ನಿರ್ದೇಶಕನಾಗಬೇಕೆಂಬ ಬಯಕೆಯನ್ನು ಜೀವಮಾನದ ಗುರಿಯಾಗಿಟ್ಟುಕೊಂಡಿದ್ದವರು ರಾಜೀವ್ ಗಣೇಸನ್. ಸಿನಿಮಾ ರಂಗದಲ್ಲಿ ಇಂಥಾ ಗುರಿಗಳನ್ನಿಟ್ಟುಕೊಂಡು ಏಕಾಏಕಿ ಸಾಧಿಸಿ ಬಿಡಲಾಗೋದಿಲ್ಲ. ಅಂಥಾ ಅವಕಾಶ ಒಂದಷ್ಟು ಮಂದಿಗೆ ಮಾತ್ರವೇ ಸಿಗುತ್ತದೆ. ಸಿನಿಮಾ ಜಗತ್ತಿನ ಯಾವ ವಿಭಾಗದಲ್ಲಿ ಕೆಲಸ ಮಾಡುವ ಅವಕಾಶ ಸಿಕ್ಕರೂ ಕೂಡಾ, ಆ ಹಾದಿ ತನ್ನನ್ನು ಗಮ್ಯದತ್ತ ಕೊಂಡೊಯ್ಯುತ್ತದೆಂಬ ಗಾಢ ನಂಬಿಕೆಯೊಂದು ರಾಜೀವ್ ಮನಸಲ್ಲಿತ್ತು. ಆ ಕಾರಣದಿಂದಲೇ ಬದುಕು ಎತ್ತ ಹೊಯ್ದಾಡಿಸಿದರೂ, ಸಿಕ್ಕ ಜವಾಬ್ದಾರಿಯನ್ನೇ ಅತ್ಯಂತ ಅಚ್ಚುಟಾಗಿ ನಿಭಾಯಿಸುವ ಗುಣವನ್ನವರು ಬೆಳೆಸಿಕೊಂಡಿದ್ದರು. ಅಂಥಾ ಮನಃಸ್ಥಿತಿಯ ಕಾರಣದಿಂದಲೇ ಅವರು ಟೈಮ್ ಪಾಸ್ ಚಿತ್ರದ ನಿರ್ದೇಶಕ ಚೇತನ್ ಜೋಡಿದಾರ್ ಅವರ ಗಮನ ಸೆಳೆದು, ಈ ಸಿನಿಮಾದ ಛಾಯಾಗ್ರಾಹಕರಾಗುವ ಅವಕಾಶವನ್ನು ಪಡೆದುಕೊಂಡಿದ್ದರು.

ರಾಗಿಣಿ ದ್ವಿವೇದಿ ನಾಯಕಿಯಾಗಿ ನಟಿಸಿರುವ `ಸಾರಿ ಕರ್ಮ ರಿಟರ್ನ್ಸ್’ ಚಿತ್ರದ ಛಾಯಾಗ್ರಾಹಕರಾಗಿ ರಾಜೀವ್ ಕಾರ್ಯನಿರ್ವಹಿಸುತ್ತಿದ್ದರು. ಆ ಸಿನಿಮಾ ಮೂಲಕ ಮೊದಲ ಬಾರಿಗೆ ರಾಜೀವ್ ಮೋಷನ್ ಕ್ಯಾಪ್ಚರ್ ಎಂಬ ಪ್ರಯೋಗ ನಡೆಸಿದ್ದರು. ಈ ಮೂಲಕ ಭಾರತೀಯ ಚಿತ್ರರಂಗದಲ್ಲಿಯೇ ರಾಜೀವ್ ಪ್ರಯೋಗ ಮೊದಲನೆಯದ್ದೆನ್ನಿಸಿಕೊಂಡಿದೆ. ಆ ಸಿನಿಮಾ ಇನ್ನೇನು ಬಿಡುಗಡೆಗೊಳ್ಳಲಿದೆ. ಸದರಿ ಚಿತ್ರದ ಚಿತ್ರೀಕರಣ ನಡೆಯುತ್ತಿದ್ದಾಗ ಆ ಸೆಟ್ಟಿಗೆ ನಿರ್ದೇಶಕ ಚೇತನ್ ಜೋಡಿದಾರ್ ಭೇಟಿ ಕೊಟ್ಟಿದ್ದರಂತೆ. ಆ ಸಂದರ್ಭದಲ್ಲಿ ರಾಜೀವ್ ಅವರನ್ನು ಸಂಪರ್ಕಿಸಿದ ಚೇತನ್ ಅವರು ಟೈಮ್ ಪಾಸ್ ಚಿತ್ರದ ಬಗ್ಗೆ ಮಾತಾಡಿದ್ದರು. ಈ ಮೂಲಕ ರಾಜೀವ್ ಗಣೇಸನ್ ಟೈಮ್ ಪಾಸ್ ಚಿತ್ರದ ಛಾಯಾಗ್ರಾಹಕರಾಗಿ ಅಖಾಡಕ್ಕಿಳಿದಿದ್ದರು.

ಆರಂಭದಲ್ಲಿಯೇ ಚೇತನ್ ಅವರು ಇಂಚಿಂಚನ್ನೂ ವಿವರಿಸಿ ಕಥೆ ಹೇಳಿದ ರೀತಿಯೇ ರಾಜೀವ್ ಅವರಿಗೆ ಹಿಡಿಸಿತ್ತಂತೆ. ಅಷ್ಟಕ್ಕೂ ಚೇತನ್ ಅವರೊಂದಿಗೆ ರಾಜೀವ್ ಗೆಳೆತನಕ್ಕೆ ಅದಾಗಲೇಢ ಮೂರು ವರ್ಷ ಕಳೆದಿತ್ತು. ಆ ಸ್ನೇಹ ಸದರಿ ಸಿನಿಮಾದ ಮೂಲಕ ಮತ್ತಷ್ಟು ಗಾಢವಾಗಿದೆ. ಆರಂಭದಲ್ಲಿ ಕಥೆ ಹೇಳಿದ ನಂತರ ಒಂದು ವರ್ಷ ಕಳೆದ ನಂತರ ಮತ್ತೆ ಚೇತನ್ ಕಡೆಯಿಂದ ಕರೆ ಬಂದಿದ್ದೇ ಟೈಮ್ ಪಾಸ್ ಚಿತ್ರೀಕರಣ ಚಾಲೂ ಆಗಿತ್ತು. ಆ ನಂತತರದಲ್ಲಿ ಚಿತ್ರೀಕರಣದ ಹಂತದಲ್ಲಿ ಏನೇ ಸಲಹೆ ಸೂಚನೆ ನೀಡಿದರೂ ಕಡೆಗಣಿಸದೆ, ಎಲ್ಲರನ್ನೂ ಒಳಗೊಂಡು ಸಾಗುವ ಚೇತನ್ ಜೋಡಿದಾರ್ ನಿರ್ದೇಶನದ ಶೈಲಿ ರಾಜೀವ್‌ರನ್ನು ಸೆಳೆದುಕೊಂಡಿದೆ. ಈ ಚಿತ್ರದ ಮೂಲಕವೇ ತಮ್ಮ ಕನಸಿನ ಪಯಣಕ್ಕೆ ಮತ್ತಷ್ಟು ಕಸುವು ಸಿಗಲಿದೆಯೆಂಬ ಭರವಸೆಯೂ ಅವರಲ್ಲಿದೆ.

ಬಿಎಸ್‌ಸಿ ಪದವಿ ಪೂರೈಸಿಕೊಂಡ ಕ್ಷಣದಿಂದಲೇ ರಾಜೀವ್ ಗಣೇಸನ್ ಪಾಲಿಗೆ ನಿರ್ದೇಶನವೇ ಬದುಕಿನ ಉದ್ದೇಶವಾಗಿತ್ತು. ಆದರೆ ಅನಿವಾರ್ಯತೆಗಳಿಗೆ ವಶವಾಗಿ ೨೦೦೮ರಲ್ಲಿ ಕಾಲೇಜೊಂದರಲ್ಲಿ ವಿಎಫ್‌ಎಕ್ಸ್ ಬಗೆಗೆ ಬೋಧಿಸುವ ಕೆಲಸವನ್ನು ಆರಂಭಿಸಿದ್ದರು. ನಾಲಕ್ಕು ವರ್ಷ ಅದರಲ್ಲಿ ಮುಂದುವರೆದ ರಾಜೀವ್ ತನ್ನ ಕನಸಿನತ್ತ ಹೊರಳಿಕೊಂಡು, ಖ್ಯಾತ ನಿರ್ದೇಶಕ ನಾಗಾಭರಣರ ಪುತ್ರ ಪನ್ನಗ ಭರಣ ನಿರ್ದೇಶನದ ಸಿನಿಮಾದಲ್ಲಿ ಸಹಾಯಕ ನಿರ್ದೇಶನದ ಅವಕಾಶ ಪಡೆದುಕೊಂಡಿದ್ದರು. ಕಾರಣಾಂತರಗಳಿಂದ ಆ ಸಿನಿಮಾ ಟೇಕಾಫ್ ಆಗಲಿಲ್ಲ. ನಂತರ ಅದೇ ವರ್ಷ ಸಿನಿಮಾ ಶಾಲೆ ಸೇರಿಕೊಂಡು, ಒಂದಷ್ಟು ಪಟ್ಟುಗಳನ್ನೂ ರಾಜೀವ್ ಕರಗತ ಮಾಡಿಕೊಂಡಿದ್ದರು.

ಕಡೆಗೂ ಒಂದಷ್ಟು ಒಲವಿದ್ದ ಸಿನಿಮಾಟೋಗ್ರಫಿಯತ್ತ ವಾಲಿಕೊಂಡ ಅವರಿಗೆ ಒಂದಷ್ಟು ಅವಕಾಶಗಳು ಒಲಿದು ಬರಲಾರಂಭಿಸಿದ್ದವು. ಸದ್ಯದ ಮಟ್ಟಿಗೆ ಅವರು ಛಾಯಾಗ್ರಾಹಕರಾಗಿ ಕೆಲಸ ಮಾಡಿರುವ ಒಂದಷ್ಟು ಸಿನಿಮಾಗಳು ಬಿಡುಗಡೆಯ ರೇಸಿನಲ್ಲಿವೆ. ಅದೆಲ್ಲರ ನಡುವೆ ಟೈಮ್ ಪಾಸ್ ಚಿತ್ರ ಇದೇ ಅಕ್ಟೋಬರ್ ೧೭ರಂದು ತೆರೆಗಾಣುತ್ತಿದೆ. ಈ ಸಿನಿಮಾವನ್ನು ನಿರ್ದೇಶಕರು ಕಟ್ಟಿ ಕೊಟ್ಟಿರುಜವ ಬಗೆ, ಅದಕ್ಕೆ ಕಲಾವಿದರು ಜೀವ ತುಂಬಿರುವ ರೀತಿಗಳ ಬಗ್ಗೆ ರಾಜೀವ್ ಅವರಲ್ಲೊಂದು ಬೆರಗಿದೆ. ಟೈಮ್ ಪಾಸ್ ಪ್ರೇಕ್ಷಕರಿಗೆ ಹಿಡಿಸುತ್ತದೆಂಬಂಥಾ ಭರವಸೆಯೂ ಇದೆ. ಈ ಸಿನಿಮಾದ ನಂತರ ಅವಕಾಶ ಸಿಕ್ಕರೆ ಮೆಲ್ಲಗೆ ನಿರ್ದೇಶನದತ್ತ ಹೊರಡುವ ಆಲೋಚನೆ ರಾಜೀವ್‌ರದ್ದು. ಒಟ್ಟಾರೆಯಾಗಿ, ಓರ್ವ ಛಾಯಾಗ್ರಾಹಕನಾಗಿ ಟೈಮ್ ಪಾಸ್ ತನ್ನ ವೃತ್ತಿ ಬದುಕಿನ ಮಹತ್ವದ ಚಿತ್ರವೆಂಬ ಭಾವ ಅವರೊಳಗಿದೆ. ಮೂಲತಃ ತಮಿಳುನಾಡಿನವರಾದರೂ ಅಲ್ಲಿನ ಕನ್ನಡದ ನಂಟಿನ ಕುಟುಂಬದಿಂದ ಬಂದವರು ರಾಜೀವ್. ಕಲೆಗೆ ಭಾಷೆಯ ಹಂಗಿಲ್ಲ ಎಂಬ ಸಿದ್ಧಾಂತ ಹೊಂದಿರುವ ಅವರೀಗ ಕನ್ನಡ ಚಿತ್ರರಂಗದ ಭಾಗವಾಗಿದ್ದಾರೆ!

The post Time pass Kannada Movie: ಸಿನಿಮಾ ಧ್ಯಾನಕ್ಕೆ ಭಾಷೆಯ ಹಂಗಿಲ್ಲ! appeared first on Cini Shodha.

ಅಪ್ಪಟ ಬೆಂಗಳರು ಹುಡುಗ ಇಮ್ರಾನ್ ಪಾಷ ಸರಿಸುಮಾರು ಹದಿನಾಲಕ್ಕು ವರ್ಷಗಳಿಂದ ರಂಗಭೂಮಿಯಲ್ಲಿ ಸಕ್ರಿಯರಾಗಿ ತೊಡಗಿಸಿಕೊಂಡಿರುವವರು. ಖ್ಯಾತ ರಂಗಕರ್ಮಿ ಎಂ.ಎಸ್ ಸತ್ಯು ಮತ್ತು ಎಂ.ಸಿ ಆನಂದ್ ಅವರ ಗರಡಿಯಲ್ಲಿ ಪಳಗಿಕೊಂಡಿದ್ದ ಪಾಷಾ, ಇದೀಗ ತಮ್ಮದೇ ತಂಡ ಕಟ್ಟಿಕೊಂಡು ಹಿಂದಿ, ಇಂಗ್ಲಿಷ್ ನಾಟಕಗಳತ್ತಲೂ ತಮ್ಮ ಪರಿಧಿಯನ್ನು ವಿಸ್ತರಿಸಿಕೊಂಡಿದ್ದಾರೆ. ಆ ಹಾದಿಯಲ್ಲಿ ಅವರಿಗೆ ಪೂಜಾ ಪಾಂಡೆ ತ್ರಿಪಾಠಿ ಗುರುವಾಗಿ ಸಿಕ್ಕಿದ್ದಾರೆ. ಹೀಗೆ ಸಕ್ರಿಯವಾಗಿ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿರುವ ಇಮ್ರಾನ್ ಪಾಷಾ ಪಾಲಿಗೆ ಆರಂಭದಿಂದಲೂ ವಜ್ರಮುನಿ ಎಂದರೆ ಬಲು ಅಭಿಮಾನ. ವಜ್ರಮುನಿಯವರ ಅಭಿನಯವನ್ನು ಕಣ್ತುಂಬಿಕೊಳ್ಳುತ್ತಲೇ ಸಾಗಿ ಬಂದ ಇಮ್ರಾನ್‌ರೊಳಗೆ ಆ ಕಾರಣದಿಂದಲೇ ಸಿನಿಮಾ ನಟನಾಗುವ ಕನಸು ಟಿಸಿಲೊಡೆದಿತ್ತು.

ಮೂಲತಃ ಸಾಪ್ಟ್‌ವೇರ್ ಇಂಜಿನಿಯರ್ ಆಗಿರುವ ಇಮ್ರಾನ್ ಪಾಷಾ ಆರಂಭದಲ್ಲಿ ಮೂರು ವರ್ಷಗಳ ಕಾಲ ಟಿಸಿಎಸ್ ಕಂಪೆನಿಯಲ್ಲಿ ಕೆಲಸ ಮಾಡಿದ್ದರು. ಆದರೆ, ಅವರ ಒಲವೆಲ್ಲವೂ ಕಲಾಕೇಂದ್ರಿತವಾಗಿದ್ದದ್ದರಿಂದ ಆ ಕ್ಷೇತ್ರದಲ್ಲಿ ಹೆಚ್ಚು ಕಾಲ ಇಕರಲು ಸಾಧ್ಯವಾಗಿರಲಿಲ್ಲ. ಕಡೆಗೂ ಕಲೆಯ ಸೆಳವಿಗೆ ಸಿಕ್ಕು ಕೈತುಂಬಾ ಸಂಪಾದನೆಯಿದ್ದ ಕೆಲಸವನ್ನು ಬಿಟ್ಟು ಬಂದಿದ್ದ ಪಾಷಾ, ರೇಡಿಯೋ ಮಿರ್ಷಿಯಲ್ಲಿ ಸೀನಿಯರ್ ಪ್ರೊಡ್ಯೂಸರ್ ಆಗಿ ಕಾರ್ಯನಿರ್ವಹಿಸಿದ್ದರು. ನಂತರ ನಮ್ ರೇಡಿಯೋದಲ್ಲಿ ಆರ್‌ಜೆ ಆಗಿ ಒಂದಷ್ಟು ವರ್ಷಗಳ ಕಾಲ ಕೆಲಸ ಮಾಡಿದ್ದ ಇಮ್ರಾನ್‌ಗೆ ಒಂದಷ್ಟು ಖ್ಯಾತಿ ಸಿಕ್ಕಿತ್ತು. ಇದಾದ ನಂತರ ತನ್ನ ಬದುಕೇನಿದ್ದರೂ ನಟನೆಗೇ ಅರ್ಪಿತ ಅಂತೊಂದು ನಿರ್ಧಾರ ಮಾಡಿದವರೇ ರಂಗಭೂಮಿಗೆ ಅಡಿಯಿರಿಸಿದ್ದರು.

ರಂಗಭೂಮಿಯ ಜೊತೆ ಜೊತೆಗೇ ಉದಯ ಮ್ಯೂಸಿಕ್ ಚಾನೆಲ್ಲಿನಲ್ಲಿ ಒಂಬತ್ತು ವರ್ಷಗಳ ಕಾಲ ಆಂಕರ್ ಆಗಿಯೂ ಕೆಲಸ ಮಾಡಿದ್ದ ಇಮ್ರಾನ್ ಪಾಶಾ ಜ್ಯೂನಿಯರ್ ಆರ್ಟಿಸ್ಟ್ ಆಗಿ ಅದೃಷ್ಟ ಪರೀಕ್ಷೆಗಿಳಿದಿದ್ದರು. ಈ ಹಾದಿಯಲ್ಲಿ ಲೆಕ್ಕವಿಲ್ಲದಷ್ಟು ಸಿನಿಮಾಗಳಲ್ಲಿ ಸಣ್ಣ ಪುಟ್ಟ ಪಾತ್ರಗಳಲ್ಲಿ ನಟಿಸುತ್ತಾ ಬಂದಿದ್ದ ಇಮ್ರಾನ್ ಪಾಲಿಗೆ ಆ ಹೆಜ್ಜೆಗಳೆಲ್ಲವೂ ಗಮ್ಯವನ್ನು ಹತ್ತಿರಾಗಿಸುತ್ತವೆಂಬ ಭಾವವಿತ್ತು. ಕಡೆ ಕಡೆಗೆ ತನ್ನಿಷ್ಟದಂತೆಯೇ ಮುಖ್ಯವಾದ ಖಳನ ಪಾತ್ರಗಳು ಒಲಿದು ಬರಲಾರಂಭಿಸಿದ್ದವು. ಅಂಥಾ ಗುರುತಿಟ್ಟುಕೊಳ್ಳಬಹುದಾದ ಪಾತ್ರಗಳಲ್ಲಿ ಮೂವತ್ತಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಇಮ್ರಾನ್ ನಟಿಸಿದ್ದಾರೆ. ಈ ನಡುವೆ ನಿರೂಪಕನಾಗಿಯೂ ಕಾರ್ಯನಿರ್ವಹಿಸುತ್ತಿದ್ದ ಇಮ್ರಾನ್‌ರ ವೃತ್ತಿ ಬದುಕು ಮಹತ್ವದ ಘಟ್ಟದತ್ತ ಹೊರಳಿಕೊಂಡಿದ್ದು ಟೈಮ್ ಪಾಸ್ ಚಿತ್ರದಲ್ಲಿ ಕೂಡಿ ಬಂದ ಅವಕಾಶದ ಮೂಲಕ!

ವರ್ಷಗಳ ಹಿಂದೆ ಅದಾಗಲೇ ಟೈಮ್ ಪಾಸ್ ಚಿತ್ರಕ್ಕೆ ತಯಾರಿ ಮಾಡಿಕೊಂಡಿದ್ದ ಚೇತನ್ ಜೋಡಿದಾರ್ ನಾಟಕವೊಂದನ್ನು ನೋಡಲು ಹೋಗಿದ್ದರು. ಆ ನಾಟಕದಲ್ಲಿ ಪಾತ್ರವೊಂದನ್ನು ನಿರ್ವಹಿಸಿದ್ದ ಇಮ್ರಾನ್‌ರನ್ನು ಕಂಡು ಮಾತಾಡಿಸಿದ್ದರಂತೆ. ಬಳಿಕ ಈ ಸಿನಿಮಾ ಬಗ್ಗೆ ಮಾತಾಡಿದ್ದ ಚೇತನ್ ಜೋಡಿದಾರ್, ಸಹ ನಿರ್ದೇಶಕಿ ವೈಷ್ಣವಿ ಮೂಲಕ ಕಥಾ ಹಂದರವನ್ನು ವಿವರಿಸಿದ್ದರು. ಅದಾಗಿ ಒಂದಷ್ಟು ಕಾಲ ನೀರವ ವಾತಾವರಣವಿತ್ತು. ಕಡೆಗೂ ಅಚಾನಕ್ಕಾಗಿ ಕರೆ ಮಾಡಿದ್ದ ಚೇತನ್ ಅವರು ಮುಖ್ಯ ಪಾತ್ರದಲ್ಲಿ ನಟಿಸಲು ಹೇಳಿದಾಗ ಇಮ್ರಾನ್‌ಗೆ ಖುಷಿ ಮತ್ತು ಭಯ ಒಟ್ಟೊಟ್ಟಿಗೇ ಕಾಡಿತ್ತಂತೆ. ಆದರೂ, ಅದಾಗಿಯೇ ಒಲಿದು ಬಂದ ಅವಕಾಶವನ್ನು ಸಂಪೂರ್ಣವಾಗಿ ಬಳಸಿಕೊಳ್ಳುವ ಸಂಕಲ್ಪದೊಂದಿಗೆ ಇಮ್ರಾನ್ ಟೈಮ್ ಪಾಸ್ ಭಾಗವಾಗಿದ್ದರು.

ಡಾರ್ಕ್ ಕಾಮಿಡಿ ಜಾನರಿನ ಈ ಸಿನಿಮಾದಲ್ಲಿ ಶಂಕರ್ ಎಂಬ ಮುಖ್ಯ ಪಾತ್ರಕ್ಕೆ ಇಮ್ರಾನ್ ಪಾಷಾ ಜೀವ ತುಂಬಿದ್ದಾರೆ. ಆ ಪಾತ್ರದ ಚಹರೆಗಳನ ನು ಒಳಗಿಳಿಸಿಕೊಂಡು, ಅದಕ್ಕಾಗಿ ಒಂದಷ್ಟು ತಾಲೀಮು ನಡೆಸಿಯೇ ಇಮ್ರಾನ್ ಬಣ್ಣ ಹಚ್ಚಿದ್ದಾರೆ. ನಿರ್ದೇಶಕನಾಗೋ ಕನಸು ಹೊತ್ತು ಸಾಗುವ ಆ ಪಾತ್ರದಲ್ಲಿ ಉತ್ಕಟವಾಗಿ ಹಬ್ಬಿಕೊಂಡಿರುವ ಸಿನಿಮಾ ಧ್ಯಾನಕ್ಕೂ, ತಗನ್ನೊಳಗಿನ ಸಿನಿಮಾ ಪ್ರೇಮಕ್ಕೂ ಸಾಮ್ಯತೆಗಳಿವೆ ಎನ್ನುವ ಇಮ್ರಾನ್‌ಗೆ, ಈ ಪಾತ್ರದ ಮೂಲಕವೇ ತನ್ನ ಕನಸಿನ ಹಾದಿ ಸುಗಮವಾಗುತ್ತದೆಂಬ ಭರವಸೆಯಿದೆ. ಈ ಸಿನಿಮಾದಲ್ಲಿ ಮುಖ್ಯ ಪಾತ್ರ ಸಿಕ್ಕರೂ ಕೂಡಾ, ಮುಂದೆ ಕೂಡಾ ಅಂಥಾದ್ದೇ ಪಾತ್ರಗಳು ಬೇಕೆಂಬ ಇಂಗಿತ ಅವರಲ್ಲಿಲ್ಲ. ಪಾತ್ರ ಯಾವುದಾದರೂ ಸರಿ; ಒಳ್ಳೆ ನಟನಾಗಿ ನೆಲೆಗಾಣಬೇಕೆಂಬುದು ಇಮ್ರಾನ್‌ರ ಏಕಮಾತ್ರ ಆಸೆ.

ಮೊದಲೇ ಹೇಳಿದಂತೆ ವಜ್ರಮುನಿಯ ಖಟ್ಟರ್ ಭಕ್ತನಾಗಿರುವ ಇಮ್ರಾನ್‌ಗೆ ನೆಗೆಟಿವ್ ರೋಲ್‌ಗಳತ್ತಲೇ ಹೆಚ್ಚು ಒಲವಿದೆ. ಈಗಾಗಲೇ ಅವರು ನಟಿಸಿರುವ ಮತ್ತೊಂದಷ್ಟು ಸಿನಿಮಾಗಳೂ ಕೂಡಾ ಬಿಡುಗಡೆಯ ಹಾದಿಯಲ್ಲಿವೆ. ಟೈಮ್ ಪಾಸ್ ಚಿತ್ರದ ಬಗ್ಗೆ ಅವರೊಳಗೆ ಗಾಢವಾದ ನಿರೀಕ್ಷೆಗಳಿದ್ದಾವೆ. ಅಪರಿಚಿತನಾಗಿದ್ದ ತನಗೆ ಈ ಚಿತ್ರದಲ್ಲಿ ಮುಖ್ಯ ಪಾತ್ರ ಕೊಟ್ಟು ಪ್ರೋತ್ಸಾಹಿಸಿದ, ಮಾಶರ್ಗದರ್ಶನ ನೀಡಿದ ಚೇತನ್ ಜೋಡಿದಾರ್ ಮತ್ತು ಸಾಥ್ ಕೊಟ್ಟ ಚಿತ್ರತಂಡದ ಬಗ್ಗೆ ಕೃತಜ್ಞತಾ ಭಾವವಿದೆ. ಅಂತೂ ಟೈಮ್ ಪಾಸ್ ಮೂಲಕ ಇಮ್ರಾನ್ ಪಾಷಾ ಚಿತ್ರರಂಗದಲ್ಲಿ ಗಟ್ಟಿಯಾಗಿ ನೆಲೆ ಕಂಡುಕೊಳ್ಳುವ ಸೂಚನೆಗಳು ದಟ್ಟವಾಗಿವೆ.

The post Timepass Kannada Movie: ರಂಗಭೂಮಿ ಪ್ರತಿಭೆಗೆ ದಕ್ಕಿದ ಚೆಂದದ ಪಾತ್ರ! appeared first on Cini Shodha.

ಸದ್ದಿಲ್ಲದೆ ಚಿತ್ರೀಕರಣ ಮುಗಿಸಿಕೊಂಡಿರುವ ನಿರ್ದೇಶಕ ಚೇತನ್ ಜೋಡಿದಾರ್ ಇದೀಗ ಒಟ್ಟಾರೆ ಸಿನಿಮಾದ ಬಗ್ಗೆ ಒಂದಷ್ಟು ವಿಚಾರಗಳನ್ನು ತೆರೆದಿಟ್ಟಿದ್ದಾರೆ. ಇಲ್ಲಿ ಕನ್ನಡ ಸಿನಿಮಾ ರಂಗದ ಇಂದಿನ ಸ್ಥಿತಿಗತಿಗಳ ಕೇಂದ್ರದಲ್ಲಿ ಚಲಿಸುವ ಕಥನವಿದೆ. ಅದನ್ನು ಪಕ್ಕಾ ಹಾಸ್ಯದ ಧಾಟಿಯಲ್ಲಿ ಪ್ರೇಕ್ಷಕರತ್ತ ದಾಟಿಸುವ ಪ್ರಯತ್ನ ಮಾಡಲಾಗಿದೆ. ಇದು ಡಾರ್ಕ್ ಹ್ಯೂಮರ್ ಜಾನರಿಗೆ ಸೇರುವ ಚಿತ್ರ ಎಂಬ ವಿಚಾರವನ್ನೂ ಚಿತ್ರತಂಡ ಖಚಿತಪಡಿಸಿದೆ. ಇಂಥಾ ಹೊಸಬರ ತಂಡಗಳು ಆಗಮಿಸಿದಾಗ ಪ್ರೇಕ್ಷಕರಲ್ಲೊಂದು ಕೌತುಕ ತಾನೇ ತಾನಾಗಿ ಚಿಗಿತುಕೊಳ್ಳುತ್ತದೆ. ಅದಕ್ಕೆ ಕಾರಣವೂ ಇಲ್ಲದಿಲ್ಲ. ಹೊಸಬರ ಆಗಮನವಾದಾಗ ತಾಜಾ ಕಥನವೊಂದು ದೃಶ್ಯರೂಪ ಧರಿಸುತ್ತದೆಂಬ ಗಾಢ ನಂಬಿಕೆ ಪ್ರೇಕ್ಷಕರಲ್ಲಿದೆ. ಅದು ಟೈಮ್ ಪಾಸ್ ವಿಚಾರದಲ್ಲಿಯೂ ನಿಜವಾಗುತ್ತಾ ಎಂಬ ಪ್ರಶ್ನೆಗೆ ಇಕಷ್ಟರಲ್ಲಿಯೇ ಉತ್ತರ ಸಿಗಲಿದೆ.

ಸಾಮಾನ್ಯವಾಗಿ ಸನಿಮಾರಂಗಕ್ಕೆ ನಿರ್ದೇಶಕರಾಗಿ ಆಗಮಿಸುವವರು ದಶಕಗಟ್ಟಲೆ ಸಿನಿಮಾ ರಂಗದ ಭಾಗವಾಗಿ ಕಾರ್ಯ ನಿರ್ವಹಿಸಿರುತ್ತಾರೆ. ನಾನಾ ನಿರ್ದೇಶಕರ ಮಾರ್ಗದರ್ಶನದಲ್ಲಿ ಪಳಗಿಕೊಂಡಿರುತ್ತಾರೆ. ಆದರೆ, ಟೈಮ್ ಪಾಸ್ ಚಿತ್ರದ ನಿರ್ದೇಶಕ ಚೇತನ್ ಜೋಡಿದಾರ್ ವಿಚಾರದಲ್ಲಿ ಮಾತ್ರ ಭಿನ್ನ ಹಿನ್ನೆಲೆಯೊಂದಿದೆ. ಚೇತನ್ ಜೋಡಿದಾರ್ ಈವರೆಗೂ ಯಾವ ನಿರ್ದೇಶಕರೊಂದಿಗೂ ಕೆಲಸ ಮಾಡಿಲ್ಲ. ಸಿನಿಮಾ ಸಂಬಂಧಿತವಾದ ಯಾವ ಕೋರ್ಸುಗಳನ್ನೂ ಅವರು ಮಾಡಿಕೊಂಡಿಲ್ಲ. ಸಿನಿಮಾ ನೋಡುತ್ತಾ, ಯೂಟ್ಯೂಬ್ ಮೂಲಕ ಅನೇಕ ಪಟ್ಟುಗಳನ್ನು ಕರಗತ ಮಾಡಿಕೊಳ್ಳುತ್ತಲೇ ಅವರು ಸ್ವತಂತ್ರ ನಿರ್ದೇಶಕರಾಗಿದ್ದಾರೆ.

ಶ್ರೀ ಚೇತನ ಸರ್ವಿಸಸ್ ಬ್ಯಾನರಿನಡಿಯಲ್ಲಿ ಗುಂಡೂರು ಶೇಖರ್, ಕಿರಣ್ ಕುಮಾರ್ ಶೆಟ್ಟಿ, ಎಂ.ಹೆಚ್ ಕೃಷ್ಣಮೂರ್ತಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ರಂಗದ ನಾನಾ ವಿಭಾಗಗಳಲ್ಲಿ ಕಾರ್ಯ ನಿರ್ವಹಿಸಬೇಕೆಂಬ ಕನಸು ಕಂಡ ಏಳು ಪಾತ್ರಗಳ ಸಂಗಮದ ಮೂಲಕ ಈ ಕಥನ ತೆರೆದುಕೊಳ್ಳುತ್ತದೆಯಂತೆ. ಅನೇಕ ತಿರುವುಗಳೊಂದಿಗೆ, ಭರಪೂರ ಮನೋರಂಜನೆಯೊಂದಿಗೆ ಈ ಚಿತ್ರ ಪ್ರೇಕ್ಷಕರಿಗೆ ಹಿಡಿಸಲಿದೆ ಎಂಬ ನಂಬಿಕೆ ನಿರ್ದೇಶಕರದ್ದು. ಇಲ್ಲಿ ಎರಡು ಫೈಟ್ ಸೀನುಗಳು ಹಾಗೂ ನಾಲಕ್ಕು ಹಾಡುಗಳಿದ್ದಾವೆ. ಇಳೆಯರಾಜ ಮತ್ತು ಎ.ಆರ್ ರೆಹಮಾನ್ ಗರಡಿಯಲ್ಲಿ ಪಳಗಿಕೊಂಡವರು ಲೈವ್ ಮ್ಯೂಸಿಕ್ ಮೂಲಕ ಹಾಡುಗಳನ್ನು ರೂಪಿಸಿದ್ದಾರೆ.

ಇದುವರೆಗೂ ಸರಿಸುಮಾರು ಒಂಬೈನೂರಾ ಐವತ್ತರಷ್ಟು ಸಿನಿಮಾಗಳಿಗೆ ಕೆಲಸ ಮಾಡಿರುವ ಪ್ರಚಾರ ಕಲೆಯ ನಿಪುಣರಾದ ಮಣಿ ಅವರೇ ಈ ಚಿತ್ರದ ಪ್ರಚಾರ ಕಲೆಯ ಜವಾಬ್ದಾರಿ ನಿಭಾಯಿಸಿದ್ದಾರೆ. ಇಮ್ರಾನ್ ಪಾಷಾ, ವೈಸಿರಿ ಕೆ ಗೌಡ, ರತ್ಷಾರಾಮ್, ಕೆ. ಚೇತನ್ ಜೋಡಿದಾರ್, ಓಂ ಶ್ರೀ ಯಕ್ಷಶಿಫ್, ಪ್ರಭಾಕರ್ ರಾವ್, ನವೀನ್ ಕುಮಾರ್, ಸಂಪತ್ ಕುಮಾರ್, ಅಶ್ವಿನಿ ಶ್ರೀನಿವಾಸ್ ಮುಖ್ಯ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಗಿರೀಶ್ ಗೌಡ ಸಾಹಸ ನಿರ್ದೇಶನ, ವೈಷ್ಣವಿ ಸತ್ಯನಾರಾಯಣ್ ನೃತ್ಯ ನಿರ್ದೇಶನ, ರಾಜೀವ್ ಗಣೇಶ್ ಛಾಯಾಗ್ರಹಣ, ಮಣಿ ಪ್ರಚಾರ ಕಲೆ, ಡಿ. ಶಾಮಸುಂದರ್, ಬಿ.ಕೆ ದಯಾನಂದ ನಿರ್ಮಾಣ ನಿರ್ವಹಣೆ, ಹರಿ ಪರಮ್ ಸಂಕಲನ, ಡಿ.ಎಂ ಉದಯ ಕುಮಾರ್ (ಡಿಕೆ) ಸಂಗೀತ ನಿರ್ದೇಶನದಲ್ಲಿ ಈ ಚಿತ್ರ ಮೂಡಿ ಬಂದಿದೆ.

The post timepass movie: ಗಾಂಧಿನಗರಕ್ಕೆ ಕನ್ನಡಿ ಹಿಡಿಯಿತೇ ಹೊಸಬರ ತಂಡ? appeared first on Cini Shodha.