ರವಿ ಬಿ ಗೌಡ ಈ ಸಿನಿಮಾವನ್ನು ನಿರ್ದೇಶನ ಮಾಡಿ, ನಾಯಕನಾಗಿಯೂ ನಟಿಸಿದ್ದಾರೆ. ಹೀಗೆ ಎರಡೆರಡು ಜವಾಬ್ದಾರಿಗಳನ್ನು ನಿಭಾಯಿಸಿರುವ ರವಿ ಬಿ ಗೌಡ ಇಲ್ಲಿ ಪ್ರಧಾನವಾಗಿ ಹೀರೋಯಿಸಂ ಮೂಲಕ ಒಂದೇ ಏಟಿಗೆ ನೆಲೆ ನಿಲ್ಲುವ ಉತ್ಸಾಹ ತೋರಿದ್ದಾರೆ. ಇಲ್ಲಿನ ಕಥೆ ಟ್ರೈಲರ್ ಕಂಡು ಬಂದಿದ್ದವರನ್ನು ಥ್ರಿಲ್ ಆಗಿಸುವಂತೆ ತೆರೆದುಕೊಳ್ಳುತ್ತೆ. ಕಾಲೇಜಿನ ಕ್ಲಾಸ್ ರೂಮಿಗೆ ಚಿಲಕ ಹಾಕಿಕೊಂಡು, ಬಿಡುಬೀಸಾಗಿ ನಾಯಕ ನಾಯಕಿ ಕಿಸ್ ಮಾಡಿಕೊಳ್ಳೋ ದೃಷ್ಯದೊಂದಿಗೆ ಸಿನಿಮಾ ಶುರುವಾಗುತ್ತೆ. ಆ ಬಳಿಕ ಎಲ್ಲಿಯೂ ನಿಧಾನಗತಿ ಆವರಿಸಿದಂತೆ ನೋಡಿಕೊಂಡಿರೋ ನಿರ್ದೇಶಕ, ಇಂಟರ್ವಲ್‌ಗೂ ಮುಂಚಿನ ಮುಕ್ಕಾಲು ಭಾಗವನ್ನು ಹೀರೋ ಮತ್ತು ಹೀರೋಯಿನ್ನುಗಳ ವೈಲ್ಡ್ ಮನಃಸ್ಥಿತಿ ಅರ್ಥ ಮಾಡಿಸಲೆಂದೇ ಮೀಸಲಿಟ್ಟಿದ್ದಾರೆ.

ಆ ನಂತರ ನಾನಾ ಕೊಂಬೆ ಕೋವೆಗಳೊಂದಿಗೆ, ತಿರುವುಗಳೊಂದಿಗೆ ಚಲಿಸೋ ಕಥೆ ಇಂಟರ್ವೆಲ್ಲಿನ ಟ್ವಿಸ್ಟ್ ಒಂದರ ನಂತರ ಮತ್ತಷ್ಟು ಆವೇಗದಿಂದ ಮುಂದುವರೆಯುತ್ತೆ. ಇದೇ ಹೊತ್ತಿನಲ್ಲಿ ಸಾಲು ಸಾಲಾಗಿ ಮದುವೆಯಾದ ಮಹಿಳೆಯರನ್ನು ಕೊಲೆ ಮಾಡುತ್ತಾ ಸಾಗೋ ಸೈಕೋ ಕಿಲ್ಲರ್‌ನತ್ತ ಕಥೆ ಹೊರಳಿಕೊಳ್ಳುತ್ತೆ. ಆ ಸೈಕೋ ಕಿಲ್ಲರ್ ಯಾರು? ಅವನೇಕೆ ಮದುವೆಯಾದ ನಂತರ ಗಂಡ ಮತ್ತು ಮನೆ ಮಂದಿಯನ್ನು ಕಾಡಿಸುವ ಮಹಿಳೆಯರನ್ನು ಮಾತ್ರವೇ ಹುಡುಕಿ ಕೊಲ್ಲುತ್ತಾನೆ? ಇಂಥಾ ಪ್ರಶ್ನೆಗಳಿಗೆ ಸಿನಿಮಾ ಮಂದಿರದಲ್ಲಷ್ಟೇ ಉತ್ತರ ಹುಡುಕೋದೊಳಿತು. ಪ್ರಧಾನವಾಗಿ, ನಿರ್ದೇಶಕ ರವಿ ಬಿ ಗೌಡ ತಾನು ಈ ಸಿನಿಮಾ ಮೂಲಕವೇ ಥೇಟು ವಿಜಯ್ ದೇವರಕೊಂಡನಂತೆ ಮಿಂಚುವ ಆಸೆ ಹೊಂದಿದ್ದಂತಿದೆ. ಅದೇ ಭರದಲ್ಲಿ ಷದೃಷ್ಯ ಕಟ್ಟುತ್ತಾ ಸಾಗಿರುವ ರವಿ, ಹೀರೋಗಿರಿ, ಬಿಲ್ಡಪ್ಪಿನ ಭರಾಟೆಯಲ್ಲಿ ನಿರ್ದೇಶನದ ಕುಸುರಿಯನ್ನೇ ಆಯಕಟ್ಟಿನ ಜಾಗಗಳಲ್ಲಿ ಮರೆತು ಬಿಟ್ಟಿದ್ದಾರೆ. ಅದುವೇ ಈ ಸಿನಿಮಾವನ್ನು ಆವರೇಜಿನ ಮಟ್ಟ ಮುಟ್ಟಲೂ ಆಗದಂತೆ ತಡೆದು ಬಿಟ್ಟಿದೆ.

ಒಟ್ಟಾರೆ ಸಿನಿಮಾದುದ್ದಕ್ಕು ಅರ್ಜುನ್ ರೆಡ್ಡಿ ಛಾಠಯೆಯಿದೆ. ರವಿ ಉಪ್ಪಿ ಗರಡಿಯಲ್ಲಿ ಪಳಗಿದ್‌ದರಿಂದಾಗಿಯೇ ಉಪೇಂದ್ರರ ಎ ಸಿನಿಮಾದ ಛಾಯೆ ಡೈಲಾಗುಗಳಲ್ಲಿ, ರವಿಯ ನಟನೆಯಲ್ಲಿ ಕಾಣಿಸುತ್ತೆ. ರವಿ ಮೊದಲ ಸಿನಿಮಾದಲ್ಲಿಯೇ ನಾಯಕನಾಗಿ, ಅಭಿನಯದ ಮೂಲಕ ಗೆದ್ದಿದ್ದಾರೆ. ಆದರೆ ನಿರ್ದೇಶಕನಾಗಿ ಸೋತು ಬಿಟ್ಟಿದ್ದಾರೆ. ಇಡೀ ಕಥೆಯ ಮುಖ್ಯ ಬಿಂದುವಿಗೆ ತಲುಪೋದಕ್ಕೀತ ಭರ್ತಿ ಎರಡು ಗಂಟೆ ವ್ಯಯಿಸಿದ್ದಾರೆ. ಆದರೆ, ಒಂದಷ್ಟು ಕೊರತೆಗಳ ಮೂಲಕ ಅದು ವ್ಯರ್ಥವೆಂಬ ಭಾವ ಪ್ರೇಕ್ಷಕರನ್ನು ಮುತ್ತಿಕೊಳ್ಳುತ್ತೆ. ಇದರಾಚೆಗೆ ಈವತ್ತಿನ ಸಮಾಜದಲ್ಲಿ ಕೆಲ ಹೆಣ್ಣುಮಕ್ಕಳು ಕೌಟುಂಬಿಕ ದೌರ್ಜನ್ಯದ ಕಾನೂನನ್ನು ದುರ್ಭಳಕೆ ಮಾಡಿಕೊಳ್ಳೋದರ ವಿರುದ್ಧ ಸಮರ್ಥ ಸಂದೇಶ ದಾಟಿಸಿದ್ದಾರೆ. ಅಷ್ಟರ ಮಟ್ಟಿಗೆ ಈ ಚಿತ್ರ ಸಾರ್ಥಕ್ಯ ಕಂಡಿದೆ.

ಇನ್ನುಳಿದಂತೆ ಅಜನೀಶ್ ಲೋಕನಾಥ್ ಈ ಚಿತ್ರದ ಸಂಗೀತ ನಿರ್ದೇಶಕನಾಗಿ ಕಾರ್ಯನಿರ್ವಹಿಸಿದ್ದಾರೆ. ಕಾಂತಾರ ಮೂಲಕ ವಿಶ್ವ ಮಟ್ಟದಲ್ಲಿ ಗಮನ ಸೆಳೆದಿರುವವರು ಅಜನೀಶ್. ಆದರೆ, ಈ ಚಿತ್ರಕ್ಕೆ ಮಾತ್ರ ಅವರು ತೀರಾ ಬುರ್ನಾಸು ಸಂಗೀತ ಕೊಟ್ಟಿದ್ದಾರೆ. ಯಾವ ಹಾಡುಗಳೂ ಚೆಂದಗಿಲ್ಲ. ಹಿನ್ನೆಲೆ ಸಂಗೀತವೂ ಕಳಪೆ. ಒಂದು ಸಿನಿಮಾ ಒಪ್ಪಿಕೊಂಡ ಮೇಲೆ ಅದಕ್ಕೆ ಪ್ರಾಮಾಣಿಕವಾಗಿ ನ್ಯಾಯ ಒದಗಿಸಬೇಕೆಂಬ ವೃತ್ತಿ ಧರ್ಮವನ್ನೇ ಅಜನೀಶ್ ಮರೆತಂತಿದೆ. ಇನ್ನುಳಿದಂತೆ ರವಿ ಬಿ ಗೌಡ ಸೇರಿದಂತೆ, ನಾಯಕಿ ವಿಜೇತಾ ಫರೀಕ್, ರವಿಶಂಕರ್, ಅವಿನಾಶ್, ಅರುಣಾ ಬಾಲರಾಜ್ ಮುಂತಾದವರು ತಂತಮ್ಮ ಪಾತ್ರವನ್ನು ಆವಾಹಿಸಿಕೊಂಡು ನಟಿಸಿದ್ದಾರೆ. ಆದರೆ, ನಿರ್ದೇಶಕನಾಗಿ ಒಂದೊಳ್ಳೆ ಕಥೆ ಕೈಗೆತ್ತಿಕೊಂಡಿದ್ದ ರವಿ ಅದರಲ್ಲಿ ಸೋತಿದ್ದಾರೆ. ಈ ಕಾರಣದಿಂದಲೇ ಒಂದು ಮಟ್ಟ ಮುಟ್ಟಬಹುದಾಗಿದ್ದ ಐ ಯಾಮ್ ಗಾಡ್ ಆ ಅವಕಾಶದಿಂದ ವಂಚಿತವಾಗಿದೆ!

The post I Am God Movie Review: ಕೌಟುಂಬಿಕ ದುರಂತಕ್ಕೆ ಕನ್ನಡಿಯಾದ ಕಥೆ! appeared first on Cini Shodha.

ಈ ಹಿಂದೆ ಕೆಮಿಸ್ಟ್ರಿ ಆಫ್ ಕರಿಯಪ್ಪ ಅಂತೊಂದು ಸಿನಿಮಾ ಮೂಲಕ ಗಮನ ಸೆಳೆದಿದ್ದ ಕುಮಾರ್ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಲವ್ ಯೂ ಮುದ್ದು ಒಂದಷ್ಟು ನಿರೀಕ್ಷೆ ಮೂಡಿಸಿದ್ದರ ಹಿಂದೆ ಈ ವಿಚಾರವೂ ಕೆಲಸ ಮಾಡಿರೋದು ಸುಳ್ಳಲ್ಲ. ಆದರೆ, ಇಂಥಾ ನಿರೀಕ್ಷೆಯ ಭಾರ ಹೊತ್ತು ಮುನ್ನಡೆದ ನಿರ್ದೇಶಕರು ಅಲ್ಲಲ್ಲಿ ಎಡವಿದ್ದಾರೆ. ಮತ್ತೆ ಸಾವರಿಸಿಕೊಂಡುಮುಂದುವರೆದರೂ ಕೂಡಾ ಯಾವುದಕ್ಕೆ ಪ್ರಾಧಾನ್ಯತೆ ಕೊಡಬೇಕು, ಹೇಗೆ ಮುಂದುವರೆಯಬೇಕೆಂಬ ನಿಖರ ದಾರಿ ಕಾಣದಂತೆ ತಬ್ಬಿಬ್ಬಾಗಿ ನಿಲ್ಲುತ್ತಾರೆ. ಒಂದಿಡೀ ಸಿನಿಮಾದ ಎಲ್ಲ ಕೊರತೆಗಳನ್ನೂ ಮಾಫಿ ಮಾಡುವಂತೆ ತೀವ್ರವಾಗಿ ಕಟ್ಟಬೇಕಿದ್ದ ದೃಷ್ಯಗಳ ವಿಚಾರದಲ್ಲಿ ನಿರ್ದೇಶಕರು ಅಕ್ಷರಶಃ ಅಸಹಾಯಕರಂತೆ ಕೈಚೆಲ್ಲಿದ್ದಾರೆ. ಇದೆಲ್ಲದರಾಚೆಗೂ ಲವ್ ಯೂ ಮುದ್ದು ಪ್ರೇಕ್ಷಕರ ಕಣ್ಣಾಲಿಗಳು ತುಂಬಿ ಬರುವಂತೆ ಮಾಡುತ್ತೆ. ಬಹುಶಃ ಅದು ಪರಿಶುದ್ಧ ಪ್ರೇಮಕ್ಕಿರೋ ಅಸಲೀ ಶಕ್ತಿಯೇನೋ…

ಹಾಗೆ ನೋಡಿದರೆ, ಈ ಸಿನಿಮಾಕ್ಕಾಗಿ ನಿರ್ದೇಶಕರು ಆಯ್ದುಕೊಂಡಿದ್ದ ಅಸಲೀ ಕಥೆಯೇ ಚೆಂದಗಿದೆ. ಆದರೆ, ಅದನ್ನು ದೃಷ್ಯಕ್ಕೆ ಒಗ್ಗಿಸುವಾಗಿನ ಕುಸುರಿಯಲ್ಲಿ ಒಂದಷ್ಟು ಕಸಿವಿಸಿಗಳು ಘಟಿಸಿವೆ. ಲವಲವಿಕೆಯಿಂದಲೇ ಆರಂಭವಾಗುವ ಈ ಚಿತ್ರದ ಒಂದಷ್ಟು ಸಮಯವನ್ನು ನಿರ್ದೇಶಕರು ನಾಯಕ ನಾಯಕಿಯನ್ನು ಪ್ರೇಮಿಗಳಾಗಿ ನೋಡುಗರ ಮನಸಿಗೆ ಛಾಪಿಸುದಕ್ಕೆ ಮೀಸಲಿಟ್ಟಿದ್ದಾರೆ. ಆ ನಂತರದಲ್ಲಿ ಒಂದಿಡೀ ಕಥೆ ಒಂದಷ್ಟು ತಿರುವುಗಳೊಂದಿಗೆ ಮುನ್ನಡೆಯುತ್ತೆ. ಅನಿರೀಕ್ಷಿತವಾಗಿ ಒಂದಾಗಿ ಜೀವದಂತೆ ಹಚ್ಚಿಕೊಂಡ ಈ ಪ್ರೇಮಿಗಳ ಬಾಳಲ್ಲಿ ನಡೆಯೋ ದುರಂತ, ಅದಕ್ಕೆ ಹೊಸೆದುಕೊಂಡಂತಿರೋ ನಾಯಕನ ತಂದೆಯ ನಿಗೂಢ ನಡೆ, ಅಪಘಾತದಿಂದ ದೇಹದ ಒಂದು ಭಾಗದ ಚಲನೆಯನ್ನೇ ಕಳೆದುಕೊಳ್ಳೋ ನಾಯಕಿ, ಆಕೆಯನ್ನು ಉಳಿಸಿಕೊಳ್ಳಲು ನಾಯಕ ನಡೆಸೋ ಹರಸಾಹಸ… ಇಂಥಾ ಮನಮಿಡಿಯೋ ಕಥನದೊಂದಿಗೆ ಸಿನಿಮಾ ಸಾಗುತ್ತೆ.

ಚಿತ್ರವೇನೂ ಸಲೀಸಾಗಿ ಮುನ್ನಡೆದಂತೆ ಕಾಣಿಸುತ್ತೆ. ನಾಯಕನಾಗಿ ನಟಿಸಿರೋ ಸಿದ್ದು ಮೂಲಿಮನಿ ಮತ್ತು ನಾಯಕಿ ರೇಷ್ಮಾ ನಟನೆಯೂ ಚೆನ್ನಾಗಿದೆ. ಆದರೆ, ಆ ಪಾತ್ರಗಳಿಗೆ ಅವರು ಹೊಂದಿಕೆಯಾಗುತ್ತಿಲ್ಲ ಎಂಬ ಭಾವ ಪ್ರೇಕ್ಷಕರನ್ನು ಕಾಡುತ್ತೆ. ತಾರಾಗಣದ ಆಯ್ಕೆಯಲ್ಲಿಯೇ ನಿರ್ದೇಶಕರು ಎಡವಿದರಾ ಅಂತೊಂದು ಗುಮಾನಿ ನೋಡುಗರ ಮನಸಲ್ಲಿ ಗಿರಕಿ ಹೊಡೆಯುತ್ತೆ. ಹಾಗಂತ ನಾಯಕ ನಾಯಕಿಯನ್ನು ದೂರುವಂತಿಲ್ಲ. ಯಾಕೆಂದರೆ, ಅವರು ತಂತಮ್ಮ ಪಾತ್ರಕ್ಕೆ ಸಮರ್ಪಿಸಿಕೊಂಡಿದ್ದಾರೆ. ಆದರೂ ಕೊರತೆ ಕಾಡಿದ್ದರ ಹಿಂದಿರೋದು ಆಯ್ಕೆಯಲ್ಲಿನ ದೋಷವಷ್ಟೆ. ಇದೆಲ್ಲದರ ನಡುವೆ ಕೆಲ ಹಾಸ್ಯ ಸನ್ನಿವೇಶಗಳನ್ನು ತೂರಿಸುವ ಮೂಲಕ ಮತ್ತಷ್ಟು ಗೋಜಲು ಮೂಡಿಸಲಾಗಿದೆ. ಕ್ಲೈಮ್ಯಾಕ್ಸ್ ಹೊತ್ತಿನ ಬಹುಮುಖ್ಯ ದೃಷ್ಯಕ್ಕೆ ಇಡೀ ಚಿತ್ರಮಂದಿರವೇ ಹುಚ್ಚೆದ್ದು ಸಂಭ್ರಮಿಸಬೇಕಿತ್ತು. ಆದೃಷ್ಯ ಅಷ್ಟು ಪರಿಣಾಮಕಾರಿಯಾಗೋ ಅವಕಾಶ ತಪ್ಪಿಸಿಕೊಂಡಿದ್ದರೂ ಪ್ರೇಕ್ಷಕರಿಗೆ ಒಂದಷ್ಟು ನಾಟುವಂತಿದೆ.

ಇಂಥಾ ಪ್ರೇಮಕಥಾನಕಗಳಲ್ಲಿ ನಾಯಕ ನಾಯಕಿಯ ಕೆಮಿಸ್ಟ್ರಿ ಹೊಂದಾಣಿಕೆಯಾದರೆ ಮಾತ್ರ ಸಿನಿಮಾ ಗೆಲ್ಲಬಹುದು. ಸಪ್ತಸಾಗರದಾಚೆ ಎಲ್ಲೋ ಚಿತ್ರದಲ್ಲಿ ರಕ್ಷಿತ್ ಮತ್ತು ರುಕ್ಮಿಣಿ ನಡುವಿನ ಕೆಮಿಸ್ಟ್ರಿಯೇ ಗೆಲುವಿನ ಮೂಲ. ಆದರೆ, ಯಾವ ಸೀನುಗಳಲ್ಲಿಯೂ ಲವ್ ಯೂ ಮುದ್ದು ಚಿತ್ರದಲ್ಲಿ ಅದು ಸಾಧ್ಯವಾಗಿಲ್ಲ. ಇದ್ದುದರಲ್ಲಿ ಸಮುದ್ರದಂಚಿನ ಸೀನುಗಳಲ್ಲಿ ಈ ಜೋಡಿ ಪ್ರೇಕ್ಷಕರನ್ನು ಆವರಿಸಿಕೊಳ್ಳುತ್ತೆ. ಅದಕ್ಕೆ ಕಾರಣವಾಗಿರೋದು ಸಿನಿಮಾಟೋಗ್ರಫಿ. ಈ ವಿಚಾರದಲ್ಲಿ ಕೃಷ್ಣ ದೀಪಕ್ ಅವರ ಕೈಚಳಕ ಅಚ್ಚರಿ ಮೂಡಿಸುತ್ತೆ. ಇನ್ನುಳಿದಂತೆ ಯಾವುದೇ ಪ್ರೇಮ ಕಥೆ ಗೆಲ್ಲವಬೇಕೆಂದರೆ ಅದರಲ್ಲಿ ಹಾಡುಗಳ ಪಾತ್ರ ದೊಡ್ಡದು. ಅನಿರುದ್ಧ ಶಾಸ್ತ್ರಿ ಆ ವಿಚಾರದಲಲಿ ಸೋತಿದ್ದಾರೆ. ಹಾಡುಗಳಾಗಲಿ, ಹಿನ್ನೆಲೆ ಸಂಗೀತವಾಗಲು ಮನಸಿಗಿಳಿಯುವಂತಿಲ್ಲ. ಇಂಥಾ ಹಲವಾರು ತಪ್ಪುಗಳಾಚೆಗೆ ಅಸಲೀ ಕಥೆಯನ್ನು ಹಾಗೆಯೇ ತೆರೆ ಮೇಲೆ ತಂದಿದ್ದರೂ ನಿರ್ದೇಶಕರು ಪ್ರೇಕ್ಷಕರನ್ನು ಮತ್ತಷ್ಟು ಮುದಗೊಳಿಸಬಹುದಿತ್ತು. ಅಂತೂ ಒಂದೊಳ್ಳೆ ಕಥೆ, ಸಂದೇಶದೊಂದಿಗೆ ಈ ಪ್ರೇಮ ಕಥನದ ಪರಾಗ ಪ್ರೇಕ್ಷಕರ ಮನಸಿಗೆ ಮೆತ್ತಿಕೊಳ್ಳುವಂತಿದೆ!

The post Love You Muddu Movie Review: ಚೆಂದದ ಕಥೆ ಸೇರಿದಂತೆ ಎಲ್ಲವೂ ಇದೆ; ಆದರೆ..! appeared first on Cini Shodha.

ನಿರ್ದೇಶನ: ಚಂದ್ರಮೌಳಿ
ತಾರಾಗಣ: ರಾಮ್ ಗೌಡ, ಅದಿತಿ ಪ್ರಭುದೇವ, ಡಿಂಪಲ್ ಹಯಾತಿ, ಸಾಯಿಕುಮಾರ್, ಶರತ್ ಲೋಹಿತಾಶ್ವ
ರೇಟಿಂಗ್: 2.5

ಟ್ರೈಲರ್ ಮೂಲಕವೇ ಒಂದು ವರ್ಗದ ಪ್ರೇಕ್ಷಕ ವಲಯದಲ್ಲಿ ಕುತೂಹಲ ಮೂಡಿಸುತ್ತಲೇ, ಪಡ್ಡೆ ಹೈಕಳ ಹೃದಯದಲ್ಲಿ ಸಂಚಲನ ಸೃಷ್ಟಿಸಿದ್ದ ಚಿತ್ರ ದಿಲ್ ಮಾರ್. ಈ ಸಿನಿಮಾ ಆರಂಭಿಕವಾಗಿ ಪ್ರೇಕ್ಷಕರನ್ನು ಸೆಳೆದುಕೊಂಡಿದ್ದಕ್ಕೆ ಟ್ರೈಲರ್ ಮಾತ್ರವೇ ಕಾರಣ ಅಂದುಕೊಳ್ಳುವಂತಿಲ್ಲ. ಕೆಜಿಎಫ್‌ನಂಥಾ ಸೂಪರ್ ಹಿಟ್ ಸಿನಿಮಾದ ಸಂಭಾಷಣಾ ಕಾರರಾಗಿಕ ಹೆಸರಾಗಿದ್ದ ಚಂದ್ರಮೌಳಿ ದಿಲ್ ಮಾರ್ ಮೂಲಕ ನಿರ್ದೇಶಕರಾಗಿದ್ದರು. ಕೆಜಿಎಫ್‌ನಂಥಾದ್ದೊಂದು ಬಿಗ್ ಹಿಟ್ ಸಿನಿಮಾದ ಭಾಗವಾದವರು ನನ್ನು ಮಾಡಹೊರಟರೂ ಪ್ರೇಕ್ಷಕರಲ್ಲೊಂದು ಕುತೂಹಲ ಮೂಡಿಸೋದು ಸಹಜ. ಅಂಥಾ ಕೌತುಕದ ಒಡ್ಡೋಲಗದಲ್ಲಿ ದಿಲ್ ಮಾರ್ ತೆರೆಗಂಡಿದೆ. ಅದರ ಕಥನ, ಅದು ಮೂಡಿಸೋ ಫೀಲ್ ಮತ್ತು ಒಟ್ಟಾರೆ ಸಿನಿಮಾವನ್ನು ಚಂದ್ರಮೌಳಿ ಕಟ್ಟಿಕೊಟ್ಟಿರುವ ರೀತಿಯೆಲ್ಲವೂ ನೋಡುಗರನ್ನು ಸೆಳೆದಿದೆ. ಆದರೆ, ಅವರೆಲ್ಲರನ್ನೂ ಕೂಡಾ ಇದು ಈ ಕಾಲಘಟ್ಟದಲ್ಲಿ ಬಿಡುಗಡೆಗೊಳ್ಳವಂಥಾ ಸಿನಿಮಾವಲ್ಲ ಎಂಬ ವಿಚಿತ್ರ ಭಾವವೊಂದು ಅನಾಯಾಸವಾಗಿ ಅಪ್ಪಿಕೊಂಡಿದೆ!

ಚಂದ್ರಮೌಳಿ ಮೊದಲ ಹೆಜ್ಜೆಯಲ್ಲಿಯೇ ಸಿಕ್ಸರ್ ಬಾರಿಸುವ ಉಮೇದಿನೊಂದಿಗೆ ಈ ಸಿನಿಮಾವನ್ನು ಕಟ್ಟಿಕೊಟ್ಟಿರೋದು ಪ್ರತೀ ಫ್ರೇಮುಗಳಲ್ಲಿಯೂ ಕಣ್ಣಿಗೆ ರಾಚುತ್ತೆ. ಅವರ ಪ್ರಯತ್ನದಲ್ಲಿ ಯಶವನ್ನೂ ಕಂಡಿದ್ದಾರೆ. ಸೀನುಗಳು ಸರಿದಾಗೆಲ್ಲ ಪುಟಿದೇಳುವ ಪಂಚಿಂಗ್ ಡೈಲಾಗುಗಳು, ಲವ್ವು, ಫೈಟ್ ಸೀನುಗಳು ಈ ಸಿನಿಮಾವನ್ನು ಕಿಮರ್ಶಿಯಲ್ ಚೌಕಟ್ಟಿನಲ್ಲಿ ಸಮೃದ್ಧಗೊಳಿಸಿವೆ. ತಾನೋರ್ವ ಹೊಸಾ ಹೀರೋನನ್ನು ಲಾಂಚ್ ಮಾಡುತ್ತಿರುವ ವಿಚಾರವನ್ನ ಮರೆತೇ ಬಿಟ್ಟಂತೆ ಚಂದ್ರಮೌಳಿ ಆ ಪಾತ್ರವನ್ನು ಕೇಜಿಗಟ್ಟಲೆ ಪಂಚಿಂಗ್ ಡೈಲಾಗುಗಳಿಂದ ಶೃಂಗರಿಸಿದ್ದಾರೆ. ತಮ್ಮ ಪಾಲಿನ ಅಷ್ಟೂ ಕೆಲಸವನ್ನು ನೋಡುಗರೆಲ್ಲ ಅಹುದಹುದೆನ್ನುವಂತೆ ಮಾಡಿದ್ದರೂ ಕೂಡಾ, ಅತೀ ಮುಖ್ಯ ವಿಚಾರವೇ ಅದೇಕೋ ಚಂದ್ರಮೌಳಿಯ ತಲೆಗೆ ಹೊಳೆಯದೆ ಯಡವಟ್ಟು ಸಂಭವಿಸಿದಂತಿದೆ!

ಈ ಸಿನಿಮಾ ಮಂಗಳೂರಿನಲ್ಲೋರ್ವ ರೌಡಿಯ ಕೊಲೆಯ ಸನ್ನಿವೇಶದೊಂದಿಗೆ ತೆರೆದುಕೊಳ್ಳುತ್ತೆ. ಹಾಗೆ ಕೊಲೆಯಾದವನ ಅಣ್ಣ ಭಾರ್ಗವನ ಪರಿಚಯವನ್ನೂ ಕೂಡಾ ನಿರ್ದೇಶಕರು ಪಂಚಿಂಗ್ ಡೈಲಾಗುಗಳ ಮೂಲಕವೇ ಮಾಡಿಸುತ್ತಾರೆ. ಆ ನಂತರದ ದೃಷ್ಯ ಮತ್ತದೇ ಡೈಲಾಗ್ ಕಮಾಲಿನೊಂದಿಗೆ ತೆರೆದುಕೊಳ್ಳೋದು ಮೇಲುಕೋಟೆಯಲ್ಲಿ. ಅಲ್ಲಿಯೇ ಹೀರೋ ಎಂಟ್ರಿಯಾಗುತ್ತೆ. ಏಕಾಏಕಿ ಆ ಊರ ಗೌಡನ ಮನೆಗೆ ನುಗ್ಗೋ ನಾಯಕ ಹುಡುಗಿಯೊಬ್ಬಳ ಹೆಸರು ಕೂಗುತ್ತಾ ಅರಚಾಡೋ ನಾಯಕನಿಗೆ ಆಕೆಯ ಅಣ್ಣ ಸಾಯಡಿಯುತ್ತಾನೆ. ಯಾಕೆಂದರೆ, ಹೀರೋ ಅದೆಷ್ಟು ಸಲ ಹೊಡೆಸಿಕೊಂಡರೂ ಮತ್ತೆ ಮತ್ತೆ ಆಕೆಯನ್ನು ಪ್ರೀತಿಸುವಂತೆ ಪೀಡಿಸುತ್ತಿರುತ್ತಾನೆ. ಇಂಥಾ ನಾಯಕನಿಗೆ ಅದಕ್ಕೂ ಮುನ್ನವೇ ಹುಡುಗಿಯೊಬ್ಬಳೊಂದಿಗೆ ಹೇಗೆ ಲವ್ವಾಗಿರುತ್ತೆ? ಖುದ್ದು ಆ ಸುಂದರಿಯೇ ಬಳಿ ಬಂದರೂ ಬ್ರೈನಿನ ಮಾತು ಕೇಳದ, ಮೆದುಳು ಹೇಳಿದಕ್ಕೆ ತದ್ವಿರುದ್ಧ ಪಥದಲ್ಲಿ ಸಾಗಿದ್ದ ಈತ ಅದೇ ಹುಡುಗಿಯ ಮೋಹಕ್ಕೆ ಬೀಳಲು ಕಾರಣವೇನು? ಆತನ ವ್ಯಕ್ತಿತ್ವಕ್ಕೆ ಸೈಕೋ ಪದರ ಮೆತ್ತಿದ ವಿಕ್ಷಿಪ್ತ ಅಧ್ಯಾತ್ಮದ ಮೂಲ ಯಾವುದು?

ಮೊದಲ ಹುಡುಗಿ ತಾನೇ ಪೀಡಿಸಿ ಪ್ರೀತಿಸೆಂದರೂ ಕೊಸರಿಕೊಂಡಿದ್ದ ನಾಯಕ ಯಾಕೆ ಮದುವೆ ನಿಗಧಿಯಾಗಿದ್ದ ಮತ್ತೋರ್ವ ಹುಡುಗಿಯನ್ನು ಬೆಂಬಿದ್ದು ಕಾಡಿಸುತ್ತಾನೆ? ಅಷ್ಟಕ್ಕೂ ಮೊದಲ ಹುಡುಗಿಯ ಬರ್ಭರ ಸಾವಿಗೆ ಕಾರಣವೇನು? ರೌಡಿ ಭಾರ್ಗವ ನಾಯಕನ ಮೇಲೆ ರೊಚ್ಚಿಟ್ಟುಕೊಂಡು ಕೊಲ್ಲಲು ಮುಗಿಬೀಳೋದ್ಯಾಕೆ? ಇಂಥಾ ಎಲ್ಲ ಪ್ರಶ್ನೆಗಳಿಗೂ ರೋಚಕ ಉತ್ತರವೆಂಬಂತೆ ನಿರ್ದೇಶಕರು ಈ ಸಿನಿಮಾವನ್ನು ಕಟ್ಟಿ ಕೊಟ್ಟಿದ್ದಾರೆ. ಕಥೆಯ ವಿಚಾರಕ್ಕೆ ಬಂದರೂ ಗಟ್ಟಿತನವಿದೆ. ಪಾತ್ರವನ್ನು ಸೃಷ್ಟಿಸೋ ವಿಚಾರದಲ್ಲಿಯೂ ಚಂದ್ರಮೌಳಿಯ ಕುಸುರಿ ಬೆರಗು ಮೂಡಿಸುತ್ತೆ. ಪಂಚಿಂಗ್ ಡೈಲಾಗುಗಳಲ್ಲಿಯಂತೂ ಎಲ್ಲವನ್ನೂ ಆವರಿಸುವ ಉಮೇದಿನಲ್ಲಿ ನಿರ್ದೇಶಕರು ವಿಜೃಂಭಿಸಿದ್ದಾರೆ. ಟ್ರೈಲರ್ ನೋಡಿ ಆ ಮೂಲಕ ಕುತೂಹಲ ಮೂಡಿಸಿಕೊಂಡು ಯಾರೇ ಹೋದರೂ ಈ ಸಿನಿಮಾ ಖಂಡಿತವಾಗಿಯೂ ಮೋಸ ಮಾಡೋದಿಲ್ಲ!

ಇಷ್ಟಿದ್ದ ಮೇಲೆ ದಿಲ್ ಮಾರ್ ಹೌಸ್ ಫುಲ್ ಪ್ರದರ್ಶನ ಕಂಡು ಸೂಪರ್ ಹಿಟ್ ಆಗಬೇಕಲ್ಲಾ? ಇಂಥಾ ಪ್ರಶ್ನೆ ನಿಮ್ಮನ್ನು ಕಾಡಸಿದರೆ ಉತ್ತರವೆಂಬುದು ನಿರಾಶಾದಾಯಕವಾಗಿದೆ. ಯಾಕೆಂದರೆ, ಕೆಜಿಎಫ್‌ನಂಥಾ ಈ ಕಾಲಮಾನದ ಸೂಪರ್ ಹಿಟ್ ಚಿತ್ರದ ಭಾಗವಾಗಿದ್ದ ನಿರ್ದೇಶಕ ಚಂದ್ರಮೌಳಿ, ದಿಲ್ ಮಾರ್ ಚಿತ್ರವನ್ನು ಇಂದಿನ ವಾತಾವರಣಕ್ಕೆ ತಕ್ಕುದಾಗಿ ರೂಪಿಸುವಲ್ಲಿ ಎಡವಿದ್ದಾರೆ. ಇಲ್ಲಿ ಚಂದ್ರಮೌಳಿ ಪ್ರದರ್ಶಿಸಿರೋದು ನಿರ್ದೇಶಕರ ಪಿಎನ್ ಸತ್ಯ ಬ್ರ್ಯಾಂಡಿನ ಫಾರ್ಮುಲಾವನ್ನು. ಪಾತ್ರಗಳನ್ನು ಡೈಲಾಗಿನ ಬಿಲ್ಡಪ್ಪುಗಳ ಮೂಲಕವೇ ಹಿಡಿದೆತ್ತೋದು ಸತ್ಯ ಶೈಲಿ. ಅದು ದಶಕಗಳ ಹಿಂದೆ ಸರಿಕಟ್ಟಾಗಿಯೇ ಪರಿಣಾಮ ಬೀರುತ್ತಿತ್ತು. ದರ್ಶನ್, ಸುದೀಪ್, ಶಿವಣ್ಣನಂಥಾ ನಟರೂ ಕೂಡಾ ಅಂಥಾ ಫಾರ್ಮುಲಾವನ್ನು ನೆಚ್ಚಿಕೊಂಡೇ ಸ್ಟಾರ್‌ಡಂ ಪಡೆದುಕೊಂಡಿದ್ದರು. ಆದರೆ, ಅದರ ಪಟ್ಟುಗಳೆಲ್ಲ ದಶಕದ ಹಿಂದೆಯೇ ಸವಕಲಾಗಿದೆ.

ಗಮನೀಯ ಅಂಶವೆಂದರೆ, ಹೊಸಾ ಹೀರೋನ ಎಂಟ್ರಿಯ ಸಿನಿಮಾದಲ್ಲಿ ಇಂಥಾ ಬಿಲ್ಡಪ್ ಡೈಲಾಗುಗಳು ಭಾರವೆನ್ನಿಸುತ್ತವೆ. ಈ ಕಾರಣದಿಂದಲೇ ನವನಾಯಕ ರಾಮ್ ಗೌಡ ಅತ್ಯಂತ ಎನರ್ಜಿಯಿಂದ, ಅಚ್ಚುಕಟ್ಟಾಗಿ ಪಾತ್ರವನ್ನು ನಿರ್ವಹಿಸಿದ್ದರೂ ಕೂಡಾ ಅದು ಗೆಲುವಾಗಿ ರೂಪಾಂತರಗೊಳ್ಳುವಲ್ಲಿ ಎಡವಿದಂತಾಗಿದೆ. ಓವರ್ ಬಿಲ್ಡಪ್ಪಿನ ಪ್ರಭೆಯೇ ಅವರ ಪಾಲಿಗೆ ಒಜ್ಜೆಯಾದಂತೆ ಭಾಸವಾಗುತ್ತದೆ. ಇದೆಲ್ಲದರಾಚೆ, ಈ ಸಿನಿಮಾವೇನಾದರೂ ಈಗೊಂದು ಐದತ್ತು ವರ್ಷಗಳ ಹಿಂದೆ ಬಂದಿದ್ದರೆ, ಆ ದಿನಗಳಲ್ಲಿ ಸ್ಟಾರುಗಳಾಗಿದ್ದ ದರ್ಶನ್, ಸುದೀಪ್‌ರಂಥಾ ನಟರು ನಾಯಕರಾಗಿದ್ದರೆ ಈ ಸಿನಿಮಾ ಖಂಡಿತವಾಗಿಯೂ ನೂರು ದಿನಗಳ ಭರ್ಜರಿ ಪ್ರದರ್ಶನ ಕಾಣುತ್ತಿತ್ತು. ಆದರೆ, ಈಗ ಸೋಶಿಯಲ್ ಮೀಡಿಯಾ ಅಲೆದಯಿಂದ ಪ್ರೇಕ್ಷಕರೇ ಅಪ್‌ಡೇಟಾಗಿದ್ದಾರೆ. ಈ ಹಂತದಲ್ಲಿ ದಿಲ್‌ಮಾರ್ ಚಿತ್ರಕ್ಕೆ ಸ್ಟಾರ್ ನಟರು ಹೀರೋ ಆಗಿದ್ದರೂ ಬಚಾವಾಗೋದು ಕಷ್ಟವೇ!
ಓರ್ವ ನಿರ್ದೇಶಕನಾಗಿ ಕಥೆಯ ಸೃಷ್ಟಿ, ಪಾತ್ರಗಳನ್ನು ರೂಪಿಸುವಿಕೆ ಸೇರಿದಂತೆ ಎಲ್ಲದರಲ್ಲಿಯೂ ಚಂದ್ರಮೌಳಿ ಗೆದ್ದಿದ್ದಾರೆ. ಆದರೆ, ಈವತ್ತಿನ ಪ್ರೇಕ್ಷಕರಿಗೆ ತಕ್ಕುದಾಗಿ ಈ ಸಿನಿಮಾವನ್ನು ಕಟ್ಟಿ ಕೊಡೋದರಲ್ಲಿ ಸೋತಿದ್ದಾರೆ. ಇಂಥಾ ಹಿನ್ನಡೆಯನ್ನು ಹೊರತಾಗಿಸಿ ನೋಡಿದರೆ, ನವ ನಾಯಕ ರಾಮ್ ಗೌಡ ಅತ್ಯಂತ ಸವಾಲಿನದ್ದಾದ ಈ ಪಾತ್ರವನ್ನು ಪೋಶಿಸುವಲ್ಲಿ ಗೆದ್ದಿದ್ದಾರೆ. ನಾಯಕಿಯರಾದ ಅದಿತಿ ಪ್ರಭುದೇವ ಮತ್ತು ಡಿಂಪಲ್ ಹಯಾತಿ ತಂತಮ್ಮ ಪಾತ್ರಗಳಿಗೆ ನ್ಯಾಯ ಸಲ್ಲಿಸಿದ್ದಾರೆ. ಇತ್ತೀಚೆಗೆ ನೇಪಥ್ಯಕ್ಕೆ ಸರಿದಂತಿದ್ದ ಸಾಯಿಕುಮಾರ್ ಭಾರ್ಗವ ಎಂಬ ಪಾತ್ರದಲ್ಲಿ ವಿಲನ್ ಆಗಿ ಅಕ್ಷರಶಃ ಅಬ್ಬರಿಸಿದ್ದಾರೆ. ಕಡಿಮೆ ಕಾಲಾವಧಿಯಿದ್ದರೂ ನಾಯಕಿಯ ತಂದೆಯ ಪಾತ್ರದ ಮೂಲಕ ಶರತ್ ಲೋಹಿತಾಶ್ವ ಮನಸಿಗಿಳಿಯುತ್ತಾರೆ. ನಿರ್ದೇಶಕನಾಗಿ ಪ್ರತೀ ಸೂಕ್ಷ್ಮಗಳನ್ನೂ ಸಮರ್ಥವಾಗಿ ನಿಭಾಯಿಸಿರುವ ಚಂದ್ರಮೌಳಿ ಅದ್ಯಾಕೆ ದಶಕದ ಹಿಂದಿನ ಸವಕಲು ಫಾರ್ಮುಲಾವನ್ನು ನೆಚ್ಚಿಕೊಂಡರೋ… ಸಿನಿಮಾ ನೋಡಿದವರನ್ನೆಲ್ಲ ಅಂತಿಮವಾಗಿ ಅದೊಂದು ಪ್ರಶ್ನೆ ವಿಷಾಧದಂತೆ ಆವರಿಸಿಕೊಳ್ಳುತ್ತೆ!

The post Dilmaar Movie Review: ಕಜಿಎಫ್ ಖ್ಯಾತಿಯ ಪ್ರಭೆಯಲ್ಲಿ ಕೇಜಿಗಟ್ಟಲೆ ಸಂಭಾಷಣೆ! appeared first on Cini Shodha.

ನಿರ್ದೇಶನ: ರಾಜ್ ವಿಜಯ್
ತಾರಾಗಣ: ಗೋಪಾಲ ದೇಶಪಾಂಡೆ, ಬಾಲಾಜಿ ಮನೋಹರ್, ರಾಜ್ ವಿಕ್ಕಿ, ವಿಶ್ವನಾಥ್ ಮಂಡಲಿಕ, ಶಿವ್ ಮಂಜು, ಗಿರೀಶ್ ಎಂ.ಎನ್ 

ರೇಟಿಂಗ್: 2.5

ಪ್ರಚಾರದ ಅಬ್ಬರವಿಲ್ಲದೆ ತಣ್ಣಗೆ ತೆರೆಗಂಡಿರುವ ಸಿನಿಮಾ ಗ್ರೀನ್. ಒಂದಷ್ಟು ಮಂದಿಗೆ ದೀಪಾವಳಿಯ ಆಸುಪಾಸಲ್ಲಿ ಇಂಥಾದ್ದೊಂದು ಸಿನಿಮಾ ತೆರೆಗಂಡಿರುವ ವರ್ತಮಾನವೇ ತಲುಪಿಕೊಂಡಿರಲಿಕ್ಕಿಲ್ಲ. ಆದರೆ, ಆರಂಭಿಕವಾಗಿ ವಿಭಿನ್ನ ಪೋಸ್ಟರ್ ಮೂಲಕ ಈ ಸಿನಿಮಾ ಪ್ರೇಕ್ಷಕರನ್ನು ಸೆಳೆದಿತ್ತು. ಅದರ ಬೆನ್ನಲ್ಲಿಯೇ ಅಂತಾರಾಷ್ಟ್ರೀಯ ಸಿನಿಮೋತ್ಸವಗಳಲ್ಲಿ ಪ್ರರ್ಶನ ಕಂಡು ಪ್ರಶಸ್ತಿ ಬಾಚಿಕೊಂಡ ಬಗ್ಗೆಯೂ ಸುದ್ದಿಗಳು ಹರಿದಾಡಿದ್ದವು. ಟೀಸರ್ ಬಿಡುಗಡೆಯಾದ ನಂತರವಂತೂ ಗ್ರೀನ್ ತಾನೇ ತಾನಾಗಿ ಸುದ್ದಿ ಕೇಂದ್ರಕ್ಕೆ ಬಂದು ನಿಂತಿತ್ತು. ಇದೊಂದು ಹಾರರ್ ಸಿನಿಮಾ ಇರಬಹುದಾ ಎಂಬ ಕುತೂಹಲ, ವಿಶೇಷವಾದದ್ದೇನೋ ಕಥೆಯಿರಬಹುದೆಂಬ ಚರ್ಚೆಗಳ ನಡುವೆ ಸದ್ದಿಲ್ಲದೆ ಈ ಸಿನಿಮಾ ತೆರೆಗಂಡಿದೆ.

ಒಂದು ಕಾಲದಲ್ಲಿ ಎಲ್ಲೋ ಗೋಡೆ ಮೇಲೆ ಅಂಟಿಸಿದ್ದ ಪೋಸ್ಟರ್ ಭಿನ್ನವಾಗಿದ್ದರೆ, ಟೈಟಲ್ಲು ವಿಶೇಷವಾಗಿದ್ದರೆ ಆಸುಪಾಸಿನ ಸಿನಿಮಾ ಮಂದಿರಕ್ಕೆ ನುಗ್ಗುವ ಪ್ರೇಕ್ಷಕ ವರ್ಗವೊಂದಿತ್ತು. ಈಗ ಓಟಿಟಿ, ಮೊಬೈಲ್ ಜಮಾನಾ ಚಾಲ್ತಿಯಲ್ಲಿದ್ದರೂ ಕೂಡಾ ಗ್ರೀನ್ ಮೂಲಕ ಅಂಥಾ ಪ್ರೇಕ್ಷಕ ವರ್ಗ ಅಲ್ಲಲ್ಲಿ ಪ್ರತ್ಯಕ್ಷವಾಗುತ್ತಿದೆ. ಹಾಗೊಂದು ಕುತೂಹಲದ ಸೆಳವಿಗೆ ಸಿಕ್ಕು ಸಿನಿಮಾ ಮಂದಿರ ತಲುಪಿದವರನ್ನು ಈ ಚಿತ್ರ ತನ್ನೊಳಗೆ ಎಳೆದುಕೊಂಡು, ತಾನೇ ಹೊರದಬ್ಬಿ, ಮತ್ತೆ ಸೆಳೆದುಕೊಳ್ಳುವ ಚಿತ್ರವಿಚಿತ್ರ ಅನುಭವಗಳನ್ನು ಕೊಡಮಾಡುತ್ತದೆ. ಅಲ್ಲಲ್ಲಿ ಬೇರ್‍ಯಾವುದೋ ಸಿನಿಮಾಗಳ ಛಾಯೆ ಇದ್ದರೂ ನಿರ್ದೇಶಕ ರಾಜ್ ವಿಜಯ್ ಭಿನ್ನವಾದ ಕಥನವನ್ನೇ ಆಯ್ದುಕೊಂಡಿದ್ದಾರೆ. ಆದರೆ, ಸಿನಿಮಾ ನೋಡಿ ಹೊರಬಂದ ಮೇಲೂ ಅತ್ತ ಪೂರ್ಣ ತೃಪ್ತಿಯೂ ಅಲ್ಲದ, ಇತ್ತ ಸಂಪೂರ್ಣವಾಗಿ ಅತೃಪ್ತವೂ ಅಲ್ಲದ ತ್ರಿಶಂಕು ಭಾವವೊಂದು ಮನೆತನಕವೂ ಹಿಂಬಾಲಿಸುತ್ತೆ!

ಪೊಲೀಸ್ ಅಧಿಕಾರಿಯೋರ್ವ ಸುಶೀಲಾ ಬೇಗ ಸಿಕ್ಬಿಡಮ್ಮ ಅನ್ನೋ ಸ್ವಗತದೊಂದಿಗೆ ಕಾರಿನಲ್ಲಿ ಕಾಡೊಂದನ್ನು ಪ್ರವೇಶಿಸುವ ಮೂಲಕ ಈ ಸಿನಿಮಾ ತೆರೆದುಕೊಳ್ಳುತ್ತದೆ. ಹಾಗೆ ಆ ಕಾರು ಗೊಂಡಾರಣ್ಯವನ್ನ ಪ್ರವೇಶಿಸೋ ದೃಷ್ಯವಿದೆಯಲ್ಲಾ? ಅದು ಇದರ ಸಿನಿಮಾಟೋಗ್ರಾಫರ್ ಯಾರು ಅಂತೊಂದು ಬೆರಗನ್ನ ನೋಡುಗರೊಳಗೆ ಮಿಸುಕಾಡುವಂತೆ ಮಾಡುತ್ತೆ. ಅಂಥಾದ್ದೊಂದು ಛಳುಕು ಮೂಡಿಸೋ ಕೈಚಳಕದ ಮೂಲಕ ಈ ಚಿತ್ ಛಾಯಾಗ್ರಾಹಕ ಮಧುಸೂಧನ್.ಕೆ ಗಮನಸೆಳೆಯುತ್ತಾರೆ. ಆ ನಂತರ ತೆರೆದುಕೊಳ್ಳೋದು ಚಿತ್ರವಿಚಿತ್ರ ಜಗತ್ತು. ಹಾಗೆ ಕಾಡೊಳಗೆ ಪ್ರವೇಶಿಸುವ ಜೀಪ್ ಕೆಟ್ಟು ನಿಂತಾಗ ಆ ಅಧಿಕಾರಿ ಕ್ಯಾನ್ ಹಿಡಿದು ನೀರನ್ನರಸುತ್ತಾ ಸುತ್ತಾಡಿ, ನೀರನ್ನು ತುಂಬಿ ತಂದು ಜೀಪಿಗೆ ಹಾಕಿ ಹೊರಟವನು ತನ್ನೊಂದಿಗೆ ತಾನೇ ಮಾತಾಡುವ ಮೂಲಕ ಆ ಕಾಡಿನ ನಿಗೂಢವನ್ನ, ಆತ ಅದರೊಳಗೆ ಹೊರಟಿರುವ ಉದ್ದೇಶದ ಸುಳಿವು ಬಿಟ್ಟು ಕೊಡುತ್ತಾನೆ.

ಅಲ್ಲಿಂದ ತುಸು ದೂರ ಹೊರಟವನಿಗೆ ಬುಡ್ಡಯ್ಯನ ಹೆಂಡದಂಗಡಿ ಸಿಗುತ್ತೆ. ಕುರುಡ ಬುಡ್ಡಯ್ಯನಿಗೆ ಓರ್ವ ಹೆಂಗಸಿನ ಫೋಟೋ ತೋರಿಸಿ, ಅವರಿಬ್ಬರ ನಡುವೆ ಮಾತುಕತೆ ನಡೆಯುತ್ತಿರುವಾಗಲೇ ಮಗ್ಗುಲ ದಿಕ್ಕಿನಿಂದ ರಣಭೀಕರ ಘರ್ಜನೆಯೊಂದು ಕೇಳಿ ಬರುತ್ತೆ. ಆ ಭೀಕರ ಸದ್ದಿನಿಂದ ಹೆದರೋ ಆ ಅಧಿಕಾರಿ ಒಂದೇ ಸಮನೆ ಓಡಲು ಶುರುವಿಟ್ಟುಕೊಂಡಂತೆಯೇ, ಆ ಕಾಡಿನ ಮತ್ತೊಂದು ಪಾರ್ಶ್ವದ ಹೂ ಗಿಡಗಳ ನರ್ಸರಿಯ ಚಿತ್ರಣ ತೆರೆದುಕೊಳ್ಳುತ್ತೆ. ಅಲ್ಲೊಬ್ಬ ವಿಜ್ಞಾನಿಗಳ ಬಳಸೋ ಮಾಸ್ಕ್ ಧರಿಸಿದಾತ ಅದರ ಮಾಲಕನಂತೆ ಕಾಣಿಸುತ್ತಾನೆ. ಅಲ್ಲಿರುವ ವೀಲ್ ಚೇರಿನ ಆಸಾಮಿ ಯಾರು, ಆ ಕಾಡೊಳಗಿಂದ ಹೊರ ಹೋಗುವ ಧಾವಂತದೊಂದಿಗೆ ಬ ಡಬಡಿಸುವ ಗೋಪಾಲ್ ದೇಶಪಾಂಡೆಯ ಪಾತ್ರವೇನು? ಅದೇ ನರ್ಸರಿಯ ಒಡಲಲ್ಲಿರೋ ಮತ್ತೊಂದು ನರ್ಸರಿಯ ನಿಗೂಢವೇನು? ಅದೇ ನರ್ಸರಿ ವಾತಾವರಣದಲ್ಲಿರೋ ಮರದ ಬೇರುಗಳು ಹೆಣದ ರುಚಿ ಅಂಟಿಸಿಕೊಂಡಿದ್ದೇಕೆ? ಸಾವೇ ಇಲ್ಲದಂತೆ ಮಾಡಬಲ್ಲ ಹೂವಿನ ರಸದ ರಹಸ್ಯವೇನು? ಅಲ್ಲಿನ ಮರಗಳು ಹೇಗೆ ರಾತ್ರೋರಾತ್ರಿ ಒಂದು ಕಡೆಯಿಂದ ಮತ್ತೊಂದೆಡೆಗೆ ಚಲಿಸುತ್ತವೆ? ಅಲ್ಲಿ ನಡೆಯೋ ನಿಗೂಢ ಸಾವುಗಳ ಹಿಂದಿರೋ ಮರ್ಮವೇನೆಂಬುದು ಒಟ್ಟಾರೆ ಸಿನಿಮಾದ ಸಾರ.

ಕನ್ನಡದ ಮಟ್ಟಿಗೆ ಇಲ್ಲಿರೋದು ಭಿನ್ನ ಕಥೆ ಮತ್ತು ಅದಕ್ಕೆ ತಕ್ಕುದಾದ ನಿರೂಪಣೆ. ಇದು ಮಿಸ್ಟೀರಿಯಸ್ ಮೈಂಡ್ ಬೆಂಡಿಂಗ್ ಥ್ರಿಲ್ಲರ್ ಜಾನರಿನ ಚಿತ್ರ. ಇದರ ವಿಶೇಷತೆಯೆಂದರೆ ಕಣ್ಣೆದುರೇ ಗೋಜಲಾಗಿ, ಸಿಕ್ಕು ಸಿಕ್ಕಾಗಿ ದೃಷ್ಯಗಳು ಸರಿಯುತ್ತವೆ. ಕಥೆ ಕೂಡಾ ಆ ಸಿಕ್ಕುಗಳ ಜೊತೆಗೇ ಸಾಗುತ್ತೆ. ಇಂಥಾ ಸಿನಿಮಾಗಳನ್ನು ನೋಡಿ ಅರಗಿಸಿಕೊಳ್ಳುವುದಕ್ಕೂ ಒಂದಷ್ಟು ವಿಶೇಷ ಗುಣಗಳೇ ಬೇಕಾಗುತ್ತವೆ. ಕಡೇ ತನಕವೂ ಕಣ್ಣೆದುರು ಏನಾಗುತ್ತಿದೆ, ಯಾವ ಪಾತ್ರದ ಚಹರೆಗಳೇನು, ಕಥೆ ಯಾವ ದಿಕ್ಕಿನತ್ತ ಚಲಿಸುತ್ತಿದೆ ಎಂಬ ಸುಳಿವೇ ಸಿಗುವುದಿಲ್ಲ. ಅಂಥಾ ಗೊಂದಲಗಳನ್ನೂ ಕೂಡಾ ನೋಡುಗರಿಗೆ ಅಸಹನೆ ಮೂಡದಂತೆ, ದೃಷ್ಯದಿಂದ ದೃಷ್ಯಕ್ಕೆ ಕುತೂಹಲ ತೀವ್ರಗೊಳ್ಳುವಂತೆ ಎಚ್ಚರ ವಹಿಸೋದು ಇಂತಾ ಸಿನಿಮಾಗಳ ನಿರ್ದೇಶನದ ದೊಡ್ಡ ಸವಾಲು. ದೃಷ್ಯಗಳು, ಕಥೆ ಅದೆಷ್ಟೇ ಸಿಕ್ಕುಗಟ್ಟಿದರೂ ಅದರ ಮೂಲ ಸೂತ್ರದ ಮೇಲೆ ನಿರ್ದೇಶಕನ ಹಿಡಿತ ತಪ್ಪುವಂತಿಲ್ಲ. ಒಂದು ವೇಳೆ ತಪ್ಪಿತೆಂದರೆ ಕ್ಲೈಮ್ಯಾಕ್ಸ್ ಅದೆಷ್ಟೇ ಅದ್ಭುತವಾಗಿದ್ದರೂ ಪ್ರೇಕ್ಷಕನಿಗೆ ತಾಕುವುದಿಲ್ಲ.

ಗ್ರೀನ್ ಚಿತ್ರದ ವಿಚಾದರಲ್ಲಿ ಹೇಳೋದಾದರೆ, ಎಲ್ಲವನ್ನೂ ರೋಚಕವಾಗಿಸುವ ಭರದರಲ್ಲಿ ಆ ಸೂತ್ರವೆಂಬುದು ನಿರ್ದೇಶಕರ ಕೈ ತಪ್ಪಿದಂತಿದೆ. ಇಲ್ಲಿ ಹೆಜ್ಜೆ ಹಜ್ಜೆಗೂ ಬೆರಗಾಗಿಸಬಲ್ಲ, ಬೆಚ್ಚಿ ಬೀಳಿಸುವ ಅಂಶಗಳಿದ್ದಾವೆ. ಕೆಲವೊಂದು ದೃಷ್ಯಗಳು ಹಾಲಿವುಡ್ ಸಿನಿಮಾವೊಂದರ ನೇರ ಪ್ರಭಾವದಿಂದ ಸೃಷ್ಟಿಯಾದಂತೆ ಭಾಸವಾಗುತ್ತದೆ. ಈ ಊಹಾತ್ಮಕ ವ್ಯೂಹಕ್ಕೆ ಸಿಕ್ಕ ಪ್ರೇಕ್ಷಕರ ಮೆದುಳು ಕ್ಲ್ಯಾಕ್ಸಿನ ಹೊತ್ತಿಗೆಲ್ಲ ಮರಗಟ್ಟಿದಂತಾಗುತ್ತದೆ. ಇದರ ದೆಸೆಯಿಂದಲೇ ರೋಮಾಂಚಕವಾಗಿರುವ ಕ್ಲೈಮ್ಯಾಕ್ಸಿನ ಅನುಭೂತಿಯನ್ನು ಎದುರುಗೊಳ್ಳುವ ಶಕ್ತಿಯನ್ನು ನೋಡುಗರು ಕಳೆದುಕೊಂಡಿರುತ್ತಾರೆ. ಮುಕ್ತಾಯದ ಹೊತ್ತಿಗೆಲ್ಲ ಮನುಷ್ಯರ ಹೆಣ ತಿನ್ನುವ ವಿಚಿತ್ರ ಮರ ಕಾಡುತ್ತೆ. ಅಷ್ಟರಲ್ಲಿ ಆ ನರಭಕ್ಷಕ ಮರದ ಕೊಂಬೆಯಲ್ಲಿ ನೇತುಬಿದ್ದಿರುವ ಬೊಂಬೆಗಳೆಲ್ಲ ನಮ್ಮದೇ ಹೆಣವೆಂಬಂತೆ ಭಾಸವಾಗಲಾರಂಭಿಸುತ್ತೆ. ಅಂಥಾ ವಿಕ್ಷಿಪ್ತ ಭಾವವೊಂದು ಸಿನಿಮಾ ಮಂದಿರದಿಂದ ಹೊರಬಿದ್ದು ಮನೆವರೆಗೂ ಹಿಂಬಾಲಿಸುತ್ತೆ!

The post Green Movie Review: ಮಿಸ್ಟೀರಿಯಸ್ ಮೈಂಡ್ ಬೆಂಡಿಂಗ್ ಥ್ರಿಲ್ಲರ್‌ನ ವಿಕ್ಷಿಪ್ತ ಅನುಭವ! appeared first on Cini Shodha.

ಹೇಳಿಕೇಳಿ (janardhan reddy) ಜನಾರ್ಧನ ರೆಡ್ಡಿ ನೆಲ ಬಗೆಯುತ್ತಾ ಏಕಾಏಕಿ ಕೋಟಿ ಕೋಟಿ ಗುಂಜಿಕೊಂಡವನು. ಇಂಥವನಿಗೆ ಓರ್ವ ನಟ ಸಿನಿಮಾ ರಂಗದಲ್ಲಿ ಸರ್ಕಸ್ಸು ನಡೆಸುತ್ತಾ, ಸ್ಟಾರ್ ನಟನಾಗಿ ನೆಲೆ ಕಾಣೋದು ಅದೆಷ್ಟು ಸುದೀರ್ಘವಾದ, ತ್ರಾಸದಾಯಕ ಪ್ರಯಾಣವೆಂಬ ಅರಿವಿರಲು ಸಾಧ್ಯವೇ? ಅಂಥಾದ್ದೊಂದು ಸೈರಣೆಯನ್ನು ಗಾಲಿ ರೆಡ್ಡಿಯಿಂದಾಗಲಿ, ಅವನ ಮಗ (kireeti) ಕಿರೀಟಿಯಿಂದಾಗಲಿ ನಿರೀಕ್ಷೆ ಮಾಡೋದೇ ಮುಠ್ಠಾಳತನ. ಇದನ್ನಿಲ್ಲಿ ಪ್ರಸ್ತಾಪಿಸುತ್ತಿರೋದಕ್ಕೆ ಕಾರಣ ಇಲ್ಲದಿಲ್ಲ. ಜ್ಯೂನಿಯರ್ ಸಿನಿಮಾ ನೋಡಿದ ಯಾರಿಗಾದರೂ ಒಂದೇ ಸಿನಿಮಾದಲ್ಲಿ ಕಿರೀಟಿಯನ್ನು ಸ್ಟಾರ್ ನಟನಾಗಿ ನೆಲೆಗಾಣಿಸುವ ಹಳವಂಡ ಕಣ್ಣಿಗೆ ರಾಚುತ್ತೆ.

ಹಾಗೆ ನೋಡಿದರೆ, ಇಲ್ಲಿ ಕೈಗೆತ್ತಿಕೊಂಡಿರುವ ಕಥೆ ಚೆನ್ನಾಗಿದೆ ಅಂತನ್ನಿಸಿದರೂ ಅದರಲ್ಲಿ ಹೊಸತನವೇನಿಲ್ಲ. ಯಾವ ಘಟ್ಟದಲ್ಲಿಯೂ ಕಥೆಯ ಭಾಗ ವಾಹ್ ಅನ್ನಿಸೋದಿಲ್ಲ. ಪಾತ್ರ ವರ್ಗ ಮತ್ತು ಕಲಾವಿದರು ಅದಕ್ಕೆ ಜೀವ ತುಂಬಿರುವ ರೀತಿಯನ್ನೂ ಮೆಚ್ಚಿಕೊಳ್ಳಬಹುದು. ಆದರೆ, ಕಿರೀಟಿಗೆ ಹಾಡು ಮಾತ್ರವಲ್ಲದೇ ಪ್ರತಿಯೊಂದಕ್ಕೂ ಬಿಲ್ಡಪ್ಪಿ ಕೊಡುವ ದರ್ದಿಗೆ ಬಿದ್ದಿರುವ ನಿರ್ದೇಶಕರು, ಕಥೆಯ ಮೂಲ ಸತ್ವದ ಕತ್ತು ಹಿಸುಕಿದ್ದಾರೆ. ಹಾಡುಗಳಲ್ಲಿ ಎನರ್ಜಿಟಿಕ್ ಆಗಿ ಕಾಣಿಸಿಕೊಂಡಿರುವ ಕಿರೀಟಿ, ನಟನೆ ಅಂತ ಬಂದಾಗ ಬಸವಳಿದಂತೆ ಕಾಣಿಸುತ್ತಾನೆ. ಗಣಿಗಳ್ಳ ರೆಡ್ಡಿ ಇದುವರೆಗೆ ಗೋರಿಕೊಂಡಿರುವ ಕಾಸನ್ನೆಲ್ಲ ಗುಡ್ಡೆ ಹಾಕಿದರೂ ಕೂಡಾ, ಕಿರೀಟಿ ನಟನಾಗಿ ಪಳಗೋದಕ್ಕೆ ಇನ್ನೂ ಸಾಕಷ್ಟು ಸಮಯ ಬೇಕಾಗುತ್ತದೆ.

ಅಷ್ಟಕ್ಕೂ ಜನಾ ರೆಡ್ಡಿಯಂಥಾ ಬೇನಾಮಿ ಆಸ್ತಿ ಹೊಂದಿರೋ ಖದೀಮರ ಮಕ್ಕಳು ಹೇಗೆ ಬೇಕಾದರೂ ತಯಾರಿ ನಡೆಸಬಹುದು. ಕಿರೀಟಿ ಕೂಡಾ ನೃತ್ಯ ಸೇರಿದಂತೆ ಒಂದಷ್ಟು ಬಗೆಯಲ್ಲಿ ಶ್ರಮ ಹಾಕಿದ್ದಾನೆ. ಆ ಕಾರಣದಿಂದಲೇಬ ಜ್ಯೂನಿಯರ್ ಇದ್ದುದರಲ್ಲಿಯೇ ಒಂದಷ್ಟು ಸಹ್ಯವೆನಿಸುತ್ತೆ. ಅಷ್ಟರ ಮಟ್ಟಿಗೆ ರೆಡ್ಡಿಮಗ ಕಿರೀಟಿಯನ್ನು ಮೆಚ್ಚಿಕೊಳ್ಳಬಹುದು. ಇದೆಲ್ಲದರಾಚೆಗೆ ಗಣಿಗಳ್ಳನ ಪುತ್ರನ ಸಿನಿಮಾದ ಬಗ್ಗೆ ಬೇರೇನೂ ಹೇಳಲಾಗೋದಿಲ್ಲ. ಒಂದು ಕಾಲದಲ್ಲಿ ಹಡಬೆ ಕಾಸಿಂದ ಒಂದಿಡೀ ರಾಜಕೀಯವನ್ನು ಹಡಾಲೆಬ್ಬಿಸಿದ್ದವನು, ಅಳಿದುಳಿದಿದ್ದ ಮೌಲ್ಯಗಳನ್ನು ಗಣಿಧೂಳಿನಲ್ಲಿ ಉಸಿರುಗಟ್ಟಿಸಿದ್ದವನು ಗಾಲಿ ಜನಾರ್ಧನ ರೆಡ್ಡಿ. ಇಂಥವನ ಮಗ ಹೀರೋ ಆದರೆ ಅದು ಕೆಡುಕಾಗಿಯಷ್ಟೇ ಕಾಣಿಸಲು ಸಾಧ್ಯ!

The post junior movie review: ಗಣಿಗಳ್ಳನ ಮಗನ ಸಿನಿಮಾ ಹೀಗಿದೆ! appeared first on Cini Shodha.

ಈ ಹಿಂದೆ (yuva rajkumar) ಯುವ ರಾಜ್ ಕುಮಾರ್ ಪೊರಕೆ ಹಿಡಿದು ನಿಂತ ಪೋಸ್ ಒಂದು ಪ್ರೇಕ್ಷಕರನ್ನು ಎದುರುಗೊಂಡಿತ್ತು. ಅದು ಥೇಟು (powerstar puneethrajkumar) ಪವರ್ ಸ್ಟಾರ್ ಪುನೀತರ್ ರಾಜ್ ಕುಮಾರ್ ನಟಿಸಿದ್ದ ಜಾಕಿ (jackie movie) ಸಿನಿಮಾವನ್ನು ಕಾಪಿ ಹೊಡೆದಂತಿತ್ತು. ಹೇಳಿಕೇಳಿ ಅಪ್ಪು ಉತ್ತರಾಧಿಕಾರಿ ಎಂಬಂತೆ ಬಿಂಬಿಸಿಕೊಂಡಿರುವಾತ ಯುವ. ಅದರ ಭಾಗವಾಗಿಯೇ ಇಂಥಾದ್ದೊಂದು ಅವತಾರ ಸೃಷ್ಟಿಯಾಗಿರಬಹುದು ಅಂತನ್ನಿಸಿತ್ತು. ಆದರೀಗ ಸಿನಿಮಾ ನೋಡಿದ ಮಂದಿಗೇ ಒಟ್ಟಾರೆ ಎಕ್ಕ ಮೂಡಿ ಬಂದಿರುವ ರೀತಿಯಲ್ಲಿಯೂ ಕೂಡಾ ಜಾಕಿಯ ಛಾಯೆ ಢಾಳಾಗಿದೆ ಅನ್ನಿಸಿದೆ. ಹಾಗಂತ ಎಕ್ಕದಲ್ಲಿರೋದು ಮತ್ತದೇ ಕಥೆಯಾ ಅಂದುಕೊಂಡರೆ ಅದು ಪಕ್ಕಾ ಸುಳ್ಳು. ಕಥೆ ಹೊಸತೇ ಆದರೂ, ಅದು ದೃಶ್ಯರೂಪ ಪಡೆದ ರೀತಿ ಮಾತ್ರ ಹಳೇ ಜಾಡಿನದ್ದೇ!

ಸಮೃದ್ಧ ಹಳ್ಳಿಯೊಂದರಲ್ಲಿ ತನ್ನದೇ ಲೋಕದಲ್ಲಿ ವಿಹರಿಸುತ್ತಿದ್ದ ಯುವಕ ಮುತ್ತು. ಮಗು ಮನಸಿನ ಈತ ಒಲ್ಲದ ಮನಸ್ಸಿಂದಲೇ ಊರು ಬಿಟ್ಟು ಬೆಂಗಳೂರು ಸೇರಿಕೊಂಡ ನಂತರ ಗರಿಬಿಚ್ಚಿಕೊಳ್ಳುವ ಕಥನವೇ ಎಕ್ಕದ ಅಸಲೀ ಜೀವಾಳ. ಹಾಗೆ ಬೆಂಗಳೂರು ಸೇರಿಕೊಂಡ ಮುತ್ತುವಿನ ಬದುಕಲ್ಲಿ ಎಂತೆಂಥಾ ಘಟನೆಗಳು ನಡೆಯುತ್ತವೆ? ಹಳ್ಳಿಗಾಡಿನ ಮುಗ್ಧತೆಯನ್ನು ಮೈಗೂಡಿಸಿಕೊಂಡು ಬೆಳೆದ ಮುತ್ತು ಮಾಸ್ ಅವತಾರವೆತ್ತಲು ಕಾರಣವೇನು? ಇಂಥಾ ಪ್ರಶ್ನೆಗಳಿಗೆ ಸಿನಿಮಾ ಮಂದಿರದಲ್ಲೇ ಉತ್ತರ ಹುಡುಕಿದರೊಳಿತು. ಆದರೆ, ನಿರ್ದೇಶಕ ರೋಹಿತ್ ಪದಕಿ ತಾಂತ್ರಿಕವಾಗಿ ಎಕ್ಕವನ್ನು ಶ್ರೀಮಂತಿಕೆಯಿಂದ ಕಟ್ಟಿ ಕೊಟ್ಟಿದ್ದರಾದರೂ, ಯುವನನ್ನು ಮಾಸ್ ಲುಕ್ಕಿನಲ್ಲಿ ಬಿಂಬಿಸುವ ಭರಾಟೆಯಲ್ಲಿ ಈ ಕಥೆಯ ಭಾವನಾತ್ಮಕ ಸನ್ನಿವೇಶಗಳೇ ಮಂಕಾಗುವಂತೆ ಮಾಡಿದ್ದಾರೆ. ಭಾವನಾತ್ಮಕ ಸನ್ನಿವೇಶಗಳೆಲ್ಲ ಮಾಸ್ ಸೀನುಗಳಲ್ಲು ಕಲೆಸಿಕೊಂಡು ಎರಡೂ ಕೂಡಾ ಪ್ರೇಕ್ಷಕರ ಮನಸಿಗೆ ತಾಕದೆ ಪೇಲವ ಭಾವವನ್ನಷ್ಟೇ ಮೂಡಿಸುತ್ತೆ.

ಇನ್ನು ಪಾತ್ರ ಕಟ್ಟುವ ವಿಚಾರದಲ್ಲಿ (rohit padaki) ರೋಹಿತ್ ಪದಕಿಯದ್ದು ಗಮನಾರ್ಹ ಪ್ರಯತ್ನ. ಖುದ್ದು ರೋಹಿತ್ ಅವರಿಗೆ ಮಾಸ್ ಕಥನ ಹೊಸತು. ತಮ್ಮ ಆತ್ಮದ ಅಭಿರುಚಿಯನ್ನು ಮಾಸ್ ಧಾಟಿಯೊಂದಿಗೆ ಸರಿದೂಗಿಸುವಲ್ಲಿ ಅವರು ಅಲ್ಲಲ್ಲಿ ಬ ಲಾಲೆನ್ಸು ತಪ್ಪಿದಂತೆ ಭಾಸವಾಗುತ್ತೆ. ಇನ್ನು ಸಾಹಿತ್ಯದ ನಂಟು ಹೊಂದಿರುವ (vikram hathwar) ವಿಕ್ರಮ್ ಹತ್ವಾರ್ ಕಥೆಯೊಂದಿಗೆ ಸಂಭಾಷಣೆಯಲ್ಲಿಯೂ ಈ ಚಿತ್ರಕ್ಕೆ ಸಾಥ್ ಕೊಟ್ಟಿಯದ್ದಾರೆ. ಇಂಥಾ ಸಾಹಿತ್ಯಕ ಹಿನ್ನೆಲೆಯವರು ಸಿನಿಮಾರಂಗಕ್ಕೆ ಎಂಟ್ರಿ ಕೊಟ್ಟಾಗ ಸಹಜವಾಗಿಯೇ ನಿರೀಕ್ಷೆ ಮೂಡುತ್ತೆ. ಹತ್ವಾರ್ ಈ ಚಿತ್ರದ ಕಥೆ ಚಿತ್ರಕಥೆ ಮತ್ತು ಸಭಾಷಣೆಗಳ ಭಾಗವಾಗಿದ್ದಾರೆ.

ಇನ್ನುಳಿದಂತೆ ಎಕ್ಕ ಚಿತ್ರದ ವಿಚಾರದಲ್ಲಿ ಯುವ ರಾಜ್ ಕುಮಾರ್ ನಟನೆಯತ್ತ ಎಲ್ಲರ ಚಿತ್ತ ನೆಟ್ಟುಕೊಂಡಿತ್ತು. ಯಾಕೆಂದರೆ, ಮೊದಲ ಚಿತ್ರ ಯುವದಲ್ಲಿ ಆತನ ನಟನೆಯ ಬಗ್ಗೆ ದೊಡ್ಡ ಮಟ್ಟದಲ್ಲಿಯೇ ಅಪಸ್ವರ ಕೇಳಿ ಬಂದಿತ್ತು. ಜೊತೆಗೆ ಆ ಸಿನಿಮಾ ಭೂಮಿಕೆಯಲ್ಲಿಯೇ ವಿವಾದವೂ ತಲೆಯಿತ್ತಿತ್ತು. ಅಷದರ ಬೆನ್ನಲ್ಲಿಯೇ ಎಕ್ಕ ಚಿತ್ರ ಘೋಷಣೆಯಾಗಿದ್ದರಿಂದ ಅದರ ಬಗೆಗೊಂದು ಕುತೂಹಲವಿತ್ತು. ಈ ಸಿನಿಮಾ ಮಟ್ಟಿಗೆ ಹೇಳೋದಾದರೆ, ಯುವನ ನಟನೆಯಲ್ಲಿ ಒಂದಷ್ಟು ಸಕಾರಾತ್ಮಕ ಬೆಳವಣಿಗೆ ಕಾಣಿಸುತ್ತದೆ. ಆದರೆ, ಓರ್ವ ನಾಯಕ ನಟನಾಗಿ ನೆಲೆ ಕಂಡುಕೊಳ್ಳಬೇಕೆಂದರೆ, ಯುವ ನಟನೆಯಲ್ಲಿ ಮತ್ತಷ್ಟು ಪಳಗಿಕೊಳ್ಳೋದು ಅತ್ಯವಶ್ಯಕ. ಅಂತೂ ಎಕ್ಕ ಚಿತ್ರ ನ ಇರೀಕ್ಷೆಯ ಮಟ್ಟ ಮುಟ್ಟುವಂತೆ ಮೂಡಿ ಬಂದಿಲ್ಲ ಅನ್ನೋದಂತೂ ಪಕ್ಕಾ!

The post Ekka movie review: ಎರಡನೇ ಪ್ರಯತ್ನದಲ್ಲೂ ತಪ್ಪಿತೇ ಯುವನ ಲೆಕ್ಕ! appeared first on Cini Shodha.

ಹೆಚ್ಚೇನಲ್ಲದಿದ್ದರೂ ಕೇಡಿಯ ಬಗ್ಗೆ ಒಂದಷ್ಟು ಕುತೂಹಲ ಇದ್ದದ್ದಂತೂ ನಿಜ. ಈ ಸಿನಿಮಾಕ್ಕೆ ಧ್ರುವ ಸರ್ಜಾಧ ನಾಯಕನೆಂದು ನಿಕ್ಕಿಯಾದಾಗಲೂ ಅಂಥಾದ್ದೇ ವಾತಾವರಣವಿತ್ತು. ಭಾರೀ ನಿರೀಕ್ಷೆ ಮೂಡಿಸಿದ್ದ ಧ್ರುವ ಅಭಿನಯದ ಮಾರ್ಟಿನ್ ಮಗುಚಿಕೊಂಡ ನಂತರವಂತೂ ಕ್ರೇಜ್ ಎಂಬುದು ಸಂಪೂರ್ಣವಾಗಿ ಮಂಕಾಗಿ ಬಿಟ್ಟಿತ್ತು. ಆದರೀಗ ಬಿಡುಗಡೆಗೊಂಡಿರುವ ಕೇಡಿ ಟ್ರೈಲರಿನಲ್ಲಿ ಮಾಸ್ ಶೈಲಿಯ ಕಿಡಿ ಮೂಡಿಕೊಂಡಿದೆ. ಒಂದರೆಕ್ಷಣ ಪ್ರೇಮ್ ಮ್ಯಾಜಿಕ್ಕು ಬೆರಗು ಹುಟ್ಟಿಸೋದು ಸುಳ್ಳಲ್ಲ. ಒಂದು ವೇಳೆ ಟ್ರೈಲರಿಗೆ ತಕ್ಕುದಾಗಿ ಒಂದಿಡೀ ಸಿನಿಮಾ ಮೂಡಿ ಬಂದಿದ್ದರೆ, ಖಂಡಿತವಾಗಿಯೂ ಕೇಡಿ ದೊಡ್ಡ ಮಟ್ಟದ ಗೆಲುವಿನ ರೂವಾರಿಯಾಗುತ್ತೆ. ಹಾಗಂತ ಸಿನಿಮಾಸಕ್ತರೇ ಅಭಿಪ್ರಾಯ ಪಡುತ್ತಿದ್ದಾರೆ.

ಇನ್ನು ಧ್ರುವ ಸರ್ಜಾನ ವಿಚಾರಕ್ಕೆ ಬಂದರೆ, ಆತನ ಅಭಿನಯದ ಶೈಲಿ, ಹಾವಭಾವಗಳು ಈ ಶತಮಾನದಲ್ಲಿ ಬದಲಾಗೋದು ಡೌಟು. ಬಾಡಿ ಬೆಳೆಸಿಕೊಂಡು ಕ್ಯಾಮೆರಾ ಮುಂದೆ ನಿಂತರೆ ಪ್ರೇಕ್ಷಕರೆಲ್ಲ ಅಹುದಹುದೆಂದು ತಲೆಯಾಡಿಸುತ್ತಾರೆ, ಥ್ರಿಲ್ ಆಗುತ್ತಾರೆಂಬ ಭ್ರಮೆ ಧ್ರುವನಿಗಿದ್ದಂತಿದೆ. ಈ ಕಾರಣದಿಂದಲೇ ಸಿನಿಮಾಗಳು ಬದಲಾದರೂ, ಪಾತ್ರಗಳು ಬೇರೆಯಾದರೂ ಅದೇ ಛಾಯೆ ಕ್ಯಾರಿಯಾದಂಥಾ ಏಕತಾನತೆ ಯಾರಿಗಾದರೂ ಕಾಡುತ್ತೆ. ಇಂಥಾ ಧ್ರುವನನ್ನು ಪ್ರೇಮ್ ತಾವು ಸೃಷ್ಟಿಸಿದ ಪಾತ್ರಕ್ಕೆ ಹೇಗೆ ಒಲಗ್ಗಿಸಿಕೊಂಡಿರಬಹುದು? ಧ್ರುವ ಬೇರೆಯದ್ದೇ ಬೆರಗಿನೊಂದಿಗೆ ಪ್ರೇಕ್ಷಕರನ್ನು ಮುಖಾಮುಖಿಯಾಗಲಿದ್ದಾರಾ? ಇಂಥಾ ಒಂದಷ್ಟು ಪ್ರಶ್ನೆಗಳಿದ್ದಾವೆ. ಅದಕ್ಕುತ್ತರ ಸಿನಿಮಾ ಮಂದಿರಗಳಲ್ಲಿ ಮಾತ್ರವೇ ಸಿಗಲು ಸಾಧ್ಯ. ಅಂತೂ ಕೇಡಿ ಟ್ರೈಲರಿನಲ್ಲಿ ಧ್ರುವ ಮತ್ತು ಪ್ರೇಮ್ ಪಾಲಿಗೆ ಗೆಲುವಿನ ಯಾತ್ರೆ ಸೂರುವಾಗೋ ಲಕ್ಷಣಗಳಿವೆ. ಆ ಸಾಧ್ಯತೆ ಹಳೇ ಶೈಲಿಯ ಜಾತ್ರೆಯಲ್ಲಿ ಕಳೆದು ಹೋಗದಿರಲೆಂಬುದು ಹಾರೈಕೆ!

The post KD movie trailer review: ಕೇಡಿ ಟ್ರೈಲರಿನಲ್ಲಿ ಕಾಣಿಸಿತೇ ಗೆಲುವಿನ ಕಿಡಿ? appeared first on Cini Shodha.

ಪ್ರೇಮವೆಂಬುದು ಸಿನಿಮಾ ಚೌಕಟ್ಟಿಗೆ ಯಾವತ್ತಿದ್ದರೂ ತಾಜಾತನದಿಂದಲೇ ಒಗ್ಗಿಕೊಳ್ಳುವ ಮಾಯೆ. ಪ್ರೇಮ ಕಥನದ ಚುಂಗು ಹಿಡಿದು ಹೊರಟವರ ಕ್ರಿಯಾಶೀಲತೆ, ಸ್ವಂತಿಕೆಯ ಮೇಲೆ ಅದರ ಪರಿಣಾಮ ನಿಂತಿರುತ್ತೆ. ಆ ನಿಟ್ಟಿನಲ್ಲಿ ಹೇಳೋದಾದರೆ, ನಿರ್ದೇಶಕ ಹೇಮಂತ್ ಈ ಚಿತ್ರವನ್ನು ಮೆಲುವಾಗಿ ಆವರಿಸಿಕೊಂಡು ಬಿಡುವ ದೃಷ್ಯಕಾವ್ಯವಾಗಿಸುವಲ್ಲಿ ಗೆದ್ದಿದ್ದಾರೆ. ಸಪ್ತ ಸಾಗರದಾಚೆ ಎಲ್ಲೋ ಎರಡು ಭಾಗಗಳಲ್ಲಿ ತೆರೆಗಾಣುವ ಸುದ್ದಿ ಹೊರ ಬಿದ್ದಾಕ್ಷಣ ಇದು ಬೇಕಿತ್ತಾ ಎಂಬಂಥಾ ಪ್ರಶ್ನೆ ಹಲವರಲ್ಲಿ ಮೂಡಿಕೊಂಡಿತ್ತು. ಹಾಗೊಂದು ಪ್ರಶ್ನೆ ಮೂಡಿದ ಮನಸುಗಳಲ್ಲೇ, ಬಿ ಸೈಡ್ ಬಗ್ಗೆ ಕುತೂಹಲ ಮಿಸುಕಾಡುವಂತೆ ಮಾಡಿದೆ ಎಂದರೆ, ಸಪ್ತ ಸಾಗರದಾಚೆಯ ಬೆರಗುಗಳ ಬಗ್ಗೆ ಬೇರೇನೂ ವಿವರಿಸುವ ಅವಶ್ಯಕತೆಯಿಲ್ಲ.

ಇಲ್ಲಿರೋದು ಮಧ್ಯಮ ವರ್ಗದ ಎರಡು ಮನಸುಗಳ ನಡುವೆ ಪ್ರವಹಿಸುವ ಗಾಢ ಪ್ರೇಮ. ವಿನಾ ಕಾರಣ ರೊಮ್ಯಾಂಟಿಕ್ ಅಂಶಗಳನ್ನು ಬೆರೆಸದೆ, ಬಿಲ್ಡಪ್ಪುಗಳಲ್ಲಿ ದೃಷ್ಯಗಳನ್ನು ಮೆರೆಸದೆ ಸಹಾಜಾತಿ ಸಹಜವಾಗಿ ಭಾವನೆಗಳು ಇಲ್ಲಿ ಅನುರಣಿಸುತ್ತವೆ. ಸಿನಿಮಾ ಶುರುವಾಗುತ್ತಲೇ ನಾಯಕ ನಾಯಕಿಯ ಪ್ರೇಮ ಕಥೆ ತೆರೆದುಕೊಳ್ಳುತ್ತದೆ. ಆಕೆ ಕಡಲೂರಿನಿಂದ ಬಂದ ಹುಡುಗಿ. ಗಿಜಿಗುಡುವ ಊರಲ್ಲಿ ನಿಂತಿದ್ರೂ ಕಡನ್ನೇ ಧ್ಯಾನವಾಗಿಸಿಕೊಂಡವಳು. ಆತ ಬದುಕಿಗಾಗಿ ಒಂದು ವೃತ್ತಿ ಮಾಡುತ್ತಾ, ಶ್ರೀಮಂತಿಕೆಯ ವಾತಾವರಣದಲ್ಲಿದ್ದರೂ ಮಧ್ಯಮ ವರ್ಗದ ತಲ್ಲಣಗಳನ್ನು ಹಾಸಿ ಹೊದ್ದಂತಿರುವ ಹುಡುಗ. ಆದರೆ, ಆತನನ್ನು ಆವರಿಸಿಕೊಂಡ ಪ್ರೇಮ ಎಲ್ಲ ಮಿತಿಗಳನ್ನು ಮೀರಿ, ಅಸಾಧ್ಯವೆಂಬುದರತ್ತ ಕೈ ಚಾಚುವಂತೆ ಮಾಡುತ್ತೆ.

ಅದು ನೈಜ ಪ್ರೇಮಕ್ಕಿರುವ ನಿಜವಾದ ಶಕ್ತಿ. ಪ್ರೀತಿಸಿದ ಜೀವವನ್ನು ದಕ್ಕಿಸಿಕೊಳ್ಳಲು ಅದು ಎಂಥಾ ಸಾಹಸಕ್ಕೂ ಪ್ರೇರೇಪಿಸಿ ಬಿಡುತ್ತೆ. ಅದರ ಸೆಳವಿಗೆ ಸಿಕ್ಕು ಮಹತ್ತರವಾದನ್ನು ಸಾಧಿಸಿದವರಿದ್ದಾರೆ. ಸೋಲಿನ ಹುದುಲಿಂದಲೇ ಪುಟಿದೆದ್ದು ಗೆದ್ದವರೂ ಇದ್ದಾರೆ. ಅದೆಲ್ಲವೂ ಹೆಜ್ಜೆಯೂರುವ ಹಾದಿಯನ್ನ ಅವಲಂಬಿಸಿರುತ್ತೆ. ಇಲ್ಲಿ ನಾಯಕ ತನ್ನ ಜತ್ತಿನಂಥವಳ ಕನಸು ನನಸು ಮಾಡಲು ತುಳಿದ ಹಾದಿ ಯಾವುದು? ಅದು ಆತನನ್ನು ಯಾವ ತೀರಕ್ಕೆ ಕರೆದೊಯ್ದು ಬಿಡುತ್ತೆ? ಇಂಥಾ ಪ್ರಶ್ನೆಗಳಿಗೆ ಸಿಗಬಹುದಾದ ಉತ್ತರವೇ ಒಂದಿಡೀ ಸಿನಿಮಾದ ಸಾರ. ಅದು ಹಪುಗಳಾಚೆಗೂ ಕಳೆಗಟ್ಟಿಕೊಂಡಿದೆ ಎಂಬುದೇ ಸಪ್ತ ಸಾಗರದಾಚೆಯ ನಿಜವಾದ ಸಾರ್ಥಕತೆ.

ಇಲ್ಲಿ ಮಧ್ಯಮ ವರ್ಗದ ಕನವರಿಕೆಗಳಿಗೆ, ಶ್ರೀಮಂತಿಕೆಯ ಠೇಂಕಾರ, ಹುನ್ನಾರಗಳು ಮುಖಾಮುಖಿಯಾಗುತ್ತವೆ. ಸಂವೇದನೆ ಕಳೆದುಕೊಂಡು, ಯಾರನ್ನ ಪಣಕ್ಕಿಟ್ಟಾದರೂ ಕಂಟಕದಿಂದ ಪಾರಾಗುವ ಕಾಂಚಾಣದ ಮನಸಲತ್ತುಗಳು ಕಂಗಾಲಾಗಿಸುತ್ತವೆ. ಓರ್ವ ನಿರ್ದೇಶಕನಾಗಿ ಪ್ರತೀ ಸೂಕ್ಷ್ಮವನ್ನೂ ಪರಿಗಣಿಸಿ, ಈ ಸಿನಿಮಾವನ್ನು ರೂಪಿಸಿರುವ ನಿರ್ದೇಶಕರು ನಿಜಕ್ಕೂ ಅಚ್ಚರಿ ಮೂಡಿಸುತ್ತಾರೆ. ಮೊದಲಾರ್ಧದ ತುಂಬಾ ನಾಯಕ, ನಾಯಕಿಯ ನಡುವಿನ ಮಧುರ ಪ್ರೇಮದ ಕನವರಿಕೆಯಲ್ಲಿಯೇ ಸಾಗುತ್ತದೆ. ದೃಷ್ಯಗಳು ಸರಿಯುತ್ತ ಕುತೂಹಲ ಹರಳುಗಟ್ಟುತ್ತಾ, ದ್ವಿತೀಯಾರ್ಧ ದಾಟಿಕೊಂಡ ನಂತರ ಅದು ಅಕ್ಷರಶಃ ನಿಗಿನಿಗಿಸುತ್ತೆ. ಇತ್ತೀಚಿನ ದಿನಮಾನದಲ್ಲಿ ನಾಯಕ ನಾಯಕಿಯರ ಕೆಮಿಸ್ಟ್ರಿಯೊಂದಿಗೆ ಗೆದ್ದ ಪ್ರೇಮ ಕಥನಗಳು ವಿರಳ. ಆ ಸಾಲಿಗೆ ನಿಸ್ಸಂದೇಹವಾಗಿಯೂ ಸಪ್ತ ಸಾಗರಾದಾಚೆ ಎಲ್ಲೋ ಸೇರಿಕೊಳ್ಳುತ್ತೆ. ಕ್ಲೈಮ್ಯಾಕ್ಸಿನ ಹೊತ್ತಿಗೆಲ್ಲ ನಿರ್ದೇಶಕ ದುನಿಯಾ ಸೂರಿಯ ಫಾರ್ಮುಲಾಕ್ಕೆ ಪಕ್ಕಾದಂತೆ ಕಾಣಿಸುವ ನಿರ್ದೇಶಕರು, ಸೈಡ್ ಬಿಯ ತುಣುಕುಗಳ ಮೂಲಕ ಕುತೂಹಲವನ್ನು ಕಾಪಿಟ್ಟುಕೊಳ್ಳುತ್ತಾರೆ. ಮೊದಲ ಭಾಗ ನೋಡಿದವರಲ್ಲೆಲ್ಲ ಎರಡನೇ ಭಾಗ ನೋಡುವ ಉತ್ಕಟ ತುಡಿತವೊಂದು ಊಟೆಯೊಡೆಯುತ್ತೆ.

ಹೀಗೆ ಎರಡು ಭಾಗಗಳಲ್ಲಿ ಸಿನಿಮಾವೊಂದನ್ನು ರೂಪಿಸುವಾಗ ನಾನಾ ರೀತಿಯಲ್ಲಿ ಎಚ್ಚರ ವಹಿಸಬೇಕಾಗುತ್ತದೆ. ಅದೆಲ್ಲವನ್ನೂ ನಿರ್ದೇಶಕರು ಲೀಲಾಜಾಲವಾಗಿಯೇ ನಿಭಾಯಿಸಿದ್ದಾರೆ. ನಟನೆಯ ವಿಚಾರಕ್ಕೆ ಬಂದರೆ ರಕ್ಷಿತ್ ಶೆಟ್ಟಿ, ರುಕ್ಮಿಣಿ ವಸಂತ್ ಪಾತ್ರದಲ್ಲಿಯೇ ಲೀನಾವಾದಂತೆ ಕಾಣುತ್ತಾರೆ. ಈ ಹುಡುಗಿ ರುಕ್ಮಿಣಿಯಂಥಾ ಪ್ರತೀ ಫ್ರೇಮಿನಲ್ಲಿಯೂ ಒಳಗಿಳಿಯುತ್ತಾಳೆ. ಹಾಗೆ ಪಾತ್ರಗಳೆಲ್ಲವನ್ನೂ ಪರಿಣಾಮಕಾರಿಯಾಗಿ ರೂಪಿಸಿದ ಫಾಯಿದೆ ನಿರ್ದೇಶಕರಿಗೂ ಸಲ್ಲುತ್ತದೆ. ಸೂಕ್ಷವಂತಿಕೆ ಇರುವ ಪ್ರೇಕ್ಷಕರನ್ನೆಲ್ಲ ಕ್ಷಣಾರ್ಧದಲ್ಲಿ ಆವರಿಸಿಕೊಳ್ಳುವ ಗುಣ ಹೊಂದಿರುವ ಈ ಸಿನಿಮಾ, ಭಿನ್ನ ಆಸಕ್ತಿಯ ನೋಡುಗರಿಗೂ ಸಲೀಸಾಗಿ ರುಚಿಸುತ್ತದೆ ಅನ್ನುವಂತಿಲ್ಲ. ಆದರೆ ಎಲ್ಲ ವರ್ಗದವರನ್ನೂ ಆವರಿಸಿಕೊಳ್ಳುವಂಥಾ ಭಾವತೀವ್ರತೆಯಂತೂ ಖಂಡಿತಾ ಇಲ್ಲಿದೆ. ಸಂಭಾಷಣೆಗೂ ಕೂಡಾ ಅಂಥಾದ್ದೊಂದು ಕಸುವಿದೆ.

ಹಾಗಾದರೆ, ಎಲ್ಲ ಕೋನಗಳಿಂದಲೂ ಸಪ್ತ ಸಾಗರದಾಚೆ ಎಲ್ಲೋ ಪರಿಪೂರ್ಣ ಚಿತ್ರವಾ? ಕೊರತೆಗಳಿಲ್ಲವಾ ಅಂತ ನೋಡ ಹೋದರೆ, ಒಂದಷ್ಟು ವಿಚಾರಗಳು ಗಮನಕ್ಕೆ ಬರುತ್ತವೆ. ಆ ಯಾದಿಯಲ್ಲಿ ದೊಡ್ಡ ಕೊರತೆಯಾಗಿ ಕಾಣಿಸೋದು ಹಾಡುಗಳು. ಈ ಸಿನಿಮಾದಲ್ಲಿ ಹಿಟ್ ಹಾಡುಗಳಿಲ್ಲ. ಈ ಬಗೆಯ ಸಿನಿಮಾಗಳ ಗೆಲುವಿನಲ್ಲಿ ಅದರ ಪಾಲೂ ಖಂಡಿತಾ ಇರುತ್ತದೆ. ಆದರೇಕೋ ಚರಣ್ ರಾಜ್ ಅದರತ್ತ ಗಮನ ಹರಿಸಿಲ್ಲ. ಆದರೆ ಹಿನ್ನೆಲೆ ಸಂಗೀತದಲ್ಲವರು ಗಮನ ಸೆಳೆಯುತ್ತಾರೆ. ಇನ್ನುಳಿದಂತೆ ಕಾಸ್ಟ್ಯೂಮು, ಒಟ್ಟಾರೆ ಲುಕ್ಕಿನ ವಿಚಾರದಲ್ಲಿ ರಕ್ಷಿತ್ ಶೆಟ್ಟಿ ಪಾತ್ರವನ್ನು ಬೊಟ್ಟು ಮಾಡದಂತೆ ರೂಪಿಸುವಲ್ಲಿಯೂ ನಿರ್ದೇಶಕರು ಒಂದಷ್ಟು ಎಚ್ಚರ ತಪ್ಪಿದಂತೆ ಭಾಸವಾಗುತ್ತೆ. ಆದರೆ ಒಟ್ಟಾರೆ ಸಿನಿಮಾದ ಅಂದವೆಂಬುದು ಒಂದಷ್ಟು ತಪ್ಪುಗಳು ಮತ್ತು ಕೊರತೆಯನ್ನು ಮಾಫಿ ಮಾಡಿ, ದೃಷ್ಯಗಳಲ್ಲಿ ಲೀನವಾಗುವಂತೆ ಮಾಡಿ ಬಿಡುತ್ತದೆ. ಒಟ್ಟಾರೆಯಾಗಿ, ಇದು ಈ ಕಾಲಮಾನದ ಒಂದೊಳ್ಳೆ ಪ್ರೇಮ ಕಥಾನಕ. ಸಿನಿಮಾ ನೋಡಿಯಾದ ಮೇಲೂ ಗಾಢ ಪ್ರೇಮದ ಪರಾಗ ಮನಸಿಗಂಟಿಕೊಳ್ಳುತ್ತೆ. ಪ್ರೀತಿಯ ಕಿರುಬೆರಳು ಉಣುಚಿಕೊಂಡ ಕರುಳ ಸಂಕಟ ನಮ್ಮದೇ ಅನ್ನಿಸಿ ಬಿಡುತ್ತೆ. ಬಿ ಸೈಡ್ ನೋಡೋ ಹಂಬಲದೊಂದಿಗೆ, ಬೊಗಸೆಯ ತುಂಬಾ ಭಾವದ ಕಡಲೊಂದು ಭೋರ್ಗರೆದಂತೆ ಭಾಸವಾಗುತ್ತೆ. ಇದಕ್ಕಿಂತ ಸಾರ್ಥಕತೆ ಮತ್ತೇನಿದೆ?

The post saptha sgagaradache ello review: ಮುಗಿದ ಮೇಲೂ ಮನಸಿಗಂಟುತ್ತೆ ಗಾಢ ಪ್ರೇಮದ ಪರಾಗ! appeared first on Cini Shodha.

ಈ ಚಿತ್ರ ತೆರೆದುಕೊಳ್ಳೋದೇ ಉತ್ತರ ಕನ್ನಡ ಸೀಮೆಯ ಕಮಟಾ ಎಂಬೂರಿನ ಪೊಲೀಸ್ ಠಾಣೆಯ ಮೂಲಕ. ಅಲ್ಲಿಗೆ ಹೊಸದಾಗಿ ಬಂದ ನರರಹಿತ ಪೊಲೀಸನೊಬ್ಬನ ಹಿನ್ನೆಲೆಯಲ್ಲಿ ತೆರೆದುಕೊಳ್ಳುವ ಕಥೆ ನೇರವಾಗಿ ಟೋಬಿಯ ಜಾಡು ಹಿಡಿಯುತ್ತೆ. ಒಂದು ಮಟ್ಟಿಗೆ ಮೊದಲಾರ್ಧವೇ ಪರವಾಗಿಲ್ಲ; ದ್ವಿತೀಯಾರ್ಧವಂತೂ ಅಧ್ವಾನ. ಅಲ್ಲಿ ದೃಷ್ಯಗಳು ಎತ್ತೆತ್ತಲೋ ಚಲಿಸುತ್ತವೆ. ಮಾರಿಯ ಅವತಾರದ ಟೋಬಿ, ಚಿಮ್ಮುವ ರಕ್ತ, ಖೂಳರ ಅಟ್ಟಹಾಸದ ನಡುವೆ ಪಾತ್ರಗಳ ಸಂವೇದನೆ, ಕಣ್ಣೀರುಗಳೆಲ್ಲವೂ ಮಾಸಲಾಗಿರುತ್ತವೆ. ಪ್ರೇಕ್ಷಕರ ಮನಸಿಗೆ ಅದಾಗಲೇ ಒಂದಷ್ಟು ಲೇಯರುಗಳ ರಕ್ತ ಮೆತ್ತಿಕೊಂಡಿರೋದರಿಂದ, ತೀವ್ರವಾಗಿ ಕಾಡುವ ಗುಣ ಹೊಂದಿದ್ದ ಒಂದಷ್ಟು ದೃಷ್ಯಗಳು ತಾಕದೆ ಉಳಿದುಬಿಡುತ್ತವೆ.

ಈ ಸಿನಿಮಾ ನಿರ್ದೇಶಕ ರಾಜ್ ಬಿ ಶೆಟ್ಟಿಯ ಪಟ್ಟದ ಶಿಷ್ಯ. ಹಾಗಿರುವಾಗ ಶೆಟ್ಟರು ತಾವೇ ನಿರ್ದೇಶನದಲ್ಲಿಯೂ ಕೈಯಾಡಿಸಿರುತ್ತಾರೆಂಬುದು ಬಹಿರಂಗ ಸತ್ಯ. ಆದರೆ, ನಿರ್ದೇಶನದ ಪಟ್ಟುಗಳನ್ನು ಕರಗತ ಮಾಡಿಕೊಂಡಿರೋ ರಾಜ್ ಬಿ ಶೆಟ್ಟಿ ಕೂಡಾ ಯಾಕೆ ಯಾಮಾರಿದರೆಂಬ ಪ್ರಶ್ನೆಯೊಂದು ಪ್ರೇಕ್ಷಕರನ್ನೆಲ್ಲ ಬಿಡದೇ ಕಾಡುತ್ತೆ. ಇದರಾಚೆಗೆ ರಾಜ್ ಶೆಟ್ಟರ ನಟನೆ ಮಾತ್ರ ಖಂಡಿತಾ ಫಲ್ ಮಾಕ್ರ್ಸ್ ಪಡೆದುಕೊಳ್ಳುತ್ತೆ. ಈ ಮೂಲಕ ಅವರೋರ್ವ ಅಪರೂಪದ ಕಲಾವಿದ ಎಂಬುದು ಮತ್ತೆ ಸಾಬೀತಾಗುತ್ತದೆ. ಚೈತ್ರಾ ಆಚಾರ್ ಕೂಡಾ ಶೆಟ್ಟರಿಗೆ ಪೈಪೋಟಿ ನೀಡುವಂತೆ ನಟಿಸಿದ್ದಾರೆ. ಇಷ್ಟಿದ್ದರೂ ಕೂಡಾ ಟೋಬಿ ಯಾವ ಹಂತದಲ್ಲಿಯೂ ನಿರೀಕ್ಷೆಯ ಮಟ್ಟ ಮುಟ್ಟುವುದಿಲ್ಲ. ಭರೀ ನಿರೀಕ್ಷೆಯಿಟ್ಟುಕೊಂಡು ಬಂದ ಪ್ರೇಕ್ಷಕರ ಮನ ತಣಿಸುವುದಿಲ್ಲ. ಅದು ಟೋಬಿಯ ಬಹುದೊಡ್ಡ ಕೊರತೆ.

ಗಮನೀಯ ಅಂಶವೆಂದರೆ, ರಾಜ್ ಶೆಟ್ಟಿ ಗರುಡ ಗಮನ ವೃಷಭ ವಾಹನದ ಗೆಲುವನ್ನು ಮನಸಲ್ಲಿಟ್ಟುಕೊಂಡೇ, ದಯಾನಂದ್ ಅವರ ಕೆಗೆ ಸಿನಿಮಾ ರೂಪ ಕೊಟ್ಟಿದ್ದಾರೆ. ಅದರ ಫಲವಾಗಿಯೇ ಟೋಬಿಯ ಮೇಲೆ ಗರುಡನ ಛಾಯ ಪ್ರತೀ ಸೀನುಗಳಲ್ಲಿಯೂ ಕಾಣಿಸುತ್ತೆ. ಹಾಗೆ ನೋಡಿದರೆ, ಕಾಂತಾರದ ಕ್ಲೈಮ್ಯಾಕ್ಷಿನಲ್ಲಿಯೂ ಶೆಟ್ಟರು ಅದೇ ಪಟ್ಟು ಪ್ರದರ್ಶಿಸಿದ್ದರು. ಗರುಡ ಗಮನದ ಫಾರ್ಮುಲಾವನ್ನು ಪರಿಣಾಮಕಾರಿಯಾಗಿ ಬಳಸಿಕೊಂಡಿದ್ದರೂ ಟೋಬಿಯ ಖದರ್ರು ಬೇರೆಯದ್ದಿರುತ್ತಿತ್ತೋ ಏನೋ… ಆದರೆ, ಟೋಬಿಗಿಲ್ಲಿ ಆ ಖದರ್ರು ಕೂಡಾ ಇಲ್ಲ. ರಾಜ್ ಶೆಟ್ಟಿ ಗರುಡಗಮನ ವೃಷಭ ವಾಹನದಲ್ಲಿ ನೆಲದ ಘಮಲು ಬೆರೆತ ಕಥೆಗೆ ಕಮರ್ಶಿಯಲ್ ಸ್ಪರ್ಶ ನೀಡಿ ಗೆದ್ದಿದ್ದರು. ಇಲ್ಲಿಯೂ ಸಹ ಅವೆರಡೂ ಇಮೇಜುಗಳನ್ನು ಒಟ್ಟೊಟ್ಟಿಗೆ ಮ್ಯಾನೇಜು ಮಾಡಲು ಹೋಗಿ ಶೆಟ್ಟರು ಮುಗ್ಗರಿಸಿದಂತಿದೆ.

ಇನ್ನುಳಿದಂತೆ ತೀರಾ ನಿಧಾನಗತಿಯ ಚಲನೆ ಕೂಡಾ ಟೋಬಿಗೆ ಕೈ ಕೊಟ್ಟಿದೆ. ಅದು ಸಿನಿಮಾ ಮಂದಿರವನ್ನು ಕೆಲ ಘಟ್ಟಗಳಲ್ಲಿ ಅಸಹನೆಯಾಗಿ ಆವರಿಸಿಕೊಂಡು ಬಿಡುತ್ತದೆ. ಅಂಥಾ ದೃಷ್ಯಗಳಲ್ಲಿ ಪ್ರೇಕ್ಷಕರು ವಿಲಗುಟ್ಟೋದನ್ನು ನೋಡಿದಾಗ, ಇದು ಓಟಿಟಿಗೆ ಮಾತ್ರವೇ ಸಹ್ಯವಾಗಬಹುದೇನೋ ಅನ್ನಿಸುತ್ತೆ. ಯಾಕೆಂದರೆ, ಅಲಿ ಫಾಸ್ಟ್ ಫಾರ್ವರ್ಡ್ ಆಪ್ಷನ್ನಿರುತ್ತದೆ. ಇನ್ನುಳಿದಂತೆ ಚಿತ್ರತಂಡ ಪ್ರಮೋಷನ್ನಿನಲ್ಲಿ ಬಿಂಬಿಸಿದ್ದ ರೀತಿಗೂ, ಸಿನಿಮಾದೊಳಗಿನ ವಾಸ್ತವಕ್ಕೂ ಅಜಗಜಾಂತರ ವ್ಯತ್ಯಾಸವಿದೆ. ಯಾಕೆಂದರೆ, ಕುರಿಯೊಂದು ಮಾರಿಯಾಗುವ ರೂಪಕವನ್ನಿಟ್ಟುಕೊಂಡು ಟೋಬಿ ಪಾತ್ರವನ್ನು ಬಿಂಬಿಸಲಾಗಿತ್ತು. ಆದರೆ, ಸಿನಿಮಾದಲ್ಲಿ ಮಾತ್ರ ಕುರಿಯಂತೆ ಒತ್ತಾಯಪೂರ್ವಕವಾಗಿ ಬಿಂಬಿಸಿದ್ದ ಮಾರಿಯೇ ಎದುರಾಗುತ್ತೆ. ಟೋಬಿ ಅನ್ನೋದೊಂದು ಪಕ್ಕಾ ವೈಲೆಂಟ್ ಪಾತ್ರ. ಒಂದು ವೇಳೆ ಕುರಿಯೊಂದು ಮಾರಿಯಾಗೋ ಅಲೀ ಕಾನ್ಸೆಪ್ಟ್ ಇದ್ದಿದ್ದರೆ ಅದರ ಮಜವೇ ಬೇರೆಯದ್ದಿರುತ್ತಿತ್ತೇನೋ.

ಹೀರೋ ಕ್ಯಾರೆಕ್ಟರಿಗಿಲ್ಲಿ ಚಾಲೆಂಜುಗಳೇ ಇಲ್ಲ. ರಾಜ್ ಶೆಟ್ಟಿ ಯಾವ ಭಿನ್ನ ಗೆಟಪ್ಪಿನಲ್ಲಿಯೂ ಪ್ರೇಕ್ಷಕರನ್ನು ಅಚ್ಚರಿಗೀಡು ಮಾಡೋದಿಲ್ಲ. ಅದೆಲ್ಲವನ್ನೂ ಬಿಡುಗಡೆಯ ಪೂರ್ವದಲ್ಲಿಯೇ ತೆರೆದಿಟ್ಟಿರೋದರಿಂದ, ಒಂದು ಸಿನಿಮಾದ ನಿಜವಾದ ಮುದವೇ ಮರೆಯಾದಂತಿದೆ. ಒಂದು ಕೋನದಲ್ಲಿ ಆರ್ಟ್ ಮೂವಿಯಂತೆ ಗೋಚರಿಸೋ ಈ ಚಿತ್ರದಲ್ಲಿ, ಪಕ್ಕಾ ಕಮರ್ಶಿಯಲ್ ಜಾಡಿನ ಫೈಟುಗಳು ಪ್ರೇಕ್ಷಕರನ್ನು ಕೆಕರುಮಕರಾಗಿಸುತ್ತವೆ. ರಾಜ್ ಶೆಟ್ಟಿ ಈ ಸಿನಿಮಾದಲ್ಲಿ ಸ್ಕ್ರಿಫ್ಟ್, ಸ್ಕ್ರೀನ್ ಪ್ಲೇನಲ್ಲಿಯೂ ಎಡವಿದ್ದಾರೆ. ತಮ್ಮ ಪಾತ್ರದಲ್ಲಿ ತಾವು ತನ್ಮಯರಾಗಿ ನಟಿಸುತ್ತಾ, ಮಿಕ್ಕುಳಿದವುಗಳನ್ನು ಕಡೆಗಣಿಸಿದಂತೆಯೇ ಭಾಸವಾಗುತ್ತೆ. ಇನ್ನುಳಿದಂತೆ ಮಿಥುನ್ ಮುಕುಂದನ್ ಬಿಜಿಎಂ ಕೂಡಾ, ರಾಜ್ ಶೆಟ್ಟಿ ನಟನೆಯಷ್ಟೇ ಪರಿಣಾಮಕಾರಿಯಾಗಿದೆ. ನೆಲಮೂಲದ ಕಥೆಗಳನ್ನು ಹೆಕ್ಕಿ ತರುವಲ್ಲಿ ನಿಸ್ಸೀಮರಾದ ಟಿ.ಕೆ ದಯಾನಂದ್ ಅವರ ಕಥೆಯೂ ಚೆನ್ನಾಗಿದೆ. ಆದರೆ, ಅದು ಹಾಳೆಯಿಂದ ದೃಷ್ಯಕ್ಕಿಳಿಯುವಲ್ಲಿ ಅಸಲೀ ಕಸುವು ಕಳೆದುಕೊಂಡಿದೆ. ಒಟ್ಟಾರೆಯಾಗಿ ರಾಜ್ ಶೆಟ್ಟಿ ಕಡೆಯಿಂದ ಮಹತ್ತರವಾದುದೇನನ್ನೋ ನಿರೀಕ್ಷಿಸಿದ್ದ ಪ್ರೇಕ್ಷಕರಿಗೆ ನಿರಾಸೆಯಾಗಿರೋದಂತೂ ನಿಜ!

The post toby movie review: ಶೆಟ್ರು ತೋರಿಸಿದ್ದು ಬಂಗುಡೆ; ಥಿಯೇಟರಿನಲ್ಲಿ ಕಂಡಿದ್ದು ಸಣಕಲು ಬೂತಾಯಿ! appeared first on Cini Shodha.

`ಬ್ಯಾಂಗ್’ ಅಂತೊಂದು ಚಿತ್ರ ರೆಡಿಯಾಗಿದೆ ಎಂಬ ವಿಚಾರ ತಿಳಿದದ್ದೇ ಬಿಡುಗಡೆಯ ಹೊಸ್ತಿಲಲ್ಲಿ. ಕಿಚ್ಚಾ ಸುದೀಪ್ ವಾಯ್ಸು ಕೊಟ್ಟರು, ಮತ್ಯಾವುದೋ ಹಾಡು ಹಿಟ್ಟಾಯ್ತು ಅಂತೆಲ್ಲ ಚಿತ್ರತಂಡ ಬೆನ್ನು ತಟ್ಟಿಕೊಂಡಿದ್ದಿದೆ. ಆದರೆ, ಅದ್ಯಾವುದರಿಂದಲೂ ಈ ಸಿನಿಮಾ ಸುತ್ತ ಕುತೂಹಲ ಹರಳುಗಟ್ಟುವಂತೆ ಮಾಡಲು ಸಾಧ್ಯವಾಗಿರಲಿಲ್ಲ. ಅದರ ಬೆನ್ನಲ್ಲೇ ರಘು ಧೀಕ್ಷಿತ್ ಈ ಸಿನಿಮಾ ಮೂಲಕ ನಟನಾಗಿದ್ದಾರೆಂಬ ಸುದ್ದಿ ಹೊರ ಬಿದ್ದಿತ್ತು. ಅದರ ಚರ್ಚೆಯೆಲ್ಲವೂ `ಚೆಂದಗೆ ಹಾಡುತ್ತಿದ್ದ ಈ ಆಸಾಮಿಗೇನಾಯ್ತು’ ಎಂಬಂಥಾ ವಿಷಾದದಲ್ಲಿಯೇ ಪರ್ಯಾವಸಾನ ಹೊಂದಿತ್ತು. ಕಡೇಗೆ ಈ ಸಿನಿಮಾ ನಾಯಕಿ ಶಾನ್ವಿ ಶ್ರೀವತ್ಸಳನ್ನು ಕೇಂದ್ರವಾಗಿಟ್ಟುಕೊಂಡು, ಕಡೇ ಕ್ಷಣದಲ್ಲಿ ಒಂದಷ್ಟು ಪ್ರಚಾರ ಪಟ್ಟುಗಳು ಪ್ರದರ್ಶನಗೊಂಡಿದ್ದವು. ಆ ಮೂಲಕ ಈ ಸಿನಿಮಾ ನಿಜಕ್ಕೂ ಚೆನ್ನಾಗಿರಬಹುದಾ ಅಂತೊಂದು ಕುತೂಹಲ ಮೂಡಿಕೊಂಡಿತ್ತು. ಅದನ್ನು ಎದೆಯಲ್ಲಿಟ್ಟುಕೊಂಡು ಸಿನಿಮಾ ನೋಡಿದವರಿಗೆಲ್ಲ, ಪ್ರಚಾರದ ಸಂದರ್ಭದಲ್ಲಿ ಬಿಟ್ಟಿದ್ದೆಲ್ಲವೂ ಬರೀ ಭೋಂಗು ಎಂಬುದು ಸ್ಪಷ್ಟವಾಗಿಯೇ ಮನದಟ್ಟಾಗಿದೆ!

ಇದು ಗಣೇಶ್ ಪರಶುರಾಮ್ ನಿರ್ದೇಶನದ ಚಿತ್ರ. ಬ್ಲ್ಯಾಕ್ ಕಾಮಿಡಿ ವಿತ್ ಗ್ಯಾಂಗ್ ಸ್ಟರ್ ಥ್ರಿಲರ್ ಮಾದರಿಯ ಚುಂಗು ಹಿಡಿದು ನಿರ್ದೇಶಕರು ಈ ಚಿತ್ರವನ್ನು ರೂಪಿಸಿದ್ದಾರೆ. ಕನ್ನಡದ ಮಟ್ಟಿಗೆ ಡ್ರಗ್ಸ್ ಭೂಮಿಕೆಯ ಕಥನಗಳು ಪ್ರೇಕ್ಷಕರಿಗೆ ರುಚಿಸೋದಿಲ್ಲ. ಆ ಬಗೆಯ ಒಂದಷ್ಟು ಸಿನಿಮಾಗಳು ಗೋತಾ ಹೊಡೆದಿವೆ. ಅದೇ ಜಾನರಿನಲ್ಲಿ ಹೊಸತೇನನ್ನೋ ಮಾಡುವ ಭರದಲ್ಲಿ, ಕಲಸುಮೇಲೋಗರವೊಂದನ್ನು ಬ್ಯಾಂಗ್ ಹೆಸರಿನಲ್ಲಿ ಪ್ರೇಕ್ಷಕರ ಮುಂದಿಡಲಾಗಿದೆ. ರೋಡ್ ಟ್ರಿಪ್ ಹೊರಡುವ ಯುವಕರ ತಂಡ, ಅದರ ನಡುವಲ್ಲಿ ಜರುಗುವ ಕಿಡ್ನಾಪ್ ಪ್ರಹಸನ, ಅದಕ್ಕೊಂದು ಪ್ಲಾಶ್ ಬ್ಯಾಕು, ಅಲ್ಲಿ ಕಾಣಿಸುವ ಐವತ್ತು ಕೋಟಿ ಮೊತ್ತದ ಡ್ರಗ್ಸ್ ಗ್ಯಾಂಗಿನ ಮ್ಯಾಟರ್ರು ಮತ್ತು ಅದರ ಜಾಡು ಹಿಡಿದು ಹೊರಟ ಯುವಕರಿಗೆ ದಾರಿ ಮಧ್ಯೆಯೇ ಜೊತೆಯಾಗುವ ಹುಡುಗಿ… ಇವಿಷ್ಟು ಅಂಶಗಳೊಂದಿಗೆ ಬ್ಯಾಂಗ್ ಕಥನ ಗರಿಬಿಚ್ಚಿಕೊಳ್ಳುತ್ತೆ.

ಮೊದಲಾರ್ಧದಲ್ಲಿ ಕಥೆ ಒಂದ್ಯಾವುದೋ ದಿಕ್ಕಿನತ್ತ ಮುಂದುವರೆಯುತ್ತಿದೆ ಎಂಬಂಥಾ ತಟುಕು ಸಮಾಧಾನ ಪ್ರೇಕ್ಷಕರ ಪಾಲಿಗುಳಿಯುತ್ತದೆ. ಆದರೆ, ಇಂಟರ್‍ವಲ್ ಹೊತ್ತಿಗೆಲ್ಲ ಇಡೀ ಕಥೆಯೇ ಗರಬಡಿದಂತಾಗುತ್ತದೆ. ಖುದ್ದು ನಿರ್ದೇಶಕನೇ ಉಳಿದರ್ಧ ಭಾಗವನ್ನು ಹೇಗೆ ಮುನ್ನಡೆಸಬೇಕೆಂಬುದೇ ಗೊತ್ತಿಲ್ಲದೆ ತಬ್ಬಿಬ್ಬುಗೊಂಡಂತೆ ಭಾಸವಾಗುತ್ತೆ. ಅದರ ಭಾಗವಾಗಿಯೇ ಸೀರಿಯಸ್ ಕಾಮಿಡಿಯಂಥಾ ಸನ್ನಿವೇಷಗಳು ಜಮೆಯಾಗುತ್ತಾ ಸಾಗುತ್ತವೆ. ಪಾತ್ರಗಳು ಇದ್ದಲ್ಲಿಯೇ ಸುತ್ತಲಾರಂಭಿಸುತ್ತವೆ. ಕೆಲ ದೃಷ್ಯಗಳಂತೂ ಆಸು ಪಾಸಿನಲ್ಲಿ ಕುಂತ ಪ್ರೇಕ್ಷಕರು ಪರಸ್ಪರ ಮುಖ ನೋಡಿಕೊಂಡು ತಮ್ಮನ್ನು ತಾವೇ ಸಮಾಧಾನಿಸಿಕೊಳ್ಳುವ ಮಟ್ಟಕ್ಕೆ ರೇಜಿಗೆ ಹುಟ್ಟಿಸುತ್ತವೆ.

ಈ ಹಂತ ತಲುಪುವ ಹೊತ್ತಿಗೆಲ್ಲ ಪ್ರೇಕ್ಷಕರು ಟಿಕೇಟಿಗೆ ಕೊಟ್ಟ ಕಾಸಿನ ಮುಖ ನೋಡಿಯಷ್ಟೇ ಸೀಟಿಗೆ ಅಂಟಿಕೊಳ್ಳೋ ಪರಿಸ್ಥಿತಿ ಸೃಷ್ಟಿಯಾಗಿರುತ್ತೆ. ನಿಖರವಾಗಿ ಹೇಳಬೇಕೆಂದರೆ, ಸಿಕ್ಕು ಸಿಕ್ಕಾದ ದೃಷ್ಯಾವಳಿಗಳ ಭರಾಟೆಯಲ್ಲಿ ಪ್ರೇಕ್ಷಕರೆಲ್ಲ ಸೈಕ್ ಆಗಿ ಬಿಟ್ಟಿರುತ್ತಾರೆ. ಅದೇ ಅಹೊತ್ತಿನಲ್ಲಿ ಸೈಕೆಡೆನಿಕ್ಸ್ ಸಾಂಗಿನ ಅಬ್ಬರ ಶುರುವಾಗುತ್ತೆ. ಗಾಂಜಾ ಮತ್ತು, ಎಣ್ಣೆ ಏಟು ಉಚ್ಛ್ರಾಯ ಸ್ಥಿತಿಯಲ್ಲಿದ್ದಾಗ ಇಂಥಾ ಸೈಕೆಡೆನಿಕ್ಸ್ ಮಾದರಿಯ ಹಾಡುಗಳನ್ನು ಹಾಕಿಕೊಂಡು ಕುಣಿಯೋ ಮಂದಿಯಿದ್ದಾರೆ. ಅದನ್ನು ಗಾಂಜಾ ಸಾಂಗ್ಸ್ ಅಂತಲೂ ಕರೆಯುತ್ತಾರೆ. ಅಂಥಾ ಮಾದರಿಯ ಹಾಡು ಬರುವ ಹೊತ್ತಿಗೆಲ್ಲ, ಗಾಂಜಾ ಮೂಲ ಹುಡುಕಿ ಹೊರಟ ಯುವಕರ ಗುಂಪಿನ ಪುಟ್ಟ ಹುಡುಗನೊಬ್ಬ ದುಷ್ಟ ಬಂಧನದಲ್ಲಿರುತ್ತಾನೆ. ಈ ಗುಂಪು ಮಾತ್ರ ಅದರ ಗೊಡವೆ ಇಲ್ಲದಂತೆ ತಮ್ಮ ಲೋಕದಲ್ಲಿ ತಾವಿರೋದು ಮಹಾ ಅಭಾಸವಾಗಿ ಗೋಚರಿಸುತ್ತದೆ.

ಹೀಗೆ ಕಳ್ಳು ಕುಡಿದ ಕಪಿಗಳಂತಾಡುವ ಈ ಟೀಮಿಗೆ ಅಚಾತುರ್ಯದಿಂದ ಅದ್ಯಾರೋ ರಾಮರಸದಂಥಾ ದ್ರವ ಕುಡಿಸುವ ಸೀನೂ ಬರುತ್ತದೆ. ಆ ಮತ್ತಿನಲ್ಲಿ ರೇಸು ಹೊರಡುವ ಸೀನನ್ನು ಗ್ರಾಫಿಕ್ಸ್ ಮುಂತಾದವನ್ನು ಬೆರೆಸಿ ಅದ್ದೂರಿಯಾಗಿ ಸೆರೆ ಹಿಡಿಯಲಾಗಿದೆ. ಆದರೆ, ಆ ಸೀನು ಅದೆಷ್ಟು ಅಸಹನೆ ಹುಟ್ಟಿಸುತ್ತದೆ ಎಂದರೆ, ಅದುವರೆಗೆ ಪ್ರೇಕ್ಷಕರಲ್ಲಿದ್ದ ತಾಳ್ಮೆ ಕಟ್ಟೆಯೊಡೆಯೋ ಹಂತ ತಲುಪುತ್ತದೆ. ದುರಂತವೆಂದರೆ, ಕ್ಲೈಮ್ಯಾಕ್ಸಿನವರೆಗೂ ಪ್ರೇಕ್ಷಕರನ್ನು ಕಟ್ಟಿಡಬಲ್ಲ ಒಂದೇ ಒಂದು ದೃಷ್ಯವೂ ಕದಲುವುದಿಲ್ಲ. ಇದಾದೇಟಿಗೆ ರಘು ದೀಕ್ಷಿತ್ ಮತ್ತು ಶಾನ್ವಿಯ ಫೈಟ್ ಸೀನಂತೂ ಅಧ್ವಾನ!

ಇದು ಬ್ಲಾಕ್ ಕಾಮಿಡಿ ಜಾನರಿನ ಚಿತ್ರ. ಹಾಲಿವುಡ್ಡಿನಲ್ಲಿ ಗುಣಮಟ್ಟ ಹೊಂದಿರುವಂಥಾ ಈ ಜಾನರಿನ ದಂಡಿ ದಂಡಿ ಸಿನಿಮಾಗಳು ಬಂದಿವೆ. ಇದೀಗ ಜೈಲರ್ ಚಿತ್ರ ಯಶಸ್ವೀ ಪ್ರದರ್ಶನ ಕಾಣುತ್ತಿದೆಯಲ್ಲಾ? ಅದರ ನಿರ್ದೇಶಕ ನೆಲ್ಸನ್ ದಿಲೀಪ್ ಕುಮಾರ್ ಕೂಡಾ ಈ ಹಿಂದೆ `ಕೊಲಮಾವು ಕೋಕಿಲಾ’ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಅಲ್ಲಿಯೂ ಡ್ರಗ್ ಮಾಫಿಯಾದ ಇರುವಿಕೆ ಇತ್ತು. ಆದರೆ ಅದನ್ನು ಸಂಭಾಳಿಸುವುದಕ್ಕೆ ಬೇರೆಯದ್ದೇ ತೆರನಾದ ಸೂಕ್ಷ್ಮತೆ ಬೇಕಾಗುತ್ತೆ. ಅದು ಇರೋದರಿಂದಲೇ ನಿರ್ದೇಶಕ ನೆಲ್ಸನ್ ಗೆದ್ದು ಬೀಗಿದ್ದರು. ಬ್ಯಾಂಗ್ ವಿಚಾರದಲ್ಲಿ ಹೇಳೋದಾದರೆ, ನಿರ್ದೇಶಕರು ಪರಿಣಾಮಕಾರಿಯಾಗಿಸುವ ದಿಕ್ಕಿನಲ್ಲಿ ಪ್ರಯತ್ನ ಹಾಕಿದ್ದಾರೆ. ಆ ದಿಸೆಯಲ್ಲಿ ಅವರನ್ನು ಮೆಚ್ಚಿಕೊಳ್ಳಬಹುದು. ಆದರೆ, ಅದು ಫಲಿಸಿಲ್ಲ ಎಂಬುದು ವಾಸ್ತವ. ಅದುವೇ ಈ ಚಿತ್ರಕ್ಕಾಗಿರುವ ಹಿನ್ನಡೆಗೆ ಪ್ರಧಾನ ಕಾರಣವೆಂದರೂ ತಪ್ಪೇನಿಲ್ಲ!

ಅದೇನು ದುರಾದೃಷ್ಟವೋ ಗೊತ್ತಿಲ್ಲ; ಕೆಲ ಸಿನಿಮಾದ ಕಥೆ ಚೆನ್ನಾಗಿರುತ್ತೆ. ನಿರೂಪಣೆಯಲ್ಲಿಯೂ ಸೆಳೆತವಿರುತ್ತದೆ. ಆದರೆ, ಅದಕ್ಕೆ ಬೇಕಾದ ಬಜೆಟ್ಟಿಗೆ ತತ್ವಾರವಾಗಿ ಬಿಡುತ್ತದೆ. ಆದರಿಲ್ಲಿ ಬ್ಯಾಂಗ್‍ಗೆ ಯಥೇಚ್ಚವಾಗಿ ಬಜೆಟ್ಟು ಸಿಕ್ಕಿದೆ. ಮೇಕಿಂಗ್ ಕೂಡಾ ಅದ್ದೂರಿಯಾಗಿದೆ. ಅದೆಲ್ಲವನ್ನೂ ವ್ಯರ್ಥವಾಗಿಸುವಂತೆ ಕಥೆ, ನಿರೂಪಣೆ ಮತ್ತು ಪಾತ್ರ ಕಟ್ಟುವಿಕೆಯಲ್ಲಿ ಎಡವಲಾಗಿದೆ. ಇಲ್ಲಿ ಶಾನ್ವಿ ಶ್ರೀವತ್ಸ, ರಘು ದೀಕ್ಷಿತ್ ಮುಂತಾದವರ ಜೊತೆ ರಿತ್ವಿಕ್ ಮುರಳೀಧರ್ ಕೂಡಾ ಪ್ರಧಾನ ಪಾತ್ರದಲ್ಲಿ ನಟಿಸಿದ್ದಾರೆ. ಅವರಿಲ್ಲಿ ಸಂಗೀತದೊಂದಿಗೆ ನಟಿಸುವ ಸರ್ಕಸ್ಸನ್ನೂ ಮಾಡಿದ್ದಾರೆ. ಅದೂ ಕೂಡಾ ಈತನಿಗೆ ಹೀರೋ ಆಗಿ ನಟಿಸುವ ಅವಕಾಶ ಹೇಗೆ ಸಿಕ್ಕಿತೆಂಬ ಪ್ರಶ್ನೆ ಪ್ರೇಕ್ಷಕರನ್ನೆಲ್ಲ ಕಾಡುತ್ತದೆ. ಬಹುಶಃ ಶ್ರೀಯುತರು ಒಂದಷ್ಟು ಇನ್ವೆಸ್ಟು ಮಾಡಿ ಆ ಅವಕಾಶವನ್ನು ಗಿಟ್ಟಿಸಿಕೊಂಡಿದ್ದರೂ ಇರಬಹುದು. ಅವರ ಅಮೋಘ ನಟನೆ ಅಂಥಾದ್ದೊಂದು ಗುಮಾನಿ ಹುಟ್ಟಿಸೋದು ಅಚ್ಚರಿಯೇನಲ್ಲ. ಇಲ್ಲಿ ನಿರ್ದೇಶಕರು ಹೊಸತೇನನ್ನೋ ಹೇಳಲು ಪ್ರಯತ್ನಿಸಿದ್ದಾರೆ. ಆದರೆ, ದೃಷ್ಯ ಕಟ್ಟುವಾಗ ಅದರಲ್ಲಿ ಸೋತಿದ್ದಾರೆ. ಇದೆಲ್ಲದರ ಫಲವಾಗಿ ಬ್ಯಾಂಗ್ ಭಯಾನಕ ಅನುಭವವೊಂನ್ನು ಕಟ್ಟಿ ಕೊಡುತ್ತದೆ. ಆ ಅನುಭವವೇ ತಲೆನೋವಾಗಿ ಒಂದಷ್ಟು ದಿನ ಕಾಡುತ್ತದೆ!

The post bang movie review: ಶೀರ್ಷಿಕೆ ಬ್ಯಾಂಗು; ಪ್ರಚಾರಕ್ಕಾಗಿ ಬಿಟ್ಟಿದ್ದೆಲ್ಲವೂ ಬರೀ ಭೋಂಗು! appeared first on Cini Shodha.