ಕೆಎಎಸ್ ಕ್ಲಾಸ್೧ ಅಧಿಕಾರಿಯಾಗಿ, ನಟ, ಲೇಖಕರಾಗಿ ಕರ್ನಾಟಕದ ತುಂಬೆಲ್ಲ ಮನೆ ಮಾತಾಗಿದ್ದ ಎಲ್.ಎಸ್ ಸುಧೀಂದ್ರ ದಶಕಗಳಷ್ಟು ಹಿಂದೆಯೇ ಜರ್ಮನ್ ಕಥೆಯೊಂದನ್ನು ಆಧರಿಸಿ `ಮಳೆ ನಿಲ್ಲುವವರೆಗೆ’ ಎಂಬ ನಾಟಕವೊಂದನ್ನು ರಚಿಸಿದ್ದರು. ಅದೇ ನಾಟಕವನ್ನು ಹೊಸತನದೊಂದಿಗೆ ಶರತ್ ಪರ್ವತವಾಣಿ ನಿರ್ದೇಶನ ಮಾಡಿದ್ದಾರೆ. ಈ ಮೂಲಕ ರಾಜೇಶ್ ನಟರಂಗ ವಿಶೇಷವಾದ ಪಾತ್ರವೊಂದರ ಮೂಲಕ ಎರಡು ದಶಕಗಳ ನಂತರ ರಂಗಭೂಮಿಗೆ ಮರಳುತ್ತಿದ್ದಾರೆ. ರಂಗಭೂಮಿಯಿಂದಲೇ ನಟನಾಗಿ ಹೊರಹೊಮ್ಮಿದ್ದ ರಾಜೇಶ್ ನಟರಂಗ ಸಿನಿಮಾ, ಕಿರುತೆರೆ ಜಗತ್ತಿನಲ್ಲಿ ಪ್ರಸಿದ್ಧಿ ಪಡೆದುಕೊಂಡಿದ್ದವರು. ಅವನ್ನು ಮೆಚ್ಚಿಕೊಂಡಿರುವ ಅಭಿಮಾನಿಗಳಿಗೀಗ ರಂಗದ ಮೂಲಕ ನೇರವಾಗಿ, ವಿಶಿಷ್ಟ ಪಾತ್ರದಲ್ಲಿ ಕಣ್ತುಂಬಿಕೊಳ್ಳುವ ಸದವಕಾಶ ಕೂಡಿಬಂದಿದೆ.

ಶರತ್ ಪರ್ವತವಾಣಿ ಯುವ ಸಮೂಹವನ್ನು ಸೆಳೆದುಕೊಳ್ಳುವ ಪ್ರಯೋಗಾತ್ಮಕ ಗುಣಗಳೊಂದಿಗೆ ಈ ನಾಟಕವನ್ನು ನಿರ್ದೇಶನ ಮಾಡಿದ್ದಾರೆ. ರೋಚಕವಾದ ಥ್ರಿಲ್ಲರ್ ಛಾಯೆಗಳೊಂದಿಗೆ, ಬೇರೆಯದ್ದೇ ತೆರನಾದ ಅನುಭೂತಿಯೊಂದನ್ನು ನೋಡುಗರನ್ನು ಆವರಿಸಿಕೊಳ್ಳುವಂತೆ ಈ ನಾಟಕವನ್ನು ರೂಪಿಸಲಾಗಿದೆ. ಓರ್ವ ನಿವೃತ್ತ ನ್ಯಾಯಾಧೀಶ, ಸೇಲ್ಸ್‌ಮನ್ ಸೇರಿದಂತೆ ಒಂದಷ್ಟು ಬಗೆಯ ಪಾತ್ರಗಳ ಸುತ್ತ ತೆರೆದುಕೊಳ್ಳುವ ಈ ನಾಟಕ ಬೆರಗಿನೊಂದಿಗೆ ನೋಡಿಸಿಕೊಳ್ಳಲಿದೆ ಎಂಬ ನಂಬಿಕೆ ತಂಡಕ್ಕಿದೆ. ಇತ್ತೀಚಿನ ದಿನಗಳಲ್ಲಿ ಓದು, ನಾಟಕಗಳತ್ತ ಮೆಲ್ಲಗೆ ತೆರೆದುಕೊಳ್ಳುತ್ತಿರುವ ಯುವ ಸಮುದಾಯ ಸದರಿ ನಾಟಕವನ್ನು ನೋಡಿ ಸಂಭ್ರಮಿಸುವಂತಾದರೆ, ಕಲಾದ್ಯುತಿ ಪ್ರೊಡಕ್ಷನ್ಸ್ ತಂಡದ ಆಶಯ, ಪರಿಶ್ರಮ ಸಾರ್ಥಕಗೊಂಡಂತಾಗುತ್ತದೆ.

ಈ ನಾಟಕವನ್ನು ರಚಿಸಿರುವ ಎಲ್.ಎಸ್ ಸುಧೀಂದ್ರ ಕ್ಲಾಸ್೧ ಕೆಎಎಸ್ ಅಧಿಕಾರಿಯಾಗಿದ್ದವರು. ಸರ್ಕಾರಿ ಅಧಿಕಾರಿಯಾಗಿದ್ದರೂ ಅತೀವ ಕಲಾಪ್ರೇಮ ಹೊಂದಿದ್ದ ಸುಧೀಂದ್ರ ಅವರು ರಂಗಭೂಮಿಗೆ ಅನುಕೂಲವಾಗುವಂಥಾ ಅನೇಕ ಕೆಲಸ ಕಾರ್ಯಗಳನ್ನು ಸೇವಾವಧಿಯಲ್ಲಿ ಮಾಡಿದ್ದರು. ಸ್ವತಃ ನಟ, ಲೇಖಕರಾಗಿ, ಅಜ್ಞಾತರಾಗಿದ್ದ ಅವರನ್ನು ಕಲಾದ್ಯುತಿ ತಂಡ ರಿಚರ್ಡ್ ಲೂಯಿಸ್ ಅವರ ಸಹಕಾರದಿಂದ ಸಂಪರ್ಕಿಸಿದೆ. ಬಹಳಷ್ಟು ಪ್ರಯತ್ನ ನಡೆಸಿ ಈ ನಾಟಕದ ಪ್ರತಿಯನ್ನು ಕಲೆ ಹಾಕಿ ಅದಕ್ಕೆ ನವ ಸ್ಪರ್ಶ ನೀಡಿ ಪ್ರೇಕ್ಷಕರ ಮುಂದೆ ತರುತ್ತಿದೆ. ಜಾಹೀರಾತು ನಿರ್ಮಾಣ ಲೋಕದಲ್ಲಿ ದೊಡ್ಡ ಹೆಸರು ಮಾಡಿರುವ ಪ್ರದೀಪ್ ಬೆಳವಾಡಿ ಅವರು ಈ ನಾಟಕದ ಸೆಟ್ ರೂಪಿಸಲಿದ್ದಾರೆ. ಒಟ್ಟಾರೆಯಾಗಿ ಮಳೆ ನಿಲ್ಲುವವರೆಗೂ ನಾಟಕದ ಮೂಲಕ ರಂಗಭೂಮಿಯಲ್ಲಿ ನವ ಸಂಚನವೊಂದು ಮೂಡಿಕೊಳ್ಳುವ ಘಳಿಗೆ ಸಮೀಪಿಸುತ್ತಿದೆ.

keywords: kaladyuthi productions, rajesh nataranga, male nilluvavarege

The post Male Nilluvavarege: ಜೆನ್ ಜೀಗಳನ್ನೂ ಆವರಿಸಿಕೊಳ್ಳಬಲ್ಲ ವಿಶಿಷ್ಟ ನಾಟಕ! appeared first on Cini Shodha.

ಕನ್ನಡ ಚಿತ್ರರಂಗಕ್ಕೆ ಅಡಿಗಡಿಗೆ ಹೊಸಬರ ತಂಡಗಳು ಎಂಟ್ರಿ ಕೊಡುತ್ತಿವೆ. ಈ ಮೂಲಕ ಹೊಸತನದ ತಿಳಿಗಾಳಿಯೂ ತಂತಾನೇ ಬೀಸಿಕೊಳ್ಳುತ್ತಿದೆ. ಹೊಸತನದ ಹೊಳಹಿನೊಂದಿಗೆ ಮೂಡಿ ಬಂದಿರುವ ಅ ಡೇಟ್ ಟೀಸರ್ ಕಂಡ ಪ್ರೇಕ್ಷಕರ ಕಡೆಯಿಂದ ಬರುತ್ತಿರುವ ಪ್ರತಿಕ್ರಿಯೆಗಳನ್ನು ಗಮನಿಸಿದರೆ ಅ ಡೇಟ್ ಚಿತ್ರವೂ ಕೂಡಾ ಹೊಸಾ ಬಗೆಯದ್ದೊಂದು ಮೈಲಿಗಲ್ಲು ಸೃಷ್ಟಿಸುವ ಸಾಧ್ಯತೆಗಳು ನಿಚ್ಚಳವಾಗಿವೆ. ಬೆಂಗಳೂರಿನ ಭೂಮಿಕೆಯಲ್ಲಿ ಮುಖಾಮುಖಿಯಾಗು ಎರಡು ಜೀವಗಳ ನಡುವೆ, ಒಂದು ದಿನದಲ್ಲ್ಲಿ ಘಟಿಸುವ ರೋಮಾಂಚಕ ಕಥೆಯ ಸುಳಿವನ್ನು ಟ್ರೈಲರ್ ಮೂಲಕ ಕಂಡ ಪ್ರೇಕ್ಷಕರು ಖುಷಿಗೊಂಡಿದ್ದಾರೆ.

ಈ ಟ್ರೈಲರ್ ಬಿಡುಗಡೆಯ ಪತ್ರಿಕಾಗೋಷ್ಠಿಯಲ್ಲಿ ನಿರ್ದೇಶಕ ವಿಮಲ್ ರಾಜ್ ಎನ್ ಸಿನಿಮಾ ಆರಂಭವಾಗಿದ್ದರ ಹಿಂಚುಮುಂಚಿನ ಒಂದಷ್ಟು ವಿಚಾರಗಳನ್ನು ಜಾಹೀರುಗೊಳಿಸಿದ್ದಾರೆ. ಅದರನ್ವಯ ಹೇಳೋದಾದರೆ, ಕೊರೋನಾ ಕಾಲಘಟ್ಟದಲ್ಲಿ ಅಂದರೆ, ೨೦೨೦ರಲ್ಲಿ ವಿಮಲ್ ರಾಜ್ ಸಿನಿಮಾ ನಿರ್ದೇಶಕರಾಗುವ ಗಟ್ಟಿ ನಿರ್ಧಾರ ಮಾಡಿದ್ದರು. ಈ ಹಂತದಲ್ಲಿ ನಿರ್ಮಾಪಕರನ್ನು ಹುಡುಕುವ ಉದ್ದೇಶದಿಂದಲೇ `ಂ ಆಂಖಿಇ’ ಎಂಬ ಕಿರುಚಿತ್ರವೊಂದನ್ನು ಇಂಗ್ಲಿಷ್ ಭಾಷೆಯನ್ನಿ ರೂಪಿಸಿದ್ದರು. ಆದರೆ, ಅದೇನೇ ಪ್ರಯತ್ನ ಮಾಡಿದರು ನಿರ್ಮಾಪಕರು ಸಿಕ್ಕಿರಲಿಲ್ಲ. ಕಡೆಗೂ ಅದನ್ನು ಯೂಟ್ಯೂಬ್ ಮೂಲಕ ಬಿಡುಗಡೆಗೊಳಿಸಿದ್ದ ವಿಮಲ್ ರಾಜ್ ಅವರಿಗೆ ಅಚ್ಚರಿ ಕಾದಿತ್ತು!

ಯಾಕೆಂದರೆ, ನಿರೀಕ್ಷೆಗೂ ಮೀರಿ ಆ ಕಿರು ಚಿತ್ರಕ್ಕೆ ಮೆಚ್ಚುಗೆಯ ಮಹಾಪೂರವೇ ಹರಿದು ಬಂದಿತ್ತು. ಎಪ್ಪತ್ತೆರಡು ಲಕ್ಷಕ್ಕೂ ಅಧಿಕ ವೀಕ್ಷಣೆ ಸಿಕ್ಕಿತ್ತು. ಓರ್ವ ನಿರ್ದೇಶಕನಾಗಿ ವಿಮಲ್ ರಾಜ್ ಪಾಲಿಗದು ಪ್ರಥಮ ಹೆಜ್ಜೆಯಲ್ಲಿಯೇ ಸಿಕ್ಕ ದೊಡ್ಡ ಭರವಸೆಯಂತೆ ಭಾಸವಾಗಿತ್ತು. ಆ ಬಲದಿಂದಲೇ ಸ್ವತಂತ್ರ ನಿರ್ದೇಶಕರಾಗುವ ಇರಾದೆಯೊಂದಿಗೆ ಈ ಪೂರ್ಣಪ್ರಮಾಣದ ಚಿತ್ರವನ್ನು ವಿಮಲ್ ರಾಜ್ ನಿರ್ಮಾಣ ಮಾಡಿದ್ದಾರೆ. ಸುಜನೀತ್ ಶೆಟ್ಟಿ ಮತ್ತು ಅಶ್ವಿನಿ ಶೆಣೈರನ್ನು ನಾಯಕ ನಾಯಕಿಯರನ್ನಾಗಿಸಿ ಈ ಸಿನಿಮಾವನ್ನು ರೂಪಿಸಿದ್ದಾರೆ. ಇದೀಗ ಈ ಟ್ರೈಲರ್‌ಗೆ ಸಿಗುತ್ತಿರುವ ಪ್ರತಿಕ್ರಿಯೆಗಳನ್ನು ಕಂಡು ಚಿತ್ರತಂಡ ಖುಷಿಗೊಂಡಿದೆ.

ಇದು ಬೆಂಗಳೂರು ಹುಡುಗ ದೆಹಲಿ ಮೂಲದ ಹುಡುಗಿಯನ್ನು ಸಂಧಿಸುವ, ಅವರಿಬ್ಬರ ಸುತ್ತ ಒಂದು ದಿನದಲ್ಲಿ ಘಟಿಸುವ ಕಥೆ ಹೊಂದಿರುವ ಸಿನಿಮಾ ಎಂಬ ವಿಚರವನ್ನೂ ವಿಮಲ್ ರಾಜ್ ಎನ್ ತೆರೆದಿಟ್ಟರು. ೨೦೧೬ರಿಂದೀಚೆಗೆ ಕಿರುಚಿತ್ರಗಳನ್ನು ನಿರ್ದೇಶನ ಮಾಡುತ್ತಾ ಬಂದಿದ್ದ ವಿಮಲ್ ರಾಜ್ ಎನ್ ಈ ಚಿತ್ರದ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ಹೋಪ್, ಲಾಫಿಂಗ್ ಬುದ್ಧ, ಬಾಸ್ ಥರದ ಚಿತ್ರಗಳಲ್ಲಿ ನಟಿಸಿದ್ದ ಸುಜನೀತ್ ಶೆಟ್ಟಿ ಅ ಡೇಟ್ ಮೂಲಕ ಪೂರ್ಣ ಪ್ರಮಾಣದ ನಾಯಕನಾಗಿ ಕನ್ನಡ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದ್ದಾರೆ. ವಾರದೊಪ್ಪತ್ತಿನಲ್ಲಿಯೇ ಅ ಡೇಟ್ ಪ್ರೇಕ್ಷಕರ ಮುಂದೆ ತೆರೆದುಕೊಳ್ಳಲಿದೆ.

keywords: A DATE movie, vimalraj n, sujanith shetty, ashvini shenoy

The post A DATE Movie Trailer: ಒಂದು ದಿನದಲ್ಲಿ ಘಟಿಸೋ ರೋಮಾಂಚಕ ಕಥನ! appeared first on Cini Shodha.

ಇತ್ತೀಚೆಗಷ್ಟೇ ಬ್ರಹ್ಮಕಮಲ ಚಿತ್ರ ಟ್ರೈಲರ್ ಮೂಲಕ ವ್ಯಾಪಕವಾಗಿ ಸುದ್ದಿಯಲ್ಲಿತ್ತು. ಒಂದು ಸದಭಿರುಚಿಯ ಸಿನಿಮಾ ಆ ಪರಿಯಾಗಿ ಸದ್ದು ಮಾಡಿದ್ದದ್ದು ಅದರೊಳಗಿರೋ ಕಂಟೆಂಟಿನ ಕಸುವಿನಿಂದ ಮಾತ್ರ. ಈಗಾಗಲೇ ಈ ಚಿತ್ರ ಹಲವಾರು ಅಂತಾರಾಷ್ಟ್ರೀಯ ಸಿನಿಮೋತ್ಸವಗಳಲ್ಲಿ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿಕೊಂಡಿತ್ತು. ಪ್ರೇಕ್ಷಕರ ಬೇಡಿಕೆಯ ಮೇರೆಗೆ ಹಲವಾರು ಬಾರಿ ಪ್ರದರ್ಶನಗೊಳ್ಳುವ ಮೂಲಕವೂ ಗಮನ ಸೆಳೆದಿತ್ತು. ಅದು ಒಟ್ಟಾರೆ ಸಿನಿಮಾ ಮೂಡಿ ಬಂದಿರುವ ರೀತಿಗೊಂದು ಉದಾಹರಣೆಯಷ್ಟೆ. ಇಂಥಾ ಸಿನಿಮಾ ಇದೀಗ ಸಿನಿಮಾ ಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ ಎಂದರೆ, ಸಹಜವಾಗಿಯೇ ಅದರತ್ತ ಕುತೂಹಲ ಮೂಡಿಕೊಳ್ಳುತ್ತದೆ. ಇದೀಗ ಬ್ರಹ್ಮಕಮಲದ ಸುತ್ತಲೂ ಅಂಥಾದ್ದೇ ಗಾಢ ಕೌತುಕ ಮೂಡಿಕೊಂಡಿದೆ.

ಕಥೆ, ಚಿತ್ರಕಥೆ, ಸಂಭಾಷಣೆಯೊಂದಿಗೆ ಸಿದ್ದು ಪೂರ್ಣಚಂದ್ರ ನಿರ್ದೇಶನ ಮಾಡಿರುವ ಈ ಸಿನಿಮಾ ಪೂರ್ಣಚಂದ್ರ ಫಿಲಂಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿದೆ. ಅದ್ವಿತಿ ಶೆಟ್ಟಿ, ಋತು ಚೈತ್ರ, ಲೋಕೇಂದ್ರ ಸೂರ್ಯ, ಬಾಲ ರಾಜ್ವಾಡಿ, ಮಮತಾ ರಾಹುತ್, ಪ್ರಮೀಳಾ ಸುಬ್ರಮಣ್ಯ ಮುಂತಾದವರ ತಾರಾಗಣ ಈ ಚಿತ್ರಕ್ಕಿದೆ. ಲೋಕೇಂದ್ರ ಸೂರ್ಯ ಛಾಯಾಗ್ರಹಣ, ಅನಂತ್ ಆರ್ಯನ್ ಸಂಗೀತ ನಿರ್ದೇಶನ, ದೀಪು ಸಂಕಲನ, ನಾಗರತ್ನ ಕೆ.ಹೆಚ್ ನಿರ್ಮಾಣ ನಿರ್ವಹಣೆಯಲ್ಲಿ ಬ್ರಹ್ಮಕಮಲ ರೂಪುಗೊಂಡಿದೆ. ಪುಟ್ಟರಾಜು ಮತ್ತು ಪ್ರಮೀಳಾ ಸುಬ್ರಮಣ್ಯ ಕಾರ್ಯಕಾರಿ ನಿರ್ಮಾಪಕರಾಗಿ ಜೊತೆಯಾಗಿದ್ದಾರೆ.

keywords: brahma kamala movie, siddu poornachandra

The post Brahma Kamala movie: ಸೂಕ್ಷ್ಮ ಕಥೆಯ ಚುಂಗು ಹಿಡಿದ ಸಿದ್ದು ಪೂರ್ಣಚಂದ್ರ! appeared first on Cini Shodha.

ರ್‍ಯಾಪ್ ಶೈಲಿಯ ಹಾಡುಗಳಿಗೆ ಹುಚ್ಚೆದ್ದು ತೆರೆದುಕೊಳ್ಳುವ ಯುವ ಸಮುದಾಯದ ಸಂಖ್ಯೆ ಇದೀಗ ಹೆಚ್ಚಾಗಿದೆ. ಅಂಥಾ ಕೇಳುಗರನ್ನು ಮಾತ್ರವಲ್ಲದೇ, ಸಂಗೀತಾಸಕ್ತರನ್ನೆಲ್ಲ ಸೆಳೆಯುವ ಶೈಲಿಯಲ್ಲಿ ಸದರಿ ಹಾಡು ಮೂಡಿ ಬಂದಿದೆ. ಈ ಹಾಡಿಗೆ ಸುಜನಿತ್ ಶೆಟ್ಟಿ ಹಾಗೂ ವಿಮಲ್ ರಾಜ್ ಎನ್ ಸಾಹಿತ್ಯ ಬರೆದಿದ್ದಾರೆ. ಮೋಕ್ಷ ಬೀಟ್ಸ್ ಸಂಗೀತ ಸಂಯೋಜನೆಯಿರುವ ಈ ಹಾಡಿನೊಂದಿಗೆ `A DATE’ ಮತ್ತಷ್ಟು ಪ್ರೇಕ್ಷಕರನ್ನು ಸೆಳೆದುಕೊಂಡಿದೆ. ಈಗಾಗಲೇ ಇದೊಂದು ಭಿನ್ನ ಕಥೆ ಹೊಂದಿರೋ ಸಿನಿಮಾವಾಗಿ ಪ್ರೇಕ್ಷಕರ ವಲಯದಲ್ಲೊಂದು ಕುತೂಹಲ ಮೂಡಿಕೊಂಡಿದೆ. ಈ ಹಾಡು ಅದನ್ನು ಮತ್ತಷ್ಟು ತೀವ್ರಗೊಳಿಸುವಲ್ಲಿ ಸಫಲವಾಗಿದೆ.

ಕಿರುಚಿತ್ರಗಳನ್ನು ನಿರ್ದೇಶನ ಮಾಡಿ ಸೈ ಅನ್ನಿಸಿಕೊಂಡಿದ್ದಾರೆ. ಅಂಥಾ ಕಿರುಚಿತ್ರಗಳಲ್ಲಿ ಅನೇಕವುಗಳು ಚಲನಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿಕೊಂಡಿವೆ. ಹೀಗೆ ಕಿರುಚಿತ್ರಗಳ ಮೂಲಕ ತಮ್ಮೊಳಗಿನ ನಿರ್ದೇಶನದ ಕಸುವನ್ನು ಒರೆಗೆಹಚ್ಚಿದ್ದ ವಿಮಲ್ ರಾಜ್ ನಿರ್ದೇಶನದ ಚೊಚ್ಚಲ ಚಿತ್ರ “A DATE’ ಇಲ್ಲಿ ಯುವ ಆವೇಗದ ಕಥೆಯಿದೆ. ಉತ್ತರದ ಹುಡುಗಿ ಮತ್ತು ದಕ್ಷಿಣದ ಹುಡುಗನ ನಡುವೆ ಬೆಂಗಳೂರಿನ ಭೂಮಿಕೆಯಲ್ಲಿ ಕಥೆಯೊಂದು ಗರಿಬಿಚ್ಚಿಕೊಳ್ಳುತ್ತದೆಯಂತೆ. ರೊಮ್ಯಾಮ್ಸ್ ಡ್ರಾಮಾ ಜಾನರಿಗೊಳಪಡುವ ಈ ಸಿನಿಮಾದಲ್ಲಿ ಭಯ, ಕುತೂಹಲ, ಹಿಂಜರಿಕೆಗಳ ಮಿಶ್ರ ಭಾವದೊಂದಿಗೆ ಭೇಟಿಯಾಗೋ ಎರಡು ಜೀವಗಳ ಹಿನ್ನೆಲೆಯಲ್ಲಿ, ಪ್ರಸ್ತುತ ಬೆಂಗಳೂರಿನ ಸನ್ನಿವೇಶಗಳನ್ನು ಒಳಗೊಂಡಂತೆ ಕಥೆ ತೆರೆದುಕೊಳ್ಳುತ್ತದೆ. ಸುಜನಿತ್ ಶೆಟ್ಟಿ ಮತ್ತು ಅಶ್ವಿನಿ ಶೆಣೈ ನಾಯಕ ನಾಯಕಿಯರಾಗಿ ನಟಿಸಿದ್ದಾರೆ.

ವಿಶೇಷವೆಂದರೆ, ಈ ಸಿನಿಮಾ ಎರಡು ಪಾತ್ರಗಳ ಸುತ್ತಾ ಚಲಿಸುತ್ತೆ. ನಿರ್ದೇಶಕರು ಪ್ರತೀ ದೃಶ್ಯಗಳೂ ಕೂಡಾ ಅತ್ಯಂತ ನೈಜವಾಗಿ ಮೂಡಿ ಬರಬೇಕೆಂಬ ಇರಾದೆಯಿಂದ ಬೆಂಗಳೂರಿನ ಐವತ್ತೈದಕ್ಕೂ ಹೆಚ್ಚು ಸ್ಥಳಗಳಲ್ಲಿ ಚಿತ್ರೀಕರಣ ನಡೆಸಿದ್ದಾರೆ. ಇದರ ಭಾಗವಾಗಿಯೇ ಬೆಂಗಳೂರು ಕೂಡಾ ಚಿತ್ರದ ಪ್ರಮುಖ ಪಾತ್ರವೊಂದರಂತೆ ಮೂಡಿಬಂದಿದೆ. ವೀಕೆಂಡ್ ಶಾರ್ಟ್ಸ್ ಸ್ಟುಡಿಯೋ ಬ್ಯಾನರ್ನಡಿ ಸಮಾನ ಮನಸ್ಕರ ತಂಡ ಈ ಚಿತ್ರವನ್ನು ನಿರ್ಮಿಸಿದೆ. ಚಿತ್ರಕ್ಕೆ ಮೋಕ್ಷ ಬೀಟ್ಸ್ ಸಂಗೀತ, ವಡ್ಡೆ ದೇವೇಂದ್ರ ರೆಡ್ಡಿ ಛಾಯಾಗ್ರಹಣ, ವಿಮಲ್ ರಾಜ್ ಎನ್ ಸಂಕಲನ ಹಾಗೂ ಸುಜನಿತ್ ಶೆಟ್ಟಿ ಮತ್ತು ವಿಮಲ್ ರಾಜ್ ಎನ್ ಸಾಹಿತ್ಯವಿದೆ. ಇಷ್ಟರಲ್ಲಿಯೇ `A DATE’ ಬಿಡುಗಡೆ ದಿನಾಂಕ ಘೋಷಣೆಯಾಗಲಿದೆ.

keywords: A DATE movie, vimalraj n, sandalwood

The post A DATE Movie: ಒಂದು ದಿನದಲ್ಲಿ ಘಟಿಸೋ ರೋಮಾಂಚಕ ಕಥನ! appeared first on Cini Shodha.

ಸದ್ಯಕ್ಕೆ ಬಂದ ಅವಕಾಶವನ್ನೆಲ್ಲ ಬಾಚಿಕೊಂಡು ಒಪ್ಪಿಕೊಳ್ಳುವ ಸ್ಥಿತಿಯಲ್ಲಿ ರುಕ್ಮೀನಿ ಇಲ್ಲ. ಟಾಕ್ಸಿಕ್‌ನಂಥಾ ದೊಡ್ಡ ಸಿನಿಮಾಗಳಲ್ಲಿ ನಟಿಸಿದ ನಂತರ, ಅದನ್ನು ಸರಿದೂಗಿಸುವಂಥಾ ಸಿನಿಮಾಗಳನ್ನು ಮಾತ್ರವೇ ಆಯ್ಕೆ ಮಾಡಿಕೊಳ್ಳುವ ಅನಿವಾರ್ಯತೆ ಇದೆ. ಇದೀಗ ಒಂದಷ್ಟು ಅವಕಾಶಗಳನ್ನು ಅಮೂಲಾಗ್ರವಾಗಿ ಪರಿಶೀಲಿಸುತ್ತಿರುವ ರ೫ಉಕ್ಮಿಣಿ, ಮಲೆಯಾಳಂನ ಒಂದು ಸಿನಿಮಾವನ್ನು ಒಪ್ಪಿಕೊಂಡಿದ್ದಾರಂತೆ. ಈ ಮೂಲಕ ಮಲೆಯಾಳದ ಪ್ರಸಿದ್ಧ ನಟ ನಿವಿನ್ ಪೌಲಿಗೆ ನಾಯಕಿಯಾಗಿ ನಟಿಸಲಿರೋದು ಪಕ್ಕಾ ಆದಂತಾಗಿದೆ. ಈ ಸಿನಿಮಾದ ಬಗೆಗಿನ ಮತ್ತಷ್ಟು ಮಾಹಿತಿಗಳು ಶೀಘ್ರದಲ್ಲಿಯೇ ಜಾಹೀರಾಗುವ ನಿರೀಕ್ಷೆಗಳಿವೆ.

dhurandhar v/s toxic war: ಯಶ್ ವಿರುದ್ಧ ಮತ್ತೆ ಬಾಲಿವುಡ್ ಮಂದಿಯ ವಾರ್!

ಹಾಗೆ ನೋಡಿದರೆ, ಈ ಹುಡುಗಿಗೆ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದಲ್ಲಿ ನಾಯಕಿಯಾಗಿ ನಟಿಸುವ ಅವಕಾಶ ಕೂಡಿ ಬಂದಿದ್ದೇ ಅಚಾನಕ್ಕಾಗಿ. ಅದಾಗಲೇ ನಟಿಯಾಗಬೇಕೆಂಬ ಕನಸಿಟ್ಟುಕೊಂಡಿದ್ದ ರುಕ್ಮಿಣಿಗೆ ಸಪ್ತ ಸಾಗರದಾಚೆ ಎಲ್ಲೋ ಚಿತ್ರದ ನಾಯಕಿಗಾಗಿ ಆಡಿಷನ್ ನಡೆಸುತ್ತಿರುವ ವಿಚಾರ ಗಮನಕ್ಕೆ ಬಂದಿತ್ತು. ತುಸು ಅಳುಕಿನೊಂದಿಗೆ ಚಿತ್ರತಂಡವನ್ನು ಸಂಪರ್ಕಿಸಿದ್ದ ರುಕ್ಮಿಣಿ, ನಂತರ ಒಂದಷ್ಟು ಸ್ಪರ್ಧೆಯನ್ನು ದಾಟಿಕೊಂಡು ನಾಯಕಿಯಾಗಿ ಆಯ್ಕೆಯಾಗಿದ್ದರು. ಅದಕ್ಕೆ ತನ್ನ ಪ್ರತಿಭೆ ಮಾತ್ರವಲ್ಲದೇ ಅದೃಷ್ಟವೂ ಕಾರಣವೆಂಬ ಮನಃಸ್ಥಿತಿ ಹೊಂದಿರುವ ರುಕ್ಮಿಣಿಯೀಗ ತಮಿಳು ಚಿತ್ರರಂಗದಲ್ಲಿಯೂ ಬ್ಯುಸಿಯಾಗಿದ್ದಾರೆ. ಅದೇ ಹೊತ್ತಿನಲ್ಲಿ ತೆಲುಗಿನಲ್ಲಿಯೂ ಒಂದಷ್ಟು ಅವಕಾಶಗಳು ಅರಸಿ ಬರಲಾರಂಭಿಸಿವೆ. ಈ ನಡುವೆ ಅಧಿಕೃತವಾಗಿಯೇ ಮಲೆಯಾಳಂಗೂ ರುಕ್ಮಿಣಿಯ ಪಾದಾರ್ಪಣೆಯಾದಂತಾಗಿದೆ!

keywords: rukmini vasanth, toxic, yash

The post Rukmini Vasanth: ಎಲ್ಲ ಭಾಷೆಗಳಲ್ಲೂ ಅವಕಾಶಗಳ ಅಬ್ಬರ! appeared first on Cini Shodha.

ಈ ಹಿಂದೆ ದಾರಿ ಯಾವುದಯ್ಯಾ ವೈಕುಂಟಕೆ ಎಂಬ ಸಿನಿಮಾ ಮೂಲಕ ನಿರ್ದೇಶಕರಾಗಿ ಗಮನ ಸೆಳೆದಿದ್ದವರು ಸಿದ್ದು ಪೂರ್ಣಚಂದ್ರ. ಈ ಮೂಲಕವೇ ತಾನೋರ್ವ ಭಿನ್ನ ಬಗೆಯ ನಿರ್ದೇಶಕನೆಂಬ ಸುಳಿವು ದಾಟಿಸುತ್ತಲೇ, ಪ್ರಯೋಗಾತ್ಮಕ ಹಾದಿಯಲ್ಲಿಯೇ ನೋಡುಗರ ಮನಮುಟ್ಟಿದ್ದರು. ಸಿನಿಮಾ ರಂಗದ ಜೀವಂತಿಕೆ ಯಾವ ನಡೆಗಳಲ್ಲಿ ಅಡಗಿದೆ ಎಂಬಂಥಾ ಸ್ಪಷ್ಟ ಅರಿವು ಹೊಂದಿರೋ ಸಿದ್ದು ಪೂರ್ಣಚಂದ್ರ, ತಮ್ಮಿಷ್ಟದ ಥವೂ ಕೂಡಾ ಸಿನಿಮಾ ರಂಗದ ಜೀವಂತಿಕೆಯ ಮೂಲಧಾತು ಎಂಬುದನ್ನು ಅರಿವಾಗಿಸಿಕೊಂಡಿದ್ದಾರೆ. ಈ ಕಾರಣದಿಂದಲೇ, ಎಲ್ಲ ಸವಾಲುಗಳನ್ನು ಮೊದಲೇ ಮನಗಂಡು, ಈ ಸಮಾಜದ ಕುಟುಂಬ ವ್ಯವಸ್ಥೆಯಲ್ಲಿ ಹುದುಗಿ ಹೋಗಿರುವ ಹೆಣ್ಣುಮಕ್ಕಳ ಒಡಲ ಕೂಗಿನ ಕಥನಕ್ಕೆ ದೃಶ್ಯ ರೂಪ ಕೊಟ್ಟಿದ್ದಾರೆ.

ಗಮನಿಸಬೇಕಾದ ಅಂಶವೆಂದರೆ, ಈ ಪ್ರಯತ್ನಕ್ಕೆ ಆರಂಭಿಕವಾಗಿಯೇ ಪ್ರೇಕ್ಷಕರ ಕಡೆಯಿಂದ ಭರಪೂರ ಪ್ರತಿಕ್ರಿಯೆಗಳು ಸಿಗುತ್ತಿವೆ. ಟ್ರೈಲರ್ ಮೂಡಿ ಬಂದಿರುವ ರೀತಿಯಿಮದಲೇ ಬ್ರಹ್ಮಕಮಲ ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಸೆಳೆದುಕೊಂಡಿದೆ. ಹೆಣ್ಣು ಸಂಸಾರದ ಕಣ್ಣು ಎಂಬುದು ನಮ್ಮ ಜನಜೀವನದಲ್ಲಿ ಹಾಸುಹೊಕ್ಕಾಗಿರುವ ನಾಣ್ನುಡಿ. ಆದರೆ, ಆ ಕಣ್ಣುಗಳಲ್ಲಿ ಜಿನುಗುವ ನಾನಾ ಮರ್ಮರಗಳನ್ನು ಗ್ರಹಿಸುವ ಸೂಕ್ಷ್ಮತೆ ಮಾತ್ರ ನಮ್ಮಲ್ಲಿನ ಕೌಟುಂಬಿಕ ವ್ಯವಸ್ಥೆಯಲ್ಲಿಲ್ಲ. ಅಂಥಾ ವಾತಾವರಣದಲ್ಲಿ ಒಂದು ರಾತ್ರಿಯಲ್ಲಿ ಘಟಿಸುವ ಹೆಣ್ಣೊಬ್ಬಳ ಕಥನ ಬ್ರಹ್ಮ ಕಮಲದ ರೂಪದಲ್ಲಿ ಪ್ರೇಕ್ಷಕರನ್ನು ಮುಖಾಮುಖಿಯಾಗುವ ಸನ್ನಾಹದಲ್ಲಿದೆ.

ಈಗಾಗಲೇ ಬೆಂಗಳೂರು ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಬ್ರಹ್ಮ ಕಮಲಕ್ಕೆ ಭರಪೂರ ಮೆಚ್ಚುಗೆ ಸಿಕ್ಕಿದೆ. ಪ್ರೇಕ್ಷಕರ ಒತ್ತಾಯದ ಮೇರೆಗೆ ಮೂರು ಮೂರು ಪ್ರದರ್ಶನಗಳನ್ನು ಕಂಡಿದೆ. ಇಂಥಾ ಚಿತ್ರವೀಗ ಟ್ರೈಲರ್ ಮೂಲಕ ಸದ್ದು ಮಾಡಲಾರಂಭಿಸಿದೆ. ಕಥೆ, ಚಿತ್ರಕಥೆ, ಸಂಭಾಷಣೆಯೊಂದಿಗೆ ಸಿದ್ದು ಪೂರ್ಣಚಂದ್ರ ನಿರ್ದೇಶನ ಮಾಡಿರುವ ಈ ಸಿನಿಮಾ ಪೂರ್ಣ ಚಂದ್ರ ಫಿಲಂಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣಗೊಂಡಿದೆ. ಅದ್ವಿತಿ ಶೆಟ್ಟಿ, ಋತು ಚೈತ್ರ, ಲೋಕೇಂದ್ರ ಸೂರ್ಯ, ಬಾಲ ರಾಜ್ವಾಡಿ, ಮಮತಾ ರಾಹುತ್, ಪ್ರಮೀಳಾ ಸುಬ್ರಮಣ್ಯ ಮುಂತಾದವರ ತಾರಾಗಣ ಈ ಚಿತ್ರಕ್ಕಿದೆ. ಲೋಕೇಂದ್ರ ಸೂರ್ಯ ಛಾಯಾಗ್ರಹಣ, ಅನಂತ್ ಆರ್ಯನ್ ಸಂಗೀತ ನಿರ್ದೇಶನ, ದೀಪು ಸಂಕಲನ, ನಾಗರತ್ನ ಕೆ.ಹೆಚ್ ನಿರ್ಮಾಣ ನಿರ್ವಹಣೆಯಲ್ಲಿ ಬ್ರಹ್ಮಕಮಲ ರೂಪುಗೊಂಡಿದೆ. ಪುಟ್ಟರಾಜು ಮತ್ತು ಪ್ರಮೀಳಾ ಸುಬ್ರಮಣ್ಯ ಕಾರ್ಯಕಾರಿ ನಿರ್ಮಾಪಕರಾಗಿ ಜೊತೆಯಾಗಿದ್ದಾರೆ. ಇಷ್ಟರಲ್ಲಿಯೇ ಬ್ರಹ್ಮಕಮಲ ಪ್ರೇಕ್ಷಕರ ಮುಂದೆ ಅರಳಿಕೊಳ್ಳುವ ದಿನಾಂಕ ನಿಗಧಿಯಾಗಲಿದೆ!

keywords: brahmakamala trailer, siddu poornachandra, adhvithi shetty, sandalwood, kfi

The post Brahmakamala Movie Trailer: ಸೂಕ್ಷ್ಮ ಕಥನಕ್ಕೆ ಕಣ್ಣಾದ ಸಿದ್ದು ಪೂರ್ಣಚಂದ್ರ! appeared first on Cini Shodha.

ಡಾಲಿ ಧನಂಜಯ್ ನಿರ್ಮಾಣ ಮಾಡಿದ್ದ ಮದರ್ ಪ್ರಾಮಿಸ್ ಚಿತ್ರ ಇತ್ತೀಚೆಗಷ್ಟೇ ಬಿಡುಗಡೆಗೊಂಡಿತ್ತು. ಒಂದಷ್ಟು ಅಡೆತಡೆಗಳಾಚೆಗೂ ಆ ಚಿತ್ರಕ್ಕೆ ಒಂದು ಮಟ್ಟದ ಗೆಲುವು ದಕ್ಕಿತ್ತು. ಅದರ ಬೆನ್ನಲ್ಲಿಯೇ ಇದೀಗ ಡಾಲಿ ವಿಶಿಷ್ಟ ಪಾತ್ರದಲ್ಲಿ ನಟಿಸಿರುವ ಅಣ್ಣ ಫ್ರಮ್ ಮೆಕ್ಸಿಕೋ ಚಿತ್ರದ ಬಿಡುಗಡೆ ದಿನಾಂಕ ಘೋಶಣೆಯಾಗಿದೆ. ಇದೇ ಡಿಸೆಂಬರ್ ೨೪ರಂದು ಸದರಿ ಸಿನಿಮಾ ಬಿಡುಗಡೆಯಾಗೋದು ಪಕ್ಕಾ. ಡಿಸೆಂಬರ್ ೨೪ರಂದು ಸಮಯ ನಿಗಧಿ ಮಾಡಿರೋದಕ್ಕೂ ಕಾರಣವಿದೆ. ಈಗ್ಗೆ ಐದು ವರ್ಷಗಳ ಹಿಂದೆ ಬಡವ ರಾಸ್ಕಲ್ ಚಿತ್ರ ಕೂಡಾ ಇದೇ ದಿನಾಂಕದಂದು ಬಿಡುಗಡೆಗೊಂಡು ಗೆಲುವು ಕಂಡಿತ್ತು. ಅಂಥಾ ಗೆಲುವು ಮರಳುವ ನಿರೀಕ್ಷೆಯೊಂದಿಗೆ ಅದೇ ದಿನಾಂಕವನ್ನು ಆಯ್ಕೆ ಮಾಡಿಕೊಂಡಿರುವಂತಿದೆ.

Kangana Ranaut Controvercy: ಭ್ರಾಂತಿಯಲ್ಲಿ ಮಿಂದೇಳುತ್ತಿರುವಾಕೆಯ ವಾಂತಿ ಪುರಾಣ!

ಶಂಕರ್ ಗುರು ನಿರ್ದೇಶನದಲ್ಲಿ ಮೂಡಿ ಬಂದಿರುವ ಅಣ್ಣ ಫ್ರಮ್ ಮೆಕ್ಸಿಕೋ ಸಿನಿಮಾದ ಬಗ್ಗೆ ಖುದ್ದು ಧನಂ ಜಯ್‌ಗೆ ವಿಪರೀತ ಭರವಸೆ ಇದೆ. ಈ ಸಿನಿಮಾದ ಕಥೆ ಮತ್ತು ಪಾತ್ರಗಳು ಬಿನ್ನವಾಗಿರೋದರಿಂದ, ಬಡವ ರಾಸ್ಕಲ್ ಚಿತ್ರವನ್ನೇ ಸರಿಗಟ್ಟುವಂಥಾ ಗೆಲುವು ಲಭಿಸುವ ನಿರೀಕ್ಷೆ ಚಿತ್ರತಂಡಕ್ಕಿದೆ. ಹೆಚ್ಚೇನೂ ಪ್ರಚಾರದ ಅಬ್ಬರವಿಲ್ಲದೆ ಕೆಲಸ ಕಾರ್ಯ ಮುಗಿಸಿಕೊಳ್ಳುತ್ತಿರೋ ಚಿತ್ರತಂಡ, ಇದುವರೆಗೂ ಕಥೆಯ ಹೊಳಹನ್ನು ಜಾಹೀರು ಮಾಡಿಲ್ಲ. ಆದರೆ, ಬಿಡುಗಡೆಗೆ ಮಾತ್ರ ಸರಿಕಟ್ಟಾದ ಮುಹೂರ್ತ ನಿಗಧಿ ಮಾಡಲಾಗಿದೆ. ಕ್ರಿಸ್‌ಮಸ್ ಹಬ್ಬಕ್ಕೆ ಸಾಲು ಸಾಲು ರಜಾ ದಿನಗಳಿರುತ್ತವೆ. ಸಿನಿಮಾ ಬಿಡುಗಡೆಗಿದು ಅತ್ಯಂತ ಪ್ರಶಸ್ತವಾದ ಸಮಯ. ಇ ಸುಮುಹೂರ್ತದಲ್ಲಿ ಅಣ್ಣ ಫ್ರಮ್ ಚಿತ್ರಕ್ಕೆ ಗೆಲುವು ಸಿಗಬಹುದೇ?

keywords: daali dhananjaya, anna from mexico, sandalwood, daali

The post Daali Dhananjay: ಹೊಸಾ ಅವತಾರದಲ್ಲಿ ಟಗರು ಡಾಲಿ! appeared first on Cini Shodha.

ಈ ವೀಡಿಯೋ ಸಾಂಗ್ ಅದ್ಭುತವಾಗಿ ಮೂಡಿ ಬಂದಿದೆ. ಹೇಮಂತ್ ಕುಮಾರ್ ಅವರ ಸಂಗೀತ ಸಂಯೋಜನೆ ಮನಮುಟ್ಟುವಂತಿದೆ. ಸರೆಗಮಪ ಖ್ಯಾತಿಯ ಅಶ್ವಿನ್ ಶರ್ಮಾ ಕೂಡಾ ಚೆಂದಗೆ ಹಾಡಿದ್ದಾರೆ. ಈ ಹಾಡಿನಲ್ಲಿ ಸಮರ್ಥ್ ಹಾಗೂ ಧನ್ವಿ ಎಲ್ಲಿಯೂ ಹೊಸಬರೆನ್ನಿಸದಂತೆ ಆ ಪಾತ್ರಗಳಿಗೆ ಜೀವ ತುಂಬಿದ್ದಾರೆಂಬ ಮೆಚ್ಚುಗೆಯ ಮಾತುಗಳು ಓಂಪ್ರಕಾಶ್ ರಾವ್ ಮತ್ತು ಬಾಲಾಜಿ ವೀರಾಸ್ವಾಮಿ ಕಡೆಯಿಂದ ಚಿತ್ರತಂಡಕ್ಕೆ ಲಭಿಸಿದೆ. ಇದೇ ಸಂದರ್ಭದಲ್ಲಿ ರಘುರಾಮ್ ಕೂಡಾ ಈ ಹಾಡನ್ನು ಮೆಚ್ಚಿಕೊಳ್ಳುತ್ತಾ, ದೊಡ್ಡ ಮಟ್ಟದ ಗೆಲುವು ಲಭಿಸಲೆಂದು ಹಾರೈಸಿದ್ದಾರೆ.

ನಿರ್ದೇಶಕ ಒರಟ ಶ್ರೀ ಸದರಿ ಹಾಡು ಸೃಷ್ಟಿಯಾದ ಬಗೆಗಿನ ಒಂದಷ್ಟು ಅಚ್ಚರಿಯ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ. ಸಿನಿಮಾದ ಕಥೆಯ ಸಾರವನ್ನು ಧ್ವನಿಸುವ ಈ ಹಾಡಿಗೆ ಸ್ಥಳದಲ್ಲಿಯೇ ಶ್ರೀ ಸಾಹಿತ್ಯ ಬರೆದಿದ್ದರಂತೆ. ಇದೇ ಸಂದರ್ಭದಲ್ಲಿ ಕಥೆಯ ಸೂಕ್ಷ್ಮ ವಿಚಾರಗಳನ್ನು ಹಂಚಿಕೊಳ್ಳುವ ಮೂಲಕ ಶಬರಿಯ ಬಗೆಗಿನ ಕೌತುಕ ತೀವ್ರಗೊಳ್ಳುವಂತೆ ಮಾಡಿದ್ದಾರೆ. ಹೀಗೆ ಬಿಡುಗಡೆಗೊಂಡಿರೋ ತಂದಾನಿ ತಾನಾನೋ ಹಾಡಿಗೀಗ ಕೇಳುಗರ ಕಡೆಯಿಂದ ಮೆಚ್ಚುಗೆ ಲಭಿಸುತ್ತಿದೆ. ಅದೀಗ ಟ್ರೆಂಡಿಂಗಿನತ್ತ ದಾಪುಗಾಲಿಡುತ್ತಿದೆ.

ಸಿವಿಲ್ ಇಂಜಿನಿಯರ್ ಆಗಿರುವ ರಮೇಶ್, ಸುಧಾಕರ್ ರೆಡ್ಡಿ ಮತ್ತು ವಿಷ್ಣುಕಾಂತ್ ಎ ಜೊತೆಗೂಡಿ ಬರವಿ ಫಿಲಂಸ್ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಒರಟ ಶ್ರೀ ನಿರ್ದೇಶನವಿರುವ ಈ ಚಿತ್ರದಲ್ಲಿ ಸಮರ್ಥ್ ಮತ್ತು ಕೃತಿಕಾ ಗೌಡ ನಾಯಕ ನಾಯಕಿಯರಾಗಿ ನಟಿಸಿದ್ದಾರೆ. ಧನ್ವಿ, ಎಂ.ಕೆ ಮಠ, ನೀನಾಸಂ ಅಶ್ವತ್, ಸೀತಾ ಹರ್ಷವರ್ಧನ್, ಯೋಗೇಶ್ ವೀರ್, ಮಂಡ್ಯ ಸಿದ್ದು ಮುಂತಾದವರ ತಾರಾಗಣವಿದೆ. ಬಿ.ಆರ್ ಹೇಮಂತ್ ಕುಮಾರ್ ಸಂಗೀತ ನಿರ್ದೇಶನ, ಸಾಮ್ರಾಟ್ ನಾಗರಾಜ್ ಛಾಯಾಗ್ರಹಣ, ಕೆ. ಗಿರೀಶ್ ಕುಮಾರ್ ಸಂಕಲನ ಈ ಚಿತ್ರಕ್ಕಿದೆ.

keywords: shabari movie, tandani tanano, sandalwood

The post Shabari Movie: ಕೇಳುಗರನ್ನು ಆವರಿಸಿಕೊಳ್ಳೋ ಭಾವತೀವ್ರತೆ! appeared first on Cini Shodha.

ರಾಧೆಯ್ಕುಮ್ ಕಣ್ಣನುಕ್ಕುಮ್ ಶೀರ್ಷಿಕೆಯ ಈ ವೀಡಿಯೋ ಹಾಡನ್ನು ಲಹರಿ ವೇಲು ಬಿಡುಗಡೆಗೊಳಿಸಿದ್ದಾರೆ. ಸುನಾದ್ ಗೌತಮ್ ಓರ್ವ ಪ್ರತಿಭಾನ್ವಿಕ ಸಂಗೀತ ನಿರ್ದೇಶಕ. ಅವರು ಈ ಸಿನಿಮಾದ ಅಷ್ಟೂ ಹಾಡುಗಳನ್ನು ಅದ್ಭುತವಾಗಿ ರೂಪಿಸಿದ್ದಾರೆ. ಆ ಕಾರಣದಿಂದಲೇ ಈ ಸಿನಿಮಾದ ಆಡಿಯೋ ಹಕ್ಕುಗಳನ್ನು ಖರೀದಿಸಿರೋದಾಗಿ ಹೇಳಿರುವ ವೇಲು, ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ. ಈ ಪತ್ರಿಕಾಗೋಷ್ಠಿಯಲ್ಲ್ಲಿ ಲಹರಿ ವೇಲು, ಕೆ ಕಲ್ಯಾಣ್, ರಜತ್, ಭರತ್ ಕುಮಾರ್, ಮೋಕ್ಷಿತಾ ಪೈ, ರಿಯಾ ಸಚಿದೇವ್, ಸುನಾದ್ ಗೌತಮ್, ನಿರ್ದೇಶಕ ಪ್ರಾಣ್ ಸುವರ್ಣ, ಉಮೇಶ್ ಕುಮಾರ್ ಮುಂತಾದವರು ಹಾಜರಿದ್ದರು.

ಈ ಹಿಂದೆ ಮೆಜೆಸ್ಟಿಕ್ ೨ ಚಿತ್ರದ ಮೂಲಕ ನ ಆಯಕ ನಟನಾಗಿ ಗಮನ ಸೆಳೆದಿದ್ದ ಭರತ್ ಕುಮಾರ್, ತಮ್ಮ ಚಿತ್ರದ ಆಡಿಯೋ ಹಕ್ಕುಗಳನ್ನು ಬಲು ಖುಷಿಯಿಂದ ದೊಡ್ಡ ಮೊತ್ತಕ್ಕೆ ಲಹರಿ ಸಂಸ್ಥೆ ಖರೀದಿಸಿದ್ದರ ಬಗ್ಗೆ ಖುಷಿ ಹಂಚಿಕೊಂಡಿದ್ದಾರೆ. ಉಇದೇ ಸಂದರ್ಭದಲ್ಲಿ, ಸದರಿ ಹಾಡಿನಲ್ಲಿ ಹಾಗೂ ಒಟ್ಟಾರೆ ಸಿನಿಮಾದಲ್ಲಿ ಕುಂಭಕೋಣಂನ ಪರಿಸರವನ್ನು ತೋರಿಸಿರೋದರಿಂದ ಇದನ್ನೊಂದು ಟ್ರೇಡಿಷನ್ ಚಿತ್ರ ಅಂದುಕೊಳ್ಳಬೇಕಿಲ್ಲ. ಇದು ಈಗಿನ ಯುವ ಸಮುದಾಯಕ್ಕೆ ನೇರವಾಗಿ ತಾಕುವಂಥಾ ಕಥೆಯನ್ನೊಳಗೊಂಡಿರೋ ಸಿನಿಮಾ ಎಂಬ ಸ್ಪಷ್ಟೀಕರಣ ಕೊಟ್ಟಿದ್ದಾರೆ. ಇದೇ ಹೊತ್ತಿನಲ್ಲಿ ಕಥೆಯ ಬಗ್ಗೆಯೂ ಒಂದಷ್ಟು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

ಇಲ್ಲಿ ಭರತ್ ಕುಮಾರ್ ಜೊತೆ ಮೋಕ್ಷಿತಾ ಪೈ ಮತ್ತು ಮುಂಬೈ ಮೂಲದ ಮಾಡೆಲ್ ರಿಯಾ ಸಚ್‌ದೇವ್ ನಾಯಕಿಯರಾಗಿ ಜೊತೆಯಾಗಿದ್ದಾರೆ. ಪಾರು ಧಾರಾವಾಹಿಯ ಮೂಲಕ ಕಿರುತೆರೆಯಲ್ಲಿ ದೊಡ್ಡ ಮಟ್ಟದಲ್ಲಿ ಹೆಸರು ಮಾಡಿದ್ದ ಮೋಕ್ಷಿತಾ ಪೈ ಇಲ್ಲಿ ರಾಧೆಯಾಗಿ, ಭಾವುಕ ಪಾತ್ರವೊಂದರ ಮೂಲಕ ಪ್ರೇಕ್ಷಕರನ್ನು ಮುಖಾಮುಖಿಯಾಗುವ ಸನ್ನಾಹದಲ್ಲಿದ್ದಾರೆ. ಇದೇ ಹೊತ್ತಿನಲ್ಲಿ ಮೋಕ್ಷಿತಾ ಈ ಸಿನಿಮಾದ ನಾಯಕಿಯಾಗಿದ್ದರ ಹಿಂದಿರುವ ಒಂದಷ್ಟು ವಿಚಾರಗಳನ್ನೂ ಹಂಚಿಕೊಂಡಿದ್ದಾರೆ. ವಿಶೇಷವೆಂದರೆ, ಸದರಿ ಹಾಡಿನ ಮೂಲಕ ಮೋಕ್ಷಿತಾ ಪಾತ್ರದ ಚಹರೆಗಳೂ ಜಾಹೀರಾಗಿವೆ.

ಇದೀಗ ಟ್ರೆಂಡಿಂಗಿನಲ್ಲಿರೋ ಈ ಮೋಹಕವಾದ ಹಾಡಿ ಕೆ ಕಲ್ಯಾಣ್ ಸಾಹಿತ್ಯ ಬರೆದಿದ್ದಾರೆ. ರಜತ್ ಹೆಗ್ಡೆ ಮತ್ತು ಕವಿತಾ ರಮೇಶ್ ಧ್ವನಿಯಾಗಿದ್ದಾರೆ. ಉಮೇಶ್ ಫಿಲಂಸ್ ಬ್ಯಾನರಿನಡಿಯಲ್ಲಿ ಎನ್ ಹನುಮಂತರಾಜು ಮತ್ತು ಎನ್ ಹೆಚ್ ಉಮೇಶ್ ಚಂದ್ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ದಶಕಗಳಿಗೂ ಹೆಚ್ಚು ಕಾಲದಿಂದ ಚಿತ್ರರಂಗದಲ್ಲಿ ಕಾರ್ಯ ನಿರ್ವಹಿಸಿರುವ ಪ್ರಾಣ್ ಸುವರ್ಣ ನಿರ್ದೇಶನ ಮಾಡಿರುವ ಈ ಚಿತ್ರದಲ್ಲಿ ಭರತ್ ಕುಮಾರ್ ನಾಯಕನಾಗಿ, ಮೋಕ್ಷಿತಾ ಪೈ ಮತ್ತು ರಿಯಾ ಸಚಿದೇವ್ ನಾಯಕಿಯರಾಗಿ ನಟಿಸಿದ್ದಾರೆ. ಸುನಾದ್ ಗೌತಮ್ ಸಂಗೀತ, ಸುನೀಲ್ ನರಸಿಂಹ ಮೂರ್ತಿ ಛಾಯಾಗ್ರಹಣ, ಸುರೇಶ್ ಆರ್ಮುಗಂ ಸಂಕಲನ, ಲಕ್ಷ್ಮಣ್ ರಾವ್ ಸಹಾಯಕ ಸಂಕಲನ, ಸಂಕಲ್ಪ್ ಆಶೀರ್ವದ್ ಮಾಂಡೋಲ್ ಕಲಾ ನಿರ್ದೇಶನ, ಸುನೀಲ್ ಸುನ್ನಪು ಮತ್ತು ಮುರಳಿ ಮಾಸ್ಟರ್ ನೃತ್ಯ ನಿರ್ದೇಶನ, ಡ್ರ್ಯಾಗನ್ ಅಭಿ ಮತ್ತು ಜಯ್ ಸುಬ್ರಮಣ್ಯ ಸಾಹಸ ನಿರ್ದೇಶನ ಈ ಚಿತ್ರಕ್ಕಿದೆ.

keywords: rukmini radhakrishna, bharath kumar, mokshitha pai, sandalwood

The post Rukmini Radhakrishna Movie: ರಾಧೆಯಾದಳು ಸೀರಿಯಲ್ ಪಾರು! appeared first on Cini Shodha.

ಶ್ರೀ ವಾರಾಹಿ ಫಿಲಂಸ್ ಬ್ಯಾನರಿನಡಿಯಲ್ಲಿ ಸಂತೋಷ್ ನಿರ್ಮಾಣ ಮಾಡಿರುವ ಸಿನಿಮಾ ಮ್ಯಾರೇಜ್ ಪಾರ್ಟಿ. ಬಿಗ್ ಬಾಸ್ ಖ್ಯಾತಿಯ ರೂಪೇಶ್ ಶೆಟ್ಟಿ ನಾಯಕನಾಗಿ ನಟಿಸಿದ್ದ ಅಧಿಪತ್ರ ಎಂಬ ಸಿನಿಮಾವನ್ನು ನಿರ್ದೆಶನ ಮಾಡಿ ಸೈ ಅನ್ನಿಸಿಕೊಂಡಿದ್ದ ಚಯನ್ ಶೆಟ್ಟಿ ಪಾಲಿಗೆ ಮ್ಯಾರೇಜ್ ಪಾರ್ಟಿ ಎರಡನೇ ಸಿನಿಮಾ. ಅಧಿಪತ್ರದ ಮೂಲಕವೇ ಭಿನ್ನ ಕಥೆಯೊಂದನ್ನು ಮುಟ್ಟಿದ್ದ ಚಯನ್, ಮ್ಯಾರೇಜ್ ಪಾರ್ಟಿಯ ಮೂಲಕ ಪಕ್ಕಾ ಫ್ಯಾಮಿಲಿ ಪ್ಯಾಕೇಜಿನಂಥಾ ಕಥನಕ್ಕೆ ಕೈಯಿಟ್ಟಿದ್ದಾರೆ. ಅದರ ಕೆಲಸ ಕಾರ್ಯಗಳೆಲ್ಲ ಪೂರ್ಣಗೊಂಡಿರುವ ಈ ಹೊತ್ತಿನಲ್ಲಿ ಫಸ್ಟ್ ಲುಕ್ ಪೋಸ್ಟರ್ ಅನ್ನು ಪ್ರೇಕ್ಷಕರಿಗೆ ತಲುಪಿಸಿದ್ದಾರೆ.

ಕರಾವಳಿ ಭಾಗದ ಕಥೆ ಎಂದಾಕ್ಷಣವೇ ಸಿದ್ಧ ಸೂತ್ರದತ್ತ ಚಿತ್ತ ವಾಲಿಕೊಳ್ಳೋದು ಸಹಜ. ಭೂತ ಕೋಲ ಮುಂತಾದ ಕರಾವಳಿಯ ಅಸ್ಮಿತ್ತೆಯತ್ತಲೇ ಕಲ್ಪನೆ ಗಿರಕಿ ಹೊಡೆಯುತ್ತೆ. ಆದರೆ, ಚಯನ್ ಶೆಟ್ಟಿ ಹೇಳ ಹೊರಟಿರೋದು ಅದೆಲ್ಲದರಾಚೆಯ ಕಥೆಯನ್ನು. ಇಲ್ಲಿ ಮದುವೆಯೊಂದರ ಸುತ್ತ ಘಟಿಸುವ, ಕರಾವಳಿ ಗ್ರಾಮ್ಯ ಬದುಕನ್ನು ಸಮೃದ್ಧವಾಗಿ, ಸಮರ್ಥವಾಗಿ ಕಟ್ಟಿ ಕೊಟ್ಟಿರುವ ದೃಷ್ಯಗಳಿವೆ ಎಂಬುದನ್ನು ಚಿತ್ರತಂಡ ಈ ಹಿಂದೆಯೇ ಹೇಳಿಕೊಂಡಿತ್ತು. ಕರಾವಳಿ ಭಾಗದಲ್ಲಿ ಚಲಿಸುವ ಮಜವಾದ ಕಥೆಯೊಂದಿಗೆ, ಹಾಸ್ಯವನ್ನೇ ಪ್ರಧಾನವಾಗಿಸಿಕೊಂಡು ನಿರ್ದೇಶಕರು ಈ ಸಿನಿಮಾವನ್ನು ರೂಪಿಸಿದ್ದಾರಂತೆ.

ದೊಡ್ಡ ಕ್ಯಾನ್ವಾಸ್ ಮತ್ತು ಚೆಮದದ ಪಾತ್ರಗಳೊಂದಿಗೆ ಚಯನ್ ಶೆಟ್ಟಿ ಈ ಸಿನಿಮಾವನ್ನು ಕಟ್ಟಿಕೊಟ್ಟಿದ್ದಾರಂತೆ. ಶ್ರೀಕಾಂತ್ ಛಾಯಾಗ್ರಹಣ, ರಿತ್ವಿಕ್ ಮುರಳೀಧರ್ ಸಂಗೀತ, ಸು ಫ್ರಂ ಸೋ ಖ್ಯಾತಿಯ ನಿತಿನ್ ಶೆಟ್ಟಿ ಸಂಕಲನ, ಪ್ರಮೋದ್ ಮರವಂತೆ ಮತ್ತು ತ್ರಿಲೋಕ್ ಸಾಹಿತ್ಯ, ಪ್ರಕಾಶ್ ತುಮಿನಾಡು, ದೀಪಕ್ ರೈ, ನವೀನ್ ಡಿ ಪಡೀಲ್, ರಕ್ಷಿತಾ, ನಮಿತಾ ಕಿರಣ್, ರಾಮ್‌ದಾಸ್, ರಘು ಪಾಂಡೇಶ್ವರ, ಪುಷ್ಪರಾಜ್ ಬೋಳಾರ್, ಜ್ಯೋತಿಷ್ ಶೆಟ್ಟಿ, ರಾಧಾಕೃಷ್ಣ, ಪಿಡಿ ಸತೀಶ್, ಭೀಮ್ ರಾವ್ ಮುಂತಾದವರ ತಾರಾಗಣವಿರುವ ಈ ಚಿತ್ರ ಕನ್ನಡ ಮತ್ತು ಮಲೆಯಾಳಂ ಭಾಷೆಗಳಲ್ಲಿ ತೆರೆಗಾಣಲಿದೆ.

keywords: marriage party movie, sandalwood, kfi

The post Marriage Party Movie: ಇದು ಕರಾವಳಿ ಸೀಮೆಯ ಕಚಗುಳಿಯಿಡೋ ಕಥನ! appeared first on Cini Shodha.