳಿಹುಳ ಚಿತ್ರದ ನಾಯಕನಾಗುವ ಅವಕಾಶ ಒಲಿದು ಬಂದಿತ್ತು. ಆ ಬಳಿಕ ಎಲ್ಲೋ ಜೋಗಪ್ಪ ನಿನ್ನರಮನೆ ಸಿನಿಮಾ ಅವಕಾಶವೂ ಹುಡುಕಿ ಬಂದಿತ್ತು. ಈಗ ಮತ್ತೊಂದಷ್ಟು ಅವಕಾಶಗಳೂ ಅಂಜನ್ ಮುಂದಿವೆ. ನಿಖರವಾಗಿ ಹೇಳಬೇಕೆಂದರೆ ಸಿನಿಮಾ ಕಲೆಯೆಂಬುದು ಅವರನ್ನು ಬರಸೆಳೆದು ಅಪ್ಪಿಕೊಂಡಿದೆ. ಎಲ್ಲೋ ಜೋಗಪ್ಪ ನಿನ್ನರಮನೆ ಚಿತ್ರದ ಮೂಲಕ ತನ್ನ ಮುಂದಿನ ಹಾದಿ ಮತ್ತಷ್ಟು ಸುಗಮವಾಗಲಿದೆ ಎಂಬ ಗಾಢ ನಂಬಿಕೆ ಅವರಲ್ಲಿದೆ. ಪವನ್ ಶಿಮಿಕೇರಿ ಮತ್ತು ಸಿಂಧು ಹಯವದನ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸೃಜನ್ ರಾಘವೇಂದ್ರ, ಚೇತನ್, ಹಯವದನ ಚಿತ್ರಕಥೆ, ವೇಣು ಹಸ್ರಾಳಿ ಸಂಭಾಷಣೆ, ನಟರಾಜು ಮದ್ದಾಲ ಛಾಯಾಗ್ರಹಣ, ಹೊಸ್ಮನೆ ಮೂರ್ತಿ ಕಲಾ ನಿರ್ದೇಶನ, ಶಿವಪ್ರಸಾದ್ ಸಂಗೀತ ನಿರ್ದೇಶನವಿರುವ ಈ ಚಿತ್ರ ತೆರೆಗಾಣಲು ದಿನಗಣನೆ ಶುರುವಾಗಿದೆ.

The post ello jogappa ninnaramane: ಎಲ್ಲೋ ಜೋಗಪ್ಪ ನಿನ್ನರಮನೆ ನಾಯಕ ಅಂಜನ್ ಅಂತರಾಳ! appeared first on Cini Shodha.