ಧೀರಜ್ ಎಂ.ವಿ ನಿರ್ದೇಶನ ಹಾಗೂ ಅಭಿರಾಮ ಅರ್ಜುನ ಬ್ಯುಸಿನೆಸ್ ಹೆಡ್ ಆಗಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಚಿತ್ರ ಕಪಟ ನಾಟಕ ಸೂತ್ರಧಾರಿ. ಈಗಾಗಲೇ ಫ:ಸ್ಟ್ ಲುಕ್ ಪೋಸ್ಟರ್ ಲಾಂಚ್ ಮಾಡಿ, ಅದರ ಭೂಮಿಕೆಯಲ್ಲಿ ಒಂದಷ್ಟು ವಿಚಾರಗಳನ್ನು ಚಿತ್ರತಂಡ ಹಂಚಿಕೊಂಡಿತ್ತು. ಅದೆಲ್ಲದರ ಮೂಲಕ ಕಪಟ ನಾಟಕ ಸೂತ್ರಧಾರಿಯ ಆಂತರ್ಯದ ಬಗ್ಗೆ ಸಹಜವಾಗಿಯೇ ಕುತೂಹಲ ಮೂಡಿಕೊಂಡಿತ್ತು. ಈ ಟ್ರೈಲರ್ ನೋಡಿದಾಕ್ಷಣವೇ ಇದೊಂದು ಭಿನ್ನ ಪಥದ ಕದಲಿಕೆ ಎಂಬಂಥಾ ಸ್ಪಷ್ಟ ಸುಳಿವು ಸಿಕ್ಕಂತಾಗಿದೆ. ಒಂದು ಸಮುದಾಯದ ಶ್ರದ್ಧಾ ಕೇಂದ್ರಕ್ಕೆ ಮನುಷ್ಯ ಸಹಜ ಕುತೂಹಲದಿಂದ ತೆರಳೋ ಅನ್ಯ ಸಮುದಾಯದ ಯುವಕ. ಆತ ಆನೆಯಡಿಯಲ್ಲಿ ನುಸುಳಲು ಹೋದಾಗ ಲಾಕ್ ಆಗೋದರ ಸುತ್ತಲಿನ ಸೂಕ್ಷ್ಮ ವಿಚಾರಗಳ ಮೂಲಕ ಒಂದಿಡೀ ಕಥೆ ಗರಿಬಿಚ್ಚಿಕೊಳ್ಳುವ ಲಕ್ಷಣಗಳಿಲ್ಲಿ ಢಾಳಾಗಿಯೇ ಗೋಚರಿಸಿದ್ದಾವೆ.

ಅನ್ಯ ಮತೀಯ ಯುವಕ ಆನಿಯ ಕಾಲ ಕೆಳಗೆ ಲಾಕ್ ಆಗೋ ರೂಪಕವಿದೆಯಲ್ಲಾ? ಅದು ಪ್ರಸ್ತುತ ನಮ್ಮ ಸಮಾಜವನ್ನು ವಿಮರ್ಶೆಗೊಳಪಡಿಸಿದ ಸೂಚನೆಯಂತೆ ಭಾಸವಾಗುತ್ತೆ. ಸಾಮಾನ್ಯವಾಗಿ ಧರ್ಮಾತೀತವಾಗಿ ನಎಲ್ಲರೊಳಗೂ ಭಕ್ತಿ, ನಂಬಿಕೆ, ಆಚರಣೆಗಳು ನೆಲೆಗಂಡಿರುತ್ತವೆ. ಆದರೀಗ ಅಂಥಾ ಆಳವಾದ ನಂಬಿಕೆಯ ಬೇರುಗಳಿಗೇ ಕ್ಷುದ್ರ ರಾಜಕಾರಣ ಕೈಯಿಟ್ಟಿದೆ. ಧಾರ್ಮಿಕ ನಂಬಿಕೆಗಳೂ ಕೂಡಾ ರಾಜಕೀಯ ಪುಢಾರಿಗಳ ಪಾಲಿನ ದಾಳವಾಗಿದೆ. ಇಂಥಾ ಸನ್ನಿವೇಶದಲ್ಲಿ ಈವತ್ತಿನ ವಾತಾವರಣಕ್ಕೆ, ಒಳಗೊಳಗೇ ಮಲೆತು ವ್ರಣವಾದ ಧಾರ್ಮಿಕ ಮನೋ ವ್ಯಾಧಿಗೆ ಮದ್ದರೆಯುವ ದೃಶ್ಯದ ಸುಳಿವುಗಳು ನಿಖರವಾಗಿಯೇ ಸಿಕ್ಕಿವೆ.

ಇದು ನಾನಾ ಅಜೆಂಡಾಗಳಿಗನುಗುಣವಾಗಿ ಸಿನಿಮಾಗಳು ತಯಾರಾಗುತ್ತಿರುವ ಪ್ರಕ್ಷಬ್ಧ ಕಾಲಮಾನ. ಇಂಥಾ ವಾತಾವರಣದಲ್ಲಿ ಕಪಟ ನಾಟಕ ಸೂತ್ರಧಾರಿ ಚಿತ್ರತಂಡ ಮನುಷ್ಯತ್ವದ ಭೂಮಿಕೆಯಲ್ಲಿ ಒಂದಿಡೀ ಕಥೆಯನ್ನು ಕಟ್ಟಿ ನಿಲ್ಲಿಸಿದ್ದೇ ಹೌದಾದರೆ ಈ ಸಿನಿಮಾ ಖಂಡಿತವಾಗಿಯೂ ಭಿನ್ನವಾಗಿ ನಿಲ್ಲಬಹುದು. ಸಿನಿಮಾ ಚೌಕಟ್ಟಿನಲ್ಲಿಯೂ ಪ್ರೇಕ್ಷಕರನ್ನು ತಾಕಬಹುದು. ಸದ್ಯಕ್ಕಂತೂ ಈ ಟ್ರೈಲರ್ ಸುತ್ತ ಒಂದಷ್ಟು ಚರ್ಚೆಗಳು ಹುಟ್ಟಿಕೊಂಡಿವೆ. ಒಂದು ಸಿನಿಮಾ ಧರ್ಮದ ಅಮಲಿನಾಚೆಗೊಂದು ಮನುಷ್ಯತ್ವದ ಗಂಧ ಪಸರಿಸುವಂತಾದರೆ ಅದಕ್ಕಿಂತಲೂ ಸಾರ್ಥಕತೆ ಬೇರೊಂದಿಲ್ಲ. ನಿಜಕ್ಕೂ ಈ ಚಿತ್ರ ಆ ಹಾದಿಯಲ್ಲಿ ಮೂಡಿ ಬಂದಿದೆಯಾ ಎಂಬ ಪ್ರಶ್ನೆಗೆ ಜುಲೈ ೪ರಂದು ನಿಖರ ಉತ್ತರ ಸಿಗಲಿದೆ!

#kapata nataka sutradhari ವಿಎಸ್ ಕೆ ಸಿನಿಮಾಸ್ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಲಾಗಿದೆ. ಅಭಿರಾಮ ಅರ್ಜುನ ಈ ಸಿನಿಮಾದ ಬ್ಯುಸಿನೆಸ್ ಹೆಡ್ ಆಗಿ ಕಾರ್ಯ ನಿರ್ವಹಿಸಿರುವುದಲ್ಲದೆ, ಪ್ರಧಾನ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಐಟಿ ವಲಯದಿಂದ ಬಂದಿರುವ ಧೀರಜ್ ಎಂ.ವಿ ಈ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ವೀರೇಶ್ ಎನ್ ಟಿ ಎ ಛಾಯಾಗ್ರಹಣ, ಪ್ರಸನ್ನ ಕುಮಾರ್ ಎಂ.ಎಸ್ ಸಂಗೀತ ನಿರ್ದೇಶನ ಹಾಗೂ ಮುರಳಿ ಶಂಕರ್ ಸಹ ನಿರ್ದೇಶನವಿರುವ ಈ ಚಿತ್ರದಲ್ಲಿ ಹರೀಶ್ ರಂಗರಾವ್ ಕ್ರಿಯೇಟಿವ್ ಹೆಡ್ ಆಗಿ, ವರುಣ್ ಗುರುರಾಜ್ ಪ್ರೊಡಕ್ಷನ್ ಹೆಡ್ ಆಗಿ ಕಾರ್ಯನಿರ್ವಹಿಸಿದ್ದಾರೆ. ಕಪಟ ನಾಟಕ ಸೂತ್ರಧಾರಿ ಜುಲೈ ೪ರಂದು ರಾಜ್ಯಾದ್ಯಂತ ಬಿಡುಗಡೆಗೊಳ್ಳಲಿದೆ.

The post kapata nataka sutradhari trailer review: ಚರ್ಚೆಗೆ ಗ್ರಾಸವಾಯ್ತು ಕಪಟ ನಾಟಕ ಸೂತ್ರಧಾರಿ ಟ್ರೈಲರ್! appeared first on Cini Shodha.

ಇದು ರತನ್ ಗಂಗಾಧರ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರ. ಸೀಸ್ ಕಡ್ಡಿಯ ಗುಣಲಕ್ಷಣಗಳನ್ನೇ ಐದು ಪಾತ್ರವಾಗಿಸಿಕೊಂಡು, ಆ ಮೂಲಕ ಐದು ಕಥನಗಳು ಗರಿಬಿಚ್ಚಿಕೊಳ್ಳುವ ಹೊಸತನದೊಂದಿಗೆ ಈ ಸಿನಿಮಾವನ್ನವರು ದೃಶ್ಯೀಕರಿಸಿದ್ದಾರೆ. ಈ ಹಿಂದೆಯೂ ಕೂಡಾ ಈ ಬಗೆಯ ಪ್ರಯೋಗಗಳು ನಡೆದಿರೋದು ನಿಜ. ಆದರೆ, ಅದೆಲ್ಲದರಾಚೆಗೆ ಹೊಸಾ ಗುಂಗಿಗೊಡ್ಡಿಕೊಳ್ಳುವಂತೆ ಈ ಕಥನವನ್ನು ನಿರೂಪಣೆ ಮಾಡಿರೋದು ಸೀಸ್ ಕಡ್ಡಿಯ ಹೆಚ್ಚುಗಾರಿಕೆ. ನಮಗೆಲ್ಲ ವಿಕ್ರಮ ಬೇತಾಳನ ಕಥೆಗಳು ಬಾಲ್ಯದ ಸಾಥಿಗಳಾಗಿವೆ. ನಮ್ಮೆಲ್ಲರ ಕಲ್ಪನಾ ಶಕ್ತಿಗೆ ಹೊಸಾ ಆವೇಗ ಸಿಕ್ಕಿದ್ದರ ಹಿಂದೆಯೂ ಇಂಥಾ ಕಥೆಗಳ ಋಣವಿದೆ. ಅಂಥಾದ್ದೊಂದು ಮಧುರಾನುಭೂತಿಯನ್ನು ಮತ್ತೆ ಪ್ರೇಕ್ಷಕರ ಬೊಗಸೆಗಿಟ್ಟು ಪುಳಕಗೊಳಿಸುವ ಪ್ರಯತ್ನವೊಂದು ಇಲ್ಲಿ ನಡೆದಂತೆ ಭಾಸವಾಗುತ್ತದೆ.

ಇಲ್ಲಿ ನಾನಾ ಬಗೆಯ ಬದುಕಿನ ಬಿಡಿ ಬಿಡಿ ಚಿತ್ರಗಳಿದ್ದಾವೆ. ಕೊಂಚ ಎಚ್ಚರ ತಪ್ಪಿದರೂ ಚದುಲಿ ಚೆಲ್ಲಾಪಿಲ್ಲಿಯಾಗಬಲ್ಲ ಸಂಕೀರ್ಣ ಕಥೆಯನ್ನು ಒಂದು ಬಿಂದುವಿನಲ್ಲಿ ಹಿಡಿದಿಡುವಲ್ಲಿ, ಒಂದಷ್ಟು ಕೊರತೆಗಳನ್ನೂ ಸಹ್ಯವಾಗಿಸಿಕೊಂಡು ನೋಡಿಸಿಕೊಂಡು ಹೋಗುವಲ್ಲಿ ನಿರ್ದೇಶನದ ಅಸಲೀ ಕಸುಬುದಾರಿಕ ಕಣ್ಣಿಗೆ ಕಟ್ಟುತ್ತೆ. ಇಲ್ಲಿನ ಬಹುತೇಕ ಕಥನಗಳು ಮನಮುಟ್ಟುವಂತಿವೆ. ಕೆಲವೆಡೆಗಳಲ್ಲಿ ನಿಧಾನಗತಿ ಹಾದುಹೋದಂತೆ ಭಾಸವಾದರೂ ಕೂಡಾ, ಒಟ್ಟಾರೆ ಕಥೆಯ ಓಘ ಅದೆಲ್ಲವನ್ನೂ ಸರಿದೂಗಿಸಿಕೊಂಡು ಮುಂದುವರೆಯುತ್ತದೆ. ಯಾವ ಗೊಂದಲ, ಗೋಜಲುಗಳಿಗೂ ಎಡೆಯಿಲ್ಲದಂತೆ, ನೋಡುಗರೆಲ್ಲರಿಗೂ ಅವರವರ ಭಾವಕ್ಕೆ ತಕ್ಕಂತೆ ಕಾಡಬಲ್ಲ ಗುಣಗಳೊಂದಿಗೆ ರತನ್ ಗಂಗಾಧರ್ ಈ ಚಿತ್ರವನ್ನು ಕಟ್ಟಿ ಕೊಟ್ಟಿದ್ದಾರೆ.

ಇಲ್ಲಿ ಸಿನಿಮಾ ಮಂದಿರದಾಚೆಗೂ ಗುಂಗಿನಂತೆ ಕಾಡುವ ಪಾತ್ರಗಳನ್ನು ಸೃಷ್ಟಿಸಿರೋದೇ ಪ್ಲಸ್ ಪಾಯಿಂಟ್. ಆಯಾ ಪಾತ್ರಗಳನ್ನು ಕಲಾವಿದರು ಪರಿಪೂರ್ಣವೆನ್ನಿಸುವಂತೆ ನಿಭಾಯಿಸಿರೋದು ಸೀಸ್ ಕಡ್ಡಿಯ ಅಸಲೀ ಶಕ್ತಿಯಂತೆ ಕಾಣಿಸುತ್ತೆ. ನಿಖರವಾಗಿ ಹೇಳಬೇಕೆಂದರೆ, ಇದು ಒಂದಷ್ಟು ಹೊಸಾ ಸಾಧ್ಯತೆಗಳ ಅನ್ವೇಷಣೆಯಲ್ಲಿ ಆವಿರ್ಭವಿಸಿದಂತಿರೋ ಚಿತ್ರ. ಆ ಮೂಲಕ ನಿರ್ಮಾಪಕ ಸಂಪತ್ ಶಿವಶಂಕರ್ ಅವರ ಸಿನಿಮಾ ಪ್ರೇಮವೂ ಸಾರ್ಥಕ್ಯ ಕಂಡಂತಾಗಿದೆ. ಈಗಾಗಲೇ ಅನೇಕ ಅಂತಾರಾಷ್ಟ್ರೀಯ ಸಿನಿಮೋತ್ಸವಗಳಲ್ಲಿಯೂ ಈ ಸಿನಿಮಾ ಪ್ರದರ್ಶನಗೊಂಡು, ಪ್ರಶಸ್ತಿಗಳನ್ನು ಬಾಚಿಕೊಂಡಿರುವ ಬಗ್ಗೆ ಸುದ್ದಿಗಳು ಜಾಹೀರಾಗಿದ್ದವು. ಈಗಾಗಲೇ ಸಿನಿಮಾ ನೋಡಿದವರ ಮುಖದಲ್ಲಿ ಸೀಸ್ ಕಡ್ಡಿ ಅಂಥಾ ಅರ್ಹತೆ ಹೊಂದಿರುವ ಸಿನಿಮಾ ಎಂಬಂಥಾ ಛಾಯೆ ಕಾಣಿಸುತ್ತಿದೆ. ಅದರ ಅಸಲೀ ಸ್ವಾದವನ್ನು ಸಿನಿಮಾ ಮಂದಿರಗಳಲ್ಲಿಯೇ ಆಸ್ವಾದಿಸಿದರೊಳಿತು…

The post sees kaddi movie review: ಜನಪ್ರಿಯ ಅಲೆಯ ನಡುವಲ್ಲೊಂದು ಕಂಟೆಂಟ್ ಓರಿಯಂಟೆಡ್ ಚಿತ್ರ! appeared first on Cini Shodha.