ಕೌಟುಂಬಿಕ ವಾತಾವರಣದಲ್ಲಿ ಹೆಣ್ಣಿನ ವಿರುದ್ಧ ನಡೆಯೋ ತಣ್ಣಗಿನ ಕ್ರೌರ್ಯವನ್ನು ಅಷ್ಟೇ ತಣ್ಣಗೆ, ಪರಿಣಾಮಕಾರಿಯಾಗಿ ಕಟ್ಟಿಕೊಡುವಲ್ಲಿ ಸಿದ್ದು ಪೂರ್ಣಚಂದ್ರ ಗೆದ್ದಿದ್ದಾರೆ. ಯಾಕೆಂದರೆ, ಒಂದಷ್ಟು ಏಕತಾನತೆಯಿಂದ ತೆರೆದುಕೊಲ್ಳುವ ಈ ಸಿನಿಮಾ, ನಂತರದಲ್ಲಿ ಪ್ರತೀ ದೃಶ್ಯಗಳೂ ಪರದೆ ದಾಟಿ ನೋಡುಗರ ಮನಸಿಗಿಳಿದು ಚಲಿಸುವಂಥಾ ಸಮ್ಮೋಹಕ ಗುಣದೊಂದಿಗೆ ಬೆರಗು ಮೂಡಿಸುತ್ತೆ. ಯಾವ ಹಿನ್ನೆಲೆ ಸಂಗೀತದ ಅಬ್ಬರ, ಗಿಮಿಕ್ಕುಗಳೂ ಇಲ್ಲದೆ ನೋಡುಗರನ್ನು ದಿಗಿಲುಗೊಳಿಸುವ, ತುದಿ ಸೀಟಿಗೆ ತಂದು ಕೂರಿಸುವಂಥಾ ಕುತೂಹಲ ಮೂಡಿಸುವ ಮೂಲಕ ನಿರ್ದೇಶನದ ಕುಸುರಿ ಗಮನ ಸೆಳೆಯುತ್ತದೆ.

ಹೆತ್ತವರ ವಿರೋಧವನ್ನೂ ಲೆಕ್ಕಿಸದೆ ಪ್ರೀತಿಸಿ ಮದುವೆಯಾದ ಹೆಣ್ಣೊಬ್ಬಳು ಮಗುವೊಂದು ಮಡಿಲು ತುಂಬದೆ ಪಡುವ ಯಾತನೆ, ಬೇರೆಯವರ ಬದುಕನ್ನ ಹೀಗಳೆಯುವ ಈ ಸಮಾಜದ ವಿಕೃತಿ, ತನ್ನ ದೋಷಕ್ಕೂ ಅಹಮ್ಮಿಕೆ ಬೆರೆಸಿ ಹೆಣ್ಣಿನ ಮೇಲೆ ರಾಚುವ ಪುರುಷಹಂಕಾರದ ಜೊತೆ ಜೊತೆಗೇ, ನಮ್ಮ ನಡುವಿನ ಮತ್ತೊಂದು ಸ್ಥರದ ಬದುಕನ್ನೂ ಕೂಡಾ ನಿರ್ದೇಶಕರು ಕಟ್ಟಿ ಕೊಟ್ಟಿರುವ ರೀತಿ ನೋಡುಗರ ಮೆಚ್ಚುಗೆ ಗಳಿಸಿಕೊಳ್ಳುತ್ತದೆ. ಇಲ್ಲಿ ಅದ್ವಿತಿ ಶೆಟ್ಟಿ ಮಕ್ಕಳಾಗದ ಕೊರಗು ತುಂಬಿಕೊಂಡ ಅಪೇಕ್ಷಾ ಎಂಬ ಪಾತ್ರವನ್ನು ಅಕ್ಷರಶಃ ಜೀವಿಸಿದ್ದಾರೆ. ಸ್ವತಃ ಸಿದ್ದು ಪೂರ್ಣಚಂದ್ರ ಪತಿಯ ಪಾತ್ರವನ್ನು ಆವಾಹಿಸಿಕೊಂಡಂತೆ ನಟಿಸಿದ್ದಾರೆ.

ಲೋಕೇಂದ್ರ ಸೂರ್ಯ ನಿರ್ವಹಿಸಿರುವ ಪಾತ್ರವಂತೂ ನಾನಾ ಆಯಾಮಗಳಲ್ಲಿ ಕಾಡುವಂತಿದೆ. ಆಟೋ ನಾಗರಾಜ್ ಪಾತ್ರವೂ ಒಳಗಿಳಿಯುತ್ತದೆ. ರುತು ಚೈತ್ರ ತನ್ನ ಪಾತ್ರ ಪೋಷಣೆ ಮಾಡಿದ ರೀತಿ ಕೂಡಾ ಬ್ರಹ್ಮ ಕಮಲದ ಶಕ್ತಿಯಾಗಿ ಗೋಚರಿಸುತ್ತೆ. ನಿಖರವಾಗಿ ಹೇಳಬೇಕೆಂದರೆ, ನಿರ್ದೇಶಕ ಸಿದ್ದು ಪೂರ್ಣಚಂದ್ರ ಈ ಚಿತ್ರವನ್ನು ತಮ್ಮದೇ ಪಥದಲ್ಲಿ, ಯಾವ ಅಬ್ಬರವೂ ಇಲ್ಲದೆ, ಕಮರ್ಶಿಯಲ್ ಸಿನಿಮಾಗಳಿಗೆ ಸರಿಸಮನಾಗಿ ರೂಪಿಸಿದ್ದಾರೆ. ಇಲ್ಲಿನ ಕಥೆ, ಪಾತ್ರಗಳ ಏರಿಳಿತ ಮತ್ತು ಹೆಣ್ಣು ಜೀವಗಳ ಒಡಲ ಮರ್ಮರಗಳೆಲ್ಲವೂ ನೇರವಾಗಿ ನೋಡುಗರ ಎದೆಗೆ ತಾಕುತ್ತದೆ. ಕಡೆಗೂ ಒಂದೊಳ್ಳೆ ಸಿನಿಮಾ ನೋಡಿದ ಅನುಭೂತಿಯಂತೂ ಖಂಡಿತವಾಗಿಯೂ ಉಳಿದುಕೊಳ್ಳುತ್ತದೆ.

ಸಿದ್ದು ಪೂರ್ಣಚಂದ್ರ ಪ್ರೇಕ್ಷಕರು ಊಹಿಸಲಾರದ ತಿರುವುಗಳನ್ನು ಸಹಜವಾಗಿಯೇ ಕಟ್ಟಿ ಕೊಡುವ ಮೂಲಕ ಪ್ರತೀ ದೃಶ್ಯಗಳನ್ನೂ ಶಶಕ್ತವಾಗಿ ಕಟ್ಟಿ ಕೊಟ್ಟಿದ್ದಾರೆ. ಒಂದೆಡೆ ಖಾಲಿ ಮಡಿಲ ಒಡಲ ತುಮುಲ, ಮತ್ತೊಂದೆಡೆ ಮಡಿಲು ತುಂಬಿದ ಮಗುವನ್ನು ಉಳಿಸಿಕೊಳ್ಳಲಾರದ ಕರುಳ ಸಂಕಟ. ಐಪಿಎಲ್ ಹುಚ್ಚಿನ ವೆಲ್ಡರ್, ಮನಸು ಮುರಿದುಕೊಂಡ ಆಟೋ ಡ್ರೈವರ್, ನಿರ್ಜನ ಪ್ರದೇಶದ ಮುರುಕು ಜೋಪಡಿ, ಘಾಸಿಕೊಂಡ ಮನಸು ಮತ್ತು ಮಸಣಗಳ ಮುಖಾಮುಖಿ ಮತ್ತು ಅಹಮ್ಮಿಕೆಯೆಲ್ಲವೂ ಆರ್ಧ್ರ ಭಾವಗಳ ಮುಂದೆ ಮಂಡಿಯೂರುವ, ಕ್ರೌರ್ಯವೂ ಕಣ್ಣೀರಾಗುವ ಕಲಾತ್ಮಕ ಸ್ಪರ್ಶದೊಂದಿಗೆ ಬ್ರಹ್ಮ ಕಮಲ ಮನಸಿಗಿಳಿಯುತ್ತದೆ.

ಇಲ್ಲಿ ನಿರ್ದೇಶಕ ಸಿದ್ದು ಪೂರ್ಣಚಂದ್ರ ನಮ್ಮ ಸುತ್ತ ಘಟಿಸುವ ಕಥಾ ವಸ್ತುವೊಂದನ್ನು ಸಿನಿಮಾ ಚೌಕಟ್ಟಿಗೆ ಒಗ್ಗಿಸಿದ ರೀತಿಯೇ ಬೆರಗು ಮೂಡಿಸುತ್ತೆ. ಅದೆಷ್ಟೋ ಹೆಣ್ಣುಮಕ್ಕಳನ್ನು ನಾಲ್ಕು ಗೋಡೆಗಳ ನಡುವೆ ನರಳಿಸಿದ ಸಂಕಟವೊಂದಕ್ಕೆ ನಿರ್ದೇಶಕರು ದೃಶ್ಯಗಳ ಮೂಲಕ ಮಾತು ಬರಿಸಿದ್ದಾರೆ. ಅಹಂಕಾರಜನ್ಯ ಕ್ರೌರ್ಯ ಹೊತ್ತ ಮನಸುಗಳೂ ಕರಗುವ ರೂಪಕದೊಂದಿಗೆ ಅತ್ಯಂತ ಕಲಾತ್ಮಕವಾಗಿಯೇ ಈ ಸಮಾಜಕ್ಕೆ ಸಂದೇಶವೊಂದನ್ನು ದಾಟಿಸಿದ್ದಾರೆ. ಕಥೆ, ನಿರೂಪಣೆ ಸೇರಿದಂತೆ ಎಲ್ಲ ಬಗೆಯಲ್ಲಿಯೂ ಭಿನ್ನವಾಗಿ ನಿಲ್ಲುವ ಬ್ರಹ್ಮ ಕಮಲ, ಯಾವ ಅಬ್ಬರವೂ ಇಲ್ಲದೆ, ಯಾವ ಕಮರ್ಶಿಯಲ್ ಸಿನಿಮಾಗಳಿಗೂ ಕಡಿಮೆಯಿಲ್ಲದಂಥಾ ಅನುಭೂತಿಯೊಂದನ್ನು ನೋಡುಗರನ್ನು ತಾಕುತ್ತದೆ. ಈ ಮೂಲಕ ಈ ವರ್ಷದ ಅತ್ಯಪರೂಪದ ಚಿತ್ರವಾಗಿ ಬ್ರಹ್ಮ ಕಮಲ ನಿಸ್ಸಂದೇಹವಾಗಿಯೂ ದಾಖಲಾಗುತ್ತದೆ. ಇದು ಕುಟುಂಬ ಸಮೇತರಾಗಿ ಸಿನಿಮಾ ಮಂದಿರಕ್ಕೆ ತೆರಳಿ ನೋಡಬೇಕಾದ ಸಿನಿಮಾ ಎಂಬುದರಲ್ಲಿ ಯಾವ ಸಂದೇಹವೂ ಇಲ್ಲ…

keywods: brahma kamala, siddu poornachandra, cinishodha review

The post Brahma Kamala Movie Review: ಮನಸಿಗಿಳಿದು ಕಾಡೋ ಗುಣದ ಬ್ರಹ್ಮ ಕಮಲ! appeared first on Cini Shodha.

ಕೆಎಎಸ್ ಕ್ಲಾಸ್೧ ಅಧಿಕಾರಿಯಾಗಿ, ನಟ, ಲೇಖಕರಾಗಿ ಕರ್ನಾಟಕದ ತುಂಬೆಲ್ಲ ಮನೆ ಮಾತಾಗಿದ್ದ ಎಲ್.ಎಸ್ ಸುಧೀಂದ್ರ ದಶಕಗಳಷ್ಟು ಹಿಂದೆಯೇ ಜರ್ಮನ್ ಕಥೆಯೊಂದನ್ನು ಆಧರಿಸಿ `ಮಳೆ ನಿಲ್ಲುವವರೆಗೆ’ ಎಂಬ ನಾಟಕವೊಂದನ್ನು ರಚಿಸಿದ್ದರು. ಅದೇ ನಾಟಕವನ್ನು ಹೊಸತನದೊಂದಿಗೆ ಶರತ್ ಪರ್ವತವಾಣಿ ನಿರ್ದೇಶನ ಮಾಡಿದ್ದಾರೆ. ಈ ಮೂಲಕ ರಾಜೇಶ್ ನಟರಂಗ ವಿಶೇಷವಾದ ಪಾತ್ರವೊಂದರ ಮೂಲಕ ಎರಡು ದಶಕಗಳ ನಂತರ ರಂಗಭೂಮಿಗೆ ಮರಳುತ್ತಿದ್ದಾರೆ. ರಂಗಭೂಮಿಯಿಂದಲೇ ನಟನಾಗಿ ಹೊರಹೊಮ್ಮಿದ್ದ ರಾಜೇಶ್ ನಟರಂಗ ಸಿನಿಮಾ, ಕಿರುತೆರೆ ಜಗತ್ತಿನಲ್ಲಿ ಪ್ರಸಿದ್ಧಿ ಪಡೆದುಕೊಂಡಿದ್ದವರು. ಅವನ್ನು ಮೆಚ್ಚಿಕೊಂಡಿರುವ ಅಭಿಮಾನಿಗಳಿಗೀಗ ರಂಗದ ಮೂಲಕ ನೇರವಾಗಿ, ವಿಶಿಷ್ಟ ಪಾತ್ರದಲ್ಲಿ ಕಣ್ತುಂಬಿಕೊಳ್ಳುವ ಸದವಕಾಶ ಕೂಡಿಬಂದಿದೆ.

ಶರತ್ ಪರ್ವತವಾಣಿ ಯುವ ಸಮೂಹವನ್ನು ಸೆಳೆದುಕೊಳ್ಳುವ ಪ್ರಯೋಗಾತ್ಮಕ ಗುಣಗಳೊಂದಿಗೆ ಈ ನಾಟಕವನ್ನು ನಿರ್ದೇಶನ ಮಾಡಿದ್ದಾರೆ. ರೋಚಕವಾದ ಥ್ರಿಲ್ಲರ್ ಛಾಯೆಗಳೊಂದಿಗೆ, ಬೇರೆಯದ್ದೇ ತೆರನಾದ ಅನುಭೂತಿಯೊಂದನ್ನು ನೋಡುಗರನ್ನು ಆವರಿಸಿಕೊಳ್ಳುವಂತೆ ಈ ನಾಟಕವನ್ನು ರೂಪಿಸಲಾಗಿದೆ. ಓರ್ವ ನಿವೃತ್ತ ನ್ಯಾಯಾಧೀಶ, ಸೇಲ್ಸ್‌ಮನ್ ಸೇರಿದಂತೆ ಒಂದಷ್ಟು ಬಗೆಯ ಪಾತ್ರಗಳ ಸುತ್ತ ತೆರೆದುಕೊಳ್ಳುವ ಈ ನಾಟಕ ಬೆರಗಿನೊಂದಿಗೆ ನೋಡಿಸಿಕೊಳ್ಳಲಿದೆ ಎಂಬ ನಂಬಿಕೆ ತಂಡಕ್ಕಿದೆ. ಇತ್ತೀಚಿನ ದಿನಗಳಲ್ಲಿ ಓದು, ನಾಟಕಗಳತ್ತ ಮೆಲ್ಲಗೆ ತೆರೆದುಕೊಳ್ಳುತ್ತಿರುವ ಯುವ ಸಮುದಾಯ ಸದರಿ ನಾಟಕವನ್ನು ನೋಡಿ ಸಂಭ್ರಮಿಸುವಂತಾದರೆ, ಕಲಾದ್ಯುತಿ ಪ್ರೊಡಕ್ಷನ್ಸ್ ತಂಡದ ಆಶಯ, ಪರಿಶ್ರಮ ಸಾರ್ಥಕಗೊಂಡಂತಾಗುತ್ತದೆ.

ಈ ನಾಟಕವನ್ನು ರಚಿಸಿರುವ ಎಲ್.ಎಸ್ ಸುಧೀಂದ್ರ ಕ್ಲಾಸ್೧ ಕೆಎಎಸ್ ಅಧಿಕಾರಿಯಾಗಿದ್ದವರು. ಸರ್ಕಾರಿ ಅಧಿಕಾರಿಯಾಗಿದ್ದರೂ ಅತೀವ ಕಲಾಪ್ರೇಮ ಹೊಂದಿದ್ದ ಸುಧೀಂದ್ರ ಅವರು ರಂಗಭೂಮಿಗೆ ಅನುಕೂಲವಾಗುವಂಥಾ ಅನೇಕ ಕೆಲಸ ಕಾರ್ಯಗಳನ್ನು ಸೇವಾವಧಿಯಲ್ಲಿ ಮಾಡಿದ್ದರು. ಸ್ವತಃ ನಟ, ಲೇಖಕರಾಗಿ, ಅಜ್ಞಾತರಾಗಿದ್ದ ಅವರನ್ನು ಕಲಾದ್ಯುತಿ ತಂಡ ರಿಚರ್ಡ್ ಲೂಯಿಸ್ ಅವರ ಸಹಕಾರದಿಂದ ಸಂಪರ್ಕಿಸಿದೆ. ಬಹಳಷ್ಟು ಪ್ರಯತ್ನ ನಡೆಸಿ ಈ ನಾಟಕದ ಪ್ರತಿಯನ್ನು ಕಲೆ ಹಾಕಿ ಅದಕ್ಕೆ ನವ ಸ್ಪರ್ಶ ನೀಡಿ ಪ್ರೇಕ್ಷಕರ ಮುಂದೆ ತರುತ್ತಿದೆ. ಜಾಹೀರಾತು ನಿರ್ಮಾಣ ಲೋಕದಲ್ಲಿ ದೊಡ್ಡ ಹೆಸರು ಮಾಡಿರುವ ಪ್ರದೀಪ್ ಬೆಳವಾಡಿ ಅವರು ಈ ನಾಟಕದ ಸೆಟ್ ರೂಪಿಸಲಿದ್ದಾರೆ. ಒಟ್ಟಾರೆಯಾಗಿ ಮಳೆ ನಿಲ್ಲುವವರೆಗೂ ನಾಟಕದ ಮೂಲಕ ರಂಗಭೂಮಿಯಲ್ಲಿ ನವ ಸಂಚನವೊಂದು ಮೂಡಿಕೊಳ್ಳುವ ಘಳಿಗೆ ಸಮೀಪಿಸುತ್ತಿದೆ.

keywords: kaladyuthi productions, rajesh nataranga, male nilluvavarege

The post Male Nilluvavarege: ಜೆನ್ ಜೀಗಳನ್ನೂ ಆವರಿಸಿಕೊಳ್ಳಬಲ್ಲ ವಿಶಿಷ್ಟ ನಾಟಕ! appeared first on Cini Shodha.

ಕನ್ನಡ ಚಿತ್ರರಂಗಕ್ಕೆ ಅಡಿಗಡಿಗೆ ಹೊಸಬರ ತಂಡಗಳು ಎಂಟ್ರಿ ಕೊಡುತ್ತಿವೆ. ಈ ಮೂಲಕ ಹೊಸತನದ ತಿಳಿಗಾಳಿಯೂ ತಂತಾನೇ ಬೀಸಿಕೊಳ್ಳುತ್ತಿದೆ. ಹೊಸತನದ ಹೊಳಹಿನೊಂದಿಗೆ ಮೂಡಿ ಬಂದಿರುವ ಅ ಡೇಟ್ ಟೀಸರ್ ಕಂಡ ಪ್ರೇಕ್ಷಕರ ಕಡೆಯಿಂದ ಬರುತ್ತಿರುವ ಪ್ರತಿಕ್ರಿಯೆಗಳನ್ನು ಗಮನಿಸಿದರೆ ಅ ಡೇಟ್ ಚಿತ್ರವೂ ಕೂಡಾ ಹೊಸಾ ಬಗೆಯದ್ದೊಂದು ಮೈಲಿಗಲ್ಲು ಸೃಷ್ಟಿಸುವ ಸಾಧ್ಯತೆಗಳು ನಿಚ್ಚಳವಾಗಿವೆ. ಬೆಂಗಳೂರಿನ ಭೂಮಿಕೆಯಲ್ಲಿ ಮುಖಾಮುಖಿಯಾಗು ಎರಡು ಜೀವಗಳ ನಡುವೆ, ಒಂದು ದಿನದಲ್ಲ್ಲಿ ಘಟಿಸುವ ರೋಮಾಂಚಕ ಕಥೆಯ ಸುಳಿವನ್ನು ಟ್ರೈಲರ್ ಮೂಲಕ ಕಂಡ ಪ್ರೇಕ್ಷಕರು ಖುಷಿಗೊಂಡಿದ್ದಾರೆ.

ಈ ಟ್ರೈಲರ್ ಬಿಡುಗಡೆಯ ಪತ್ರಿಕಾಗೋಷ್ಠಿಯಲ್ಲಿ ನಿರ್ದೇಶಕ ವಿಮಲ್ ರಾಜ್ ಎನ್ ಸಿನಿಮಾ ಆರಂಭವಾಗಿದ್ದರ ಹಿಂಚುಮುಂಚಿನ ಒಂದಷ್ಟು ವಿಚಾರಗಳನ್ನು ಜಾಹೀರುಗೊಳಿಸಿದ್ದಾರೆ. ಅದರನ್ವಯ ಹೇಳೋದಾದರೆ, ಕೊರೋನಾ ಕಾಲಘಟ್ಟದಲ್ಲಿ ಅಂದರೆ, ೨೦೨೦ರಲ್ಲಿ ವಿಮಲ್ ರಾಜ್ ಸಿನಿಮಾ ನಿರ್ದೇಶಕರಾಗುವ ಗಟ್ಟಿ ನಿರ್ಧಾರ ಮಾಡಿದ್ದರು. ಈ ಹಂತದಲ್ಲಿ ನಿರ್ಮಾಪಕರನ್ನು ಹುಡುಕುವ ಉದ್ದೇಶದಿಂದಲೇ `ಂ ಆಂಖಿಇ’ ಎಂಬ ಕಿರುಚಿತ್ರವೊಂದನ್ನು ಇಂಗ್ಲಿಷ್ ಭಾಷೆಯನ್ನಿ ರೂಪಿಸಿದ್ದರು. ಆದರೆ, ಅದೇನೇ ಪ್ರಯತ್ನ ಮಾಡಿದರು ನಿರ್ಮಾಪಕರು ಸಿಕ್ಕಿರಲಿಲ್ಲ. ಕಡೆಗೂ ಅದನ್ನು ಯೂಟ್ಯೂಬ್ ಮೂಲಕ ಬಿಡುಗಡೆಗೊಳಿಸಿದ್ದ ವಿಮಲ್ ರಾಜ್ ಅವರಿಗೆ ಅಚ್ಚರಿ ಕಾದಿತ್ತು!

ಯಾಕೆಂದರೆ, ನಿರೀಕ್ಷೆಗೂ ಮೀರಿ ಆ ಕಿರು ಚಿತ್ರಕ್ಕೆ ಮೆಚ್ಚುಗೆಯ ಮಹಾಪೂರವೇ ಹರಿದು ಬಂದಿತ್ತು. ಎಪ್ಪತ್ತೆರಡು ಲಕ್ಷಕ್ಕೂ ಅಧಿಕ ವೀಕ್ಷಣೆ ಸಿಕ್ಕಿತ್ತು. ಓರ್ವ ನಿರ್ದೇಶಕನಾಗಿ ವಿಮಲ್ ರಾಜ್ ಪಾಲಿಗದು ಪ್ರಥಮ ಹೆಜ್ಜೆಯಲ್ಲಿಯೇ ಸಿಕ್ಕ ದೊಡ್ಡ ಭರವಸೆಯಂತೆ ಭಾಸವಾಗಿತ್ತು. ಆ ಬಲದಿಂದಲೇ ಸ್ವತಂತ್ರ ನಿರ್ದೇಶಕರಾಗುವ ಇರಾದೆಯೊಂದಿಗೆ ಈ ಪೂರ್ಣಪ್ರಮಾಣದ ಚಿತ್ರವನ್ನು ವಿಮಲ್ ರಾಜ್ ನಿರ್ಮಾಣ ಮಾಡಿದ್ದಾರೆ. ಸುಜನೀತ್ ಶೆಟ್ಟಿ ಮತ್ತು ಅಶ್ವಿನಿ ಶೆಣೈರನ್ನು ನಾಯಕ ನಾಯಕಿಯರನ್ನಾಗಿಸಿ ಈ ಸಿನಿಮಾವನ್ನು ರೂಪಿಸಿದ್ದಾರೆ. ಇದೀಗ ಈ ಟ್ರೈಲರ್‌ಗೆ ಸಿಗುತ್ತಿರುವ ಪ್ರತಿಕ್ರಿಯೆಗಳನ್ನು ಕಂಡು ಚಿತ್ರತಂಡ ಖುಷಿಗೊಂಡಿದೆ.

ಇದು ಬೆಂಗಳೂರು ಹುಡುಗ ದೆಹಲಿ ಮೂಲದ ಹುಡುಗಿಯನ್ನು ಸಂಧಿಸುವ, ಅವರಿಬ್ಬರ ಸುತ್ತ ಒಂದು ದಿನದಲ್ಲಿ ಘಟಿಸುವ ಕಥೆ ಹೊಂದಿರುವ ಸಿನಿಮಾ ಎಂಬ ವಿಚರವನ್ನೂ ವಿಮಲ್ ರಾಜ್ ಎನ್ ತೆರೆದಿಟ್ಟರು. ೨೦೧೬ರಿಂದೀಚೆಗೆ ಕಿರುಚಿತ್ರಗಳನ್ನು ನಿರ್ದೇಶನ ಮಾಡುತ್ತಾ ಬಂದಿದ್ದ ವಿಮಲ್ ರಾಜ್ ಎನ್ ಈ ಚಿತ್ರದ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಹೋಪ್, ಲಾಫಿಂಗ್ ಬುದ್ಧ, ಬಾಸ್ ಥರದ ಚಿತ್ರಗಳಲ್ಲಿ ನಟಿಸಿದ್ದ ಸುಜನೀತ್ ಶೆಟ್ಟಿ ಅ ಡೇಟ್ ಮೂಲಕ ಪೂರ್ಣ ಪ್ರಮಾಣದ ನಾಯಕನಾಗಿ ಕನ್ನಡ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ವಾರದೊಪ್ಪತ್ತಿನಲ್ಲಿಯೇ ಅ ಡೇಟ್ ಪ್ರೇಕ್ಷಕರ ಮುಂದೆ ತೆರೆದುಕೊಳ್ಳಲಿದೆ.

keywords: A DATE movie, vimalraj n, sujanith shetty, ashvini shenoy

The post A DATE Movie Trailer: ಒಂದು ದಿನದಲ್ಲಿ ಘಟಿಸೋ ರೋಮಾಂಚಕ ಕಥನ! appeared first on Cini Shodha.

ಈ ವರ್ಷದ ಕಡೇಯ ಭಾಗದಲ್ಲಾದರೂ ಬಿಲ್ಲ ರಂಗ ಬಾಷಾ ಚಿತ್ರ ಬಿಡುಗಡೆಗೊಳ್ಳಲೆಂಬುದು ಬಹುತೇಕ ಅಭಿಮಾನಿಗಳ ನಿರೀಕ್ಷೆಯಾಗಿತ್ತು. ಹಾಗೆ ನೋಡಿದರೆ, ಈ ಸಿನಿಮಾ ಘೋಷಣೆಯ ಹಂತದಿಂದಲೇ ಅಡಿಗಡಿಗೆ ಗ್ರಹಣ ಕವುಚಿಕೊಳ್ಳುತ್ತಾ ಬಂದಿತ್ತು. ಪ್ರತಿಭಾನ್ವಿತ ನಿರ್ದೇಶಕ ಅನೂಪ್ ಭಂಡಾರಿ ನಿರ್ದೇಶನದ ಈ ಚಿತ್ರದ ಬಗ್ಗೆ ಸುದ್ದೀಪ್ ಮೇಲಿನ ಅಭಿಮಾನದಾಚೆಗೂ ಒಂದು ನಿರೀಕ್ಷೆ ಮೂಡಿಕೊಂಡಿರೋದು ನಿಜ. ಆದರೆ, ಅದನ್ನೆಲ್ಲ ಪದೇ ಪದೆ ಖುದ್ದು ಕಿಚ್ಚನೇ ನಿರ್ದಾಕ್ಷಿಣ್ಯವಾಗಿ ಹೊಸಕಿ ಹಾಕುತ್ತಾ ಮುಂದುವರೆಯುತ್ತಿದ್ದಾರೆಂಬುದೂ ಅಷ್ಟೇ ನಿಜ. ಹೀಗೆ ಸುದೀಪ್ ಸಿನಿಮಾಗಳತ್ತ ನಿರಾಸಕ್ತಿ ಹೊಂದೋದಕ್ಕೆ ಪ್ರಧಾನ ಕಾರಣ ಬಿಗ್‌ಬಾಸ್ ಎಂಬ ಬೂಸಾ ಶೋ ಎಂಬ ತಕರಾರು ಬಹುತೇಕ ಕಿಚ್ಚನ ಅಭಿಮಾನಿಗಳಲ್ಲಿದೆ.

ಬಿಲ್ಲ ರಂಗ ಬಾಷಾ ಚಿತ್ರದ ಬಗ್ಗೆ ಚರ್ಚೆ ಶುರುವಾಗಿ ಸಾಕಷ್ಟು ವರ್ಷಗಳೇ ಕಳೆದು ಹೋಗಿವೆ. ಆದರೆ, ಅನೂಪ್ ಭಂಡಾರಿ ಅಚ್ಚರಿದಾಯಕವಾಗಿ ವಿಕ್ರಾಂತ್ ರೋಣ ಚಿತ್ರಕ್ಕೆ ಚಾಲನೆ ಕೊಟ್ಟಿದ್ದರು. ಭಾರೀ ಕ್ರೇಜ್ ಮೂಡಿಸಿದ್ದ ಆ ಚಿತ್ರ ಕೂಡಾ ಹೇಳಿಕೊಳ್ಳುವಂಥಾ ಗೆಲುವು ಕಂಡಿರಲಿಲ್ಲ. ಈ ಹಂತದಲ್ಲಿ ಬಿಲ್ಲ ರಂಗ ಬಾಷಾ ಚಿತ್ರದ ಕಥೆ ಮುಗಿದೇ ಹೋಯ್ತೆಂಬಂಥಾ ವಾತಾವರಣ ನಿರ್ಮಾಣಗೊಂಡಿತ್ತು. ಕಡೆಗೂ ೨೦೨೪ರಲ್ಲಿ ಬಿಲ್ಲ ರಂಗ ಬಾಷಾಗೆ ಅಧಿಕೃತ ಚಾಲನೆ ಸಿಕ್ಕಿತ್ತಾದರೂ, ಕಿಚ್ಚ ಸಾಹೇಬರು ಮ್ಯಾಕ್ಸ್, ಮಾರ್ಕ್ ಅಂತೆಲ್ಲ ಸಾಧಾರಣ ಗೆಲುವುಗಳ ನಶೆಗೆ ವಶವಾಗಿದ್ದರು. ಅದ್ಯಾಕೋ ಬಿಲ್ಲ ರಂಗ ಬಾಷಾ ಮೂಲಕ ಮ್ಯಾಕ್ಸಿಮಮ್ ಗೆಲುವು ಕಾಣ ಬೇಕೆಂಬಂಥಾ ಉತ್ಸಾಹವೇ ಕಿಚ್ಚನೊಳಗೆ ಉಡುಗಿ ಹೋದಂತೆ ಭಾಸವಾಗಲಾರಂಭಿಸಿತ್ತು.

ಈಗ ೨೦೨೬ರ ಮುಕ್ತಾಯದ ಘಟ್ಟದಲ್ಲಿದ್ದೇವೆ. ಆದರೆ, ನಿರ್ದೇಸಕ ಅನೂಪ್ ಭಂಡಾರಿ ಈಗತಾನೇ ದ್ವಾರಕೆಯಲ್ಲಿ ಮತ್ತೊಂದು ಹಂತದ ಚಿತ್ರೀಕರಣ ನಡೆಸಲು ತೆರಳುತ್ತಿರೋದಾಗಿ ಸೋಶಿಯಲ್ ಮೀಡಿಯಾ ಮೂಲಕ ಮಾಹಿತಿ ಹಂಚಿಕೊಂಡಿದ್ದಾರೆ. ಇನ್ನೇನು ಕೆಲವೇ ದಿಕನಗಳಲ್ಲಿ ಬಿಗ್ ಬಾಸ್ ಶೋ ಆರಂಭವಾಗೋದರಿಂದ ಕಿಚ್ಚ ಮೂರು ತಿಂಗಳ ಕಾಲ ಆ ಹ್ಯಾಂಗೋವರಿಗೆ ಜಾರುತ್ತಾರೆ. ಅಲ್ಲಿಗೆ ಬಿಲ್ಲ ರಂಗ ಬಾಷಾ ಕೂಡಾ ಪಂಚವಾರ್ಶಿಕ ಯೋಜನೆಯಂತಾಗೋದರಲ್ಲಿ ಯಾವ ಅನುಮಾನಗಳೂ ಉಳಿದಿಲ್ಲ. ಅಷ್ಟಕ್ಕೂ ಸುದೀಪ್ ಒಂದು ಸದಭಿರುಚಿಯ ಕಾರ್ಯಕ್ರಮಕ್ಕಾಗಿ ಸಿನಿಮಾಗಳನ್ನು ಕಡೆಗಣಿಸಿದ್ದರೆ ಅದಕ್ಕೊಂದು ಮಾಫಿ ಇರುತ್ತಿತ್ತು. ಆದರೆ ಬಿಗ್ ಬಾಸ್ ಎಂಬುದು ಹುಚ್ಚರು, ಅರೆಹುಚ್ಚರನ್ನು ಮೆರೆಸುವಂಥಾ ಅತ್ಯಂತ ಬುರ್ನಾಸು ಕಾರ್ಯಕ್ರಮ. ಇಂಥಾ ಅಭಿರುಚಿಯ ಗಂಧವಿಲ್ಲದ ಶೋಗಾಗಿ ಕಿಚ್ಚ ಯಾಕೆ ಅಭಿಮಾನಿಗಳ ಭಾವನೆಗಳ ಜೊತೆ ಆಟವಾಡುತ್ತಿದ್ದಾರೋಳ ಬಿಗ್ ಬಾಸೇ ಬಲ್ಲ!

keyword: kiccha sudeep, billa ranga baashaa, sandalwood, anup bhandari

The post Billa Ranga Baasha: ಹುಚ್ಚರ ಸಂತೆಯಲ್ಲಿ ಕಳೆದು ಹೋದ ಕಿಚ್ಚ! appeared first on Cini Shodha.

ಇತ್ತೀಚೆಗಷ್ಟೇ ಬ್ರಹ್ಮಕಮಲ ಚಿತ್ರ ಟ್ರೈಲರ್ ಮೂಲಕ ವ್ಯಾಪಕವಾಗಿ ಸುದ್ದಿಯಲ್ಲಿತ್ತು. ಒಂದು ಸದಭಿರುಚಿಯ ಸಿನಿಮಾ ಆ ಪರಿಯಾಗಿ ಸದ್ದು ಮಾಡಿದ್ದದ್ದು ಅದರೊಳಗಿರೋ ಕಂಟೆಂಟಿನ ಕಸುವಿನಿಂದ ಮಾತ್ರ. ಈಗಾಗಲೇ ಈ ಚಿತ್ರ ಹಲವಾರು ಅಂತಾರಾಷ್ಟ್ರೀಯ ಸಿನಿಮೋತ್ಸವಗಳಲ್ಲಿ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿಕೊಂಡಿತ್ತು. ಪ್ರೇಕ್ಷಕರ ಬೇಡಿಕೆಯ ಮೇರೆಗೆ ಹಲವಾರು ಬಾರಿ ಪ್ರದರ್ಶನಗೊಳ್ಳುವ ಮೂಲಕವೂ ಗಮನ ಸೆಳೆದಿತ್ತು. ಅದು ಒಟ್ಟಾರೆ ಸಿನಿಮಾ ಮೂಡಿ ಬಂದಿರುವ ರೀತಿಗೊಂದು ಉದಾಹರಣೆಯಷ್ಟೆ. ಇಂಥಾ ಸಿನಿಮಾ ಇದೀಗ ಸಿನಿಮಾ ಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ ಎಂದರೆ, ಸಹಜವಾಗಿಯೇ ಅದರತ್ತ ಕುತೂಹಲ ಮೂಡಿಕೊಳ್ಳುತ್ತದೆ. ಇದೀಗ ಬ್ರಹ್ಮಕಮಲದ ಸುತ್ತಲೂ ಅಂಥಾದ್ದೇ ಗಾಢ ಕೌತುಕ ಮೂಡಿಕೊಂಡಿದೆ.

ಕಥೆ, ಚಿತ್ರಕಥೆ, ಸಂಭಾಷಣೆಯೊಂದಿಗೆ ಸಿದ್ದು ಪೂರ್ಣಚಂದ್ರ ನಿರ್ದೇಶನ ಮಾಡಿರುವ ಈ ಸಿನಿಮಾ ಪೂರ್ಣಚಂದ್ರ ಫಿಲಂಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿದೆ. ಅದ್ವಿತಿ ಶೆಟ್ಟಿ, ಋತು ಚೈತ್ರ, ಲೋಕೇಂದ್ರ ಸೂರ್ಯ, ಬಾಲ ರಾಜ್ವಾಡಿ, ಮಮತಾ ರಾಹುತ್, ಪ್ರಮೀಳಾ ಸುಬ್ರಮಣ್ಯ ಮುಂತಾದವರ ತಾರಾಗಣ ಈ ಚಿತ್ರಕ್ಕಿದೆ. ಲೋಕೇಂದ್ರ ಸೂರ್ಯ ಛಾಯಾಗ್ರಹಣ, ಅನಂತ್ ಆರ್ಯನ್ ಸಂಗೀತ ನಿರ್ದೇಶನ, ದೀಪು ಸಂಕಲನ, ನಾಗರತ್ನ ಕೆ.ಹೆಚ್ ನಿರ್ಮಾಣ ನಿರ್ವಹಣೆಯಲ್ಲಿ ಬ್ರಹ್ಮಕಮಲ ರೂಪುಗೊಂಡಿದೆ. ಪುಟ್ಟರಾಜು ಮತ್ತು ಪ್ರಮೀಳಾ ಸುಬ್ರಮಣ್ಯ ಕಾರ್ಯಕಾರಿ ನಿರ್ಮಾಪಕರಾಗಿ ಜೊತೆಯಾಗಿದ್ದಾರೆ.

keywords: brahma kamala movie, siddu poornachandra

The post Brahma Kamala movie: ಸೂಕ್ಷ್ಮ ಕಥೆಯ ಚುಂಗು ಹಿಡಿದ ಸಿದ್ದು ಪೂರ್ಣಚಂದ್ರ! appeared first on Cini Shodha.

ರ್‍ಯಾಪ್ ಶೈಲಿಯ ಹಾಡುಗಳಿಗೆ ಹುಚ್ಚೆದ್ದು ತೆರೆದುಕೊಳ್ಳುವ ಯುವ ಸಮುದಾಯದ ಸಂಖ್ಯೆ ಇದೀಗ ಹೆಚ್ಚಾಗಿದೆ. ಅಂಥಾ ಕೇಳುಗರನ್ನು ಮಾತ್ರವಲ್ಲದೇ, ಸಂಗೀತಾಸಕ್ತರನ್ನೆಲ್ಲ ಸೆಳೆಯುವ ಶೈಲಿಯಲ್ಲಿ ಸದರಿ ಹಾಡು ಮೂಡಿ ಬಂದಿದೆ. ಈ ಹಾಡಿಗೆ ಸುಜನಿತ್ ಶೆಟ್ಟಿ ಹಾಗೂ ವಿಮಲ್ ರಾಜ್ ಎನ್ ಸಾಹಿತ್ಯ ಬರೆದಿದ್ದಾರೆ. ಮೋಕ್ಷ ಬೀಟ್ಸ್ ಸಂಗೀತ ಸಂಯೋಜನೆಯಿರುವ ಈ ಹಾಡಿನೊಂದಿಗೆ `A DATE’ ಮತ್ತಷ್ಟು ಪ್ರೇಕ್ಷಕರನ್ನು ಸೆಳೆದುಕೊಂಡಿದೆ. ಈಗಾಗಲೇ ಇದೊಂದು ಭಿನ್ನ ಕಥೆ ಹೊಂದಿರೋ ಸಿನಿಮಾವಾಗಿ ಪ್ರೇಕ್ಷಕರ ವಲಯದಲ್ಲೊಂದು ಕುತೂಹಲ ಮೂಡಿಕೊಂಡಿದೆ. ಈ ಹಾಡು ಅದನ್ನು ಮತ್ತಷ್ಟು ತೀವ್ರಗೊಳಿಸುವಲ್ಲಿ ಸಫಲವಾಗಿದೆ.

ಕಿರುಚಿತ್ರಗಳನ್ನು ನಿರ್ದೇಶನ ಮಾಡಿ ಸೈ ಅನ್ನಿಸಿಕೊಂಡಿದ್ದಾರೆ. ಅಂಥಾ ಕಿರುಚಿತ್ರಗಳಲ್ಲಿ ಅನೇಕವುಗಳು ಚಲನಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿಕೊಂಡಿವೆ. ಹೀಗೆ ಕಿರುಚಿತ್ರಗಳ ಮೂಲಕ ತಮ್ಮೊಳಗಿನ ನಿರ್ದೇಶನದ ಕಸುವನ್ನು ಒರೆಗೆಹಚ್ಚಿದ್ದ ವಿಮಲ್ ರಾಜ್ ನಿರ್ದೇಶನದ ಚೊಚ್ಚಲ ಚಿತ್ರ “A DATE’ ಇಲ್ಲಿ ಯುವ ಆವೇಗದ ಕಥೆಯಿದೆ. ಉತ್ತರದ ಹುಡುಗಿ ಮತ್ತು ದಕ್ಷಿಣದ ಹುಡುಗನ ನಡುವೆ ಬೆಂಗಳೂರಿನ ಭೂಮಿಕೆಯಲ್ಲಿ ಕಥೆಯೊಂದು ಗರಿಬಿಚ್ಚಿಕೊಳ್ಳುತ್ತದೆಯಂತೆ. ರೊಮ್ಯಾಮ್ಸ್ ಡ್ರಾಮಾ ಜಾನರಿಗೊಳಪಡುವ ಈ ಸಿನಿಮಾದಲ್ಲಿ ಭಯ, ಕುತೂಹಲ, ಹಿಂಜರಿಕೆಗಳ ಮಿಶ್ರ ಭಾವದೊಂದಿಗೆ ಭೇಟಿಯಾಗೋ ಎರಡು ಜೀವಗಳ ಹಿನ್ನೆಲೆಯಲ್ಲಿ, ಪ್ರಸ್ತುತ ಬೆಂಗಳೂರಿನ ಸನ್ನಿವೇಶಗಳನ್ನು ಒಳಗೊಂಡಂತೆ ಕಥೆ ತೆರೆದುಕೊಳ್ಳುತ್ತದೆ. ಸುಜನಿತ್ ಶೆಟ್ಟಿ ಮತ್ತು ಅಶ್ವಿನಿ ಶೆಣೈ ನಾಯಕ ನಾಯಕಿಯರಾಗಿ ನಟಿಸಿದ್ದಾರೆ.

ವಿಶೇಷವೆಂದರೆ, ಈ ಸಿನಿಮಾ ಎರಡು ಪಾತ್ರಗಳ ಸುತ್ತಾ ಚಲಿಸುತ್ತೆ. ನಿರ್ದೇಶಕರು ಪ್ರತೀ ದೃಶ್ಯಗಳೂ ಕೂಡಾ ಅತ್ಯಂತ ನೈಜವಾಗಿ ಮೂಡಿ ಬರಬೇಕೆಂಬ ಇರಾದೆಯಿಂದ ಬೆಂಗಳೂರಿನ ಐವತ್ತೈದಕ್ಕೂ ಹೆಚ್ಚು ಸ್ಥಳಗಳಲ್ಲಿ ಚಿತ್ರೀಕರಣ ನಡೆಸಿದ್ದಾರೆ. ಇದರ ಭಾಗವಾಗಿಯೇ ಬೆಂಗಳೂರು ಕೂಡಾ ಚಿತ್ರದ ಪ್ರಮುಖ ಪಾತ್ರವೊಂದರಂತೆ ಮೂಡಿಬಂದಿದೆ. ವೀಕೆಂಡ್ ಶಾರ್ಟ್ಸ್ ಸ್ಟುಡಿಯೋ ಬ್ಯಾನರ್ನಡಿ ಸಮಾನ ಮನಸ್ಕರ ತಂಡ ಈ ಚಿತ್ರವನ್ನು ನಿರ್ಮಿಸಿದೆ. ಚಿತ್ರಕ್ಕೆ ಮೋಕ್ಷ ಬೀಟ್ಸ್ ಸಂಗೀತ, ವಡ್ಡೆ ದೇವೇಂದ್ರ ರೆಡ್ಡಿ ಛಾಯಾಗ್ರಹಣ, ವಿಮಲ್ ರಾಜ್ ಎನ್ ಸಂಕಲನ ಹಾಗೂ ಸುಜನಿತ್ ಶೆಟ್ಟಿ ಮತ್ತು ವಿಮಲ್ ರಾಜ್ ಎನ್ ಸಾಹಿತ್ಯವಿದೆ. ಇಷ್ಟರಲ್ಲಿಯೇ `A DATE’ ಬಿಡುಗಡೆ ದಿನಾಂಕ ಘೋಷಣೆಯಾಗಲಿದೆ.

keywords: A DATE movie, vimalraj n, sandalwood

The post A DATE Movie: ಒಂದು ದಿನದಲ್ಲಿ ಘಟಿಸೋ ರೋಮಾಂಚಕ ಕಥನ! appeared first on Cini Shodha.

ಸದ್ಯಕ್ಕೆ ಬಂದ ಅವಕಾಶವನ್ನೆಲ್ಲ ಬಾಚಿಕೊಂಡು ಒಪ್ಪಿಕೊಳ್ಳುವ ಸ್ಥಿತಿಯಲ್ಲಿ ರುಕ್ಮೀನಿ ಇಲ್ಲ. ಟಾಕ್ಸಿಕ್‌ನಂಥಾ ದೊಡ್ಡ ಸಿನಿಮಾಗಳಲ್ಲಿ ನಟಿಸಿದ ನಂತರ, ಅದನ್ನು ಸರಿದೂಗಿಸುವಂಥಾ ಸಿನಿಮಾಗಳನ್ನು ಮಾತ್ರವೇ ಆಯ್ಕೆ ಮಾಡಿಕೊಳ್ಳುವ ಅನಿವಾರ್ಯತೆ ಇದೆ. ಇದೀಗ ಒಂದಷ್ಟು ಅವಕಾಶಗಳನ್ನು ಅಮೂಲಾಗ್ರವಾಗಿ ಪರಿಶೀಲಿಸುತ್ತಿರುವ ರ೫ಉಕ್ಮಿಣಿ, ಮಲೆಯಾಳಂನ ಒಂದು ಸಿನಿಮಾವನ್ನು ಒಪ್ಪಿಕೊಂಡಿದ್ದಾರಂತೆ. ಈ ಮೂಲಕ ಮಲೆಯಾಳದ ಪ್ರಸಿದ್ಧ ನಟ ನಿವಿನ್ ಪೌಲಿಗೆ ನಾಯಕಿಯಾಗಿ ನಟಿಸಲಿರೋದು ಪಕ್ಕಾ ಆದಂತಾಗಿದೆ. ಈ ಸಿನಿಮಾದ ಬಗೆಗಿನ ಮತ್ತಷ್ಟು ಮಾಹಿತಿಗಳು ಶೀಘ್ರದಲ್ಲಿಯೇ ಜಾಹೀರಾಗುವ ನಿರೀಕ್ಷೆಗಳಿವೆ.

dhurandhar v/s toxic war: ಯಶ್ ವಿರುದ್ಧ ಮತ್ತೆ ಬಾಲಿವುಡ್ ಮಂದಿಯ ವಾರ್!

ಹಾಗೆ ನೋಡಿದರೆ, ಈ ಹುಡುಗಿಗೆ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದಲ್ಲಿ ನಾಯಕಿಯಾಗಿ ನಟಿಸುವ ಅವಕಾಶ ಕೂಡಿ ಬಂದಿದ್ದೇ ಅಚಾನಕ್ಕಾಗಿ. ಅದಾಗಲೇ ನಟಿಯಾಗಬೇಕೆಂಬ ಕನಸಿಟ್ಟುಕೊಂಡಿದ್ದ ರುಕ್ಮಿಣಿಗೆ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದ ನಾಯಕಿಗಾಗಿ ಆಡಿಷನ್ ನಡೆಸುತ್ತಿರುವ ವಿಚಾರ ಗಮನಕ್ಕೆ ಬಂದಿತ್ತು. ತುಸು ಅಳುಕಿನೊಂದಿಗೆ ಚಿತ್ರತಂಡವನ್ನು ಸಂಪರ್ಕಿಸಿದ್ದ ರುಕ್ಮಿಣಿ, ನಂತರ ಒಂದಷ್ಟು ಸ್ಪರ್ಧೆಯನ್ನು ದಾಟಿಕೊಂಡು ನಾಯಕಿಯಾಗಿ ಆಯ್ಕೆಯಾಗಿದ್ದರು. ಅದಕ್ಕೆ ತನ್ನ ಪ್ರತಿಭೆ ಮಾತ್ರವಲ್ಲದೇ ಅದೃಷ್ಟವೂ ಕಾರಣವೆಂಬ ಮನಃಸ್ಥಿತಿ ಹೊಂದಿರುವ ರುಕ್ಮಿಣಿಯೀಗ ತಮಿಳು ಚಿತ್ರರಂಗದಲ್ಲಿಯೂ ಬ್ಯುಸಿಯಾಗಿದ್ದಾರೆ. ಅದೇ ಹೊತ್ತಿನಲ್ಲಿ ತೆಲುಗಿನಲ್ಲಿಯೂ ಒಂದಷ್ಟು ಅವಕಾಶಗಳು ಅರಸಿ ಬರಲಾರಂಭಿಸಿವೆ. ಈ ನಡುವೆ ಅಧಿಕೃತವಾಗಿಯೇ ಮಲೆಯಾಳಂಗೂ ರುಕ್ಮಿಣಿಯ ಪಾದಾರ್ಪಣೆಯಾದಂತಾಗಿದೆ!

keywords: rukmini vasanth, toxic, yash

The post Rukmini Vasanth: ಎಲ್ಲ ಭಾಷೆಗಳಲ್ಲೂ ಅವಕಾಶಗಳ ಅಬ್ಬರ! appeared first on Cini Shodha.

ರೇಣುಕಾಸ್ವಾಮಿ ಕೊಲೆಪ್ರಕರಣದಲ್ಲಿ ಎ೧೪ ಆರೋಪಿಯಾಗಿರೋ ಪ್ರದೋಶ್ ಇದೀಗ ಏಕಾಏಕಿ ವರಸೆ ಬದಲಿಸಿದ್ದಾನೆ. ದರ್ಶನ್ ಪಾಳೆಯದಲ್ಲಿ ಬಹುಕಾಲದಿಂದ ಗುರುತಿಸಿಕೊಂಡಿದ್ದ, ಆ ಕಾರಣದಿಂದಲೇ ರೇಣುಕಾಸ್ವಾಮಿಯ ಮರ್ಡರ್ ಕೇಸಿನಲ್ಲಿ ದಾಸನಿಗೆ ಸಾಥ್ ಕೊಟ್ಟಿದ್ದ ಪ್ರದೋಶ್ ಇದೀಗ ಮಾಫಿ ಸಾಕ್ಷಿಯಾಗಿ ಪರಿಗಣಿಸಲು ಕೋರಿ ನ್ಯಾಯಾಲಯಕ್ಕೆ ಅರ್ಜಿ ಹಾಕಿದ್ದಾನೆ. ಅಲ್ಲಿಗೆ, ಮುಂದಿನ ವರ್ಷದ ಮೇ ತಿಂಗಳ ಹೊತ್ತಿಗಾದರೂ ಬಿಡುಗಡೆ ಭಾಗ್ಯ ಸಿಕ್ಕೀತೆಂಬ ನಿರೀಕ್ಷೆಯಲ್ಲಿದ್ದ ದರ್ಶನ್ ಕನಸೆಲ್ಲವೂ ಕಮರಿದಂತಾಗಿದೆ. ಯಾಕೆಂದರೆ, ಪ್ರದೋಶ್ ಮಾಫಿ ಸಾಕ್ಷಿಯಾಗಿ ಒಂದಿಡೀ ಪ್ರಕರಣದಲ್ಲಿ ತನ್ನ ಪಾತ್ರದ ಬಗ್ಗೆ, ಹಾಗೂ ಅದರ ಆಚೀಚಿನ ಹಸೀ ಸತ್ಯಗಳನ್ನು ನ್ಯಾಯಾಧೀಶರ ಮುಂದೆ ತೆರೆದಿಡುತ್ತಾನೆ. ಇದರಿಂದ ಒಟ್ಟಾರೆ ಶಿಕ್ಷೆಯಲ್ಲಿ ಪ್ರದೋಶ್‌ಗೆ ಕೊಂಚ ರಿಯಾಯಿತಿ ಸಿಗುತ್ತೆ. ಆದರೆ, ಈ ಪ್ರಕರಣದಲ್ಲಿ ಎ೧ ಮತ್ತು ಎ೨ ಆರೋಪಿಗಳಾಗಿರುವ ಪವಿತ್ರಾ ಗೌಡ, ದರ್ಶನ್ ಪಾಲಿಗೆ ಕಾನೂನಿನ ಕುಣಿಕೆ ಮತ್ತಷ್ಟು ಬಿಗಿಯಾಗೋದು ಗ್ಯಾರಂಟಿ.

darshan photo leak case: ಮಾಲಿನಿ ಕೃಷ್ಣಮೂರ್ತಿಗೆ 2 ಕೋಟಿ ತಲುಪಿಸಿದ್ದನಾ ದರ್ಶನ್?

ಪ್ರಕರಣವೊಂದು ವಿಚಾರಣೆಯ ಹಂತದಲ್ಲಿರುವಾಗ ಆರೋಪಿ ಸ್ಥಾನದಲ್ಲಿ ಜೈಲು ಪಾಲಾದವನು, ಪ್ರಕರಣದ ಬಗೆಗಿನ ಅಸಲೀ ಸತ್ಯ ಒಪ್ಪಿಕೊಂಡು, ಶಿಕ್ಷೆಯಿಂದ ತುಸು ವಿನಾಯಿತಿ ಪಡುವ ಅವಕಾಶ ಮಾಫಿ ಸಾಕ್ಷಿಗಿದೆ. ಇದೀಗ ಅದನ್ನೇ ಬಳಸಿಕೊಂಡಿರುವ ಪ್ರದೋಶ್, ವಕೀಲರ ಮೂಲಕ ರೇಣುಕಾಸ್ವಾಮಿ ಕೊಲೆ ಕೇಸಿನ ವಿಚಾರದ ಅಸಲೀ ಸತ್ಯವನ್ನು ಕಾರಿಕೊಂಡು ಕಾನೂನಿನ ಕುಣಿಕೆಯಿಂದ ಪಾರಾಗುವ ನಿರ್ಧಾರಕ್ಕೆ ಬಂದಿದ್ದಾನೆ. ಒಂದೆಡೆಯಲ್ಲಿ ಇದೊಂದು ಅಚಾನಕ್ಕಾಗಿ ಆದ ಅವಘಡವೆಂದು ಬಿಂಬಿಸಿ, ಪಾರಾಗುವ ದಾರಿಯನ್ನು ದಾಸ ಹುಡುಕುತ್ತಿರುವಾಗಲೇ, ಪ್ರದೋಶ್‌ನ ಹೊಸಾ ವರಸೆ ದಾಸನನ್ನು ಸಹಜವಾಗಿಯೇ ಕಂಗಾಲು ಮಾಡಿ ಹಾಕಿದೆ. ಒಂದು ವೇಳೆ ಮಾಫಿ ಸಾಕ್ಷಿಯಾಗಿ ಪ್ರದೋಶ್ ಎಲ್ಲ ಚಿತ್ರಣವನ್ನೂ ತೆರೆದಿಟ್ಟರೆ, ಅಲ್ಲಿಗೆ ಸುಬ್ಬಾಸುಬ್ಬಿಗೆ ಗನಗಂಭೀರವಾದ ಶಿಕ್ಷೆಯಾಗುವ ಸಾಧ್ಯತೆಗಳೇ ಢಾಳಾಗಿ ಗೋಚರಿಸುತ್ತಿವೆ.

ಇತ್ತ ಇತ್ತೀಚೆಗಷ್ಟೇ ಒಂದು ಹಂತದ ಕಾನೂನು ಸಮರದ ಕಾರಣದಿಂದಾಗಿ ಜೀವಾವಧಿ ಶಿಕ್ಷೆಯಿಂದ ಕಾಂಗ್ರೆಸ್ ಶಾಸಕ ವಿನಯ್ ಕುಲಕರ್ಣಿ ಪಾರಾಗಿದ್ದಾನೆ. ಈ ಕೇಸಿನಲ್ಲಿ ಪ್ರಧಾನ ಪಾತ್ರ ವಹಿಸಿದ್ದವನು ಉತ್ತರ ಕರ್ನಾಟಕ ಸೀಮೆಯ ದಂಧೆಕೋರ ಬಸವರಾಜ ಮುತ್ತಗಿ ಅಲಿಯಾಸ್ ಕರಾಟೆ ಬಸವ. ನಾನಾ ಅವತಾರವೆತ್ತಿ, ಮುತ್ತಪ್ಪ ರೈ ಸಖ್ಯ ಬೆಳೆಸಿಕೊಂಡು, ಆತನ ಜಯಕರ್ನಾಟಕ ಸಂಘಟನೆಯ ಹೆಸರಲ್ಲಿ ಮಜಬೂತಾಗಿ ಕೊಬ್ಬಿದ್ದವನು ಕರಾಟೆ ಬಸವ. ಇಂಥವನು ಮುತ್ತಪ್ಪ ರೈ ಹೊರಗಟ್ಟುತ್ತಲೇ ವಿನಯ್ ಕುಲಕರ್ಣಿಯ ಪಟಾಲಮ್ಮು ಸೇರಿಕೊಂಡಿದ್ದ. ಆ ಬಳಿಕ ವಿನಯ್ ಇಷಾರೆಯ ಮೇರೆಗೆ ರಿಯಲ್ ಎಸ್ಟೇಟ್ ದಂಧೆಕೋರ ಕಂ ಬಿಜೆಪಿ ಮುಖಂಡ ಯೋಗೀಶ್ ಗೌಡನನ್ನು ತಾನೇ ಮುಂದೆ ನಿಂತು ಕೊಲ್ಲಿಸಿದ್ದ. ಖುದ್ದು ತಾನೇ ಬೆಂಗಳೂರಿನಿಂದ ಪಂಟರುಗಳನ್ನು ಕರೆಸಿ ಕೊಂದು, ವಿನಯ್ ಜೊತೆ ಜೈಲು ಪಾಲಾಗಿದ್ದ ಮುತ್ತಗಿ, ಜೈಲೊಳಗೇ ವರಸೆ ಬದಲಿಸಿ ಮಾಫಿ ಸಾಕ್ಷಿಯಾಗಿ ಬಿಟ್ಟಿದ್ದ.

ಹಾಗೆ ಮಾಫಿ ಸಾಕ್ಷಿಯಾಗಿ, ಈ ಪ್ರಕರಣದ ಹಿಂದಿರುವ ವಿನಯ್ ಕುಲಕರ್ಣಿಯ ಮಹತ್ತರವಾದ ಪಾತ್ರದ ಬಗ್ಗೆ ಸತ್ಯ ಒದರಿದ್ದ. ವಿನಯ್ ಕುಲಕರ್ಣಿಗೆ ಜೀವಾವಧಿ ಶಿಕ್ಷೆಯಾದದ್ದು ಈ ಕಾರಣದಿಂದಲೇ ಎಂಬುದಿಲ್ಲಿ ಉಲ್ಲೇಖಿಸಲೇ ಬೇಕಾದ ವಿಚಾರ. ಇದೀಗ ಈ ಕೇಸಿನಿಂದ ವಿನಯ್ ಒಂದು ಮಟ್ಟಕ್ಕೆ ನುಣುಚಿಕೊಂಡಿದ್ದೇ, ದರ್ಶನ್ ಅಭಿಮಾನಿಗಳು ಬಾಸ್ ಬರ್‍ತಾರೆ ಅಂತೆಲ್ಲ ಕಿರುಲಾಂಭಿಸಿದ್ದರು. ಮತ್ತೆ ಸೋಶಿಯಲ್ ಮೀಡಿಯಾದಲ್ಲಿ ಆವುಟ ಶುರುವಿಟ್ಟುಕೊಂಡಿದ್‌ದ ಈ ಎಳಸು ಕುನ್ನಿಗಳಿಗೆ, ರೇಣುಕಾಸ್ವಾಮಿ ಹಾಗೂ ಯೋಗೀಶ್ ಗೌಡ ಕೊಲೆ ಕೇಸಿನ ನಡುವೆ ಇರುವ ಅಜಗಜಾಂತರ ವ್ಯತ್ಯಾಸದ ಅರಿವಿಲ್ಲ. ಆದರೂ ಒಂದು ಹಂತದಲ್ಲಿ ದರ್ಶನ್ ಬಚಾವಾಗಬಹುದಾದ ಅವಕಾಶಗಳಿದ್ದವೋ ಏನೋ… ಆದರೆ, ಒಂದು ಕಾಲದಲ್ಲಿ ಬಾಸು ಹೆಗಲ ಮೇಲೆ ಕೈ ಹಾಕೋದೇ ಮಹಾ ಪ್ರಸಾದ ಅಂದುಕೊಂಡಿದ್ದ ಪ್ರದೋಶ್ ಏಕಾಏಕಿ ಉಲ್ಟಾ ಹೊಡೆದು ಬಿಟ್ಟಿದ್ದಾನೆ!

ಈ ಪಲ್ಲಟ ದಾಸನ ಬುಡಕ್ಕೆ ಬಿಸಿ ನೀರು ಕಾಯಿಸೋದರಲ್ಲಿ ಯಾವ ಸಂದೇಹವೂ ಉಳಿದಿಲ್ಲ. ಅಷ್ಟಕ್ಕೂ ಈ ಪ್ರಕರಣ ನಡೆದಾದ ಮೇಲೆ ದರ್ಶನ್ ಜೊತೆ ಜೈಲು ಸೇರಿರುವ ಪ್ರತಿಯೊಬ್ಬರಿಗೂ ತಾವೆಂತಾ ಮಣ್ಣು ತಿನ್ನೋ ಕೆಲಸ ಮಾಡಿದೆವೆಂಬ ಅರಿವಾಗಿದೆ. ಹೇಳಿಕೇಳಿ ಡಿ ಬಾಸ್ ಅನ್ನು ಬಂಧಿಸಿಡುವ ಜೈಲೇ ಸೃಷ್ಟಿಯಾಗಿಲ್ಲ ಎಂಬಂಥಾ ಹಡಬೆ ಭ್ರಮೆಯನ್ನು ಮೆದುಳಿಗೆ ತುಂಬಿಸಿಕೊಂಡವರ ಕೊಂಪೆಯಿಂದಲೇ ಬಂದಿರುವಾತ ಪ್ರದೋಶ್. ದಾಸನ ಖಾಸಗಿ ಪಾರ್ಟಿಗಳಲ್ಲಿ ಬಾಗಿಯಾಗೋ ಅವಕಾಶ ಸಿಗೋದೇ ಪರಮ ಪುಣ್ಯ ಅಂದುಕೊಂಡಿದ್‌ದ ಪ್ರದೋಶ್, ಆ ದಿನ ಸ್ಟೋನಿ ಬ್ರೂಕ್ಸ್ ರೆಸ್ಟೋರಾಂಟಿಂದ ಅಚಾನಕ್ಕಾಗಿ ದರ್ಶನ್ ಹಿಂದೆ ಹೋಗಿದ್ದ. ಪಟ್ಟಣಗೆರೆ ಶೆಡ್ಡಿನಲ್ಲಿ ನಡೆದ ರಕ್ಕಸ ಕೃತ್ಯದ ನಂತರ ಕಾನೂನಿನ ಕಣ್ಣಿಗೆ ಮಣ್ಣೆರಚುವ ಕೆಲಸವನ್ನು ಖುದ್ದಾಗಿ ಮುಂದೆ ನಿಂತು ಮಾಡಿದ್ದ.

ಸದರಿ ಕೃತ್ಯ ನಡೆದಾಗ ದರ್ಶನ್ ರೇಣುಕಾಸ್ವಾಮಿಗೆ ಎರಡೇಟು ಹೊಡೆದು ಅಲ್ಲಿಂದ ತೆರಳಿದ್ದರು. ಆ ನಂತರದ ಕೃತ್ಯಗಳೆಲ್ಲ ಮಿಕ್ಕವರ ನೆರಳಲ್ಲಿಯೇ ನಡೆದಿತ್ತು. ಅದರಲ್ಲಿ ದರ್ಶನ್ ಪಾತ್ರವೇನಿಲ್ಲ ಅಂತೆಲ್ಲ ದರ್ಶನ್ ಪಾಳೆಯದ ಮಂದಿ ಹಂತ ಹಂತವಾಗಿ ಹೇಳಿಕೊಂಡು ಬಂದಿದ್ದಾರೆ. ಒಂದು ವೇಳೆ ಅದಕ್ಕೆ ವ್ಯತಿರಿಕ್ತವಾದ ಹೇಳಿಕೆಯನ್ನು ಪ್ರದೋಶ್ ಕೊಟ್ಟರೆ, ನ್ಯಾಯಾಲಯ ಅದನ್ನು ಪರಿಗಣಿಸಿದರೆ, ದರ್ಶನ್ ಮತ್ತು ಪವಿತ್ರಾ ಗೌಡಳ ನಸೀಬು ಸಂಪೂರ್ಣವಾಗಿ ಖರಾಬಾಗಲಿದೆ. ದುರಂತವೆಂದರೆ, ಇಂಥಾ ಡೇಂಜರ್ ಜೋನಿನಲ್ಲಿ ದರ್ಶನ್ ನಿಂತಿರುವಾಗಲೂ ಆತನ ಕೆಲ ಅಭಿಮಾನಿಗ್ಳು ಮತ್ತಷ್ಟು ಡ್ಯಾಮೇಜು ಮಾಡುವಂಥಾ ವಿಚಾರಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳುತ್ತಿದ್ದಾರೆ. ದರ್ಶನ್‌ಗೆ ಹೊರಗಿರುವಾಗಲೇ ತನ್ನ ಅಭಿಮಾನಿಗಳ ದುಂಡಾವರ್ತನೆಗಳಿಗೆ ಬ್ರೇಕ್ ಹಾಕೋ ಯೋಗ್ಯತೆ ಇರಲಿಲ್ಲ. ಒಂದೆಡೆಯಲ್ಲಿ ಮಾಫಿ ಸಾಕ್ಷಿ ಮಣ್ಣುಮುಕ್ಕಿಸಲು ತಯಾರಾಗುತ್ತಿರುವಾಗಲೇ, ಅಭಿಮಾನಿ ಪಡೆ ಅಂಧಾಭಿಮಾನದ ಭರಾಟೆಯಲ್ಲಿ ರಾಡಿಯೆಬ್ಬಿಸಲು ತಯಾರಾಗಿ ನಿಂತಿದೆ. ಇತ್ತ ಸದಾ ದರ್ಶನ್ ಪರವಾಗಿ ಅಡ್ಯಾಡುತ್ತಿದ್ದ ಸ್ಯಾಂಡಲ್ವುಡ್ಡಿನ ವಾಮನ ಕೋಮಣ ಕೊಡವಿಕೊಂಡು ದೂರಾಗಿದ್ದಾನೆ. ಹೀಗಿರುವಾಗ ದಾಸನನ್ನು ಕಾಪಾಡೋದ್ಯಾರು?

keywords: renukaswamy murder case, darshan, pavithra gowda, pradosh

The post Challenging Star Darshan: ಪಟ್ಟಣಗೆರೆ ಶೆಡ್ಡಿನ ರಹಸ್ಯ ಬಯಲಾಗೋ ಘಳಿಗೆ! appeared first on Cini Shodha.

ಈ ಹಿಂದೆ ದಾರಿ ಯಾವುದಯ್ಯಾ ವೈಕುಂಟಕೆ ಎಂಬ ಸಿನಿಮಾ ಮೂಲಕ ನಿರ್ದೇಶಕರಾಗಿ ಗಮನ ಸೆಳೆದಿದ್ದವರು ಸಿದ್ದು ಪೂರ್ಣಚಂದ್ರ. ಈ ಮೂಲಕವೇ ತಾನೋರ್ವ ಭಿನ್ನ ಬಗೆಯ ನಿರ್ದೇಶಕನೆಂಬ ಸುಳಿವು ದಾಟಿಸುತ್ತಲೇ, ಪ್ರಯೋಗಾತ್ಮಕ ಹಾದಿಯಲ್ಲಿಯೇ ನೋಡುಗರ ಮನಮುಟ್ಟಿದ್ದರು. ಸಿನಿಮಾ ರಂಗದ ಜೀವಂತಿಕೆ ಯಾವ ನಡೆಗಳಲ್ಲಿ ಅಡಗಿದೆ ಎಂಬಂಥಾ ಸ್ಪಷ್ಟ ಅರಿವು ಹೊಂದಿರೋ ಸಿದ್ದು ಪೂರ್ಣಚಂದ್ರ, ತಮ್ಮಿಷ್ಟದ ಥವೂ ಕೂಡಾ ಸಿನಿಮಾ ರಂಗದ ಜೀವಂತಿಕೆಯ ಮೂಲಧಾತು ಎಂಬುದನ್ನು ಅರಿವಾಗಿಸಿಕೊಂಡಿದ್ದಾರೆ. ಈ ಕಾರಣದಿಂದಲೇ, ಎಲ್ಲ ಸವಾಲುಗಳನ್ನು ಮೊದಲೇ ಮನಗಂಡು, ಈ ಸಮಾಜದ ಕುಟುಂಬ ವ್ಯವಸ್ಥೆಯಲ್ಲಿ ಹುದುಗಿ ಹೋಗಿರುವ ಹೆಣ್ಣುಮಕ್ಕಳ ಒಡಲ ಕೂಗಿನ ಕಥನಕ್ಕೆ ದೃಶ್ಯ ರೂಪ ಕೊಟ್ಟಿದ್ದಾರೆ.

ಗಮನಿಸಬೇಕಾದ ಅಂಶವೆಂದರೆ, ಈ ಪ್ರಯತ್ನಕ್ಕೆ ಆರಂಭಿಕವಾಗಿಯೇ ಪ್ರೇಕ್ಷಕರ ಕಡೆಯಿಂದ ಭರಪೂರ ಪ್ರತಿಕ್ರಿಯೆಗಳು ಸಿಗುತ್ತಿವೆ. ಟ್ರೈಲರ್ ಮೂಡಿ ಬಂದಿರುವ ರೀತಿಯಿಮದಲೇ ಬ್ರಹ್ಮಕಮಲ ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಸೆಳೆದುಕೊಂಡಿದೆ. ಹೆಣ್ಣು ಸಂಸಾರದ ಕಣ್ಣು ಎಂಬುದು ನಮ್ಮ ಜನಜೀವನದಲ್ಲಿ ಹಾಸುಹೊಕ್ಕಾಗಿರುವ ನಾಣ್ನುಡಿ. ಆದರೆ, ಆ ಕಣ್ಣುಗಳಲ್ಲಿ ಜಿನುಗುವ ನಾನಾ ಮರ್ಮರಗಳನ್ನು ಗ್ರಹಿಸುವ ಸೂಕ್ಷ್ಮತೆ ಮಾತ್ರ ನಮ್ಮಲ್ಲಿನ ಕೌಟುಂಬಿಕ ವ್ಯವಸ್ಥೆಯಲ್ಲಿಲ್ಲ. ಅಂಥಾ ವಾತಾವರಣದಲ್ಲಿ ಒಂದು ರಾತ್ರಿಯಲ್ಲಿ ಘಟಿಸುವ ಹೆಣ್ಣೊಬ್ಬಳ ಕಥನ ಬ್ರಹ್ಮ ಕಮಲದ ರೂಪದಲ್ಲಿ ಪ್ರೇಕ್ಷಕರನ್ನು ಮುಖಾಮುಖಿಯಾಗುವ ಸನ್ನಾಹದಲ್ಲಿದೆ.

ಈಗಾಗಲೇ ಬೆಂಗಳೂರು ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಬ್ರಹ್ಮ ಕಮಲಕ್ಕೆ ಭರಪೂರ ಮೆಚ್ಚುಗೆ ಸಿಕ್ಕಿದೆ. ಪ್ರೇಕ್ಷಕರ ಒತ್ತಾಯದ ಮೇರೆಗೆ ಮೂರು ಮೂರು ಪ್ರದರ್ಶನಗಳನ್ನು ಕಂಡಿದೆ. ಇಂಥಾ ಚಿತ್ರವೀಗ ಟ್ರೈಲರ್ ಮೂಲಕ ಸದ್ದು ಮಾಡಲಾರಂಭಿಸಿದೆ. ಕಥೆ, ಚಿತ್ರಕಥೆ, ಸಂಭಾಷಣೆಯೊಂದಿಗೆ ಸಿದ್ದು ಪೂರ್ಣಚಂದ್ರ ನಿರ್ದೇಶನ ಮಾಡಿರುವ ಈ ಸಿನಿಮಾ ಪೂರ್ಣ ಚಂದ್ರ ಫಿಲಂಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿದೆ. ಅದ್ವಿತಿ ಶೆಟ್ಟಿ, ಋತು ಚೈತ್ರ, ಲೋಕೇಂದ್ರ ಸೂರ್ಯ, ಬಾಲ ರಾಜ್ವಾಡಿ, ಮಮತಾ ರಾಹುತ್, ಪ್ರಮೀಳಾ ಸುಬ್ರಮಣ್ಯ ಮುಂತಾದವರ ತಾರಾಗಣ ಈ ಚಿತ್ರಕ್ಕಿದೆ. ಲೋಕೇಂದ್ರ ಸೂರ್ಯ ಛಾಯಾಗ್ರಹಣ, ಅನಂತ್ ಆರ್ಯನ್ ಸಂಗೀತ ನಿರ್ದೇಶನ, ದೀಪು ಸಂಕಲನ, ನಾಗರತ್ನ ಕೆ.ಹೆಚ್ ನಿರ್ಮಾಣ ನಿರ್ವಹಣೆಯಲ್ಲಿ ಬ್ರಹ್ಮಕಮಲ ರೂಪುಗೊಂಡಿದೆ. ಪುಟ್ಟರಾಜು ಮತ್ತು ಪ್ರಮೀಳಾ ಸುಬ್ರಮಣ್ಯ ಕಾರ್ಯಕಾರಿ ನಿರ್ಮಾಪಕರಾಗಿ ಜೊತೆಯಾಗಿದ್ದಾರೆ. ಇಷ್ಟರಲ್ಲಿಯೇ ಬ್ರಹ್ಮಕಮಲ ಪ್ರೇಕ್ಷಕರ ಮುಂದೆ ಅರಳಿಕೊಳ್ಳುವ ದಿನಾಂಕ ನಿಗಧಿಯಾಗಲಿದೆ!

keywords: brahmakamala trailer, siddu poornachandra, adhvithi shetty, sandalwood, kfi

The post Brahmakamala Movie Trailer: ಸೂಕ್ಷ್ಮ ಕಥನಕ್ಕೆ ಕಣ್ಣಾದ ಸಿದ್ದು ಪೂರ್ಣಚಂದ್ರ! appeared first on Cini Shodha.

ಡಾಲಿ ಧನಂಜಯ್ ನಿರ್ಮಾಣ ಮಾಡಿದ್ದ ಮದರ್ ಪ್ರಾಮಿಸ್ ಚಿತ್ರ ಇತ್ತೀಚೆಗಷ್ಟೇ ಬಿಡುಗಡೆಗೊಂಡಿತ್ತು. ಒಂದಷ್ಟು ಅಡೆತಡೆಗಳಾಚೆಗೂ ಆ ಚಿತ್ರಕ್ಕೆ ಒಂದು ಮಟ್ಟದ ಗೆಲುವು ದಕ್ಕಿತ್ತು. ಅದರ ಬೆನ್ನಲ್ಲಿಯೇ ಇದೀಗ ಡಾಲಿ ವಿಶಿಷ್ಟ ಪಾತ್ರದಲ್ಲಿ ನಟಿಸಿರುವ ಅಣ್ಣ ಫ್ರಮ್ ಮೆಕ್ಸಿಕೋ ಚಿತ್ರದ ಬಿಡುಗಡೆ ದಿನಾಂಕ ಘೋಶಣೆಯಾಗಿದೆ. ಇದೇ ಡಿಸೆಂಬರ್ ೨೪ರಂದು ಸದರಿ ಸಿನಿಮಾ ಬಿಡುಗಡೆಯಾಗೋದು ಪಕ್ಕಾ. ಡಿಸೆಂಬರ್ ೨೪ರಂದು ಸಮಯ ನಿಗಧಿ ಮಾಡಿರೋದಕ್ಕೂ ಕಾರಣವಿದೆ. ಈಗ್ಗೆ ಐದು ವರ್ಷಗಳ ಹಿಂದೆ ಬಡವ ರಾಸ್ಕಲ್ ಚಿತ್ರ ಕೂಡಾ ಇದೇ ದಿನಾಂಕದಂದು ಬಿಡುಗಡೆಗೊಂಡು ಗೆಲುವು ಕಂಡಿತ್ತು. ಅಂಥಾ ಗೆಲುವು ಮರಳುವ ನಿರೀಕ್ಷೆಯೊಂದಿಗೆ ಅದೇ ದಿನಾಂಕವನ್ನು ಆಯ್ಕೆ ಮಾಡಿಕೊಂಡಿರುವಂತಿದೆ.

Kangana Ranaut Controvercy: ಭ್ರಾಂತಿಯಲ್ಲಿ ಮಿಂದೇಳುತ್ತಿರುವಾಕೆಯ ವಾಂತಿ ಪುರಾಣ!

ಶಂಕರ್ ಗುರು ನಿರ್ದೇಶನದಲ್ಲಿ ಮೂಡಿ ಬಂದಿರುವ ಅಣ್ಣ ಫ್ರಮ್ ಮೆಕ್ಸಿಕೋ ಸಿನಿಮಾದ ಬಗ್ಗೆ ಖುದ್ದು ಧನಂ ಜಯ್‌ಗೆ ವಿಪರೀತ ಭರವಸೆ ಇದೆ. ಈ ಸಿನಿಮಾದ ಕಥೆ ಮತ್ತು ಪಾತ್ರಗಳು ಬಿನ್ನವಾಗಿರೋದರಿಂದ, ಬಡವ ರಾಸ್ಕಲ್ ಚಿತ್ರವನ್ನೇ ಸರಿಗಟ್ಟುವಂಥಾ ಗೆಲುವು ಲಭಿಸುವ ನಿರೀಕ್ಷೆ ಚಿತ್ರತಂಡಕ್ಕಿದೆ. ಹೆಚ್ಚೇನೂ ಪ್ರಚಾರದ ಅಬ್ಬರವಿಲ್ಲದೆ ಕೆಲಸ ಕಾರ್ಯ ಮುಗಿಸಿಕೊಳ್ಳುತ್ತಿರೋ ಚಿತ್ರತಂಡ, ಇದುವರೆಗೂ ಕಥೆಯ ಹೊಳಹನ್ನು ಜಾಹೀರು ಮಾಡಿಲ್ಲ. ಆದರೆ, ಬಿಡುಗಡೆಗೆ ಮಾತ್ರ ಸರಿಕಟ್ಟಾದ ಮುಹೂರ್ತ ನಿಗಧಿ ಮಾಡಲಾಗಿದೆ. ಕ್ರಿಸ್‌ಮಸ್ ಹಬ್ಬಕ್ಕೆ ಸಾಲು ಸಾಲು ರಜಾ ದಿನಗಳಿರುತ್ತವೆ. ಸಿನಿಮಾ ಬಿಡುಗಡೆಗಿದು ಅತ್ಯಂತ ಪ್ರಶಸ್ತವಾದ ಸಮಯ. ಇ ಸುಮುಹೂರ್ತದಲ್ಲಿ ಅಣ್ಣ ಫ್ರಮ್ ಚಿತ್ರಕ್ಕೆ ಗೆಲುವು ಸಿಗಬಹುದೇ?

keywords: daali dhananjaya, anna from mexico, sandalwood, daali

The post Daali Dhananjay: ಹೊಸಾ ಅವತಾರದಲ್ಲಿ ಟಗರು ಡಾಲಿ! appeared first on Cini Shodha.