ಸಿನಿಮಾ ನಿರ್ಮಾಣವೆಂಬುದು ಇದೀಗ ಉದ್ಯಮವೆಂದೇ ಪರಿಗನಿಸಲ್ಪಟ್ಟಿದೆ. ನಿರ್ಮಾಪಕರಾದವರು ಕಾಸು ಹೂಡಿಕೆ ಮಾಡಿ, ಅದನ್ನು ದುಪ್ಪಟ್ಟಾಗಿ ವಾಪಾಸು ಪಡೆಯೋದರತ್ತಲೇ ಪ್ರಧಾನವಾಗಿ ಗಮನ ಹರಿಸುತ್ತಾರೆಂಬ ಭಾವನೆ ಬಹುತೇಕರಲ್ಲಿದೆ. ವ್ಯಾವಹಾರಿಕ ದೃಷ್ಟಿಯಿಂದ ನೋಡಿದರೆ ಅದರಲ್ಲಿ ವಿಶೇಷವೇನೂ ಇಲ್ಲ. ಆದರೆ, ವ್ಯಾವಹಾರಿಕ ದೃಷ್ಟಿಕೋನ ಒಂದರಿಂದಲೇ ಸಿನಿಮಾ ನಿರ್ಮಾಣ ಸಾಧ್ಯವಿಲ್ಲ. ಅದರ ಹಿಂದೆ ಅದೆಷ್ಟೋ ವರ್ಷಗಳಿಂದ ಕಂಡ ಕನಸಿರುತ್ತದೆ, ತಯಾರಿಯಿರುತ್ತದೆ. ಲವ್ ಸೀಸನ್ಸ್ ನಿರ್ಮಾಪಕ ಎನ್.ಆರ್ ಮಂಜುನಾಥ್ ಅವರ ವಿಚಾರದಲ್ಲಿ ಖಂಡಿತವಾಗಿಯೂ ಸಿದ್ಧಸೂತ್ರದ ಚೌಕಟ್ಟಿನ ಅನಿಸಿಕೆಗಳೆಲ್ಲ ಅದಲು ಬದಕಲಾಗುವಂಥಾ ಒಂದಷ್ಟು ವಿಚಾರಗಳಿದ್ದಾವೆ.

ಮೂಲತಃ ಬೆಂತಗಳೂರಿನ ದೇವನಹಳ್ಳಿಯ ನೀಲೇರಿಯವರಾದ ಮಂಜುನಾಥ್ ಈವತ್ತಿಗೆ ರಿಯಲ್ ಎಸ್ಟೇಟ್ ಉದ್ಯಮದಲ್ಲಿ ಯಶ ಕಂಡಿದ್ದಾರೆ. ಆದರೆ, ಊರಿನಲ್ಲಿ ಈವತ್ತಿಗೂ ಕೃಷಿ ಭೂಮಿಯಲ್ಲಿ ಕೃಷಿ ಚಟುವಟಿಕೆಗಳನ್ನು ಚಾಲ್ತಿಯಲ್ಲಿಟ್ಟುಕೊಳ್ಳುವ ಮೂಲಕ ರೈತಾಪಿ ಹಿನ್ನೆಲೆಯನ್ನು ಯಥಾಪ್ರಕಾರವಾಗಿ ಮುಂದುವರೆಸಿಕೊಂಡು ಬರುತ್ತಿದ್ದಾರೆ. ಸಹಜವಾಗಿಯೇ ಬದುಕಿನ ಒಂದು ಘಟ್ಟಕ್ಕೆ ಬಂದ ನಂತರ ಒಂದ್ಯಾವುದೋ ವೃತ್ತಿಯ ಮೂಲಕ ಬದುಕು ಕಟ್ಟಿಕೊಳ್ಳುವ ಅನಿವಾರ್ಯತೆ ಎದುರಾಗುತ್ತೆ. ಆ ಕ್ಷಣದಲ್ಲಿ ಕಂಡ ಕನಸುಗಳನ್ನೆಲ್ಲ ಕಳಚಿಟ್ಟು ಮುಂದುವರೆಯುವ ಅನಿವಾರ್ಯ ಸಂದರ್ಭಗಳು ಎದುರಾಗುತ್ತವೆ. ಅಂಥಾದ್ದೊಂದು ಹಂತದಲ್ಲಿ ಸಿನಿಮಾ ನಟನಾಗಬೇಕೆಂಬ ಮಂಜುನಾಥ್ ಅವರ ಆಳದಲ್ಲಿದ್ದ ಕನಸೊಂದು ಹಾಗೆಯೇ ಉಳಿದು ಹೋಗುವಂತಾಗಿತ್ತು.

ರೈತಾಪಿ ಕುಟುಂಬದಿಂದ ಬಂದಿದ್ದ ಮಂಜುನಾಥ್ ನೀಲೇರಿಯವರ ಪಾಲಿಗೆ ಆರಂಭದಿಂದಲೂ ಅತೀವ ಸಿನಿಮಾ ಸೆಳೆತವಿತ್ತು. ಮುಂದೊಂದು ದಿನ ಸಿನಿಮಾ ನಟನಾಗಬೇಕೆಂಬುದೇ ಅವರ ಬಹುದೊಡ್ಡ ಕನಸಾಗಿತ್ತು. ಆದರೆ, ಬದುಕಿನ ಬಂಡಿ ಬೇರೆಯದ್ದೇ ದಿಕ್ಕಿನತ್ತ ಹಬ್ಬಿಕೊಂಡಿದ್ದರಿಂದಾಗಿ ಆ ಕನಸು ಕನಸಾಗಿಯೇ ಉಳಿದು ಹೋಗಿತ್ತು. ಆದರೆ, ಮಗ ಮುಕುಂದ ರಾಮಸ್ವಾಮಿಯ ವ್ಯಕ್ತಿತ್ವದಲ್ಲಿ ಮಂಜುನಾಥ್ ಅವರ ಅಪೂರ್ಣ ಕನಸು ಅತ್ಯಂತ ಭದ್ರವಾಗಿ ಬೇರೂರಿಕೊಂಡಿತ್ತು. ತಮ್ಮ ಮಗ ಚಿಕ್ಕ ವಯಸ್ಸಿನಿಂದಲೇ ಸಿನಿಮಾ ವ್ಯಾಮೋಹ ಹೊಂದಿದ್ದನ್ನು ಬೆರಗಿನಿಂದ ಕಾಣುತ್ತಾ ಬಂದಿದ್ದ ಮಂಜುನಾಥ್‌ರಿಗೆ, ಬರಬರುತ್ತಾ ಮಗನ ಕನಸಿನ ಬಗೆಗೊಂದು ತುಂಬು ಭರವಸೆ ಮೂಡಿಕೊಳ್ಳಲಾರಂಭಿಸಿತ್ತು.

ಈಗ್ಗೆ ಏಳು ವರ್ಷದಿಂದೀಚೆಗೆ ಮುಕುಂದ ರಾಮಸ್ವಾಮಿ ನಟನಾಗಲು ನಡೆಸುತ್ತಾ ಬಂದಿದ್ದ ಗಂಭೀರವದ ಪ್ರಯತ್ನಗಳನ ನು ಕಂಡು ಮಂಜುನಾಥ್ ಖುಷಿಗೊಂಡಿದ್ದರು. ಹೀಗೆ ನಟನೆಯತ್ತ ವಾಲಿಕೊಂಡಿರುವ ಮಗನ ಇಗೆ ಒತ್ತಾಸೆಯಾಗಿ ನಿಲ್ಲುವ ಸಲುವಾಗಿಯೇ, ಅವರು ಎನ್‌ಆರ್ ಸ್ಟುಡಿಯೋಸ್ ಎಂಬ ಬ್ಯಾನರ್ ಸ್ಥಾಪಿಸಿ ಅದರ ಮೂಲಕ ಲವ್ ಸೀಸನ್ಸ್ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ನಿರ್ದೇಶಕ ಕೃತ್ವಿಕ್ ಕಥೆಯನ್ನು ಬಹುವಾಗಿ ಮೆಚ್ಚಿಕೊಂಡಿದ್ದ ಅವರಲ್ಲಿಂದು, ಸದರಿ ಸಿನಿಮಾ ಪ್ರತಿಯೊಬ್ಬರಿಗೂ ಹಿಡಿಸುತ್ತದೆಂಬ ತುಂಬು ನಂಬಿಕೆ ಮೂಡಿಕೊಂಡಿದೆ. ಮಗನ ಕಾರಣದಿಂದ ತನ್ನೊಳಗಿದ್ದ ನಟನೆಯ ಕನಸು ಸಾಕಾರಗೊಂಡಿರೋ ಖುಷಿ, ಮೊದಲ ಹೆಜ್ಜೆಯಲ್ಲಿಯೇ ಒಂದೊಳ್ಳೆ ಸಿನಿಮಾ ನಿರ್ಮಾಣ ಮಾಡಿದ ಆತ್ಮತೃಪ್ತಿ ಎನ್.ಆರ್ ಮಂಜುನಾಥ್ (ನೀಲೇರಿ) ಅವರಲ್ಲಿದೆ…

keywords: nr manjunath neeleri, love seasons movie, sandalwood

The post Love Seasons Movie: ನಿರ್ಮಾಪಕನ ಮನಸಲ್ಲಿತ್ತು ನಟನಾಗೋ ತುಡಿತ! appeared first on Cini Shodha.

ಸಿನಿಮಾ ಸೇರಿದಂತೆ ನಾನಾ ಕ್ಷೇತ್ರಗಳ ಬಗ್ಗೆ ಬಹುತೇಕರಿಗೊಂದು ಸೆಳೆತವಿರುವುದು ಮಾಮೂಲು. ಹೆಚ್ಚಿನ ಮಂದಿಗೆ ಅದೊಂದು ಹುಚ್ಚಿನಂತ ಆವರಿಸಿಕೊಂಡಿರುತ್ತದೆ. ಆದರೆ, ಕೆಲವೇ ಕೆಲ ಮಂದಿಯ ಪಾಲಿಗದು ಅಕ್ಷರಶಃ ಆತ್ಮಕ್ಕಂಟಿದ ಹಚ್ಚೆಯಿದ್ದಂತೆ. ಹುಚ್ಚು ಒಂದು ಹಂತದಲ್ಲಿ ಬಿಟ್ಟರೂ ಬಿಡಬಹುದು; ಆದರೆ ಆತ್ಮಕ್ಕಂಟಿದ ಹಚ್ಚೆ ಮಾಸಲಾಗಲು ಸಾಧ್ಯವಿಲ್ಲ. ಲವ್ ಸೀಸನ್ಸ್ ನಾಯಕ ಮುಕುಂದರಾಮಸ್ವಾಮಿ ಪಾಲಿಗೂ ಸಿನಿಮಾ ಸೆಳೆತವೆಂಬುದು ಹಚ್ಚೆಯಂತಿತ್ತು. ಬುದ್ಧಿ ಬಲಿಯುತ್ತಲೇ ಸಿನಿಮಾ ಲೋಕದತ್ತ ಬೆರಗುಗಣ್ಣಿನಿಂದ ನೋಡುತ್ತಿದ್ದ ಮುಕುಂದ್ ಪಾಲಿಗೆ, ಆ ವಯಸ್ಸಿನಿಂದಲೇ ಸಿನಿಮಾ ನಟನಾಗಬೇಕೆಂಬ ಹಂಬಲವೊಂದು ಶುರುವಾಗಿತ್ತು.

ಪ್ರತಿಯೊಂದು ಹಂತದಲ್ಲಿಯೂ ಸಿನಿಮಾ ಧ್ಯಾನದಲ್ಲಿ ಸಾಗಿ ಬಂದಿದ್ದ ಮುಕುಂದ ರಾಮಸ್ವಾಮಿ, ಆ ಮಾಯೆಯ ಜೊತೆ ಜೊತೆಗೇಬ ವ್ಯಾಸಂಗ ಮುಗಿಸಿಕೊಂಡ ಕ್ಷಣದಲ್ಲಿಯೇ ತನ್ನ ಭವಿಷ್ಯವೇನಿದ್ದರೂ ಚಿತ್ರರಂಗದಲ್ಲಿಯೇ ಎಂಬಂಥಾ ಗಟ್ಟಿಯಾದ ನಿಲುವು ತಳೆದಿದ್ದರು. ಅದರ ಭಾಗವಾಗಿಯೇ, ಓದು ಮುಕ್ತಾಯವಾದೇಟಿಗೆ ೨೦೧೮ರಲ್ಲಿ ನಟನಾಗಲು ಬೇಕಾದ ತಯಾರಿ ಆರಂಭಿಸಿದ್ದರು. ಹೈದರಾಬಾದಿನ ರಂಗಶಾಲೆಯಲ್ಲಿ ತರಬೇತಿ ಪಡೆದುಕೊಂಡು ನಾನಾ ಬೀದಿನಾಟಕಗಳಲ್ಲಿ ಪಾತ್ರ ಮಾಡುತ್ತಾ, ನಟನಾಗಿ ಹದಗೊಳ್ಳಲಾರಂಭಿಸಿದ್ದರು. ಹಾಗೆ ರಂಗಶಾಲೆಯಲ್ಲಿ ಅಭ್ಯಾಸ ಮುಗಿಸಿ ಬಂದಿದ್ದ ಮುಕುಂದ್ ರಾಮಸ್ವಾಮಿ, ಕೃತ್ವಿಕ್ ನಿರ್ದೇಶನದ ಎಂಆರ್‌ಎಫ್ ಎಂಬ ಕಿರುಚಿತ್ರವೊಂದರ ಮೂಲಕ ತಮ್ಮೊಳಗಿನ ನಟನೆಯ ಕಸುವನ್ನು ಒರೆಗೆ ಹಚ್ಚಿದ್ದರು.

ಇದಾದ ನಂತರ ಒಂದು ಪೂರ್ಣಪ್ರಮಾಣದ ಸಿನಿಮಾಕ್ಕಾಗಿ ತಯಾರಿ ಮಾಡಿಕೊಂಡರಾದರೂ ಬಜೆಟ್ ಜಾಸ್ತಿಯಾಗುತ್ತದೆಂಬ ಕಾರಣದಿಂದ ನಿರ್ಮಾಪಕರು ನಿರಾಕರಿಸಿದ್ದರು. ಆ ಬಳಿಕ ನಿರ್ದೇಸಕ ಕೃತ್ವಿಕ್ ಹಾಗೂ ಮುಕುಂದ ರಾಮಸ್ವಾಮಿ ಲವ್ ಸೀಸನ್ಸ್ ಚಿತ್ರದ ಕಥೆ ಚಿತ್ರಕಥೆಯತ್ತ ಗಮನ ಹರಿಸಿದ್ದರು. ಅದಕ್ಕೆ ನಿರ್ಮಾಪಕರ ಕಡೆಯಿಂದ ಸಕಾರಾತ್ಮಕ ಬೆಂಬಲ ಸಿಗುತ್ತಲೇ, ನಟನೆಯಲ್ಲಿ ಮತ್ತಷ್ಟು ಪರಿಪೂರ್ಣರಾಗುವ ಇರಾದೆಯಿಂದ ನಟನಾ ರಂಗಶಾಲೆಗೆ ಸೇರಿಕೊಂಡಿದ್ದರು. ಹಾಗೆ ಪ್ರತಿಯೊಂದರಲ್ಲಿಯೂ ತರಬೇತಿ ಪಡೆದುಕೊಂಡು, ತಯಾರಿ ಮಾಡಿಕೊಂಡೇ ಮುಕುಂದ ರಾಮಸ್ವಾಮಿ ಈ ಸಿನಿಮಾದ ರಾಮ್ ಎಂಬ ಪಾತ್ರಕ್ಕೆ ಜೀವ ತುಂಬಿದ್ದಾರೆ.

ರಾಮ್ ಎಂಬ ಪಾತ್ರ ಪ್ರತಿಯೊಬ್ಬರನ್ನೂ ಆವರಿಸಿಕೊಳ್ಳುವ ಗುಣ ಹೊಂದಿದೆಯಂತೆ. ನಾನಾ ಶೇಡುಗಳಿರುವ ಈ ಪಾತ್ರವನ್ನು ನಿರ್ವಹಿಸಲು ಮುಕುಂದ್ ಸಾಕಷ್ಟು ಶ್ರಮಪಟ್ಟಿದ್ದಾರೆ. ಸದರಿ ಪಾತ್ರದ ಸಣ್ಣ ಝಲಕ್ಕುಗಳು ಟ್ರೈಲರಿನಲ್ಲಿ ಕಾಣಿಸಿವೆ. ಅದಕ್ಕೂ ಕೂಡಾ ಪ್ರೇಕ್ಷಕರ ಕಡೆಯಿಂದ ಅತ್ಯುತ್ತಮ ಪ್ರತಿಕ್ರಿಯೆಗಳು ಕೇಳಿ ಬರುತ್ತಿರೋದರಿಂದ ಮುಕುಂದ ರಾಮಸ್ವಾಮಿ ಖುಷಿಗೊಂಡಿದ್ದಾರೆ. ಹೀಗೆ ಸರ್ವ ರೀತಿಯಿಂದಲೂ ತಯಾರಾಗಿ ಬಂದಿರುವ ಮುಕುಂದ ರಾಮಸ್ವಾಮಿ, ಲವ್ ಸೀಸನ್ಸ್ ನಿರ್ಮಾಪಕರಾದ ಎನ್.ಆರ್ ಮಂಜುನಾಥ ನೀಲೇರಿ ಅವರ ಪುತ್ರ. ಸ್ಥಿತಿವಂತ ಕುಟುಂಬದಿಂದ ಬಂದಿದ್ದರೂ ಕೂಡಾ, ಸೆಟ್ ಬಾಯ್ ಆಗಿ, ನಿರ್ದೇಶನ ವಿಭಾಗದಲ್ಲಿ ಕಾರ್ಯನಿರ್ವಹಿಸಿ ಎಲ್ಲದರಲ್ಲಿಯೂ ಕಾರ್ಯರೂಪದಲ್ಲಿಯೇ ಪಳಗಿಕೊಂಡಿರುವ ಮುಕುಂದ ರಾಮಸ್ವಾಮಿ, ಲವ್ ಸೀಸನ್ಸ್ ಮೂಲಕ ತನ್ನ ಕನಸಿನ ಹಾದಿ ರಂಗು ಪಡೆದುಕೊಳ್ಳುವ ಭರವಸೆ ಹೊಂದಿದ್ದಾರೆ. ಈ ಸಿನಿಮಾ ಬಿಡುಗಡೆಯ ಹೊಸ್ತಿಲಲ್ಲಿರುವಾಗಲೇ ಮತ್ತೊಂದಷ್ಟು ನವೀನ ಅವಕಾಶಗಳು ಅರಸಿ ಬರುತ್ತಿರೋದನ್ನು ಕಂಡು ಥ್ರಿಲ್ ಆಗಿರುವ ಅವರು, ಸದ್ಯಕ್ಕೆ ಲವ್ ಸೀಸನ್ಸ್ ಬಿಡುಗಡೆಪೂರ್ವ ಕೆಲಸ ಕಾರ್ಯಗಳ ಬಗ್ಗೆ ಗಮನಹರಿಸಿದ್ದಾರೆ. ಅಂದಹಾಗೆ, ಈ ಚಿತ್ರ ಇದೇ ಜುಲೈ ೩ರಂದು ರಾಜ್ಯಾದ್ಯಂತ ತೆರೆಗಾಣಲಿದೆ.

keywords: mukunda ramaswamy, love seasons movie, sandalwood

The post Love Seasons Movie: ನಟನಾಗಬೇಕೆಂಬುದು ಹುಚ್ಚಲ್ಲ; ಆತ್ಮಕ್ಕಂಟಿದ ಹಚ್ಚೆ! appeared first on Cini Shodha.

ದಿಯಾ ಕೀರ್ತಿ ೨೦೧೮ರಿಂದಲೇ ರಂಗಭೂಮಿಯ ನಂಟು ಹೊಂದಿದ್ದವರು. ಸುಶಿಕ್ಷಿತ ಕುಟುಂಬದಿಂದ ಬಂದಿರುವ ದಿಯಾಗೆ ಕೌಟುಂಬಿಕ ವಾತಾವರಣದಾಚೆಗಿನ ಕ್ಷೇತ್ರಕ್ಕೆ ಕಾಲಿಡಬೇಕೆಂಬುದು ಲಾಗಾಯ್ತಿನ ಕನಸಾಗಿತ್ತು. ಅದಕ್ಕಾಗಿ ಆಕೆ ಆರಿಸಿಕೊಂಡಿದ್ದು ನಟನೆಯನ್ನು. ಪ್ರತಿಯೊಂದರಲ್ಲಿಯೂ ಪಳಗಿಕೊಂಡೇ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಬೇಕೆಂಬ ಇರಾದೆಯಿಂದ ದಿಯಾ ವರ್ಷಗಟ್ಟಲೆ ರಂಗಭೂಮಿ ವಾತಾವರಣದಲ್ಲಿ ಕಲಿಕೆ ನಡೆಸಿದ್ದಾರೆ. ಈ ಸಿನಿಮಾದ ನಾಯಕ ಮುಕುಂದ ರಾಮಸ್ವಾಮಿಉ ಮತ್ತು ದಿಯಾ ರಂಗಭೂಮಿಯ ಭೂಮಿಕೆಯಲ್ಲಿಯೇ ಪರಿಚಿತರಾಗಿದ್ದವರು. ತಮ್ಮ ಕನಸಿನ ಸಿನಿಮಾದ ಪಾತ್ರವೊಂದಕ್ಕೆ ಈಕೆಯೇ ಸೂಕ್ತ ಎಂದರಿತ ಮುಕುಂದ ರಾಮಸ್ವಾಮಿ ನಿರ್ದೇಶಕರಿಗೆ ಈ ಬಗ್ಗೆ ಹೇಳಿದ್ದರಂತೆ. ಕಡೆಗೂ ಆಡಿಷನ್ ಮೂಲಕವೇ ದಿಯಾ ಕೀರ್ತಿಗೆ ಭಾವುಕ ಪಾತ್ರವೊಂದು ಲಭಿಸಿದೆ.

ಲವ್ ಸೀಸನ್ಸ್ ಚಿತ್ರದಲ್ಲಿ ದಿಯಾ ಕೀರ್ತಿ ಮೇರಿ ಎಂಬ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಹೀಗೆ ತಮ್ಮ ಪಾಲಿಗೆ ಒದಗಿ ಬಂದ ಸದರಿ ಪಾತ್ರದ ಬಗ್ಗೆ ಖುದ್ದು ದಿಯಾಗೇ ಥ್ರಿಲ್ ಇದೆ. ಯಾಕೆಂದರೆ, ಅದು ಎಂಥಾ ಸಂದರ್ಭದಲ್ಲಿಯೂ ಸುತ್ತಲಿರುವವರಿಗೆಲ್ಲ ಒಳಿತನ್ನೇ ಬಯಸೋ ಪಾತ್ರ. ಮನಸಿನ ತುಂಬಾ ನಿಷ್ಕಪಟ ಪ್ರೀತಿ ತುಂಬಿಕೊಂಡ ಆ ಪಾತ್ರ ಅಪ್ಪಿತಪ್ಪಿಯೂ ಯಾರಿಗೂ ಕೇಡು ಬಯಸೋದಿಲ್ಲ. ಮೇರಿ ಎಂಬ ಈ ಪಾತ್ರ ಪ್ರತೀ ನೋಡುಗರನ್ನೂ ತನ್ನದೇ ರೀತಿಯಲ್ಲಿ ಕಾಡುವಂತಿದೆಯಂತೆ. ಇಂಥಾ ಒಬ್ಬಳು ಅಕ್ಕ, ತಂಗಿ, ಮಗಳು, ಮಡದಿ ತಮಗೂ ಇರಬೇಕಿತ್ತೆಂಬ ಬೆಚ್ಚಗಿನ ಭಾವ ಮುಡಿಸೋ ಮೇರಿಯೆಂಬ ಪಾತ್ರವನ್ನು ಒಳಗಿಳಿಸಿಕೊಂಡು ನಟಿಸಿದ ಆತ್ಮತೃಪ್ತಿ ದಿಯಾರದ್ದು.

ಚಿಕ್ಕಬಳ್ಳಾಪುರದಲ್ಲಿ ಹುಟ್ಟಿ ಬೆಳೆದು, ಅಲ್ಲಿಯೇ ವಿದ್ಯಾಭ್ಯಾಸವನ್ನೂ ಮುಗಿಸಿಕೊಂಡಿರೋಳ ದಿಯಾ ಕೀರ್ತಿಯ ಮನೆ ಮಂದಿಯೆಲ್ಲ ಶಿಕ್ಷಣ ಕ್ಷೇತ್ರದಲ್ಲಿರುವವರು. ಇಂಥಾ ವಾತಾವರಣದಲ್ಲಿಯೇ ಬೆಳೆದು ಬಂದ ಕಾರಣದಿಂದ, ಭಿನ್ನ ಕ್ಷೇತ್ರವೊಂದನ್ನು ಆಯ್ಕೆ ಮಾಡಿಕೊಳ್ಳಬೆಕೆಂಬ ಹಂಬಲ ಶಾಲಾ ಕಾಲೆಜು ದಿನಗಳಲ್ಲಿಯೇ ದಿಯಾರನ್ನು ಆವರಿಸಿಕೊಂಡಿತ್ತು. ಆದರೆ, ನಟಿಯಾಗಬೇಕೆಂಬ ಹಂಬಲ ಒಂದು ಹಂತದವರೆಗೂ ಇರಲಿಲ್ಲ. ಕಡೆಗೂ ಬಣ್ಣದ ಜಗತ್ತಿನಲ್ಲಿಯೇ ಬದುಕು ಕಟ್ಟಿಕೊಳ್ಳುವ ತೀರ್ಮಾನ ಕ್ಕೆ ಬಂದಿದ್ದ ದಿಯಾ, ೨೦೧೭ರ ಸುಮಾರಿಗೆ ಮಾಡೆಲಿಂಗ್ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿದ್ದರು. ಅನೇಕ ರಿಯಾಲಿಟಿ ಶೋಗಳಲ್ಲಿ ಕೋರಿಯೋಗ್ರಾಫರ್ ಆಗಿಯೂ ಕಾರ್ಯ ನಿರ್ವಹಿಸಿದ್ದರು.

ನಟಿಯಾಗಬೇಕೆಂದರೆ, ಪ್ರತಿ ಸುಕ್ಷ್ಮಗಳ್ನ್ನೂ ಅರಿತುಕೊಳ್ಳಬೇಕೆಂಬ ಇರಾದೆಯಿಂದಲೇ ರಂಗಭೂಮಿಯಲ್ಲಿಯೂ ಸಕ್ರಿಯರಾಗಿದ್ದರು. ಈ ಮೂಲಕವೇ ಲವ್ ಸೀಸನ್ಸ್ ನಾಯಕ ಮುಕುಂದ ರಾಮಸ್ವಾಮಿಯವರ ಪರಿಚಯವೂ ಆಗಿತ್ತು. ಈ ದೆಸೆಯಿಂದಲೆ ಲವ್ ಸೀಸನ್ಸ್ ಪಾತ್ರ ಸಿಕ್ಕಿತ್ತು, ನಟನಾ ರಂಗಶಾಲೆಯಲ್ಲಿ ಎಲ್ಲ ಪಟ್ಟುಗಳನ್ನು ಕಲಿತುಕೊಂಡಿದ್ದ ದಿಯಾ, ಆಡಿಷನ್ ಮೂಲಕ ಲವ್ ಸೀಸನ್ಸ್ ಪಾತ್ರವನ್ನು ಆವಾಹಿಸಿಕೊಂಡಿದ್ದಾರೆ. ಸದ್ಯಕ್ಕೆ ಒಂದಷ್ಟು ಸಿನಿಮಾ ಆಫರುಗಳೂ ಅವರ ಮುಂದಿವೆ. ಇದೀಗ ಲವ್ ಸೀಸನ್ಸ್ ಬಿಡುಗಡೆಯ ಕೆಲಸ ಕಾರ್ಯಗಳಲ್ಲಿ ಭಾಗಿಯಾಗಿರೋ ದಿಯಾಗೆ ತನ್ನ ಮೊದಲ ಚಿತ್ರ ದೊಡ್ಡ ಮಟ್ಟದಲ್ಲಿ ಯಶ ಕಾಣುತ್ತದೆಯೆಂಬ ತುಂಬು ನಂಬಿಕೆಯಿದೆ.

keywords: diyakeerthi, love seasons movie, sandalwood, kfi

The post Love Seasons Movie: ಆಕೆ ಕನಸಲ್ಲೂ ಕೆಡುಕು ಬಯಸದ ಮೇರಿ! appeared first on Cini Shodha.

ಈ ಸಿನಿಮಾದ ನಾಯಕಿಯರಲ್ಲಿ ಒಬ್ಬರಾಗಿರುವ ಚಂದನಾ, ಮಹಾನಟಿ ಎಂಬ ರಿಯಾಲಿಟಿ ಶೋ ಮೂಲಕ ಕರ್ನಾಟಕಕ್ಕೆ ಚಿರಪರಿಚಿತವಾಗಿರುವವರು. ಮಹಾನಟಿಯಂಥಾ ವೇದಿಕೆಯಲ್ಲಿ ನಟಿಯಾಗಿ ಮಿಂಚಿದ್ದ ಚಂದನಾರ ಬಹುದೊಡ್ಡ ಕನಸೊಂದು ಲವ್ ಸೀಸನ್ಸ್ ಮೂಲಕ ಸಾಕಾರಗೊಂಡಿದೆ. ವ್ಯಾಸಂಗದ ಜೊತೆ ಜೊತೆಗೇ ನಟನೆಯತ್ತ ಗಮನ ಹರಿಸಿದ್ದ ಚಂದನಾ ಪಾಲಿಗೆ ಮಹಾನಟಿಯಂಥಾ ದೊಡ್ಡ ವೇದಿಕೆ ಸಿಕ್ಕಿ, ಆ ಮೂಲಕ ಒಂದಷ್ಟು ಪ್ರಸಿದ್ಧಿಯೂ ದಕ್ಕಿತ್ತು. ಅದಾದ ಬಳಿಕ ನಾಯಕಿಯಾಗೋ ಕನಸಿನ ಸಾಕರಕ್ಕಾಗಿ ಪ್ರಯತ್ನ ಪಡುತ್ತಿರುವಾಗಲೇ ವರವೆಂಬಂತೆ ಲವ್ ಸೀಸನ್ಸ್ ಚಿತ್ರದ ನಾಯಕಿಯಾಗೋ ಅವಕಾಶ ಕೂಡಿ ಬಂದಿತ್ತು.

ಒಟ್ಟಾರೆ ಕಥೆಯ ಗೌಪ್ಯತೆಯ ದೃಷ್ಟಿಯಿಂದ ಚಂದನಾ ನಿರ್ವಹಿಸಿರುವ ಪಾತ್ರದ ಬಗ್ಗೆ ಹೆಚ್ಚೇನೂ ಹೇಳಲಾಗದಿದ್ದರೂ, ಅದೊಂದು ವಿಭಿನ್ನವಾದ ಪಾತ್ರ ಮತ್ತು ಅದು ಪ್ರತೀ ಪ್ರೇಕ್ಷಕರಿಗೂ ಹಿಡಿಸುವಂಥಾ ಪಾತ್ರವೆಂಬ ತುಂಬು ನಂಬಿಕೆ ಚಂದನಾರದ್ದು. ಒಂದೊಳ್ಳೆ ತಂಡ, ಹೊಸಬರ ಹುಮ್ಮಸ್ಸು ಮತ್ತು ಚೆಂದದ ಕಥೆಯ ಮೂಲಕ ಲವ್ ಸೀಸನ್ಸ್ ಒಂದೊಳ್ಳೆ ಚಿತ್ರವಾಗಿ ರೂಪುಗೊಂಡಿದೆ ಎಂಬ ತೃಪ್ತ ಭಾವ ಹೊಂದಿರೋ ಚಂದನಾಗೆ, ಈ ಸಿನಿಮಾ ನಿರೀಕ್ಷಿತ ಗೆಲುವು ಕಾಣಲಿದೆ ಎಂಬ ಭರವಸೆಯಿದೆ. ಲವ್ ಸೀಸನ್ಸ್ ಮೂಲಕವೇ ತನ್ನ ಕನಸಿನ ಹಾದಿಯ ಹೆಬ್ಬಾಗಿಲು ತೆರೆದುಕೊಳ್ಳುತ್ತದೆಂಬ ಗಾಢ ನಂಬಿಕೆಯೂ ಅವರಲ್ಲಿದೆ. ಅದಕ್ಕೆ ಕಾರಣವಾಗಿರೋದು ಈ ಸಿನಿಮಾ ಮೂಡಿ ಬಂದಿರೋ ರೀತಿ ಮತ್ತು ಅದರಲ್ಲಿರುವ ಗಟ್ಟಿ ಕಥನ!

ಮೂಲತಃ ಬೆಂಗಳೂರಿನವರೇ ಆದ ಚಂದನಾರನ್ನು ಐದು ವರ್ಷವಿರುವಾಗಲೇ ಅಜ್ಜಿ ಒತ್ತಾಯಪೂರ್ವಕವಾಗಿ ಭರತನಾಟ್ಯ ಕಲಿಕೆಗೆ ಸೇರಿಸಿದ್ದರಂತೆ. ಆರಂಭದಲ್ಲಿ ಒಲ್ಲದ ಮನಸಿನಿಂದ ಭರತನಾಟ್ಯ ತರಗತಿಗೆ ಹೋಗುತ್ತಿದ್ದ ಚಂದನಾಗೆ, ಬರಬರುತ್ತಾ ಭರತನಾಟ್ಯದ ನಾನಾ ಆಯಾಮಗಳು ಬೆರಗು ಮೂಡಿಸಲಾರಂಭಿಸಿದ್ದವು. ಅಭಿನಯ ಕೂಡಾ ಭರತನಾಟ್ಯದ ಆತ್ಮವಾಗಿರೋದರಿಂದ, ಎಳವೆಯಿಂದಲೇ ನಟನೆ ಆಕೆಯನ್ನು ಬಹುವಾಗಿ ಆವರಿಸಿಕೊಳ್ಳಲಾರಂಭಿಸಿತ್ತು. ಭರತನಾಟ್ಯದಲ್ಲಿ ಪಳಗಿಕೊಳ್ಳುತ್ತಲೇ, ನಟಿಯಾಗಬೇಕೆಂಬ ಕನಸು ಕಾಣಲಾರಂಭಿಸಿದ್ದ ಚಂದನಾ, ಹತ್ತನೇ ತರಗತಿ ಮುಗಿಯುತ್ತಲೇ ರಂಗತಂಡಗಳೊಂದಿಗೆ ಸೇರಿಕೊಂಡು ಅಭಿನಯದ ಪಟ್ಟುಗಳನ್ನು ಕಲಿಯಲಾರಂಭಿಸಿದ್ದರು. ದ್ವಿತೀಯ ಪಿಯುಸಿ ಹಂತದಲ್ಲಿಯೇ ನಟಿಯಾಗೋ ಅವಕಾಶಕ್ಕಾಗಿ ಅರಸುತ್ತಿದ್ದವರಿಗೆ ಉದಯ ವಾಹಿನಿಯ ಕನ್ಯಾದಾನ ಎಂಬ ಧಾರಾವಾಹಿಯ ಪುಟ್ಟ ಪಾತ್ರವೊಂದರಲ್ಲಿ ನಟಿಸೋ ಅವಕಾಶ ಲಭಿಸಿತ್ತು.

ಆ ಮೂಲಕ ಮೊದಲ ಸಲ ಕಿರುತೆರೆಯಲ್ಲಿ ಬಣ್ಣಹಚ್ಚಿದ್ದ ಚಂದನಾಗೆ ನಿರ್ದೇಶಕ ನವೀನ್ ಸೋಮನಹಳ್ಳಿಯವರ ಮಾರ್ಗದರ್ಶನವೂ ಸಿಕ್ಕಿತ್ತು. ೨೦೨೪ರಲ್ಲಿ ಬಿಬಿಎ ವ್ಯಾಂಸಂಗ ಮಾಡುತ್ತಿರುವಾಗಲೇ ಮಹಾನಟಿ ಎಂಬ ರಿಯಾಲಿಟಿ ಶೋದ ಆಡಿಷನ್ ಕರೆಯಲಾಗಿತ್ತು. ಜೆಆರ್‌ಸಿ ಕಾಲೇಜಿನಲ್ಲಿ ನೂರಾರು ಆಕಾಂಕ್ಷಿಗಳ ಜೊತೆ ಆಡಿಷನ್ನಿನಲ್ಲಿ ಪಾಲ್ಗೊಂಡಿದ್ದ ಚಂದನಾಗೆ ಮಹಾನಟಿಯಾಗುವ ಅವಕಾಶ ಕೂಡಿ ಬಂದಿತ್ತು.

ಆ ಶೋನಲ್ಲಿ ತನ್ನ ನಟನಾ ಚಾತುರ್ಯದ ಮೂಲಕ ಗಮನ ಸೆಳೆಯುತ್ತಲೇ, ಮೆಚ್ಚುಗೆ ಗಳಿಸಿಕೊಂಡಿದ್ದ ಚಂದನಾ, ಆ ನಂತರ ಸಿನಿಮಾ ನಾಯಕಿಯಾಗುವ ಕನಸಿನತ್ತ ಗಂಭೀರವಾಗಿ ಹೊರಳಿಕೊಂಡಿದ್ದರು. ಆ ಹಾದಿಯಲ್ಲಿ ಅಚಾನಕ್ಕಾಗಿ ಎದುರುಗೊಂಡಿದ್ದದ್ದು ಲವ್ ಸೀಸನ್ಸ್ ಚಿತ್ರದ ನಾಯಕಿಯಾಗೋ ಸದವಕಾಶ. ಇಲ್ಲಿನ ವಿಭಿನ್ನ ಪಾತ್ರವನ್ನು ಶಕ್ತಿ ಮೀರಿ ಆವಾಹಿಸಿಕೊಂಡ ತೃಪ್ತಿ ಚಂದನಾರಲ್ಲಿದೆ. ಸದ್ಯಕ್ಕೆ ಲವ್ ಸೀಸನ್ಸ್ ನಡುವಲ್ಲಿಯೇ ಒಂದಷ್ಟು ಅವಕಾಶಗಳು ಈಕೆಯನ್ನು ಅರಸಿಕೊಂಡು ಬರುತ್ತಿವೆ. ಅದೆಲ್ಲವನ್ನೂ ಸಾವಧಾನದಿಂದ ಪರಾಮಾರ್ಶೆ ನಡೆಸಿ ನಿರ್ಧಾರ ತಳೆಯುವ ಪ್ರಕ್ರಿಯೆ ಚಾಲ್ತಿಯಲ್ಲಿದೆ. ನಾಯಕಿಯಾಗಿ ಸಿನಿಮಾ ರಂಗದಲ್ಲಿ ನೆಲೆ ಕಂಡುಕೊಳ್ಳುವುದರ ಜೊತೆಗೇ ಒಳ್ಳೆ ಕಥೆ, ಪಾತ್ರ ಸಿಕ್ಕರೆ ಕಿರುತೆರೆಯಲ್ಲಿಯೂ ಸಕ್ರಿಯರಾಗಿರುವ ಇರಾದೆಯೂ ಚಂದನಾರಲ್ಲಿದೆ. ಹೀಗೆ ಮಹಾನಟಿಯಾಗಿ ಹೆಸರು ಮಾಡಿ, ಹಿರಿತೆರೆಗೆ ಆಗಮಿಸಿರುವ ಚಂದನಾಗೆ ಲವ್ ಸೀಸನ್ಸ್ ವರವಾಗುವ ಲಕ್ಷಣಗಳೇ ಢಾಳಾಗಿವೆ!

keywords: mahanati chandana, chandana, actress, love seasons, sandalwood

The post Love Seasons Movie: ಸ್ಯಾಂಡಲ್ವುಡ್ಡಿಗೆ ಅಡಿಯಿರಿಸಿದ ಭರತನಾಟ್ಯ ಪಾರಂಗತೆ! appeared first on Cini Shodha.

ಲವ್ ಸೀಸನ್ಸ್ ಮೂಲಕ ರಂಗಭೂಮಿ ಹಿನ್ನೆಲೆಯ ಹೊಸಬರ ತಂಡವೊಂದು ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿದೆ. ಆ ಪ್ರತಿಭಾನ್ವಿತ ತಂಡದ ಸಾರಥಿಯಂತಿರುವಾತ ನಿರ್ದೇಶಕ ಕೃತ್ವಿಕ್. ಕಾಲೇಜು ದಿನಗಳಲ್ಲಿಯೇ ನಟನಾಗಬೇಕೆಂಬ ಹಂಬಲ ಹೊಂದಿದ್ದ ಕೃತ್ವಿಕ್, ೨೦೧೬ರಿಂದಲೆ ಗೆಜ್ಜೆ ಹೆಜ್ಜೆ ಎಂಬ ರಂಗಭೂಮಿ ತಂಡಕ್ಕೆ ಸೇರ್ಪಡೆಗೊಂಡು ತಾಲೀಮು ಆರಂಭಿಸಿದ್ದರು. ಆ ಬಳಿಕ ಎರಡು ವರ್ಷಗಳ ಕಾಲ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದುಕೊಂಡು, ಎಪ್ಪತ್ತಕ್ಕೂ ಹೆಚ್ಚು ನಾಟಕಗಳಲ್ಲಿ ನಟಿಸಿದ್ದ ಕೃತ್ವಿಕ್‌ರ ಆಸಕ್ತಿ ನಿರ್ದೇಶನ ಮತ್ತು ಬರವಣಿಗೆಯತ್ತಲೂ ಹೊರಳಿಕೊಂಡಿತ್ತು. ಈ ಹಂತದಲ್ಲಿಯೇ ನಟನೆಯಾಚೆಗಿರುವ ಭಿನ್ನ ಸಾಧ್ಯತೆಗಳತ್ತ ಕೃತ್ವಿಕ್ ತೆರೆದುಕೊಂಡಿದ್ದರು.

ಆ ಬಳಿಕ 2016ರ ಸುಮಾರಿಗೆ ಸಿನಿಮಾ ರಂಗದತ್ತ ಮುಖ ಮಾಡಿದ್ದ ಕೃತ್ವಿಕ್‌ರ ಪ್ರಧಾನ ಗುರಿಯಾಗಿದ್ದದ್ದು ನಿರ್ದೇಶನ. ನಿರ್ದೇಶನ ವಿಭಾಗದಲ್ಲಿ ಪಳಗಿಕೊಳ್ಳುವ ಉದ್ದೇಶದೊಂದಿಗೆ ಅವಕಾಶಕ್ಕಾಗಿ ಅರಸುತ್ತಿದ್ದಾಗ ಚಿರಂಜೀವಿ ಸರ್ಜಾ ಅಭಿನಯದ ಕ್ಷತ್ರಿಯ ಚಿತ್ರದಲ್ಲಿ ಕೆಲಸ ಮಾಡುವ ಅವಕಾಶ ಸಿಕ್ಕಿತ್ತು. ಆ ಬಳಿಕ ರಿಯಲ್ ಸ್ಟಾರ್ ಉಪೇಂದ್ರ ಅಭಿನಯದ ಬುದ್ಧಿವಂತ೨, ಡಾಲಿ ಧನಂಜಯ ನಾಯಕನಾಗಿ ನಟಿಸಿದ್ದ ಗುರುದೇವ ಹೊಯ್ಸಳ ಮ ಉಂತದ ಚಿತ್ರಗಳ ನಿರ್ದೇಶನ ವಿಭಾಗದಲ್ಲಿ ಪಳಗಿಕೊಳ್ಳುವ ಅವಕಾಶವೂ ಕೂಡಿ ಬಂದಿತ್ತು. ಇದೆಲ್ಲದರ ನಂತರ ಕೆಲ ಸರ್ಕಾರಿ ಡಾಕ್ಯುಮೆಂಟರಿ, ಜಾಹೀರಾತು ಚಿತ್ರೀಕರಣ ಮುಂತಾದವುಗಳಲ್ಲಿ ತೊಡಗಿಕೊಂಡಿದ್ದ ಕೃತ್ವಿಕ್, ೨೦೨೪ರ ಹೊತ್ತಿಗೆಲ್ಲ ಒಂದಷ್ಟು ಕಥೆ ಸಿದ್ಧಪಡಿಸಿಕೊಂಡು ಶಾರ್ಟ್‌ಫಿಲಂಗಳ ಮೂಲಕ ತನ್ನ ನಿರ್ದೇಶನದ ಕಸುವನ್ನು ಒರೆಗೆ ಹಚ್ಚಲಾರಂಭಿಸಿದ್ದರು.

ಆ ನಿರ್ಧಾರದ ಭಾಗವಾಗಿಯೇ 2022ರಲ್ಲಿ ಶುರುವಾಗಿದ್ದ ಕಿರುಚಿತ್ರ ಎಂಆರ್‌ಎಫ್. ಸದರಿ ಕಿರುಚಿತ್ರದ ಮೂಲಕವೇ ಮುಕುಂದ್ ರಾಮಸ್ವಾಮಿ ಮತ್ತು ಕೃತ್ವಿಕ್ ಸಮಾಗಮವಾಗಿತ್ತು. ವಿಶೇಷವೆಂದರೆ ಇವರಿಬ್ಬರನ್ನು ಸಂದಿಸುವಂತೆ ಮಾಡಿದ್ದ ಮೂಲ ಬಿಂದು ರಂಗಭೂಮಿ. ಇಂಥಾ ಘಟ್ಟಗಳನ್ನು ದಾಟಿಕೊಂಡ ಬಳಿಕ ಕಿರುಚಿತ್ರ ಮಾಡುವ ಉದ್ದೇಶದಿಂದಲೇ ಒಂದು ಪ್ರೇಮದ ಭೂಮಿಕೆಯ ಕಥನವನ್ನು ಕೃತ್ವಿಕ್ ತಯಾರುಗೊಳಿಸಿದ್ದರು. ಅದು ನಿರ್ಮಾಪಕ ಮಂಜುನಾಥ್ ನೀಲೇರಿ ಅವರಿಗೆ ಹಿಡಿಸಿದ್ದೇ, ಇದು ಸಿನಿಮಾ ಮಾಡಲು ಸೂಕ್ತ ಕಥೆ ಎಂಬಂಥಾ ಅಭಿಪ್ರಾಯವೂ ಬಂದಿತ್ತು. ಈ ಕಾರಣದಿಮದಲೇ ೨೦೨೪ರ ಮಧ್ಯ ಭಾಗದಲ್ಲಿ ಲವ್ ಸೀಸನ್ಸ್ ಚಿತ್ರ ಶುರುವಾಗಿತ್ತು.

ಇದು ಪ್ರೇಮವನ್ನು ರುತುಮಾನಗಳ ಭೂಮಿಕೆಯಲ್ಲಿ ಕಟ್ಟಿ ಕೊಡುವ ಯುವ ಆವೇಗದ ಕಥೆ ಹೊಂದಿರೋ ಚಿತ್ರ. ಆಯಾ ಋತುಮಾನಗಳಿಗೆ ತಕ್ಕಂತೆ ರೂಪುಗೊಳ್ಳೋ ಭಿನ್ನ ಕಥೆಗಳ ಮೂಲಕ ಈ ಸಿನಿಮಾವನ್ನು ಕೃತ್ವಿಕ್ ಕಟ್ಟಿಕೊಟ್ಟಿದ್ದಾರಂತೆ. ಮಂಡ್ಯ ಜಿಲ್ಲೆಯ ಮಳವಳ್ಳಿ ತಾಲೂಕಿನವರಾದರೂ, ಬೆಂಗಳೂರಿನ ರಾಜಾಜಿ ನಗರದಲ್ಲಿಯೇ ಹುಟ್ಟಿ ಬೆಳೆದವರು ನಿರ್ದೇಶಕ ಕೃತ್ವಿಕ್. ಈ ಕಾರಣದಿಂದಲೇ, ಈ ಭಾಗದಲ್ಲಿ ಘಟಿಸುವ ಕಥೆಯೊಂದಿಗೆ ಈ ಸಿನಿಮಾವನ್ನು ಕಟ್ಟಿಕೊಟ್ಟಿದ್ದಾರೆ. ಪ್ರೇಮಕಥೆಯಾದರೂ, ಇದು ಬೆಂಗಳೂರಿನ ಮಣ್ಣ ಘಮಲನ್ನು ಒಡಲಲ್ಲಿಟ್ಟುಕೊಂಡಿರುವ ಕಥನವೂ ಹೌದು.

ಅದನ್ನು ಎಲ್ಲ ವರ್ಗದ ಪ್ರೇಕ್ಷಕರಿಗೂ ರುಚಿಸುವಂತೆ ರೂಪಿಸಿರುವ ತುಂಬು ಭರವಸೆ ಕೃತ್ವಿಕ್‌ರಲ್ಲಿದೆ. ಸದ್ಯ ಒಂದಷ್ಟು ಭಿನ್ನ ಕಥೆಗಳನ್ನು ಪ್ರೇಕ್ಷಕರಿಗೆ ತಲುಪಿಸಬೇಕೆಂಬ ಹಂಬಲ ಹೊಂದಿರೋ ಕೃತ್ವಿಕ್, ಮುಂದಿನ ದಿನಗಳಲ್ಲಿ ನಿರ್ದೇಶಕರಗಿಯೇ ಮುಂದುವರೆಯುವ ಇರಾದೆ ಹೊಂದಿದ್ದಾರೆ. ಇದೇ ಹೊತ್ತಿನಲ್ಲಿ ಮುಂದೆ ಒಳ್ಳೆ ಪಾತ್ರ ಸಿಕ್ಕರೆ ನಟಿಸುವ ಆಸೆಯನ್ನೂ ಒಳಗಿಟ್ಟುಕೊಂಡಿದ್ದಾರೆ. ಕೃತ್ವಿಕ್ ಕನಸಿನ ಕೂಸಿನಂಥಾ ಲವ್ ಸೀಸನ್ಸ್‌ಗೆ ಪ್ರೇಕ್ಷಕರ ಪ್ರತಿಕ್ರಿಯೆ ಹೇಗಿರಲಿದೆ ಎಂಬುದು ವಾರದೊಪ್ಪತ್ತಿನಲ್ಲಿಯೇ ಜಾಹಿರಾಗಲಿದೆ!

keywords: kruthvik, love seasons movie, sandalwood

The post Love Seasons Movie: ಇದು ಬೆಂಗಳೂರಿನ ಮಣ್ಣ ಘಮ ಹೊಂದಿರೋ ಪ್ರೇಮ ಕಥನ! appeared first on Cini Shodha.

ಕಿರುತೆರೆಯಲ್ಲಿ ಪ್ರಸಿದ್ಧಿ ಪಡೆದಿರುವ ಅಮೃತಧಾರೆ, ಮಿಥುನರಾಶಿ ಮುಂತಾದ ಧಾರಾವಾಹಿಗಳಲ್ಲಿ ನಟಿಸುವ ಮೂಲಕ ಕಿರುತೆರೆ ಪ್ರೇಕ್ಷಕರ ಮನಗೆದ್ದವರು ವೈಷ್ಣವಿ. ಒಂದಷ್ಟು ಸಿನಿಮಾಗಳಲ್ಲಿಯೂ ಕಾಣಿಸಿಕೊಂಡಿರುವ ಆಕೆ ಟೈಮ್ ಪಾಸ್ ಚಿತ್ರದ ಸಹ ನಿರ್ದೇಶಕಿಯಾಗಿ ಕಾರ್ಯ ನಿರ್ವಹಿಸಿದ್ದಾರೆ. ಆರಂಭದಿಂದ ಇಲ್ಲಿಯವರೆಗೂ ಪ್ರತೀ ಹಂತದಲ್ಲಿಯೂ ನಿರ್ದೇಶಕ ಚೇತನ್ ಜೋಡಿದಾರ್ ಅವರಿಗೆ ಸಾಥ್ ಕೊಟ್ಟಿದ್ದಾರೆ. ಇಷ್ಟು ಮಾತ್ರವಲ್ಲದೇ, ನೃತ್ಯ ನಿರ್ದೇಶಕಿಯಾಗಿಯೂ ಕೆಲಸ ಮಾಡಿದ್ದಾರೆ. ಎರಡು ಹಾಡುಗಳಿಗೆ ಸಾಹಿತ್ಯ ಬರೆಯುವ ಮೂಲಕವೂ ಗಮನ ಸೆಳೆದಿದ್ದಾರೆ. ಈಗಾಗಲೇ ಅವೆರಡೂ ಹಾಡುಗಳು ಬಿಡುಗಡೆಗೊಂಡು, ಕೇಳುಗರಿಂದ ಮೆಚ್ಚುಗೆ ಪಡೆದುಕೊಂಡ ಖುಷಿಯೂ ವೈಷ್ಣವಿಗಿದೆ.

ತೆರೆಮೇಲೆ ಕಾಣಿಸಿಕೊಂಡ ಅನುಭವವಿದ್ದ ವೈಷ್ಣವಿ ಸತ್ಯನಾರಾಯಣರದ್ದು ಸಿನಿಮಾ ಜಗತ್ತಿನ ಎಲ್ಲ ವಿಭಾಗಗಳನ್ನೂ ಕೂಡಾ ಅರಿತುಕೊಳ್ಳಬೇಕೆಂಬ ಹಂಬಲ. ನಟಿಯಾಗಿ ನೆಲೆಗೊಳ್ಳುವ ಸಾಧ್ಯತೆಗಳು ಇದ್ದಾಗಲೂ ಕೂಡಾ, ಅವರ ಪ್ರಧಾನ ಆಸಕ್ತಿ ನಿರ್ದೇಶನದತ್ತ ಕೀಲಿಸಿಕೊಂಡಿತ್ತು. ಅಂಥಾದ್ದೊಂದು ಅವಕಾಶವನ್ನು ಟೈಮ್ ಪಾಸ್ ಮೂಲಕ ನಿರ್ದೇಶಕ ಚೇತನ್ ಜೋಡಿದಾರ್ ಕಲ್ಪಿಸಿದ್ದಾರೆ. ಹಾಗೆ ಸಿಕ್ಕ ಅವಕಾಶವನ್ನು ಸರಿಕಟ್ಟಾಗಿ ಬಳಸಿಕೊಂಡ ಆತ್ಮತೃಪ್ತಿ ಮತ್ತು ಹೆಣ್ಣುಮಕ್ಕಳು ವಿರಳವಾಗಿರುವ ವಲಯದಲ್ಲಿ ಕಾರ್ಯನಿರ್ವಹಿಸಿದ ಹೆಮ್ಮೆ ವೈಷ್ಣವಿಯದ್ದು. ವರ್ಷಗಟ್ಟಲೆ ಹಾಕಿದ ಶ್ರಮದಿಂದ ಎಲ್ಲ ವರ್ಗಕ್ಕೂ ರುಚಿಸುವಂತೆ ಟೈಮ್ ಪಾಸ್ ಚಿತ್ರ ಮೂಡಿ ಬಂದಿದೆ ಎಂಬ ಖುಷಿಯೂ ಅವರಲ್ಲಿದೆ.

ಬೆಂಗಳೂರು ಹುಡುಗಿಯಾಗಿರುವ ವೈಷ್ಣವಿ ಬಿಕಾಂ ಪದವೀಧರೆ. ಶಾಲಾ ಕಾಲೇಜು ದಿನಗಳಲ್ಲಿಯೇ ನಟನೆಯ ಗುಂಗು ಹತ್ತಿಸಿಕೊಂಡಿದ್‌ದ ಅವರು, ಓದು ಮುಗಿಯುತ್ತಲೇ ರಂಗಭೂಮಿ ತಂಡಗಳೊಂದಿಗೆ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು. ಅಲ್ಲಿಯೂ ಕೂಡಾ ಬರೀ ನಟನೆಗೆ ಮಾತ್ರವೇ ಸೀಮಿತವಾಗದೆ ಎಲ್ಲ ವಿಭಾಗಗಳನ್ನೂ ಅರಗಿಸಿಕೊಳ್ಳಲು ಪ್ರಯತ್ನಿಸಿದ್ದರು. ಹೀಗೆ ರಂಗಭೂಮಿಯಲ್ಲಿ ಒಂದಷ್ಟು ಕಾಲ ಪಳಗಿಕೊಂಡ ನಂತರ ಧಾರಾವಾಹಿಗಳತ್ತ ವಾಲಿಕೊಂಡ ವೈಷ್ಣವಿ ಪಾಲಿಗೆ ಕಲರ್ಸ್ ಮತ್ತು ಜೀ ಕನ್ನಡ ವಾಹಿನಿಗಳ ಜನಪ್ರಿಯ ಧಾರಾವಾಹಿಗಳಲ್ಲಿ ಗುರುತಾಗುವಂಥಾ ಪಾತ್ರಗಳು ಸಿಕ್ಕಿದ್ದವು. ಪ್ರಿಯಾಂಕಾ ಉಪೇಂದ್ರ ನಟಿಸಿರುವ, ಇನ್ನಷ್ಟೇ ಬಿಡುಗಡೆಗೊಳ್ಳಬೇಕಿರುವ ಕತೃ ಕ್ರಿಯಾ ಕರ್ಮ ಚಿತ್ರದಲ್ಲಿಯೂ ಆಕೆ ನಟಿಸಿದ್ದಾರೆ. ಸ್ಲೋಗನ್ ಚಿತ್ರದಲ್ಲಿಯೂ ಮುಖ್ಯ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಹೀಗೆ ನಟಿಯಾಗಿ ಚಿಗುರಿಕೊಳ್ಳುತ್ತಿದ್ದ ವೈಷ್ಣವಿ ಪಾಲಿಗೆ ಟೈಮ್ ಪಾಸ್ ಚಿತ್ರ ರೂಪಾಂತರವಿದ್ದಂತೆ. ಇದರ ಮೂಲಕ ತನ್ನ ವೃತ್ತಿ ಬದುಕು ಮತ್ತೊಂದು ಬಗೆಯಲ್ಲಿ ಟಿಸಿಲೊಡೆಯಹುವ, ಗೆಲುವು ದಕ್ಕುವ ನಿರೀಕ್ಷೆ ವೈಷ್ಣವಿ ಅವರದ್ದು!

The post Timepass Kannada Movie: ವೈಷ್ಣವಿ ವೃತ್ತಿ ಬದುಕಲ್ಲಿ ಹೀಗೊಂದು ರೂಪಾಂತರ! appeared first on Cini Shodha.

ನಿರ್ದೇಶಕನಾಗಬೇಕೆಂಬ ಬಯಕೆಯನ್ನು ಜೀವಮಾನದ ಗುರಿಯಾಗಿಟ್ಟುಕೊಂಡಿದ್ದವರು ರಾಜೀವ್ ಗಣೇಸನ್. ಸಿನಿಮಾ ರಂಗದಲ್ಲಿ ಇಂಥಾ ಗುರಿಗಳನ್ನಿಟ್ಟುಕೊಂಡು ಏಕಾಏಕಿ ಸಾಧಿಸಿ ಬಿಡಲಾಗೋದಿಲ್ಲ. ಅಂಥಾ ಅವಕಾಶ ಒಂದಷ್ಟು ಮಂದಿಗೆ ಮಾತ್ರವೇ ಸಿಗುತ್ತದೆ. ಸಿನಿಮಾ ಜಗತ್ತಿನ ಯಾವ ವಿಭಾಗದಲ್ಲಿ ಕೆಲಸ ಮಾಡುವ ಅವಕಾಶ ಸಿಕ್ಕರೂ ಕೂಡಾ, ಆ ಹಾದಿ ತನ್ನನ್ನು ಗಮ್ಯದತ್ತ ಕೊಂಡೊಯ್ಯುತ್ತದೆಂಬ ಗಾಢ ನಂಬಿಕೆಯೊಂದು ರಾಜೀವ್ ಮನಸಲ್ಲಿತ್ತು. ಆ ಕಾರಣದಿಂದಲೇ ಬದುಕು ಎತ್ತ ಹೊಯ್ದಾಡಿಸಿದರೂ, ಸಿಕ್ಕ ಜವಾಬ್ದಾರಿಯನ್ನೇ ಅತ್ಯಂತ ಅಚ್ಚುಟಾಗಿ ನಿಭಾಯಿಸುವ ಗುಣವನ್ನವರು ಬೆಳೆಸಿಕೊಂಡಿದ್ದರು. ಅಂಥಾ ಮನಃಸ್ಥಿತಿಯ ಕಾರಣದಿಂದಲೇ ಅವರು ಟೈಮ್ ಪಾಸ್ ಚಿತ್ರದ ನಿರ್ದೇಶಕ ಚೇತನ್ ಜೋಡಿದಾರ್ ಅವರ ಗಮನ ಸೆಳೆದು, ಈ ಸಿನಿಮಾದ ಛಾಯಾಗ್ರಾಹಕರಾಗುವ ಅವಕಾಶವನ್ನು ಪಡೆದುಕೊಂಡಿದ್ದರು.

ರಾಗಿಣಿ ದ್ವಿವೇದಿ ನಾಯಕಿಯಾಗಿ ನಟಿಸಿರುವ `ಸಾರಿ ಕರ್ಮ ರಿಟರ್ನ್ಸ್’ ಚಿತ್ರದ ಛಾಯಾಗ್ರಾಹಕರಾಗಿ ರಾಜೀವ್ ಕಾರ್ಯನಿರ್ವಹಿಸುತ್ತಿದ್ದರು. ಆ ಸಿನಿಮಾ ಮೂಲಕ ಮೊದಲ ಬಾರಿಗೆ ರಾಜೀವ್ ಮೋಷನ್ ಕ್ಯಾಪ್ಚರ್ ಎಂಬ ಪ್ರಯೋಗ ನಡೆಸಿದ್ದರು. ಈ ಮೂಲಕ ಭಾರತೀಯ ಚಿತ್ರರಂಗದಲ್ಲಿಯೇ ರಾಜೀವ್ ಪ್ರಯೋಗ ಮೊದಲನೆಯದ್ದೆನ್ನಿಸಿಕೊಂಡಿದೆ. ಆ ಸಿನಿಮಾ ಇನ್ನೇನು ಬಿಡುಗಡೆಗೊಳ್ಳಲಿದೆ. ಸದರಿ ಚಿತ್ರದ ಚಿತ್ರೀಕರಣ ನಡೆಯುತ್ತಿದ್ದಾಗ ಆ ಸೆಟ್ಟಿಗೆ ನಿರ್ದೇಶಕ ಚೇತನ್ ಜೋಡಿದಾರ್ ಭೇಟಿ ಕೊಟ್ಟಿದ್ದರಂತೆ. ಆ ಸಂದರ್ಭದಲ್ಲಿ ರಾಜೀವ್ ಅವರನ್ನು ಸಂಪರ್ಕಿಸಿದ ಚೇತನ್ ಅವರು ಟೈಮ್ ಪಾಸ್ ಚಿತ್ರದ ಬಗ್ಗೆ ಮಾತಾಡಿದ್ದರು. ಈ ಮೂಲಕ ರಾಜೀವ್ ಗಣೇಸನ್ ಟೈಮ್ ಪಾಸ್ ಚಿತ್ರದ ಛಾಯಾಗ್ರಾಹಕರಾಗಿ ಅಖಾಡಕ್ಕಿಳಿದಿದ್ದರು.

ಆರಂಭದಲ್ಲಿಯೇ ಚೇತನ್ ಅವರು ಇಂಚಿಂಚನ್ನೂ ವಿವರಿಸಿ ಕಥೆ ಹೇಳಿದ ರೀತಿಯೇ ರಾಜೀವ್ ಅವರಿಗೆ ಹಿಡಿಸಿತ್ತಂತೆ. ಅಷ್ಟಕ್ಕೂ ಚೇತನ್ ಅವರೊಂದಿಗೆ ರಾಜೀವ್ ಗೆಳೆತನಕ್ಕೆ ಅದಾಗಲೇಢ ಮೂರು ವರ್ಷ ಕಳೆದಿತ್ತು. ಆ ಸ್ನೇಹ ಸದರಿ ಸಿನಿಮಾದ ಮೂಲಕ ಮತ್ತಷ್ಟು ಗಾಢವಾಗಿದೆ. ಆರಂಭದಲ್ಲಿ ಕಥೆ ಹೇಳಿದ ನಂತರ ಒಂದು ವರ್ಷ ಕಳೆದ ನಂತರ ಮತ್ತೆ ಚೇತನ್ ಕಡೆಯಿಂದ ಕರೆ ಬಂದಿದ್ದೇ ಟೈಮ್ ಪಾಸ್ ಚಿತ್ರೀಕರಣ ಚಾಲೂ ಆಗಿತ್ತು. ಆ ನಂತತರದಲ್ಲಿ ಚಿತ್ರೀಕರಣದ ಹಂತದಲ್ಲಿ ಏನೇ ಸಲಹೆ ಸೂಚನೆ ನೀಡಿದರೂ ಕಡೆಗಣಿಸದೆ, ಎಲ್ಲರನ್ನೂ ಒಳಗೊಂಡು ಸಾಗುವ ಚೇತನ್ ಜೋಡಿದಾರ್ ನಿರ್ದೇಶನದ ಶೈಲಿ ರಾಜೀವ್‌ರನ್ನು ಸೆಳೆದುಕೊಂಡಿದೆ. ಈ ಚಿತ್ರದ ಮೂಲಕವೇ ತಮ್ಮ ಕನಸಿನ ಪಯಣಕ್ಕೆ ಮತ್ತಷ್ಟು ಕಸುವು ಸಿಗಲಿದೆಯೆಂಬ ಭರವಸೆಯೂ ಅವರಲ್ಲಿದೆ.

ಬಿಎಸ್‌ಸಿ ಪದವಿ ಪೂರೈಸಿಕೊಂಡ ಕ್ಷಣದಿಂದಲೇ ರಾಜೀವ್ ಗಣೇಸನ್ ಪಾಲಿಗೆ ನಿರ್ದೇಶನವೇ ಬದುಕಿನ ಉದ್ದೇಶವಾಗಿತ್ತು. ಆದರೆ ಅನಿವಾರ್ಯತೆಗಳಿಗೆ ವಶವಾಗಿ ೨೦೦೮ರಲ್ಲಿ ಕಾಲೇಜೊಂದರಲ್ಲಿ ವಿಎಫ್‌ಎಕ್ಸ್ ಬಗೆಗೆ ಬೋಧಿಸುವ ಕೆಲಸವನ್ನು ಆರಂಭಿಸಿದ್ದರು. ನಾಲಕ್ಕು ವರ್ಷ ಅದರಲ್ಲಿ ಮುಂದುವರೆದ ರಾಜೀವ್ ತನ್ನ ಕನಸಿನತ್ತ ಹೊರಳಿಕೊಂಡು, ಖ್ಯಾತ ನಿರ್ದೇಶಕ ನಾಗಾಭರಣರ ಪುತ್ರ ಪನ್ನಗ ಭರಣ ನಿರ್ದೇಶನದ ಸಿನಿಮಾದಲ್ಲಿ ಸಹಾಯಕ ನಿರ್ದೇಶನದ ಅವಕಾಶ ಪಡೆದುಕೊಂಡಿದ್ದರು. ಕಾರಣಾಂತರಗಳಿಂದ ಆ ಸಿನಿಮಾ ಟೇಕಾಫ್ ಆಗಲಿಲ್ಲ. ನಂತರ ಅದೇ ವರ್ಷ ಸಿನಿಮಾ ಶಾಲೆ ಸೇರಿಕೊಂಡು, ಒಂದಷ್ಟು ಪಟ್ಟುಗಳನ್ನೂ ರಾಜೀವ್ ಕರಗತ ಮಾಡಿಕೊಂಡಿದ್ದರು.

ಕಡೆಗೂ ಒಂದಷ್ಟು ಒಲವಿದ್ದ ಸಿನಿಮಾಟೋಗ್ರಫಿಯತ್ತ ವಾಲಿಕೊಂಡ ಅವರಿಗೆ ಒಂದಷ್ಟು ಅವಕಾಶಗಳು ಒಲಿದು ಬರಲಾರಂಭಿಸಿದ್ದವು. ಸದ್ಯದ ಮಟ್ಟಿಗೆ ಅವರು ಛಾಯಾಗ್ರಾಹಕರಾಗಿ ಕೆಲಸ ಮಾಡಿರುವ ಒಂದಷ್ಟು ಸಿನಿಮಾಗಳು ಬಿಡುಗಡೆಯ ರೇಸಿನಲ್ಲಿವೆ. ಅದೆಲ್ಲರ ನಡುವೆ ಟೈಮ್ ಪಾಸ್ ಚಿತ್ರ ಇದೇ ಅಕ್ಟೋಬರ್ ೧೭ರಂದು ತೆರೆಗಾಣುತ್ತಿದೆ. ಈ ಸಿನಿಮಾವನ್ನು ನಿರ್ದೇಶಕರು ಕಟ್ಟಿ ಕೊಟ್ಟಿರುಜವ ಬಗೆ, ಅದಕ್ಕೆ ಕಲಾವಿದರು ಜೀವ ತುಂಬಿರುವ ರೀತಿಗಳ ಬಗ್ಗೆ ರಾಜೀವ್ ಅವರಲ್ಲೊಂದು ಬೆರಗಿದೆ. ಟೈಮ್ ಪಾಸ್ ಪ್ರೇಕ್ಷಕರಿಗೆ ಹಿಡಿಸುತ್ತದೆಂಬಂಥಾ ಭರವಸೆಯೂ ಇದೆ. ಈ ಸಿನಿಮಾದ ನಂತರ ಅವಕಾಶ ಸಿಕ್ಕರೆ ಮೆಲ್ಲಗೆ ನಿರ್ದೇಶನದತ್ತ ಹೊರಡುವ ಆಲೋಚನೆ ರಾಜೀವ್‌ರದ್ದು. ಒಟ್ಟಾರೆಯಾಗಿ, ಓರ್ವ ಛಾಯಾಗ್ರಾಹಕನಾಗಿ ಟೈಮ್ ಪಾಸ್ ತನ್ನ ವೃತ್ತಿ ಬದುಕಿನ ಮಹತ್ವದ ಚಿತ್ರವೆಂಬ ಭಾವ ಅವರೊಳಗಿದೆ. ಮೂಲತಃ ತಮಿಳುನಾಡಿನವರಾದರೂ ಅಲ್ಲಿನ ಕನ್ನಡದ ನಂಟಿನ ಕುಟುಂಬದಿಂದ ಬಂದವರು ರಾಜೀವ್. ಕಲೆಗೆ ಭಾಷೆಯ ಹಂಗಿಲ್ಲ ಎಂಬ ಸಿದ್ಧಾಂತ ಹೊಂದಿರುವ ಅವರೀಗ ಕನ್ನಡ ಚಿತ್ರರಂಗದ ಭಾಗವಾಗಿದ್ದಾರೆ!

The post Time pass Kannada Movie: ಸಿನಿಮಾ ಧ್ಯಾನಕ್ಕೆ ಭಾಷೆಯ ಹಂಗಿಲ್ಲ! appeared first on Cini Shodha.

ಅಪ್ಪಟ ಬೆಂಗಳರು ಹುಡುಗ ಇಮ್ರಾನ್ ಪಾಷ ಸರಿಸುಮಾರು ಹದಿನಾಲಕ್ಕು ವರ್ಷಗಳಿಂದ ರಂಗಭೂಮಿಯಲ್ಲಿ ಸಕ್ರಿಯರಾಗಿ ತೊಡಗಿಸಿಕೊಂಡಿರುವವರು. ಖ್ಯಾತ ರಂಗಕರ್ಮಿ ಎಂ.ಎಸ್ ಸತ್ಯು ಮತ್ತು ಎಂ.ಸಿ ಆನಂದ್ ಅವರ ಗರಡಿಯಲ್ಲಿ ಪಳಗಿಕೊಂಡಿದ್ದ ಪಾಷಾ, ಇದೀಗ ತಮ್ಮದೇ ತಂಡ ಕಟ್ಟಿಕೊಂಡು ಹಿಂದಿ, ಇಂಗ್ಲಿಷ್ ನಾಟಕಗಳತ್ತಲೂ ತಮ್ಮ ಪರಿಧಿಯನ್ನು ವಿಸ್ತರಿಸಿಕೊಂಡಿದ್ದಾರೆ. ಆ ಹಾದಿಯಲ್ಲಿ ಅವರಿಗೆ ಪೂಜಾ ಪಾಂಡೆ ತ್ರಿಪಾಠಿ ಗುರುವಾಗಿ ಸಿಕ್ಕಿದ್ದಾರೆ. ಹೀಗೆ ಸಕ್ರಿಯವಾಗಿ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿರುವ ಇಮ್ರಾನ್ ಪಾಷಾ ಪಾಲಿಗೆ ಆರಂಭದಿಂದಲೂ ವಜ್ರಮುನಿ ಎಂದರೆ ಬಲು ಅಭಿಮಾನ. ವಜ್ರಮುನಿಯವರ ಅಭಿನಯವನ್ನು ಕಣ್ತುಂಬಿಕೊಳ್ಳುತ್ತಲೇ ಸಾಗಿ ಬಂದ ಇಮ್ರಾನ್‌ರೊಳಗೆ ಆ ಕಾರಣದಿಂದಲೇ ಸಿನಿಮಾ ನಟನಾಗುವ ಕನಸು ಟಿಸಿಲೊಡೆದಿತ್ತು.

ಮೂಲತಃ ಸಾಪ್ಟ್‌ವೇರ್ ಇಂಜಿನಿಯರ್ ಆಗಿರುವ ಇಮ್ರಾನ್ ಪಾಷಾ ಆರಂಭದಲ್ಲಿ ಮೂರು ವರ್ಷಗಳ ಕಾಲ ಟಿಸಿಎಸ್ ಕಂಪೆನಿಯಲ್ಲಿ ಕೆಲಸ ಮಾಡಿದ್ದರು. ಆದರೆ, ಅವರ ಒಲವೆಲ್ಲವೂ ಕಲಾಕೇಂದ್ರಿತವಾಗಿದ್ದದ್ದರಿಂದ ಆ ಕ್ಷೇತ್ರದಲ್ಲಿ ಹೆಚ್ಚು ಕಾಲ ಇಕರಲು ಸಾಧ್ಯವಾಗಿರಲಿಲ್ಲ. ಕಡೆಗೂ ಕಲೆಯ ಸೆಳವಿಗೆ ಸಿಕ್ಕು ಕೈತುಂಬಾ ಸಂಪಾದನೆಯಿದ್ದ ಕೆಲಸವನ್ನು ಬಿಟ್ಟು ಬಂದಿದ್ದ ಪಾಷಾ, ರೇಡಿಯೋ ಮಿರ್ಷಿಯಲ್ಲಿ ಸೀನಿಯರ್ ಪ್ರೊಡ್ಯೂಸರ್ ಆಗಿ ಕಾರ್ಯನಿರ್ವಹಿಸಿದ್ದರು. ನಂತರ ನಮ್ ರೇಡಿಯೋದಲ್ಲಿ ಆರ್‌ಜೆ ಆಗಿ ಒಂದಷ್ಟು ವರ್ಷಗಳ ಕಾಲ ಕೆಲಸ ಮಾಡಿದ್ದ ಇಮ್ರಾನ್‌ಗೆ ಒಂದಷ್ಟು ಖ್ಯಾತಿ ಸಿಕ್ಕಿತ್ತು. ಇದಾದ ನಂತರ ತನ್ನ ಬದುಕೇನಿದ್ದರೂ ನಟನೆಗೇ ಅರ್ಪಿತ ಅಂತೊಂದು ನಿರ್ಧಾರ ಮಾಡಿದವರೇ ರಂಗಭೂಮಿಗೆ ಅಡಿಯಿರಿಸಿದ್ದರು.

ರಂಗಭೂಮಿಯ ಜೊತೆ ಜೊತೆಗೇ ಉದಯ ಮ್ಯೂಸಿಕ್ ಚಾನೆಲ್ಲಿನಲ್ಲಿ ಒಂಬತ್ತು ವರ್ಷಗಳ ಕಾಲ ಆಂಕರ್ ಆಗಿಯೂ ಕೆಲಸ ಮಾಡಿದ್ದ ಇಮ್ರಾನ್ ಪಾಶಾ ಜ್ಯೂನಿಯರ್ ಆರ್ಟಿಸ್ಟ್ ಆಗಿ ಅದೃಷ್ಟ ಪರೀಕ್ಷೆಗಿಳಿದಿದ್ದರು. ಈ ಹಾದಿಯಲ್ಲಿ ಲೆಕ್ಕವಿಲ್ಲದಷ್ಟು ಸಿನಿಮಾಗಳಲ್ಲಿ ಸಣ್ಣ ಪುಟ್ಟ ಪಾತ್ರಗಳಲ್ಲಿ ನಟಿಸುತ್ತಾ ಬಂದಿದ್ದ ಇಮ್ರಾನ್ ಪಾಲಿಗೆ ಆ ಹೆಜ್ಜೆಗಳೆಲ್ಲವೂ ಗಮ್ಯವನ್ನು ಹತ್ತಿರಾಗಿಸುತ್ತವೆಂಬ ಭಾವವಿತ್ತು. ಕಡೆ ಕಡೆಗೆ ತನ್ನಿಷ್ಟದಂತೆಯೇ ಮುಖ್ಯವಾದ ಖಳನ ಪಾತ್ರಗಳು ಒಲಿದು ಬರಲಾರಂಭಿಸಿದ್ದವು. ಅಂಥಾ ಗುರುತಿಟ್ಟುಕೊಳ್ಳಬಹುದಾದ ಪಾತ್ರಗಳಲ್ಲಿ ಮೂವತ್ತಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಇಮ್ರಾನ್ ನಟಿಸಿದ್ದಾರೆ. ಈ ನಡುವೆ ನಿರೂಪಕನಾಗಿಯೂ ಕಾರ್ಯನಿರ್ವಹಿಸುತ್ತಿದ್ದ ಇಮ್ರಾನ್‌ರ ವೃತ್ತಿ ಬದುಕು ಮಹತ್ವದ ಘಟ್ಟದತ್ತ ಹೊರಳಿಕೊಂಡಿದ್ದು ಟೈಮ್ ಪಾಸ್ ಚಿತ್ರದಲ್ಲಿ ಕೂಡಿ ಬಂದ ಅವಕಾಶದ ಮೂಲಕ!

ವರ್ಷಗಳ ಹಿಂದೆ ಅದಾಗಲೇ ಟೈಮ್ ಪಾಸ್ ಚಿತ್ರಕ್ಕೆ ತಯಾರಿ ಮಾಡಿಕೊಂಡಿದ್ದ ಚೇತನ್ ಜೋಡಿದಾರ್ ನಾಟಕವೊಂದನ್ನು ನೋಡಲು ಹೋಗಿದ್ದರು. ಆ ನಾಟಕದಲ್ಲಿ ಪಾತ್ರವೊಂದನ್ನು ನಿರ್ವಹಿಸಿದ್ದ ಇಮ್ರಾನ್‌ರನ್ನು ಕಂಡು ಮಾತಾಡಿಸಿದ್ದರಂತೆ. ಬಳಿಕ ಈ ಸಿನಿಮಾ ಬಗ್ಗೆ ಮಾತಾಡಿದ್ದ ಚೇತನ್ ಜೋಡಿದಾರ್, ಸಹ ನಿರ್ದೇಶಕಿ ವೈಷ್ಣವಿ ಮೂಲಕ ಕಥಾ ಹಂದರವನ್ನು ವಿವರಿಸಿದ್ದರು. ಅದಾಗಿ ಒಂದಷ್ಟು ಕಾಲ ನೀರವ ವಾತಾವರಣವಿತ್ತು. ಕಡೆಗೂ ಅಚಾನಕ್ಕಾಗಿ ಕರೆ ಮಾಡಿದ್ದ ಚೇತನ್ ಅವರು ಮುಖ್ಯ ಪಾತ್ರದಲ್ಲಿ ನಟಿಸಲು ಹೇಳಿದಾಗ ಇಮ್ರಾನ್‌ಗೆ ಖುಷಿ ಮತ್ತು ಭಯ ಒಟ್ಟೊಟ್ಟಿಗೇ ಕಾಡಿತ್ತಂತೆ. ಆದರೂ, ಅದಾಗಿಯೇ ಒಲಿದು ಬಂದ ಅವಕಾಶವನ್ನು ಸಂಪೂರ್ಣವಾಗಿ ಬಳಸಿಕೊಳ್ಳುವ ಸಂಕಲ್ಪದೊಂದಿಗೆ ಇಮ್ರಾನ್ ಟೈಮ್ ಪಾಸ್ ಭಾಗವಾಗಿದ್ದರು.

ಡಾರ್ಕ್ ಕಾಮಿಡಿ ಜಾನರಿನ ಈ ಸಿನಿಮಾದಲ್ಲಿ ಶಂಕರ್ ಎಂಬ ಮುಖ್ಯ ಪಾತ್ರಕ್ಕೆ ಇಮ್ರಾನ್ ಪಾಷಾ ಜೀವ ತುಂಬಿದ್ದಾರೆ. ಆ ಪಾತ್ರದ ಚಹರೆಗಳನ ನು ಒಳಗಿಳಿಸಿಕೊಂಡು, ಅದಕ್ಕಾಗಿ ಒಂದಷ್ಟು ತಾಲೀಮು ನಡೆಸಿಯೇ ಇಮ್ರಾನ್ ಬಣ್ಣ ಹಚ್ಚಿದ್ದಾರೆ. ನಿರ್ದೇಶಕನಾಗೋ ಕನಸು ಹೊತ್ತು ಸಾಗುವ ಆ ಪಾತ್ರದಲ್ಲಿ ಉತ್ಕಟವಾಗಿ ಹಬ್ಬಿಕೊಂಡಿರುವ ಸಿನಿಮಾ ಧ್ಯಾನಕ್ಕೂ, ತಗನ್ನೊಳಗಿನ ಸಿನಿಮಾ ಪ್ರೇಮಕ್ಕೂ ಸಾಮ್ಯತೆಗಳಿವೆ ಎನ್ನುವ ಇಮ್ರಾನ್‌ಗೆ, ಈ ಪಾತ್ರದ ಮೂಲಕವೇ ತನ್ನ ಕನಸಿನ ಹಾದಿ ಸುಗಮವಾಗುತ್ತದೆಂಬ ಭರವಸೆಯಿದೆ. ಈ ಸಿನಿಮಾದಲ್ಲಿ ಮುಖ್ಯ ಪಾತ್ರ ಸಿಕ್ಕರೂ ಕೂಡಾ, ಮುಂದೆ ಕೂಡಾ ಅಂಥಾದ್ದೇ ಪಾತ್ರಗಳು ಬೇಕೆಂಬ ಇಂಗಿತ ಅವರಲ್ಲಿಲ್ಲ. ಪಾತ್ರ ಯಾವುದಾದರೂ ಸರಿ; ಒಳ್ಳೆ ನಟನಾಗಿ ನೆಲೆಗಾಣಬೇಕೆಂಬುದು ಇಮ್ರಾನ್‌ರ ಏಕಮಾತ್ರ ಆಸೆ.

ಮೊದಲೇ ಹೇಳಿದಂತೆ ವಜ್ರಮುನಿಯ ಖಟ್ಟರ್ ಭಕ್ತನಾಗಿರುವ ಇಮ್ರಾನ್‌ಗೆ ನೆಗೆಟಿವ್ ರೋಲ್‌ಗಳತ್ತಲೇ ಹೆಚ್ಚು ಒಲವಿದೆ. ಈಗಾಗಲೇ ಅವರು ನಟಿಸಿರುವ ಮತ್ತೊಂದಷ್ಟು ಸಿನಿಮಾಗಳೂ ಕೂಡಾ ಬಿಡುಗಡೆಯ ಹಾದಿಯಲ್ಲಿವೆ. ಟೈಮ್ ಪಾಸ್ ಚಿತ್ರದ ಬಗ್ಗೆ ಅವರೊಳಗೆ ಗಾಢವಾದ ನಿರೀಕ್ಷೆಗಳಿದ್ದಾವೆ. ಅಪರಿಚಿತನಾಗಿದ್ದ ತನಗೆ ಈ ಚಿತ್ರದಲ್ಲಿ ಮುಖ್ಯ ಪಾತ್ರ ಕೊಟ್ಟು ಪ್ರೋತ್ಸಾಹಿಸಿದ, ಮಾಶರ್ಗದರ್ಶನ ನೀಡಿದ ಚೇತನ್ ಜೋಡಿದಾರ್ ಮತ್ತು ಸಾಥ್ ಕೊಟ್ಟ ಚಿತ್ರತಂಡದ ಬಗ್ಗೆ ಕೃತಜ್ಞತಾ ಭಾವವಿದೆ. ಅಂತೂ ಟೈಮ್ ಪಾಸ್ ಮೂಲಕ ಇಮ್ರಾನ್ ಪಾಷಾ ಚಿತ್ರರಂಗದಲ್ಲಿ ಗಟ್ಟಿಯಾಗಿ ನೆಲೆ ಕಂಡುಕೊಳ್ಳುವ ಸೂಚನೆಗಳು ದಟ್ಟವಾಗಿವೆ.

The post Timepass Kannada Movie: ರಂಗಭೂಮಿ ಪ್ರತಿಭೆಗೆ ದಕ್ಕಿದ ಚೆಂದದ ಪಾತ್ರ! appeared first on Cini Shodha.

ಇದೀಗ ಒಂದಷ್ಟು ಸಿನಿಮಾಗಳ ಭಾಗವಾಗಿರುವ ಅಥರ್ವ ಪ್ರಕಾಶ್ ಮಂಗಳೂರು ಸೀಮೆಯವರು. ಕಲೆಯ ವಾತಾವರಣದಲ್ಲಿಯೇ ಬೆಳೆದಿದ್ದ ಅವರ ಪಾಲಿಗೆ ಹದಿನಾರನೇ ವಯಸ್ಸಿನಲ್ಲಿಯೇ ಒಂದೊಳ್ಳೆ ಅವಕಾಶ ಕೂಡಿ ಬಂದಿತ್ತು. ತುಳುವಿನಲ್ಲಿ ಸೂಪರ್ ಹಿಟ್ ಆಗಿದ್ದ, ಐನೂರು ದಿನಗಳ ಕಾಲ ಯಶಸ್ವೀ ಪ್ರದರ್ಶನ ಕಂಡಿದ್ದ ಚಾಲಿ ಪೋಲಿಲು ಚಿತ್ರದಲ್ಲಿ ನಟಿಸುವ ಅವಕಾಶವೊಂದು ಅಥರ್ವಗೆ ಸಿಕ್ಕಿತ್ತು. ಆ ಚಿತ್ರದಲ್ಲಿ ಬಾಲ ನಟನಾಗಿ, ನಾಯಕನ ಬಾಲ್ಯದ ಪಾತ್ರಕ್ಕೆ ಜೀವ ತುಂಬಿದ್ಧ ಅಥರ್ವ ಪಾಲಿಗೆ ಆ ದಿನಗಳಿಂದಲೇ ನಟನಾಗಿ ಬೆಳೆದು ನಿಲ್ಲುವ ಹಂಬಲವಿತ್ತು. ಆ ನಂತರದಲ್ಲಿ ಓದಿನ ನಡುವೆಯೇ ನಟನಾಗೋ ತಾಲೀಮು ನಡೆಸುತ್ತಾ ಬಂದು, ಇದೀಗ ಎಂಥಾ ಸವಾಲಿನ ಪಾತ್ರವನ್ನಾದರೂ ಸಲೀಸಾಗಿ ನಿಭಾಯಿಸುವ ಕಸುವು ತುಂಬಿಕೊಂಡಿರೋದು ಅಥರ್ವನ ಹೆಚ್ಚುಗಾರಿಕೆ.

ಹೀಗೆ ತುಳು ಚಿತ್ರರಂಗದಲ್ಲಿ ದೇವದಾಸ್ ಕಾಪಿಕಾಡ್, ಶೋಭರಾಜ್ ಮುಂತಾದ ನಿರ್ದೇಶಕರ ಗರಡಿಯಲ್ಲಿ ನಟನಾಗಿ ಪಳಗಿಕೊಂಡಿದ್ದ ಅಥರ್ವ ಕನ್ನಡಕ್ಕೆ ಅಡಿಯಿರಿಸಿದ್ದದ್ದು ಪಿಆರ್‌ಕೆ ಪ್ರೊಡಕ್ಷನ್ಸ್ ಮೂಲಕ. ನವ ಪ್ರತಿಭೆಗಳಿಗೆ ಅವಕಾಶ ಕಲ್ಪಿಸಿ ಪ್ರೋತ್ಸಾಹಿಸುತ್ತಾ ಬಂದಿದ್ದ ಪುನೀತ್ ರಾಜ್ ಕುಮಾರ್ ತನ್ನ ಬ್ಯಾನರ್ ಮೂಲಕ ಮ್ಯಾ ಆಫ್ ದ ಮ್ಯಾಚ್ ಎಂಬ ಚಿತ್ರವನ್ನು ನಿರ್ಮಾಣ ಮಾಡಿದ್ದರು. ಆ ಚಿತ್ರದ ಮೂಲಕ ಅಥರ್ವ ಕನ್ನಡ ಸಿನಿಮಾಭಿಮಾನಿಗಳನ್ನು ನಾಯಕ ನಟನಾಗಿ ಮುಖಾಮುಖಿಯಾಗಿದ್ದರು. ಚೇತನ್ ಮುಂಡಾಡಿ ಜನಿರ್ದೇಶನದ ಭಾವಪೂರ್ಣ ಚಿತ್ರದಲ್ಲಿಯೂ ಪ್ರಧಾನ ಪಾತ್ರವನ್ನು ನಿರ್ವಹಿಸಿ ಸೈ ಅನ್ನಿಸಿಕೊಂಡಿದ್ದರು. ಅದಾದ ನಂತರ ಮತ್ತೆ ಸತ್ಯಪ್ರಕಾಶ್ ಸಾರಥ್ಯದ ಎಕ್ಸ್ ಆಂಡ್ ರೇ ಸಿನಿಮಾ ಮೂಲಕ ಮತ್ತೆ ನಾಯಮಕನಾಗಿ ಗಮನ ಸೆಳೆದುಕೊಂಡಿದ್ದಾರೆ.

ಕಣ್ಣಾಮುಚ್ಚೆ ಕಾಡೇಗೂಡೆ ಎಂಬ ಚಿತ್ರದಲ್ಲಿಯೂ ನಾಯಕನಾಗಿ ನಟಿಸಿದ್ದ ಅಥರ್ವ ನಾನ್‌ವೆಜ್ ಅಂತೊಂದು ಚಿತ್ರದಲ್ಲಿಯೂ ನಟಿಸಿದ್ದಾರೆ. ಆ ಸಿನಿಮಾ ಮುಂದಿನ ತಿಂಗಳು ತೆರೆಗಾಣುವ ಸಾಧ್ಯತೆಗಳಿದ್ದಾವೆ. ಇದೀಗ ತುಳು ಮತ್ತು ಕನ್ನಡದಲ್ಲಿ ಏಕಕಾಲದಲ್ಲಿ ನಿರ್ಮಾಣಗೊಳ್ಳಲಿರುವ ಚಿತ್ರಕ್ಕಾಗಿ ತಯಾರಿ ಆರಂಭವಾಗಿದೆ. ವಿಶೇಷವೆಂದರೆ, ಪೃಥ್ವಿ ಅಂಬಾರ್ ಆ ಸಿನಿಮಾವನ್ನು ನಿರ್ದೇಶನ ಮಾಡಲಿದ್ದಾರೆ. ಮೂಲತಃ ಆರ್ಕಿಟೆಕ್ಟ್ ಆಗಿರುವ ಅಥರ್ವ ಪಾಲಿಗೆ ಮೊದಲು ಸಿನಿಮಾ ಮೋಹ ಶುರುವಾದದ್ದು ಮೋಹನ್ ಲಾಲ್ ಅಭಿನಯದ ಸಿನಿಮಾ ಮೂಲಕ. ಅದರೊಂದಿಗೆ ಸಿನಿಮಾ ಸೆಳೆತಕ್ಕೆ ಬಿದ್ದಿದ್ದ ಅಥರ್ವ, ಕಾಲೇಜು ದಿನಗಳಲ್ಲಿ ತಮ್ಮ ಮಿತಿಯಲ್ಲಿಯೇ ಒಂದಷ್ಟು ತಯಾರಿ, ಪ್ರಯೋಗಗಳನ್ನು ಮಾಡಿದ್ದರು. ಕಡೆಗೂ ಕನಸಿನ ಹಾದಿಯಲ್ಲಿ ಕಾಲೂರಿ ನಿಂತಿರುವ ಅವರೀಗ ಕನ್ನಡ ಮತ್ತು ತುಳುವಿನಲ್ಲಿ ಬಹು ಬೇಡಿಕೆಯ ನಟನಾಗಿ ಹೊರಹೊಮ್ಮಿದ್ದಾರೆ…

The post atharva prakash: ತುಳು-ಕನ್ನಡದಲ್ಲಿ ಅಥರ್ವ ಪ್ರಕಾಶ್ ಸಿನಿಮಾ ಯಾನ! appeared first on Cini Shodha.

ಬಿಳಿಗಿರಿರಂಗನ ಬೆಟ್ಟದ ತಪ್ಪಲಿನ ಪ್ರಾಕೃತಿಕ ದೈವೀಕ ವಾತಾವರಣದಲ್ಲಿ ಬೆಳೆದವರು ರಾಕ್ ರಘು. ಆರಂಭದಿಂದಲೂ ಸಿನಿಮಾ ಬಗೆಗೊಂದು ಸಹಜವಾದ ಆಕರ್ಷಣೆಯಿಟ್ಟುಕೊಂಡಿದ್ದ ರಘು ಪಾಲಿಗೆ ನಟನಾಗಬೇಕೆಂಬ ಆಸೆಯೇನೂ ಇರಲಿಲ್ಲ. ಬೆಟ್ಟದ ಇಕ್ಕೆಲದಲ್ಲಿ ತಲೆಮಾರುಗಳ ಹಿಂದಿನಿಂದಲೂ ಅವರ ಅಸ್ತಿತ್ವವಿತ್ತು. ಅಲ್ಲಿಯೇ ಒಂದು ಸಣ್ಣ ಹೊಟೇಲು ಒಂದಿಡೀ ರಘು ಕುಟುಂಬದ ಜೀವನಾಧಾರವಾಗಿತ್ತು. ಅದನ್ನೇ ನೆಚ್ಚಿಕೊಂಡು ಬದುಕುತ್ತಿದ್ದ ಈತನ ಬದುಕಿನಲ್ಲಿ ಅನಿರೀಕ್ಷಿತ ಅವಘಡವೊಂದು ನಡೆದದ್ದು ೨೦೧೩ರಲ್ಲಿ. ಅದಾಗ ತಾನೇ ಹೊಸತಾಗಿ ಕಾರು ತೆಗೆದುಕೊಂಡಿದ್ದ ರಘು ಭೀಕರ ಅಪಘಾತಕ್ಕೀಡಾಗಿದ್ದರು. ಗಂಭೀರವಾಗಿ ಗಾಯಗೊಂಡ ಕಾರಣದಿಂದ ಒಂದು ವರ್ಷಗಳ ಕಾಲ ಮನೆಯಲ್ಲಿಯೇ ವಿಶ್ರಾಂತಿ ತೆಗೆದುಕೊಳ್ಳಲು ವೈದ್ಯರು ಸೂಚಿಸಿದ್ದರು.

ಹಾಗೆ ಅಪಘಾತಕ್ಕೀಡಾಗಿ ಹಾಸಿಗೆಗೆ ಒರಗಿದ್ದ ರಘು ಪಾಲಿಗಾಗ ಟಿವಿಯೇ ಜಗತ್ತು. ಆ ಕಾಲಕ್ಕೆ ಆಂಡ್ರಾಯ್ಡ್ ಫೋನುಗಳಾಗಲಿ, ಈಗಿನಂತೆ ಇಂಟರ್ನೆಟ್ ಆಗಲಿ ಅಷ್ಟಾಗಿ ಪ್ರವರ್ಧಮಾನಕ್ಕೆ ಬಂದಿರಲಿಲ್ಲ. ಆ ಹಂತದಲ್ಲಿ ಹಲವಾರು ಸಿನಿಮಾಗಳನ್ನು ನೋಡುತ್ತಾ, ಹಾಸ್ಯ ನಟನೆಯತ್ತ ರಘು ಮನಸು ವಾಲಿಕೊಂಡಿತ್ತು. ಬುಲೆಟ್ ಪ್ರಕಾಶ್ ಥರದ ನಟರನ್ನು ನೋಡುತ್ತಾ, ತಾನೂ ಕೂಡಾ ಅದೇ ರೀತಿಯಲ್ಲಿ ಜನರನ್ನು ರಂ ಜಿಸಬೇಕೆಂಬ ಆಕಾಂಕ್ಷೆಯೊಂದು ರಘು ಮನಸಲ್ಲಿ ಮೊಳಕೆಯೊಡೆಯಲಾರಂಭಿಸಿತ್ತು. ಸಾಮಾನ್ಯವಾಗಿ ಹೀಗೆ ಅನಾರೋಗ್ಯದಿಂದಲೋ, ಅಪಘಾತದಿಂದಲೋ ಹಾಸಿಗೆ ಹಿಡಿದ ಸಂದರ್ಭದಲ್ಲಿ ಉತ್ಕಟವಾಗಿ ಹಬ್ಬಿಕೊಳ್ಳುವ ಕನಸೊಂದು ಪವಾಡ ಸದೃಶವಾಗಿ ಹಾಸಿಗೆಯಿಂದ ಎದ್ದು ಕೂರುವಂತೆ ಮಾಡಿಬಿಡೋದಿದೆ. ರಘು ಕೂಡಾ ನಟನಾಗಬೇಕೆಂಬ ಕನಸಿನ ಕಸುವಿನೊಂದಿಗೆ ಆರು ತಿಂಗಳಿಗೆಲ್ಲ ಚೇತರಿಸಿಕೊಂಡು ಬಿಟ್ಟಿದ್ದರು.

ಹಾಗೆ ಚೇತರಿಸಿಕೊಂಡ ಬಳಿಕ ರಘು ನಟನಾಗುವ ಸಲುವಾಗಿ ಗಂಭೀರವಾಗಿ ಪ್ರಯತ್ನಿಸಲಾರಂಭಿಸಿದ್ದರು. ಇದೇ ಹೊತ್ತಿನಲ್ಲಿ ಬಿಆರ್ ಹಿಲ್ಸ್‌ನಲ್ಲಿ ರಾಹಿ ಅಂತೊಂದು ಸಿನಿಮಾದ ಚಿತ್ರೀಕರಣ ನಡೆಯುತ್ತಿತ್ತು. ಗೆಳೆಯರೋರ್ವರ ಕಡೆಯಿಂದ ಈ ವಿಚಾರ ತಿಳಿದ ರಘು ನಿರ್ದೇಶಕ ಗಿರೀಶ್ ಅವರನ್ನು ಭೇಟಿಯಾದಾಗ, ಅಚ್ಚರಿದಾಯಕವಾಗಿ ಆ ಸಿನಿಮಾದ ಹನಾಸ್ಯ ಪಾತ್ರವೊಂದು ಸಿಕ್ಕಿಬಿಟ್ಟಿತ್ತು. ಅದು ನಟನಾಗಿ ರಘು ಪಾಲಿನ ಮೊದಲ ಹೆಜ್ಜೆ. ಆ ನಂತರ ನಿರ್ದೇಶಕ ಮಹೇಶ್ ಸುಖಧರೆ ಬಿಆರ್ ಹಿಲ್ಸ್‌ನ ಐಬಿಗೆ ಬಂದಿದ್ದಾಗ ರಘು ಅವರನ್ನು ಸಂಧಿಸಿ ಅವಕಾಶ ಕೇಳಿದ್ದರಂತೆ. ಆ ಹೊತ್ತಿನಲ್ಲಿ ಉಘೇ ಉಘೇ ಮಾದಪ್ಪ ಎಂಬ ಧಾರಾವಾಹಿ ನಿರ್ದೇಶನ ಮಾಡುತ್ತಿದ್ದ ಸುಖಧರೆ ಅದರಲ್ಲೊಂದು ಪಾತ್ರದಲ್ಲಿ ನಟಿಸೋ ಅವಕಾಶ ಕೊಟ್ಟಿದ್ದರು. ಆ ನಂತರ ಮಹಾದೇವಿ ಎಂಬ ಧಾರಾವಾಹಿಯಲ್ಲಿಯೂ ಒಂದೊಳ್ಳೆ ಪಾತ್ರವೇ ಸಿಕ್ಕಿತ್ತು.

ಅದಾದ ಬಳಿಕ ನಟ ದುನಿಯಾ ವಿಜಯ್ ಅದೊಂದು ಸಲ ಕುಟುಂಬ ಸಮೇತರಾಗಿ ಬಿಆರ್ ಹಿಲ್ಸ್‌ಗೆ ಬಂ ದುಳಿದಿದ್ದರು. ಅವರನ್ನು ಭೇಟಿಯಾದ ರಘುಗೆ ತಮ್ಮ ಚಿತ್ರದಲ್ಲಿ ನಟಿಸಲು ಅವಕಾಶ ಕೊಡೋದಾಗಿ ವಿಜಯ್ ಅಭಯ ಕೊಟ್ಟಿದ್ದರು. ಅದಕ್ಕನುಸಾರವಾಗಿ ಸಲಗ ಚಿತ್ರದಲ್ಲೊಂದು ಪುಟ್ಟ ಪಾತ್ರ ರಘುಗೆ ಸಿಕ್ಕಿತ್ತು. ಆ ನಂತರ ಭೀಮ ಚಿತ್ರದಲ್ಲಿ ಸದಾ ನಾಯಕನ ಜೊತೆಗಿರುವ ಮಹತ್ವದ ಪಾತ್ರದ ಮೂಲಕ ರಾಕ್ ರಘು ಮಿಂಚಿದ್ದರು. ಆ ಸಿನಿಮಾದಲ್ಲಿ ನಟನೆ ಮಾತ್ರವಲ್ಲದೆ, ನಿರ್ದೇಶನ ಸೇರಿದಂತೆ ಎಲ್ಲದರಲ್ಲಿಯೂ ಅನುಭವ ಗಿಟ್ಟಿಸಿಕೊಳ್ಳುವ ಅವಕಾಶವನ್ನು ದುನಿಯಾ ವಿಜಯ್ ಕಲ್ಪಿಸಿದ್ದರು. ಆ ಬಳಿಕ ಪ್ರಸಿದ್ಧ ಕೃಷ್ಣ ನಿರ್ದೇಶನದ, ಕನ್ನಡತಿ ಖ್ಯಾತಿಯ ಕಿರಣ್ ರಾಜ್ ನಾಯಕನಾಗಿ ನಟಿಸಿದ್ದ ಭರ್ಜರಿ ಗಂಡು ಚಿತ್ರದಲ್ಲಿಯೂ ರಘು ನಟಿಸಿದ್ದರು.

ಸದ್ಯ ಅದೇ ಕಿರಣ್ ರಾಜ್ ನಟಿಸಿರುವ ಶೇರ್ ಚಿತ್ರದಲ್ಲೊಂದು ಮಹತ್ವದ ಪಾತ್ರದಲ್ಲಿ ರಾಕ್ ರಘು ನಟಿಸಿದ್ದಾರೆ. ಎಸ್ ಮಹೇಂದರ್ ನಿರ್ದೇಶನದ ಕೊಂಬುಡಕಿ ಚಿತ್ರದಲ್ಲೂ ಅವಕಾಶ ಗಿಟ್ಟಸಿಕೊಂಡಿದ್ದಾರೆ. ವಿಕ್ಕಿ ವರುಣ್ ನಟನೆಯ ಸೈಕೋ ಚಿತ್ರದಲ್ಲೂ ಅವರೊಂದು ಪಾತ್ರವಾಗಿದ್ದಾರೆ. ಅದಲ್ಲದೇ ಮಹೇಶ್ ಸುಖಧರೆ ನಿರ್ದೇಶನದ ರಾಘವೇಂದ್ರ ಮಹಾತ್ಮೆ ಧಾರಾವಾಹಿಯಲ್ಲೂ ಅವರು ನಟಿಸಲಿದ್ದಾರೆ. ಬುರುಡೆ ಬಂಗ್ಲೆ ರಹಸ್ಯ ಬಿಡುಗಡೆಯ ಹಾದಿಯಲ್ಲಿದೆ. ಇನ್ನೇನು ಶುರುವಾಗಲಿರುವ ಗಿಚ್ಚಿಗಿಲಿಗಿಲಿ ಶೋನಲ್ಲಿ ಸಾಧು ಕೋಕಿಲಾ ಮಾರ್ಗದರ್ಶನದಲ್ಲಿ ಮಿಂಚಲು ರಾಕ್ ರಘು ಅಣಿಯಾಗಿದ್ದಾರೆ. ಸದ್ಯ ಆ ಶೋಗಾಗಿನ ತಯಾರಿ ಚಾಲ್ತಿಯಲ್ಲಿದೆ. ಒಟ್ಟಾರೆಯಾಗಿ, ಒಂದು ಅಪಘಾತದ ಆಘಾತದ ನಡುವೆ ನಟನ ಆಗೋ ಕನಸು ಕಂಡ ರಾಕ್ ರಘು ಇದೀಗ ಬಹುಬೇಡಿಕೆಯ ನಟರಾಗಿ ನೆಲೆ ಕಂಡುಕೊಳ್ಳುತ್ತಿದ್ದಾರೆ!

The post rock raghu: ಬಿಳಿಗಿರಿ ರಂಗನ ಬೆಟ್ಟದ ತಪ್ಪಲಿನ ಪ್ರತಿಭೆ! appeared first on Cini Shodha.