ನಿಜ, ಕಿಚ್ಚಾ ಸುದೀಪ್ (kiccha sudeep) ಹೆಚ್ಚಿನ ಸಂದರ್ಭಗಳಲ್ಲಿ ಅತ್ಯಂತ ಪ್ರಜ್ಞಾವಂತಿಕೆಯಿಂದ ನಡೆದುಕೊಳ್ಳುತ್ತಾರೆ. ಘನತೆ ಮುಕ್ಕಾಗದಂತೆ ಮಾತಾಡುತ್ತಾರೆ. ಆದರೆ, ಬರಬರುತ್ತಾ ಆತನ ನಡವಳಿಕೆಗಳಲ್ಲಿ ಇದುವರೆಗೂ ತಡೆಹಿಡಿದಂತಿದ್ದ ನಾಜೂಕಯ್ಯ ಅಪ್ರಜ್ಞಾಪೂರ್ವಕವಾಗಿ ಹಣಕಿ ಹಾಕಲಾರಂಭಿಸಿದ್ದಾನೆ. ಬೇಸ್ ವಾಯ್ಸಿನ ಭರಾಟೆಯಲ್ಲಿ ತನ್ನ ವಿರುದ್ಧ ಏಳೋ ಪ್ರಶ್ನೆಗಳನ್ನು ಹತ್ತಿಕ್ಕುವ ಅತಿ ಬುದ್ಧಿವಂತಿಕೆಯೂ ಯಥೇಚ್ಚವಾಗಿ ಪ್ರದರ್ಶನಗೊಳ್ಳಲಾರಂಭಿಸಿದೆ. ಇತ್ತೀಚೆಗೆ ಸಾಹೇಬರು ಪ್ರೆಸ್ ಮೀಟುಗಳನ್ನು ಎದುರಿಸುವ ರೀತಿಯೂ ಬದಲಾಗಿ ಬಿಟ್ಟಿದೆ. ಅದಕ್ಕೆ ರಮ್ಮಿ ಆಟದ ಬಗ್ಗೆ ತೂರಿಬಂದ ಪ್ರಶ್ನೆಗೆ ಕಿಚ್ಚನ ಕಡೆಯಿಂದ ಸಿಕ್ಕ ದುರಹಂಕಾರದ ಉತ್ತರಕ್ಕಿಂತಲೂ ಬೇರೆ ಉದಾಹರಣೆ ಬೇಕಿಲ್ಲವೇನೋ…

ಪ್ರತೀ ಸಾರಿಯೂ (bigboss season11) ಬಿಗ್ ಬಾಸ್ ಸ್ಪರ್ಧಿಗಳಾಗುವವರ ಬಗ್ಗೆ ತಕರಾರುಗಳೇಳುತ್ತವೆ. ಆದರೆ ಕಿಚ್ಚ ಯಾವತ್ತೂ ಆ ಬಗ್ಗೆ ನೇರಾನೇರ ಉತ್ತರ ಕೊಟ್ಟವರಲ್ಲ. ಬಂದು ಹೋದವರೆಲ್ಲ ಮಹಾತ್ಮರೇ ಎಂಬಂಥಾ ಗಾಢ ಭಂಡತನವೊಂದು ಅವರ ಮುಖದಲ್ಲಿ ಸದಾ ಹೊಳೆಯುತ್ತಿರುತ್ತದೆ. ಬರಬರುತ್ತಾ ಜೈಲಿಗೆ ಹೋಗಬಹುದಾದ ಆಸಾಮಿಗಳು, ಜೈಲಿಂದ ಬಂದವರೇ ಬಿಗ್ ಬಾಸ್ ಕ್ಯಾಂಡಿಡೇಟುಗಳು ಎಂಬಂತಾಗಿತ್ತು. ಈ ಬಾರಿ ಅದು ನೂರಕ್ಕೆ ನೂರರಷ್ಟು ಋಜುವಾತಾಗಿದೆ; ವಂಚನೆ ಕೇಸಲ್ಲಿ ಜೈಲುಪಾಲಾಗಿದ್ದ ಚೈತ್ರಾ ಕುಂದಾಪುರ ಎಂಬಾಕೆ ಬಿಗ್ ಬಾಸ್ ಮನೆ ಸೇರಿಕೊಳ್ಳುವ ಮೂಲಕ. ಈಕೆಯನ್ನು ಅದ್ಯಾವ ಮಾನದಂಡದ ಮೇಲೆ ಆರಿಸಿಕೊಂಡಿದ್ದಾರೋ ಕಿಚ್ಚನಿಗೆ ಮಾತ್ರವೇ ಗೊತ್ತಿರಲು ಸಾಧ್ಯ. ಬಾಯಿ ಬಿಟ್ಟರೆ ಹಿಂದುತ್ವ ಅಂತೆಲ್ಲ ಗಂಟಲು ಹರಿದುಕೊಳ್ಳುತ್ತಿದ್ದಾಕೆ ಚೈತ್ರಾ. ಬಾಬು ಪೂಜಾರಿ ಎಂಬಾತನಿಗೆ ಬಿಜೆಪಿ ಟಿಕೆಟು ಕೊಡಿಸೋ ನೆಪದಲ್ಲಿ ಕೋಟಿ ಕೋಟಿ ಕಿತ್ತದ್ದಷ್ಟೇ ಈಕೆಯ ಸಾಧನೆ.

ಮಾತೆತ್ತಿದ್ದರೆ ಧರ್ಮ ಧರ್ಮಗಳ ನಡುವೆ ಬೆಂಕಿ ಹಚ್ಚೋದು ಈಕೆಯ ಮಾಮೂಲು ಖಯಾಲಿ. ಧರ್ಮರಕ್ಷಕಿಯಂತೆ ಪೋಸು ಕೊಡುತ್ತಾ, ಆ ಪ್ರಭೆಯಲ್ಲಿ ಕಾಸೆತ್ತೋ ದಂಧೆಗಿಳಿದಿದ್ದಳೆಂಬ ಆರೋಪ ಚೈತ್ರಾ ಮೇಲಿದೆ. ಈಕೆ ಅದೆಂಥಾ ಕೆಲಸ ಮಾಡಿದ್ದಾಳೆಂದರೆ, ಅಸಲೀ ಹಿಂದೂತ್ವದ ಪ್ರತಿಪಾದಕರೇ ಚೈತ್ರಾಳ ಹೆಸರೆತ್ತಿದರೆ ಕೆಂಡ ಕಾರುತ್ತಾರೆ. ಇಂಥವಳನ್ನು ಬಿಗ್ ಬಾಸ್ ಶೋಗೆ ಕರೆದುಕೊಂಡಿರೋ ಆಯೋಜಕರು ಈ ಸಮಾಜಕ್ಕೆ ಯಾವ ರೀತಿಯ ಸಂದೇಶ ರವಾನಿಸುತ್ತಾರೆ? ಈವತ್ತಿಗೆ ಅಸಲೀ ಪ್ರತಿಭೆ ಹೊಂದಿರುವ ಅನೇಕರು ಬಿಗ್ ಬಾಸ್ ಶೋನಲ್ಲಿ ಒಂದು ಅವಕಾಶ ಸಿಗಲೆಂಬಂತೆ ಕಾದು ಕೂತಿರೋದು ಸತ್ಯ. ಇಂಥಾ ತಲೆತಿರುಕ ಆಸಾಮಿಗಳನ್ನು ಒಳಬಿಟ್ಟುಕೊಂಡಾಗ ಪ್ರತಿಭಾವಂತರ ಮನಃಸ್ಥಿತಿ ಹೇಗಾಗಬೇಡ? ಪ್ರತಿಭೆ ಹೊಂದಿರುವವರೆಲ್ಲ ಧಗಾ ದಗಲುಬಾಜಿ ನಡೆಸಿ ಒಂದು ರೌಡು ಜೈಲಿಗೆ ಹೋಗಿ ಬರೋದಷ್ಟೇ ಈ ಶೋಗೆ ಬೇಕಾದ ಅರ್ಹತೆ ಅನ್ನಿಸೋದಿಲ್ಲವೇ?

ಖಂಡಿತವಾಗಿಯೂ ಇಂಥಾ ಪ್ರಶ್ನೆಗಳಿಗೆ ನಾಜೂಕಯ್ಯ ಕಿಚ್ಚ ಉತ್ತರಿಸೋದಿಲ್ಲ. ರಮ್ಮಿ ಎಂಬೋ ಆನ್ ಲೈನ್ ಗೇಮ್ ಬಿಗ್ ಬಾಸ್ ಸಂಗ ಮಾಡಿದೆಯಲ್ಲಾ? ಈ ಬಗ್ಗೆ ಎದ್ದ ಪ್ರಶ್ನೆಗೆ ಕಿಚ್ಚ ನಾಜೂಕಿನ ಉತ್ತರ ಕೊಟ್ಟಿದ್ದಾರೆ. ಇದರ ಬಗ್ಗೆ ಆಳೋ ಸರ್ಕಾರವನ್ನು ಕೇಳಬೇಕು ಅಂತೆಲ್ಲ ಮೇಧಾವಿಯಂತೆ ಮಾತಾಡಿದ್ದಾರೆ. ಎಲ್ಲವನ್ನೂ ಆಳೋ ಸರ್ಕಾರಗಳೇ ಮಾಡೋದಾದರೆ ಕಿಚ್ಚನಂಥಾ ಹೀರೋಗಳಿಗೇನು ಕೀಳೋ ಕೆಲಸವೇ? ಓರ್ವ ಹೀರೋ ಆಗಿ ಕಿಚ್ಚನಿಗೆ ಸಾಮಾಜಿಕ ಕಳಕಳಿ ಇಲ್ಲವೇ? ರಮ್ಮಿ ಸರ್ಕಲ್ಲಿನಂಥಾ ಆನ್ ಲೈನ್ ಜೂಜಿನ ದೆಸೆಯಿಂದ ಈವತ್ತು ಅನೇಕರ ಸಂಸಾರ ಬೀದಿಗೆ ಬಂದಿದೆ. ಮತ್ತೆ ಕೆಲ ಮಂದಿ ಸಾಲದ ಶೂಲದಿಂದ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ಇಂಥಾ ಸಾವುಗಳ ಸೂತಕ ಸೋಕದ ವ್ಯಕ್ತಿತ್ವವೊಂದು ಅದು ಹೇಗೆ ಹೀರೋ ಆಗಿ ಮೆರೆಯಲು ಸಾಧ್ಯ? ಕಿಚ್ಚನ ಬಗ್ಗೆ ಒಂದು ಘಟ್ಟದಲ್ಲಿ ಗೌರವ ಹೊಂದಿದ್ದವರಿಗೆಲ್ಲ ಈಗ ಭ್ರಮನಿರಸನವಾಗಿದೆ. ಯಾಕೆಂದರೆ, ಆತನ ವ್ಯಕ್ತಿತ್ವವೀಗ ಕಾಸಿನಾಸೆಯ ಕೊಚ್ಚೆಯಲ್ಲಿದೆ. ಮಿಸ್ಟರ್ ಸುದೀಪ್… ನಿಮ್ಮ ಸೀಮೆಗಿಲ್ಲದ ಬೇಸ್ ವಾಯ್ಸಿನಿಂದ ಸತ್ಯವನ್ನು ಹತ್ತಿಕ್ಕಲಾಗೋದಿಲ್ಲ!

The post bigboss season11: ಹುಚ್ಚರ ಸಂತೆಯಲ್ಲೊಬ್ಬಳು ಚಿಗರೆಯಂಥಾ ವಂಚಕಿ! appeared first on Cini Shodha.

ಎರಡ್ಮೂರು ಸೀಜನ್ನಿನ ಬಿಗ್ ಬಾಸ್ ಶೋ ಸಂಪನ್ನಗೊಂಡಾಗಲೇ, ಇನ್ನು ಮುಂದೆ ಕಿಚ್ಚ ಈ ಶೋನಿಂದ ದೂರವಿದ್ದರೇ ಚೆನ್ನ ಎಂಬಂಥಾ ಮಾತುಗಳು ಕೇಳಿಬರಲಾರಂಭಿಸಿದ್ದವು. ಆ ಬಳಿಕ ಕಿಚ್ಚನ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದು ಬರಲಾರಂಭಿಸಿದ್ದ ನೆಗೆಟಿವ್ ಕಮೆಂಟುಗಳನ್ನು ಕಂಡು ಖುದ್ದು ಅಭಿಮಾನಿಗಳೇ ಬೇಸರಗೊಂಡಿದ್ದರು. ಈವತ್ತಿಗೆ ಅಂಥಾ ಅಭಿಮಾನಿ ಬಳಗಕ್ಕೆ ಕೂಡಾ ಕಿಚ್ಚ ಈ ಬೂಸಾ ಶೋನ ಸಾರಥ್ಯ ವಹಿಸೋದು ಕಿಂಚಿತ್ತೂ ಇಷ್ಟವಿಲ್ಲ. ಆದರೆ ವರ್ಷದ ಬಹುಭಾಗವನ್ನು ಈ ಶೋನಲ್ಲಿಯೇ ಕಳೆಯುತ್ತಿರೋ ಕಿಚ್ಚನಿಗೆ ತನ್ನ ಅಭಿಮಾನಿಗಳ ಮನದಾಅರ್ಥವಗದಿರೋದು ನಿಜಕ್ಕೂ ದುರಂತ.

ಹೊರ ಜಗತ್ತಿನಲ್ಲಿ ಇಂಥಾ ಪಲ್ಲಟಗಳಾಗುತ್ತಿರುವಾಗ, ಬಿಗ್ ಬಾಸ್ ಹತ್ತನೇ ಆವೃತ್ತಿಗೆ ಸಕಲ ತಯಾರಿಗಳೂ ನಡೆಯುತ್ತಿದ್ದಾವೆ. ಆರಂಭದ ದಿನಗಳಲ್ಲಿ ಹೀಗೆ ಹೊಸಾ ಆವೃತ್ತಿ ಶುರುವಾಗುವಾಗ, ಈ ಬಾರಿ ಯಾರೆಲ್ಲಾ ಬರ್ತಾರೆ ಎಂಬಂಥಾ ಕುತೂಹಲ ಇರುತ್ತಿದ್ದದ್ದು ನಿಜ. ಆದರೀಗ ಹಾಗೆ ಬರುವವರಲ್ಲಿ ಬಹುತೇಕರು ತಿಕ್ಕಲು ಆಸಾಮಿಗಳೇ ಎಂಬ ವಿಚಾರ ಎಲ್ಲರಿಗೂ ಮನದಟ್ಟಾಗಿದೆ. ಕಳೆದ ಬಾರಿ ಓಟಿಟಿ ಅಂತೊಂದು ಹೊಸಾ ವರಸೆ ಶುರುವಿಟ್ಟುಕೊಂಡಿದ್ದರಲ್ಲಾ? ಅದಕ್ಕೆ ಸೆಲೆಬ್ರಿಟಿಗಳ ಹೆಸರಲ್ಲಿ ದಾಂಗುಡಿಯಿಟ್ಟವರ ಮುಸುಡಿ ನೋಡಿಯೇ ಪ್ರೇಕ್ಷಕರು ಬೆಚ್ಚಿಬಿದ್ದಿದ್ದರು. ಯಾವಾಗ ಟಿಕ್ ಟಾಕ್ ಮೂಲಕ ಚೆಲ್ಲಾಟ ಆರಂಭಿಸಿದ್ದ ಸೋನು ಗೌಡ ಕೂಡಾ ಬಿಗ್ ಬಾಸ್ ಮಂದಿಯ ಕಣ್ಣಲ್ಲಿ ಸೆಲೆಬ್ರಿಟಿಯಾದಳೋ, ಆ ಕ್ಷಣದಿಂದಲೇ ಬಿಗ್ ಬಾಸ್ ಶೋನ ಅಳಿದುಳಿದ ಘನತೆಯೂ ಮಣ್ಣುಪಾಲಾಗಿದೆ.

ಒಂದೆಡೆ ಯಾವುದೋ ಹಾಡಿಗೆ ಪ್ರಯಾಸ ಪಟ್ಟು ಲಿಪ್ ಸಿಂಕ್ ಮಾಡುತ್ತಾ, ಕೆಕರು ಮಕರಾಗಿ ಕುಣಿಯೋ ಸೋನು ಗೌಡ, ಇನ್ನೊಂದು ಕಡೆ ಸಿನಿಮಾ ಮಂದಿರದೆದುರು ಫಿಟ್ಸ್ ಬಂದವನಂತಾಡುತ್ತಾ, ಶಿಶುಪ್ರಾಸ ಉದುರಿಸೋ ನವಾಜ್ ಎಂಬ ತಿಕ್ಕಲು ಆಸಾಮಿ… ಇವರಂತೂ ಹಳೇಯ ಬಿಗ್ ಬಾಸ್ ಸ್ಪರ್ಧಿ ಫಟಿಂಗ ಪ್ರಥಮನನ್ನೇ ಮೀರಿಸುವ ಮಹಾನ್ ಪ್ರತಿಭೆಗಳು. ಇಂಥವರನ್ನೆಲ್ಲ ಗುಡ್ಡೆ ಹಾಕಿಕೊಳ್ಳುವ ಮೂಲಕ ಬಿಗ್ ಬಾಸ್ ಮಂದಿ ಸೆಲೆಬ್ರಿಟಿ ಎಂಬ ಪದದ ಪರಿಭಾಷೆಯನ್ನೇ ಬದಲಿಸಿ ಬಿಟ್ಟಿದ್ದರು. ಇಂಥವೆಲ್ಲ ಈ ಜನರ ಕಣ್ಣಿಗೆ ಅದು ಹೇಗೆ ಸೆಲೆಬ್ರಿಟಿಗಳಂತೆ, ಪ್ರತಿಭಾವಂತರಂತೆ ಕಾಣಿಸುತ್ತಾರೋ ಭಗವಂತನೇ ಬಲ್ಲ. ಚಾಲ್ತಿಯಲ್ಲಿರಲು ಈ ಸೈಕ್ ಗಿರಾಕಿಗಳು ಏನು ಮಾಡಲೂ ಹೇಸೋದಿಲ್ಲ. ಸರಕೆಲ್ಲ ಖಾಲಿಯಾದರೆ ವಾರ್ಡ್‍ರೋಬಿನಲ್ಲಿ ಬೂಸಲು ಹಿಡಿದ ಹಳೇ ಕಾಚಗಳ ಕಲೆಕ್ಷನ್ನು ಪ್ರದರ್ಶಿಸಲೂ ಈ ಅಸಹ್ಯದ ಪ್ರತಿಭೆಗಳು ಹಿಂದೆಮುಂದೆ ನೋಡುವುದಿಲ್ಲ!

ಇಂಥಾ ಕೆಲಸಕ್ಕೆ ಬಾರದವರನ್ನು ಒಂದು ಮನೆಯಲ್ಲಿ ಗುಡ್ಡೆ ಹಾಕಿಕೊಂಡು, ಅವುಗಳ ತಿಪ್ಪರಲಾಗವನ್ನು ಸೆನ್ಸೇಷನ್ ಎಂಬಂತೆ ತೋರಿಸುತ್ತಾ, ವಾರಕ್ಕೆರಡು ದಿನ ಘನ ಗಾಂಭೀರ್ಯದಿಂದ ಪಂಚಾಯ್ತಿ ನಡೆಸೋ ಕಿಚ್ಚ ಬಹಳಷ್ಟು ಸಲ ಕಾಮಿಡಿ ಪೀಸಿನಂತೆ ಕಾಣಿಸುತ್ತಾರೆ. ನಿಖರವಾಗಿ, ನಿಷ್ಠುರವಾಗಿ ಹೇಳಬೇಕೆಂದರೆ, ಬಿಗ್ ಬಾಸ್ ಎಂಬುದು ಕಿಚ್ಚನ ಘನತೆಯನ್ನು ಪಾತಾಳಕ್ಕಿಳಿಸುತ್ತಿದೆ. ಈ ಶೋವನ್ನು ಬರಖತ್ತಾಗಿಸಲು ನಾನಾ ಪಟ್ಟುಗಳನ್ನು ಪ್ರದರ್ಶಿಸಿದ್ದ ಪರಮೇಶ್ವರ್ ಗುಂಡ್ಕಲ್ ಈಗ ಬೇರೆಡೆಯಲ್ಲಿ ಪ್ರತಿಷ್ಟಾಪಿಸಲ್ಪಟ್ಟಿದ್ದಾರೆ. ಅವರ ಅವಧಿಯಲ್ಲಿಯೇ ಈ ಶೋನ ಮರ್ಯಾದೆ ಮಾಸಲಾಗಿ ಬಿಟ್ಟಿತ್ತು. ಇನ್ನು ಮುಂದೆ ಅದ್ಯಾರೇ ಇದರ ಸಾರಥ್ಯ ವಹಿಸಿದರೂ ಬಿಗ್ ಬಾಸ್ ಮೇಲೆ ನಿರೀಕ್ಷೆಯಿಟ್ಟುಕೊಳ್ಳುವಂತಿಲ್ಲ. ಯಾಕೆಂದರೆ, ಅದೀಗ ಬಿಗ್ ಬೂಸಾ ಶೋ ಆಗಿ ರೂಪಾಂತರಗೊಂಡು ಅಕ್ಷರಶಃ ಸವಕಲಾಗಿ ಬಿಟ್ಟಿದೆ. ಹೀಗಿದ್ದರೂ ಕಿಚ್ಚ ಮತ್ತೊಂದು ಸೀಜನ್ನಿಗೆ ಸಂಭ್ರಮದಿಂದ ತಯಾರಾಗುತ್ತಿರುವಾಗ ಅವರನ್ನು ಇಷ್ಟಪಡುವ ಮಂದಿಯ ಮನಸಿಗೆ ವಿಷಾದವೊಂದರ ಮುಳ್ಳು ಚುಚ್ಚಿದಂತಾಗಿದೆ. ಪ್ರೇಕ್ಷಕರೇ ಈ ಪರಿಯಾಗಿ ಉಗಿಯುತ್ತಿದ್ದರೂ ನಾಚಿಕೆಯಾಗೋದಿಲ್ಲವೇ ಸ್ವಾಮಿ?

The post bigboss season 10: ಪ್ರೇಕ್ಷಕರೇ ಉಗಿದರೂ ಮರ್ಯಾದೆ ಇಲ್ವಾ ಸ್ವಾಮಿ? appeared first on Cini Shodha.